੧੩. ਤੇਵਿਜ੍ਜਸੁਤ੍ਤਵਣ੍ਣਨਾ

੫੧੮. ਉਤ੍ਤਰੇਨਾਤਿ ਏਤ੍ਥ ਏਨ-ਸਦ੍ਦੋ ਦਿਸਾਵਾਚੀਸਦ੍ਦਤੋ ਪਞ੍ਚਮੀਅਨ੍ਤਤੋ ਅਦੂਰਤ੍ਥੋ ਇਚ੍ਛਿਤੋ, ਤਸ੍ਮਾ ਉਤ੍ਤਰੇਨ-ਸਦ੍ਦੇਨ ਅਦੂਰਤ੍ਥਜੋਤਨਂ ਦਸ੍ਸੇਨ੍ਤੋ ‘‘ਅਦੂਰੇ ਉਤ੍ਤਰਪਸ੍ਸੇ’’ਤਿ ਆਹ. ਅਕ੍ਖਰਚਿਨ੍ਤਕਾ ਪਨ ਏਨ-ਸਦ੍ਦਯੋਗੇ ਅਵਧਿਵਾਚਿਨਿ ਪਦੇ ਉਪਯੋਗਵਚਨਂ ਇਚ੍ਛਨ੍ਤਿ. ਅਤ੍ਥੋ ਪਨ ਸਾਮਿਵਸੇਨੇਵ ਇਚ੍ਛਿਤੋਤਿ ਇਧ ਸਾਮਿਵਚਨਵਸੇਨੇਵ ਵੁਤ੍ਤਂ.

੫੧੯. ਕੁਲਚਾਰਿਤ੍ਤਾਦੀਤਿ ਆਦਿ-ਸਦ੍ਦੇਨ ਮਨ੍ਤਜ੍ਝੇਨਾਭਿਰੂਪਤਾਦਿਸਮ੍ਪਤ੍ਤਿਂ ਸਙ੍ਗਣ੍ਹਾਤਿ. ਮਨ੍ਤਸਜ੍ਝਾਯਕਰਣਤ੍ਥਨ੍ਤਿ ਆਥਬ੍ਬਣਮਨ੍ਤਾਨਂ ਸਜ੍ਝਾਯਕਰਣਤ੍ਥਂ, ਤੇਨਾਹ ‘‘ਅਞ੍ਞੇਸਂ ਬਹੂਨਂ ਪਵੇਸਨਂ ਨਿਵਾਰੇਤ੍ਵਾ’’ਤਿ.

ਮਗ੍ਗਾਮਗ੍ਗਕਥਾਵਣ੍ਣਨਾ

੫੨੦. ‘‘ਜਙ੍ਘਚਾਰ’’ਨ੍ਤਿ ਚਙ੍ਕਮਤੋ ਇਤੋ ਚਿਤੋ ਚ ਚਰਣਮਾਹ. ਸੋ ਹਿ ਜਙ੍ਘਾਸੁ ਕਿਲਮਥਵਿਨੋਦਨਤ੍ਥੋ ਚਾਰੋਤਿ ਤਥਾ ਵੁਤ੍ਤੋ. ਤੇਨਾਹ ‘‘ਅਨੁਚਙ੍ਕਮਨ੍ਤਾਨਂ ਅਨੁਵਿਚਰਨ੍ਤਾਨ’’ਨ੍ਤਿ. ਤੇਨਾਤਿ ਉਭੋਸੁਪਿ ਅਨੁਚਙ੍ਕਮਨਾਨੁਵਿਚਾਰਣਾਨਂ ਲਬ੍ਭਨਤੋ. ਸਹਾਯਾ ਹਿ ਤੇ ਅਞ੍ਞਮਞ੍ਞ ਸਭਾਗਵੁਤ੍ਤਿਕਾ. ‘‘ਮਗ੍ਗੋ’’ਤਿ ਇਚ੍ਛਿਤਟ੍ਠਾਨਂ ਉਜੁਕਂ ਮਗ੍ਗਤਿ ਉਪਗਚ੍ਛਤਿ ਏਤੇਨਾਤਿ ਮਗ੍ਗੋ, ਉਜੁਮਗ੍ਗੋ. ਤਦਞ੍ਞੋ ਅਮਗ੍ਗੋ, ਤਸ੍ਮਿਂ ਮਗ੍ਗੇ ਚ ਅਮਗ੍ਗੇ ਚ. ਪਟਿਪਦਨ੍ਤਿ ਬ੍ਰਹ੍ਮਲੋਕਗਾਮਿਮਗ੍ਗਸ੍ਸ ਪੁਬ੍ਬਭਾਗਪਟਿਪਦਂ.

ਨਿਯ੍ਯਾਤੀਤਿ ਨਿਯ੍ਯਾਨੀਯੋ, ਸੋ ਏਵ ‘‘ਨਿਯ੍ਯਾਨਿਕੋ’’ਤਿ ਵੁਤ੍ਤੋਤਿ ਆਹ ‘‘ਨਿਯ੍ਯਾਯਨ੍ਤੋ’’ਤਿ. ਯਸ੍ਮਾ ਨਿਯ੍ਯਾਤਪੁਗ੍ਗਲਵਸੇਨਸ੍ਸ ਨਿਯ੍ਯਾਨਿਕਭਾਵੋ, ਤਸ੍ਮਾ ‘‘ਨਿਯ੍ਯਾਯਨ੍ਤੋ’’ਤਿ ਪੁਗ੍ਗਲਸ੍ਸ ਯੋਨਿਸੋ ਪਟਿਪਜ੍ਜਨਵਸੇਨ ਨਿਯ੍ਯਾਯਨ੍ਤੋ ਮਗ੍ਗੋ ‘‘ਨਿਯ੍ਯਾਤੀ’’ਤਿ ਵੁਤ੍ਤੋ. ਕਰੋਤੀਤਿ ਅਤ੍ਤਨੋ ਸਨ੍ਤਾਨੇ ਉਪ੍ਪਾਦੇਤਿ. ਉਪ੍ਪਾਦੇਨ੍ਤੋਯੇਵ ਹਿ ਤਤ੍ਥ ਪਟਿਪਜ੍ਜਤਿ ਨਾਮ. ਸਹ ਬ੍ਯੇਤਿ ਵਤ੍ਤਤੀਤਿ ਸਹਬ੍ਯੋ, ਸਹਵਤ੍ਤਨਕੋ. ਤਸ੍ਸ ਭਾਵੋ ਸਹਬ੍ਯਤਾਤਿ ਆਹ ‘‘ਸਹਭਾਵਾਯਾ’’ਤਿਆਦਿ. ਸਹਭਾਵੋਤਿ ਚ ਸਲੋਕਤਾ, ਸਮੀਪਤਾ ਵਾ ਵੇਦਿਤਬ੍ਬਾ, ਤੇਨਾਹ ‘‘ਏਕਟ੍ਠਾਨੇ ਪਾਤੁਭਾਵਾਯਾ’’ਤਿ. ਸਕਮੇਵ ਆਚਰਿਯਵਾਦਨ੍ਤਿ ਅਤ੍ਤਨੋ ਆਚਰਿਯੇਨ ਪੋਕ੍ਖਰਸਾਤਿਨਾ ਕਥਿਤਮੇਵ ਆਚਰਿਯਵਾਦਂ. ਥੋਮੇਤ੍ਵਾ ਪਗ੍ਗਣ੍ਹਿਤ੍ਵਾ ‘‘ਅਯਮੇਵ ਉਜੁਮਗ੍ਗੋ ਅਯਮਞ੍ਜਸਾਯਨੋ’’ਤਿ ਪਸਂਸਿਤ੍ਵਾ ਉਕ੍ਕਂਸਿਤ੍ਵਾ. ਭਾਰਦ੍ਵਾਜੋਪਿ ਸਕਮੇਵਾਤਿ ਭਾਰਦ੍ਵਾਜੋਪਿ ਮਾਣਵੋ ਅਤ੍ਤਨੋ ਆਚਰਿਯੇਨ ਤਾਰੁਕ੍ਖੇਨ ਕਥਿਤਮੇਵ ਆਚਰਿਯਵਾਦਂ ਥੋਮੇਤ੍ਵਾ ਪਗ੍ਗਣ੍ਹਿਤ੍ਵਾ ਵਿਚਰਤੀਤਿ ਯੋਜਨਾ. ਤੇਨ ਵੁਤ੍ਤਨ੍ਤਿ ਤੇਨ ਯਥਾ ਤਥਾ ਵਾ ਅਭਿਨਿਵਿਟ੍ਠਭਾਵੇਨ ਵੁਤ੍ਤਂ ਪਾਲ਼ਿਯਂ.

੫੨੧-੨. ਅਨਿਯ੍ਯਾਨਿਕਾ ਵਾਤਿ ਅਪ੍ਪਾਟਿਹਾਰਿਯਾਵ ਅਞ੍ਞਮਞ੍ਞਸ੍ਸ ਵਾਦੇ ਦੋਸਂ ਦਸ੍ਸੇਤ੍ਵਾ ਅਵਿਪਰੀਤਤ੍ਥਦਸ੍ਸਨਤ੍ਥਂ ਉਤ੍ਤਰਰਹਿਤਾ ਏਵ. ਅਞ੍ਞਮਞ੍ਞਸ੍ਸ ਵਾਦਸ੍ਸ ਆਦਿਤੋ ਵਿਰੁਦ੍ਧਗ੍ਗਹਣਂ ਵਿਗ੍ਗਹੋ, ਸ੍ਵੇਵ ਵਿਵਦਨਵਸੇਨ ਅਪਰਾਪਰਂ ਉਪ੍ਪਨ੍ਨੋ ਵਿਵਾਦੋਤਿ ਆਹ ‘‘ਪੁਬ੍ਬੁਪ੍ਪਤ੍ਤਿਕੋ ਵਿਗ੍ਗਹੋ ਅਪਰਭਾਗੇ ਵਿਵਾਦੋ’’ਤਿ. ਦੁਵਿਧੋਪਿ ਏਸੋ ਵਿਗ੍ਗਹੋ, ਵਿਵਾਦੋਤਿ ਦ੍ਵਿਧਾ ਵੁਤ੍ਤੋਪਿ ਵਿਰੋਧੋ. ਨਾਨਾਆਚਰਿਯਾਨਂ ਵਾਦਤੋਤਿ ਨਾਨਾਰੁਚਿਕਾਨਂ ਆਚਰਿਯਾਨਂ ਵਾਦਭਾਵਤੋ. ਨਾਨਾਵਾਦੋ ਨਾਨਾਵਿਧੋ ਵਾਦੋਤਿ ਕਤ੍ਵਾ.

੫੨੩. ਏਕਸ੍ਸਾਪੀਤਿ ਤੁਮ੍ਹੇਸੁ ਦ੍ਵੀਸੁ ਏਕਸ੍ਸਾਪਿ. ਏਕਸ੍ਮਿਨ੍ਤਿ ਸਕਵਾਦਪਰਵਾਦੇਸੁ ਏਕਸ੍ਮਿਮ੍ਪਿ. ਸਂਸਯੋ ਨਤ੍ਥੀਤਿ ‘‘ਮਗ੍ਗੋ ਨੁ ਖੋ, ਨ ਮਗ੍ਗੋ ਨੁ ਖੋ’’ਤਿ ਸਂਸਯੋ ਵਿਚਿਕਿਚ੍ਛਾ ਨਤ੍ਥਿ. ਅਞ੍ਜਸਾਯਨਭਾਵੇ ਪਨ ਸਂਸਯੋ. ਤੇਨਾਹ ‘‘ਏਸ ਕਿਰਾ’’ਤਿਆਦਿ. ਭਗਵਾ ਪਨ ਯਦਿ ਸਬ੍ਬਤ੍ਥ ਮਗ੍ਗਸਞ੍ਞਿਨੋ, ਏਵਂ ਸਤਿ ‘‘ਕਿਸ੍ਮਿਂ ਵੋ ਵਿਗ੍ਗਹੋ’’ਤਿ ਪੁਚ੍ਛਤਿ.

੫੨੪. ‘‘ਇਚ੍ਛਿਤਟ੍ਠਾਨਂ ਉਜੁਕਂ ਮਗ੍ਗਤਿ ਉਪਗਚ੍ਛਤਿ ਏਤੇਨਾਤਿ ਮਗ੍ਗੋ, ਉਜੁਮਗ੍ਗੋ. ਤਦਞ੍ਞੋ ਅਮਗ੍ਗੋ’’ਤਿ ਵੁਤ੍ਤੋ ਵਾਯਮਤ੍ਥੋ. ਸਬ੍ਬੇ ਤੇਤਿ ਸਬ੍ਬੇਪਿ ਤੇ ਨਾਨਾਆਚਰਿਯੇਹਿ ਵੁਤ੍ਤਮਗ੍ਗਾ.

ਯੇ ਪਾਲ਼ਿਯਂ ‘‘ਅਦ੍ਧਰਿਯਾ ਬ੍ਰਾਹ੍ਮਣਾ’’ਤਿਆਦਿਨਾ ਵੁਤ੍ਤਾ. ਅਦ੍ਧਰੋ ਨਾਮ ਯਞ੍ਞਵਿਸੇਸੋ, ਤਦੁਪਯੋਗਿਭਾਵਤੋ ‘‘ਅਦ੍ਧਰਿਯਾ’’ ਤ੍ਵੇਵ ਵੁਚ੍ਚਨ੍ਤਿ ਯਜੂਨਿ, ਤਾਨਿ ਸਜ੍ਝਾਯਨ੍ਤੀਤਿ ਅਦ੍ਧਰਿਯਾ, ਯਜੁਬ੍ਬੇਦਿਨੋ. ਯੇ ਚ ਤਿਤ੍ਤਿਰਿਇਸਿਨਾ ਕਤੇ ਮਨ੍ਤੇ ਸਜ੍ਝਾਯਨ੍ਤਿ, ਤੇ ਤਿਤ੍ਤਿਰਿਯਾ, ਯਜੁਬ੍ਬੇਦਿਨੋ ਏਵ. ਯਜੁਬ੍ਬੇਦਸਾਖਾ ਹੇਸਾ, ਯਦਿਦਂ ਤਿਤ੍ਤਿਰਂ. ਛਨ੍ਦੋ ਵੁਚ੍ਚਤਿ ਵਿਸੇਸਤੋ ਸਾਮਵੇਦੋ, ਤਂ ਸਰੇਨ ਕਾਯਨ੍ਤੀਤਿ ਛਨ੍ਦੋਕਾ, ਸਾਮਵੇਦਿਨੋ. ‘‘ਛਨ੍ਦੋਗਾ’’ਤਿਪਿ ਪਠਨ੍ਤਿ, ਸੋ ਏਵਤ੍ਥੋ. ਬਹਵੋ ਇਰਯੋ ਏਤ੍ਥਾਤਿ ਬਵ੍ਹਾਰਿ, ਇਰੁਬ੍ਬੇਦੋ. ਤਂ ਅਧੀਯਨ੍ਤੀਤਿ ਬਵ੍ਹਾਰਿਜ੍ਝਾ.

‘‘ਬਹੂਨੀ’’ਤਿ ਏਤ੍ਥਾਯਂ ਉਪਮਾਸਂਸਨ੍ਦਨਾ – ਯਥਾ ਤੇ ਨਾਨਾਮਗ੍ਗਾ ਏਕਂਸਤੋ ਤਸ੍ਸ ਗਾਮਸ੍ਸ ਵਾ ਨਿਗਮਸ੍ਸ ਵਾ ਪਵੇਸਾਯ ਹੋਨ੍ਤਿ, ਏਵਂ ਬ੍ਰਾਹ੍ਮਣੇਹਿ ਪਞ੍ਞਾਪਿਯਮਾਨਾਪਿ ਨਾਨਾਮਗ੍ਗਾ ਬ੍ਰਹ੍ਮਲੋਕੂਪਗਮਨਾਯ ਬ੍ਰਹ੍ਮੁਨਾ ਸਹਬ੍ਯਤਾਯ ਏਕਂਸੇਨੇਵ ਹੋਨ੍ਤੀਤਿ.

੫੨੭-੫੨੯. ਵ-ਕਾਰੋ ਆਗਮਸਨ੍ਧਿਮਤ੍ਤਨ੍ਤਿ ਅਨਤ੍ਥਕੋ ਵ-ਕਾਰੋ, ਤੇਨ ਵਣ੍ਣਾਗਮੇਨ ਪਦਨ੍ਤਰਸਨ੍ਧਿਮਤ੍ਤਂ ਕਤਨ੍ਤਿ ਅਤ੍ਥੋ. ਅਨ੍ਧਪਵੇਣੀਤਿ ਅਨ੍ਧਪਨ੍ਤਿ. ‘‘ਪਞ੍ਞਾਸਸਟ੍ਠਿ ਅਨ੍ਧਾ’’ਤਿ ਇਦਂ ਤਸ੍ਸਾ ਅਨ੍ਧਪਵੇਣਿਯਾ ਮਹਤੋ ਗਚ੍ਛਗੁਮ੍ਬਸ੍ਸ ਅਨੁਪਰਿਗਮਨਯੋਗ੍ਯਤਾਦਸ੍ਸਨਂ. ਏਵਞ੍ਹਿ ਤੇ ‘‘ਸੁਚਿਰਂ ਵੇਲਂ ਮਗ੍ਗਂ ਗਚ੍ਛਾਮਾ’’ਤਿ ਏਵਂ ਸਞ੍ਞਿਨੋ ਹੋਨ੍ਤਿ. ਨਾਮਕਂਯੇਵਾਤਿ ਅਤ੍ਥਾਭਾਵਤੋ ਨਾਮਮਤ੍ਤਂਯੇਵ, ਤਂ ਪਨ ਭਾਸਿਤਂ ਤੇਹਿ ਸਾਰਸਞ੍ਞਿਤਮ੍ਪਿ ਨਾਮਮਤ੍ਤਤਾਯ ਅਸਾਰਭਾਵਤੋ ਨਿਹੀਨਮੇਵਾਤਿ ਆਹ ‘‘ਲਾਮਕਂਯੇਵਾ’’ਤਿ.

੫੩੦. ਯਤੋਤਿ ਭੁਮ੍ਮਤ੍ਥੇ ਨਿਸ੍ਸਕ੍ਕਵਚਨਂ, ਸਾਮਞ੍ਞਜੋਤਨਾ ਚ ਵਿਸੇਸੇ ਅਵਤਿਟ੍ਠਤੀਤਿ ਆਹ ‘‘ਯਸ੍ਮਿਂ ਕਾਲੇ’’ਤਿ. ਆਯਾਚਨ੍ਤੀਤਿ ਪਤ੍ਥੇਨ੍ਤਿ. ਉਗ੍ਗਮਨਂ ਲੋਕਸ੍ਸ ਬਹੁਕਾਰਭਾਵਤੋ ਤਥਾ ਥੋਮਨਾਤਿ. ਅਯਂ ਕਿਰ ਬ੍ਰਾਹ੍ਮਣਾਨਂ ਲਦ੍ਧਿ ‘‘ਬ੍ਰਾਹ੍ਮਣਾਨਂ ਆਯਾਚਨਾਯ ਚਨ੍ਦਿਮਸੂਰਿਯਾ ਗਨ੍ਤ੍ਵਾ ਲੋਕੇ ਓਭਾਸਂ ਕਰੋਨ੍ਤੀ’’ਤਿ.

੫੩੨. ਇਧ ਪਨ ਕਿਂ ਵਤ੍ਤਬ੍ਬਨ੍ਤਿ ਇਮਸ੍ਮਿਂ ਪਨ ਅਪ੍ਪਚ੍ਚਕ੍ਖਭੂਤਸ੍ਸ ਬ੍ਰਹ੍ਮੁਨੋ ਸਹਬ੍ਯਤਾਯ ਮਗ੍ਗਦੇਸਨੇ ਤੇਵਿਜ੍ਜਾਨਂ ਕਿਂ ਵਤ੍ਤਬ੍ਬਂ ਅਤ੍ਥਿ, ਯੇ ਪਚ੍ਚਕ੍ਖਭੂਤਾਨਮ੍ਪਿ ਚਨ੍ਦਿਮਸੂਰਿਯਾਨਂ ਸਹਬ੍ਯਤਾਯ ਮਗ੍ਗਂ ਦੇਸੇਤੁਂ ਨ ਸਕ੍ਕੋਨ੍ਤੀਤਿ ਅਧਿਪ੍ਪਾਯੋ. ‘‘ਯਤ੍ਥਾ’’ਤਿ ‘‘ਇਧ ਪਨਾ’’ਤਿ ਵੁਤ੍ਤਮੇਵਤ੍ਥਂ ਪਚ੍ਚਾਮਸਤਿ.

ਅਚਿਰਵਤੀਨਦੀਉਪਮਾਕਥਾਵਣ੍ਣਨਾ

੫੪੨. ਸਮਭਰਿਤਾਤਿ ਸਮ੍ਪੁਣ੍ਣਾ. ਤਤੋ ਏਵ ਕਾਕਪੇਯ੍ਯਾ. ਪਾਰਾਤਿ ਪਰਤੀਰਂ. ਅਪਾਰਨ੍ਤਿ ਓਰਿਮਤੀਰਂ. ਏਹੀਤਿ ਆਗਚ੍ਛ.

੫੪੪. ਪਞ੍ਚਸੀਲ…ਪੇ… ਵੇਦਿਤਬ੍ਬਾ ਯਮਨਿਯਮਾਦਿਬ੍ਰਾਹ੍ਮਣਧਮ੍ਮਾਨਂ ਤਦਨ੍ਤੋਗਧਭਾਵਤੋ. ਤਬ੍ਬਿਪਰੀਤਾਤਿ ਪਞ੍ਚਸੀਲਾਦਿਵਿਪਰੀਤਾ ਪਞ੍ਚ ਵੇਰਾਦਯੋ. ‘‘ਪੁਨਪੀ’’ਤਿ ਵਤ੍ਵਾ ‘‘ਅਪਰਮ੍ਪੀ’’ਤਿ ਵਚਨਂ ਇਤਰਾਯਪਿ ਨਦਿ ਉਪਮਾਯ ਸਙ੍ਗਣ੍ਹਨਤ੍ਥਂ.

੫੪੬. ਕਾਮਯਿਤਬ੍ਬਟ੍ਠੇਨਾਤਿ ਕਾਮਨੀਯਭਾਵੇਨ. ਬਨ੍ਧਨਟ੍ਠੇਨਾਤਿ ਤੇਨੇਵ ਕਾਮੇਤਬ੍ਬਭਾਵੇਨ ਸਤ੍ਤਾਨਂ ਚਿਤ੍ਤਸ੍ਸ ਆਬਨ੍ਧਨਭਾਵੇਨ. ਕਾਮਞ੍ਚਾਯਂ ਗੁਣ-ਸਦ੍ਦੋ ਅਤ੍ਥਨ੍ਤਰੇਸੁਪਿ ਦਿਟ੍ਠਪ੍ਪਯੋਗੋ, ਤੇਸਂ ਪਨੇਤ੍ਥ ਅਸਮ੍ਭਵਤੋ ਪਾਰਿਸੇਸਞਾਯੇਨ ਬਨ੍ਧਨਟ੍ਠੇਯੇਵ ਯੁਤ੍ਤੋਤਿ ਦਸ੍ਸੇਤੁਂ ‘‘ਅਨੁਜਾਨਾਮੀ’’ਤਿਆਦਿਨਾ ਅਤ੍ਥੁਦ੍ਧਾਰੋ ਆਰਦ੍ਧੋ, ਏਸੇਵਾਤਿ ਬਨ੍ਧਨਟ੍ਠੋ ਏਵ. ਨ ਹਿ ਰੂਪਾਦੀਨਂ ਕਾਮੇਤਬ੍ਬਭਾਵੇ ਵੁਚ੍ਚਮਾਨੇ ਪਟਲਟ੍ਠੋ ਯੁਜ੍ਜਤਿ ਤਥਾ ਕਾਮੇਤਬ੍ਬਤਾਯ ਅਨਧਿਪ੍ਪੇਤਤ੍ਤਾ. ਰਾਸਟ੍ਠਆਨਿਸਂਸਟ੍ਠੇਸੁਪਿ ਏਸੇਵ ਨਯੋ ਤਥਾਪਿ ਕਾਮੇਤਬ੍ਬਤਾਯ ਅਨਧਿਪ੍ਪੇਤਤ੍ਤਾ. ਪਾਰਿਸੇਸਤੋ ਪਨ ਬਨ੍ਧਨਟ੍ਠੋ ਗਹਿਤੋ. ਯਦਗ੍ਗੇਨ ਹਿ ਨੇਸਂ ਕਾਮੇਤਬ੍ਬਤਾ, ਤਦਗ੍ਗੇਨ ਬਨ੍ਧਨਭਾਵੋ ਚਾਤਿ.

ਕੋਟ੍ਠਾਸਟ੍ਠੋਪਿ ਤੇਸੁ ਯੁਜ੍ਜਤੇਵ ਚਕ੍ਖੁਵਿਞ੍ਞੇਯ੍ਯਾਦਿਕੋਟ੍ਠਾਸਭਾਵੇਨ ਨੇਸਂ ਕਾਮੇਤਬ੍ਬਤੋ. ਕੋਟ੍ਠਾਸੇ ਚ ਗੁਣ-ਸਦ੍ਦੋ ਦਿਸ੍ਸਤਿ ‘‘ਦਿਗੁਣਂ ਵਡ੍ਢੇਤਬ੍ਬ’’ਨ੍ਤਿਆਦੀਸੁ, ਸਮ੍ਪਦਾਟ੍ਠੋਪਿ –

‘‘ਅਸਙ੍ਖ੍ਯੇਯ੍ਯਾਨਿ ਨਾਮਾਨਿ, ਸਗੁਣੇਨ ਮਹੇਸਿਨੋ;

ਗੁਣੇਨ ਨਾਮਮੁਦ੍ਧੇਯ੍ਯਂ, ਅਪਿ ਨਾਮਸਹਸ੍ਸਤੋ’’ਤਿ. (ਧ. ਸ. ਅਟ੍ਠ. ੧੩੧੩; ਉਦਾ. ਅਟ੍ਠ. ੫੩; ਪਟਿ. ਮ. ਅਟ੍ਠ. ੭੬);

ਆਦੀਸੁ ਸੋਪਿ ਇਧ ਨ ਯੁਜ੍ਜਤੀਤਿ ਅਨੁਦ੍ਧਟੋ.

ਚਕ੍ਖੁਵਿਞ੍ਞੇਯ੍ਯਾਤਿ ਚਕ੍ਖੁਵਿਞ੍ਞਾਣੇਨ ਵਿਜਾਨਿਤਬ੍ਬਾ, ਤੇਨ ਪਨ ਵਿਜਾਨਨਂ ਦਸ੍ਸਨਮੇਵਾਤਿ ਆਹ ‘‘ਪਸ੍ਸਿਤਬ੍ਬਾ’’ਤਿ. ‘‘ਸੋਤਵਿਞ੍ਞਾਣੇਨ ਸੋਤਬ੍ਬਾ’’ਤਿ ਏਵਮਾਦਿ ਏਤੇਨੁਪਾਯੇਨਾਤਿ ਅਤਿਦਿਸਤਿ. ਗਵੇਸਿਤਮ੍ਪਿ ‘‘ਇਟ੍ਠ’’ਨ੍ਤਿ ਵੁਚ੍ਚਤਿ, ਤਂ ਇਧ ਨਾਧਿਪ੍ਪੇਤਨ੍ਤਿ ਆਹ ‘‘ਪਰਿਯਿਟ੍ਠਾ ਵਾ ਹੋਨ੍ਤੁ ਮਾ ਵਾ’’ਤਿ. ਇਟ੍ਠਾਰਮ੍ਮਣਭੂਤਾਤਿ ਸੁਖਾਰਮ੍ਮਣਭੂਤਾ. ਕਾਮਨੀਯਾਤਿ ਕਾਮੇਤਬ੍ਬਾ. ਇਟ੍ਠਭਾਵੇਨ ਮਨਂ ਅਪ੍ਪਾਯਨ੍ਤੀਤਿ ਮਨਾਪਾ. ਪਿਯਜਾਤਿਕਾਤਿ ਪਿਯਸਭਾਵਾ.

ਗੇਧੇਨਾਤਿ ਲੋਭੇਨ ਅਭਿਭੂਤਾ ਹੁਤ੍ਵਾ ਪਞ੍ਚਕਾਮਗੁਣੇ ਪਰਿਭੁਞ੍ਜਨ੍ਤੀਤਿ ਯੋਜਨਾ. ਮੁਚ੍ਛਾਕਾਰਨ੍ਤਿ ਮੋਹਨਾਕਾਰਂ. ਅਧਿਓਸਨ੍ਨਾਤਿ ਅਧਿਗ੍ਗਯ੍ਹ ਅਜ੍ਝੋਸਾਯ ਅਵਸਨ੍ਨਾ, ਤੇਨਾਹ ‘‘ਓਗਾਲ਼੍ਹਾ’’ਤਿ. ਪਰਿਨਿਟ੍ਠਾਨਪ੍ਪਤ੍ਤਾਤਿ ਗਿਲਿਤ੍ਵਾ ਪਰਿਨਿਟ੍ਠਾਪਨਵਸੇਨ ਪਰਿਨਿਟ੍ਠਾਨਂ ਉਪਗਤਾ. ਆਦੀਨਵਨ੍ਤਿ ਕਾਮਪਰਿਭੋਗੇ ਸਮ੍ਪਤਿ, ਆਯਤਿਞ੍ਚ ਦੋਸਂ ਅਪਸ੍ਸਨ੍ਤਾ. ਘਾਸਚ੍ਛਾਦਨਾਦਿਸਮ੍ਭੋਗਨਿਮਿਤ੍ਤਸਂਕਿਲੇਸਤੋ ਨਿਸ੍ਸਰਨ੍ਤਿ ਅਪਗਚ੍ਛਨ੍ਤਿ ਏਤੇਨਾਤਿ ਨਿਸ੍ਸਰਣਂ, ਯੋਨਿਸੋ ਪਚ੍ਚਵੇਕ੍ਖਿਤ੍ਵਾ ਤੇਸਂ ਪਰਿਭੋਗਪਞ੍ਞਾ. ਤਦਭਾਵਤੋ ਅਨਿਸ੍ਸਰਣਪਞ੍ਞਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਇਦਮੇਤ੍ਥਾ’’ਤਿਆਦਿਮਾਹ.

੫੪੮-੯. ਆਵਰਨ੍ਤੀਤਿ ਕੁਸਲਪ੍ਪਵਤ੍ਤਿਂ ਆਦਿਤੋਵ ਨਿਵਾਰੇਨ੍ਤਿ. ਨਿਵਾਰੇਨ੍ਤੀਤਿ ਨਿਰਵਸੇਸਤੋ ਵਾਰਯਨ੍ਤਿ. ਓਨਨ੍ਧਨ੍ਤੀਤਿ ਓਗਾਹਨ੍ਤਾ ਵਿਯ ਛਾਦੇਨ੍ਤਿ. ਪਰਿਯੋਨਨ੍ਧਨ੍ਤੀਤਿ ਸਬ੍ਬਸੋ ਛਾਦੇਨ੍ਤਿ. ਆਵਰਣਾਦੀਨਂ ਵਸੇਨਾਤਿ ਆਵਰਣਾਦਿਅਤ੍ਥਾਨਂ ਵਸੇਨ. ਤੇ ਹਿ ਆਸੇਵਨਬਲਵਤਾਯ ਪੁਰਿਮਪੁਰਿਮੇਹਿ ਪਚ੍ਛਿਮਪਚ੍ਛਿਮਾ ਦਲ਼੍ਹਤਰਤਮਾਦਿਭਾਵਪ੍ਪਤ੍ਤਾ ਵੁਤ੍ਤਾ.

ਸਂਸਨ੍ਦਨਕਥਾਵਣ੍ਣਨਾ

੫੫੦. ਇਤ੍ਥਿਪਰਿਗ੍ਗਹੇ ਸਤਿ ਪੁਰਿਸਸ੍ਸ ਪਞ੍ਚਕਾਮਗੁਣਪਰਿਗ੍ਗਹੋ ਪਰਿਪੁਣ੍ਣੋ ਏਵ ਹੋਤੀਤਿ ਵੁਤ੍ਤਂ ‘‘ਸਪਰਿਗ੍ਗਹੋਤਿ ਇਤ੍ਥਿਪਰਿਗ੍ਗਹੇਨ ਸਪਰਿਗ੍ਗਹੋ’’ਤਿ. ‘‘ਇਤ੍ਥਿਪਰਿਗ੍ਗਹੇਨ ਅਪਰਿਗ੍ਗਹੋ’’ਤਿ ਚ ਇਦਂ ਤੇਵਿਜ੍ਜਬ੍ਰਾਹ੍ਮਣੇਸੁ ਦਿਸ੍ਸਮਾਨਪਰਿਗ੍ਗਹਾਨਂ ਦੁਟ੍ਠੁਲ੍ਲਤਮਪਰਿਗ੍ਗਹਾਭਾਵਦਸ੍ਸਨਂ. ਏਵਂਭੂਤਾਨਂ ਤੇਵਿਜ੍ਜਾਨਂ ਬ੍ਰਾਹ੍ਮਣਾਨਂ ਕਾ ਬ੍ਰਹ੍ਮੁਨਾ ਸਂਸਨ੍ਦਨਾ, ਬ੍ਰਹ੍ਮਾ ਪਨ ਸਬ੍ਬੇਨ ਸਬ੍ਬਂ ਅਪਰਿਗ੍ਗਹੋਤਿ. ਵੇਰਚਿਤ੍ਤੇਨ ਅਵੇਰੋ, ਕੁਤੋ ਏਤਸ੍ਸ ਵੇਰਪ੍ਪਯੋਗੋਤਿ ਅਧਿਪ੍ਪਾਯੋ. ਚਿਤ੍ਤਗੇਲਞ੍ਞਸਙ੍ਖਾਤੇਨਾਤਿ ਚਿਤ੍ਤੁਪ੍ਪਾਦਗੇਲਞ੍ਞਸਞ੍ਞਿਤੇਨ, ਤੇਨਸ੍ਸ ਸਬ੍ਬਰੂਪਕਾਯਗੇਲਞ੍ਞਭਾਵੋ ਵੁਤ੍ਤੋ ਹੋਤਿ. ਬ੍ਯਾਪਜ੍ਝੇਨਾਤਿ ਦੁਕ੍ਖੇਨ. ਉਦ੍ਧਚ੍ਚਕੁਕ੍ਕੁਚ੍ਚਾਦੀਹੀਤਿ ਆਦਿ-ਸਦ੍ਦੇਨ ਤਦੇਕਟ੍ਠਾ ਸਂਕਿਲੇਸਧਮ੍ਮਾ ਸਙ੍ਗਯ੍ਹਨ੍ਤਿ. ਅਪ੍ਪਟਿਪਤ੍ਤਿਹੇਤੁਭੂਤਾਯ ਵਿਚਿਕਿਚ੍ਛਾਯ ਸਤਿ ਨ ਕਦਾਚਿ ਚਿਤ੍ਤਂ ਪੁਰਿਸਸ੍ਸ ਵਸੇ ਵਤ੍ਤਤਿ, ਪਹੀਨਾਯ ਪਨ ਸਿਯਾ ਵਸਵਤ੍ਤਨਨ੍ਤਿ ਆਹ ‘‘ਵਿਚਿਕਿਚ੍ਛਾਯ ਅਭਾਵਤੋ ਚਿਤ੍ਤਂ ਵਸੇ ਵਤ੍ਤੇਤੀ’’ਤਿ. ਚਿਤ੍ਤਗਤਿਕਾਤਿ ਚਿਤ੍ਤਵਸਿਕਾ, ਤੇਨਾਹ ਚਿਤ੍ਤਸ੍ਸ ਵਸੇ ਵਤ੍ਤਨ੍ਤੀ’’ਤਿ. ਨ ਤਾਦਿਸੋਤਿ ਬ੍ਰਾਹ੍ਮਣਾ ਵਿਯ ਚਿਤ੍ਤਵਸਿਕੋ ਨ ਹੋਤਿ, ਅਥ ਖੋ ਵਸੀਭੂਤਜ੍ਝਾਨਾਭਿਞ੍ਞਤਾਯ ਚਿਤ੍ਤਂ ਅਤ੍ਤਨੋ ਵਸੇ ਵਤ੍ਤੇਤੀਤਿ ਵਸਵਤ੍ਤੀ.

੫੫੨. ਬ੍ਰਹ੍ਮਲੋਕਮਗ੍ਗੇਤਿ ਬ੍ਰਹ੍ਮਲੋਕਗਾਮਿਮਗ੍ਗੇ ਪਟਿਪਜ੍ਜਿਤਬ੍ਬੇ, ਪਞ੍ਞਪੇਤਬ੍ਬੇ ਵਾ, ਤਂ ਪਞ੍ਞਪੇਨ੍ਤਾਤਿ ਅਧਿਪ੍ਪਾਯੋ. ਉਪਗਨ੍ਤ੍ਵਾਤਿ ਅਮਗ੍ਗਮੇਵ ‘‘ਮਗ੍ਗੋ’’ਤਿ ਮਿਚ੍ਛਾਪਟਿਪਜ੍ਜਨੇਨ ਉਪਗਨ੍ਤ੍ਵਾ, ਪਟਿਜਾਨਿਤ੍ਵਾ ਵਾ. ਪਙ੍ਕਂ ਓਤਿਣ੍ਣਾ ਵਿਯਾਤਿ ਮਤ੍ਥਕੇ ਏਕਙ੍ਗੁਲਂ ਵਾ ਉਪਡ੍ਢਙ੍ਗੁਲਂ ਵਾ ਸੁਕ੍ਖਤਾਯ ‘‘ਸਮਤਲ’’ਨ੍ਤਿ ਸਞ੍ਞਾਯ ਅਨੇਕਪੋਰਿਸਂ ਮਹਾਪਙ੍ਕਂ ਓਤਿਣ੍ਣਾ ਵਿਯ. ਅਨੁਪ੍ਪਵਿਸਨ੍ਤੀਤਿ ਅਪਾਯਮਗ੍ਗਂ ਬ੍ਰਹ੍ਮਲੋਕਮਗ੍ਗਸਞ੍ਞਾਯ ਓਗਾਹਯਨ੍ਤਿ. ਤਤੋ ਏਵ ਸਂਸੀਦਿਤ੍ਵਾ ਵਿਸਾਦਂ ਪਾਪੁਣਨ੍ਤਿ. ਏਵਨ੍ਤਿ ‘‘ਸਮਤਲ’’ਨ੍ਤਿਆਦਿਨਾ ਵੁਤ੍ਤਨਯੇਨ. ਸਂਸੀਦਿਤ੍ਵਾਤਿ ਨਿਮ੍ਮੁਜ੍ਜਿਤ੍ਵਾ. ਸੁਕ੍ਖਤਰਣਂ ਮਞ੍ਞੇ ਤਰਨ੍ਤੀਤਿ ਸੁਕ੍ਖਨਦਿਤਰਣਂ ਤਰਨ੍ਤਿ ਮਞ੍ਞੇ. ਤਸ੍ਮਾਤਿ ਯਸ੍ਮਾ ਤੇਵਿਜ੍ਜਾ ਅਮਗ੍ਗਮੇਵ ‘‘ਮਗ੍ਗੋ’’ਤਿ ਉਪਗਨ੍ਤ੍ਵਾ ਸਂਸੀਦਨ੍ਤਿ, ਤਸ੍ਮਾ. ਯਥਾ ਤੇਤਿ ਯਥਾ ਤੇ ‘‘ਸਮਤਲ’’ਨ੍ਤਿ ਸਞ੍ਞਾਯ ਪਙ੍ਕਂ ਓਤਿਣ੍ਣਾ. ਇਧੇਵ ਚਾਤਿ ਇਮਸ੍ਮਿਞ੍ਚ ਅਤ੍ਤਭਾਵੇ. ਸੁਖਂ ਵਾ ਸਾਤਂ ਵਾ ਨ ਲਭਨ੍ਤੀਤਿ ਝਾਨਸੁਖਂ ਵਾ ਵਿਪਸ੍ਸਨਾਸਾਤਂ ਵਾ ਨ ਲਭਨ੍ਤਿ, ਕੁਤੋ ਮਗ੍ਗਸੁਖਂ ਵਾ ਨਿਬ੍ਬਾਨਸਾਤਂ ਵਾਤਿ ਅਧਿਪ੍ਪਾਯੋ. ਮਗ੍ਗਦੀਪਕਨ੍ਤਿ ਮਗ੍ਗਦੀਪਕਾਭਿਮਤਂ. ‘‘ਇਰਿਣ’’ਨ੍ਤਿ ਅਰਞ੍ਞਾਨਿਯਾ ਇਦਂ ਅਧਿਵਚਨਨ੍ਤਿ ਆਹ ‘‘ਅਗਾਮਕਂ ਮਹਾਰਞ੍ਞ’’ਨ੍ਤਿ. ਮਿਗਰੁਰੁਆਦੀਨਮ੍ਪਿ ਅਨੁਪਭੋਗਰੁਕ੍ਖੇਹਿ. ਪਰਿਵਤ੍ਤਿਤੁਮ੍ਪਿ ਨ ਸਕ੍ਕਾ ਹੋਨ੍ਤਿ ਮਹਾਕਣ੍ਟਕਤਾਯ. ਞਾਤੀਨਂ ਬ੍ਯਸਨਂ ਵਿਨਾਸੋ ਞਾਤਿਬ੍ਯਸਨਂ. ਏਵਂ ਭੋਗਸੀਲਬ੍ਯਸਨਾਨਿ ਵੇਦਿਤਬ੍ਬਾਨਿ. ਰੋਗੋ ਏਵ ਬ੍ਯਸਤਿ ਵਿਬਾਧਤੀਤਿ ਰੋਗਬ੍ਯਸਨਂ. ਏਵਂ ਦਿਟ੍ਠਿਬ੍ਯਸਨਮ੍ਪਿ ਦਟ੍ਠਬ੍ਬਂ.

੫੫੪. ਜਾਤਸਂਵਡ੍ਢੋਤਿ ਜਾਤੋ ਹੁਤ੍ਵਾ ਸਂਵਡ੍ਢਿਤੋ. ਨ ਸਬ੍ਬਸੋ ਪਚ੍ਚਕ੍ਖਾ ਹੋਨ੍ਤਿ ਪਰਿਚਯਾਭਾਵਤੋ. ਚਿਰਨਿਕ੍ਖਨ੍ਤੋਤਿ ਨਿਕ੍ਖਨ੍ਤੋ ਹੁਤ੍ਵਾ ਚਿਰਕਾਲੋ. ਦਨ੍ਧਾਯਿਤਤ੍ਤਨ੍ਤਿ ਵਿਸ੍ਸਜ੍ਜਨੇ ਮਨ੍ਦਤ੍ਤਂ ਸਣਿਕਵੁਤ੍ਤਿ, ਤਂ ਪਨ ਸਂਸਯਵਸੇਨ ਚਿਰਾਯਨਂ ਨਾਮ ਹੋਤੀਤਿ ਆਹ ‘‘ਕਙ੍ਖਾਵਸੇਨ ਚਿਰਾਯਿਤਤ੍ਤ’’ਨ੍ਤਿ. ਵਿਤ੍ਥਾਯਿਤਤ੍ਤਨ੍ਤਿ ਸਾਰਜ੍ਜਿਤਤ੍ਤਂ. ਅਟ੍ਠਕਥਾਯਂ ਪਨ ਵਿਤ੍ਥਾਯਿਤਤ੍ਤਂ ਨਾਮ ਛਮ੍ਭਿਤਤ੍ਤਨ੍ਤਿ ਅਧਿਪ੍ਪਾਯੇਨ ‘‘ਥਦ੍ਧਭਾਵਗ੍ਗਹਣ’’ਨ੍ਤਿ ਵੁਤ੍ਤਂ.

੫੫੫. ਉ-ਇਤਿ ਉਪਸਗ੍ਗਯੋਗੇ ਲੁਮ੍ਪ-ਸਦ੍ਦੋ ਉਦ੍ਧਰਣਤ੍ਥੋ ਹੋਤੀਤਿ ‘‘ਉਲ੍ਲੁਮ੍ਪਤੂ’’ਤਿ ਪਦਸ੍ਸ ਉਦ੍ਧਰਤੂਤਿ ਅਤ੍ਥਮਾਹ. ਉਪਸਗ੍ਗਵਸੇਨ ਹਿ ਧਾਤੁ-ਸਦ੍ਦਾ ਅਤ੍ਥਵਿਸੇਸਵੁਤ੍ਤਿਨੋ ਹੋਨ੍ਤਿ ਯਥਾ ‘‘ਉਦ੍ਧਰਤੂ’’ਤਿ.

ਬ੍ਰਹ੍ਮਲੋਕਮਗ੍ਗਦੇਸਨਾਵਣ੍ਣਨਾ

੫੫੬. ਯਸ੍ਸ ਅਤਿਸਯੇਨ ਬਲਂ ਅਤ੍ਥਿ, ਸੋ ‘‘ਬਲਵਾ’’ਤਿ ਵੁਤ੍ਤੋਤਿ ਆਹ ‘‘ਬਲਸਮ੍ਪਨ੍ਨੋ’’ਤਿ. ਸਙ੍ਖਂ ਧਮਯਤੀਤਿ ਸਙ੍ਖਧਮਕੋ, ਤਂ ਧਮਯਿਤ੍ਵਾ ਤਤੋ ਸਦ੍ਦਪਵਤ੍ਤਕੋ. ਅਪ੍ਪਨਾਵ ਵਟ੍ਟਤਿ ਪਟਿਪਕ੍ਖਤੋ ਸਮ੍ਮਦੇਵ ਚੇਤਸੋ ਵਿਮੁਤ੍ਤਿਭਾਵਤੋ.

ਪਮਾਣਕਤਂ ਕਮ੍ਮਂ ਨਾਮ ਕਾਮਾਵਚਰਂ ਪਮਾਣਕਰਾਨਂ ਸਂਕਿਲੇਸਧਮ੍ਮਾਨਂ ਅਵਿਕ੍ਖਮ੍ਭਨਤੋ. ਤਥਾ ਹਿ ਤਂ ਬ੍ਰਹ੍ਮਵਿਹਾਰਪੁਬ੍ਬਭਾਗਭੂਤਂ ਪਮਾਣਂ ਅਤਿਕ੍ਕਮਿਤ੍ਵਾ ਓਦਿਸ੍ਸਕਅਨੋਦਿਸ੍ਸਕਦਿਸਾਫਰਣਵਸੇਨ ਵਡ੍ਢੇਤੁਂ ਨ ਸਕ੍ਕਾ. ਵੁਤ੍ਤਵਿਪਰਿਯਾਯਤੋ ਪਨ ਅਪ੍ਪਮਾਣਕਤਂ ਕਮ੍ਮਂ ਨਾਮ ਰੂਪਾਰੂਪਾਵਚਰਂ, ਤੇਨਾਹ ‘‘ਤਞ੍ਹੀ’’ਤਿਆਦਿ. ਤਤ੍ਥ ਅਰੂਪਾਵਚਰੇ ਓਦਿਸ੍ਸਕਾਨੋਦਿਸ੍ਸਕਵਸੇਨ ਫਰਣਂ ਨ ਲਬ੍ਭਤਿ, ਤਥਾ ਦਿਸਾਫਰਣਂ.

ਕੇਚਿ ਪਨ ਤਂ ਆਗਮਨਵਸੇਨ ਲਬ੍ਭਤੀਤਿ ਵਦਨ੍ਤਿ, ਤਦਯੁਤ੍ਤਂ. ਨ ਹਿ ਬ੍ਰਹ੍ਮਵਿਹਾਰਨਿਸ੍ਸਨ੍ਦੋ ਆਰੁਪ੍ਪਂ, ਅਥ ਖੋ ਕਸਿਣਨਿਸ੍ਸਨ੍ਦੋ, ਤਸ੍ਮਾ ਯਂ ਸੁਵਿਭਾਵਿਤਂ ਵਸੀਭਾਵਂ ਪਾਪਿਤਂ ਆਰੁਪ੍ਪਂ, ਤਂ ‘‘ਅਪ੍ਪਮਾਣਕਤ’’ਨ੍ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਯਂ ਵਾ ਸਾਤਿਸਯਂ ਬ੍ਰਹ੍ਮਵਿਹਾਰਭਾਵਨਾਯ ਅਭਿਸਙ੍ਖਤੇਨ ਸਨ੍ਤਾਨੇਨ ਨਿਬ੍ਬਤ੍ਤਿਤਂ, ਯਞ੍ਚ ਬ੍ਰਹ੍ਮਵਿਹਾਰਸਮਾਪਤ੍ਤਿਤੋ ਵੁਟ੍ਠਾਯ ਸਮਾਪਨ੍ਨਂ ਅਰੂਪਾਵਚਰਜ੍ਝਾਨਂ, ਤਂ ਇਮਿਨਾ ਪਰਿਯਾਯੇਨ ਫਰਣਪ੍ਪਮਾਣਵਸੇਨ ਅਪ੍ਪਮਾਣਕਤਨ੍ਤਿ ਵਤ੍ਤੁਂ ਵਟ੍ਟਤੀਤਿ ਅਪਰੇ. ਵੀਮਂਸਿਤ੍ਵਾ ਗਹੇਤਬ੍ਬਂ.

ਰੂਪਾਵਚਰਾਰੂਪਾਵਚਰਕਮ੍ਮੇਤਿ ਰੂਪਾਵਚਰਕਮ੍ਮੇ, ਅਰੂਪਾਵਚਰਕਮ੍ਮੇ ਚ ਸਤਿ. ਨ ਓਹੀਯਤਿ ਨ ਤਿਟ੍ਠਤੀਤਿ ਕਤੂਪਚਿਤਮ੍ਪਿ ਕਾਮਾਵਚਰਕਮ੍ਮਂ ਯਥਾਧਿਗਤੇ ਮਹਗ੍ਗਤਜ੍ਝਾਨੇ ਅਪਰਿਹੀਨੇ ਤਂ ਅਭਿਭਵਿਤ੍ਵਾ ਪਟਿਬਾਹਿਤ੍ਵਾ ਸਯਂ ਓਹੀਯਕਂ ਹੁਤ੍ਵਾ ਪਟਿਸਨ੍ਧਿਂ ਦਾਤੁਂ ਸਮਤ੍ਥਭਾਵੇ ਨ ਤਿਟ੍ਠਤਿ. ਲਗ੍ਗਿਤੁਨ੍ਤਿ ਆਵਰਿਤੁਂ ਨਿਸੇਧੇਤੁਂ. ਠਾਤੁਨ੍ਤਿ ਪਟਿਬਲੋ ਹੁਤ੍ਵਾ ਠਾਤੁਂ. ਫਰਿਤ੍ਵਾਤਿ ਪਟਿਪ੍ਫਰਿਤ੍ਵਾ. ਪਰਿਯਾਦਿਯਿਤ੍ਵਾਤਿ ਤਸ੍ਸ ਸਾਮਤ੍ਥਿਯਂ ਖੇਪੇਤ੍ਵਾ. ਕਮ੍ਮਸ੍ਸ ਪਰਿਯਾਦਿਯਨਂ ਨਾਮ ਤਸ੍ਸ ਵਿਪਾਕੁਪ੍ਪਾਦਨਂ ਨਿਸੇਧੇਤ੍ਵਾ ਅਤ੍ਤਨੋ ਵਿਪਾਕੁਪ੍ਪਾਦਨਨ੍ਤਿ ਆਹ ‘‘ਤਸ੍ਸ ਵਿਪਾਕਂ ਪਟਿਬਾਹਿਤ੍ਵਾ’’ਤਿਆਦਿ. ਏਵਂ ਮੇਤ੍ਤਾਦਿਵਿਹਾਰੀਤਿ ਏਵਂ ਵੁਤ੍ਤਾਨਂ ਮੇਤ੍ਤਾਦੀਨਂ ਬ੍ਰਹ੍ਮਵਿਹਾਰਾਨਂ ਵਸੇਨ ਮੇਤ੍ਤਾਦਿਵਿਹਾਰੀ.

੫੫੯. ਅਗ੍ਗਞ੍ਞਸੁਤ੍ਤੇ…ਪੇ… ਅਲਤ੍ਥੁਨ੍ਤਿ ਅਗ੍ਗਞ੍ਞਸੁਤ੍ਤੇ ਆਗਤਨਯੇਨ ਉਪਸਮ੍ਪਦਞ੍ਚੇਵ ਅਰਹਤ੍ਤਞ੍ਚ ਅਲਤ੍ਥੁਂ ਪਟਿਲਭਿਂਸੁ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਤੇਵਿਜ੍ਜਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.