੪. ਸੋਣਦਣ੍ਡਸੁਤ੍ਤਵਣ੍ਣਨਾ

੩੦੦. ਸੁਨ੍ਦਰਭਾਵੇਨ ਸਾਤਿਸਯਾਨਿ ਅਙ੍ਗਾਨਿ ਏਤੇਸਂ ਅਤ੍ਥੀਤਿ ਅਙ੍ਗਾ, ਰਾਜਕੁਮਾਰਾਤਿ ਆਹ ‘‘ਅਙ੍ਗਾ ਨਾਮ ਅਙ੍ਗਪਾਸਾਦਿਕਤਾਯਾ’’ਤਿਆਦਿ. ਇਧਾਪਿ ਅਧਿਪ੍ਪੇਤਾ, ਨ ਅਮ੍ਬਟ੍ਠਸੁਤ੍ਤੇ ਏਵ. ਆਗਨ੍ਤੁਂ ਨ ਦਸ੍ਸਨ੍ਤੀਤਿ ਆਗਮਨੇ ਆਦੀਨਵਂ ਦਸ੍ਸੇਤ੍ਵਾ ਪਟਿਕ੍ਖਿਪਨਵਸੇਨ ਆਗਨ੍ਤੁਂ ਨ ਦਸ੍ਸਨ੍ਤਿ, ਨਾਨੁਜਾਨਿਸ੍ਸਨ੍ਤੀਤਿ ਅਧਿਪ੍ਪਾਯੋ. ਨੀਲਾਸੋਕਕਣਿਕਾਰਕੋਵਿਲ਼ਾਰਕੁਨ੍ਦਰਾਜਰੁਕ੍ਖੇਹਿ ਸਮ੍ਮਿਸ੍ਸਤਾਯ ਤਂ ਚਮ੍ਪਕਵਨਂ ‘‘ਨੀਲਾਦਿਪਞ੍ਚਵਣ੍ਣਕੁਸੁਮਪਟਿਮਣ੍ਡਿਤ’’ਨ੍ਤਿ ਦਟ੍ਠਬ੍ਬਂ. ਨ ਚਮ੍ਪਕਰੁਕ੍ਖਾਨਂਯੇਵ ਨੀਲਾਦਿਪਞ੍ਚਕੁਸੁਮਤਾਯਾਤਿ ਵਦਨ੍ਤਿ. ‘‘ਭਗਵਾ ਕੁਸੁਮਗਨ੍ਧਸੁਗਨ੍ਧੇ ਚਮ੍ਪਕਵਨੇ ਵਿਹਰਤੀ’’ਤਿ ਇਮਿਨਾ ਨ ਮਾਪਨਕਾਲੇ ਏਵ ਤਸ੍ਮਿਂ ਨਗਰੇ ਚਮ੍ਪਕਰੁਕ੍ਖਾ ਉਸ੍ਸਨ੍ਨਾ, ਅਥ ਖੋ ਅਪਰਭਾਗੇ ਪੀਤਿ ਦਸ੍ਸੇਤਿ. ਮਾਪਨਕਾਲੇ ਹਿ ਚਮ੍ਪਕਾਨਂ ਉਸ੍ਸਨ੍ਨਤਾਯ ਸਾ ਨਗਰੀ ‘‘ਚਮ੍ਪਾ’’ਤਿ ਨਾਮਂ ਲਭਿ. ਇਸ੍ਸਰਤ੍ਤਾਤਿ ਅਧਿਪਤਿਭਾਵਤੋ. ਸੇਨਾ ਏਤਸ੍ਸ ਅਤ੍ਥੀਤਿ ਸੇਨਿਕੋ, ਸੇਨਿਕੋ ਏਵ ਸੇਨਿਯੋ, ਅਤ੍ਥਿਤਾ ਚੇਤ੍ਥ ਬਹੁਭਾਵਵਿਸਿਟ੍ਠਾਤਿ ਵੁਤ੍ਤਂ ‘‘ਮਹਤਿਯਾ ਸੇਨਾਯ ਸਮਨ੍ਨਾਗਤਤ੍ਤਾ’’ਤਿ.

੩੦੧-੨. ਸਂਹਤਾਤਿ ਸਨ੍ਨਿਪਤਿਤਾ, ‘‘ਸਙ੍ਘਿਨੋ’’ਤਿ ਵਤ੍ਤਬ੍ਬੇ ‘‘ਸਙ੍ਘੀ’’ਤਿ ਪੁਥੁਤ੍ਥੇ ਏਕਵਚਨਂ ਬ੍ਰਾਹ੍ਮਣਗਹਪਤਿਕਾਨਂ ਅਧਿਪ੍ਪੇਤਤ੍ਤਾ, ਤੇਨਾਹ ‘‘ਏਤੇਸ’’ਨ੍ਤਿ. ਰਾਜਰਾਜਞ੍ਞਾਦੀਨਂ ਭਣ੍ਡਧਰਾ ਪੁਰਿਸਾ ਖਤਾ, ਨੇਸਂ ਤਾਯਨਤੋ ਖਤ੍ਤਾ. ਸੋ ਹਿ ਯੇਹਿ ਯਤ੍ਥ ਪੇਸਿਤੋ, ਤਤ੍ਥ ਤੇਸਂ ਦੋਸਂ ਪਰਿਹਰਨ੍ਤੋ ਯੁਤ੍ਤਪਤ੍ਤਵਸੇਨ ਪੁਚ੍ਛਿਤਮਤ੍ਥਂ ਕਥੇਤਿ, ਤੇਨਾਹ ‘‘ਪੁਚ੍ਛਿਤਪਞ੍ਹੇ ਬ੍ਯਾਕਰਣਸਮਤ੍ਥੋ’’ਤਿ. ਕੁਲਾਪਦੇਸਾਦਿਨਾ ਮਹਤੀ ਮਤ੍ਤਾ ਏਤਸ੍ਸਾਤਿ ਮਹਾਮਤ੍ਤੋ.

ਸੋਣਦਣ੍ਡਗੁਣਕਥਾਵਣ੍ਣਨਾ

੩੦੩. ਵਿਸਿਟ੍ਠਂ ਰਜ੍ਜਂ ਵਿਰਜ੍ਜਂ, ਵਿਰਜ੍ਜਮੇਵ ਵੇਰਜ੍ਜਂ ਯਥਾ ‘‘ਵੇਕਤਂ ਵੇਸਯ’’ਨ੍ਤਿ, ਨਾਨਾਵਿਧਂ ਵੇਰਜ੍ਜਂ ਨਾਨਾਵੇਰਜ੍ਜਂ, ਤਤ੍ਥ ਜਾਤਾਤਿਆਦਿਨਾ ਸਬ੍ਬਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਉਤ੍ਤਮਬ੍ਰਾਹ੍ਮਣੋਤਿ ਅਭਿਜਨਸਮ੍ਪਤ੍ਤਿਯਾ ਵਿਤ੍ਤਸਮ੍ਪਤ੍ਤਿਯਾ ਵਿਜ੍ਜਾਸਮ੍ਪਤ੍ਤਿਯਾ ਉਗ੍ਗਤਤਰੋ, ਉਲ਼ਾਰੋ ਵਾ ਬ੍ਰਾਹ੍ਮਣੋ. ਅਸਨ੍ਨਿਪਾਤੋਤਿ ਲਾਭਮਚ੍ਛਰੇਨ ਨਿਪ੍ਪੀਲ਼ਿਤਤਾਯ ਅਸਨ੍ਨਿਪਾਤੋ ਵਿਯ ਭਵਿਸ੍ਸਤਿ.

‘‘ਅਙ੍ਗੇਤਿ ਗਮੇਤਿ ਞਾਪੇਤੀਤਿ ਅਙ੍ਗਂ, ਹੇਤੂਤਿ ਆਹ ‘‘ਇਮਿਨਾਪਿ ਕਾਰਣੇਨਾ’’ਤਿ. ‘‘ਉਭਤੋ ਸੁਜਾਤੋ’’ਤਿ ਏਤ੍ਤਕੇ ਵੁਤ੍ਤੇ ਯੇਹਿ ਕੇਹਿਚਿ ਦ੍ਵੀਹਿ ਭਾਗੇਹਿ ਸੁਜਾਤਤਾ ਵਿਞ੍ਞਾਯੇਯ੍ਯ. ਸੁਜਾਤ-ਸਦ੍ਦੋ ਚ ‘‘ਸੁਜਾਤੋ ਚਾਰੁਦਸ੍ਸਨੋ’’ਤਿਆਦੀਸੁ (ਥੇਰਗਾ. ੮੧੮) ਆਰੋਹਸਮ੍ਪਤ੍ਤਿਪਰਿਯਾਯੋਤਿ ਜਾਤਿਵਸੇਨੇਵ ਸੁਜਾਤਤਂ ਵਿਭਾਵੇਤੁਂ ‘‘ਮਾਤਿਤੋ ਚ ਪਿਤਿਤੋ ਚਾ’’ਤਿ ਵੁਤ੍ਤਂ. ਅਨੋਰਸਪੁਤ੍ਤਵਸੇਨਾਪਿ ਲੋਕੇ ਮਾਤੁਪਿਤੁਸਮਞ੍ਞਾ ਦਿਸ੍ਸਤਿ, ਇਧ ਪਨਸ੍ਸ ਓਰਸਪੁਤ੍ਤਵਸੇਨੇਵ ਇਚ੍ਛਿਤਾਤਿ ਦਸ੍ਸੇਤੁਂ ‘‘ਸਂਸੁਦ੍ਧਗਹਣਿਕੋ’’ਤਿ ਵੁਤ੍ਤਂ. ਗਬ੍ਭਂ ਗਣ੍ਹਾਤਿ ਧਾਰੇਤੀਤਿ ਗਹਣੀ, ਗਬ੍ਭਾਸਯਸਞ੍ਞਿਤੋ ਮਾਤੁਕੁਚ੍ਛਿਪ੍ਪਦੇਸੋ. ਯਥਾਭੁਤ੍ਤਸ੍ਸ ਆਹਾਰਸ੍ਸ ਵਿਪਾਚਨਵਸੇਨ ਗਣ੍ਹਨਤੋ ਅਛਡ੍ਡਨਤੋ ਗਹਣੀ, ਕਮ੍ਮਜਤੇਜੋਧਾਤੁ.

ਪਿਤਾ ਚ ਮਾਤਾ ਚ ਪਿਤਰੋ, ਪਿਤੂਨਂ ਪਿਤਰੋ ਪਿਤਾਮਹਾ, ਤੇਸਂ ਯੁਗੋ ਦ੍ਵਨ੍ਦੋ ਪਿਤਾਮਹਯੁਗੋ, ਤਸ੍ਮਾ, ਯਾਵ ਸਤ੍ਤਮਾ ਪਿਤਾਮਹਯੁਗਾ ਪਿਤਾਮਹਦ੍ਵਨ੍ਦਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਏਵਞ੍ਹਿ ਪਿਤਾਮਹਗ੍ਗਹਣੇਨੇਵ ਮਾਤਾਮਹੋਪਿ ਗਹਿਤੋਤਿ. ਸੋ ਅਟ੍ਠਕਥਾਯਂ ਵਿਸੁਂ ਨ ਉਦ੍ਧਟੋ. ਯੁਗ-ਸਦ੍ਦੋ ਚੇਤ੍ਥ ਏਕਸੇਸਨਯੇਨ ਦਟ੍ਠਬ੍ਬੋ ‘‘ਯੁਗੋ ਚ ਯੁਗੋ ਚ ਯੁਗਾ’’ਤਿ. ਏਵਞ੍ਹਿ ਤਤ੍ਥ ਤਤ੍ਥ ਦ੍ਵਨ੍ਦਂ ਗਹਿਤਮੇਵ ਹੋਤਿ, ਤੇਨਾਹ ‘‘ਤਤੋ ਉਦ੍ਧਂ ਸਬ੍ਬੇਪਿ ਪੁਬ੍ਬਪੁਰਿਸਾ ਪਿਤਾਮਹਗ੍ਗਹਣੇਨੇਵ ਗਹਿਤਾ’’ਤਿ. ਪੁਰਿਸਗ੍ਗਹਣਞ੍ਚੇਤ੍ਥ ਉਕ੍ਕਟ੍ਠਨਿਦ੍ਦੇਸਵਸੇਨ ਕਤਨ੍ਤਿ ਦਟ੍ਠਬ੍ਬਂ. ਏਵਞ੍ਹਿ ‘‘ਮਾਤਿਤੋ’’ਤਿ ਪਾਲ਼ਿਵਚਨਂ ਸਮਤ੍ਥਿਤਂ ਹੋਤਿ. ਅਕ੍ਖਿਤ੍ਤੋਤਿ ਅਪ੍ਪਤ੍ਤਖੇਪੋ. ਅਨਵਕ੍ਖਿਤ੍ਤੋਤਿ ਸਦ੍ਧਥਾਲਿਪਾਕਾਦੀਸੁ ਨ ਅਵਕ੍ਖਿਤ੍ਤੋ ਨ ਛਡ੍ਡਿਤੋ. ਜਾਤਿਵਾਦੇਨਾਤਿ ਹੇਤੁਮ੍ਹਿ ਕਰਣਵਚਨਨ੍ਤਿ ਦਸ੍ਸੇਤੁਂ ‘‘ਕੇਨ ਕਾਰਣੇਨਾ’’ਤਿਆਦਿ ਵੁਤ੍ਤਂ. ਏਤ੍ਥ ਚ ‘‘ਉਭਤੋ…ਪੇ… ਪਿਤਾਮਹਯੁਗਾ’’ਤਿ ਏਤੇਨ ਬ੍ਰਾਹ੍ਮਣਸ੍ਸ ਯੋਨਿਦੋਸਾਭਾਵੋ ਦਸ੍ਸਿਤੋ ਸਂਸੁਦ੍ਧਗਹਣਿਕਭਾਵਕਿਤ੍ਤਨਤੋ, ‘‘ਅਕ੍ਖਿਤ੍ਤੋ’’ਤਿ ਇਮਿਨਾ ਕਿਰਿਯਾਪਰਾਧਾਭਾਵੋ. ਕਿਰਿਯਾਪਰਾਧੇਨ ਹਿ ਸਤ੍ਤਾ ਖੇਪਂ ਪਾਪੁਣਨ੍ਤਿ. ‘‘ਅਨੁਪਕ੍ਕੁਟ੍ਠੋ’’ਤਿ ਇਮਿਨਾ ਅਯੁਤ੍ਤਸਂਸਗ੍ਗਾਭਾਵੋ. ਅਯੁਤ੍ਤਸਂਸਗ੍ਗਮ੍ਪਿ ਹਿ ਪਟਿਚ੍ਚ ਸਤ੍ਤਾ ਅਕ੍ਕੋਸਂ ਲਭਨ੍ਤਿ.

ਇਸ੍ਸਰੋਤਿ ਆਧਿਪਤੇਯ੍ਯਸਂਵਤ੍ਤਨਿਯਕਮ੍ਮਬਲੇਨ ਈਸਨਸੀਲੋ, ਸਾ ਪਨਸ੍ਸ ਇਸ੍ਸਰਤਾ ਵਿਭਵਸਮ੍ਪਤ੍ਤਿਪਚ੍ਚਯਾ ਪਾਕਟਾ ਜਾਤਾਤਿ ਅਡ੍ਢਤਾਪਰਿਯਾਯਭਾਵੇਨੇਵ ਵਦਨ੍ਤੋ ‘‘ਅਡ੍ਢੋਤਿ ਇਸ੍ਸਰੋ’’ਤਿ ਆਹ. ਮਹਨ੍ਤਂ ਧਨਂ ਅਸ੍ਸ ਭੂਮਿਗਤਞ੍ਚੇਵ ਵੇਹਾਸਟ੍ਠਞ੍ਚਾਤਿ ਮਹਦ੍ਧਨੋ. ਤਸ੍ਸਾਤਿ ਤਸ੍ਸ ਤਸ੍ਸ. ਵਦਨ੍ਤਿ ‘‘ਅਨ੍ਵਯਤੋ, ਬ੍ਯਤਿਰੇਕਤੋ ਚ ਅਨੁਪਸਙ੍ਕਮਨਕਾਰਣਂ ਕਿਤ੍ਤੇਮਾ’’ਤਿ.

ਅਧਿਕਰੂਪੋਤਿ ਵਿਸਿਟ੍ਠਰੂਪੋ ਉਤ੍ਤਮਸਰੀਰੋ. ਦਸ੍ਸਨਂ ਅਰਹਤੀਤਿ ਦਸ੍ਸਨੀਯੋ, ਤੇਨਾਹ ‘‘ਦਸ੍ਸਨਯੋਗ੍ਗੋ’’ਤਿ. ਪਸਾਦਂ ਆਵਹਤੀਤਿ ਪਾਸਾਦਿਕੋ, ਤੇਨਾਹ ‘‘ਚਿਤ੍ਤਪ੍ਪਸਾਦਜਨਨਤੋ’’ਤਿ. ਵਣ੍ਣਸ੍ਸਾਤਿ ਵਣ੍ਣਧਾਤੁਯਾ. ਸਰੀਰਨ੍ਤਿ ਸਨ੍ਨਿਵੇਸਵਿਸਿਟ੍ਠਂ ਕਰਚਰਣਗੀਵਾਸੀਸਾਦਿਅਵਯਵਸਮੁਦਾਯਂ, ਸੋ ਚ ਸਣ੍ਠਾਨਮੁਖੇਨ ਗਯ੍ਹਤੀਤਿ ‘‘ਪਰਮਾਯ ਵਣ੍ਣਪੋਕ੍ਖਰਤਾਯਾਤਿ…ਪੇ… ਸਮ੍ਪਤ੍ਤਿਯਾ ਚਾ’’ਤਿ ਵੁਤ੍ਤਂ. ਸਬ੍ਬਵਣ੍ਣੇਸੁ ਸੁਵਣ੍ਣਵਣ੍ਣੋਵ ਉਤ੍ਤਮੋਤਿ ਵੁਤ੍ਤਂ ‘‘ਸੇਟ੍ਠੇਨ ਸੁਵਣ੍ਣਵਣ੍ਣੇਨ ਸਮਨ੍ਨਾਗਤੋ’’ਤਿ. ਤਥਾ ਹਿ ਬੁਦ੍ਧਾ, ਚਕ੍ਕਵਤ੍ਤਿਨੋ ਚ ਸੁਵਣ੍ਣਵਣ੍ਣਾਵ ਹੋਨ੍ਤਿ. ਬ੍ਰਹ੍ਮਵਚ੍ਛਸੀਤਿ ਉਤ੍ਤਮਸਰੀਰਾਭੋ, ਸੁਵਣ੍ਣਾਭੋ ਇਚ੍ਚੇਵ ਅਤ੍ਥੋ. ਇਮਮੇਵ ਹਿ ਅਤ੍ਥਂ ਸਨ੍ਧਾਯ ‘‘ਮਹਾਬ੍ਰਹ੍ਮੁਨੋ ਸਰੀਰਸਦਿਸੇਨੇਵ ਸਰੀਰੇਨ ਸਮਨ੍ਨਾਗਤੋ’’ਤਿ ਵੁਤ੍ਤਂ, ਨ ਬ੍ਰਹ੍ਮੁਜੁਗਤ੍ਤਤਂ. ਅਖੁਦ੍ਦਾਵਕਾਸੋ ਦਸ੍ਸਨਾਯਾਤਿ ਆਰੋਹਪਰਿਣਾਹਸਮ੍ਪਤ੍ਤਿਯਾ, ਅਵਯਵਪਾਰਿਪੂਰਿਯਾ ਚ ਦਸ੍ਸਨਾਯ ਓਕਾਸੋ ਨ ਖੁਦ੍ਦਕੋ, ਤੇਨਾਹ ‘‘ਸਬ੍ਬਾਨੇਵਾ’’ਤਿਆਦਿ.

ਯਮਨਿਯਮਲਕ੍ਖਣਂ ਸੀਲਮਸ੍ਸ ਅਤ੍ਥੀਤਿ ਸੀਲਵਾ. ਤਂ ਪਨਸ੍ਸ ਰਤ੍ਤਞ੍ਞੁਤਾਯ ਵੁਦ੍ਧਂ ਵਡ੍ਢਿਤਂ ਅਤ੍ਥੀਤਿ ਵੁਦ੍ਧਸੀਲੀ. ਤੇਨ ਚ ਸਬ੍ਬਦਾ ਸਮ੍ਮਾਯੋਗਤੋ ਵੁਦ੍ਧਸੀਲੇਨ ਸਮਨ੍ਨਾਗਤੋ. ਸਬ੍ਬਮੇਤਂ ਪਞ੍ਚਸੀਲਮਤ੍ਤਮੇਵ ਸਨ੍ਧਾਯ ਵਦਨ੍ਤਿ ਤਤੋ ਪਰਂ ਸੀਲਸ੍ਸ ਤਤ੍ਥ ਅਭਾਵਤੋ, ਤੇਸਞ੍ਚ ਅਜਾਨਨਤੋ.

ਠਾਨਕਰਣਸਮ੍ਪਤ੍ਤਿਯਾ, ਸਿਕ੍ਖਾਸਮ੍ਪਤ੍ਤਿਯਾ ਚ ਕਤ੍ਥਚਿਪਿ ਅਨੂਨਤਾਯ ਪਰਿਮਣ੍ਡਲਪਦਾਨਿ ਬ੍ਯਞ੍ਜਨਾਨਿ ਅਕ੍ਖਰਾਨਿ ਏਤਿਸ੍ਸਾਤਿ ਪਰਿਮਣ੍ਡਲਪਦਬ੍ਯਞ੍ਜਨਾ. ਅਥ ਵਾ ਪਜ੍ਜਤਿ ਅਤ੍ਥੋ ਏਤੇਨਾਤਿ ਪਦਂ, ਨਾਮਾਦਿ. ਯਥਾਧਿਪ੍ਪੇਤਮਤ੍ਥਂ ਬ੍ਯਞ੍ਜੇਤੀਤਿ ਬ੍ਯਞ੍ਜਨਂ, ਵਾਕ੍ਯਂ. ਤੇਸਂ ਪਰਿਪੁਣ੍ਣਤਾਯ ਪਰਿਮਣ੍ਡਲਪਦਬ੍ਯਞ੍ਜਨਾ. ਅਤ੍ਥਞਾਪਨੇ ਸਾਧਨਤਾਯ ਵਾਚਾਵ ਕਰਣਨ੍ਤਿ ਵਾਕ੍ਕਰਣਂ, ਉਦਾਹਾਰਘੋਸੋ. ਗੁਣਪਰਿਪੁਣ੍ਣਭਾਵੇਨ ਤਸ੍ਸ ਬ੍ਰਾਹ੍ਮਣਸ੍ਸ, ਤੇਨ ਵਾ ਭਾਸਿਤਬ੍ਬਅਤ੍ਥਸ੍ਸ. ਪੂਰੇ ਪੁਣ੍ਣਭਾਵੇ. ਪੂਰੇਤਿ ਚ ਪੁਰਿਮਸ੍ਮਿਂ ਅਤ੍ਥੇ ਆਧਾਰੇ ਭੁਮ੍ਮਂ, ਦੁਤਿਯਸ੍ਮਿਂ ਵਿਸਯੇ. ‘‘ਸੁਖੁਮਾਲਤ੍ਤਨੇਨਾ’’ਤਿ ਇਮਿਨਾ ਤਸ੍ਸਾ ਵਾਚਾਯ ਮੁਦੁਸਣ੍ਹਭਾਵਮਾਹ. ਅਪਲਿਬੁਦ੍ਧਾਯ ਪਿਤ੍ਤਸੇਮ੍ਹਾਦੀਹਿ. ਸਨ੍ਦਿਟ੍ਠਂ ਸਬ੍ਬਂ ਦਸ੍ਸੇਤ੍ਵਾ ਵਿਯ ਏਕਦੇਸਂ ਕਥਨਂ. ਵਿਲਮ੍ਬਿਤਂ ਸਣਿਕਂ ਚਿਰਾਯਿਤ੍ਵਾ ਕਥਨਂ. ‘‘ਸਨ੍ਦਿਦ੍ਧਵਿਲਮ੍ਬਿਤਾਦੀ’’ਤਿ ਵਾ ਪਾਠੋ. ਤਤ੍ਥ ਸਨ੍ਦਿਦ੍ਧਂ ਸਨ੍ਦੇਹਜਨਕਂ. ਆਦਿ-ਸਦ੍ਦੇਨ ਦੁਕ੍ਖਲਿਤਾਨੁਕਡ੍ਢਿਤਾਦਿਂ ਸਙ੍ਗਣ੍ਹਾਤਿ. ‘‘ਆਦਿਮਜ੍ਝਪਰਿਯੋਸਾਨਂ ਪਾਕਟਂ ਕਤ੍ਵਾ’’ਤਿ ਇਮਿਨਾ ਤਸ੍ਸਾ ਵਾਚਾਯ ਅਤ੍ਥਪਾਰਿਪੂਰਿਂ ਵਦਨ੍ਤਿ.

‘‘ਜਿਣ੍ਣੋ’’ਤਿਆਦੀਨਿ ਪਦਾਨਿ ਸੁਵਿਞ੍ਞੇਯ੍ਯਾਨਿ, ਹੇਟ੍ਠਾ ਵੁਤ੍ਤਤ੍ਥਾਨਿ ਚ. ਦੁਤਿਯਨਯੇ ਪਨ ਜਿਣ੍ਣੋਤਿ ਨਾਯਂ ਜਿਣ੍ਣਤਾ ਵਯੋਮਤ੍ਤੇਨ, ਅਥ ਖੋ ਕੁਲਪਰਿਵਟ੍ਟੇਨ ਪੁਰਾਣਤਾਤਿ ਆਹ ‘‘ਜਿਣ੍ਣੋਤਿ ਪੋਰਾਣੋ’’ਤਿਆਦਿ, ਤੇਨ ਤਸ੍ਸ ਬ੍ਰਾਹ੍ਮਣਸ੍ਸ ਕੁਲਵਸੇਨ ਉਦਿਤੋਦਿਤਭਾਵਮਾਹ. ਜਾਤਿਵੁਦ੍ਧਿਯਾ ‘‘ਵਯੋਅਨੁਪ੍ਪਤ੍ਤੋ’’ਤਿ ਵਕ੍ਖਮਾਨਤ੍ਤਾ, ਗੁਣਵੁਦ੍ਧਿਯਾ ਤਤੋ ਸਾਤਿਸਯਤ੍ਤਾ ਚ ‘‘ਵੁਦ੍ਧੋਤਿ ਸੀਲਾਚਾਰਾਦਿਗੁਣਵੁਦ੍ਧਿਯਾ ਯੁਤ੍ਤੋ’’ਤਿ ਆਹ. ਤਥਾ ਜਾਤਿਮਹਲ੍ਲਕਤਾਯ ਵਕ੍ਖਮਾਨਤ੍ਤਾ ‘‘ਮਹਲ੍ਲਕੋ’’ਤਿ ਪਦੇਨ ਵਿਭਵਮਹਤ੍ਤਤਾ ਯੋਜਿਤਾ. ਮਗ੍ਗਪਟਿਪਨ੍ਨੋਤਿ ਬ੍ਰਾਹ੍ਮਣਾਨਂ ਪਟਿਪਤ੍ਤਿਵੀਥਿਂ ਉਪਗਤੋ ਤਂ ਅਵੋਕ੍ਕਮ੍ਮ ਚਰਣਤੋ. ਅਨ੍ਤਿਮਵਯਨ੍ਤਿ ਪਚ੍ਛਿਮਵਯਂ.

ਬੁਦ੍ਧਗੁਣਕਥਾਵਣ੍ਣਨਾ

੩੦੪. ਤਾਦਿਸੇਹਿ ਮਹਾਨੁਭਾਵੇਹਿ ਸਦ੍ਧਿਂ ਯੁਗਗ੍ਗਾਹਵਸੇਨਪਿ ਦਹਨਂ ਨ ਮਾਦਿਸਾਨਂ ਅਨੁਚ੍ਛਵਿਕਂ, ਕੁਤੋ ਪਨ ਉਕ੍ਕਂਸਨਨ੍ਤਿ ਇਦਂ ਬ੍ਰਾਹ੍ਮਣਸ੍ਸ ਨ ਯੁਤ੍ਤਰੂਪਨ੍ਤਿ ਦਸ੍ਸੇਨ੍ਤੋ ਆਹ ‘‘ਨ ਖੋ ਪਨ ਮੇਤਂ ਯੁਤ੍ਤ’’ਨ੍ਤਿਆਦਿ. ਸਦਿਸਾਤਿ ਏਕਦੇਸੇਨ ਸਦਿਸਾ. ਨ ਹਿ ਬੁਦ੍ਧਾਨਂ ਗੁਣੇਹਿ ਸਬ੍ਬਥਾ ਸਦਿਸਾ ਕੇਚਿਪਿ ਗੁਣਾ ਅਞ੍ਞੇਸੁ ਲਬ੍ਭਨ੍ਤਿ. ਇਤਰੇਤਿ ਅਤ੍ਤਨੋ ਗੁਣੇਹਿ ਅਸਦਿਸਗੁਣੇ. ਇਦਨ੍ਤਿ ਇਦਂ ਅਤ੍ਥਜਾਤਂ. ਗੋਪਦਕਨ੍ਤਿ ਗਾਵਿਯਾ ਪਦੇ ਠਿਤਉਦਕਂ.

ਸਟ੍ਠਿਕੁਲਸਤਸਹਸ੍ਸਨ੍ਤਿ ਸਟ੍ਠਿਸਹਸ੍ਸਾਧਿਕਂ ਕੁਲਸਤਸਹਸ੍ਸਂ ਕੁਲਪਰਿਯਾਯੇਨਾਤਿ ਸੁਦ੍ਧੋਦਨਮਹਾਰਾਜਸ੍ਸ ਕੁਲਾਨੁਕ੍ਕਮੇਨ ਆਗਤਂ. ਤੇਸੁਪੀਤਿ ਤੇਸੁਪਿ ਚਤੂਸੁ ਨਿਧੀਸੁ. ਗਹਿਤਗਹਿਤਨ੍ਤਿ ਗਹਿਤਂ ਗਹਿਤਂ ਠਾਨਂ ਪੂਰਤਿਯੇਵ ਧਨੇਨ ਪਟਿਪਾਕਤਿਕਮੇਵ ਹੋਤਿ. ਅਪਰਿਮਾਣੋਯੇਵਾਤਿ ‘‘ਏਤ੍ਤਕੋ ਏਸੋ’’ਤਿ ਕੇਨਚਿ ਪਰਿਚ੍ਛਿਨ੍ਦਿਤੁਂ ਅਸਕ੍ਕੁਣੇਯ੍ਯਤਾਯ ਅਪਰਿਚ੍ਛਿਨ੍ਨੋ ਏਵ.

ਤਤ੍ਥਾਤਿ ਮਞ੍ਚਕੇ. ਸੀਹਸੇਯ੍ਯਂ ਕਪ੍ਪੇਸੀਤਿ ਯਥਾ ਰਾਹੁ ਅਸੁਰਿਨ੍ਦੋ ਆਯਾਮਤੋ, ਵਿਤ੍ਥਾਰਤੋ ਉਬ੍ਬੇਧਤੋ ਚ ਭਗਵਤੋ ਰੂਪਕਾਯਸ੍ਸ ਪਰਿਚ੍ਛੇਦਂ ਗਹੇਤੁਂ ਨ ਸਕ੍ਕੋਤਿ, ਤਥਾ ਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰੋਨ੍ਤੋ ਸੀਹਸੇਯ੍ਯਂ ਕਪ੍ਪੇਸਿ.

ਕਿਲੇਸੇਹਿ ਆਰਕਤ੍ਤਾ ਪਰਿਸੁਦ੍ਧਟ੍ਠੇਨ ਅਰਿਯਨ੍ਤਿ ਆਹ ‘‘ਅਰਿਯਂ ਉਤ੍ਤਮਂ ਪਰਿਸੁਦ੍ਧ’’ਨ੍ਤਿ. ਅਨਵਜ੍ਜਟ੍ਠੇਨ ਕੁਸਲਂ, ਨ ਸੁਖਵਿਪਾਕਟ੍ਠੇਨ. ਕਤ੍ਥਚਿ ਚਤੁਰਾਸੀਤਿਪਾਣਸਹਸ੍ਸਾਨਿ, ਕਤ੍ਥਚਿ ਅਪਰਿਮਾਣਾਪਿ ਦੇਵਮਨੁਸ੍ਸਾ ਯਸ੍ਮਾ ਚਤੁਵੀਸਤਿਯਾ ਠਾਨੇਸੁ ਅਸਙ੍ਖ੍ਯੇਯ੍ਯਾ ਅਪਰਿਮੇਯ੍ਯਾ ਦੇਵਮਨੁਸ੍ਸਾ ਮਗ੍ਗਫਲਾਮਤਂ ਪਿਵਿਂਸੁ, ਕੋਟਿਸਤਸਹਸ੍ਸਾਦਿਪਰਿਮਾਣੇਨਪਿ ਬਹੂ ਏਵ, ਤਸ੍ਮਾ ਅਨੁਤ੍ਤਰਾਚਾਰਸਿਕ੍ਖਾਪਨਵਸੇਨ ਭਗਵਾ ਬਹੂਨਂ ਆਚਰਿਯੋ. ਤੇਤਿ ਕਾਮਰਾਗਤੋ ਅਞ੍ਞੇ ਭਗਵਤੋ ਪਹੀਨਕਿਲੇਸੇ. ਕੇਲ਼ਨਾਤਿ ਕੇਲ਼ਾਯਨਾ ਧਨਾਯਨਾ.

ਅਪਾਪਪੁਰੇਕ੍ਖਾਰੋਤਿ ਅਪਾਪੇ ਪੁਰੇ ਕਰੋਤਿ, ਨ ਵਾ ਪਾਪਂ ਪੁਰਤੋ ਕਰੋਤੀਤਿਪਿ ਅਪਾਪਪੁਰੇਕ੍ਖਾਰੋਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਅਪਾਪੇ ਨਵਲੋਕੁਤ੍ਤਰਧਮ੍ਮੇ’’ਤਿਆਦਿ ਵੁਤ੍ਤਂ. ਤਤ੍ਥ ਅਪਾਪੇਤਿ ਪਾਪਪਟਿਪਕ੍ਖੇ, ਪਾਪਰਹਿਤੇ ਚ. ਬ੍ਰਹ੍ਮਨਿ ਸੇਟ੍ਠੇ ਬੁਦ੍ਧੇ ਭਗਵਤਿ ਭਵਾ ਤਸ੍ਸ ਧਮ੍ਮਦੇਸਨਾਵਸੇਨ ਅਰਿਯਾਯ ਜਾਤਿਯਾ ਜਾਤਤ੍ਤਾ, ਬ੍ਰਹ੍ਮੁਨੋ ਵਾ ਭਗਵਤੋ ਹਿਤਾ ਗਰੁਕਰਣਾਦਿਨਾ, ਯਥਾਨੁਸਿਟ੍ਠਪਟਿਪਤ੍ਤਿਯਾ ਚ, ਬ੍ਰਹ੍ਮਂ ਵਾ ਸੇਟ੍ਠਂ ਅਰਿਯਮਗ੍ਗਂ ਜਾਨਾਤੀਤਿ ਬ੍ਰਹ੍ਮਞ੍ਞਾ, ਅਰਿਯਸਾਵਕਸਙ੍ਖਾਤਾ ਪਜਾ, ਤੇਨਾਹ ‘‘ਸਾਰਿਪੁਤ੍ਤਾ’’ਤਿਆਦਿ. ਪਕਤਿਬ੍ਰਾਹ੍ਮਣਜਾਤਿਵਸੇਨਾਪਿ ‘‘ਬ੍ਰਹ੍ਮਞ੍ਞਾਯ ਪਜਾਯਾ’’ਤਿ ਪਦਸ੍ਸ ਅਤ੍ਥੋ ਵੇਦਿਤਬ੍ਬੋਤਿ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ.

ਤਿਰੋਰਟ੍ਠਾ ਤਿਰੋਜਨਪਦਾਤਿ ਏਤ੍ਥ ਰਜ੍ਜਂ ਰਟ੍ਠਂ, ਰਾਜਨ੍ਤਿ ਰਾਜਾਨੋ ਏਤੇਨਾਤਿ, ਤਦੇਕਦੇਸਭੂਤਾ ਪਦੇਸਾ ਪਨ ਜਨਪਦੋ,ਜਨਾ ਪਜ੍ਜਨ੍ਤਿ ਏਤ੍ਥ ਸੁਖਜੀਵਿਕਂ ਪਾਪੁਣਨ੍ਤੀਤਿ. ਪੁਚ੍ਛਾਯ ਵਾ ਦੋਸਂ ਸਲ੍ਲਕ੍ਖੇਤ੍ਵਾਤਿ ਸਮ੍ਬਨ੍ਧੋ. ਅਸਮਤ੍ਥਤਨ੍ਤਿ ਅਤ੍ਤਨੋ ਅਸਮਤ੍ਥਤਂ. ਭਗਵਾ ਵਿਸ੍ਸਜ੍ਜੇਤਿ ਤੇਸਂ ਉਪਨਿਸ੍ਸਯਸਮ੍ਪਤ੍ਤਿਂ, ਞਾਣਪਰਿਪਾਕਂ, ਚਿਤ੍ਤਾਚਾਰਞ੍ਚ ਞਤ੍ਵਾਤਿ ਅਧਿਪ੍ਪਾਯੋ.

‘‘ਏਹਿ ਸ੍ਵਾਗਤਵਾਦੀ’’ਤਿ ਇਮਿਨਾ ਸੁਖਸਮ੍ਭਾਸਪੁਬ੍ਬਕਂ ਪਿਯਵਾਦਿਤਂ ਦਸ੍ਸੇਤਿ, ‘‘ਸਖਿਲੋ’’ਤਿ ਇਮਿਨਾ ਸਣ੍ਹਵਾਚਤਂ, ‘‘ਸਮ੍ਮੋਦਕੋ’’ਤਿ ਇਮਿਨਾ ਪਟਿਸਨ੍ਧਾਰਕੁਸਲਤਂ, ‘‘ਅਭਾਕੁਟਿਕੋ’’ਤਿ ਇਮਿਨਾ ਸਬ੍ਬਤ੍ਥੇਵ ਵਿਪ੍ਪਸਨ੍ਨਮੁਖਤਂ, ‘‘ਉਤ੍ਤਾਨਮੁਖੋ’’ਤਿ ਇਮਿਨਾ ਸੁਖਾਲਾਪਤਂ, ‘‘ਪੁਬ੍ਬਭਾਸੀ’’ਤਿ ਇਮਿਨਾ ਧਮ੍ਮਾਨੁਗ੍ਗਹਸ੍ਸ ਓਕਾਸਕਰਣਤੋ ਹਿਤਜ੍ਝਾਸਯਤਂ ਭਗਵਤੋ ਵਿਭਾਵੇਤਿ.

ਯਤ੍ਥ ਕਿਰਾਤਿ ਕਿਰ-ਸਦ੍ਦੋ ਅਰੁਚਿਸੂਚਨਤ੍ਥੋ, ਤੇਨ ਭਗਵਤਾ ਅਧਿਵੁਤ੍ਥਪਦੇਸੇ ਨ ਦੇਵਤਾਨੁਭਾਵੇਨ ਮਨੁਸ੍ਸਾਨਂ ਅਨੁਪਦ੍ਦਵਤਾ, ਅਥ ਖੋ ਬੁਦ੍ਧਾਨੁਭਾਵੇਨਾਤਿ ਦਸ੍ਸੇਤਿ. ਤੇਨਾਹ ‘‘ਅਪਿਚਾ’’ਤਿਆਦਿ.

ਅਨੁਸਾਸਿਤਬ੍ਬੋਤਿ ਵਿਨੇਯ੍ਯਜਨਸਮੂਹੋ ਗਯ੍ਹਤੀਤਿ ਨਿਬ੍ਬਤ੍ਤਿਤਂ ਅਰਿਯਸਙ੍ਘਮੇਵ ਦਸ੍ਸੇਤੁਂ ‘‘ਸਯਂ ਵਾ’’ਤਿਆਦਿ ਵੁਤ੍ਤਂ, ਅਨਨ੍ਤਰਸ੍ਸ ਵਿਧਿ ਪਟਿਸੇਧੋ ਵਾਤਿ ਕਤ੍ਵਾ. ‘‘ਤਾਦਿਸੋਵਾ’’ਤਿ ਇਮਿਨਾ ‘‘ਸਯਂ ਵਾ’’ਤਿਆਦਿਨਾ ਵੁਤ੍ਤਵਿਕਪ੍ਪੋ ਏਵ ਪਚ੍ਚਾਮਟ੍ਠੋਤਿ. ‘‘ਪੁਰਿਮਪਦਸ੍ਸੇਵ ਵਾ’’ਤਿ ਵਿਕਪ੍ਪਨ੍ਤਰਗ੍ਗਹਣਂ. ਬਹੂਨਂ ਤਿਤ੍ਥਕਰਾਨਨ੍ਤਿ ਪੂਰਣਾਦੀਨਂ ਅਨੇਕੇਸਂ ਤਿਤ੍ਥਕਰਾਨਂ, ਨਿਦ੍ਧਾਰਣੇ ਚੇਤਂ ਸਾਮਿਵਚਨਂ. ਕਾਰਣੇਨਾਤਿ ਅਪ੍ਪਿਚ੍ਛਸਨ੍ਤੁਟ੍ਠਤਾਦਿਸਮਾਰੋਪਨਲਕ੍ਖਣੇਨ ਕਾਰਣੇਨ. ਆਗਨ੍ਤੁਕਾ ਨਵਕਾਤਿ ਅਭਿਨਵਾ ਆਗਨ੍ਤੁਕਾ ਅਬ੍ਭਾਗਤਾ. ਪਰਿਯਾਪੁਣਾਮੀਤਿ ਪਰਿਚ੍ਛਿਨ੍ਦਿਤੁਂ ਜਾਨਾਮਿ ਸਕ੍ਕੋਮਿ, ਤੇਨਾਹ ‘‘ਜਾਨਾਮੀ’’ਤਿ. ‘‘ਕਪ੍ਪਮ੍ਪਿ ਚੇ ਅਞ੍ਞਮਭਾਸਮਾਨੋ’’ਤਿ ਅਭੂਤਪਰਿਕਪ੍ਪਨਵਚਨਮੇਤਂ ਤਥਾ ਭਾਸਮਾਨਸ੍ਸ ਅਭਾਵਤੋ.

੩੦੫. ਅਲਂ-ਸਦ੍ਦੋ ਅਰਹਤ੍ਤੋਪਿ ਹੋਤਿ ‘‘ਅਲਮੇਵ ਨਿਬ੍ਬਿਨ੍ਦਿਤੁ’’ਨ੍ਤਿਆਦੀਸੁ (ਸਂ. ਨਿ. ੧.੧੨੪) ਵਿਯਾਤਿ ਆਹ ‘‘ਅਲਮੇਵਾਤਿ ਯੁਤ੍ਤਮੇਵਾ’’ਤਿ. ਪੁਟੇਨ ਨੇਤ੍ਵਾ ਅਸਿਤਬ੍ਬਤੋ ਪਰਿਭੁਞ੍ਜਿਤਬ੍ਬਤੋ ਪੁਟੋਸਂ ਵੁਚ੍ਚਤਿ ਪਾਥੇਯ੍ਯਂ. ਪੁਟਂਸੇਨ ਪੁਰਿਸੇਨ.

ਸੋਣਦਣ੍ਡਪਰਿਵਿਤਕ੍ਕਵਣ੍ਣਨਾ

੩੦੭. ਉਭਤੋਪਕ੍ਖਿਕਾਤਿ ਮਿਚ੍ਛਾਦਿਟ੍ਠਿਸਮ੍ਮਾਦਿਟ੍ਠੀਨਂ ਵਸੇਨ ਉਭਯਪਕ੍ਖਿਕਾ. ਕੇਰਾਟਿਕਾਤਿ ਸਠਾ.

ਬ੍ਰਾਹ੍ਮਣਪਞ੍ਞਤ੍ਤਿਵਣ੍ਣਨਾ

੩੦੯. ਵਿਘਾਤਨ੍ਤਿ ਚਿਤ੍ਤਦੁਕ੍ਖਂ.

੩੧੧-੩. ਸੁਜਨ੍ਤਿ ਹੋਮਦਬ੍ਬਿਂ ਪਗ੍ਗਣ੍ਹਨ੍ਤੇਸੂਤਿ ਜੁਹਨਤ੍ਥਂ ਗਣ੍ਹਨਕੇਸੁ, ਇਰੁਬ੍ਬਿਜ੍ਜੇਸੂਤਿ ਅਤ੍ਥੋ. ਪਠਮੋ ਵਾਤਿ ਤਤ੍ਥ ਸਨ੍ਨਿਪਤਿਤੇਸੁ ਯਜਨਕਿਰਿਯਾਯਂ ਸਬ੍ਬਪਧਾਨੋ ਵਾ. ਦੁਤਿਯੋ ਵਾਤਿ ਤਦਨਨ੍ਤਰੋ ਵਾ. ‘‘ਸੁਜ’’ਨ੍ਤਿ ਕਰਣੇ ਏਤਂ ਉਪਯੋਗਵਚਨਨ੍ਤਿ ਆਹ ‘‘ਸੁਜਾਯਾ’’ਤਿ. ਅਗ੍ਗਿਹੁਤ੍ਤਪਮੁਖਤਾਯ ਯਞ੍ਞਸ੍ਸ ਯਞ੍ਞੇ ਦਿਯ੍ਯਮਾਨਂ ਸੁਜਾਮੁਖੇਨ ਦੀਯਤੀਤਿ ਆਹ ‘‘ਸੁਜਾਯ ਦਿਯ੍ਯਮਾਨ’’ਨ੍ਤਿ. ਪੋਰਾਣਾਤਿ ਅਟ੍ਠਕਥਾਚਰਿਯਾ. ਵਿਸੇਸਤੋਤਿ ਵਿਜ੍ਜਾਚਰਣਵਿਸੇਸਤੋ, ਨ ਬ੍ਰਾਹ੍ਮਣੇਹਿ ਇਚ੍ਛਿਤਵਿਜ੍ਜਾਚਰਣਮਤ੍ਤਤੋ. ਉਤ੍ਤਮਬ੍ਰਾਹ੍ਮਣਸ੍ਸਾਤਿ ਅਨੁਤ੍ਤਰਦਕ੍ਖਿਣੇਯ੍ਯਤਾਯ ਉਕ੍ਕਟ੍ਠਬ੍ਰਾਹ੍ਮਣਸ੍ਸ. ਬ੍ਰਾਹ੍ਮਣਸਮਯਨ੍ਤਿ ਬ੍ਰਾਹ੍ਮਣਸਿਦ੍ਧਨ੍ਤਂ. ਮਾ ਭਿਨ੍ਦਿ ਮਾ ਵਿਨਾਸੇਸਿ.

੩੧੬. ਸਮਸਮੋਤਿ ਸਮੋਯੇਵ ਹੁਤ੍ਵਾ ਸਮੋ. ਹੀਨੋਪਮਵਸੇਨਪਿ ਸਮਤਾ ਵੁਚ੍ਚਤੀਤਿ ਤਂ ਨਿਵਤ੍ਤੇਨ੍ਤੋ ‘‘ਠਪੇਤ੍ਵਾ ਏਕਦੇਸਸਮਤ੍ਤ’’ਨ੍ਤਿਆਦਿਮਾਹ. ਕੁਲਕੋਟਿਪਰਿਦੀਪਨਨ੍ਤਿ ਕੁਲਆਦਿਪਰਿਦੀਪਨਂ ਅਥਾਪਿ ਸਿਯਾਤਿ ਅਥਾਪਿ ਤੁਮ੍ਹਾਕਂ ਏਵਂ ਪਰਿਵਿਤਕ੍ਕੋ ਸਿਯਾ. ਬ੍ਰਾਹ੍ਮਣਭਾਵਂ ਸਾਧੇਤਿ ਵਣ੍ਣੋ. ਮਨ੍ਤਜਾਤੀਸੁਪਿ ਏਸੇਵ ਨਯੋ. ਸੀਲਮੇਵ ਸਾਧੇਸ੍ਸਤਿ ਬ੍ਰਾਹ੍ਮਣਭਾਵਂ. ਕਸ੍ਮਾਤਿ ਚੇ? ਆਹ ‘‘ਤਸ੍ਮਿਞ੍ਹਿਸ੍ਸਾ’’ਤਿਆਦਿ. ਸਮ੍ਮੋਹਮਤ੍ਤਂ ਵਣ੍ਣਾਦਯੋਤਿ ਵਣ੍ਣਮਨ੍ਤਜਾਤਿਯੋ ਹਿ ਬ੍ਰਾਹ੍ਮਣਭਾਵਸ੍ਸ ਅਙ੍ਗਨ੍ਤਿ ਸਮ੍ਮੋਹਮਤ੍ਤਮੇਤਂ ਅਸਮਵੇਕ੍ਖਿਤਾਭਿਮਾਨਭਾਵਤੋ.

ਸੀਲਪਞ੍ਞਾਕਥਾਵਣ੍ਣਨਾ

੩੧੭. ਕਥਿਤੋ ਬ੍ਰਾਹ੍ਮਣੇਨ ਪਞ੍ਹੋਤਿ ‘‘ਸੀਲਵਾ ਚ ਹੋਤੀ’’ਤਿਆਦਿਨਾ ਦ੍ਵਿਨ੍ਨਮੇਵ ਅਙ੍ਗਾਨਂ ਵਸੇਨ ਯਥਾਪੁਚ੍ਛਿਤੋ ਪਞ੍ਹੋ ਯਾਥਾਵਤੋ ਵਿਸ੍ਸਜ੍ਜਿਤੋ ਏਤ੍ਥਾਤਿ ਏਤਸ੍ਮਿਂ ਯਥਾਵਿਸ੍ਸਜ੍ਜਿਤੇ ਅਤ੍ਥੇ. ਤਸ੍ਸਾਤਿ ਸੋਣਦਣ੍ਡਸ੍ਸ. ਸੀਲਪਰਿਸੁਦ੍ਧਾਤਿ ਸੀਲਸਮ੍ਪਤ੍ਤਿਯਾ ਸਬ੍ਬਸੋ ਸੁਦ੍ਧਾ ਅਨੁਪਕ੍ਕਿਲਿਟ੍ਠਾ. ਕੁਤੋ ਦੁਸ੍ਸੀਲੇ ਪਞ੍ਞਾ ਅਸਮਾਹਿਤਤ੍ਤਾ ਤਸ੍ਸ. ਜਲ਼ੇ ਏਲ਼ਮੂਗੇ ਕੁਤੋ ਸੀਲਨ੍ਤਿ ਜਲ਼ੇ ਏਲ਼ਮੂਗੇ ਦੁਪ੍ਪਞ੍ਞੇ ਕੁਤੋ ਸੀਲਂ ਸੀਲਵਿਭਾਗਸ੍ਸ, ਸੀਲਪਰਿਸੋਧਨੂਪਾਯਸ੍ਸ ਚ ਅਜਾਨਨਤੋ. ਪਕਟ੍ਠਂ ਉਕ੍ਕਟ੍ਠਂ ਞਾਣਂ ਪਞ੍ਞਾਣਨ੍ਤਿ, ਪਾਕਤਿਕਂ ਞਾਣਂ ਨਿਵਤ੍ਤੇਤੁਂ ‘‘ਪਞ੍ਞਾਣ’’ਨ੍ਤਿ ਵੁਤ੍ਤਨ੍ਤਿ ਤਯਿਦਂ ਪਕਾਰੇਹਿ ਜਾਨਨਤੋ ਪਞ੍ਞਾਵਾਤਿ ਆਹ ‘‘ਪਞ੍ਞਾਣਨ੍ਤਿ ਪਞ੍ਞਾ ਯੇਵਾ’’ਤਿ.

ਸੀਲੇਨਧੋਤਾਤਿ ਸਮਾਧਿਪਦਟ੍ਠਾਨੇਨ ਸੀਲੇਨ ਸਕਲਸਂਕਿਲੇਸਮਲਵਿਸੁਦ੍ਧਿਯਾ ਧੋਤਾ ਵਿਸੁਦ੍ਧਾ, ਤੇਨਾਹ ‘‘ਕਥਂ ਪਨਾ’’ਤਿਆਦਿ. ਤਤ੍ਥ ਧੋਵਤੀਤਿ ਸੁਜ੍ਝਤਿ. ਮਹਾਸਟ੍ਠਿਵਸ੍ਸਤ੍ਥੇਰੋ ਵਿਯਾਤਿ ਸਟ੍ਠਿਵਸ੍ਸਮਹਾਥੇਰੋ ਵਿਯ. ਵੇਦਨਾਪਰਿਗ੍ਗਹਮਤ੍ਤਮ੍ਪੀਤਿ ਏਤ੍ਥ ਵੇਦਨਾਪਰਿਗ੍ਗਹੋ ਨਾਮ ਯਥਾਉਪ੍ਪਨ੍ਨਂ ਵੇਦਨਂ ਸਭਾਵਰਸਤੋ ਉਪਧਾਰੇਤ੍ਵਾ ‘‘ਅਯਂ ਵੇਦਨਾ ਫਸ੍ਸਂ ਪਟਿਚ੍ਚ, ਸੋ ਫਸ੍ਸੋ ਅਨਿਚ੍ਚੋ ਦੁਕ੍ਖੋ ਵਿਪਰਿਣਾਮਧਮ੍ਮੋ’’ਤਿ ਲਕ੍ਖਣਤ੍ਤਯਂ ਆਰੋਪੇਤ੍ਵਾ ਪਵਤ੍ਤਿਤਵਿਪਸ੍ਸਨਾ. ਏਵਂ ਵਿਪਸ੍ਸਨ੍ਤੇਨ ‘‘ਸੁਖੇਨ ਸਕ੍ਕਾ ਸਾ ਵੇਦਨਾ ਅਧਿਵਾਸੇਤੁਂ ‘‘ਵੇਦਨਾ ਏਵ ਵੇਦਿਯਤੀ’’ਤਿ. ਵੇਦਨਂ ਵਿਕ੍ਖਮ੍ਭੇਤ੍ਵਾਤਿ ਯਥਾਉਪ੍ਪਨ੍ਨਂ ਦੁਕ੍ਖਂ ਵੇਦਨਂ ਅਨਨੁਵਤ੍ਤਿਤ੍ਵਾ ਵਿਪਸ੍ਸਨਂ ਆਰਭਿਤ੍ਵਾ ਵੀਥਿਂ ਪਟਿਪਨ੍ਨਾਯ ਵਿਪਸ੍ਸਨਾਯ ਤਂ ਵਿਨੋਦੇਤ੍ਵਾ. ਸਂਸੁਮਾਰਪਤਿਤੇਨਾਤਿ ਕੁਮ੍ਭੀਲੇਨ ਵਿਯ ਭੂਮਿਯਂ ਉਰੇਨ ਨਿਪਜ੍ਜਨੇਨ. ਪਞ੍ਞਾਯ ਸੀਲਂ ਧੋਵਿਤ੍ਵਾਤਿ ਅਖਣ੍ਡਾਦਿਭਾਵਾਪਾਦਨੇਨ ਸੀਲਂ ਆਦਿਮਜ੍ਝਪਰਿਯੋਸਾਨੇਸੁ ਪਞ੍ਞਾਯ ਸੁਵਿਸੋਧਿਤਂ ਕਤ੍ਵਾ.

੩੧੮. ‘‘ਕਸ੍ਮਾ ਆਹਾ’’ਤਿ ਉਪਰਿਦੇਸਨਾਯ ਕਾਰਣਂ ਪੁਚ੍ਛਤਿ. ਲਜ੍ਜਾ ਨਾਮ ‘‘ਸੀਲਸ੍ਸ ਜਾਤਿਯਾ ਚ ਗੁਣਦੋਸਪਕਾਸਨੇਨ ਸਮਣੇਨ ਗੋਤਮੇਨ ਪੁਚ੍ਛਿਤਪਞ੍ਹਂ ਵਿਸ੍ਸਜ੍ਜੇਸੀ’’ਤਿ ਪਰਿਸਾਯ ਪਞ੍ਞਾਤਤਾ. ਏਤ੍ਤਕਪਰਮਾਤਿ ਏਤ੍ਤਕਉਕ੍ਕਂਸਕੋਟਿਕਾ ਪਞ੍ਚ ਸੀਲਾਨਿ, ਵੇਦਤ੍ਤਯਵਿਭਾਵਨਂ ਪਞ੍ਞਞ੍ਚ ਲਕ੍ਖਣਾਦਿਤੋ ਨਿਦ੍ਧਾਰੇਤ੍ਵਾ ਜਾਨਨਂ ਨਤ੍ਥਿ, ਕੇਵਲਂ ਤਤ੍ਥ ਵਚੀਪਰਮਾ ਮਯਨ੍ਤਿ ਦਸ੍ਸੇਤੀਤਿ ਆਹ ‘‘ਸੀਲਪਞ੍ਞਾਣਨ੍ਤਿ ਵਚਨਮੇਵ ਪਰਮਂ ਅਮ੍ਹਾਕ’’ਨ੍ਤਿ. ‘‘ਅਯਂ ਪਨ ਵਿਸੇਸੋ’’ਤਿ ਇਦਂ ਨਿਯ੍ਯਾਤਨਾਪੇਕ੍ਖਂ ਸੀਲਨਿਦ੍ਦੇਸੇ, ਤੇਨਾਹ ‘‘ਸੀਲਮਿਚ੍ਚੇਵ ਨਿਯ੍ਯਾਤਿਤ’’ਨ੍ਤਿ. ਸਾਮਞ੍ਞਫਲੇ ਪਨ ‘‘ਸਾਮਞ੍ਞਫਲ’’ ਮਿਚ੍ਚੇਵ ਨਿਯ੍ਯਾਤਿਤਂ, ਪਞ੍ਞਾਨਿਦ੍ਦੇਸੇ ਪਨ ਝਾਨਪਞ੍ਞਂ ਅਧਿਟ੍ਠਾਨਂ ਕਤ੍ਵਾ ਵਿਪਸ੍ਸਨਾਪਞ੍ਞਾਵਸੇਨੇਵ ਪਞ੍ਞਾਨਿਯ੍ਯਾਤਨਂ ਕਤਂ, ਤੇਨਾਹ ‘‘ਪਠਮਜ੍ਝਾਨਾਦੀਨੀ’’ਤਿ.

ਸੋਣਦਣ੍ਡਉਪਾਸਕਤ੍ਤਪਟਿਵੇਦਨਾਕਥਾਵਣ੍ਣਨਾ

੩੨੧-੨. ਨਤ੍ਤਾਤਿ ਪੁਤ੍ਤਪੁਤ੍ਤੋ. ਅਗਾਰਵਂ ਨਾਮ ਨਤ੍ਥਿ, ਨ ਚਾਯਂ ਭਗਵਤਿ ਅਗਾਰਵੇਨ ‘‘ਅਹਞ੍ਚੇਵ ਖੋ ਪਨਾ’’ਤਿਆਦਿਮਾਹ, ਅਥ ਖੋ ਅਤ੍ਤਲਾਭਪਰਿਹਾਨਿਭਯੇਨ. ਅਯਞ੍ਹਿ ਯਥਾ ਤਥਾ ਅਤ੍ਤਨੋ ਮਹਾਜਨਸ੍ਸ ਸਮ੍ਭਾਵਨਂ ਉਪ੍ਪਾਦੇਤ੍ਵਾ ਕੋਹਞ੍ਞੇਨ ਪਰੇ ਵਿਮ੍ਹਾਪੇਤ੍ਵਾ ਲਾਭੁਪ੍ਪਾਦਂ ਨਿਜਿਗਿਸਨ੍ਤੋ ਵਿਚਰਤਿ, ਤਸ੍ਮਾ ਤਥਾ ਅਵੋਚ, ਤੇਨਾਹ ‘‘ਇਮਿਨਾ ਕਿਰਾ’’ਤਿਆਦਿ.

ਤਙ੍ਖਣਾਨੁਰੂਪਾਯਾਤਿ ਯਾਦਿਸੀ ਤਦਾ ਤਸ੍ਸ ਅਜ੍ਝਾਸਯਪ੍ਪਵਤ੍ਤਿ, ਤਦਨੁਰੂਪਾਯਾਤਿ ਅਤ੍ਥੋ. ਤਸ੍ਸ ਤਦਾ ਤਾਦਿਸਸ੍ਸ ਵਿਵਟ੍ਟਸਨ੍ਨਿਸ੍ਸਿਤਸ੍ਸ ਞਾਣਸ੍ਸ ਪਰਿਪਾਕਸ੍ਸ ਅਭਾਵਤੋ ਕੇਵਲਂ ਅਬ੍ਭੁਦਯਨਿਸ੍ਸਿਤੋ ਏਵ ਅਤ੍ਥੋ ਦਸ੍ਸਿਤੋਤਿ ਆਹ ‘‘ਦਿਟ੍ਠਧਮ੍ਮਿਕਸਮ੍ਪਰਾਯਿਕਮਤ੍ਥਂ ਸਨ੍ਦਸ੍ਸੇਤ੍ਵਾ’’ਤਿ, ਪਚ੍ਚਕ੍ਖਤੋ ਵਿਭਾਵੇਤ੍ਵਾਤਿ ਅਤ੍ਥੋ. ਕੁਸਲੇ ਧਮ੍ਮੇਤਿ ਤੇਭੂਮਕੇ ਕੁਸਲੇ ਧਮ੍ਮੇ, ‘‘ਚਤੁਭੂਮਕੇ’’ਤਿਪਿ ਵਤ੍ਤੁਂ ਵਟ੍ਟਤਿਯੇਵ, ਤੇਨੇਵਾਹ ‘‘ਆਯਤਿਂ ਨਿਬ੍ਬਾਨਤ੍ਥਾਯ ਵਾਸਨਾਭਾਗਿਯਾ ਵਾ’’ਤਿ. ਤਤ੍ਥਾਤਿ ਕੁਸਲਧਮ੍ਮੇ ਯਥਾ ਸਮਾਦਪਿਤੇ. ਨਨ੍ਤਿ ਬ੍ਰਾਹ੍ਮਣਂ ਸਮੁਤ੍ਤੇਜੇਤ੍ਵਾਤਿ ਸਮ੍ਮਦੇਵ ਉਪਰੂਪਰਿ ਨਿਸਾਨੇਤ੍ਵਾ ਪੁਞ੍ਞਕਿਰਿਯਾਯ ਤਿਕ੍ਖਵਿਸਦਭਾਵਂ ਆਪਾਦੇਤ੍ਵਾ. ਤਂ ਪਨ ਅਤ੍ਥਤੋ ਤਤ੍ਥ ਉਸ੍ਸਾਹਜਨਨਂ ਹੋਤੀਤਿ ਆਹ ‘‘ਸਉਸ੍ਸਾਹਂ ਕਤ੍ਵਾ’’ਤਿ. ਏਵਂ ਪੁਞ੍ਞਕਿਰਿਯਾਯ ਸਉਸ੍ਸਾਹਤਾ, ਏਵਰੂਪਂ ਗੁਣਸਮਙ੍ਗਿਤਾ ਚ ਨਿਯਮਤੋ ਦਿਟ੍ਠਧਮ੍ਮਿਕਾ ਅਤ੍ਥਸਮ੍ਪਾਦਨੀਤਿ ਏਵਂ ਸਉਸ੍ਸਾਹਤਾਯ, ਅਞ੍ਞੇਹਿ ਚ ਤਸ੍ਮਿਂ ਵਿਜ੍ਜਮਾਨਗੁਣੇਹਿ ਸਮ੍ਪਹਂਸੇਤ੍ਵਾ ਸਮ੍ਮਦੇਵ ਹਟ੍ਠਤੁਟ੍ਠਭਾਵਂ ਆਪਾਦੇਤ੍ਵਾ.

ਯਦਿ ਭਗਵਾ ਧਮ੍ਮਰਤਨਵਸ੍ਸਂ ਵਸ੍ਸਿ, ਅਥ ਕਸ੍ਮਾ ਸੋ ਵਿਸੇਸਂ ਨਾਧਿਗਚ੍ਛਤੀਤਿ ਆਹ ‘‘ਬ੍ਰਾਹ੍ਮਣੋ ਪਨਾ’’ਤਿਆਦਿ. ਯਦਿ ਏਵਂ ਕਸ੍ਮਾ ਭਗਵਾ ਤਸ੍ਸ ਤਥਾ ਧਮ੍ਮਰਤਨਵਸ੍ਸਂ ਵਸ੍ਸੀਤਿ ਆਹ ‘‘ਕੇਵਲਮਸ੍ਸਾ’’ਤਿਆਦਿ. ਨ ਹਿ ਭਗਵਤੋ ਨਿਰਤ੍ਥਕਾ ਦੇਸਨਾ ਹੋਤੀਤਿ.

ਸੋਣਦਣ੍ਡਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.