੧੨. ਲੋਹਿਚ੍ਚਸੁਤ੍ਤਵਣ੍ਣਨਾ

ਲੋਹਿਚ੍ਚਬ੍ਰਾਹ੍ਮਣਵਤ੍ਥੁਵਣ੍ਣਨਾ

੫੦੧. ਸਾਲਵਤਿਕਾਤਿ ਇਤ੍ਥਿਲਿਙ੍ਗਵਸੇਨ ਤਸ੍ਸ ਗਾਮਸ੍ਸ ਨਾਮਂ. ਗਾਮਣਿਕਾਭਾਵੇਨਾਤਿ ਕੇਚਿ. ਲੋਹਿਤੋ ਨਾਮ ਤਸ੍ਸ ਕੁਲੇ ਪੁਬ੍ਬਪੁਰਿਸੋ, ਤਸ੍ਸ ਵਸੇਨ ਲੋਹਿਚ੍ਚੋਤਿ ਤਸ੍ਸ ਬ੍ਰਾਹ੍ਮਣਸ੍ਸ ਗੋਤ੍ਤਤੋ ਆਗਤਂ ਨਾਮਂ.

੫੦੨. ‘‘ਦਿਟ੍ਠਿਗਤ’’ਨ੍ਤਿ ਲਦ੍ਧਿਮਤ੍ਤਂ ਅਧਿਪ੍ਪੇਤਨ੍ਤਿ ਆਹ ‘‘ਨ ਪਨ ਉਚ੍ਛੇਦਸਸ੍ਸਤਾਨਂ ਅਞ੍ਞਤਰ’’ਨ੍ਤਿ. ਨ ਹਿ ਉਚ੍ਛੇਦਸਸ੍ਸਤਗਾਹਵਿਨਿਮੁਤ੍ਤੋ ਕੋਚਿ ਦਿਟ੍ਠਿਗਾਹੋ ਅਤ੍ਥਿ. ‘‘ਭਾਸਤਿ ਯੇਵਾ’’ਤਿ ਤਸ੍ਸਾ ਲਦ੍ਧਿਯਾ ਲੋਕੇ ਪਾਕਟਭਾਵਂ ਦਸ੍ਸੇਤਿ. ਅਤ੍ਤਤੋ ਅਞ੍ਞੋ ਪਰੋਤਿ ਯਥਾ ਅਨੁਸਾਸਕਤੋ ਅਨੁਸਾਸਿਤਬ੍ਬੋ ਪਰੋ, ਏਵਂ ਅਨੁਸਾਸਿਤਬ੍ਬਤੋਪਿ ਅਨੁਸਾਸਕੋ ਪਰੋਤਿ ਵੁਤ੍ਤਂ ‘‘ਪਰੋ ਪਰਸ੍ਸਾਤਿ ਪਰੋ ਯੋ’’ਤਿਆਦਿ. ਕਿਂ-ਸਦ੍ਦਾਪੇਕ੍ਖਾਯ ਚੇਤ੍ਥ ‘‘ਕਰਿਸ੍ਸਤੀ’’ਤਿ ਅਨਾਗਤਕਾਲਵਚਨਂ, ਅਨਾਗਤੇਪਿ ਵਾ ਤੇਨ ਤਸ੍ਸ ਕਾਤਬ੍ਬਂ ਨਤ੍ਥੀਤਿ ਦਸ੍ਸਨਤ੍ਥਂ. ਕੁਸਲਂ ਧਮ੍ਮਨ੍ਤਿ ਅਨਵਜ੍ਜਧਮ੍ਮਂ ਨਿਕ੍ਕਿਲੇਸਧਮ੍ਮਂ ਵਿਮੋਕ੍ਖਧਮ੍ਮਨ੍ਤਿ ਅਤ੍ਥੋ. ‘‘ਪਰੇਸਂ ਧਮ੍ਮਂ ਕਥੇਸ੍ਸਾਮੀ’’ਤਿ ਤੇਹਿ ਅਤ੍ਤਾਨਂ ਪਰਿਵਾਰਾਪੇਤ੍ਵਾ ਵਿਚਰਣਂ ਕਿਂ ਅਤ੍ਥਿਯਂ ਆਸਯਬੁਦ੍ਧਸ੍ਸਾਪਿ ਅਨੁਰੋਧੇਨ ਵਿਨਾ ਤਂ ਨ ਹੋਤੀਤਿ ਤਸ੍ਮਾ ਅਤ੍ਤਨਾ ਪਟਿਲਦ੍ਧਂ…ਪੇ… ਵਿਹਾਤਬ੍ਬਨ੍ਤਿ ਵਦਤਿ. ਤੇਨਾਹ ‘‘ਏਵਂ ਸਮ੍ਪਦਮਿਦਂ ਪਾਪਕਂ ਲੋਭਧਮ੍ਮਂ ਵਦਾਮੀ’’ਤਿ.

੫੦੪. ਸੋਤਿ ਲੋਹਿਚ੍ਚੋ ਬ੍ਰਾਹ੍ਮਣੋ.

੫੦੮. ਕਥਾਫਾਸੁਕਤ੍ਥਨ੍ਤਿ ਕਥਾਸੁਖਤ੍ਥਂ, ਸੁਖੇਨ ਕਥਂ ਕਥੇਤੁਞ੍ਚੇਵ ਸੋਤੁਞ੍ਚਾਤਿ ਅਤ੍ਥੋ. ਅਪ੍ਪੇਵ ਨਾਮ ਸਿਯਾਤਿ ਏਤ੍ਥ ਪੀਤਿਵਸੇਨ ਆਮੇਡਿਤਂ ਦਟ੍ਠਬ੍ਬਂ. ਤਥਾ ਹਿ ਤਂ ‘‘ਬੁਦ੍ਧਗਜ੍ਜਿਤ’’ਨ੍ਤਿ ਵੁਚ੍ਚਤਿ. ਭਗਵਾ ਹਿ ਈਦਿਸੇਸੁ ਠਾਨੇਸੁ ਵਿਸੇਸਤੋ ਪੀਤਿਸੋਮਨਸ੍ਸਜਾਤੋ ਹੋਤਿ. ਤੇਨਾਹ ‘‘ਅਯਂ ਕਿਰੇਤ੍ਥ ਅਧਿਪ੍ਪਾਯੋ’’ਤਿਆਦਿ.

ਲੋਹਿਚ੍ਚਬ੍ਰਾਹ੍ਮਣਾਨੁਯੋਗਵਣ੍ਣਨਾ

੫੦੯. ਸਮੁਦਯਸਞ੍ਜਾਤੀਤਿ ਆਯੁਪ੍ਪਾਦੋ. ਅਨੁਪੁਬ੍ਬੋ ਕਮ੍ਪੀ-ਸਦ੍ਦੋ ਆਕਙ੍ਖਨਤ੍ਥੋ ਹੋਤੀਤਿ ‘‘ਇਚ੍ਛਤੀਤਿ ਅਤ੍ਥੋ’’ਤਿ ਵੁਤ੍ਤਂ. ਸਾਤਿਸਯੇਨ ਵਾ ਹਿਤੇਨ ਅਨੁਕਮ੍ਪਕੋ ਅਨੁਗ੍ਗਣ੍ਹਨਕੋ ਹਿਤਾਨੁਕਮ੍ਪੀ. ਸਮ੍ਪਜ੍ਜਤੀਤਿ ਆਸੇਵਨਲਾਭੇਨ ਨਿਪ੍ਪਜ੍ਜਤਿ ਬਲਵਤੀ ਹੋਤਿ, ਅਵਗ੍ਗਹਾਤਿ ਅਤ੍ਥੋ, ਤੇਨਾਹ ‘‘ਨਿਯਤਾ ਹੋਤੀ’’ਤਿ. ਨਿਰਯੇ ਨਿਬ੍ਬਤ੍ਤਤਿ ਮਿਚ੍ਛਾਦਿਟ੍ਠਿਕੋ.

੫੧੦-੧੧. ਦੁਤਿਯਂ ਉਪਪਤ੍ਤਿਨ੍ਤਿ ‘‘ਨਨੁ ਰਾਜਾ ਪਸੇਨਦੀ ਕੋਸਲੋ’’ਤਿਆਦਿਨਾ ਦੁਤਿਯਂ ਉਪਪਤ੍ਤਿਂ ਸਾਧਨਯੁਤ੍ਤਿਂ. ਕਾਰਣਞ੍ਹਿ ਭਗਵਾ ਉਪਮਾਮੁਖੇਨ ਦਸ੍ਸੇਤਿ. ਯੇ ਚਿਮੇਤਿ ਯੇ ਚ ਇਮੇ ਕੁਲਪੁਤ੍ਤਾ ਦਿਬ੍ਬਾ ਗਬ੍ਭਾ ਪਰਿਪਾਚੇਨ੍ਤੀਤਿ ਯੋਜਨਾ. ਅਸਕ੍ਕੁਣਨ੍ਤਾ ਉਪਨਿਸ੍ਸਯਸਮ੍ਪਤ੍ਤਿਯਾ, ਞਾਣਪਰਿਪਾਕਸ੍ਸ ਵਾ ਅਭਾਵੇਨ. ਯੇ ਪਨ ‘‘ਪਰਿਪਚ੍ਚਨ੍ਤੀ’’ਤਿ ਪਠਨ੍ਤਿ, ਤੇਸਂ ‘‘ਦਿਬ੍ਬੇ ਗਬ੍ਭੇ’’ਤਿ ਵਚਨਵਿਪਲ੍ਲਾਸੇਨ ਪਯੋਜਨਂ ਨਤ੍ਥਿ. ਅਤ੍ਥੋ ਚ ਦੁਤਿਯਵਿਕਪ੍ਪੇ ਵੁਤ੍ਤਨਯੇਨ ਵੇਦਿਤਬ੍ਬੋ. ਅਹਿਤਾਨੁਕਮ੍ਪਿਤਾ ਚ ਤਂਸਮਙ੍ਗਿਸਤ੍ਤਵਸੇਨ. ਦਿਵਿ ਭਵਾਤਿ ਦਿਬ੍ਬਾ. ਗਬ੍ਭੇਨ੍ਤਿ ਪਰਿਪਚ੍ਚਨਵਸੇਨ ਸਨ੍ਤਾਨਂ ਪਬਨ੍ਧੇਨ੍ਤੀਤਿ ਗਬ੍ਭਾ. ‘‘ਛਨ੍ਨਂ ਦੇਵਲੋਕਾਨ’’ਨ੍ਤਿ ਨਿਦਸ੍ਸਨਵਚਨਮੇਤਂ. ਬ੍ਰਹ੍ਮਲੋਕਸ੍ਸਾਪਿ ਹਿ ਦਿਬ੍ਬਗਬ੍ਭਭਾਵੋ ਲਬ੍ਭਤੇਵ ਦਿਬ੍ਬਵਿਹਾਰਹੇਤੁਕਤ੍ਤਾ. ਏਵਞ੍ਚ ਕਤ੍ਵਾ ‘‘ਭਾਵਨਂ ਭਾਵਯਮਾਨਾ’’ਤਿ ਇਦਮ੍ਪਿ ਵਚਨਂ ਸਮਤ੍ਥਿਤਂ ਹੋਤਿ. ਭਵਨ੍ਤਿ ਏਤ੍ਥ ਯਥਾਰੁਚਿ ਸੁਖਸਮਪ੍ਪਿਤਾਤਿ ਭਵਾ, ਵਿਮਾਨਾਨਿ. ਦੇਵਭਾਵਾਵਹਤ੍ਤਾ ਦਿਬ੍ਬਾ. ਵੁਤ੍ਤਨਯੇਨੇਵ ਗਬ੍ਭਾ. ਦਾਨਾਦਯੋ ਦੇਵਲੋਕਸਂਵਤ੍ਤਨਿਯਪੁਞ੍ਞਵਿਸੇਸਾ.ਦਿਬ੍ਬਾ ਭਵਾਤਿ ਦੇਵਲੋਕਪਰਿਯਾਪਨ੍ਨਾ ਉਪਪਤ੍ਤਿਭਵਾ. ਤਦਾਵਹੋ ਹਿ ਕਮ੍ਮਭਵੋ ਪੁਬ੍ਬੇ ਗਹਿਤੋ.

ਤਯੋਚੋਦਨਾਰਹਵਣ੍ਣਨਾ

੫੧੩. ਅਨਿਯਮਿਤੇਨੇਵਾਤਿ ਅਨਿਯਮੇਨੇਵ ‘‘ਤ੍ਵਂ ਏਵਂਦਿਟ੍ਠਿਕੋ ਏਵਂ ਸਤ੍ਤਾਨਂ ਅਨਤ੍ਥਸ੍ਸ ਕਾਰਕੋ’’ਤਿ ਏਵਂ ਅਨੁਦ੍ਦੇਸਿਕੇਨੇਵ. ਮਾਨਨ੍ਤਿ ‘‘ਅਹਮੇਤਂ ਜਾਨਾਮਿ, ਅਹਮੇਤਂ ਪਸ੍ਸਾਮੀ’’ਤਿ ਏਵਂ ਪਣ੍ਡਿਤਮਾਨਂ. ਭਿਨ੍ਦਿਤ੍ਵਾਤਿ ਵਿਧਮੇਤ੍ਵਾ, ਜਹਾਪੇਤ੍ਵਾਤਿ ਅਤ੍ਥੋ. ਤਯੋ ਸਤ੍ਥਾਰੇਤਿ ਅਸਮ੍ਪਾਦਿਤਅਤ੍ਤਹਿਤੋ ਅਨੋਵਾਦਕਰਸਾਵਕੋ, ਅਸਮ੍ਪਾਦਿਤਅਤ੍ਤਹਿਤੋ ਓਵਾਦਕਰਸਾਵਕੋ, ਸਮ੍ਪਾਦਿਤਅਤ੍ਤਹਿਤੋ ਅਨੋਵਾਦਕਰਸਾਵਕੋਤਿ ਇਮੇ ਤਯੋ ਸਤ੍ਥਾਰੇ. ਚਤੁਤ੍ਥੋ ਪਨ ਸਮ੍ਮਾਸਮ੍ਬੁਦ੍ਧੋ ਨ ਚੋਦਨਾਰਹੋ ਹੋਤੀਤਿ ‘‘ਤੇਨ ਪੁਚ੍ਛਿਤੇ ਏਵ ਕਥੇਸ੍ਸਾਮੀ’’ਤਿ ਚੋਦਨਾਰਹੇ ਤਯੋ ਸਤ੍ਥਾਰੇ ਪਠਮਂ ਦਸ੍ਸੇਸਿ, ਪਚ੍ਛਾ ਚਤੁਤ੍ਥਂਸਤ੍ਥਾਰਂ. ਕਾਮਞ੍ਚੇਤ੍ਥ ਚਤੁਤ੍ਥੋ ਸਤ੍ਥਾ ਏਕੋ ਅਦੁਤਿਯੋ ਅਨਞ੍ਞਸਾਧਾਰਣੋ, ਤਥਾਪਿ ਸੋ ਯੇਸਂ ਉਤ੍ਤਰਿਮਨੁਸ੍ਸਧਮ੍ਮਾਨਂ ਵਸੇਨ ‘‘ਧਮ੍ਮਮਯੋ ਕਾਯੋ’’ਤਿ ਵੁਚ੍ਚਤਿ, ਤੇਸਂ ਸਮੁਦਾਯਭੂਤੋਪਿ ਤੇ ਗੁਣਾਵਯਵੇ ਸਤ੍ਥੁਟ੍ਠਾਨਿਯੇ ਕਤ੍ਵਾ ਦਸ੍ਸੇਨ੍ਤੋ ਭਗਵਾ ‘‘ਅਯਮ੍ਪਿ ਖੋ, ਲੋਹਿਚ੍ਚ, ਸਤ੍ਥਾ’’ਤਿ ਅਭਾਸਿ.

ਅਞ੍ਞਾਤਿ ਯ-ਕਾਰਲੋਪੇਨ ਨਿਦ੍ਦੇਸੋ ‘‘ਸਯਂ ਅਭਿਞ੍ਞਾ’’ਤਿ ਆਦੀਸੁ (ਦੀ. ਨਿ. ੧.੨੮, ੩੭, ੫੨; ਮ. ਨਿ. ੧.੨੮੪; ੨.੩੪੧; ਅ. ਨਿ. ੨.੫; ੧੦.੧੧; ਮਹਾਵ. ੧੧; ਧ. ਪ. ੩੫੩; ਕਥਾ. ੪੦੫) ਵਿਯ. ਅਞ੍ਞਾਯਾਤਿ ਚ ਤਦਤ੍ਥਿਯੇ ਸਮ੍ਪਦਾਨਵਚਨਨ੍ਤਿ ਆਹ ‘‘ਆਜਾਨਨਤ੍ਥਾਯਾ’’ਤਿ. ਸਾਵਕਤ੍ਤਂ ਪਟਿਜਾਨਿਤ੍ਵਾ ਠਿਤਤ੍ਤਾ ਏਕਦੇਸੇਨਸ੍ਸ ਸਾਸਨਂ ਕਰੋਨ੍ਤੀਤਿ ਆਹ ‘‘ਨਿਰਨ੍ਤਰਂ ਤਸ੍ਸ ਸਾਸਨਂ ਅਕਤ੍ਵਾ’’ਤਿ. ਉਕ੍ਕਮਿਤ੍ਵਾ ਵਤ੍ਤਨ੍ਤੀਤਿ ਯਥਿਚ੍ਛਿਤਂ ਕਰੋਨ੍ਤੀਤਿ ਅਤ੍ਥੋ. ਪਟਿਕ੍ਕਮਨ੍ਤਿਯਾਤਿ ਅਨਭਿਰਤਿਯਾ ਅਗਾਰਵੇਨ ਅਪਗਚ੍ਛਨ੍ਤਿਯਾ, ਤੇਨਾਹ ‘‘ਅਨਿਚ੍ਛਨ੍ਤਿਯਾ’’ਤਿਆਦਿ. ਏਕਾਯਾਤਿ ਏਕਾਯ ਇਤ੍ਥਿਯਾ. ਏਕੋ ਇਚ੍ਛੇਯ੍ਯਾਤਿ ਏਕੋ ਪੁਰਿਸੋ ਤਾਯ ਅਨਿਚ੍ਛਨ੍ਤਿਯਾ ਸਮ੍ਪਯੋਗਂ ਕਾਮੇਯ੍ਯ. ਓਸਕ੍ਕਨਾਦਿਮੁਖੇਨ ਇਤ੍ਥਿਪੁਰਿਸਸਮ੍ਬਨ੍ਧਨਿਦਸ੍ਸਨਂ ਗੇਹਸਿਤਅਪੇਕ੍ਖਾਵਸੇਨ ਤਸ੍ਸ ਸਤ੍ਥੁਨੋ ਸਾਵਕੇਸੁ ਪਟਿਪਤ੍ਤੀਤਿ ਦਸ੍ਸੇਤਿ. ਅਤਿਵਿਯ ਵਿਰਤ੍ਤਭਾਵਤੋ ਦਟ੍ਠੁਮ੍ਪਿ ਅਨਿਚ੍ਛਮਾਨਂ. ਲੋਭੇਨਾਤਿ ਪਰਿਵਾਰਵਸੇਨ ਉਪ੍ਪਜ੍ਜਨਕਲਾਭਸਕ੍ਕਾਰਲੋਭੇਨ. ਤਤ੍ਥ ਸਮ੍ਪਾਦੇਹੀਤਿ ਤਸ੍ਮਿਂ ਪਟਿਪਤ੍ਤਿਧਮ੍ਮੇ ਪਤਿਟ੍ਠਿਤਂ ਕਤ੍ਵਾ ਸਮ੍ਪਾਦੇਹਿ. ਉਜੁਂ ਕਰੋਹਿ ਕਾਯਵਙ੍ਕਾਦਿਵਿਗਮੇਨ.

੫੧੫. ਏਵਂ ਚੋਦਨਂ ਅਰਹਤੀਤਿ ਏਵਂ ਵੁਤ੍ਤਨਯੇਨ ਸਾਵਕੇਸੁ ਅਪ੍ਪੋਸ੍ਸੁਕ੍ਕਭਾਵਾਪਾਦਨੇ ਨਿਯੋਜਨਵਸੇਨ ਚੋਦਨਂ ਅਰਹਤਿ, ਨ ਪਠਮੋ ਵਿਯ ‘‘ਏਵਰੂਪੋ ਤਵ ਲੋਭਧਮ੍ਮੋ’’ਤਿਆਦਿਨਾ, ਨ ਚ ਦੁਤਿਯੋ ਵਿਯ ‘‘ਅਤ੍ਤਾਨਮੇਵ ਤਾਵ ਤਤ੍ਥ ਸਮ੍ਪਾਦੇਹੀ’’ਤਿਆਦਿਨਾ. ਕਸ੍ਮਾ? ਸਮ੍ਪਾਦਿਤਅਤ੍ਤਹਿਤਤਾਯ ਤਤਿਯਸ੍ਸ.

ਨਚੋਦਨਾਰਹਸਤ੍ਥੁਵਣ੍ਣਨਾ

੫੧੬. ‘‘ਨ ਚੋਦਨਾਰਹੋ’’ਤਿ ਏਤ੍ਥ ਯਸ੍ਮਾ ਚੋਦਨਾਰਹਤਾ ਨਾਮ ਸਤ੍ਥੁਵਿਪ੍ਪਟਿਪਤ੍ਤਿਯਾ ਵਾ ਸਾਵਕਵਿਪ੍ਪਟਿਪਤ੍ਤਿਯਾ ਵਾ ਉਭਯਵਿਪ੍ਪਟਿਪਤ੍ਤਿਯਾ ਵਾ, ਤਯਿਦਂ ਸਬ੍ਬਮ੍ਪਿ ਇਮਸ੍ਮਿਂ ਸਤ੍ਥਰਿ ਨਤ੍ਥਿ, ਤਸ੍ਮਾ ਨ ਚੋਦਨਾਰਹੋਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਅਯਞ੍ਹੀ’’ਤਿਆਦਿ ਵੁਤ੍ਤਂ.

੫੧੭. ਮਯਾ ਗਹਿਤਾਯ ਦਿਟ੍ਠਿਯਾਤਿ ਸਬ੍ਬਸੋ ਅਨਵਜ੍ਜੇ ਸਮ੍ਮਾਪਟਿਪਨ੍ਨੇ ਪਰੇਸਂ ਸਮ੍ਮਦੇਵ ਸਮ੍ਮਾਪਟਿਪਤ੍ਤਿਂ ਦੇਸ੍ਸੇਨ੍ਤੇ ਸਤ੍ਥਰਿ ਅਭੂਤਦੋਸਾਰੋਪਨਵਸੇਨ ਮਿਚ੍ਛਾਗਹਿਤਾਯ ਨਿਰਯਗਾਮਿਨਿਯਾ ਪਾਪਦਿਟ੍ਠਿਯਾ. ਨਰਕਪਪਾਤਨ੍ਤਿ ਨਰਕਸਙ੍ਖਾਤਂ ਮਹਾਪਪਾਤਂ. ਪਪਤਨ੍ਤਿ ਤਤ੍ਥਾਤਿ ਹਿ ਪਪਾਤੋ. ਸਗ੍ਗਮਗ੍ਗਥਲੇਤਿ ਸਗ੍ਗਗਾਮਿਮਗ੍ਗਭੂਤੇ ਪੁਞ੍ਞਧਮ੍ਮਥਲੇ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਲੋਹਿਚ੍ਚਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.