੩. ਅਮ੍ਬਟ੍ਠਸੁਤ੍ਤਵਣ੍ਣਨਾ
ਅਦ੍ਧਾਨਗਮਨਵਣ੍ਣਨਾ
੨੫੪. ਅਪੁਬ੍ਬਪਦਵਣ੍ਣਨਾਤਿ ਅਤ੍ਥਸਂਵਣ੍ਣਨਾਵਸੇਨ ਹੇਟ੍ਠਾ ਅਗ੍ਗਹਿਤਤਾਯ ਅਪੁਬ੍ਬਸ੍ਸ ਪਦਸ੍ਸ ਵਣ੍ਣਨਾ ਅਤ੍ਥਵਿਭਜਨਾ. ‘‘ਹਿਤ੍ਵਾ ਪੁਨਪ੍ਪੁਨਾਗਤਮਤ੍ਥ’’ਨ੍ਤਿ (ਦੀ. ਨਿ. ਅਟ੍ਠ. ੧.ਗਨ੍ਥਾਰਮ੍ਭਕਥਾ) ਹਿ ਵੁਤ੍ਤਂ. ਜਨਪਦਿਨੋਤਿ ਜਨਪਦਵਨ੍ਤੋ, ਜਨਪਦਸ੍ਸ ਵਾ ਇਸ੍ਸਰਾ ਰਾਜਕੁਮਾਰਾ ਗੋਤ੍ਤਵਸੇਨ ਕੋਸਲਾ ਨਾਮ. ਯਦਿ ਏਕੋ ਜਨਪਦੋ, ਕਥਂ ਬਹੁਵਚਨਨ੍ਤਿ ਆਹ ‘‘ਰੂਲ਼੍ਹਿਸਦ੍ਦੇਨਾ’’ਤਿ. ਅਕ੍ਖਰਚਿਨ੍ਤਕਾ ਹਿ ਈਦਿਸੇਸੁ ਠਾਨੇਸੁ ਯੁਤ੍ਤੇ ਵਿਯ ਈਦਿਸਲਿਙ੍ਗਵਚਨਾਨਿ ਇਚ੍ਛਨ੍ਤਿ, ਅਯਮੇਤ੍ਥ ਰੂਲ਼੍ਹਿ ਯਥਾ ਅਞ੍ਞਤ੍ਥਪਿ ‘‘ਕੁਰੂਸੁ ਵਿਹਰਤਿ, ਅਙ੍ਗੇਸੁ ਵਿਹਰਤੀ’’ਤਿ ਚ. ਤਬ੍ਬਿਸੇਸਨੇਪਿ ਜਨਪਦ-ਸਦ੍ਦੇ ਜਾਤਿ-ਸਦ੍ਦੇ ਏਕਵਚਨਮੇਵ. ਪੋਰਾਣਾ ਪਨਾਤਿ ਪਨ-ਸਦ੍ਦੋ ਵਿਸੇਸਤ੍ਥਜੋਤਨੋ, ਤੇਨ ਪੁਥੁਅਤ੍ਥਵਿਸਯਤਾਯ ਏਵਞ੍ਚੇਤਂ ਪੁਥੁਵਚਨਨ੍ਤਿ ਵਕ੍ਖਮਾਨਵਿਸੇਸਂ ਜੋਤੇਤਿ. ਬਹੁਪ੍ਪਭੇਦੋ ਹਿ ਸੋ ਪਦੇਸੋ ਤਿਯੋਜਨਸਤਪਰਿਮਾਣਤਾਯ. ਨਙ੍ਗਲਾਨਿਪਿ ਛਡ੍ਡੇਤ੍ਵਾਤਿ ਕਮ੍ਮਪ੍ਪਹਾਨਵਸੇਨ ਨਙ੍ਗਲਾਨਿਪਿ ਪਹਾਯ, ਨਿਦਸ੍ਸਨਮਤ੍ਤਞ੍ਚੇਤਂ. ਨ ਕੇਵਲਂ ਕਸ੍ਸਕਾ ਏਵ, ਅਥ ਖੋ ਅਞ੍ਞੇਪਿ ਮਨੁਸ੍ਸਾ ਅਤ੍ਤਨੋ ਅਤ੍ਤਨੋ ਕਿਚ੍ਚਂ ਪਹਾਯ ਤਤ੍ਥ ਸਨ੍ਨਿਪਤਿਂਸੁ. ‘‘ਸੋ ਪਦੇਸੋ’’ਤਿ ਪਦੇਸਸਾਮਞ੍ਞਤੋ ਵੁਤ੍ਤਂ, ਵਚਨਵਿਪਲ੍ਲਾਸੇਨ ਵਾ, ਤੇ ਪਦੇਸਾਤਿ ਅਤ੍ਥੋ. ਕੋਸਲਾਤਿ ਵੁਚ੍ਚਤਿ ਕੁਸਲਾ ਏਵ ਕੋਸਲਾਤਿ ਕਤ੍ਵਾ.
ਚਾਰਿਕਨ੍ਤਿ ਚਰਣਂ, ਚਰਣਂ ਵਾ ਚਾਰੋ, ਸੋ ਏਵ ਚਾਰਿਕਾ. ਤਯਿਦਂ ਮਗ੍ਗਗਮਨਂ ਇਧਾਧਿਪ੍ਪੇਤਂ, ਨ ਚੁਣ੍ਣਿਕਗਮਨਮਤ੍ਤਨ੍ਤਿ ਆਹ ‘‘ਅਦ੍ਧਾਨਗਮਨਂ ਗਚ੍ਛਨ੍ਤੋ’’ਤਿ. ਤਂ ਵਿਭਾਗੇਨ ਦਸ੍ਸੇਤੁਂ ‘‘ਚਾਰਿਕਾ ਚ ਨਾਮੇਸਾ’’ਤਿਆਦਿ ਵੁਤ੍ਤਂ. ਤਤ੍ਥ ਦੂਰੇਪੀਤਿ ਨਾਤਿਦੂਰੇਪਿ. ਸਹਸਾ ਗਮਨਨ੍ਤਿ ਸੀਘਗਮਨਂ. ਮਹਾਕਸ੍ਸਪਪਚ੍ਚੁਗ੍ਗਮਨਾਦਿਂ ਏਕਦੇਸੇਨ ਵਤ੍ਵਾ ਵਨਵਾਸੀਤਿਸ੍ਸਸਾਮਣੇਰਸ੍ਸ ਵਤ੍ਥੁਂ ਵਿਤ੍ਥਾਰੇਤ੍ਵਾ ਜਨਪਦਚਾਰਿਕਂ ਕਥੇਤੁਂ ‘‘ਭਗਵਾ ਹੀ’’ਤਿਆਦਿ ਆਰਦ੍ਧਂ. ਆਕਾਸਗਾਮੀਹਿ ਏਵ ਸਦ੍ਧਿਂ ਗਨ੍ਤੁਕਾਮੋ ‘‘ਛਲ਼ਭਿਞ੍ਞਾਨਂ ਆਰੋਚੇਹੀ’’ਤਿ ਆਹ.
ਸਙ੍ਘਕਮ੍ਮਵਸੇਨ ਸਿਜ੍ਝਮਾਨਾਪਿ ਉਪਸਮ੍ਪਦਾ ਸਤ੍ਥੁ ਆਣਾਵਸੇਨੇਵ ਸਿਜ੍ਝਨਤੋ ‘‘ਬੁਦ੍ਧਦਾਯਜ੍ਜਂ ਤੇ ਦਸ੍ਸਾਮੀ’’ਤਿ ਵੁਤ੍ਤਨ੍ਤਿ ਵਦਨ੍ਤਿ. ਅਪਰੇ ਪਨ ਅਪਰਿਪੁਣ੍ਣਵੀਸਤਿਵਸ੍ਸਸ੍ਸੇਵ ਤਸ੍ਸ ਉਪਸਮ੍ਪਦਂ ਅਨੁਜਾਨਨ੍ਤੋ ‘‘ਦਸ੍ਸਾਮੀ’’ਤਿ ਅਵੋਚਾਤਿ ਵਦਨ੍ਤਿ. ਉਪਸਮ੍ਪਾਦੇਤ੍ਵਾਤਿ ਧਮ੍ਮਸੇਨਾਪਤਿਨਾ ਉਪਜ੍ਝਾਯੇਨ ਉਪਸਮ੍ਪਾਦੇਤ੍ਵਾ.
ਨਵਯੋਜਨਸਤਿਕਮ੍ਪਿ ਠਾਨਂ ਮਜ੍ਝਿਮਦੇਸਪਰਿਯਾਪਨ੍ਨਮੇਵ, ਤਤੋ ਪਰਂ ਨਾਧਿਪ੍ਪੇਤਂ ਤੁਰਿਤਚਾਰਿਕਾਵਸੇਨ ਅਗਮਨਤੋ. ਸਮਨ੍ਤਾਤਿ ਗਤਗਤਟ੍ਠਾਨਸ੍ਸ ਚਤੂਸੁ ਪਸ੍ਸੇਸੁ ਸਮਨ੍ਤਤੋ. ਅਞ੍ਞੇਨਪਿ ਕਾਰਣੇਨਾਤਿ ਭਿਕ੍ਖੂਨਂ ਸਮਥਵਿਪਸ੍ਸਨਾਤਰੁਣਭਾਵਤੋ ਅਞ੍ਞੇਨਪਿ ਮਜ੍ਝਿਮਮਣ੍ਡਲੇ ਵੇਨੇਯ੍ਯਾਨਂ ਞਾਣਪਰਿਪਾਕਾਦਿਕਾਰਣੇਨ ਮਜ੍ਝਿਮਮਣ੍ਡਲਂ ਓਸਰਤਿ.‘‘ਸਤ੍ਤਹਿ ਵਾ’’ਤਿਆਦਿ ‘‘ਏਕਮਾਸਂ ਵਾ’’ਤਿਆਦਿਨਾ ਵੁਤ੍ਤਾਨੁਕ੍ਕਮੇਨ ਯੋਜੇਤਬ੍ਬਂ.
ਸਰੀਰਫਾਸੁਕਤ੍ਥਾਯਾਤਿ ਏਕਸ੍ਮਿਂਯੇਵ ਠਾਨੇ ਨਿਬਦ੍ਧਵਾਸਵਸੇਨ ਉਸ੍ਸਨ੍ਨਧਾਤੁਕਸ੍ਸ ਸਰੀਰਸ੍ਸ ਵਿਚਰਣੇਨ ਫਾਸੁਕਤ੍ਥਾਯ. ਅਟ੍ਠੁਪ੍ਪਤ੍ਤਿਕਾਲਾਭਿਕਙ੍ਖਨਤ੍ਥਾਯਾਤਿ ਅਗ੍ਗਿਕ੍ਖਨ੍ਧੋਪਮਸੁਤ੍ਤ (ਅ. ਨਿ. ੭.੭੨) ਮਘਦੇਵਜਾਤਕਾਦਿ (ਜਾ. ੧.੧.੯) ਦੇਸਨਾਨਂ ਵਿਯ ਧਮ੍ਮਦੇਸਨਾਯ ਅਟ੍ਠੁਪ੍ਪਤ੍ਤਿਕਾਲਂ ਆਕਙ੍ਖਮਾਨੇਨ. ਸੁਰਾਪਾਨਸਿਕ੍ਖਾਪਦਪਞ੍ਞਾਪਨੇ (ਪਾਚਿ. ੩੨੮) ਵਿਯ ਸਿਕ੍ਖਾਪਦਪਞ੍ਞਾਪਨਤ੍ਥਾਯ. ਬੋਧਨੇਯ੍ਯਸਤ੍ਤੇ ਅਙ੍ਗੁਲਿਮਾਲਾਦਿਕੇ (ਮ. ਨਿ. ੨.੩੪੭) ਬੋਧਨਤ੍ਥਾਯ. ਕਞ੍ਚਿ, ਕਤਿਪਯੇ ਵਾ ਪੁਗ੍ਗਲੇ ਉਦ੍ਦਿਸ੍ਸ ਚਾਰਿਕਾ ਨਿਬਦ੍ਧਚਾਰਿਕਾ. ਤਦਞ੍ਞਾ ਅਨਿਬਦ੍ਧਚਾਰਿਕਾ.
ਦਸਸਹਸ੍ਸਿ ਲੋਕਧਾਤੁਯਾਤਿ ਜਾਤਿਖੇਤ੍ਤਭੂਤੇ ਦਸਸਹਸ੍ਸਚਕ੍ਕਵਾਲ਼ੇ. ਤਤ੍ਥ ਹਿ ਸਤ੍ਤੇ ਪਰਿਪਕ੍ਕਿਨ੍ਦ੍ਰਿਯੇ ਪਸ੍ਸਿਤੁਂ ਬੁਦ੍ਧਞਾਣਂ ਅਭਿਨੀਹਰਿਤ੍ਵਾ ਠਿਤੋ ਭਗਵਾ ਞਾਣਜਾਲਂ ਪਤ੍ਥਰਤੀਤਿ ਵੁਚ੍ਚਤਿ. ਸਬ੍ਬਞ੍ਞੁਤਞ੍ਞਾਣਜਾਲਸ੍ਸ ਅਨ੍ਤੋ ਪਵਿਟ੍ਠੋਤਿ ਤਸ੍ਸ ਞਾਣਸ੍ਸ ਗੋਚਰਭਾਵਂ ਉਪਗਤੋ. ਭਗਵਾ ਕਿਰ ਮਹਾਕਰੁਣਾਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ‘‘ਯੇ ਸਤ੍ਤਾ ਭਬ੍ਬਾ ਪਰਿਪਾਕਞਾਣਾ ਅਜ੍ਜ ਮਯਾ ਵਿਨੇਤਬ੍ਬਾ, ਤੇ ਮਯ੍ਹਂ ਞਾਣਸ੍ਸ ਉਪਟ੍ਠਹਨ੍ਤੂ’’ਤਿ ਚਿਤ੍ਤਂ ਅਧਿਟ੍ਠਾਯ ਸਮਨ੍ਨਾਹਰਤਿ. ਤਸ੍ਸ ਸਹ ਸਮਨ੍ਨਾਹਾਰਾ ਏਕੋ ਵਾ ਦ੍ਵੇ ਵਾ ਬਹੂ ਵਾ ਤਦਾ ਵਿਨਯੂਪਗਾ ਵੇਨੇਯ੍ਯਾ ਞਾਣਸ੍ਸ ਆਪਾਥਮਾਗਚ੍ਛਨ੍ਤਿ ਅਯਮੇਤ੍ਥ ਬੁਦ੍ਧਾਨੁਭਾਵੋ. ਏਵਮ੍ਪਿ ਆਪਾਥਮਾਗਤਾਨਂ ਪਨ ਨੇਸਂ ਉਪਨਿਸ੍ਸਯਂ ਪੁਬ੍ਬਚਰਿਯਂ ਪੁਬ੍ਬਹੇਤੁਂ ਸਮ੍ਪਤਿ ਵਤ੍ਤਮਾਨਞ੍ਚ ਪਟਿਪਤ੍ਤਿਂ ਓਲੋਕੇਤਿ, ਤੇਨਾਹ ‘‘ਅਥ ਭਗਵਾ’’ਤਿਆਦਿ. ਵਾਦਪਟਿਵਾਦਂ ਕਤ੍ਵਾਤਿ ‘‘ਏਵਂ ਨੁ ਤੇ ਅਮ੍ਬਟ੍ਠਾ’’ਤਿਆਦਿਨਾ ਮਯਾ ਵੁਤ੍ਤਵਚਨਸ੍ਸ ‘‘ਯੇ ਚ ਖੋ ਤੇ ਭੋ ਗੋਤਮ ਮੁਣ੍ਡਕਾ ਸਮਣਕਾ’’ਤਿਆਦਿਨਾ ਪਟਿਵਚਨਂ ਕਤ੍ਵਾ ਤਿਕ੍ਖਤ੍ਤੁਂ ਇਬ੍ਭਵਾਦਨਿਪਾਤਨਵਸੇਨ ਨਾਨਪ੍ਪਕਾਰਂ ਅਸਮ੍ਭਿਵਾਕ੍ਯਂ ਸਾਧੁਸਭਾਵਾਯ ਵਾਚਾਯ ਵਤ੍ਤੁਂ ਅਯੁਤ੍ਤਵਚਨਂ ਵਕ੍ਖਤਿ. ਨਿਬ੍ਬਿਸੇਵਨਨ੍ਤਿ ਵਿਗਤਤੁਦਨਂ, ਮਾਨਦਬ੍ਬਵਸੇਨ ਅਪਗਤਪਰਿਪ੍ਫਨ੍ਦਨਨ੍ਤਿ ਅਤ੍ਥੋ.
ਅਵਸਰਿਤਬ੍ਬਨ੍ਤਿ ਉਪਗਨ੍ਤਬ੍ਬਂ. ਇਚ੍ਛਾਨਙ੍ਗਲੇਤਿ ਇਦਂ ਤਦਾ ਭਗਵਤੋ ਗੋਚਰਗਾਮਨਿਦਸ੍ਸਨਂ ਸਮੀਪਤ੍ਥੇ ਭੁਮ੍ਮਨ੍ਤਿ ਕਤ੍ਵਾ. ‘‘ਇਚ੍ਛਾਨਙ੍ਗਲਵਨਸਣ੍ਡੇ’’ਤਿ ਨਿਵਾਸਨਟ੍ਠਾਨਦਸ੍ਸਨਂ ਅਧਿਕਰਣੇ ਭੁਮ੍ਮਨ੍ਤਿ. ਤਦੁਭਯਂ ਵਿਵਰਨ੍ਤੋ ‘‘ਇਚ੍ਛਾਨਙ੍ਗਲਂ ਉਪਨਿਸ੍ਸਾਯਾ’’ਤਿਆਦਿਮਾਹ. ਧਮ੍ਮਰਾਜਸ੍ਸ ਭਗਵਤੋ ਸਬ੍ਬਸੋ ਅਧਮ੍ਮਨਿਗ੍ਗਣ੍ਹਨਪਰਾ ਪਟਿਪਤ੍ਤਿ, ਸਾ ਚ ਸੀਲਸਮਾਧਿਪਞ੍ਞਾਵਸੇਨਾਤਿ ਤਂ ਦਸ੍ਸੇਤੁਂ ‘‘ਸੀਲਖਨ੍ਧਾਵਾਰ’’ਨ੍ਤਿਆਦਿ ਵੁਤ੍ਤਂ. ਯਥਾਭਿਰੁਚਿਤੇਨਾਤਿ ਦਿਬ੍ਬਵਿਹਾਰਾਦੀਸੁ ਯੇਨ ਯੇਨ ਅਤ੍ਤਨੋ ਅਭਿਰੁਚਿਤੇਨ ਵਿਹਾਰੇਨ.
ਪੋਕ੍ਖਰਸਾਤਿਵਤ੍ਥੁਵਣ੍ਣਨਾ
੨੫੫. ਮਨ੍ਤੇਤਿ ਇਰੁਬ੍ਬੇਦਾਦਿਮਨ੍ਤਸਤ੍ਥੇ. ਪੋਕ੍ਖਰੇ ਕਮਲੇ ਸਯਮਾਨੋ ਨਿਸੀਦੀਤਿ ਪੋਕ੍ਖਰਸਾਤੀ. ਸਾਤਿ ਵੁਚ੍ਚਤਿ ਸਮਸਣ੍ਠਾਨਂ, ਪੋਕ੍ਖਰੇ ਸਣ੍ਠਾਨਾਵਯਵੇ ਜਾਤੋਤਿ ‘‘ਪੋਕ੍ਖਰਸਾਤੀ’’ਤਿਪਿ ਵੁਚ੍ਚਤਿ. ਸੇਤਪੋਕ੍ਖਰਸਦਿਸੋਤਿ ਸੇਤਪਦੁਮਵਣ੍ਣੋ. ਸੁਵਟ੍ਟਿਤਾਤਿ ਵਟ੍ਟਭਾਵਸ੍ਸ ਯੁਤ੍ਤਟ੍ਠਾਨੇ ਸੁਟ੍ਠੁ ਵਟ੍ਟੁਲਾ. ਕਾਲ਼ਵਙ੍ਗਤਿਲਕਾਦੀਨਂ ਅਭਾਵੇਨ ਸੁਪਰਿਸੁਦ੍ਧਾ.
ਇਮਸ੍ਸ ਬ੍ਰਾਹ੍ਮਣਸ੍ਸ ਕੀਦਿਸੋ ਪੁਬ੍ਬਯੋਗੋ, ਯੇਨ ਨਂ ਭਗਵਾ ਅਨੁਗ੍ਗਣ੍ਹਿਤੁਂ ਤਂ ਠਾਨਂ ਉਪਗਤੋਤਿ ਆਹ ‘‘ਅਯਂ ਪਨਾ’’ਤਿਆਦਿ. ਪਦੁਮਗਬ੍ਭੇ ਨਿਬ੍ਬਤ੍ਤਿ ਤੇਨਾਯਂ ਸਂਸੇਦਜੋ ਜਾਤੋ. ਨ ਪੁਪ੍ਫਤੀਤਿ ਨ ਵਿਕਸਤਿ. ਰਜਤਬਿਮ੍ਬਕਨ੍ਤਿ ਰੂਪਿਯਮਯਂ ਰੂਪਕਂ.
ਅਜ੍ਝਾਵਸਤੀਤਿ ਏਤ੍ਥ ਅਧਿ-ਸਦ੍ਦੋ ਇਸ੍ਸਰਿਯਤ੍ਥਦੀਪਨੋ, ਆਸਦ੍ਦੋ ਮਰਿਯਾਦਤ੍ਥੋਤਿ ਦਸ੍ਸੇਨ੍ਤੋ ‘‘ਅਭਿਭਵਿਤ੍ਵਾ’’ਤਿਆਦਿਮਾਹ. ਤੇਹਿ ਯੁਤ੍ਤਤ੍ਤਾ ਹਿ ਉਕ੍ਕਟ੍ਠਨ੍ਤਿ ਉਪਯੋਗਵਚਨਂ, ਤੇਨਾਹ ‘‘ਉਪਸਗ੍ਗਵਸੇਨਾ’’ਤਿਆਦਿ. ਯਾਯ ਮਰਿਯਾਦਾਯਾਤਿ ਯਾਯ ਅਵਤ੍ਥਾਯ.ਨਗਰਸ੍ਸ ਵਤ੍ਥੁਨ੍ਤਿ ‘‘ਅਯਂ ਖਣੋ, ਸੁਮੁਹੁਤ੍ਤਂ ਮਾ ਅਤਿਕ੍ਕਮੀ’’ਤਿ ਰਤ੍ਤਿਵਿਭਾਯਨਂ ਅਨੁਰਕ੍ਖਨ੍ਤਾ ਰਤ੍ਤਿਯਂ ਉਕ੍ਕਾ ਠਪੇਤ੍ਵਾ ਉਕ੍ਕਾਸੁ ਜਲਮਾਨਾਸੁ ਨਗਰਸ੍ਸ ਵਤ੍ਥੁਂ ਅਗ੍ਗਹੇਸੁਂ, ਤਸ੍ਮਾ ਉਕ੍ਕਾਸੁ ਠਿਤਾਤਿ ਉਕ੍ਕਟ੍ਠਾ, ਉਕ੍ਕਾਸੁ ਵਿਜ੍ਜੋਤਯਨ੍ਤੀਸੁ ਠਿਤਾ ਪਤਿਟ੍ਠਿਤਾਤਿ ਮੂਲਵਿਭੁਜਾਦਿਪਕ੍ਖੇਪੇਨ ਸਦ੍ਦਸਿਦ੍ਧਿ ਵੇਦਿਤਬ੍ਬਾ, ਨਿਰੁਤ੍ਤਿਨਯੇਨ ਵਾ ਉਕ੍ਕਾਸੁ ਠਿਤਾਸੁ ਠਿਤਾ ਆਸੀਤਿ ਉਕ੍ਕਟ੍ਠਾ. ਅਪਰੇ ਪਨ ਭਣਨ੍ਤਿ ‘‘ਭੂਮਿਭਾਗਸਮ੍ਪਤ੍ਤਿਯਾ, ਉਪਕਰਣਸਮ੍ਪਤ੍ਤਿਯਾ, ਮਨੁਸ੍ਸਸਮ੍ਪਤ੍ਤਿਯਾ ਚ ਤਂ ਨਗਰਂ ਉਕ੍ਕਟ੍ਠਗੁਣਯੋਗਤੋ ਉਕ੍ਕਟ੍ਠਾਤਿ ਨਾਮਂ ਲਭੀ’’ਤਿ. ਤਸ੍ਸਾਤਿ ‘‘ਉਕ੍ਕਟ੍ਠ’’ਨ੍ਤਿ ਉਪਯੋਗਵਸੇਨ ਵੁਤ੍ਤਪਦਸ੍ਸ. ਅਨੁਪਯੋਗਤ੍ਤਾਤਿ ਵਿਸੇਸਨਭਾਵੇਨ ਅਨੁਪਯੁਤ੍ਤਤ੍ਤਾ. ਸੇਸਪਦੇਸੂਤਿ ‘‘ਸਤ੍ਤੁਸ੍ਸਦ’’ਨ੍ਤਿਆਦਿਪਦੇਸੁ. ਯਥਾਵਿਧਿ ਹਿ ਅਨੁਪਯੋਗੋ ਪੁਰਿਮਸ੍ਮਿਂ. ਤਤ੍ਥਾਤਿ ‘‘ਉਪਸਗ੍ਗਵਸੇਨਾ’’ਤਿਆਦਿਨਾ ਵੁਤ੍ਤਵਿਧਾਨੇ. ‘‘ਸਦ੍ਦਸਤ੍ਥਤੋ ਪਰਿਯੇਸਿਤਬ੍ਬ’’ਨ੍ਤਿ ਏਤੇਨ ਸਦ੍ਦਲਕ੍ਖਣਾਨੁਗਤੋ ਵਾਯਂ ਸਦ੍ਦਪ੍ਪਯੋਗੋਤਿ ਦਸ੍ਸੇਤਿ. ਉਪਅਨੁਅਧਿਆਇਤਿਏਵਂਪੁਬ੍ਬਕੇ ਵਸਨਕਿਰਿਯਾਠਾਨੇ ਉਪਯੋਗਵਚਨਮੇਵ ਪਾਪੁਣਾਤੀਤਿ ਸਦ੍ਦਵਿਦੂ ਇਚ੍ਛਨ੍ਤਿ.
ਉਸ੍ਸਦਤਾ ਨਾਮੇਤ੍ਥ ਬਹੁਲਤਾਤਿ, ਤਂ ਬਹੁਲਤਂ ਦਸ੍ਸੇਤੁਂ ‘‘ਬਹੁਜਨ’’ਨ੍ਤਿਆਦਿ ਵੁਤ੍ਤਂ. ਗਹੇਤ੍ਵਾ ਪੋਸੇਤਬ੍ਬਂ ਪੋਸਾਵਨਿਯਂ. ਆਵਿਜ੍ਝਿਤ੍ਵਾਤਿ ਪਰਿਕ੍ਖਿਪਿਤ੍ਵਾ.
ਰਞ੍ਞਾ ਵਿਯ ਭੁਞ੍ਜਿਤਬ੍ਬਨ੍ਤਿ ਵਾ ਰਾਜਭੋਗ੍ਗਂ. ਰਞ੍ਞੋ ਦਾਯਭੂਤਨ੍ਤਿ ਕੁਲਪਰਮ੍ਪਰਾਯ ਯੋਗ੍ਯਭਾਵੇਨ ਰਾਜਤੋ ਲਦ੍ਧਦਾਯਭੂਤਂ. ਤੇਨਾਹ ‘‘ਦਾਯਜ੍ਜਨ੍ਤਿ ਅਤ੍ਥੋ’’ਤਿ. ਰਾਜਨੀਹਾਰੇਨ ਪਰਿਭੁਞ੍ਜਿਤਬ੍ਬਤੋ ਉਦ੍ਧਂ ਪਰਿਭੋਗਲਾਭਸ੍ਸ ਸੇਟ੍ਠਦੇਯ੍ਯਤਾ ਨਾਮ ਨਤ੍ਥੀਤਿ ਆਹ ‘‘ਛਤ੍ਤਂ ਉਸ੍ਸਾਪੇਤ੍ਵਾ ਰਾਜਸਙ੍ਖੇਪੇਨ ਭੁਞ੍ਜਿਤਬ੍ਬ’’ਨ੍ਤਿ. ‘‘ਸਬ੍ਬਂ ਛੇਜ੍ਜਭੇਜ੍ਜ’’ਨ੍ਤਿ ਸਰੀਰਦਣ੍ਡਧਨਦਣ੍ਡਾਦਿ ਭੇਦਂ ਸਬ੍ਬਂ ਦਣ੍ਡਮਾਹ. ਨਦੀਤਿਤ੍ਥਪਬ੍ਬਤਾਦੀਸੂਤਿ ਨਦੀਤਿਤ੍ਥਪਬ੍ਬਤਪਾਦਗਾਮਦ੍ਵਾਰਅਟਵਿਮੁਖਾਦੀਸੁ. ‘‘ਰਾਜਦਾਯ’’ਨ੍ਤਿ ਇਮਿਨਾਵ ਰਞ੍ਞੋ ਦਿਨ੍ਨਭਾਵੇ ਸਿਦ੍ਧੇ ‘‘ਰਞ੍ਞਾ ਪਸੇਨਦਿਨਾ ਕੋਸਲੇਨ ਦਿਨ੍ਨ’’ਨ੍ਤਿ ਵਚਨਂ ਕਿਮਤ੍ਥਿਯਨ੍ਤਿ ਆਹ ‘‘ਦਾਯਕਰਾਜਦੀਪਨਤ੍ਥ’’ਨ੍ਤਿਆਦਿ. ਨਿਸ੍ਸਟ੍ਠਪਰਿਚ੍ਚਤ੍ਤਨ੍ਤਿ ਮੁਤ੍ਤਚਾਗਵਸੇਨ ਪਰਿਚ੍ਚਤ੍ਤਂ ਕਤ੍ਵਾ. ਏਵਞ੍ਹਿ ਤਂ ਸੇਟ੍ਠਦੇਯ੍ਯਂ ਉਤ੍ਤਮਦੇਯ੍ਯਂ ਜਾਤਂ.
ਉਪਲਭੀਤਿ ਸਵਨਵਸੇਨ ਉਪਲਭੀਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਸੋਤਦ੍ਵਾਰ…ਪੇ… ਅਞ੍ਞਾਸੀ’’ਤਿ ਆਹ. ਅਵਧਾਰਣਫਲਤ੍ਤਾ ਸਬ੍ਬਮ੍ਪਿ ਵਾਕ੍ਯਂ ਅਨ੍ਤੋਗਧਾਵਧਾਰਣਨ੍ਤਿ ਆਹ ‘‘ਪਦਪੂਰਣਮਤ੍ਤੇ ਨਿਪਾਤੋ’’ਤਿ. ‘‘ਅਵਧਾਰਣਤ੍ਥੇ’’ਤਿ ਪਨ ਇਮਿਨਾ ਇਟ੍ਠਤੋਵਧਾਰਣਤ੍ਥਂ ਖੋ-ਸਦ੍ਦਗ੍ਗਹਣਨ੍ਤਿ ਦਸ੍ਸੇਤਿ. ‘‘ਅਸ੍ਸੋਸੀ’’ਤਿ ਪਦਂ ਖੋ-ਸਦ੍ਦੇ ਗਹਿਤੇ ਤੇਨ ਫੁਲ੍ਲਿਤਮਣ੍ਡਿਤਂ ਵਿਯ ਹੋਨ੍ਤਂ ਪੂਰਿਤਂ ਨਾਮ ਹੋਤਿ, ਤੇਨ ਚ ਪੁਰਿਮਪਚ੍ਛਿਮਪਦਾਨਿ ਸਿਲਿਟ੍ਠਾਨਿ ਹੋਨ੍ਤਿ, ਨ ਤਸ੍ਮਿਂ ਅਗ੍ਗਹਿਤੇਤਿ ਆਹ ‘‘ਪਦਪੂਰਣੇਨ ਬ੍ਯਞ੍ਜਨਸਿਲਿਟ੍ਠਤਾਮਤ੍ਤਮੇਵਾ’’ਤਿ. ਮਤ੍ਤ-ਸਦ੍ਦੋ ਵਿਸੇਸਨਿਵਤ੍ਤਿਅਤ੍ਥੋ, ਤੇਨਸ੍ਸ ਅਨਤ੍ਥਨ੍ਤਰਦੀਪਨਤਾ ਦਸ੍ਸਿਤਾ ਹੋਤਿ, ਏਵ-ਸਦ੍ਦੇਨ ਪਨ ਬ੍ਯਞ੍ਜਨਸਿਲਿਟ੍ਠਤਾਯ ਏਕਨ੍ਤਿਕਤਾ.
ਸਮਿਤਪਾਪਤ੍ਤਾਤਿ ਅਚ੍ਚਨ੍ਤਂ ਅਨਵਸੇਸਤੋ ਸਵਾਸਨਂ ਸਮਿਤਪਾਪਤ੍ਤਾ. ਏਵਞ੍ਹਿ ਬਾਹਿਰਕਵਿਰਾਗਸੇਕ੍ਖਾਸੇਕ੍ਖਪਾਪਸਮਨਤੋ ਭਗਵਤੋ ਪਾਪਸਮਨਂ ਵਿਸੇਸਿਤਂ ਹੋਤਿ, ਤੇਨਾਹ ਵੁਤ੍ਤਞ੍ਹੇਤਨ੍ਤਿਆਦਿ. ਅਨੇਕਤ੍ਥਤ੍ਤਾ ਨਿਪਾਤਾਨਂ ਇਧ ਅਨੁਸ੍ਸਵਤ੍ਥੋ ਅਧਿਪ੍ਪੇਤੋਤਿ ਆਹ ‘‘ਖਲੂਤਿ ਅਨੁਸ੍ਸਵਤ੍ਥੇ ਨਿਪਾਤੋ’’ਤਿ. ਆਲਪਨਮਤ੍ਤਨ੍ਤਿ ਪਿਯਾਲਾਪਵਚਨਮਤ੍ਤਂ. ਪਿਯਸਮੁਦਾਹਾਰੋ ਹੇਤੇ ‘‘ਭੋ’’ਤਿ ਵਾ ‘‘ਆਵੁਸੋ’’ਤਿ ਵਾ ‘‘ਦੇਵਾਨਂ ਪਿਯਾ’’ਤਿ ਵਾ. ਗੋਤ੍ਤਵਸੇਨਾਤਿ ਏਤ੍ਥ ਗਂ ਤਾਯਤੀਤਿ ਗੋਤ੍ਤਂ. ਗੋਤਮੋਤਿ ਹਿ ਪਵਤ੍ਤਮਾਨਂ ਵਚਨਂ, ਬੁਦ੍ਧਿਞ੍ਚ ਤਾਯਤਿ ਏਕਂਸਿਕਵਿਸਯਤਾਯ ਰਕ੍ਖਤੀਤਿ ਗੋਤ੍ਤਂ. ਯਥਾ ਹਿ ਬੁਦ੍ਧਿ ਆਰਮ੍ਮਣਭੂਤੇਨ ਅਤ੍ਥੇਨ ਵਿਨਾ ਨ ਵਤ੍ਤਤਿ, ਏਵਂ ਅਭਿਧਾਨਂ ਅਭਿਧੇਯ੍ਯਭੂਤੇਨ, ਤਸ੍ਮਾ ਸੋ ਗੋਤ੍ਤਸਙ੍ਖਾਤੋ ਅਤ੍ਥੋ ਤਾਨਿ ਤਾਯਤਿ ਰਕ੍ਖਤੀਤਿ ਵੁਚ੍ਚਤਿ. ਕੋ ਪਨ ਸੋਤਿ? ਅਞ੍ਞਕੁਲਪਰਮ੍ਪਰਾਸਾਧਾਰਣਂ ਤਸ੍ਸ ਕੁਲਸ੍ਸ ਆਦਿਪੁਰਿਸਸਮੁਦਾਗਤਂ ਤਂਕੁਲਪਰਿਯਾਪਨ੍ਨਸਾਧਾਰਣਂ ਸਾਮਞ੍ਞਰੂਪਨ੍ਤਿ ਦਟ੍ਠਬ੍ਬਂ. ਏਤ੍ਥ ਚ ‘‘ਸਮਣੋ’’ਤਿ ਇਮਿਨਾ ਸਰਿਕ੍ਖਕਜਨੇਹਿ ਭਗਵਤੋ ਬਹੁਮਤਭਾਵੋ ਦਸ੍ਸਿਤੋ ਸਮਿਤਪਾਪਤਾਕਿਤ੍ਤਨਤੋ. ‘‘ਗੋਤਮੋ’’ਤਿ ਇਮਿਨਾ ਲੋਕਿਯਜਨੇਹਿ ਉਲ਼ਾਰਕੁਲਸਮ੍ਭੂਤਤਾਦੀਪਨਤੋ.
ਉਚ੍ਚਾਕੁਲਪਰਿਦੀਪਨਂ ਉਦਿਤੋਦਿਤਵਿਪੁਲਖਤ੍ਤਿਯਕੁਲਵਿਭਾਵਨਤੋ. ਸਬ੍ਬਖਤ੍ਤਿਯਾਨਞ੍ਹਿ ਆਦਿਭੂਤਮਹਾਸਮ੍ਮਤਮਹਾਰਾਜਤੋ ਪਟ੍ਠਾਯ ਅਸਮ੍ਭਿਨ੍ਨਂ ਉਲ਼ਾਰਤਮਂ ਸਕ੍ਯਰਾਜਕੁਲਂ. ਕੇਨਚਿ ਪਾਰਿਜੁਞ੍ਞੇਨਾਤਿ ਞਾਤਿਪਾਰਿਜੁਞ੍ਞਭੋਗਪਾਰਿਜੁਞ੍ਞਾਦਿਨਾ ਕੇਨਚਿ ਪਾਰਿਜੁਞ੍ਞੇਨ ਪਾਰਿਹਾਨਿਯਾ. ਅਨਭਿਭੂਤੋ ਅਨਜ੍ਝੋਤ੍ਥਤੋ. ਤਥਾ ਹਿ ਤਸ੍ਸ ਕੁਲਸ੍ਸ ਨ ਕਿਞ੍ਚਿ ਪਾਰਿਜੁਞ੍ਞਂ ਲੋਕਨਾਥਸ੍ਸ ਅਭਿਜਾਤਿਯਂ, ਅਥ ਖੋ ਵਡ੍ਢਿਯੇਵ. ਅਭਿਨਿਕ੍ਖਮਨੇ ਚ ਤਤੋਪਿ ਸਮਿਦ੍ਧਤਮਭਾਵੋ ਲੋਕੇ ਪਾਕਟੋ ਪਞ੍ਞਾਤੋ. ਇਤਿ ‘‘ਸਕ੍ਯਕੁਲਾ ਪਬ੍ਬਜਿਤੋ’’ਤਿ ਇਦਂ ਵਚਨਂ ਭਗਵਤੋ ਸਦ੍ਧਾਪਬ੍ਬਜਿਤਭਾਵਦੀਪਨਂ ਵੁਤ੍ਤਂ ਮਹਨ੍ਤਂ ਞਾਤਿਪਰਿਵਟ੍ਟਂ, ਮਹਨ੍ਤਞ੍ਚ ਭੋਗਕ੍ਖਨ੍ਧਂ ਪਹਾਯ ਪਬ੍ਬਜਿਤਭਾਵਸਿਦ੍ਧਿਤੋ. ਸੁਨ੍ਦਰਨ੍ਤਿ ਭਦ੍ਦਕਂ. ਭਦ੍ਦਕਤਾ ਚ ਪਸ੍ਸਨ੍ਤਸ੍ਸ ਹਿਤਸੁਖਾਵਹਭਾਵੇਨ ਵੇਦਿਤਬ੍ਬਾਤਿ ਆਹ ਅਤ੍ਥਾਵਹਂ ਸੁਖਾਵਹਨ੍ਤਿ. ਤਤ੍ਥ ਅਤ੍ਥਾਵਹਨ੍ਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥਸਂਹਿਤਹਿਤਾਵਹਂ. ਸੁਖਾਵਹਨ੍ਤਿ ਯਥਾਵੁਤ੍ਤਤਿਵਿਧਸੁਖਾਵਹਂ. ਤਥਾਰੂਪਾਨਨ੍ਤਿ ਤਾਦਿਸਾਨਂ. ਯਾਦਿਸੇਹਿ ਪਨ ਗੁਣੇਹਿ ਭਗਵਾ ਸਮਨ੍ਨਾਗਤੋ, ਤੇਹਿ ਚਤੁਪ੍ਪਮਾਣਿਕਸ੍ਸ ਲੋਕਸ੍ਸ ਸਬ੍ਬਥਾਪਿ ਅਚ੍ਚਨ੍ਤਾਯ ਸਦ੍ਧਾਯ ਪਸਾਦਨੀਯੋ ਤੇਸਂ ਯਥਾਭੂਤਸਭਾਵਤ੍ਤਾਤਿ ਦਸ੍ਸੇਨ੍ਤੋ ਯਥਾਰੂਪੋਤਿਆਦਿਮਾਹ. ਤਤ੍ਥ ਯਥਾਭੂਤਂ…ਪੇ… ਅਰਹਤਨ੍ਤਿ ਇਮਿਨਾ ਧਮ੍ਮਪ੍ਪਮਾਣਾਨਂ, ਲੂਖਪ੍ਪਮਾਣਾਨਞ੍ਚ ਸਤ੍ਤਾਨਂ ਭਗਵਤੋ ਪਸਾਦਾਵਹਤਂ ਦਸ੍ਸੇਤਿ. ਤਂ ਦਸ੍ਸਨੇਨੇਵ ਚ ਇਤਰੇਸਮ੍ਪਿ ਅਤ੍ਥਤੋ ਪਸਾਦਾਵਹਤਾ ਦਸ੍ਸਿਤਾ ਹੋਤੀਤਿ ਦਟ੍ਠਬ੍ਬਂ ਤਦਵਿਨਾਭਾਵਤੋ. ਦਸ੍ਸਨਮਤ੍ਤਮ੍ਪਿ ਸਾਧੁ ਹੋਤੀਤਿ ਏਤ੍ਥ ਕੋਸਿਯਸਕੁਣਵਤ੍ਥੁਂ (ਮ. ਨਿ. ਅਟ੍ਠ. ੧.੧੪੪; ਖੁ. ਪਾ. ਅਟ੍ਠ. ੧੦) ਕਥੇਤਬ੍ਬਂ.
ਅਮ੍ਬਟ੍ਠਮਾਣਵਕਥਾਵਣ੍ਣਨਾ
੨੫੬. ਮਨ੍ਤੇ ਪਰਿਵਤ੍ਤੇਤੀਤਿ ਵੇਦੇ ਸਜ੍ਝਾਯਤਿ, ਪਰਿਯਾਪੁਣਾਤੀਤਿ ਅਤ੍ਥੋ. ਮਨ੍ਤੇ ਧਾਰੇਤੀਤਿ ਯਥਾਅਧੀਤੇ ਮਨ੍ਤੇ ਅਸਮ੍ਮੁਟ੍ਠੇ ਕਤ੍ਵਾ ਹਦਯੇ ਠਪੇਤਿ ਓਟ੍ਠਪਹਤਕਰਣਵਸੇਨ, ਨ ਅਤ੍ਥਵਿਭਾਵਨਵਸੇਨ.
ਸਨਿਘਣ੍ਡੁਕੇਟੁਭਾਨਨ੍ਤਿ ਏਤ੍ਥ ਵਚਨੀਯਵਾਚਕਭਾਵੇਨ ਅਤ੍ਥਂ ਸਦ੍ਦਞ੍ਚ ਨਿਖਡਤਿ ਭਿਨ੍ਦਤਿ ਵਿਭਜ੍ਜ ਦਸ੍ਸੇਤੀਤਿ ਨਿਖਣ੍ਡੁ, ਸਾ ਏਵ ਇਧ ਖ-ਕਾਰਸ੍ਸ ਘ-ਕਾਰਂ ਕਤ੍ਵਾ ‘‘ਨਿਘਣ੍ਡੂ’’ਤਿ ਵੁਤ੍ਤੋ. ਕਿਟਯਤਿ ਗਮੇਤਿ ਞਾਪੇਤਿ ਕਿਰਿਯਾਦਿਵਿਭਾਗਂ, ਤਂ ਵਾ ਅਨਵਸੇਸਪਰਿਯਾਦਾਨਤੋ ਗਮੇਨ੍ਤੋ ਪੂਰੇਤੀਤਿ ਕੇਟੁਭਂ. ਵੇਵਚਨਪ੍ਪਕਾਸਕਨ੍ਤਿ ਪਰਿਯਾਯਸਦ੍ਦਦੀਪਕਂ, ਏਕੇਕਸ੍ਸ ਅਤ੍ਥਸ੍ਸ ਅਨੇਕਪਰਿਯਾਯਵਚਨਵਿਭਾਵਕਨ੍ਤਿ ਅਤ੍ਥੋ. ਨਿਦਸ੍ਸਨਮਤ੍ਤਞ੍ਚੇਤਂ ਅਨੇਕੇਸਮ੍ਪਿ ਅਤ੍ਥਾਨਂ ਏਕਸਦ੍ਦਵਚਨੀਯਤਾਵਿਭਾਵਨਵਸੇਨਪਿ ਤਸ੍ਸ ਗਨ੍ਥਸ੍ਸ ਪਵਤ੍ਤਤ੍ਤਾ. ਵਚੀਭੇਦਾਦਿਲਕ੍ਖਣਾ ਕਿਰਿਯਾ ਕਪ੍ਪੀਯਤਿ ਏਤੇਨਾਤਿ ਕਿਰਿਯਾਕਪ੍ਪੋ, ਸੋ ਪਨ ਵਣ੍ਣਪਦਸਮ੍ਬਨ੍ਧਪਦਤ੍ਥਾਦਿਵਿਭਾਗਤੋ ਬਹੁਵਿਕਪ੍ਪੋਤਿ ਆਹ ‘‘ਕਿਰਿਯਾਕਪ੍ਪਵਿਕਪ੍ਪੋ’’ਤਿ. ਇਦਞ੍ਚ ਮੂਲਕਿਰਿਯਾਕਪ੍ਪਗਨ੍ਥਂ ਸਨ੍ਧਾਯ ਵੁਤ੍ਤਂ. ਸੋ ਹਿ ਸਤਸਹਸ੍ਸਪਰਿਮਾਣੋ ਨਯਚਰਿਯਾਦਿਪਕਰਣਂ. ਠਾਨਕਰਣਾਦਿਵਿਭਾਗਤੋ, ਨਿਬ੍ਬਚਨਵਿਭਾਗਤੋ ਚ ਅਕ੍ਖਰਾ ਪਭੇਦੀਯਨ੍ਤਿ ਏਤੇਹੀਤਿ ਅਕ੍ਖਰਪ੍ਪਭੇਦਾ, ਸਿਕ੍ਖਾਨਿਰੁਤ੍ਤਿਯੋ. ਏਤੇਸਨ੍ਤਿ ਵੇਦਾਨਂ.
ਤੇ ਏਵ ਵੇਦੇ ਪਦਸੋ ਕਾਯਤੀਤਿ ਪਦਕੋ. ਤਂ ਤਂ ਸਦ੍ਦਂ ਤਦਤ੍ਥਞ੍ਚ ਬ੍ਯਾਕਰੋਤਿ ਬ੍ਯਾਚਿਕ੍ਖਤਿ ਏਤੇਨਾਤਿ ਬ੍ਯਾਕਰਣਂ, ਸਦ੍ਦਸਤ੍ਥਂ. ਆਯਤਿਂ ਹਿਤਂ ਤੇਨ ਲੋਕੋ ਨ ਯਤਤਿ ਨ ਈਹਤੀਤਿ ਲੋਕਾਯਤਂ. ਤਞ੍ਹਿ ਗਨ੍ਥਂ ਨਿਸ੍ਸਾਯ ਸਤ੍ਤਾ ਪੁਞ੍ਞਕਿਰਿਯਾਯ ਚਿਤ੍ਤਮ੍ਪਿ ਨ ਉਪ੍ਪਾਦੇਨ੍ਤਿ.
ਵਯਤੀਤਿ ਵਯੋ, ਆਦਿਮਜ੍ਝਪਰਿਯੋਸਾਨੇਸੁ ਕਤ੍ਥਚਿ ਅਪਰਿਕਿਲਮਨ੍ਤੋ ਅਵਿਤ੍ਥਾਯਨ੍ਤੋ ਤੇ ਗਨ੍ਥੇ ਸਨ੍ਧਾਰੇਤਿ ਪੂਰੇਤੀਤਿ ਅਤ੍ਥੋ. ਦ੍ਵੇ ਪਟਿਸੇਧਾ ਪਕਤਿਂ ਗਮੇਨ੍ਤੀਤਿ ਦਸ੍ਸੇਨ੍ਤੋ ‘‘ਅਵਯੋ ਨ ਹੋਤੀ’’ਤਿ ਵਤ੍ਵਾ ਤਤ੍ਥ ਅਵਯਂ ਦਸ੍ਸੇਤੁਂ ‘‘ਅਵਯੋ ਨਾਮ…ਪੇ… ਨ ਸਕ੍ਕੋਤੀ’’ਤਿ ਵੁਤ੍ਤਂ. ‘‘ਅਨੁਞ੍ਞਾਤੋ’’ਤਿ ਪਦਸ੍ਸ ਕਮ੍ਮਸਾਧਨਵਸੇਨ, ‘‘ਪਟਿਞ੍ਞਾਤੋ’’ਤਿ ਪਨ ਪਦਸ੍ਸ ਕਤ੍ਤੁਸਾਧਨਵਸੇਨ ਅਤ੍ਥੋ ਵੇਦਿਤਬ੍ਬੋਤਿ ਦਸ੍ਸੇਨ੍ਤੋ ‘‘ਆਚਰਿਯੇਨਾ’’ਤਿਆਦਿਮਾਹ. ਆਚਰਿਯਪਰਮ੍ਪਰਾਭਤਂ ਆਚਰਿਯਕਂ. ਗਰੂਤਿ ਭਾਰਿਯਂ ਅਤ੍ਤਾਨਂ ਤਤੋ ਮੋਚੇਤ੍ਵਾ ਗਮਨਂ ਦੁਕ੍ਕਰਂ ਹੋਤਿ. ਅਨਤ੍ਥੋਪਿ ਉਪ੍ਪਜ੍ਜਤਿ ਨਿਨ੍ਦਾਬ੍ਯਾਰੋਸਉਪਾਰਮ੍ਭਾਦਿ.
੨੫੭. ‘‘ਅਬ੍ਭੁਗ੍ਗਤੋ’’ਤਿ ਏਤ੍ਥ ਅਭਿਸਦ੍ਦਯੋਗੇਨ ਇਤ੍ਥਮ੍ਭੂਤਾਖ੍ਯਾਨਤ੍ਥਵਸੇਨੇਵ ਉਪਯੋਗਵਚਨਂ.
੨੫੮. ਲਕ੍ਖਣਾਨੀਤਿ ਲਕ੍ਖਣਦੀਪਨਾਨਿ ਮਨ੍ਤਪਦਾਨਿ. ਅਨ੍ਤਰਧਾਯਨ੍ਤੀਤਿ ਨ ਕੇਵਲਂ ਲਕ੍ਖਣਮਨ੍ਤਾਨਿਯੇਵ, ਅਥ ਖੋ ਅਞ੍ਞਾਨਿਪਿ ਬ੍ਰਾਹ੍ਮਣਾਨਂ ਞਾਣਬਲਾਭਾਵੇਨ ਅਨੁਕ੍ਕਮੇਨ ਅਨ੍ਤਰਧਾਯਨ੍ਤਿ. ਤਥਾ ਹਿ ਵਦਨ੍ਤਿ ‘‘ਏਕਸਤਂ ਅਦ੍ਧਰਿਯਂ ਸਾਖਾ ਸਹਸ੍ਸਵਤ੍ਤਕੋ ਸਾਮਾ’’ਤਿਆਦਿ. ਪਣਿਧਿ …ਪੇ… ਮਹਤੋਤਿ ਏਤ੍ਥ ਪਣਿਧਿਮਹਤੋ ਸਮਾਦਾਨਮਹਤੋਤਿ ਆਦਿਨਾ ਪਚ੍ਚੇਕਂ ਮਹਨ੍ਤ-ਸਦ੍ਦੋ ਯੋਜੇਤਬ੍ਬੋ. ਪਣਿਧਿਮਹਨ੍ਤਤਾਦਿ ਚਸ੍ਸ ਬੁਦ੍ਧਵਂਸਚਰਿਯਾਪਿਟਕਵਣ੍ਣਨਾਦਿਵਸੇਨ ਵੇਦਿਤਬ੍ਬੋ. ਨਿਟ੍ਠਾਤਿ ਨਿਪ੍ਫਤ੍ਤਿਯੋ. ਭਵਭੇਦੇਤਿ ਭਵਵਿਸੇਸੇ. ਇਤੋ ਚ ਏਤ੍ਤੋ ਚ ਬ੍ਯਾਪੇਤ੍ਵਾ ਠਿਤਤਾ ਵਿਸਟਭਾਵੋ.
ਜਾਤਿਸਾਮਞ੍ਞਤੋਤਿ ਲਕ੍ਖਣਜਾਤਿਯਾ ਲਕ੍ਖਣਭਾਵਮਤ੍ਤੇਨ ਸਮਾਨਭਾਵਤੋ. ਯਥਾ ਹਿ ਬੁਦ੍ਧਾਨਂ ਲਕ੍ਖਣਾਨਿ ਸੁਵਿਸਦਾਨਿ, ਸੁਪਰਿਬ੍ਯਤ੍ਤਾਨਿ, ਪਰਿਪੁਣ੍ਣਾਨਿ ਚ ਹੋਨ੍ਤਿ, ਨ ਏਵਂ ਚਕ੍ਕਵਤ੍ਤੀਨਂ, ਤੇਨਾਹ ‘‘ਨ ਤੇਹੇਵ ਬੁਦ੍ਧੋ ਹੋਤੀ’’ਤਿ. ਅਭਿਰੂਪਤਾ, ਦੀਘਾਯੁਕਤਾ, ਅਪ੍ਪਾਤਙ੍ਕਤਾ, ਬ੍ਰਾਹ੍ਮਣਾਦੀਨਂ ਪਿਯਮਨਾਪਤਾਤਿ ਇਮੇਹਿ ਚਤੂਹਿ ਅਚ੍ਛਰਿਯਸਭਾਵੇਹਿ. ਦਾਨਂ, ਪਿਯਵਚਨਂ, ਅਤ੍ਥਚਰਿਯਾ, ਸਮਾਨਤ੍ਤਤਾਤਿ ਇਮੇਹਿ ਚਤੂਹਿ ਸਙ੍ਗਹਵਤ੍ਥੂਹਿ. ਰਞ੍ਜਨਤੋਤਿ ਪੀਤਿਜਨਨਤੋ. ਚਕ੍ਕਂ ਚਕ੍ਕਰਤਨਂ ਵਤ੍ਤੇਤਿ ਪਵਤ੍ਤੇਤੀਤਿ ਚਕ੍ਕਵਤ੍ਤੀ. ਸਮ੍ਪਤ੍ਤਿਚਕ੍ਕੇਹਿ ਸਯਂ ਵਤ੍ਤਤਿ, ਤੇਹਿ ਚ ਪਰਂ ਸਤ੍ਤਨਿਕਾਯਂ ਵਤ੍ਤੇਤਿ ਪਵਤ੍ਤੇਤੀਤਿ ਚਕ੍ਕਵਤ੍ਤੀ. ਪਰਹਿਤਾਵਹੋ ਇਰਿਯਾਪਥਚਕ੍ਕਾਨਂ ਵਤ੍ਤੋ ਵਤ੍ਤਨਂ ਏਤਸ੍ਸ, ਏਤ੍ਥਾਤਿ ਵਾ ਚਕ੍ਕਵਤ੍ਤੀ. ਅਪ੍ਪਟਿਹਤਂ ਵਾ ਆਣਾਸਙ੍ਖਾਤਂ ਚਕ੍ਕਂ ਵਤ੍ਤੇਤੀਤਿ ਚਕ੍ਕਵਤ੍ਤੀ. ਖਤ੍ਤਿਯਮਣ੍ਡਲਾਦਿਸਞ੍ਞਿਤਂ ਚਕ੍ਕਂ ਸਮੂਹਂ ਅਤ੍ਤਨੋ ਵਸੇ ਵਤ੍ਤੇਤੀਤਿ ਚਕ੍ਕਵਤ੍ਤੀ ਚਕ੍ਕਵਤ੍ਤਿਵਤ੍ਤਸਙ੍ਖਾਤਂ ਧਮ੍ਮਂ ਚਰਤਿ, ਚਕ੍ਕਵਤ੍ਤਿਵਤ੍ਤਸਙ੍ਖਾਤੋ ਧਮ੍ਮੋ ਏਤਸ੍ਮਿਂ ਅਤ੍ਥੀਤਿ ਵਾ ਧਮ੍ਮਿਕੋ. ਧਮ੍ਮਤੋ ਅਨਪੇਤਤ੍ਤਾ ਧਮ੍ਮੋ ਰਞ੍ਜਨਟ੍ਠੇਨ ਰਾਜਾਤਿ ਧਮ੍ਮਰਾਜਾ. ‘‘ਰਾਜਾ ਹੋਤਿ ਚਕ੍ਕਵਤ੍ਤੀ’’ਤਿ ਵੁਤ੍ਤਤ੍ਤਾ ‘‘ਚਾਤੁਰਨ੍ਤੋ’’ਤਿ ਪਦਂ ਚਤੁਦੀਪਿਸ੍ਸਰਤਂ ਵਿਭਾਵੇਤੀਤਿ ਆਹ ‘‘ਚਤੁਸਮੁਦ੍ਦਅਨ੍ਤਾਯਾ’’ਤਿਆਦਿ. ਤਤ੍ਥ ‘‘ਚਤੁਦ੍ਦੀਪਵਿਭੂਸਿਤਾਯਾ’’ਤਿ ਅਵਤ੍ਵਾ ‘‘ਚਤੁਬ੍ਬਿਧਾ’’ਤਿ ਵਿਧਗ੍ਗਹਣਂ ਤਂਤਂਪਰਿਤ੍ਤਦੀਪਾਨਮ੍ਪਿ ਸਙ੍ਗਹਤ੍ਥਨ੍ਤਿ ਦਟ੍ਠਬ੍ਬਂ. ਕੋਪਾਦੀਤਿ ਆਦਿ-ਸਦ੍ਦੇਨ ਕਾਮਮੋਹਮਾਨਮਦਾਦਿਕੇ ਸਙ੍ਗਣ੍ਹਾਤਿ. ਵਿਜਿਤਾਵੀਤਿ ਵਿਜਿਤਵਾ. ਕੇਨਚਿ ਅਕਮ੍ਪਿਯਟ੍ਠੇਨ ਜਨਪਦੇ ਥਾਵਰਿਯਪ੍ਪਤ੍ਤੋ, ਦਲ਼੍ਹਭਤ੍ਤਿਭਾਵਤੋ ਵਾ, ਜਨਪਦੋ ਥਾਵਰਿਯਂ ਪਤ੍ਤੋ ਏਤ੍ਥਾਤਿ ਜਨਪਦਤ੍ਥਾਵਰਿਯਪ੍ਪਤ੍ਤੋ.
ਚਿਤ੍ਤੀਕਤਭਾਵਾਦਿਨਾਪਿ (ਖੁ. ਪਾ. ਅਟ੍ਠ. ੩; ਦੀ. ਨਿ. ਅਟ੍ਠ. ੨.੩੩; ਸੁ. ਨਿ. ਅਟ੍ਠ. ੧.੨੨੬; ਮਹਾਨਿ. ਅਟ੍ਠ. ੫੦) ਚਕ੍ਕਸ੍ਸ ਰਤਨਟ੍ਠੋ ਵੇਦਿਤਬ੍ਬੋ. ਏਸ ਨਯੋ ਸੇਸੇਸੁਪਿ. ਰਤਿਨਿਮਿਤ੍ਤਤਾਯ ਵਾ ਚਿਤ੍ਤੀਕਤਾਦਿਭਾਵਸ੍ਸ ਰਤਿਜਨਨਟ੍ਠੇਨ ਏਕਸਙ੍ਗਹਤਾਯ ਵਿਸੁਂ ਅਗ੍ਗਹਣਂ. ਇਮੇਹਿ ਪਨ ਰਤਨੇਹਿ ਰਾਜਾ ਚਕ੍ਕਵਤ੍ਤੀ ਯਂ ਯਮਤ੍ਥਂ ਪਚ੍ਚਨੁਭੋਤਿ, ਤਂ ਤਂ ਦਸ੍ਸੇਤੁਂ ‘‘ਇਮੇਸੁ ਪਨਾ’’ਤਿਆਦਿ ਵੁਤ੍ਤਂ. ਅਜਿਤਂ ਜਿਨਾਤਿ ਮਹੇਸਕ੍ਖਤਾਸਂਵਤ੍ਤਨਿਯਕਮ੍ਮਨਿਸ੍ਸਨ੍ਦਭਾਵਤੋ. ਵਿਜਿਤੇ ਯਥਾਸੁਖਂ ਅਨੁਵਿਚਰਤਿ ਹਤ੍ਥਿਰਤਨਂ ਅਸ੍ਸਰਤਨਞ੍ਚ ਅਭਿਰੁਹਿਤ੍ਵਾ ਤੇਸਂ ਆਨੁਭਾਵੇਨ ਅਨ੍ਤੋਪਾਤਰਾਸੇਯੇਵ ਸਮੁਦ੍ਦਪਰਿਯਨ੍ਤਂ ਪਥਵਿਂ ਅਨੁਸਂਯਾਯਿਤ੍ਵਾ ਰਾਜਧਾਨਿਮੇਵ ਪਚ੍ਚਾਗਮਨਤੋ. ਪਰਿਣਾਯਕਰਤਨੇਨ ਵਿਜਿਤਮਨੁਰਕ੍ਖਤਿ ਤੇਨ ਤਤ੍ਥ ਤਤ੍ਥ ਕਾਤਬ੍ਬਕਿਚ੍ਚਸ੍ਸ ਸਂਵਿਧਾਨਤੋ. ਅਵਸੇਸੇਹੀਤਿ ਮਣਿਰਤਨਇਤ੍ਥਿਰਤਨਗਹਪਤਿਰਤਨੇਹਿ. ਤਤ੍ਥ ਮਣਿਰਤਨੇਨ ਯੋਜਨਪ੍ਪਮਾਣੇ ਪਦੇਸੇ ਅਨ੍ਧਕਾਰਂ ਵਿਧਮਿਤ੍ਵਾ ਆਲੋਕਦਸ੍ਸਨਾਦਿਨਾ ਸੁਖਮਨੁਭਵਤਿ, ਇਤ੍ਥਿਰਤਨੇਨ ਅਤਿਕ੍ਕਨ੍ਤਮਾਨੁਸਕਰੂਪਸਮ੍ਪਤ੍ਤਿਦਸ੍ਸਨਾਦਿਵਸੇਨ, ਗਹਪਤਿਰਤਨੇਨ ਇਚ੍ਛਿਤਿਚ੍ਛਿਤਮਣਿਕਨਕਰਜਤਾਦਿਧਨਪਟਿਲਾਭਵਸੇਨ.
ਉਸ੍ਸਾਹਸਤ੍ਤਿਯੋਗੋ ਤੇਨ ਕੇਨਚਿ ਅਪ੍ਪਟਿਹਤਾਣਾਚਕ੍ਕਭਾਵਸਿਦ੍ਧਿਤੋ ਪਚ੍ਛਿਮੇਨਾਤਿ ਪਰਿਣਾਯਕਰਤਨੇਨ. ਤਞ੍ਹਿ ਸਬ੍ਬਰਾਜਕਿਚ੍ਚੇਸੁ ਕੁਸਲਂ ਅਵਿਰਜ੍ਝਨਯੋਗਂ, ਤੇਨਾਹ ‘‘ਮਨ੍ਤਸਤ੍ਤਿਯੋਗੋ’’ਤਿ. ਹਤ੍ਥਿਅਸ੍ਸਰਤਨਾਨਂ ਮਹਾਨੁਭਾਵਤਾਯ ਕੋਸਸਮ੍ਪਤ੍ਤਿਯਾਪਿ ਪਭਾਵਸਮ੍ਪਤ੍ਤਿਸਿਦ੍ਧਿਤੋ ‘‘ਹਤ੍ਥਿ…ਪੇ… ਯੋਗੋ’’ਤਿ ਵੁਤ੍ਤਂ. (ਕੋਸੋ ਹਿ ਨਾਮ ਸਤਿ ਉਸ੍ਸਾਹਸਮ੍ਪਤ੍ਤਿਯਂ ਦੁਗ੍ਗਂ ਤੇਜਂ ਕੁਸੁਮੋਰਂ ਪਰਕ੍ਕਮਂ ਪਬ੍ਬਤੋਮੁਖਂ ਅਮੋਸਪਹਰਣਂ) ਤਿਵਿਧਸਤ੍ਤਿਯੋਗਫਲਂ ਪਰਿਪੁਣ੍ਣਂ ਹੋਤੀਤਿ ਸਮ੍ਬਨ੍ਧੋ. ਸੇਸੇਹੀਤਿ ਸੇਸੇਹਿ ਪਞ੍ਚਹਿ ਰਤਨੇਹਿ.
ਅਦੋਸਕੁਸਲਮੂਲਜਨਿਤਕਮ੍ਮਾਨੁਭਾਵੇਨਾਤਿ ਅਦੋਸਸਙ੍ਖਾਤੇਨ ਕੁਸਲਮੂਲੇਨ ਸਹਜਾਤਾਦਿਪਚ੍ਚਯਵਸੇਨ ਉਪ੍ਪਾਦਿਤਕਮ੍ਮਸ੍ਸ ਆਨੁਭਾਵੇਨ ਸਮ੍ਪਜ੍ਜਨ੍ਤਿ ਸੋਮ੍ਮਤਰਰਤਨਜਾਤਿਕਤ੍ਤਾ. ਮਜ੍ਝਿਮਾਨਿ ਮਣਿਇਤ੍ਥਿਗਹਪਤਿਰਤਨਾਨਿ. ਅਲੋਭ…ਪੇ… ਕਮ੍ਮਾਨੁਭਾਵੇਨ ਸਮ੍ਪਜ੍ਜਨ੍ਤਿ ਉਲ਼ਾਰਸ੍ਸ ਧਨਸ੍ਸ, ਉਲ਼ਾਰਧਨਪਟਿਲਾਭਕਾਰਣਸ੍ਸ ਚ ਪਰਿਚ੍ਚਾਗਸਮ੍ਪਦਾਹੇਤੁਕਤ੍ਤਾ. ਪਚ੍ਛਿਮਨ੍ਤਿ ਪਰਿਣਾਯਕਰਤਨਂ. ਤਞ੍ਹਿ ਅਮੋਹ…ਪੇ… ਕਮ੍ਮਾਨੁਭਾਵੇਨ ਸਮ੍ਪਜ੍ਜਤਿ ਮਹਾਪਞ੍ਞੇਨੇਵ ਚਕ੍ਕਵਤ੍ਤਿਰਾਜਕਿਚ੍ਚਸ੍ਸ ਪਰਿਣੇਤਬ੍ਬਤ੍ਤਾ. ਉਪਦੇਸੋ ਨਾਮ ਸਵਿਸੇਸਂ ਸਤ੍ਤਨ੍ਨਂ ਰਤਨਾਨਂ ਵਿਚਾਰਣਵਸੇਨ ਪਵਤ੍ਤੋ ਕਥਾਬਨ੍ਧੋ.
ਸਰਣਤੋ ਪਟਿਪਕ੍ਖਵਿਧਮਨਤੋ ਸੂਰਾ, ਤੇਨਾਹ ‘‘ਅਭੀਰੁਕਜਾਤਿਕਾ’’ਤਿ. ਅਸੁਰੇ ਵਿਜਿਨਿਤ੍ਵਾ ਠਿਤਤ੍ਤਾ ਵੀਰੋ, ਸਕ੍ਕੋ ਦੇਵਾਨਂ ਇਨ੍ਦੋ. ਤਸ੍ਸ ਅਙ੍ਗਂ ਦੇਵਪੁਤ੍ਤੋ ਸੇਨਙ੍ਗਭਾਵਤੋਤਿ ਵੁਤ੍ਤਂ ‘‘ਵੀਰਙ੍ਗਰੂਪਾਤਿ ਦੇਵਪੁਤ੍ਤਸਦਿਸਕਾਯਾ’’ਤਿ. ‘‘ਏਕੇ’’ਤਿ ਸਾਰਸਮਾਸਾਚਰਿਯਮਾਹ. ਸਭਾਵੋਤਿ ਸਭਾਵਭੂਤੋ ਅਤ੍ਥੋ. ਵੀਰਕਾਰਣਨ੍ਤਿ ਵੀਰਭਾਵਕਾਰਣਂ. ਵੀਰਿਯਮਯਸਰੀਰਾ ਵਿਯਾਤਿ ਸਵਿਗ੍ਗਹਵੀਰਿਯਸਦਿਸਾ, ਸਵਿਗ੍ਗਹਂ ਚੇ ਵੀਰਿਯਂ ਸਿਯਾ ਤਂਸਦਿਸਾਤਿ ਅਤ੍ਥੋ. ਨਨੁ ਰਞ੍ਞੋ ਚਕ੍ਕਵਤ੍ਤਿਸ੍ਸ ਪਟਿਸੇਨਾ ਨਾਮ ਨਤ੍ਥਿ, ਯ’ਮਸ੍ਸ ਪੁਤ੍ਤਾ ਪਮਦ੍ਦੇਯ੍ਯੁਂ, ਅਥ ਕਸ੍ਮਾ ਪਰਸੇਨਪ੍ਪਮਦ੍ਦਨਾਤਿ ਵੁਤ੍ਤਨ੍ਤਿ ਚੋਦਨਂ ਸਨ੍ਧਾਯਾਹ ਸਚੇਤਿਆਦਿ, ਤੇਨ ਪਰਸੇਨਾ ਹੋਤੁ ਵਾ ਮਾ ਵਾ ਤੇ ਪਨ ਏਵਂ ਮਹਾਨੁਭਾਵਾਤਿ ਦਸ੍ਸੇਤਿ. ਧਮ੍ਮੇਨਾਤਿ ਕਤੁਪਚਿਤੇਨ ਅਤ੍ਤਨੋ ਪੁਞ੍ਞਧਮ੍ਮੇਨ. ਤੇਨ ਹਿ ਸਞ੍ਚੋਦਿਤਾ ਪਥਵਿਯਂ ਸਬ੍ਬਰਾਜਾਨੋ ਪਚ੍ਚੁਗ੍ਗਨ੍ਤ੍ਵਾ ‘‘ਸ੍ਵਾਗਤਂ ਤੇ ਮਹਾਰਾਜਾ’’ਤਿ ਆਦਿਂ ਵਤ੍ਵਾ ਅਤ੍ਤਨੋ ਰਜ੍ਜਂ ਰਞ੍ਞੋ ਚਕ੍ਕਵਤ੍ਤਿਸ੍ਸ ਨਿਯ੍ਯਾਤੇਨ੍ਤਿ, ਤੇਨ ਵੁਤ੍ਤਂ ‘‘ਸੋ ਇਮਂ…ਪੇ… ਅਜ੍ਝਾਵਸਤੀ’’ਤਿ. ਅਟ੍ਠਕਥਾਯਂ ਪਨ ਤਸ੍ਸ ਯਥਾਵੁਤ੍ਤਸ੍ਸ ਧਮ੍ਮਸ੍ਸ ਚਿਰਤਰਂ ਵਿਪਚ੍ਚਿਤੁਂ ਪਚ੍ਚਯਭੂਤਂ ਚਕ੍ਕਵਤ੍ਤਿਵਤ੍ਤਸਮੁਦਾਗਤਂ ਪਯੋਗਸਮ੍ਪਤ੍ਤਿਸਙ੍ਖਾਤਂ ਧਮ੍ਮਂ ਦਸ੍ਸੇਤੁਂ ‘‘ਪਾਣੋ ਨ ਹਨ੍ਤਬ੍ਬੋਤਿਆਦਿਨਾ ਪਞ੍ਚਸੀਲਧਮ੍ਮੇਨਾ’’ਤਿ ਵੁਤ੍ਤਂ. ਏਵਞ੍ਹਿ ‘‘ਅਦਣ੍ਡੇਨ ਅਸਤ੍ਥੇਨਾ’’ਤਿ ਇਦਂ ਵਚਨਂ ਸੁਟ੍ਠੁਤਰਂ ਸਮਤ੍ਥਿਤਂ ਹੋਤੀਤਿ. ਯਸ੍ਮਾ ਰਾਗਾਦਯੋ ਪਾਪਧਮ੍ਮਾ ਉਪ੍ਪਜ੍ਜਮਾਨਾ ਸਤ੍ਤਸਨ੍ਤਾਨਂ ਛਾਦੇਤ੍ਵਾ ਪਰਿਯੋਨਨ੍ਧਿਤ੍ਵਾ ਤਿਟ੍ਠਨ੍ਤਿ ਕੁਸਲਪ੍ਪਵਤ੍ਤਿਂ ਨਿਵਾਰੇਨ੍ਤਿ, ਤਸ੍ਮਾ ਤੇ ‘‘ਛਦਨਾ, ਛਦਾ’’ਤਿ ਚ ਵੁਤ੍ਤਾ. ਵਿਵਟੇਤ੍ਵਾਤਿ ਵਿਗਮੇਤ੍ਵਾ. ਪੂਜਾਰਹਤਾ ਵੁਤ੍ਤਾ ‘‘ਅਰਹਤੀਤਿ ਅਰਹ’’ਨ੍ਤਿ. ਤਸ੍ਸਾ ਪੂਜਾਰਹਤਾਯ. ਯਸ੍ਮਾ ਸਮ੍ਮਾਸਮ੍ਬੁਦ੍ਧੋ, ਤਸ੍ਮਾ ਅਰਹਨ੍ਤਿ. ਬੁਦ੍ਧਤ੍ਤਹੇਤੁਭੂਤਾ ਵਿਵਟ੍ਟਚ੍ਛਦਤਾ ਵੁਤ੍ਤਾ ਸਵਾਸਨਸਬ੍ਬਕਿਲੇਸਪ੍ਪਹਾਨਪੁਬ੍ਬਕਤ੍ਤਾ ਬੁਦ੍ਧਭਾਵਸ੍ਸ.
ਅਰਹਂ ਵਟ੍ਟਾਭਾਵੇਨਾਤਿ ਫਲੇਨ ਹੇਤੁਅਨੁਮਾਨਦਸ੍ਸਨਂ. ਸਮ੍ਮਾਸਮ੍ਬੁਦ੍ਧੋ ਛਦਨਾਭਾਵੇਨਾਤਿ ਹੇਤੁਨਾ ਫਲਾਨੁਮਾਨਦਸ੍ਸਨਂ. ਹੇਤੁਦ੍ਵਯਂ ਵੁਤ੍ਤਂ ‘‘ਵਿਵਟ੍ਟੋ ਵਿਚ੍ਛਦੋ ਚਾ’’ਤਿ. ਦੁਤਿਯੇਨ ਵੇਸਾਰਜ੍ਜੇਨਾਤਿ ‘‘ਖੀਣਾਸਵਸ੍ਸ ਤੇ ਪਟਿਜਾਨਤੋ’’ਤਿਆਦਿਨਾ ਵੁਤ੍ਤੇਨ ਵੇਸਾਰਜ੍ਜੇਨ. ਪੁਰਿਮਸਿਦ੍ਧੀਤਿ ਪੁਰਿਮਸ੍ਸ ਪਦਸ੍ਸ ਅਤ੍ਥਸਿਦ੍ਧੀਤਿ ਅਤ੍ਥੋ. ਪਠਮੇਨਾਤਿ ‘‘ਸਮ੍ਮਾਸਮ੍ਬੁਦ੍ਧਸ੍ਸ ਤੇ ਪਟਿਜਾਨਤੋ’’ਤਿਆਦਿਨਾ (ਮ. ਨਿ. ੧.੧੫੦; ਅ. ਨਿ. ੪.੮) ਵੁਤ੍ਤੇਨ ਵੇਸਾਰਜ੍ਜੇਨ. ਦੁਤਿਯਸਿਦ੍ਧੀਤਿ ਦੁਤਿਯਸ੍ਸ ਪਦਸ੍ਸ ਅਤ੍ਥਸਿਦ੍ਧਿ, ਬੁਦ੍ਧਤ੍ਥਸਿਦ੍ਧੀਤਿ ਅਤ੍ਥੋ. ਤਤਿਯਚਤੁਤ੍ਥੇਹੀਤਿ ‘‘ਯੇ ਖੋ ਪਨ ਤੇ ਅਨ੍ਤਰਾਯਿਕਾ ਧਮ੍ਮਾ’’ਤਿਆਦਿਨਾ, (ਮ. ਨਿ. ੧.੧੫੦; ਅ. ਨਿ. ੪.੮) ‘‘ਯਸ੍ਸ ਖੋ ਪਨ ਤੇ ਅਤ੍ਥਾਯਾ’’ਤਿਆਦਿਨਾ (ਮ. ਨਿ. ੧.੧੫੦; ਅ. ਨਿ. ੪.੮) ਚ ਵੁਤ੍ਤੇਹਿ ਤਤਿਯਚਤੁਤ੍ਥੇਹਿ ਵੇਸਾਰਜ੍ਜੇਹਿ. ਤਤਿਯਸਿਦ੍ਧੀਤਿ ਵਿਵਟ੍ਟਚ੍ਛਦਨਤਾਸਿਦ੍ਧਿ ਯਾਥਾਵਤੋ ਅਨ੍ਤਰਾਯਿਕਨਿਯ੍ਯਾਨਿਕਧਮ੍ਮਾਪਦੇਸੇਨ ਹਿ ਸਤ੍ਥੁ ਵਿਵਟ੍ਟਚ੍ਛਦਨਭਾਵੋ ਲੋਕੇ ਪਾਕਟੋ ਅਹੋਸਿ. ਪੁਰਿਮਂ ਧਮ੍ਮਚਕ੍ਖੁਨ੍ਤਿ ਪੁਰਿਮਪਦਂ ਭਗਵਤੋ ਧਮ੍ਮਚਕ੍ਖੁਂ ਸਾਧੇਤਿ ਕਿਲੇਸਾਰੀਨਂ, ਸਂਸਾਰਚਕ੍ਕਸ੍ਸ ਚ ਅਰਾਨਂ ਹਤਭਾਵਦੀਪਨਤੋ. ਦੁਤਿਯਂ ਪਦਂ ਬੁਦ੍ਧਚਕ੍ਖੁਂ ਸਾਧੇਤਿ ਸਮ੍ਮਾਸਮ੍ਬੁਦ੍ਧਸ੍ਸੇਵ ਤਂਸਬ੍ਭਾਵਤੋ. ਤਤਿਯਂ ਪਦਂ ਸਮਨ੍ਤਚਕ੍ਖੁਂ ਸਾਧੇਤਿ ਸਵਾਸਨਸਬ੍ਬਕਿਲੇਸਪ੍ਪਹਾਨਦੀਪਨਤੋ. ‘‘ਸਮ੍ਮਾਸਮ੍ਬੁਦ੍ਧੋ’’ਤਿ ਹਿ ਵਤ੍ਵਾ ‘‘ਵਿਵਟ੍ਟਚ੍ਛਦੋ’’ਤਿ ਵਚਨਂ ਬੁਦ੍ਧਭਾਵਾਵਹਮੇਵ ਸਬ੍ਬਕਿਲੇਸਪ੍ਪਹਾਨਂ ਵਿਭਾਵੇਤਿ. ‘‘ਸੂਰਭਾਵ’’ਨ੍ਤਿ ਲਕ੍ਖਣਵਿਭਾਵਨੇ ਵਿਸਦਞਾਣਤਂ.
੨੫੯. ਏਵਂ ਭੋਤਿ ਏਤ੍ਥ ਏਵਨ੍ਤਿ ਵਚਨਸਮ੍ਪਟਿਚ੍ਛਨੇ ਨਿਪਾਤੋ. ਵਚਨਸਮ੍ਪਟਿਚ੍ਛਨਞ੍ਚੇਤ੍ਥ ‘‘ਤਥਾ ਮਯਂ ਤਂ ਭਵਨ੍ਤਂ ਗੋਤਮਂ ਵੇਦਿਸ੍ਸਾਮ, ਤ੍ਵਂ ਮਨ੍ਤਾਨਂ ਪਟਿਗ੍ਗਹੇਤਾ’’ਤਿ ਚ ਏਵਂ ਪਵਤ੍ਤਸ੍ਸ ਪੋਕ੍ਖਰਸਾਤਿਨੋ ਵਚਨਸ੍ਸ ਸਮ੍ਪਟਿਗ੍ਗਹੋਤਿ ਆਹ. ‘‘ਸੋਪਿ ਤਾਯਾ’’ਤਿਆਦਿ. ਤਤ੍ਥ ਤਾਯਾਤਿ ਤਾਯ ਯਥਾਵੁਤ੍ਤਾਯ ਸਮੁਤ੍ਤੇਜਨਾਯ. ਅਯਾਨਭੂਮਿਨ੍ਤਿ ਯਾਨਸ੍ਸ ਅਭੂਮਿਂ. ਦਿਵਾਪਧਾਨਿਕਾਤਿ ਦਿਵਾਪਧਾਨਾਨੁਯੁਞ੍ਜਨਕਾ.
੨੬੦. ਯਦਿਪਿ ਪੁਬ੍ਬੇ ਅਮ੍ਬਟ੍ਠਕੁਲਂ ਅਪ੍ਪਞ੍ਞਾਤਂ, ਤਦਾ ਪਨ ਪਞ੍ਞਾਯਤੀਤਿ ਆਹ ‘‘ਤਦਾ ਕਿਰਾ’’ਤਿਆਦਿ. ਅਤੁਰਿਤੋਤਿ ਅਵੇਗਾਯਨ੍ਤੋ.
੨੬੧. ਯਥਾ ਖਮਨੀਯਾਦੀਨਿ ਪੁਚ੍ਛਨ੍ਤੋਤਿ ਯਥਾ ਭਗਵਾ ‘‘ਕਚ੍ਚਿ ਵੋ ਮਾਣਵਾ ਖਮਨੀਯਂ, ਕਚ੍ਚਿ ਯਾਪਨੀਯ’’ਨ੍ਤਿਆਦਿਨਾ ਖਮਨੀਯਾਦੀਨਿ ਪੁਚ੍ਛਨ੍ਤੋ ਤੇਹਿ ਮਾਣਵੇਹਿ ਸਦ੍ਧਿਂ ਪਠਮਂ ਪਵਤ੍ਤਮੋਦੋ ਅਹੋਸਿ ਪੁਬ੍ਬਭਾਸਿਤਾਯ ਤਦਨੁਕਰਣੇਨ ਏਵਂ ਤੇਪਿ ਮਾਣਵਾ ਭਗਵਤਾ ਸਦ੍ਧਿਂ ਸਮਪ੍ਪਵਤ੍ਤਮੋਦਾ ਅਹੇਸੁਨ੍ਤਿ ਯੋਜਨਾ. ਤਂ ਪਨ ਸਮਪ੍ਪਵਤ੍ਤਮੋਦਤਂ ਉਪਮਾਯ ਦਸ੍ਸੇਤੁਂ ‘‘ਸੀਤੋਦਕਂ ਵਿਯਾ’’ਤਿਆਦਿ ਵੁਤ੍ਤਂ. ਤਤ੍ਥ ਸਮ੍ਮੋਦਿਤਨ੍ਤਿ ਸਂਸਨ੍ਦਿਤਂ. ਏਕੀਭਾਵਨ੍ਤਿ ਸਮ੍ਮੋਦਨਕਿਰਿਯਾਯ ਸਮਾਨਤਂ. ਖਮਨੀਯਨ੍ਤਿ ‘‘ਇਦਂ ਚਤੁਚਕ੍ਕਂ ਨਵਦ੍ਵਾਰਂ ਸਰੀਰਯਨ੍ਤਂ ਦੁਕ੍ਖਬਹੁਲਤਾਯ ਸਭਾਵਤੋ ਦੁਸ੍ਸਹਂ ਕਚ੍ਚਿ ਖਮਿਤੁਂ ਸਕ੍ਕੁਣੇਯ੍ਯ’’ਨ੍ਤਿ ਪੁਚ੍ਛਨ੍ਤਿ, ਯਾਪਨੀਯਨ੍ਤਿ ਆਹਾਰਾਦਿਪਚ੍ਚਯਪਟਿਬਦ੍ਧਵੁਤ੍ਤਿਕਂ ਚਿਰਪ੍ਪਬਨ੍ਧਸਙ੍ਖਾਤਾਯ ਯਾਪਨਾਯ ਕਚ੍ਚਿ ਯਾਪੇਤੁਂ ਸਕ੍ਕੁਣੇਯ੍ਯਂ. ਸੀਸਰੋਗਾਦਿਆਬਾਧਾਭਾਵੇਨ ਕਚ੍ਚਿ ਅਪ੍ਪਾਬਾਧਂ, ਦੁਕ੍ਖਜੀਵਿਕਾਭਾਵੇਨ ਕਚ੍ਚਿ ਅਪ੍ਪਾਤਙ੍ਕਂ, ਤਂਤਂਕਿਚ੍ਚਕਰਣੇ ਉਟ੍ਠਾਨਸੁਖਤਾਯ ਕਚ੍ਚਿ ਲਹੁਟ੍ਠਾਨਂ, ਤਦਨੁਰੂਪਬਲਯੋਗਤੋ ਕਚ੍ਚਿ ਬਲਂ, ਸੁਖਵਿਹਾਰਸਬ੍ਭਾਵੇਨ ਕਚ੍ਚਿ ਫਾਸੁਵਿਹਾਰੋ ਅਤ੍ਥੀਤਿ ਸਬ੍ਬਤ੍ਥ ਕਚ੍ਚਿ-ਸਦ੍ਦਂ ਯੋਜੇਤ੍ਵਾ ਅਤ੍ਥੋ ਵੇਦਿਤਬ੍ਬੋ. ਬਲਪ੍ਪਤ੍ਤਾ ਪੀਤਿ ਪੀਤਿਯੇਵ. ਤਰੁਣਪੀਤਿ ਪਾਮੋਜ੍ਜਂ. ਸਮ੍ਮੋਦਨਂ ਜਨੇਤਿ ਕਰੋਤੀਤਿ ਸਮ੍ਮੋਦਨਿਕਂ ਤਦੇਵ ਸਮ੍ਮੋਦਨੀਯਂ. ਸਮ੍ਮੋਦਿਤਬ੍ਬਤੋ ਸਮ੍ਮੋਦਨੀਯਨ੍ਤਿ ਇਦਂ ਪਨ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸਮ੍ਮੋਦਿਤੁਂ ਯੁਤ੍ਤਭਾਵਤੋ’’ਤਿ. ਸਰਿਤਬ੍ਬਭਾਵਤੋ ਅਨੁਸ੍ਸਰਿਤਬ੍ਬਭਾਵਤੋ ‘‘ਸਰਣੀਯ’’ਨ੍ਤਿ ਵਤ੍ਤਬ੍ਬੇ ‘‘ਸਾਰਣੀਯ’’ਨ੍ਤਿ ਦੀਘਂ ਕਤ੍ਵਾ ਵੁਤ੍ਤਂ. ‘‘ਸੁਯ੍ਯਮਾਨਸੁਖਤੋ’’ਤਿ ਆਪਾਥਮਧੁਰਤਮਾਹ, ‘‘ਅਨੁਸ੍ਸਰਿਯਮਾਨਸੁਖਤੋ’’ਤਿ ਵਿਮਦ੍ਦਰਮਣੀਯਤਂ. ‘‘ਬ੍ਯਞ੍ਜਨਪਰਿਸੁਦ੍ਧਤਾਯਾ’’ਤਿ ਸਭਾਵਨਿਰੁਤ੍ਤਿਭਾਵੇਨ ਤਸ੍ਸਾ ਕਥਾਯ ਵਚਨਚਾਤੁਰਿਯਮਾਹ, ‘‘ਅਤ੍ਥਪਰਿਸੁਦ੍ਧਤਾਯਾ’’ਤਿ ਅਤ੍ਥਸ੍ਸ ਨਿਰੁਪਕ੍ਕਿਲੇਸਤਂ. ਅਨੇਕੇਹਿ ਪਰਿਯਾਯੇਹੀਤਿ ਅਨੇਕੇਹਿ ਕਾਰਣੇਹਿ.
ਅਪਸਾਦੇਸ੍ਸਾਮੀਤਿ ਮਙ੍ਕੁਂ ਕਰਿਸ੍ਸਾਮਿ. ਕਣ੍ਠੇ ਓਲਮ੍ਬੇਤ੍ਵਾਤਿ ਉਭੋਸੁ ਖਨ੍ਧੇਸੁ ਸਾਟਕਂ ਆਸਜ੍ਜੇਤ੍ਵਾ ਕਣ੍ਠੇ ਓਲਮ੍ਬਿਤ੍ਵਾ. ਦੁਸ੍ਸਕਣ੍ਣਂ ਗਹੇਤ੍ਵਾਤਿ ਨਿਵਤ੍ਥਸਾਟਕਸ੍ਸ ਦਸਾਕੋਟਿਂ ਏਕੇਨ ਹਤ੍ਥੇਨ ਗਹੇਤ੍ਵਾ. ਚਙ੍ਕਮਂ ਅਭਿਰੁਹਿਤ੍ਵਾਤਿ ਚਙ੍ਕਮਿਤੁਂ ਆਰਭਿਤ੍ਵਾ. ਧਾਤੁਸਮਤਾਤਿ ਰਸਾਦਿਧਾਤੂਨਂ ਸਮਾਵਤ੍ਥਤਾ, ਅਰੋਗਤਾਤਿ ਅਤ੍ਥੋ. ਅਨਾਚਾਰਭਾਵਸਾਰਣੀਯਨ੍ਤਿ ਅਨਾਚਾਰਭਾਵੇਨ ਸਰਣੀਯਂ. ‘‘ਅਨਾਚਾਰੋ ਵਤਾਯ’’ਨ੍ਤਿ ਸਰਿਤਬ੍ਬਕਂ.
੨੬੨. ‘‘ਭਵਗ੍ਗਂ ਗਹੇਤੁਕਾਮੋ ਵਿਯਾ’’ਤਿਆਦਿ ਅਸਕ੍ਕੁਣੇਯ੍ਯਤ੍ਤਾ ਦੁਕ੍ਕਰਂ ਕਿਚ੍ਚਂ ਆਰਭਤੀਤਿ ਦਸ੍ਸੇਤੁਂ ਵੁਤ੍ਤਂ. ਅਸਕ੍ਕੁਣੇਯ੍ਯਞ੍ਹੇਤਂ ਸਦੇਵਕੇਨਾਪਿ ਲੋਕੇਨ, ਯਦਿਦਂ ਭਗਵਤੋ ਅਪਸਾਦਨਂ, ਤੇਨਾਹ ‘‘ਅਟ੍ਠਾਨੇ ਵਾਯਮਤੀ’’ਤਿ. ਅਯਂ ਬਾਲੋ ‘‘ਮਯਿ ਕਿਞ੍ਚਿ ਅਕਥੇਨ੍ਤੇ ਮਯਾ ਸਦ੍ਧਿਂ ਕਥੇਤੁਮ੍ਪਿ ਨ ਵਿਸਹਤੀ’’ਤਿ ਮਾਨਮੇਵ ਪਗ੍ਗਣ੍ਹਿਸ੍ਸਤਿ, ਕਥੇਨ੍ਤੇ ਪਨ ਕਥਾਪਸਙ੍ਗੇਨਸ੍ਸ ਜਾਤਿਗੋਤ੍ਤੇ ਵਿਭਾਵਿਤੇ ਮਾਨਨਿਗ੍ਗਹੋ ਭਵਿਸ੍ਸਤੀਤਿ ਭਗਵਾ ‘‘ਏਵਂ ਨੁ ਤੇ’’ਤਿਆਦਿਮਾਹ. ਤੇਨ ਵੁਤ੍ਤਂ ‘‘ਅਥ ਖੋ ਭਗਵਾ’’ਤਿਆਦਿ. ਆਚਾਰਸਮਾਚਾਰਸਿਕ੍ਖਾਪਨੇਨ ਆਚਰਿਯਾ, ਤੇਸਂ ਪਨ ਆਚਰਿਯਾਨਂ ਪਕਟ੍ਠਾ ਆਚਰਿਯਾਤਿ ਪਾਚਰਿਯਾ ਯਥਾ ਪਪਿਤਾਮਹੋਤਿ, ਤੇਨਾਹ ‘‘ਆਚਰਿਯੇਹਿ ਚ ਤੇਸਂ ਪਾਚਰਿਯੇਹਿ ਚਾ’’ਤਿ.
ਪਠਮਇਬ੍ਭਵਾਦਵਣ੍ਣਨਾ
੨੬੩. ਤੀਸੁ ਇਰਿਯਾਪਥੇਸੂਤਿ ਠਾਨਗਮਨਨਿਸਜ੍ਜਾਸੁ. ਕਥਾਪਲ਼ਾਸਨ੍ਤਿ ਕਥਾਵਸੇਨ ਯੁਗਗ੍ਗਾਹਂ. ਸਯਾਨੇਨ ਆਚਰਿਯੇਨ ਸਦ੍ਧਿਂ ਸਯਾਨਸ੍ਸ ਕਥਾ ਨਾਮ ਆਚਾਰੋ ਨ ਹੋਤਿ, ਤਂ ਇਤਰੇਹਿ ਸਦਿਸਂ ਕਤ੍ਵਾ ਕਥਨਂ ਇਧ ਕਥਾਪਲ਼ਾਸੋ.
ਤਸ੍ਸ ਪਨ ਯਂ ਅਨਾਚਾਰਭਾਵਵਿਭਾਵਨਂ ਸਤ੍ਥਾਰਾ ਅਮ੍ਬਟ੍ਠੇਨ ਸਦ੍ਧਿਂ ਕਥੇਨ੍ਤੇਨ ਕਤਂ, ਤਂ ਸਙ੍ਗੀਤਿਅਨਾਰੁਲ਼੍ਹਂ ਪਰਮ੍ਪਰਾਭਤਨ੍ਤਿ ਉਪਰਿ ਪਾਲ਼ਿਯਾ ਸਮ੍ਬਨ੍ਧਭਾਵੇਨ ਦਸ੍ਸੇਨ੍ਤੋ ‘‘ਤਤੋ ਕਿਰਾ’’ਤਿਆਦਿਮਾਹ. ਮੁਣ੍ਡਕਾ ਸਮਣਕਾਤਿ ਚ ਗਰਹਾਯਂ ਕ-ਸਦ੍ਦੋ, ਤੇਨਾਹ ‘‘ਹੀਲ਼ੇਨ੍ਤੋ’’ਤਿ. ਇਭਸ੍ਸ ਪਯੋਗੋ ਇਭੋ ਉਤ੍ਤਰਪਦਲੋਪੇਨ, ਤਂ ਇਭਂ ਅਰਹਨ੍ਤੀਤਿ ਇਬ੍ਭਾ. ਕਿਂ ਵੁਤ੍ਤਂ ਹੋਤਿ? ਯਥਾ ਇਭੋ ਹਤ੍ਥਿਵਾਹਨਭੂਤੋ ਪਰਸ੍ਸ ਵਸੇਨ ਵਤ੍ਤਤਿ, ਨ ਅਤ੍ਤਨੋ, ਏਵਂ ਏਤੇਪਿ ਬ੍ਰਾਹ੍ਮਣਾਨਂ ਸੁਸ੍ਸੁਸਕਾ ਸੁਦ੍ਦਾ ਪਰਸ੍ਸ ਵਸੇਨ ਵਤ੍ਤਨ੍ਤਿ, ਨ ਅਤ੍ਤਨੋ, ਤਸ੍ਮਾ ਇਭਸਦਿਸਪਯੋਗਤਾਯ ਇਬ੍ਭਾਤਿ. ਤੇ ਪਨ ਕੁਟੁਮ੍ਬਿਕਤਾਯ ਘਰਵਾਸਿਨੋ ਘਰਸ੍ਸਾਮਿਕਾ ਹੋਨ੍ਤੀਤਿ ਆਹ ‘‘ਗਹਪਤਿਕਾ’’ਤਿ. ਕਣ੍ਹਾਤਿ ਕਣ੍ਹਜਾਤਿਕਾ. ਦਿਜਾ ਏਵ ਹਿ ਸੁਦ੍ਧਜਾਤਿਕਾ, ਨ ਇਤਰੇਤਿ ਤਸ੍ਸ ਅਧਿਪ੍ਪਾਯੋ, ਤੇਨਾਹ ‘‘ਕਾਲ਼ਕਾ’’ਤਿ. ਮੁਖਤੋ ਨਿਕ੍ਖਨ੍ਤਾਤਿ ਬ੍ਰਾਹ੍ਮਣਾਨਂ ਪੁਬ੍ਬਪੁਰਿਸਾ ਬ੍ਰਹ੍ਮੁਨੋ ਮੁਖਤੋ ਨਿਕ੍ਖਨ੍ਤਾ, ਅਯਂ ਤੇਸਂ ਪਠਮੁਪ੍ਪਤ੍ਤੀਤਿ ਅਧਿਪ੍ਪਾਯੋ. ਸੇਸਪਦੇਸੁਪਿ ਏਸੇਵ ਨਯੋ. ‘‘ਸਮਣਾ ਪਿਟ੍ਠਿਪਾਦਤੋ’’ਤਿ ਇਦਂ ਪਨਸ੍ਸ ‘‘ਮੁਖਤੋ ਨਿਕ੍ਖਨ੍ਤਾ’’ਤਿਆਦਿਵਚਨਤੋਪਿ ਅਤਿਵਿਯ ਅਸਮਵੇਕ੍ਖਿਤਵਚਨਂ ਚਤੁਵਣ੍ਣਪਰਿਯਾਪਨ੍ਨਸ੍ਸੇਵ ਸਮਣਭਾਵਸਮ੍ਭਵਤੋ. ਅਨਿਯਮੇਤ੍ਵਾਤਿ ਅਵਿਸੇਸੇਤ੍ਵਾ, ਅਨੁਦ੍ਦੇਸਿਕਭਾਵੇਨਾਤਿ ਅਤ੍ਥੋ.
ਮਾਨੁਸ੍ਸਯਵਸੇਨ ਕਥੇਤੀਤਿ ਮਾਨੁਸ੍ਸਯਂ ਅਵਸ੍ਸਾਯ ਅਤ੍ਤਾਨਂ ਉਕ੍ਕਂਸੇਨ੍ਤੋ, ਪਰੇ ਚ ਵਮ੍ਭੇਨ੍ਤੋ ‘‘ਮੁਣ੍ਡਕਾ’’ਤਿ ਆਦਿਂ ਕਥੇਤਿ. ਜਾਨਾਪੇਮੀਤਿ ਜਾਤਿਗੋਤ੍ਤਸ੍ਸ ਪਮਾਣਂ ਯਾਥਾਵਤੋ ਵਿਭਾਵਨੇਨ ਪਮਾਣਂ ਜਾਨਾਪੇਮੀਤਿ. ਅਤ੍ਥੋ ਏਤਸ੍ਸ ਅਤ੍ਥੀਤਿ ਅਤ੍ਥਿਕਂ ਦਣ੍ਡਿਕਞਾਯੇਨ.
‘‘ਯਾਯੇਵ ਖੋ ਪਨਤ੍ਥਾਯਾ’’ਤਿ ਇਤ੍ਥਿਲਿਙ੍ਗਵਸੇਨ ਵੁਤ੍ਤਨ੍ਤਿ ਵਦਨ੍ਤਿ, ਤਂ ਪਰਤੋ ‘‘ਪੁਰਿਸਲਿਙ੍ਗਵਸੇਨੇਵਾ’’ਤਿ ਵਕ੍ਖਮਾਨਤ੍ਤਾ ਯੁਤ੍ਤਂ. ਯਾਯ ਅਤ੍ਥਾਯਾਤਿ ਵਾ ਪੁਲ੍ਲਿਙ੍ਗਵਸੇਨੇਵ ਤਦਤ੍ਥੇ ਸਮ੍ਪਦਾਨਵਚਨਂ, ਯਸ੍ਸ ਅਤ੍ਥਸ੍ਸ ਅਤ੍ਥਾਯਾਤਿ ਅਤ੍ਥੋ. ਅਸ੍ਸਾਤਿ ਅਮ੍ਬਟ੍ਠਸ੍ਸ ਦਸ੍ਸੇਤ੍ਵਾਤਿ ਸਮ੍ਬਨ੍ਧੋ. ਅਞ੍ਞੇਸਨ੍ਤਿ ਅਞ੍ਞੇਸਂ ਸਾਧੁਰੂਪਾਨਂ. ਸਨ੍ਤਿਕਂ ਆਗਤਾਨਨ੍ਤਿ ਗੁਰੁਟ੍ਠਾਨਿਯਾਨਂ ਸਨ੍ਤਿਕਂ ਉਪਗਤਾਨਂ. ਵਤ੍ਤਨ੍ਤਿ ਤੇਹਿ ਚਰਿਤਬ੍ਬਆਚਾਰਂ. ਅਸਿਕ੍ਖਿਤੋਤਿ ਆਚਾਰਂ ਅਸਿਕ੍ਖਿਤੋ. ਤਤੋ ਏਵ ਅਪ੍ਪਸ੍ਸੁਤੋ. ਬਾਹੁਸਚ੍ਚਞ੍ਹਿ ਨਾਮ ਯਾਵਦੇਵ ਉਪਸਮਤ੍ਥਂ ਇਚ੍ਛਿਤਬ੍ਬਂ, ਤਦਭਾਵਤੋ ਅਮ੍ਬਟ੍ਠੋ ਅਪ੍ਪਸ੍ਸੁਤੋ ਅਸਿਕ੍ਖਿਤੋ ‘‘ਅਵੁਸਿਤੋ’’ਤਿ ਵਿਞ੍ਞਾਯਤਿ, ਤੇਨਾਹ ‘‘ਏਤਸ੍ਸ ਹੀ’’ਤਿਆਦਿ.
੨੬੪. ਕੋਧਵਸਚਿਤ੍ਤਤਾਯ ਅਸਕਮਨੋ. ਮਾਨਨਿਮ੍ਮਦਨਤ੍ਥਨ੍ਤਿ ਮਾਨਸ੍ਸ ਨਿਮ੍ਮਦਨਤ੍ਥਂ. ਉਗ੍ਗਿਲੇਤ੍ਵਾਤਿ ਸਿਨੇਹਪਾਨੇਨ ਕਿਲਿਨ੍ਨਂ ਉਬ੍ਬਮਨਂ ਕਤ੍ਵਾ. ਗੋਤ੍ਤੇਨ ਗੋਤ੍ਤਨ੍ਤਿ ਤੇਨ ਵੁਤ੍ਤੇਨ ਪੁਰਾਤਨਗੋਤ੍ਤੇਨ ਇਦਾਨਿ ਤਂ ਤਂ ਅਨਵਜ੍ਜਸਞ੍ਞਿਤਂ ਗੋਤ੍ਤਂ ਸਾਵਜ੍ਜਤੋ ਉਟ੍ਠਾਪੇਤ੍ਵਾ ਉਦ੍ਧਰਿਤ੍ਵਾ. ਸੇਸਪਦੇਸੁਪਿ ਏਸੇਵ ਨਯੋ. ਤਤ੍ਥ ਗੋਤ੍ਤਂ ਆਦਿਪੁਰਿਸਵਸੇਨ, ਕੁਲਾਪਦੋਸੋ, ਤਦਨ੍ਵਯੇ ਉਪ੍ਪਨ੍ਨਅਭਿਞ੍ਞਾਤਪੁਰਿਸਵਸੇਨ ਵੇਦਿਤਬ੍ਬੋ ਯਥਾ ‘‘ਆਦਿਚ੍ਚੋ, ਮਘਦੇਵੋ’’ਤਿ. ਗੋਤ੍ਤਮੂਲਸ੍ਸ ਗਾਰਯ੍ਹਤਾਯ ਅਮਾਨਵਤ੍ਥੁਭਾਵਪਵੇਦਨਤੋ ‘‘ਮਾਨਦ੍ਧਜਂ ਮੂਲੇ ਛੇਤ੍ਵਾ’’ਤਿ ਵੁਤ੍ਤਂ. ਘਟ੍ਟੇਨ੍ਤੋਤਿ ਓਮਸਨ੍ਤੋ.
ਯਸ੍ਮਿਂ ਮਾਨੁਸ੍ਸਯਕੋਧੁਸ੍ਸਯਾ ਅਞ੍ਞਮਞ੍ਞੂਪਤ੍ਥਦ੍ਧਾ, ਸੋ ‘‘ਚਣ੍ਡੋ’’ਤਿ ਵੁਚ੍ਚਤੀਤਿ ਆਹ ‘‘ਚਣ੍ਡਾਤਿ ਮਾਨਨਿਸ੍ਸਿਤਕੋਧਯੁਤ੍ਤਾ’’ਤਿ. ਖਰਾਤਿ ਚਿਤ੍ਤੇਨ, ਵਾਚਾਯ ਚ ਕਕ੍ਖਲ਼ਾ. ਲਹੁਕਾਤਿ ਤਰੁਣਾ. ਭਸ੍ਸਾਤਿ ‘‘ਸਾਹਸਿਕਾ’’ਤਿ ਕੇਚਿ ਵਦਨ੍ਤਿ, ‘‘ਸਾਰਮ੍ਭਕਾ’’ਤਿ ਅਪਰੇ. ਸਮਾਨਾਤਿ ਹੋਨ੍ਤਾ, ਭਵਮਾਨਾਤਿ ਅਤ੍ਥੋਤਿ ਆਹ ‘‘ਸਨ੍ਤਾਤਿ ਪੁਰਿਮਪਦਸ੍ਸੇਵ ਵੇਵਚਨ’’ਨ੍ਤਿ. ਨ ਸਕ੍ਕਰੋਨ੍ਤੀਤਿ ਸਕ੍ਕਾਰਂ ਨ ਕਰੋਨ੍ਤਿ. ਅਪਚਿਤਿਕਮ੍ਮਨ੍ਤਿ ਪਣਿਪਾਤਕਮ੍ਮ ਨਾਨੁਲੋਮਨ੍ਤਿ ਅਤ੍ਤਨੋ ਜਾਤਿਯਾ ਨ ਅਨੁਚ੍ਛਵਿਕਨ੍ਤਿ ਅਤ੍ਥੋ.
ਦੁਤਿਯਇਬ੍ਭਵਾਦਵਣ੍ਣਨਾ
੨੬੫. ਕਾਮਂ ਸਕ੍ਯਰਾਜਕੁਲੇ ਯੋ ਸਬ੍ਬੇਸਂ ਬੁਦ੍ਧਤਰੋ ਸਮਤ੍ਥੋ ਚ, ਸੋ ਏਵ ਅਭਿਸੇਕਂ ਲਭਤਿ, ਏਕਚ੍ਚੋ ਪਨ ਅਭਿਸਿਤ੍ਤੋ ਸਮਾਨੋ ‘‘ਇਦਂ ਰਜ੍ਜਂ ਨਾਮ ਬਹੁਕਿਚ੍ਚਂ ਬਹੁਬ੍ਯਾਪਾਰ’’ਨ੍ਤਿ ਤਤੋ ਨਿਬ੍ਬਿਜ੍ਜ ਰਜ੍ਜਂ ਵਯਸਾ ਅਨਨ੍ਤਰਸ੍ਸ ਨਿਯ੍ਯਾਤੇਤਿ, ਕਦਾਚਿ ਸੋਪਿ ਅਞ੍ਞਸ੍ਸਾਤਿ ਤਾਦਿਸੇ ਸਨ੍ਧਾਯਾਹ ‘‘ਸਕ੍ਯਾਤਿ ਅਭਿਸਿਤ੍ਤਰਾਜਾਨੋ’’ਤਿ. ਕੁਲਵਂਸਂ ਜਾਨਨ੍ਤੀਤਿ ਕਣ੍ਹਾਯਨਤੋ ਪਟ੍ਠਾਯ ਪਰਮ੍ਪਰਾਗਤਂ ਅਨੁਸ੍ਸਵਵਸੇਨ ਜਾਨਨ੍ਤਿ. ਕੁਲਾਭਿਮਾਨਿਨੋ ਹਿ ਯੇਭੁਯ੍ਯੇਨ ਪਰੇਸਂ ਉਚ੍ਚਾਵਚਂ ਕੁਲਂ ਤਥਾ ਤਥਾ ਉਦਾਹਰਨ੍ਤਿ, ਅਤ੍ਤਨੋ ਚ ਕੁਲਵਂਸਂ ਜਾਨਨ੍ਤਿ, ਏਵਂ ਅਮ੍ਬਟ੍ਠੋਪਿ. ਤਥਾ ਹਿ ਸੋ ਪਰਤੋ ਭਗਵਤਾ ਪੁਚ੍ਛਿਤੋ ਵਜਿਰਪਾਣਿਭਯੇਨ ਯਾਥਾਵਤੋ ਕਥੇਸਿ.
ਤਤਿਯਇਬ੍ਭਵਾਦਵਣ੍ਣਨਾ
੨੬੬. ਖੇਤ੍ਤਲੇਡ੍ਡੂਨਨ੍ਤਿ ਖੇਤ੍ਤੇ ਕਸਨਵਸੇਨ ਨਙ੍ਗਲੇਨ ਉਟ੍ਠਾਪਿਤਲੇਡ੍ਡੂਨਂ. ‘‘ਲਟੁਕਿਕਾ’’ ਇਚ੍ਚੇਵ ਪਞ੍ਞਾਤਾ ਖੁਦ੍ਦਕਸਕੁਣਿਕਾ ਲਟੁਕਿਕੋਪਮਵਣ੍ਣਨਾਯਂ ‘‘ਚਾਤਕਸਕੁਣਿਕਾ’’ਤਿ (ਮ. ਨਿ. ਅਟ੍ਠ. ੩.੧੫੦) ਵੁਤ੍ਤਾ. ਕੋਧਵਸੇਨ ਲਗ੍ਗਿਤੁਨ੍ਤਿ ਉਪਨਯ੍ਹਿਤੁਂ, ਆਘਾਤਂ ਬਨ੍ਧਿਤੁਨ੍ਤਿ ਅਤ੍ਥੋ. ‘‘ਅਮ੍ਹੇ ਹਂਸਕੋਞ੍ਚਮੋਰਸਮੇ ਕਰੋਤੀ’’ਤਿ ਇਮਿਨਾ ‘‘ਨ ਤਂ ਕੋਚਿ ਹਂਸੋ ਵਾ’’ਤਿਆਦਿਵਚਨਂ ਸਙ੍ਗੀਤਿਂ ਅਨਾਰੁਲ਼੍ਹਂ ਤਦਾ ਭਗਵਤਾ ਵੁਤ੍ਤਮੇਵਾਤਿ ਦਸ੍ਸੇਤਿ. ‘‘ਏਵਂ ਨੁ ਤੇ’’ਤਿਆਦਿਵਚਨਂ, ‘‘ਅਵੁਸਿਤਵਾਯੇਵਾ’’ਤਿਆਦਿਵਚਨਞ੍ਚ ਮਾਨਵਸੇਨ ਸਮਣੇਨ ਗੋਤਮੇਨ ਵੁਤ੍ਤਨ੍ਤਿ ਮਞ੍ਞਤੀਤਿ ਅਧਿਪ੍ਪਾਯੇਨਾਹ ‘‘ਨਿਮ੍ਮਾਨੋ ਦਾਨਿ ਜਾਤੋਤਿ ਮਞ੍ਞਮਾਨੋ’’ਤਿ.
ਦਾਸਿਪੁਤ੍ਤਵਾਦਵਣ੍ਣਨਾ
੨੬੭. ਨਿਮ੍ਮਾਦੇਤੀਤਿ ਅ-ਕਾਰਸ੍ਸ ਆ-ਕਾਰਂ ਕਤ੍ਵਾ ਨਿਦ੍ਦੇਸੋਤਿ ਆਹ ‘‘ਨਿਮ੍ਮਦੇਤੀ’’ਤਿ. ਕਾਮਂ ਗੋਤ੍ਤਂ ਨਾਮੇਤਂ ਪਿਤਿਤੋ ਲਦ੍ਧਬ੍ਬਂ, ਨ ਮਾਤਿਤੋ ਨ ਹਿ ਬ੍ਰਾਹ੍ਮਣਾਨਂ ਸਗੋਤ੍ਤਾਯ ਆਵਾਹਵਿਵਾਹੋ ਇਚ੍ਛਿਤੋ, ਗੋਤ੍ਤਨਾਮਂ ਪਨ ਯਸ੍ਮਾ ਜਾਤਿਸਿਦ੍ਧਂ, ਨ ਕਿਤ੍ਤਿਮਂ, ਜਾਤਿ ਚ ਉਭਯਸਮ੍ਬਨ੍ਧਿਨੀ, ਤਸ੍ਮਾ ‘‘ਮਾਤਾਪੇਤ੍ਤਿਕਨ੍ਤਿ ਮਾਤਾਪਿਤੂਨਂ ਸਨ੍ਤਕ’’ਨ੍ਤਿ ਵੁਤ੍ਤਂ. ਨਾਮਗੋਤ੍ਤਨ੍ਤਿ ਗੋਤ੍ਤਨਾਮਂ, ਨ ਕਿਤ੍ਤਿਮਨਾਮਂ, ਨ ਗੁਣਨਾਮਂ ਵਾ. ਤਤ੍ਥ ‘‘ਕਣ੍ਹਾਯਨੋ’’ਤਿ ਨਿਰੁਲ਼੍ਹਾ ਯਾ ਨਾਮਪਣ੍ਣਤ੍ਤਿ, ਤਂ ਸਨ੍ਧਾਯਾਹ ‘‘ਪਣ੍ਣਤ੍ਤਿਵਸੇਨ ਨਾਮਨ੍ਤਿ. ਤਂ ਪਨ ਕਣ੍ਹਇਸਿਤੋ ਪਟ੍ਠਾਯ ਤਸ੍ਮਿਂ ਕੁਲਪਰਮ੍ਪਰਾਵਸੇਨ ਆਗਤਂ, ਨ ਏਤਸ੍ਮਿਂਯੇਵ ਨਿਰੁਲ਼੍ਹਂ, ਤੇਨ ਵੁਤ੍ਤਂ ‘‘ਪਵੇਣੀਵਸੇਨ ਗੋਤ੍ਤ’’ਨ੍ਤਿ. ਗੋਤ੍ਤ-ਪਦਸ੍ਸ ਪਨ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਅਨੁਸ੍ਸਰਤੋਤਿ ਏਤ੍ਥ ਨ ਕੇਵਲਂ ਅਨੁਸ੍ਸਰਣਂ ਅਧਿਪ੍ਪੇਤਂ, ਅਥ ਖੋ ਕੁਲਸੁਦ੍ਧਿਵੀਮਂਸਨਵਸੇਨਾਤਿ ਆਹ ‘‘ਕੁਲਕੋਟਿਂ ਸੋਧੇਨ੍ਤਸ੍ਸਾ’’ਤਿ. ਅਯ੍ਯਪੁਤ੍ਤਾਤਿ ਅਯ੍ਯਿਕਪੁਤ੍ਤਾਤਿ ਆਹ ‘‘ਸਾਮਿਨੋ ਪੁਤ੍ਤਾ’’ਤਿ. ਦਿਸਾ ਓਕ੍ਕਾਕਰਞ੍ਞੋ ਅਨ੍ਤੋਜਾਤਾ ਦਾਸੀਤਿ ਆਹ ‘‘ਘਰਦਾਸਿਯਾ ਪੁਤ੍ਤੋ’’ਤਿ. ਏਤ੍ਥ ਚ ਯਸ੍ਮਾ ਅਮ੍ਬਟ੍ਠੋ ਜਾਤਿਂ ਨਿਸ੍ਸਾਯ ਮਾਨਤ੍ਥਦ੍ਧੋ, ਨ ਚਸ੍ਸ ਯਾਥਾਵਤੋ ਜਾਤਿਯਾ ਅਵਿਭਾਵਿਤਾਯ ਮਾਨਨਿਗ੍ਗਹੋ ਹੋਤਿ, ਮਾਨਨਿਗ੍ਗਹੇ ਚ ਕਤੇ ਅਪਰਭਾਗੇ ਰਤਨਤ੍ਤਯੇ ਪਸੀਦਿਸ੍ਸਤਿ, ਨ ‘‘ਦਾਸੀ’’ਤਿ ਵਾਚਾ ਫਰੁਸਵਾਚਾ ਨਾਮ ਹੋਤਿ ਚਿਤ੍ਤਸ੍ਸ ਸਣ੍ਹਭਾਵਤੋ. ਅਭਯਸੁਤ੍ਤਞ੍ਚੇਤ੍ਥ (ਮ. ਨਿ. ੨.੮੩; ਅ. ਨਿ. ੪.੧੮੪) ਨਿਦਸ੍ਸਨਂ. ਕੇਚਿ ਚ ਸਤ੍ਤਾ ਅਗ੍ਗਿਨਾ ਵਿਯ ਲੋਹਾਦਯੋ ਕਕ੍ਖਲ਼ਾਯ ਵਾਚਾਯ ਮੁਦੁਭਾਵਂ ਗਚ੍ਛਨ੍ਤਿ, ਤਸ੍ਮਾ ਭਗਵਾ ਅਮ੍ਬਟ੍ਠਂ ਨਿਬ੍ਬਿਸੇਵਨਂ ਕਾਤੁਕਾਮੋ ‘‘ਅਯ੍ਯਪੁਤ੍ਤਾ ਸਕ੍ਯਾ ਭਵਨ੍ਤਿ, ਦਾਸਿਪੁਤ੍ਤੋ ਤ੍ਵਮਸਿ ਸਕ੍ਯਾਨ’’ਨ੍ਤਿ ਅਵੋਚ.
ਠਪੇਨ੍ਤੀਤਿ ਪਞ੍ਞਪੇਨ੍ਤਿ, ਤੇਨਾਹ ‘‘ਓਕ੍ਕਾਕੋ’’ਤਿਆਦਿ. ਪਭਾ ਨਿਚ੍ਛਰਤਿ ਦਨ੍ਤਾਨਂ ਅਤਿਵਿਯ ਪਭਸ੍ਸਰਭਾਵਤੋ.
ਪਠਮਕਪ੍ਪਿਕਾਨਨ੍ਤਿ ਪਠਮਕਪ੍ਪਸ੍ਸ ਆਦਿਕਾਲੇ ਨਿਬ੍ਬਤ੍ਤਾਨਂ. ਕਿਰ-ਸਦ੍ਦੋ ਅਨੁਸ੍ਸਵਤ੍ਥੇ, ਤੇਨ ਯੋ ਵੁਚ੍ਚਮਾਨਾਯ ਰਾਜਪਰਮ੍ਪਰਾਯ ਕੇਸਞ੍ਚਿ ਮਤਿਭੇਦੋ, ਤਂ ਉਲ੍ਲਿਙ੍ਗੇਤਿ. ਮਹਾਸਮ੍ਮਤਸ੍ਸਾਤਿ ‘‘ਅਯਂ ਨੋ ਰਾਜਾ’’ਤਿ ਮਹਾਜਨੇਨ ਸਮ੍ਮਨ੍ਨਿਤ੍ਵਾ ਠਪਿਤਤ੍ਤਾ ‘‘ਮਹਾਸਮ੍ਮਤੋ’’ਤਿ ਏਵਂ ਸਮ੍ਮਤਸ੍ਸ. ਯਂ ਸਨ੍ਧਾਯ ਵਦਨ੍ਤਿ –
‘‘ਆਦਿਚ੍ਚਕੁਲਸਮ੍ਭੂਤੋ, ਸੁਵਿਸੁਦ੍ਧਗੁਣਾਕਰੋ;
ਮਹਾਨੁਭਾਵੋ ਰਾਜਾਸਿ, ਮਹਾਸਮ੍ਮਤਨਾਮਕੋ.
ਯੋ ਚਕ੍ਖੁਭੂਤੋ ਲੋਕਸ੍ਸ, ਗੁਣਰਂਸਿਸਮੁਜ੍ਜਲੋ;
ਤਮੋਨੁਦੋ ਵਿਰੋਚਿਤ੍ਥ, ਦੁਤਿਯੋ ਵਿਯ ਭਾਣੁਮਾ.
ਠਪਿਤਾ ਯੇਨ ਮਰਿਯਾਦਾ, ਲੋਕੇ ਲੋਕਹਿਤੇਸਿਨਾ;
ਵਵਤ੍ਥਿਤਾ ਸਕ੍ਕੁਣਨ੍ਤਿ, ਨ ਵਿਲਙ੍ਘਯਿਤੁਂ ਜਨਾ.
ਯਸਸ੍ਸਿਨਂ ਤੇਜਸ੍ਸਿਨਂ, ਲੋਕਸੀਮਾਨੁਰਕ੍ਖਕਂ;
ਆਦਿਭੂਤਂ ਮਹਾਵੀਰਂ, ਕਥਯਨ੍ਤਿ ‘ਮਨੂ’ਤਿ ਯ’’ਨ੍ਤਿ.
ਤਸ੍ਸ ਚ ਪੁਤ੍ਤਪਪੁਤ੍ਤਪਰਮ੍ਪਰਂ ਸਨ੍ਧਾਯ –
‘‘ਤਸ੍ਸ ਪੁਤ੍ਤੋ ਮਹਾਤੇਜੋ, ਰੋਜੋ ਨਾਮ ਮਹੀਪਤਿ;
ਤਸ੍ਸ ਪੁਤ੍ਤੋ ਵਰਰੋਜੋ, ਪਵਰੋ ਰਾਜਮਣ੍ਡਲੇ.
ਤਸ੍ਸਾਸਿ ਕਲ੍ਯਾਣਗੁਣੋ, ਕਲ੍ਯਾਣੋ ਨਾਮ ਅਤ੍ਰਜੋ;
ਰਾਜਾ ਤਸ੍ਸਾਸਿ ਤਨਯੋ, ਵਰਕਲ੍ਯਾਣਨਾਮਕੋ.
ਤਸ੍ਸ ਪੁਤ੍ਤੋ ਮਹਾਵੀਰੋ, ਮਨ੍ਧਾਤਾ ਕਾਮਭੋਗਿਨਂ;
ਅਗ੍ਗਭੂਤੋ ਮਹਿਨ੍ਦੇਨ, ਅਡ੍ਢਰਜ੍ਜੇਨ ਪੂਜਿਤੋ.
ਤਸ੍ਸ ਸੂਨੁ ਮਹਾਤੇਜੋ, ਵਰਮਨ੍ਧਾਤੁਨਾਮਕੋ;
‘ਉਪੋਸਥੋ’ਤਿ ਨਾਮੇਨ, ਤਸ੍ਸ ਪੁਤ੍ਤੋ ਮਹਾਯਸੋ.
ਵਰੋ ਨਾਮ ਮਹਾਤੇਜੋ, ਤਸ੍ਸ ਪੁਤ੍ਤੋ ਮਹਾਵਰੋ;
ਤਸ੍ਸਾਸਿ ਉਪਵਰੋਤਿ, ਪੁਤ੍ਤੋ ਰਾਜਾ ਮਹਾਬਲੋ.
ਤਸ੍ਸ ਪੁਤ੍ਤੋ ਮਘਦੇਵੋ, ਦੇਵਤੁਲ੍ਯੋ ਮਹੀਪਤਿ;
ਚਤੁਰਾਸੀਤਿਸਹਸ੍ਸਾਨਿ, ਤਸ੍ਸ ਪੁਤ੍ਤਪਰਮ੍ਪਰਾ.
ਤੇਸਂ ਪਚ੍ਛਿਮਕੋ ਰਾਜਾ, ‘ਓਕ੍ਕਾਕੋ’ ਇਤਿ ਵਿਸ੍ਸੁਤੋ;
ਮਹਾਯਸੋ ਮਹਾਤੇਜੋ, ਅਖੁਦ੍ਦੋ ਰਾਜਮਣ੍ਡਲੇ’’ਤਿ.
ਆਦਿ ਤੇਸਂ ਪਚ੍ਛਤੋਤਿ ਤੇਸਂ ਮਘਦੇਵ ਪਰਮ੍ਪਰਭੂਤਾਨਂ ਕਲ਼ਾਰਜਨਕਪਰਿਯੋਸਾਨਾਨਂ ਅਨੇਕਸਤਸਹਸ੍ਸਾਨਂ ਰਾਜੂਨਂ ਅਪਰਭਾਗੇ ਓਕ੍ਕਾਕੋ ਨਾਮ ਰਾਜਾ ਅਹੋਸਿ, ਤਸ੍ਸ ਪਰਮ੍ਪਰਾਭੂਤਾਨਂ ਅਨੇਕਸਤਸਹਸ੍ਸਾਨਂ ਰਾਜੂਨਂ ਅਪਰਭਾਗੇ ਅਪਰੋ ਓਕ੍ਕਾਕੋ ਨਾਮ ਰਾਜਾ ਅਹੋਸਿ, ਤਸ੍ਸ ਪਰਮ੍ਪਰਭੂਤਾਨਂ ਅਨੇਕਸਤਸਹਸ੍ਸਾਨਂ ਰਾਜੂਨਂ ਅਪਰਭਾਗੇ ਪੁਨਾਪਰੋ ਓਕ੍ਕਾਕੋ ਨਾਮ ਰਾਜਾ ਅਹੋਸਿ, ਤਂ ਸਨ੍ਧਾਯਾਹ ‘‘ਤਯੋ ਓਕ੍ਕਾਕਵਂਸਾ ਅਹੇਸੁਂ. ਤੇਸੁ ਤਤਿਯਓਕ੍ਕਾਕਸ੍ਸਾ’’ਤਿਆਦਿ.
ਸਹਸਾ ਵਰਂ ਅਦਾਸਿਨ੍ਤਿ ਪੁਤ੍ਤਦਸ੍ਸਨੇਨ ਸੋਮਨਸ੍ਸਪ੍ਪਤ੍ਤੋ ਸਹਸਾ ਅਵੀਮਂਸਿਤ੍ਵਾ ਤੁਟ੍ਠਿਯਾ ਵਸੇਨ ਵਰਂ ਅਦਾਸਿਂ, ‘‘ਯਂ ਇਚ੍ਛਸਿ, ਤਂ ਗਣ੍ਹਾ’’ਤਿ. ਰਜ੍ਜਂ ਪਰਿਣਾਮੇਤੁਂ ਇਚ੍ਛਤੀਤਿ ਸਾ ਜਨ੍ਤੁਕੁਮਾਰਸ੍ਸ ਮਾਤਾ ਮਮ ਤਂ ਵਰਦਾਨਂ ਅਨ੍ਤਰਂ ਕਤ੍ਵਾ ਇਮਂ ਰਜ੍ਜਂ ਪਰਿਣਾਮੇਤੁਂ ਇਚ੍ਛਤੀਤਿ.
ਨਪ੍ਪਸਹੇਯ੍ਯਾਤਿ ਨ ਪਰਿਯਤ੍ਤੋ ਭਵੇਯ੍ਯ.
ਨਿਕ੍ਖਮ੍ਮਾਤਿ ਘਰਾਵਾਸਤੋ, ਕਾਮੇਹਿ ਚ ਨਿਕ੍ਖਮਿਤ੍ਵਾ. ਹੇਟ੍ਠਾ ਚਾਤਿ ਚ-ਸਦ੍ਦੇਨ ‘‘ਅਸੀਤਿਹਤ੍ਥੇ’’ਤਿ ਇਦਂ ਅਨੁਕਡ੍ਢਤਿ. ਤੇਹੀਤਿ ਮਿਗਸੂਕਰੇਹਿ, ਮਣ੍ਡੂਕਮੂਸਿਕੇਹਿ ਚ. ਤੇਤਿ ਸੀਹਬ੍ਯਗ੍ਘਾਦਯੋ, ਸਪ੍ਪਬਿਲ਼ਾਰਾ ਚ.
ਅਵਸੇਸਾਹਿ ਅਤ੍ਤਨੋ ਅਤ੍ਤਨੋ ਕਨਿਟ੍ਠਾਹਿ.
ਵਡ੍ਢਮਾਨਾਨਨ੍ਤਿ ਅਨਾਦਰੇ ਸਾਮਿਵਚਨਂ. ਕੁਟ੍ਠਰੋਗੋ ਨਾਮ ਸਾਸਮਸੂਰੀਰੋਗਾ ਵਿਯ ਯੇਭੁਯ੍ਯੇਨ ਸਙ੍ਕਮਨਸਭਾਵੋਤਿ ਵੁਤ੍ਤਂ ‘‘ਅਯਂ ਰੋਗੋ ਸਙ੍ਕਮਤੀਤਿ ਚਿਨ੍ਤੇਤ੍ਵਾ’’ਤਿ.
ਮਿਗਸੂਕਰਾਦੀਨਨ੍ਤਿ ਆਦਿ-ਸਦ੍ਦੇਨ ਵਨਚਰਸੋਣਾਦਿਕੇ ਸਙ੍ਗਣ੍ਹਾਤਿ.
ਤਸ੍ਮਿਂ ਨਿਸਿਨ੍ਨੇਤਿ ਸਮ੍ਬਨ੍ਧੋ. ਖਤ੍ਤਿਯਮਾਯਾਰੋਚਨੇਨ ਅਤ੍ਤਨੋ ਖਤ੍ਤਿਯਭਾਵਂ ਜਾਨਾਪੇਤ੍ਵਾ.
ਨਗਰਂ ਮਾਪੇਹੀਤਿ ਸਾਹਾਰਂ ਨਗਰਂ ਮਾਪੇਹੀਤਿ ਅਧਿਪ੍ਪਾਯੋ.
ਕੇਸਗ੍ਗਹਣਨ੍ਤਿ ਕੇਸਵੇਣਿਬਨ੍ਧਨਂ. ਦੁਸ੍ਸਗ੍ਗਹਣਨ੍ਤਿ ਵਤ੍ਥਸ੍ਸ ਨਿਵਾਸਨਾਕਾਰੋ.
੨੬੮. ਅਤ੍ਤਨੋ ਉਪਾਰਮ੍ਭਮੋਚਨਤ੍ਥਾਯਾਤਿ ਆਚਰਿਯੇਨ ਅਮ੍ਬਟ੍ਠੇਨ ਚ ਅਤ੍ਤਨੋ ਅਤ੍ਤਨੋ ਉਪਰਿ ਪਾਪੇਤਬ੍ਬਉਪਵਾਦਸ੍ਸ ਅਪਨਯਨਤ੍ਥਂ. ਅਸ੍ਮਿਂ ਵਚਨੇਤਿ ‘‘ਚਤ੍ਤਾਰੋਮੇ ਭੋ ਗੋਤਮ ਵਣ੍ਣਾ’’ਤਿਆਦਿਨਾ ਅਤ੍ਤਨਾ ਵੁਤ੍ਤੇ, ਭੋਤਾ ਚ ਗੋਤਮੇਨ ਵੁਤ੍ਤੇ ‘‘ਜਾਤਿਵਾਦੇ’’ਤਿ ਇਮਸ੍ਮਿਂ ਯਥਾਧਿਕਤੇ ਵਚਨੇ. ਤਤ੍ਥ ਪਨ ਯਸ੍ਮਾ ਵੇਦੇ ਵੁਤ੍ਤਵਿਧਿਨਾਵ ਤੇਨ ਪਟਿਮਨ੍ਤੇਤਬ੍ਬਂ ਹੋਤਿ, ਤਸ੍ਮਾ ਵੁਤ੍ਤਂ ‘‘ਵੇਦਤ੍ਤਯਵਚਨੇ’’ਤਿ, ‘‘ਏਤਸ੍ਮਿਂ ਵਾ ਦਾਸਿਪੁਤ੍ਤਵਚਨੇ’’ਤਿ ਚ.
੨੭੦. ਧਮ੍ਮੋ ਨਾਮ ਕਾਰਣਂ ‘‘ਧਮ੍ਮਪਟਿਸਮ੍ਭਿਦਾ’’ਤਿਆਦੀਸੁ (ਵਿਭ. ੭੧੮) ਵਿਯ, ਸਹ ਧਮ੍ਮੇਨਾਤਿ ਸਹਧਮ੍ਮੋ, ਸਹਧਮ੍ਮੋ ਏਵ ਸਹਧਮ੍ਮਿਕੋਤਿ ਆਹ ‘‘ਸਹੇਤੁਕੋ’’ਤਿ.
੨੭੧. ਤਸ੍ਮਾ ਤਦਾ ਪਟਿਞ੍ਞਾਤਤ੍ਤਾ. ਤਾਸੇਤ੍ਵਾ ਪਞ੍ਹਂ ਵਿਸ੍ਸਜ੍ਜਾਪੇਸ੍ਸਾਮੀਤਿ ਆਗਤੋ ਯਥਾ ਤਂ ਸਚ੍ਚਕਸਮਾਗਮੇ. ‘‘ਭਗਵਾ ਚੇਵ ਪਸ੍ਸਤਿ ਅਮ੍ਬਟ੍ਠੋ ਚਾ’’ਤਿ ਏਤ੍ਥ ਇਤਰੇਸਂ ਅਦਸ੍ਸਨੇ ਕਾਰਣਂ ਦਸ੍ਸੇਤੁਂ ‘‘ਯਦਿ ਹੀ’’ਤਿਆਦਿ ਵੁਤ੍ਤਂ. ਆਵਾਹੇਤ੍ਵਾਤਿ ਮਨ੍ਤਬਲੇਨ ਆਨੇਤ੍ਵਾ. ਤਸ੍ਸਾਤਿ ਅਮ੍ਬਟ੍ਠਸ੍ਸ. ਵਾਦਸਙ੍ਘਟ੍ਟੇਤਿ ਵਾਚਾਸਙ੍ਘਟ੍ਟੇ.
੨੭੨. ਤਾਣਨ੍ਤਿ ਗਵੇਸਮਾਨੋਤਿ, ‘‘ਅਯਮੇਵ ਸਮਣੋ ਗੋਤਮੋ ਇਤੋ ਭਯਤੋ ਮਮ ਤਾਯਕੋ’’ਤਿ ਭਗਵਨ੍ਤਂਯੇਵ ‘‘ਤਾਣ’’ਨ੍ਤਿ ਪਰਿਯੇਸਨ੍ਤੋ ਉਪਗਚ੍ਛਨ੍ਤੋ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਤਾਯਤੀਤਿ ਯਥਾਉਪਟ੍ਠਿਤਭਯਤੋ ਪਾਲੇਤਿ, ਤੇਨਾਹ ‘‘ਰਕ੍ਖਤੀ’’ਤਿ, ਏਤੇਨ ਤਾਣ-ਸਦ੍ਦਸ੍ਸ ਕਤ੍ਤੁਸਾਧਨਤਮਾਹ. ਯਥੁਪਟ੍ਠਿਤੇਨ ਭਯੇਨ ਉਪਦ੍ਦੁਤੋ ਨਿਲੀਯਤਿ ਏਤ੍ਥਾਤਿ ਲੇਣਂ, ਉਪਲਯਨਂ, ਏਤੇਨ ਲੇਣ-ਸਦ੍ਦਸ੍ਸ ਅਧਿਕਰਣਸਾਧਨਤਮਾਹ. ‘‘ਸਰਤੀ’’ਤਿ ਏਤੇਨ ਸਰਣ-ਸਦ੍ਦਸ੍ਸ ਕਤ੍ਤੁਸਾਧਨਤਮਾਹ.
ਅਮ੍ਬਟ੍ਠਵਂਸਕਥਾਵਣ੍ਣਨਾ
੨੭੪. ਗਙ੍ਗਾਯ ਦਕ੍ਖਿਣਤੋਤਿ ਗਙ੍ਗਾਯ ਨਦਿਯਾ ਦਕ੍ਖਿਣਦਿਸਾਯ. ਆਵੁਧਂ ਨ ਪਰਿਵਤ੍ਤਤੀਤਿ ਸਰਂ ਵਾਸਤ੍ਤਿਆਦਿਂ ਵਾ ਪਰਸ੍ਸ ਉਪਰਿ ਖਿਪਿਤੁਕਾਮਸ੍ਸ ਹਤ੍ਥਂ ਨ ਪਰਿਵਤ੍ਤਤਿ, ਹਤ੍ਥੇ ਪਨ ਅਪਰਿਵਤ੍ਤੇਨ੍ਤੇ ਕੁਤੋ ਆਵੁਧਪਰਿਵਤ੍ਤਨਨ੍ਤਿ ਆਹ ‘‘ਆਵੁਧਂ ਨ ਪਰਿਵਤ੍ਤਤੀ’’ਤਿ. ਸੋ ਕਿਰ ‘‘ਕਥਂ ਨਾਮਾਹਂ ਦਿਸਾਯ ਦਾਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤੋ’’ਤਿ ਤਂ ਹੀਨਂ ਜਾਤਿਂ ਜਿਗੁਚ੍ਛਨ੍ਤੋ ‘‘ਹਨ੍ਦਾਹਂ ਯਥਾ ਤਥਾ ਇਮਂ ਜਾਤਿਂ ਸੋਧੇਸ੍ਸਾਮੀ’’ਤਿ ਨਿਗ੍ਗਤੋ, ਤੇਨਾਹ ‘‘ਇਦਾਨਿ ਮੇ ਮਨੋਰਥਂ ਪੂਰੇਸ੍ਸਾਮੀ’’ਤਿਆਦਿ. ਵਿਜ੍ਜਾਬਲੇਨ ਰਾਜਾਨਂ ਤਾਸੇਤ੍ਵਾ ਤਸ੍ਸ ਧੀਤੁਯਾ ਲਦ੍ਧਕਾਲਤੋ ਪਟ੍ਠਾਯ ਮ੍ਯਾਯਂ ਜਾਤਿਸੋਧਿਤਾ ਭਵਿਸ੍ਸਤੀਤਿ ਤਸ੍ਸ ਅਧਿਪ੍ਪਾਯੋ. ਅਮ੍ਬਟ੍ਠਂ ਨਾਮ ਵਿਜ੍ਜਨ੍ਤਿ ਸਤ੍ਤਾਨਂ ਸਰੀਰੇ ਅਬ੍ਭਙ੍ਗਂ ਠਪੇਤੀਤਿ ਅਮ੍ਬਟ੍ਠਾਤਿ ਏਵਂ ਲਦ੍ਧਨਾਮਂ ਵਿਜ੍ਜਂ, ਮਨ੍ਤਨ੍ਤਿ ਅਤ੍ਥੋ. ਯਤੋ ਅਮ੍ਬਟ੍ਠਾ ਏਤਸ੍ਮਿਂ ਅਤ੍ਥੀਤਿ ਅਮ੍ਬਟ੍ਠੋਤਿ ਕਣ੍ਹੋ ਇਸਿ ਪਞ੍ਞਾਯਿਤ੍ਥ, ਤਂਬਂਸਜਾਤਤਾਯ ਅਯਂ ਮਾਣਵੋ ‘‘ਅਮ੍ਬਟ੍ਠੋ’’ਤਿ ਵੋਹਰੀਯਤਿ.
ਸੇਟ੍ਠਮਨ੍ਤੇ ਵੇਦਮਨ੍ਤੇਤਿ ਅਧਿਪ੍ਪਾਯੋ. ਮਨ੍ਤਾਨੁਭਾਵੇਨ ਰਞ੍ਞੋ ਬਾਹੁਕ੍ਖਮ੍ਭਮਤ੍ਤਂ ਜਾਤਂ ਤੇਨ ਪਨਸ੍ਸ ਬਾਹੁਕ੍ਖਮ੍ਭੇਨ ਰਾਜਾ, ‘‘ਕੋ ਜਾਨਾਤਿ, ਕਿਂ ਭਵਿਸ੍ਸਤੀ’’ਤਿ ਭੀਤੋ ਉਸ੍ਸਙ੍ਕੀ ਉਤ੍ਰਾਸੋ ਅਹੋਸਿ, ਤੇਨਾਹ ‘‘ਭਯੇਨ ਵੇਧਮਾਨੋ ਅਟ੍ਠਾਸੀ’’ਤਿ. ਸੋਤ੍ਥਿ ਭਦ੍ਦਨ੍ਤੇਤਿ ਆਦਿਵਚਨਂ ਅਵੋਚੁਂ. ‘‘ਅਯਂ ਮਹਾਨੁਭਾਵੋ ਇਸੀ’’ਤਿ ਮਞ੍ਞਮਾਨਾ.
ਉਨ੍ਦ੍ਰਿਯਿਸ੍ਸਤੀਤਿ ਵਿਪ੍ਪਕਿਰਿਯਿਸ੍ਸਤਿ, ਤੇਨਾਹ ‘‘ਭਿਜ੍ਜਿਸ੍ਸਤੀ’’ਤਿ. ਮਨ੍ਤੇ ਪਰਿਵਤ੍ਤਿਤੇਤਿ ਬਾਹੁਕ੍ਖਮ੍ਭਕਮਨ੍ਤਸ੍ਸ ਪਟਿਪ੍ਪਸ੍ਸਮ੍ਭਕਵਿਜ੍ਜਾਸਙ੍ਖਾਤੇ ਮਨ੍ਤੇ ‘‘ਸਰੋ ਓਤਰਤੂ’’ਤਿ ਪਰਿਵਤ੍ਤਿਤੇ. ਏਵਰੂਪਾਨਞ੍ਹਿ ਮਨ੍ਤਾਨਂ ਏਕਂਸੇਨੇਵ ਪਟਿਪ੍ਪਸ੍ਸਮ੍ਭਕਵਿਜ੍ਜਾ ਹੋਨ੍ਤਿਯੇਵ ਯਥਾ ਤਂ ਕੁਸੁਮਾਰਕਵਿਜ੍ਜਾਨਂ. ਅਤ੍ਤਨੋ ਧੀਤੁ ਅਪਵਾਦਮੋਚਨਤ੍ਥਂ ਤਸ੍ਸ ਭੁਜਿਸ੍ਸਕਰਣਂ. ਤਸ੍ਸਾਨੁਰੂਪੇ ਇਸ੍ਸਰਿਯੇ ਠਪਨਤ੍ਥਂ ਉਲ਼ਾਰੇ ਚ ਨਂ ਠਾਨੇ ਠਪੇਸਿ.
ਖਤ੍ਤਿਯਸੇਟ੍ਠਭਾਵਵਣ੍ਣਨਾ
੨੭੫. ਸਮਸ੍ਸਾਸਨਤ੍ਥਮਾਹ ਕਰੁਣਾਯਨ੍ਤੋ, ਨ ਕੁਲੀਨਭਾਵਦਸ੍ਸਨਤ੍ਥਂ, ਤੇਨਾਹ ‘‘ਅਥ ਖੋ ਭਗਵਾ’’ਤਿਆਦਿ. ਬ੍ਰਾਹ੍ਮਣੇਸੂਤਿ ਬ੍ਰਾਹ੍ਮਣਾਨਂ ਸਮੀਪੇ, ਤਤੋ ਬ੍ਰਾਹ੍ਮਣੇਹਿ ਲਦ੍ਧਬ੍ਬਂ ਆਸਨਾਦਿਂ ਸਨ੍ਧਾਯ ‘‘ਬ੍ਰਾਹ੍ਮਣਾਨਂ ਅਨ੍ਤਰੇ’’ਤਿ ਵੁਤ੍ਤਂ. ਕੇਵਲਂ ਸਦ੍ਧਾਯ ਕਾਤਬ੍ਬਂ ਸਦ੍ਧਂ, ਪਰਲੋਕਗਤੇ ਸਨ੍ਧਾਯ ਨ ਤਤੋ ਕਿਞ੍ਚਿ ਅਪਤ੍ਥੇਨ੍ਤੇਨ ਕਾਤਬ੍ਬਨ੍ਤਿ ਅਤ੍ਥੋ, ਤੇਨਾਹ ‘‘ਮਤਕੇ ਉਦ੍ਦਿਸ੍ਸ ਕਤਭਤ੍ਤੇ’’ਤਿ. ਮਙ੍ਗਲਾਦਿਭਤ੍ਤੇਤਿ ਆਦਿ-ਸਦ੍ਦੇਨ ਉਸ੍ਸਵਦੇਵਤਾਰਾਧਨਾਦਿਂ ਸਙ੍ਗਣ੍ਹਾਤਿ. ਯਞ੍ਞਭਤ੍ਤੇਤਿ ਪਾਪਸਞ੍ਞਮਾਦਿਵਸੇਨ ਕਤਭਤ੍ਤੇ. ਪਾਹੁਨਕਾਨਨ੍ਤਿ ਅਤਿਥੀਨਂ. ਖਤ੍ਤਿਯਭਾਵਂ ਅਪ੍ਪਤ੍ਤੋ ਉਭਤੋ ਸੁਜਾਤਤਾਭਾਵਤੋ, ਤੇਨਾਹ ‘‘ਅਪਰਿਸੁਦ੍ਧੋਤਿ ਅਤ੍ਥੋ’’ਤਿ.
੨੭੬. ਇਤ੍ਥਿਂ ਕਰਿਤ੍ਵਾਤਿ ਏਤ੍ਥ ਕਰਣਂ ਕਿਰਿਯਾਸਾਮਞ੍ਞਵਿਸਯਨ੍ਤਿ ਆਹ ‘‘ਇਤ੍ਥਿਂ ਪਰਿਯੇਸਿਤ੍ਵਾ’’ਤਿ. ਬ੍ਰਾਹ੍ਮਣਕਞ੍ਞਂ ਇਤ੍ਥਿਂ ਖਤ੍ਤਿਯਕੁਮਾਰਸ੍ਸ ਭਰਿਯਾਭੂਤਂ ਗਹੇਤ੍ਵਾਪਿ ਖਤ੍ਤਿਯਾਵ ਸੇਟ੍ਠਾ, ਹੀਨਾ ਬ੍ਰਾਹ੍ਮਣਾਤਿ ਯੋਜਨਾ. ਪੁਰਿਸੇਨ ਵਾ ਪੁਰਿਸਂ ਕਰਿਤ੍ਵਾਤਿ ਏਤ੍ਥਾਪਿ ਏਸੇਵ ਨਯੋ. ਪਕਰਣੇਤਿ ਰਾਗਾਦਿਵਸੇਨ ਪਦੁਟ੍ਠੇ ਪਕ੍ਖਲਿਤੇ ਕਾਰਣੇ, ਤੇਨਾਹ ‘‘ਦੋਸੇ’’ਤਿ. ਭਸ੍ਸਤਿ ਨਿਰਤ੍ਥਕਭਾਵੇਨ ਖਿਪੀਯਤੀਤਿ ਭਸ੍ਸਂ, ਛਾਰਿਕਾ.
੨੭੭. ਜਨਿਤਸ੍ਮਿਨ੍ਤਿ ਕਮ੍ਮਕਿਲੇਸੇਹਿ ਨਿਬ੍ਬਤ੍ਤੇ. ਜਨੇ ਏਤਸ੍ਮਿਨ੍ਤਿ ਵਾ ਜਨੇਤਸ੍ਮਿਂ, ਮਨੁਸ੍ਸੇਸੂਤਿ ਅਤ੍ਥੋ, ਤੇਨਾਹ ‘‘ਗੋਤ੍ਤਪਟਿਸਾਰਿਨੋ’’ਤਿ. ਸਂਸਨ੍ਦਿਤ੍ਵਾਤਿ ਘਟੇਤ੍ਵਾ, ਅਵਿਰੁਦ੍ਧਂ ਕਤ੍ਵਾਤਿ ਅਤ੍ਥੋ.
ਪਠਮਭਾਣਵਾਰਵਣ੍ਣਨਾ ਨਿਟ੍ਠਿਤਾ.
ਵਿਜ੍ਜਾਚਰਣਕਥਾਵਣ੍ਣਨਾ
੨੭੮. ਇਦਂ ਵਟ੍ਟਤੀਤਿ ਇਦਂ ਅਜ੍ਝੇਨਾਦਿ ਕਤ੍ਤੁਂ ਲਬ੍ਭਤਿ. ਜਾਤਿਵਾਦਵਿਨਿਬਦ੍ਧਾਤਿ ਜਾਤਿਸਨ੍ਨਿਸ੍ਸਿਤਵਾਦੇ ਵਿਨਿਬਦ੍ਧਾ. ਬ੍ਰਾਹ੍ਮਣਸ੍ਸੇਵ ਅਜ੍ਝੇਨਜ੍ਝਾਪਨਯਜਨਯਾਜਨਾਦਯੋਤਿ ਏਵਂ ਯੇ ਅਤ੍ਤੁਕ੍ਕਂਸਨਪਰਵਮ੍ਭਨਵਸੇਨ ਪਵਤ੍ਤਾ, ਤਤੋ ਏਵ ਤੇ ਮਾਨਵਾਦਪਟਿਬਦ੍ਧਾ ਚ ਹੋਨ੍ਤਿ. ਯੇ ਪਨ ਆਵਾਹਵਿਵਾਹਵਿਨਿਬਦ੍ਧਾ, ਤੇ ਏਵ ਸਮ੍ਬਨ੍ਧਤ੍ਤਯਵਸੇਨ ‘‘ਅਰਹਸਿ ਵਾ ਮਂ ਤ੍ਵਂ, ਨ ਵਾ ਮਂ ਤ੍ਵਂ ਅਰਹਸੀ’’ਤਿ ਏਵਂ ਪਵਤ੍ਤਨਕਾ.
ਯਤ੍ਥਾਤਿ ਯਸ੍ਸਂ ਵਿਜ੍ਜਾਚਰਣਸਮ੍ਪਤ੍ਤਿਯਂ. ਲਗ੍ਗਿਸ੍ਸਾਮਾਤਿ ਓਲਗ੍ਗਾ ਅਨ੍ਤੋਗਧਾ ਭਵਿਸ੍ਸਾਮਾਤਿ ਚਿਨ੍ਤਯਿਮ੍ਹ. ਪਰਮਤ੍ਥਤੋ ਅਵਿਜ੍ਜਾਚਰਣਾਨਿਯੇਵ ‘‘ਵਿਜ੍ਜਾਚਰਣਾਨੀ’’ਤਿ ਗਹੇਤ੍ਵਾ ਠਿਤੋ ਪਰਮਤ੍ਥਤੋ ਵਿਜ੍ਜਾਚਰਣੇਸੁ ਵਿਭਜਿਯਮਾਨੇਸੁ ਸੋ ਤਤੋ ਦੂਰਤੋ ਅਪਨੀਤੋ ਨਾਮ ਹੋਤੀਤਿ ਆਹ ‘‘ਦੂਰਮੇਵ ਅਵਕ੍ਖਿਪੀ’’ਤਿ. ਸਮੁਦਾਗਮਤੋ ਪਭੁਤੀਤਿਆਦਿਸਮੁਟ੍ਠਾਨਤੋ ਪਟ੍ਠਾਯ.
੨੭੯. ਤਿਵਿਧਂ ਸੀਲਨ੍ਤਿ ਖੁਦ੍ਦਕਾਦਿਭੇਦਂ ਤਿਵਿਧਂ ਸੀਲਂ. ਸੀਲਵਸੇਨੇਵਾਤਿ ਸੀਲਪਰਿਯਾਯੇਨੇਵ. ਕਿਞ੍ਚਿ ਕਿਞ੍ਚੀਤਿ ਅਹਿਂਸਨਾਦਿਯਮਨਿਯਮਲਕ੍ਖਣਂ ਕਿਞ੍ਚਿ ਕਿਞ੍ਚਿ ਸੀਲਂ ਅਤ੍ਥਿ. ਤਤ੍ਥ ਤਤ੍ਥੇਵ ਲਗ੍ਗੇਯ੍ਯਾਤਿ ਤਸ੍ਮਿਂ ਤਸ੍ਮਿਂਯੇਵ ਬ੍ਰਾਹ੍ਮਣਸਮਯਸਿਦ੍ਧੇ ਸੀਲਮਤ੍ਤੇ ‘‘ਚਰਣ’’ਨ੍ਤਿ ਲਗ੍ਗੇਯ੍ਯ. ਅਟ੍ਠਪਿ ਸਮਾਪਤ੍ਤਿਯੋ ਚਰਣਨ੍ਤਿ ਨਿਯ੍ਯਾਤਿਤਾ ਹੋਨ੍ਤਿ ਰੂਪਾਵਚਰਚਤੁਤ੍ਥਜ੍ਝਾਨਨਿਦ੍ਦੇਸੇਨੇਵ ਅਰੂਪਜ੍ਝਾਨਾਨਮ੍ਪਿ ਨਿਦ੍ਦਿਟ੍ਠਭਾਵਾਪਤ੍ਤਿਤੋ ਨਿਯ੍ਯਾਤਿਤਾ ਨਿਦਸ੍ਸਿਤਾ.
ਚਤੁਅਪਾਯਮੁਖਕਥਾਵਣ੍ਣਨਾ
੨੮੦. ਅਸਮ੍ਪਾਪੁਣਨ੍ਤੋਤਿ ਆਰਭਿਤ੍ਵਾ ਸਮ੍ਪਤ੍ਤੁਂ ਅਸਕ੍ਕੋਨ੍ਤੋ. ਅਵਿਸਹਮਾਨੋਤਿ ਆਰਭਿਤੁਮੇਵ ਅਸਕ੍ਕੋਨ੍ਤੋ. ਖਾਰਿਨ੍ਤਿ ਪਰਿਕ੍ਖਾਰਂ. ਤਂ ਪਨ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਅਰਣੀ’’ਤਿਆਦਿ ਵੁਤ੍ਤਂ. ਤਤ੍ਥ ਅਰਣੀਤਿ ਅਗ੍ਗਿਧਮਨਕਂ ਅਰਣੀਦ੍ਵਯਂ. ਸੁਜਾਤਿ ਦਬ੍ਬਿ. ਆਦਿ-ਸਦ੍ਦੇਨ ਤਿਦਣ੍ਡਤਿਘਟਿਕਾਦਿਂ ਸਙ੍ਗਣ੍ਹਾਤਿ ਖਾਰਿਭਰਿਤਨ੍ਤਿ ਖਾਰੀਹਿ ਪੁਣ੍ਣਂ. ਨਨੁ ਉਪਸਮ੍ਪਨ੍ਨਸ੍ਸ ਭਿਕ੍ਖੁਨੋ ਸਾਸਨਿਕੋਪਿ ਯੋ ਕੋਚਿ ਅਨੁਪਸਮ੍ਪਨ੍ਨੋ ਅਤ੍ਥਤੋ ਪਰਿਚਾਰਕੋਵ, ਕਿਂ ਅਙ੍ਗਂ ਪਨ ਬਾਹਿਰਕਪਬ੍ਬਜਿਤੇਤਿ ਤਤ੍ਥ ਵਿਸੇਸਂ ਦਸ੍ਸੇਤੁਂ ‘‘ਕਾਮਞ੍ਚਾ’’ਤਿਆਦਿ ਵੁਤ੍ਤਂ. ਵੁਤ੍ਤਨਯੇਨਾਤਿ ‘‘ਕਪ੍ਪਿਯਕਰਣ…ਪੇ… ਵਤ੍ਤਕਰਣਵਸੇਨਾ’’ਤਿ ਏਵਂ ਵੁਤ੍ਤੇਨ ਨਯੇਨ. ਪਰਿਚਾਰਕੋ ਹੋਤਿ ਉਪਸਮ੍ਪਨ੍ਨਭਾਵਸ੍ਸ ਵਿਸਿਟ੍ਠਭਾਵਤੋ. ‘‘ਨਵਕੋਟਿਸਹਸ੍ਸਾਨੀ’’ਤਿਆਦਿਨਾ (ਵਿਸੁਦ੍ਧਿ. ੧.੨੦; ਪਟਿ. ਮ. ਅਟ੍ਠ. ੩੭) ਵੁਤ੍ਤਪ੍ਪਭੇਦਾਨਂ ਅਨੇਕਸਹਸ੍ਸਾਨਂ ਸਂਵਰਵਿਨਯਾਨਂ ਸਮਾਦਿਯਿਤ੍ਵਾ ਵਤ੍ਤਨੇਨ ਉਪਰਿਭੂਤਾ ਅਗ੍ਗਭੂਤਾ ਸਮ੍ਪਦਾਤਿ ਹਿ ‘‘ਉਪਸਮ੍ਪਦਾ’’ਤਿ ਵੁਚ੍ਚਤੀਤਿ. ਗੁਣਾਧਿਕੋਪੀਤਿ ਗੁਣੇਹਿ ਉਕ੍ਕਟ੍ਠੋਪਿ. ਅਯਂ ਪਨਾਤਿ ਵੁਤ੍ਤਲਕ੍ਖਣੋ ਤਾਪਸੋ.
ਤਾਪਸਾ ਨਾਮ ਕਮ੍ਮਵਾਦਿਕਿਰਿਯਾਵਾਦਿਨੋ, ਨ ਸਾਸਨਸ੍ਸ ਪਟਾਣੀਭੂਤਾ, ਯਤੋ ਨੇਸਂ ਪਬ੍ਬਜਿਤੁਂ ਆਗਤਾਨਂ ਤਿਤ੍ਥਿਯਪਰਿਵਾਸੇਨ ਵਿਨਾਵ ਪਬ੍ਬਜ੍ਜਾ ਅਨੁਞ੍ਞਾਤਾਤਿ ਕਤ੍ਵਾ ‘‘ਕਸ੍ਮਾ ਪਨਾ’’ਤਿ ਚੋਦਨਂ ਸਮੁਟ੍ਠਪੇਤਿ ਚੋਦਕੋ. ਆਚਰਿਯੋ ‘‘ਯਸ੍ਮਾ’’ਤਿਆਦਿਨਾ ਚੋਦਨਂ ਪਰਿਹਰਤਿ. ‘‘ਓਸਕ੍ਕਿਸ੍ਸਤੀ’’ਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਵਰਿਤੁਂ ‘‘ਇਮਸ੍ਮਿਞ੍ਹੀ’’ਤਿਆਦਿ ਵੁਤ੍ਤਂ. ਖੁਰਧਾਰੂਪਮਨ੍ਤਿ ਖੁਰਧਾਰਾਨਂ ਮਤ੍ਥਕੇਨੇਵ ਅਕ੍ਕਮਿਤ੍ਵਾ ਗਮਨੂਪਮਂ. ਅਞ੍ਞੇਤਿ ਅਞ੍ਞੇ ਭਿਕ੍ਖੂ. ਅਗ੍ਗਿਸਾਲਨ੍ਤਿ ਅਗ੍ਗਿਹੁਤ੍ਤਸਾਲਂ. ਨਾਨਾਦਾਰੂਹੀਤਿ ਪਲਾਸਦਣ੍ਡਾਦਿਨਾਨਾਵਿਧਸਮਿਧਾਦਾਰੂਹਿ.
ਇਦਨ੍ਤਿ ‘‘ਚਤੁਦ੍ਵਾਰਂ ਆਗਾਰਂ ਕਤ੍ਵਾ’’ਤਿਆਦਿਨਾ ਵੁਤ੍ਤਂ. ਅਸ੍ਸਾਤਿ ਅਸ੍ਸ ਚਤੁਤ੍ਥਸ੍ਸ ਪੁਗ੍ਗਲਸ੍ਸ. ਪਟਿਪਤ੍ਤਿਮੁਖਨ੍ਤਿ ਕੋਹਞ੍ਞਪਟਿਪਤ੍ਤਿਯਾ ਮੁਖਮਤ੍ਤਂ. ਸੋ ਹਿ ਨਾਨਾਵਿਧੇਨ ਕੋਹਞ੍ਞੇਨ ਲੋਕਂ ਵਿਮ੍ਹਾਪੇਨ੍ਤੋ ਤਤ੍ਥ ਅਚ੍ਛਤਿ, ਤੇਨਾਹ ‘‘ਇਮਿਨਾ ਹਿ ਮੁਖੇਨ ਸੋ ਏਵਂ ਪਟਿਪਜ੍ਜਤੀ’’ਤਿ.
ਖਲਾਦੀਸੁ ਮਨੁਸ੍ਸਾਨਂ ਸਨ੍ਤਿਕੇ ਉਪਤਿਟ੍ਠਿਤ੍ਵਾ ਵੀਹਿਮੁਗ੍ਗਤਿਲਮਾਸਾਦੀਨਿ ਭਿਕ੍ਖਾਚਰਿਯਾਨਿਯਾਮੇਨ ਸਙ੍ਕਡ੍ਢਿਤ੍ਵਾ ਉਞ੍ਛਨਂ ਉਞ੍ਛਾ, ਸਾ ਏਵ ਚਰਿਯਾ ਵੁਤ੍ਤਿ ਏਤੇਸਨ੍ਤਿ ਉਞ੍ਛਾਚਰਿਯਾ. ਅਗ੍ਗਿਪਕ੍ਕੇਨ ਜੀਵਨ੍ਤੀਤਿ ਅਗ੍ਗਿਪਕ੍ਕਿਕਾ, ਨ ਅਗ੍ਗਿਪਕ੍ਕਿਕਾ ਅਨਗ੍ਗਿਪਕ੍ਕਿਕਾ. ਉਞ੍ਛਾਚਰਿਯਾ ਹਿ ਖਲੇਸੁ ਗਨ੍ਤ੍ਵਾ ਖਲਗ੍ਗਂ ਨਾਮ ਮਨੁਸ੍ਸੇਹਿ ਦਿਯ੍ਯਮਾਨਂ ਧਞ੍ਞਂ ਗਣ੍ਹਨ੍ਤਿ, ਤਂ ਇਮੇ ਨ ਗਣ੍ਹਨ੍ਤੀਤਿ ਅਨਗ੍ਗਿਪਕ੍ਕਿਕਾ ਨਾਮ ਜਾਤਾ. ਅਸਾਮਪਾਕਾਤਿ ਅਸਯਂਪਾਚਕਾ. ਅਸ੍ਮਮੁਟ੍ਠਿਨਾ ਮੁਟ੍ਠਿਪਾਸਾਣੇਨ ਵਤ੍ਤਨ੍ਤੀਤਿ ਅਸ੍ਮਮੁਟ੍ਠਿਕਾ. ਦਨ੍ਤੇਨ ਉਪ੍ਪਾਟਿਤਂ ਵਕ੍ਕਲਂ ਰੁਕ੍ਖਤ੍ਤਚੋ ਦਨ੍ਤਵਕ੍ਕਲਂ, ਤੇਨ ਵਤ੍ਤਨ੍ਤੀਤਿ ਦਨ੍ਤਵਕ੍ਕਲਿਕਾ. ਪਵਤ੍ਤਂ ਰੁਕ੍ਖਾਦਿਤੋ ਪਾਤਿਤਂ ਫਲਂ ਭੁਞ੍ਜਨ੍ਤੀਤਿ ਪਵਤ੍ਤਫਲਭੋਜਿਨੋ. ਜਿਣ੍ਣਪਕ੍ਕਤਾਯ ਪਣ੍ਡੁਭੂਤਂ ਪਲਾਸਂ, ਤਂਸਦਿਸਞ੍ਚ ਪਣ੍ਡੁਪਲਾਸਂ, ਤੇਨ ਵਤ੍ਤਨ੍ਤੀਤਿ ਪਣ੍ਡੁਪਲਾਸਿਕਾ, ਸਯਂਪਤਿਤਪੁਪ੍ਫਫਲਪਤ੍ਤਭੋਜਿਨੋ.
ਇਦਾਨਿ ਤੇ ਅਟ੍ਠਵਿਧੇਪਿ ਸਰੂਪਤੋ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਸਙ੍ਕਡ੍ਢਿਤ੍ਵਾਤਿ ਭਿਕ੍ਖਾਚਰਿਯਾਵਸੇਨ ਲਦ੍ਧਧਞ੍ਞਂ ਏਕਜ੍ਝਂ ਕਤ੍ਵਾ.
ਪਰਿਯੇਟ੍ਠਿ ਨਾਮ ਦੁਕ੍ਖਾਤਿ ਪਰੇਸਂ ਗੇਹਤੋ ਗੇਹਂ ਗਨ੍ਤ੍ਵਾ ਪਰਿਯੇਟ੍ਠਿ ਨਾਮ ਦੀਨਵੁਤ੍ਤਿਭਾਵੇਨ ਦੁਕ੍ਖਾ. ਪਾਸਾਣਸ੍ਸ ਪਰਿਗ੍ਗਹੋ ਦੁਕ੍ਖੋ ਪਬ੍ਬਜਿਤਸ੍ਸਾਤਿ ਵਾ ਦਨ੍ਤੇਹੇਵ ਉਪ੍ਪਾਟੇਤ੍ਵਾ ਖਾਦਨ੍ਤਿ.
ਇਮਾਹਿ ਚਤੂਹਿਯੇਵਾਤਿ ‘‘ਖਾਰਿਵਿਧਂ ਆਦਾਯਾ’’ਤਿਆਦਿਨਾ ਵੁਤ੍ਤਾਹਿ ਚਤੂਹਿ ਏਵ ਤਾਪਸਪਬ੍ਬਜ੍ਜਾਹੀਤਿ.
੨੮੨. ਅਪਾਯੇ ਵਿਨਾਸੇ ਨਿਯੁਤ੍ਤੋ ਆਪਾਯਿਕੋ. ਤਬ੍ਭਾਵਂ ਪਰਿਪੂਰੇਤੁਂ ਅਸਕ੍ਕੋਨ੍ਤੋ ਤੇਨ ਅਪਰਿਪੁਣ੍ਣੋ ਅਪਰਿਪੂਰਮਾਨੋ, ਕਰਣੇ ਚੇਤਂ ਪਚ੍ਚਤ੍ਤਵਚਨਂ, ਤੇਨਾਹ ‘‘ਆਪਾਯਿਕੇਨਾਪਿ ਅਪਰਿਪੂਰਮਾਨੇਨਾ’’ਤਿ.
ਪੁਬ੍ਬਕਇਸਿਭਾਵਾਨੁਯੋਗਵਣ੍ਣਨਾ
੨੮੩. ਦੀਯਤੀਤਿ ਦਤ੍ਤਿ, ਦਤ੍ਤਿਯੇਵ ਦਤ੍ਤਿਕਨ੍ਤਿ ਆਹ ‘‘ਦਿਨ੍ਨਕ’’ਨ੍ਤਿ. ਯਦਿ ਬ੍ਰਾਹ੍ਮਣਸ੍ਸ ਸਮ੍ਮੁਖੀਭਾਵੋ ਰਞ੍ਞੋ ਨ ਦਾਤਬ੍ਬੋ, ਕਸ੍ਮਾਸ੍ਸ ਉਪਸਙ੍ਕਮਨਂ ਨ ਪਟਿਕ੍ਖਿਤ੍ਤਨ੍ਤਿ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਖੇਤ੍ਤਵਿਜ੍ਜਾਯਾਤਿ ਨੀਤਿਸਤ੍ਥੇ. ਪਯਾਤਨ੍ਤਿ ਸਦ੍ਧਂ, ਸਸ੍ਸਤਿਕਂ ਵਾ, ਤੇਨਾਹ ‘‘ਅਭਿਹਰਿਤ੍ਵਾ ਦਿਨ੍ਨ’’ਨ੍ਤਿ. ਕਸ੍ਮਾ ਭਗਵਾ ‘‘ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਦਤ੍ਤਿਕਂ ਭੁਞ੍ਜਤੀ’’ਤਿਆਦਿਨਾ ਬ੍ਰਾਹ੍ਮਣਸ੍ਸ ਮਮ੍ਮਵਚਨਂ ਅਵੋਚਾਤਿ ਤਤ੍ਥ ਕਾਰਣਂ ਦਸ੍ਸੇਤੁਂ ‘‘ਇਦਂ ਪਨ ਕਾਰਣ’’ਨ੍ਤਿਆਦਿ ਵੁਤ੍ਤਂ.
੨੮੪. ਰਥੂਪਤ੍ਥਰੇਤਿ ਰਥਸ੍ਸ ਉਪਰਿ ਅਤ੍ਥਰਿਤਪਦੇਸੇ. ਪਾਕਟਮਨ੍ਤਨਨ੍ਤਿ ਪਕਾਸਭੂਤਂ ਮਨ੍ਤਨਂ. ਤਞ੍ਹਿ ਸੁਦ੍ਦਾਦੀਹਿ ਞਾਯਤੀਤਿ ਨ ਰਹਸ੍ਸਮਨ੍ਤਨਂ. ਭਣਤੀਤਿ ਅਪਿ ਨੁ ਭਣਤਿ.
੨੮੫. ਪਵਤ੍ਤਾਰੋਤਿ ਪਾਵਚਨਭਾਵੇਨ ਵਤ੍ਤਾਰੋ, ਯਸ੍ਮਾ ਤੇ ਤੇਸਂ ਮਨ੍ਤਾਨਂ ਪਵਤ੍ਤਕਾ, ਤਸ੍ਮਾ ਆਹ ‘‘ਪਵਤ੍ਤਯਿਤਾਰੋ’’ਤਿ. ਸੁਦ੍ਦੇ ਬਹਿ ਕਤ੍ਵਾ ਰਹੋ ਭਾਸਿਤਬ੍ਬਟ੍ਠੇਨ ਮਨ੍ਤਾ ਏਵ, ਤਂਤਂਅਤ੍ਥਪਟਿਪਤ੍ਤਿਹੇਤੁਤਾਯ ਪਦਨ੍ਤਿ ਮਨ੍ਤਪਦਂ, ਅਨੁਪਨੀਤਾਸਾਧਾਰਣਤਾਯ ਵਾ ਰਹਸ੍ਸਭਾਵੇਨ ਵਤ੍ਤਬ੍ਬਂ ਹਿਤਕਿਰਿਯਾਯ ਅਧਿਗਮੁਪਾਯਂ. ਸਜ੍ਝਾਯਿਤਨ੍ਤਿ ਗਾਯਨਵਸੇਨ ਸਜ੍ਝਾਯਿਤਂ, ਤਂ ਪਨ ਉਦਤ੍ਤਾਨੁਦਤ੍ਤਾਦੀਨਂ ਸਰਾਨਂ ਸਮ੍ਪਾਦਨਵਸੇਨੇਵ ਇਚ੍ਛਿਤਨ੍ਤਿ ਆਹ ‘‘ਸਰਸਮ੍ਪਤ੍ਤਿਵਸੇਨਾ’’ਤਿ. ਅਞ੍ਞੇਸਂ ਵੁਤ੍ਤਨ੍ਤਿ ਪਾਵਚਨਭਾਵੇਨ ਅਞ੍ਞੇਸਂ ਵੁਤ੍ਤਂ. ਸਮੁਪਬ੍ਯੂਲ਼੍ਹਨ੍ਤਿ ਸਙ੍ਗਹੇਤ੍ਵਾ ਉਪਰੂਪਰਿ ਸਞ੍ਞੂਲ਼੍ਹਂ. ਰਾਸਿਕਤਨ੍ਤਿ ਇਰੁਵੇਦਯਜੁਵੇਦਸਾਮਵੇਦਾਦਿਵਸੇਨ, ਤਤ੍ਥਾਪਿ ਪਚ੍ਚੇਕਂ ਮਨ੍ਤਬ੍ਰਹ੍ਮਾਦਿਵਸੇਨ, ਅਜ੍ਝਾਯਾਨੁਵਾਕਾਦਿਵਸੇਨ ਚ ਰਾਸਿਕਤਂ.
ਤੇਸਨ੍ਤਿ ਮਨ੍ਤਾਨਂ ਕਤ੍ਤੂਨਂ. ਦਿਬ੍ਬੇਨ ਚਕ੍ਖੁਨਾ ਓਲੋਕੇਤ੍ਵਾਤਿ ਦਿਬ੍ਬਚਕ੍ਖੁਪਰਿਭਣ੍ਡੇਨ ਯਥਾਕਮ੍ਮੂਪਗਞਾਣੇਨ ਸਤ੍ਤਾਨਂ ਕਮ੍ਮਸ੍ਸਕਤਾਦਿਂ ਪਚ੍ਚਕ੍ਖਤੋ ਦਸ੍ਸਨਟ੍ਠੇਨ ਦਿਬ੍ਬਚਕ੍ਖੁਸਦਿਸੇਨ ਪੁਬ੍ਬੇਨਿਵਾਸਞਾਣੇਨ ਅਤੀਤਕਪ੍ਪੇ ਬ੍ਰਾਹ੍ਮਣਾਨਂ ਮਨ੍ਤਜ੍ਝੇਨਵਿਧਿਞ੍ਚ ਓਲੋਕੇਤ੍ਵਾ. ਪਾਵਚਨੇਨ ਸਹ ਸਂਸਨ੍ਦਿਤ੍ਵਾਤਿ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਯਂ ਵਚਨਂ ਵਟ੍ਟਸਨ੍ਨਿਸ੍ਸਿਤਂ, ਤੇਨ ਸਹ ਅਵਿਰੁਦ੍ਧਂ ਕਤ੍ਵਾ. ਨ ਹਿ ਤੇਸਂ ਵਿਵਟ੍ਟਸਨ੍ਨਿਸ੍ਸਿਤੋ ਅਤ੍ਥੋ ਪਚ੍ਚਕ੍ਖੋ ਹੋਤਿ. ਅਪਰਾਪਰੇ ਪਨਾਤਿ ਅਟ੍ਠਕਾਦੀਹਿ ਅਪਰਾ ਪਰੇ ਪਚ੍ਛਿਮਾ ਓਕ੍ਕਾਕਰਾਜਕਾਲਾਦੀਸੁ ਉਪ੍ਪਨ੍ਨਾ. ਪਕ੍ਖਿਪਿਤ੍ਵਾਤਿ ਅਟ੍ਠਕਾਦੀਹਿ ਗਨ੍ਥਿਤਮਨ੍ਤਪਦੇਸੁ ਕਿਲੇਸਸਨ੍ਨਿਸ੍ਸਿਤਪਦਾਨਂ ਤਤ੍ਥ ਤਤ੍ਥ ਪਦੇ ਪਕ੍ਖਿਪਨਂ ਕਤ੍ਵਾ. ਵਿਰੁਦ੍ਧੇ ਅਕਂਸੂਤਿ ਬ੍ਰਾਹ੍ਮਣਧਮ੍ਮਿਕਸੁਤ੍ਤਾਦੀਸੁ ਆਗਤਨਯੇਨ ਸਂਕਿਲੇਸਿਕਤ੍ਥਦੀਪਨਤੋ ਪਚ੍ਚਨੀਕਭੂਤੇ ਅਕਂਸੁ. ਇਧਾਤਿ ‘‘ਤ੍ਯਾਹਂ ਮਨ੍ਤੇ ਅਧੀਯਾਮੀ’’ਤਿ ਏਤਸ੍ਮਿਂ ਠਾਨੇ. ਪਟਿਞ੍ਞਂ ਅਗ੍ਗਹੇਤ੍ਵਾਤਿ ‘‘ਤਂ ਕਿਂ ਮਞ੍ਞਸੀ’’ਤਿ ਏਵਂ ਪਟਿਞ੍ਞਂ ਅਗ੍ਗਹੇਤ੍ਵਾਵ.
੨੮੬. ਨਿਰਾਮਗਨ੍ਧਾਤਿ ਕਿਲੇਸਾਸੁਚਿਵਸੇਨ ਵਿਸ੍ਸਗਨ੍ਧਰਹਿਤਾ. ਅਨਿਤ੍ਥਿਗਨ੍ਧਾਤਿ ਇਤ੍ਥੀਨਂ ਗਨ੍ਧਮਤ੍ਤਸ੍ਸਪਿ ਅਵਿਸਹਨੇਨ ਇਤ੍ਥਿਗਨ੍ਧਰਹਿਤਾ. ਏਤ੍ਥ ਚ ‘‘ਨਿਰਾਮਗਨ੍ਧਾ’’ਤਿ ਏਤੇਨ ਤੇਸਂ ਪੋਰਾਣਾਨਂ ਬ੍ਰਾਹ੍ਮਣਾਨਂ ਵਿਕ੍ਖਮ੍ਭਿਤਕਿਲੇਸਤਂ ਦਸ੍ਸੇਤਿ, ‘‘ਅਨਿਤ੍ਥਿਗਨ੍ਧਾ ਬ੍ਰਹ੍ਮਚਾਰਿਨੋ’’ਤਿ ਏਤੇਨ ਏਕਵਿਹਾਰਿਤਂ, ‘‘ਰਜੋਜਲ੍ਲਧਰਾ’’ਤਿ ਏਤੇਨ ਮਣ੍ਡਨਵਿਭੂਸਨਾਨੁਯੋਗਾਭਾਵਂ, ‘‘ਅਰਞ੍ਞਾਯਤਨੇ ਪਬ੍ਬਤਪਾਦੇਸੁ ਵਸਿਂਸੂ’’ਤਿ ਏਤੇਨ ਮਨੁਸ੍ਸੂਪਚਾਰਂ ਪਹਾਯ ਵਿਵਿਤ੍ਤਵਾਸਂ, ‘‘ਵਨਮੂਲਫਲਾਹਾਰਾ ਵਸਿਂਸੂ’’ਤਿ ਏਤੇਨ ਸਾਲਿਮਂਸੋਦਨਾਦਿਪਣੀਤਾਹਾਰਪਟਿਕ੍ਖੇਪਂ, ‘‘ਯਦਾ’’ਤਿਆਦਿਨਾ ਯਾਨਵਾਹਨਪਟਿਕ੍ਖੇਪਂ, ‘‘ਸਬ੍ਬਦਿਸਾਸੂ’’ਤਿਆਦਿਨਾ ਰਕ੍ਖਾਵਰਣਪਟਿਕ੍ਖੇਪਂ, ਏਵਞ੍ਚ ਵਦਨ੍ਤੋ ਮਿਚ੍ਛਾਪਟਿਪਦਾਪਕ੍ਖਿਕਂ ਸਾਚਰਿਯਸ੍ਸ ਅਮ੍ਬਟ੍ਠਸ੍ਸ ਵੁਤ੍ਤਿਂ ਉਪਾਦਾਯ ਸਮ੍ਮਾਪਟਿਪਦਾਪਕ੍ਖਿਕਾਪਿ ਤੇਸਂ ਬ੍ਰਾਹ੍ਮਣਾਨਂ ਵੁਤ੍ਤਿ ਅਰਿਯਵਿਨਯੇ ਸਮ੍ਮਾਪਟਿਪਤ੍ਤਿਂ ਉਪਾਦਾਯ ਮਿਚ੍ਛਾਪਟਿਪਦਾਯੇਵ. ਕੁਤਸ੍ਸ ਸਲ੍ਲੇਖਪਟਿਪਤ੍ਤਿਯੁਤ੍ਤਤਾਤਿ. ‘‘ਏਵਂ ਸੁਤੇ’’ਤਿਆਦਿਨਾ ਭਗਵਾ ਅਮ੍ਬਟ੍ਠਂ ਸਨ੍ਤਜ੍ਜੇਨ੍ਤੋ ਨਿਗ੍ਗਣ੍ਹਾਤੀਤਿ ਦਸ੍ਸੇਤਿ.
ਵੇਠਕੇਹੀਤਿ ਵੇਠਕਪਟ੍ਟਕਾਹਿ. ਸਮਨ੍ਤਾਨਗਰਨ੍ਤਿ ਨਗਰਸ੍ਸ ਸਮਨ੍ਤਤੋ. ਕਤਸੁਧਾਕਮ੍ਮਂ ਪਾਕਾਰਸ੍ਸ ਅਧੋਭਾਗੇ ਠਾਨਂ ਵੁਚ੍ਚਤੀਤਿ ਅਧਿਪ੍ਪਾਯੋ.
ਦ੍ਵੇਲਕ੍ਖਣਦਸ੍ਸਨਵਣ੍ਣਨਾ
੨੮੭. ਨ ਸਕ੍ਕੋਤਿਸਙ੍ਕੁਚਿਤੇ ਇਰਿਯਾਪਥੇ ਅਨਵਸੇਸਤੋ ਤੇਸਂ ਦੁਬ੍ਬਿਭਾਵਨਤੋ. ਗਵੇਸੀਤਿ ਞਾਣੇਨ ਪਰਿਯੇਸਨਮਕਾਸਿ. ਸਮਾਨਯੀਤਿ ਞਾਣੇਨ ਸਙ੍ਕਲੇਨ੍ਤੋ ਸਮ੍ਮਾ ਆਨਯਿ ਸਮਾਹਰਿ. ‘‘ਕਙ੍ਖਤੀ’’ਤਿ ਪਦਸ੍ਸ ਆਕਙ੍ਖਤੀਤਿ ਅਯਮਤ੍ਥੋਤਿ ਆਹ ‘‘ਅਹੋ ਵਤ ਪਸ੍ਸੇਯ੍ਯਨ੍ਤਿ ਪਤ੍ਥਨਂ ਉਪ੍ਪਾਦੇਤੀ’’ਤਿ. ਕਿਚ੍ਛਤੀਤਿ ਕਿਲਮਤਿ. ‘‘ਕਙ੍ਖਤੀ’’ਤਿ ਪਦਸ੍ਸ ਪੁਬ੍ਬੇ ਆਸਿਸਨਤ੍ਥਤਂ ਵਤ੍ਵਾ ਇਦਾਨਿਸ੍ਸ ਸਂਸਯਤ੍ਥਤਮੇਵ ਵਿਕਪ੍ਪਨ੍ਤਰਵਸੇਨ ਦਸ੍ਸੇਨ੍ਤੋ ‘‘ਕਙ੍ਖਾਯ ਵਾ ਦੁਬ੍ਬਲਾ ਵਿਮਤਿ ਵੁਤ੍ਤਾ’’ਤਿ ਆਹ. ਤੀਹਿ ਧਮ੍ਮੇਹੀਤਿ ਤਿਪ੍ਪਕਾਰੇਹਿ ਸਂਸਯਧਮ੍ਮੇਹਿ. ਕਾਲੁਸਿਯਭਾਵੋਤਿ ਅਪ੍ਪਸਨ੍ਨਤਾਯ ਹੇਤੁਭੂਤੋ ਆਵਿਲਭਾਵੋ.
ਯਸ੍ਮਾ ਭਗਵਤੋ ਕੋਸੋਹਿਤਂ ਸਬ੍ਬਬੁਦ੍ਧਾਨਂ ਆਵੇਣਿਕਂ ਅਞ੍ਞੇਹਿ ਅਸਾਧਾਰਣਂ ਵਤ੍ਥਗੁਯ੍ਹਂ ਸੁਵਿਸੁਦ੍ਧਕਞ੍ਚਨਮਣ੍ਡਲਸਨ੍ਨਿਕਾਸਂ, ਅਤ੍ਤਨੋ ਸਣ੍ਠਾਨਸਨ੍ਨਿਵੇਸਸੁਨ੍ਦਰਤਾਯ ਆਜਾਨੇਯ੍ਯਗਨ੍ਧਹਤ੍ਥਿਨੋ ਵਰਙ੍ਗਪਰਮਚਾਰੁਭਾਵਂ, ਵਿਕਸਮਾਨਤਪਨਿਯਾਰਵਿਨ੍ਦਸਮੁਜ੍ਜਲਕੇਸਰਾਵਤ੍ਤਵਿਲਾਸਂ, ਸਞ੍ਝਾਪਭਾਨੁਰਞ੍ਜਿਤਜਲਵਨਨ੍ਤਰਾਭਿਲਕ੍ਖਿਤਸਮ੍ਪੁਣ੍ਣਚਨ੍ਦਮਣ੍ਡਲਸੋਭਞ੍ਚ ਅਤ੍ਤਨੋ ਸਿਰਿਯਾ ਅਭਿਭੁਯ੍ਯ ਵਿਰਾਜਤਿ, ਯਂ ਬਾਹਿਰਬ੍ਭਨ੍ਤਰਮਲੇਹਿ ਅਨੁਪਕ੍ਕਿਲਿਟ੍ਠਤਾਯ, ਚਿਰਕਾਲਂ ਸੁਪਰਿਚਿਤਬ੍ਰਹ੍ਮਚਰਿਯਾਧਿਕਾਰਤਾਯ, ਸੁਸਣ੍ਠਿਤਸਣ੍ਠਾਨਸਮ੍ਪਤ੍ਤਿਯਾ ਚ, ਕੋਪੀਨਮ੍ਪਿ ਸਨ੍ਤਂ ਅਕੋਪੀਨਮੇਵ, ਤਸ੍ਮਾ ਵੁਤ੍ਤਂ ‘‘ਭਗਵਤੋ ਹੀ’’ਤਿਆਦਿ. ਪਹੂਤਭਾਵਨ੍ਤਿ ਪੁਥੁਲਭਾਵਂ. ਏਤ੍ਥੇਵ ਹਿ ਤਸ੍ਸ ਸਂਸਯੋ, ਤਨੁਮੁਦੁਸੁਕੁਮਾਰਤਾਦੀਸੁ ਪਨਸ੍ਸ ਗੁਣੇਸੁ ਵਿਚਾਰਣਾ ਏਵ ਨਾਹੋਸਿ.
੨੮੮. ਹਿਰਿਕਰਣੋਕਾਸਨ੍ਤਿ ਹਿਰਿਯਿਤਬ੍ਬਟ੍ਠਾਨਂ. ਛਾਯਨ੍ਤਿ ਪਟਿਬਿਮ੍ਬਂ. ਕਥਂ ਕੀਦਿਸਨ੍ਤਿ ਆਹ ‘‘ਇਦ੍ਧਿਯਾ’’ਤਿਆਦਿ. ਛਾਯਾਰੂਪਕਮਤ੍ਤਨ੍ਤਿ ਭਗਵਤੋ ਪਟਿਬਿਮ੍ਬਰੂਪਂ. ਤਞ੍ਚ ਖੋ ਬੁਦ੍ਧਸਨ੍ਤਾਨਤੋ ਵਿਨਿਮੁਤ੍ਤਤ੍ਤਾ ਰੂਪਕਮਤ੍ਤਂ ਭਗਵਤੋ ਸਰੀਰਵਣ੍ਣਸਣ੍ਠਾਨਾਵਯਵਂ ਇਦ੍ਧਿਮਯਂ ਬਿਮ੍ਬਕਮਤ੍ਤਂ. ਤਂ ਪਨ ਰੂਪਕਮਤ੍ਤਂ ਦਸ੍ਸੇਨ੍ਤੋ ਭਗਵਾ ਯਥਾ ਅਤ੍ਤਨੋ ਬੁਦ੍ਧਰੂਪਂ ਨ ਦਿਸ੍ਸਤਿ, ਤਥਾ ਕਤ੍ਵਾ ਦਸ੍ਸੇਤਿ. ਨਿਨ੍ਨੇਤ੍ਵਾਤਿ ਨੀਹਰਿਤ੍ਵਾ. ਕਲ੍ਲੋਸੀਤਿ ਪੁਚ੍ਛਾਵਿਸ੍ਸਜ੍ਜਨੇ ਕੁਸਲੋ ਛੇਕੋ ਅਸਿ. ਤਥਾਕਰਣੇਨਾਤਿ ਕਥਿਨਸੂਚਿਂ ਵਿਯ ਕਰਣੇਨ. ਏਤ੍ਥਾਤਿ ਪਹੂਤਜਿਵ੍ਹਾਯ. ਮੁਦੁਭਾਵੋ ਪਕਾਸਿਤੋ ਅਮੁਦੁਨੋ ਘਨਸੁਖੁਮਭਾਵਾਪਾਦਨਤ੍ਥਂ ਅਸਕ੍ਕੁਣੇਯ੍ਯਤ੍ਤਾ ਦੀਘਭਾਵੋ, ਤਨੁਭਾਵੋ ਚਾਤਿ ਦਟ੍ਠਬ੍ਬਂ.
੨੯੧. ‘‘ਅਤ੍ਥਚਰਕੇਨਾ’’ਤਿ ਇਮਿਨਾ ਬ੍ਯਤਿਰੇਕਮੁਖੇਨ ਅਨਤ੍ਥਚਰਕਤਂਯੇਵ ਵਿਭਾਵੇਤਿ. ਨ ਅਞ੍ਞਤ੍ਰਾਤਿ ਨ ਅਞ੍ਞਸ੍ਮਿਂ ਸੁਗਤਿਯਨ੍ਤਿ ਅਤ੍ਥੋ. ਉਪਨੇਤ੍ਵਾ ਉਪਨੇਤ੍ਵਾਤਿ ਤਂ ਤਂ ਦੋਸਂ ਉਪਨੇਤ੍ਵਾ ਉਪਨੇਤ੍ਵਾ, ਤੇਨਾਹ ‘‘ਸੁਟ੍ਠੁਦਾਸਾਦਿਭਾਵਂ ਆਰੋਪੇਤ੍ਵਾ’’ਤਿ. ਪਾਤੇਸੀਤਿ ਪਵਟ੍ਟਨਵਸੇਨ ਪਾਤੇਸਿ.
ਪੋਕ੍ਖਰਸਾਤਿਬੁਦ੍ਧੂਪਸਙ੍ਕਮਨਵਣ੍ਣਨਾ
੨੯੩-੬. ਆਗਮਾ ਨੂਤਿ ਆਗਤੋ ਨੁ. ਖੋਤਿ ਨਿਪਾਤਮਤ੍ਤਂ. ਇਧਾਤਿ ਏਤ੍ਥ, ਤੁਮ੍ਹਾਕਂ ਸਨ੍ਤਿਕਨ੍ਤਿ ਅਤ੍ਥੋ. ਅਧਿਵਾਸੇਤੂਤਿ ਸਾਦਿਯਤੁ, ਤਂ ਪਨ ਸਾਦਿਯਨਂ ਮਨਸਾ ਸਮ੍ਪਟਿਗ੍ਗਹੋ ਹੋਤੀਤਿ ਆਹ ‘‘ਸਮ੍ਪਟਿਚ੍ਛਤੂ’’ਤਿ.
੨੯੭. ਯਾਵਦਤ੍ਥਨ੍ਤਿ ਯਾਵ ਅਤ੍ਥੋ, ਤਾਵ ਭੋਜਨੇਨ ਤਦਾ ਕਤਨ੍ਤਿ ਅਤ੍ਥੋ. ਓਣਿਤ੍ਤਨ੍ਤਿ ਆਮਿਸਾਪਨਯਨੇਨ ਸੁਚਿਕਤਂ, ਤੇਨਾਹ ‘‘ਹਤ੍ਥੇ ਚ ਪਤ੍ਤਞ੍ਚ ਧੋਵਿਤ੍ਵਾ’’ਤਿ.
੨੯੮. ਅਨੁਪੁਬ੍ਬਿਂ ਕਥਨ੍ਤਿ ਅਨੁਪੁਬ੍ਬਂ ਕਥੇਤਬ੍ਬਕਥਂ, ਤੇਨਾਹ ‘‘ਅਨੁਪਟਿਪਾਟਿਕਥ’’ਨ੍ਤਿ. ਕਾ ਪਨ ਸਾ? ਦਾਨਾਦਿਕਥਾਤਿ ਆਹ ‘‘ਦਾਨਾਨਨ੍ਤਰਂ ਸੀਲ’’ਨ੍ਤਿਆਦਿ. ਤੇਨ ਦਾਨਕਥਾ ਤਾਵ ਪਚੁਰਜਨੇਸੁਪਿ ਪਵਤ੍ਤਿਯਾ ਸਬ੍ਬਸਾਧਾਰਣਤ੍ਤਾ, ਸੁਕਰਤ੍ਤਾ, ਸੀਲੇ ਪਤਿਟ੍ਠਾਨਸ੍ਸ ਉਪਾਯਭਾਵਤੋ ਚ ਆਦਿਤੋ ਕਥੇਤਬ੍ਬਾ. ਪਰਿਚ੍ਚਾਗਸੀਲੋ ਹਿ ਪੁਗ੍ਗਲੋ ਪਰਿਗ੍ਗਹਿਤਵਤ੍ਥੂਸੁ ਨਿਸ੍ਸਙ੍ਗਭਾਵਤੋ ਸੁਖੇਨੇਵ ਸੀਲਾਨਿ ਸਮਾਦਿਯਤਿ, ਤਤ੍ਥ ਚ ਸੁਪ੍ਪਤਿਟ੍ਠਿਤੋ ਹੋਤਿ. ਸੀਲੇਨ ਦਾਯਕਪਟਿਗ੍ਗਾਹਕਸੁਦ੍ਧਿਤੋ ਪਰਾਨੁਗ੍ਗਹਂ ਵਤ੍ਵਾ ਪਰਪੀਲ਼ਾਨਿਵਤ੍ਤਿਵਚਨਤੋ, ਕਿਰਿਯਧਮ੍ਮਂ ਵਤ੍ਵਾ ਅਕਿਰਿਯਧਮ੍ਮਵਚਨਤੋ, ਭੋਗਸਮ੍ਪਤ੍ਤਿਹੇਤੁਂ ਵਤ੍ਵਾ ਭਵਸਮ੍ਪਤ੍ਤਿਹੇਤੁਵਚਨਤੋ ਚ ਦਾਨਕਥਾਨਨ੍ਤਰਂ ਸੀਲਕਥਾ ਕਥੇਤਬ੍ਬਾ, ਤਞ੍ਚੇ ਦਾਨਸੀਲਂ ਵਟ੍ਟਨਿਸ੍ਸਿਤਂ, ਅਯਂ ਭਵਸਮ੍ਪਤ੍ਤਿ ਤਸ੍ਸ ਫਲਨ੍ਤਿ ਦਸ੍ਸਨਤ੍ਥਂ ਇਮੇਹਿ ਚ ਦਾਨਸੀਲਮਯੇਹਿ ਪਣੀਤਪਣੀਤਤਰਾਦਿਭੇਦਭਿਨ੍ਨੇਹਿ ਪੁਞ੍ਞਕਿਰਿਯਵਤ੍ਥੂਹਿ ਏਤਾ ਚਾਤੁਮਹਾਰਾਜਿਕਾਦੀਸੁ ਪਣੀਤਪਣੀਤਤਰਾਦਿਭੇਦਭਿਨ੍ਨਾ ਅਪਰਿਮੇਯ੍ਯਾ ਦਿਬ੍ਬਭੋਗਸਮ੍ਪਤ੍ਤਿਯੋ ਲਦ੍ਧਬ੍ਬਾਤਿ ਦਸ੍ਸਨਤ੍ਥਂ ਤਦਨਨ੍ਤਰਂ ਸਗ੍ਗਕਥਾ. ਸ੍ਵਾਯਂ ਸਗ੍ਗੋ ਰਾਗਾਦੀਹਿ ਉਪਕ੍ਕਿਲਿਟ੍ਠੋ, ਸਬ੍ਬਥਾਨੁਪਕ੍ਕਿਲਿਟ੍ਠੋ ਅਰਿਯਮਗ੍ਗੋਤਿ ਦਸ੍ਸਨਤ੍ਥਂ ਸਗ੍ਗਾਨਨ੍ਤਰਂ ਮਗ੍ਗੋ ਕਥੇਤਬ੍ਬੋ. ਮਗ੍ਗਞ੍ਚ ਕਥੇਨ੍ਤੇਨ ਤਦਧਿਗਮੁਪਾਯਸਨ੍ਦਸ੍ਸਨਤ੍ਥਂ ਸਗ੍ਗਪਰਿਯਾਪਨ੍ਨਾਪਿ, ਪਗੇਵ ਇਤਰੇ ਸਬ੍ਬੇਪਿ ਕਾਮਾ ਨਾਮ ਬਹ੍ਵਾਦੀਨਵਾ ਅਨਿਚ੍ਚਾ ਅਦ੍ਧੁਵਾ ਵਿਪਰਿਣਾਮਧਮ੍ਮਾਤਿ ਕਾਮਾਨਂ ਆਦੀਨਵੋ, ਹੀਨਾ ਗਮ੍ਮਾ ਪੋਥੁਜ੍ਜਨਿਕਾ ਅਨਰਿਯਾ ਅਨਤ੍ਥਸਞ੍ਹਿਤਾਤਿ ਤੇਸਂ ਓਕਾਰੋ ਲਾਮਕਭਾਵੋ, ਸਬ੍ਬੇਪਿ ਭਵਾ ਕਿਲੇਸਾਨਂ ਵਤ੍ਥੁਭੂਤਾਤਿ ਤਤ੍ਥ ਸਂਕਿਲੇਸੋ, ਸਬ੍ਬਸਂਕਿਲੇਸਵਿਪ੍ਪਮੁਤ੍ਤਂ ਨਿਬ੍ਬਾਨਨ੍ਤਿ ਨੇਕ੍ਖਮ੍ਮੇ ਆਨਿਸਂਸੋ ਚ ਕਥੇਤਬ੍ਬੋਤਿ ਅਯਮਤ੍ਥੋ ਬੋਧਿਤੋਤਿ ਵੇਦਿਤਬ੍ਬੋ. ਮਗ੍ਗੋਤਿ ਚੇਤ੍ਥ ਇਤਿ-ਸਦ੍ਦੇਨ ਆਦਿਅਤ੍ਥਦੀਪਨਤੋ ‘‘ਕਾਮਾਨਂ ਆਦੀਨਵੋ’’ਤਿ ਏਵਮਾਦੀਨਂ ਸਙ੍ਗਹੋਤਿ ਏਵਮਯਂ ਅਤ੍ਥਵਣ੍ਣਨਾ ਕਤਾਤਿ ਵੇਦਿਤਬ੍ਬਾ. ‘‘ਤਸ੍ਸ ਉਪ੍ਪਤ੍ਤਿਆਕਾਰਦਸ੍ਸਨਤ੍ਥ’’ਨ੍ਤਿ ਕਸ੍ਮਾ ਵੁਤ੍ਤਂ, ਨਨੁ ਮਗ੍ਗਞਾਣਂ ਅਸਙ੍ਖਤਧਮ੍ਮਾਰਮ੍ਮਣਂ, ਨ ਸਙ੍ਖਤਧਮ੍ਮਾਰਮ੍ਮਣਨ੍ਤਿ ਚੋਦਨਂ ਸਨ੍ਧਾਯਾਹ ‘‘ਤਞ੍ਹੀ’’ਤਿਆਦਿ. ਤਤ੍ਥ ਪਟਿਵਿਜ੍ਝਨ੍ਤਨ੍ਤਿ ਅਸਮ੍ਮੋਹਪਟਿਵੇਧਵਸੇਨ ਪਟਿਵਿਜ੍ਝਨ੍ਤਂ, ਤੇਨਾਹ ‘‘ਕਿਚ੍ਚਵਸੇਨਾ’’ਤਿ.
ਪੋਕ੍ਖਰਸਾਤਿਉਪਾਸਕਤ੍ਤਪਟਿਵੇਦਨਾਕਥਾਵਣ੍ਣਨਾ
੨੯੯. ਏਤ੍ਥ ਚ ‘‘ਦਿਟ੍ਠਧਮ੍ਮੋ’’ਤਿਆਦਿ ਪਾਲ਼ਿਯਂ ਦਸ੍ਸਨਂ ਨਾਮ ਞਾਣਦਸ੍ਸਨਤੋ ਅਞ੍ਞਮ੍ਪਿ ਅਤ੍ਥਿ, ਤਨ੍ਨਿਵਤ੍ਤਨਤ੍ਥਂ ‘‘ਪਤ੍ਤਧਮ੍ਮੋ’’ਤਿ ਵੁਤ੍ਤਂ. ਪਤ੍ਤਿ ਚ ਞਾਣਸਮ੍ਪਤ੍ਤਿਤੋ ਅਞ੍ਞਮ੍ਪਿ ਵਿਜ੍ਜਤੀਤਿ ਤਤੋ ਵਿਸੇਸਦਸ੍ਸਨਤ੍ਥਂ ‘‘ਵਿਦਿਤਧਮ੍ਮੋ’’ਤਿ ਵੁਤ੍ਤਂ. ਸਾ ਪਨੇਸਾ ਵਿਦਿਤਧਮ੍ਮਤਾ ਏਕਦੇਸਤੋਪਿ ਹੋਤੀਤਿ ਨਿਪ੍ਪਦੇਸਤੋ ਵਿਦਿਤਭਾਵਂ ਦਸ੍ਸੇਤੁਂ ‘‘ਪਰਿਯੋਗਾਲ਼੍ਹਧਮ੍ਮੋ’’ਤਿ ਵੁਤ੍ਤਂ. ਤੇਨਸ੍ਸ ਸਚ੍ਚਾਭਿਸਮ੍ਬੋਧਂਯੇਵ ਦੀਪੇਤਿ. ਮਗ੍ਗਞਾਣਞ੍ਹਿ ਏਕਾਭਿਸਮਯਵਸੇਨ ਪਰਿਞ੍ਞਾਦਿਕਿਚ੍ਚਂ ਸਾਧੇਨ੍ਤਂ ਨਿਪ੍ਪਦੇਸੇਨ ਚਤੁਸਚ੍ਚਧਮ੍ਮਂ ਸਮਨ੍ਤਤੋ ਓਗਾਲ਼੍ਹਂ ਨਾਮ ਹੋਤਿ, ਤੇਨਾਹ ‘‘ਦਿਟ੍ਠੋ ਅਰਿਯਸਚ੍ਚਧਮ੍ਮੋ ਏਤੇਨਾਤਿ ਦਿਟ੍ਠਧਮ੍ਮੋ’’ਤਿ. ਤਿਣ੍ਣਾ ਵਿਚਿਕਿਚ੍ਛਾਤਿ ਸਪ੍ਪਟਿਭਯਕਨ੍ਤਾਰਸਦਿਸਾ ਸੋਲ਼ਸਵਤ੍ਥੁਕਾ, ਅਟ੍ਠਵਤ੍ਥੁਕਾ ਚ ਤਿਣ੍ਣਾ ਵਿਤਿਣ੍ਣਾ ਵਿਚਿਕਿਚ੍ਛਾ. ਵਿਗਤਾ ਕਥਙ੍ਕਥਾਤਿ ਪਵਤ੍ਤਿਆਦੀਸੁ. ‘‘ਏਵਂ ਨੁ ਖੋ, ਨ ਨੁ ਖੋ’’ਤਿ ਏਵਂ ਪਵਤ੍ਤਿਕਾ ਵਿਗਤਾ ਸਮੁਚ੍ਛਿਨ੍ਨਾ ਕਥਙ੍ਕਥਾ. ਵੇਸਾਰਜ੍ਜਪ੍ਪਤ੍ਤੋਤਿ ਸਾਰਜ੍ਜਕਰਾਨਂ ਪਾਪਧਮ੍ਮਾਨਂ ਪਹੀਨਤ੍ਤਾ, ਤਪ੍ਪਟਿਪਕ੍ਖੇਸੁ ਚ ਸੀਲਾਦਿਗੁਣੇਸੁ ਸੁਪ੍ਪਤਿਟ੍ਠਿਤਤ੍ਤਾ ਵੇਸਾਰਜ੍ਜਂ ਵਿਸਾਰਦਭਾਵਂ ਵੇਯ੍ਯਤ੍ਤਿਯਂ ਪਤ੍ਤੋ ਅਧਿਗਤੋ. ਸਾਯਂ ਵੇਸਾਰਜ੍ਜਪ੍ਪਤ੍ਤਿ ਸੁਪ੍ਪਤਿਟ੍ਠਿਤਭਾਵੋਤਿ ਕਤ੍ਵਾ ਆਹ ‘‘ਸਤ੍ਥੁਸਾਸਨੇ’’ਤਿ. ਅਤ੍ਤਨਾ ਪਚ੍ਚਕ੍ਖਤੋ ਦਿਟ੍ਠਤ੍ਤਾ ਅਧਿਗਤਤ੍ਤਾ ਨ ਪਰਂ ਪਚ੍ਚੇਤਿ, ਨ ਤਸ੍ਸ ਪਰੋ ਪਚ੍ਚੇਤਬ੍ਬੋ ਅਤ੍ਥੀਤਿ ਅਪਰਪ੍ਪਚ੍ਚਯੋ. ਯਂ ਪਨੇਤ੍ਥ ਵਤ੍ਤਬ੍ਬਂ ਅਵੁਤ੍ਤਂ, ਤਂ ਪਰਤੋ ਆਗਮਿਸ੍ਸਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਅਮ੍ਬਟ੍ਠਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.