੧੦. ਸੁਭਸੁਤ੍ਤਵਣ੍ਣਨਾ

ਸੁਭਮਾਣਵਕਵਤ੍ਥੁਵਣ੍ਣਨਾ

੪੪੪. ‘‘ਅਚਿਰਪਰਿਨਿਬ੍ਬੁਤੇ’’ਤਿ ਸਤ੍ਥੁ ਪਰਿਨਿਬ੍ਬੁਤਭਾਵਸ੍ਸ ਚਿਰਕਾਲਤਾਪਟਿਕ੍ਖੇਪੇਨ ਆਸਨ੍ਨਤਾ ਦਸ੍ਸਿਤਾ, ਕਾਲਪਰਿਚ੍ਛੇਦੋ ਨ ਦਸ੍ਸਿਤੋਤਿ ਤਂ ਪਰਿਚ੍ਛੇਦਤੋ ਦਸ੍ਸੇਤੁਂ ‘‘ਪਰਿਨਿਬ੍ਬਾਨਤੋ ਉਦ੍ਧਂ ਮਾਸਮਤ੍ਤੇ ਕਾਲੇ’’ਤਿ ਵੁਤ੍ਤਂ. ਤਤ੍ਥ ਮਤ੍ਤ-ਗ੍ਗਹਣੇਨ ਕਾਲਸ੍ਸ ਅਸਮ੍ਪੁਣ੍ਣਤਂ ਜੋਤੇਤਿ. ਤੁਦਿਸਞ੍ਞਿਤੋ ਗਾਮੋ ਨਿਵਾਸੋ ਏਤਸ੍ਸਾਤਿ ਤੋਦੇਯ੍ਯੋ. ਤਂ ਪਨੇਸ ਯਸ੍ਮਾ ਸੋਣਦਣ੍ਡੋ ਵਿਯ ਚਮ੍ਪਂ, ਕੂਟਦਨ੍ਤੋ ਵਿਯ ਚ ਖਾਣੁਮਤਂ ਅਜ੍ਝਾਵਸਤਿ, ਤਸ੍ਮਾ ਵੁਤ੍ਤਂ ‘‘ਤਸ੍ਸ ਅਧਿਪਤਿਤ੍ਤਾ’’ਤਿ ਇਸ੍ਸਰਭਾਵਤੋਤਿ ਅਤ੍ਥੋ. ਸਮਾਹਾਰਨ੍ਤਿ ਸਨ੍ਨਿਚਯਂ. ਪਣ੍ਡਿਤੋ ਘਰਮਾਵਸੇਤਿ ਯਸ੍ਮਾ ਅਪ੍ਪਤਰਪ੍ਪਤਰੇਪਿ ਵਯਮਾਨੇ ਭੋਗਾ ਖਿਯਨ੍ਤਿ, ਅਪ੍ਪਤਰਪ੍ਪਤਰੇਪਿ ਸਞ੍ਚਿਯਮਾਨੇ ਵਡ੍ਢਨ੍ਤਿ, ਤਸ੍ਮਾ ਵਿਞ੍ਞੁਜਾਤਿਕੋ ਕਿਞ੍ਚਿ ਵਯਂ ਅਕਤ੍ਵਾ ਆਯਮੇਵ ਉਪ੍ਪਾਦੇਨ੍ਤੋ ਘਰਾਵਾਸਂ ਅਨੁਤਿਟ੍ਠੇਯ੍ਯਾਤਿ ਲੋਭਾਦੇਸਿਤਂ ਪਟਿਪਤ੍ਤਿਂ ਉਪਦਿਸਤਿ.

ਅਦਾਨਮੇਵ ਸਿਕ੍ਖਾਪੇਤ੍ਵਾ ਲੋਭਾਭਿਭੂਤਤਾਯ ਤਸ੍ਮਿਂਯੇਵ ਘਰੇ ਸੁਨਖੋ ਹੁਤ੍ਵਾ ਨਿਬ੍ਬਤ੍ਤਿ. ਲੋਭਵਸਿਕਸ੍ਸ ਹਿ ਦੁਗ੍ਗਤਿ ਪਾਟਿਕਙ੍ਖਾ. ਅਤਿਵਿਯ ਪਿਯਾਯਤਿ ਪੁਬ੍ਬਪਰਿਚਯੇਨ. ਪਿਣ੍ਡਾਯ ਪਾਵਿਸਿ ਸੁਭਂ ਮਾਣਵਂ ਅਨੁਗ੍ਗਣ੍ਹਿਤੁਕਾਮੋ. ਨਿਰਯੇ ਨਿਬ੍ਬਤ੍ਤਿਸ੍ਸਸਿ ਕਤੋਕਾਸਸ੍ਸ ਕਮ੍ਮਸ੍ਸ ਪਟਿਬਾਹਿਤੁਂ ਅਸਕ੍ਕੁਣੇਯ੍ਯਭਾਵਤੋ.

ਬ੍ਰਾਹ੍ਮਣਚਾਰਿਤ੍ਤਸ੍ਸ ਭਾਵਿਤਤਂ ਸਨ੍ਧਾਯ, ਤਥਾ ਪਿਤਰਂ ਉਕ੍ਕਂਸੇਨ੍ਤੋ ਚ ‘‘ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ’’ਤਿ ਆਹ. ਤਂ ਪਵਤ੍ਤਿਂ ਪੁਚ੍ਛੀਤਿ ਸੁਤਮੇਤਂ ਮਯਾ ‘‘ਮਯ੍ਹਂ ਪਿਤਾ ਸੁਨਖੋ ਹੁਤ੍ਵਾ ਨਿਬ੍ਬਤ੍ਤੋ’’ਤਿ ਤੁਮ੍ਹੇਹਿ ਵੁਤ੍ਤਂ, ਕਿਮਿਦਂ ਸਚ੍ਚਨ੍ਤਿ ਪੁਚ੍ਛਿ. ਤਥੇਵ ਵਤ੍ਵਾਤਿ ਯਥਾ ਪੁਬ੍ਬੇ ਸੁਨਖਸ੍ਸ ਵੁਤ੍ਤਂ, ਤਥੇਵ ਵਤ੍ਵਾ. ਅਵਿਸਂਵਾਦਨਤ੍ਥਨ੍ਤਿ ਸਚ੍ਚਾਪਨਤ੍ਥਂ ‘‘ਤੋਦੇਯ੍ਯਬ੍ਰਾਹ੍ਮਣੋ ਸੁਨਖੋ ਹੁਤ੍ਵਾ ਨਿਬ੍ਬਤ੍ਤੋ’’ਤਿ ਅਤ੍ਤਨੋ ਵਚਨਸ੍ਸ ਅਵਿਸਂਵਾਦਨਤ੍ਥਂ ਅਵਿਸਂਵਾਦਭਾਵਸ੍ਸ ਦਸ੍ਸਨਤ੍ਥਨ੍ਤਿ ਅਤ੍ਥੋ. ਸਬ੍ਬਂ ਦਸ੍ਸੇਸੀਤਿ ਬੁਦ੍ਧਾਨੁਭਾਵੇਨ ਸੋ ਸੁਨਖੋ ਤਂ ਸਬ੍ਬਂ ਨੇਤ੍ਵਾ ਦਸ੍ਸੇਸਿ, ਨ ਜਾਤਿਸ੍ਸਰਤਾਯ. ਭਗਵਨ੍ਤਂ ਦਿਸ੍ਵਾ ਭੁਕ੍ਕਰਣਂ ਪਨ ਪੁਰਿਮਜਾਤਿਸਿਦ੍ਧਵਾਸਨਾਵਸੇਨ. ਚੁਦ੍ਦਸ ਪਞ੍ਹੇ ਪੁਚ੍ਛਿਤ੍ਵਾਤਿ ‘‘ਦਿਸ੍ਸਨ੍ਤਿ ਹਿ ਭੋ ਗੋਤਮ ਮਨੁਸ੍ਸਾ ਅਪ੍ਪਾਯੁਕਾ, ਦਿਸ੍ਸਨ੍ਤਿ ਦੀਘਾਯੁਕਾ. ਦਿਸ੍ਸਨ੍ਤਿ ਬਵ੍ਹਾਬਾਧਾ, ਦਿਸ੍ਸਨ੍ਤਿ ਅਪ੍ਪਾਬਾਧਾ. ਦਿਸ੍ਸਨ੍ਤਿ ਦੁਬ੍ਬਣ੍ਣਾ, ਦਿਸ੍ਸਨ੍ਤਿ ਵਣ੍ਣਵਨ੍ਤੋ. ਦਿਸ੍ਸਨ੍ਤਿ ਅਪ੍ਪੇਸਕ੍ਖਾ, ਦਿਸ੍ਸਨ੍ਤਿ ਮਹੇਸਕ੍ਖਾ. ਦਿਸ੍ਸਨ੍ਤਿ ਅਪ੍ਪਭੋਗਾ, ਦਿਸ੍ਸਨ੍ਤਿ ਮਹਾਭੋਗਾ. ਦਿਸ੍ਸਨ੍ਤਿ ਨੀਚਕੁਲੀਨਾ, ਦਿਸ੍ਸਨ੍ਤਿ ਉਚ੍ਚਾਕੁਲੀਨਾ. ਦਿਸ੍ਸਨ੍ਤਿ ਦੁਪ੍ਪਞ੍ਞਾ, ਦਿਸ੍ਸਨ੍ਤਿ ਪਞ੍ਞਾਵਨ੍ਤੋ’’ਤਿ (ਮ. ਨਿ. ੩.੨੮੯). ਇਮੇ ਚੁਦ੍ਦਸ ਪਞ੍ਹੇ ਪੁਚ੍ਛਿਤ੍ਵਾ, ਅਙ੍ਗਸੁਭਤਾਯ ਕਿਰੇਸ ‘‘ਸੁਭੋ’’ਤਿ ਨਾਮਂ ਲਭਿ.

੪੪੫. ‘‘ਏਕਾ ਚ ਮੇ ਕਙ੍ਖਾ ਅਤ੍ਥੀ’’ਤਿ ਇਮਿਨਾ ਉਪਰਿ ਪੁਚ੍ਛਿਯਮਾਨਸ੍ਸ ਪਞ੍ਹਸ੍ਸ ਪਗੇਵ ਤੇਨ ਅਭਿਸਙ੍ਖਤਭਾਵਂ ਦਸ੍ਸੇਤਿ. ਵਿਸਭਾਗਵੇਦਨਾਤਿ ਦੁਕ੍ਖਵੇਦਨਾ. ਸਾ ਹਿ ਕੁਸਲਕਮ੍ਮਨਿਬ੍ਬਤ੍ਤੇ ਅਤ੍ਤਭਾਵੇ ਉਪ੍ਪਜ੍ਜਨਕਸੁਖਵੇਦਨਾਪਟਿਪਕ੍ਖਭਾਵਤੋ ‘‘ਵਿਸਭਾਗਵੇਦਨਾ’’ਤਿ. ਕਾਯਂ ਗਾਲ਼੍ਹਾ ਹੁਤ੍ਵਾ ਬਾਧਤਿ ਪੀਲ਼ੇਤੀਤਿ ‘‘ਆਬਾਧੋ’’ਤਿ ਚ ਵੁਚ੍ਚਤਿ. ਏਕਦੇਸੇ ਉਪ੍ਪਜ੍ਜਿਤ੍ਵਾਤਿ ਸਰੀਰਸ੍ਸ ਏਕਦੇਸੇ ਉਟ੍ਠਿਤਾਪਿ ਅਯਪਟ੍ਟੇਨ ਆਬਨ੍ਧਿਤ੍ਵਾ ਵਿਯ ਗਣ੍ਹਾਤਿ ਅਪਰਿਵਤ੍ਤਭਾਵਕਰਣਤੋ, ਏਤੇਨ ਬਲਵਰੋਗੋ ਆਬਾਧੋ ਨਾਮਾਤਿ ਦਸ੍ਸੇਤਿ. ਕਿਚ੍ਛਜੀਵਿਤਕਰੋਤਿ ਅਸੁਖਜੀਵਿਤਾਵਹੋ, ਏਤੇਨ ਦੁਬ੍ਬਲੋ ਅਪ੍ਪਮਤ੍ਤਕੋ ਰੋਗੋ ਆਤਙ੍ਕੋਤਿ ਦਸ੍ਸੇਤਿ. ਉਟ੍ਠਾਨਨ੍ਤਿ ਸਯਨਨਿਸਜ੍ਜਾਦਿਤੋ ਉਟ੍ਠਹਨਂ, ਤੇਨ ਯਥਾ ਤਥਾ ਅਪਰਾਪਰਂ ਸਰੀਰਸ੍ਸ ਪਰਿਵਤ੍ਤਨਂ ਵਦਤਿ. ਗਰੁਕਨ੍ਤਿ ਭਾਰਿਯਂ ਕਿਚ੍ਛਸਿਦ੍ਧਿਕਂ. ਕਾਯੇ ਬਲਂ ਨ ਹੋਤੀਤਿ ਏਤ੍ਥਾਪਿ ‘‘ਗਿਲਾਨਸ੍ਸੇਵਾ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਹੇਟ੍ਠਾ ਚਤੂਹਿ ਪਦੇਹਿ ਅਫਾਸੁਵਿਹਾਰਾਭਾਵਂ ਪੁਚ੍ਛਿਤ੍ਵਾ ਇਦਾਨਿ ਫਾਸੁਵਿਹਾਰਸਬ੍ਭਾਵਂ ਪੁਚ੍ਛਤਿ, ਤੇਨ ਸਵਿਸੇਸੋ ਫਾਸੁਵਿਹਾਰੋ ਪੁਚ੍ਛਿਤੋਤਿ ਦਟ੍ਠਬ੍ਬੋ, ਅਸਤਿਪਿ ਅਤਿਸਯਤ੍ਥਜੋਤਨੇ ਸਦ੍ਦੇ ਅਤਿਸਯਤ੍ਥਸ੍ਸ ਲਬ੍ਭਨਤੋ ਯਥਾ ‘‘ਅਭਿਰੂਪਾਯ ਦੇਯ੍ਯਂ ਦਾਤਬ੍ਬ’’ਨ੍ਤਿ.

੪੪੭. ਕਾਲਞ੍ਚ ਸਮਯਞ੍ਚ ਉਪਾਦਾਯਾਤਿ. ਏਤ੍ਥ ਕਾਲੋ ਨਾਮ ਉਪਸਙ੍ਕਮਨਸ੍ਸ ਯੁਤ੍ਤਪਤ੍ਤਕਾਲੋ. ਸਮਯੋ ਨਾਮ ਤਸ੍ਸੇਵ ਪਚ੍ਚਯਸਾਮਗ੍ਗੀ, ਅਤ੍ਥਤੋ ਤਜ੍ਜਂ ਸਰੀਰਬਲਞ੍ਚੇਵ ਤਪ੍ਪਚ੍ਚਯਪਰਿਸ੍ਸਯਾਭਾਵੋ ਚ. ਉਪਾਦਾਨਂ ਨਾਮ ਞਾਣੇਨ ਤੇਸਂ ਗਹਣਂ ਸਲ੍ਲਕ੍ਖਣਨ੍ਤਿ ਦਸ੍ਸੇਤੁਂ ‘‘ਕਾਲਞ੍ਚਾ’’ਤਿਆਦਿ ਵੁਤ੍ਤਂ. ਫਰਿਸ੍ਸਤੀਤਿ ਵਡ੍ਢਿਸ੍ਸਤਿ.

੪੪੮. ਚੇਤਿਯਰਟ੍ਠੇਤਿ ਚੇਤਿਰਟ੍ਠੇ. ਯ-ਕਾਰੇਨ ਹਿ ਪਦਂ ਵਡ੍ਢੇਤ੍ਵਾ ਵੁਤ੍ਤਂ. ਚੇਤਿਰਟ੍ਠਤੋ ਅਞ੍ਞਂ ਵਿਸੁਂਯੇਵੇਕਂ ਰਟ੍ਠਨ੍ਤਿ ਚ ਵਦਨ੍ਤਿ. ਮਰਣਪਟਿਸਂਯੁਤ੍ਤਨ੍ਤਿ ਮਰਣਂ ਨਾਮ ਤਾਦਿਸਾਨਂ ਰੋਗ ਵਸੇਨੇਵ ਹੋਤੀਤਿ ਯੇਨ ਰੋਗੇਨ ਤਂ ਜਾਤਂ, ਤਸ੍ਸ ਸਰੂਪਪੁਚ੍ਛਾ, ਕਾਰਣਪੁਚ੍ਛਾ, ਮਰਣਹੇਤੁਕਚਿਤ੍ਤਸਨ੍ਤਾਪਪੁਚ੍ਛਾ, ਤਸ੍ਸ ਚ ਸਨ੍ਤਾਪਸ੍ਸ ਸਬ੍ਬਲੋਕਸਾਧਾਰਣਤਾ, ਤਥਾ ਮਰਣਸ੍ਸ ਚ ਅਪ੍ਪਤਿਕਾਰਤਾਤਿ ਏਵਂ ਆਦਿਨਾ ਮਰਣਪਟਿਸਂਯੁਤ੍ਤਂ ਸਮ੍ਮੋਦਨੀਯਂ ਕਥਂ ਕਥੇਸੀਤਿ ਦਸ੍ਸੇਤੁਂ ‘‘ਭੋ ਆਨਨ੍ਦਾ’’ਤਿਆਦਿ ਵੁਤ੍ਤਂ. ਨ ਰਨ੍ਧਗਵੇਸੀ ਮਾਰੋ ਵਿਯ, ਨ ਵੀਮਂਸਨਾਧਿਪ੍ਪਾਯੋ ਉਤ੍ਤਰਮਾਣਵੋ ਵਿਯਾਤਿ ਅਧਿਪ੍ਪਾਯੋ. ਯੇਸੁ ਧਮ੍ਮੇਸੂਤਿ ਵਿਮੋਕ੍ਖੁਪਾਯੇਸੁ ਨਿਯ੍ਯਾਨਧਮ੍ਮੇਸੁ. ਧਰਨ੍ਤੀਤਿ ਤਿਟ੍ਠਨ੍ਤਿ, ਪਵਤ੍ਤਨ੍ਤੀਤਿ ਅਤ੍ਥੋ.

੪੪੯. ਅਤ੍ਥਪ੍ਪਯੁਤ੍ਤਤਾਯ ਸਦ੍ਦਪਯੋਗਸ੍ਸ ਸਦ੍ਦਪ੍ਪਬਨ੍ਧਲਕ੍ਖਣਾਨਿ ਤੀਣਿ ਪਿਟਕਾਨਿ ਤਦਤ੍ਥਭੂਤੇਹਿ ਸੀਲਾਦੀਹਿ ਧਮ੍ਮਕ੍ਖਨ੍ਧੇਹਿ ਸਙ੍ਗਯ੍ਹਨ੍ਤੀਤਿ ਵੁਤ੍ਤਂ ‘‘ਤੀਣਿ ਪਿਟਕਾਨਿ ਤੀਹਿ ਖਨ੍ਧੇਹਿ ਸਙ੍ਗਹੇਤ੍ਵਾ’’ਤਿ. ਸਙ੍ਖਿਤ੍ਤੇਨ ਕਥਿਤਨ੍ਤਿ ‘‘ਤਿਣ੍ਣਂ ਖਨ੍ਧਾਨ’’ਨ੍ਤਿ ਏਵਂ ਗਹਣਤੋ ਸਾਮਞ੍ਞਤੋ ਚਾਤਿ ਸਙ੍ਖੇਪੇਨੇਵ ਕਥਿਤਂ. ‘‘ਕਤਮੇਸਂ ਤਿਣ੍ਣ’’ਨ੍ਤਿ ਅਯਂ ਅਦਿਟ੍ਠਜੋਤਨਾ ਪੁਚ੍ਛਾ, ਨ ਕਥੇਤੁਕਮ੍ਯਤਾ ਪੁਚ੍ਛਾਤਿ ਵੁਤ੍ਤਂ ‘‘ਵਿਤ੍ਥਾਰਤੋ ਪੁਚ੍ਛਿਸ੍ਸਾਮੀ ‘ਤਿ ਚਿਨ੍ਤੇਤ੍ਵਾ ‘ਕਤਮੇਸਂ ਤਿਣ੍ਣ’ਨ੍ਤਿ ਆਹਾ’’ਤਿ. ਕਥੇਤੁਕਮ੍ਯਤਾਭਾਵੇ ਪਨਸ੍ਸ ਥੇਰਸ੍ਸ ਵਚਨਤਾ ਸਿਯਾ.

ਸੀਲਕ੍ਖਨ੍ਧਵਣ੍ਣਨਾ

੪੫੦-੪੫੩. ਸੀਲਕ੍ਖਨ੍ਧਸ੍ਸਾਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ, ਪਕਾਰਤ੍ਥੋ ਵਾ, ਤੇਨ ‘‘ਅਰਿਯਸ੍ਸ ਸਮਾਧਿਕ੍ਖਨ੍ਧਸ੍ਸ…ਪੇ… ਪਤਿਟ੍ਠਾਪੇਸੀ’’ਤਿ ਅਯਂ ਏਤ੍ਤਕੋ ਪਾਠੋ ਦਸ੍ਸਿਤੋਤਿ ਦਟ੍ਠਬ੍ਬਂ ਤੇਨਾਹ ‘‘ਤੇਸੁ ਦਸ੍ਸਿਤੇਸੂ’’ਤਿ, ਉਦ੍ਦੇਸਵਸੇਨਾਤਿ ਅਧਿਪ੍ਪਾਯੋ. ਭਗਵਤਾ ਵੁਤ੍ਤਨਯੇਨੇਵਾਤਿ ਸਾਮਞ੍ਞਫਲਦੇਸਨਾਦੀਸੁ ਭਗਵਤਾ ਦੇਸਿਤਨਯੇਨੇਵ, ਤੇਨਸ੍ਸ ਸੁਤ੍ਤਸ੍ਸ ਸਤ੍ਥੁਭਾਸਿਤਭਾਵਂ ਜਿਨਵਚਨਭਾਵਂ ਦਸ੍ਸੇਤਿ. ਸਾਸਨੇ ਨ ਸੀਲਮੇਵ ਸਾਰੋਤਿ ਅਰਿਯਮਗ੍ਗਸਾਰੇ ਭਗਵਤੋ ਸਾਸਨੇ ਯਥਾ ਦਸ੍ਸਿਤਂ ਸੀਲਂ ਸਾਰੋ ਏਵ ਨ ਹੋਤਿ ਸਾਰਵਤੋ ਮਹਤੋ ਰੁਕ੍ਖਸ੍ਸ ਪਪਟਿਕਟ੍ਠਾਨਿਯਤ੍ਤਾ. ਯਦਿ ਏਵਂ ਕਸ੍ਮਾ ਇਧ ਗਹਿਤਨ੍ਤਿ ਆਹ ‘‘ਕੇਵਲਞ੍ਹੇਤਂ ਪਤਿਟ੍ਠਾਮਤ੍ਤਕਮੇਵਾ’’ਤਿ. ਝਾਨਾਦਿਉਤ੍ਤਰਿਮਨੁਸ੍ਸਧਮ੍ਮੇ ਅਧਿਗਨ੍ਤੁਕਾਮਸ੍ਸ ਅਧਿਟ੍ਠਾਨਮਤ੍ਤਂ ਤਤ੍ਥ ਅਪ੍ਪਤਿਟ੍ਠਿਤਸ੍ਸ ਤੇਸਂ ਅਸਮ੍ਭਵਤੋ. ਅਥ ਵਾ ਨ ਸੀਲਮੇਵ ਸਾਰੋਤਿ ਕਾਮਞ੍ਚੇਤ੍ਥ ਸਾਸਨੇ ‘‘ਮਗ੍ਗਸੀਲਂ, ਫਲਸੀਲ’’ਨ੍ਤਿ ਇਦਂ ਲੋਕੁਤ੍ਤਰਸੀਲਮ੍ਪਿ ਸਾਰਮੇਵ, ਤਥਾਪਿ ਨ ਸੀਲਕ੍ਖਨ੍ਧੋ ਏਵ ਸਾਰੋ ਅਥ ਖੋ ਸਮਾਧਿਕ੍ਖਨ੍ਧੋਪਿ ਪਞ੍ਞਾਕ੍ਖਨ੍ਧੋਪਿ ਸਾਰੋ ਏਵਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਪੁਰਿਮੋ ਏਵ ਸਾਰੋ, ਤੇਨਾਹ ‘‘ਇਤੋ ਉਤ੍ਤਰੀ’’ਤਿਆਦਿ.

ਸਮਾਧਿਕ੍ਖਨ੍ਧਵਣ੍ਣਨਾ

੪੫੪. ਕਸ੍ਮਾ ਪਨੇਤ੍ਥ ਥੇਰੋ ਸਮਾਧਿਕ੍ਖਨ੍ਧਂ ਪੁਟ੍ਠੋ ਇਨ੍ਦ੍ਰਿਯਸਂਵਰਾਦਿਕੇ ਵਿਸ੍ਸਜ੍ਜੇਸਿ, ਨਨੁ ਏਵਂ ਸਨ੍ਤੇ ਅਞ੍ਞਂ ਪੁਟ੍ਠੋ ਅਞ੍ਞਂ ਬ੍ਯਾਕਰੋਨ੍ਤੋ ਅਮ੍ਬਂ ਪੁਟ੍ਠੋ ਲਬੁਜਂ ਬ੍ਯਾਕਰੋਨ੍ਤੋ ਵਿਯ ਹੋਤੀਤਿ ਈਦਿਸੀ ਚੋਦਨਾ ਇਧ ਅਨੋਕਾਸਾਤਿ ਦਸ੍ਸੇਨ੍ਤੋ ‘‘ਕਥਞ੍ਚ ਮਾਣਵ ਭਿਕ੍ਖੁ…ਪੇ… ਸਮਾਧਿਕ੍ਖਨ੍ਧਂ ਦਸ੍ਸੇਤੁਕਾਮੋ ਆਰਭੀ’’ਤਿ ਆਹ, ਤੇਨੇਤ੍ਥ ਇਨ੍ਦ੍ਰਿਯਸਂਵਰਾਦਯੋਪਿ ਸਮਾਧਿਉਪਕਾਰਤਂ ਉਪਾਦਾਯ ਸਮਾਧਿਕ੍ਖਨ੍ਧਪਕ੍ਖਿਕਾਨਿ ਉਦ੍ਦਿਟ੍ਠਾਨੀਤਿ ਦਸ੍ਸੇਤਿ ਰੂਪਜ੍ਝਾਨਾਨੇਵ ਆਗਤਾਨਿ, ਨ ਅਰੂਪਜ੍ਝਾਨਾਨਿ ਰੂਪਾਵਚਰਚਤੁਤ੍ਥਜ੍ਝਾਨਦੇਸਨਾਨਨ੍ਤਰਂ ਅਭਿਞ੍ਞਾਦੇਸਨਾਯ ਅਵਸਰੋਤਿ ਕਤ੍ਵਾ. ਰੂਪਾਵਚਰਚਤੁਤ੍ਥਜ੍ਝਾਨਪਾਦਿਕਾ ਹਿ ਸਪਰਿਭਣ੍ਡਾ ਛਪਿ ਅਭਿਞ੍ਞਾਯੋ. ਲੋਕਿਯਾ ਅਭਿਞ੍ਞਾ ਪਨ ਸਿਜ੍ਝਮਾਨਾ ਯਸ੍ਮਾ ਅਟ੍ਠਸੁ ਸਮਾਪਤ੍ਤੀਸੁ ਚੁਦ੍ਦਸਵਿਧੇਨ ਚਿਤ੍ਤਪਰਿਦਮਨੇਨ ਵਿਨਾ ਨ ਇਜ੍ਝਨ੍ਤਿ, ਤਸ੍ਮਾ ਅਭਿਞ੍ਞਾਸੁ ਦੇਸਿਯਮਾਨਾਸੁ ਅਰੂਪਜ੍ਝਾਨਾਨਿਪਿ ਦੇਸਿਤਾਨੇਵ ਹੋਨ੍ਤਿ ਨਾਨਨ੍ਤਰਿਯਭਾਵਤੋ, ਤੇਨਾਹ ‘‘ਆਨੇਤ੍ਵਾ ਪਨ ਦੀਪੇਤਬ੍ਬਾਨੀ’’ਤਿ. ਵੁਤ੍ਤਨਯੇਨ ਦੇਸਿਤਾਨੇਵ ਕਤ੍ਵਾ ਸਂਵਣ੍ਣਕੇਹਿ ਪਕਾਸੇਤਬ੍ਬਾਨੀਤਿ ਅਤ੍ਥੋ. ਅਟ੍ਠਕਥਾਯਂ ਪਨ ‘‘ਚਤੁਤ੍ਥਜ੍ਝਾਨਂ ਉਪਸਮ੍ਪਜ੍ਜ ਵਿਹਰਤੀ’’ਤਿ ਇਮਿਨਾਵ ਅਰੂਪਜ੍ਝਾਨਮ੍ਪਿ ਸਙ੍ਗਹਿਤਨ੍ਤਿ ਦਸ੍ਸੇਤੁਂ ‘‘ਚਤੁਤ੍ਥਜ੍ਝਾਨੇਨ ਹੀ’’ਤਿਆਦਿ ਵੁਤ੍ਤਂ. ਚਤੁਤ੍ਥਜ੍ਝਾਨਞ੍ਹਿ ਰੂਪਵਿਰਾਗਭਾਵਨਾਵਸੇਨ ਪਵਤ੍ਤਂ ‘‘ਅਰੂਪਜ੍ਝਾਨ’’ਨ੍ਤਿ ਵੁਚ੍ਚਤੀਤਿ.

੪੭੧-੪੮੦. ਨ ਚਿਤ੍ਤੇਕਗ੍ਗਤਾਮਤ੍ਤਕੇਨੇਵਾਤਿ ਏਤ੍ਥ ਹੇਟ੍ਠਾ ਵੁਤ੍ਤਨਯਾਨੁਸਾਰੇਨ ਅਤ੍ਥੋ ਵੇਦਿਤਬ੍ਬੋ. ਲੋਕਿਯਸ੍ਸ ਸਮਾਧਿਕ੍ਖਨ੍ਧਸ੍ਸ ਅਧਿਪ੍ਪੇਤਤ੍ਤਾ ‘‘ਨ ਚਿਤ੍ਤੇ…ਪੇ… ਅਤ੍ਥੀ’’ਤਿ ਵੁਤ੍ਤਂ. ਅਰਿਯ-ਸਦ੍ਦੋ ਚੇਤ੍ਥ ਸੁਦ੍ਧਪਰਿਯਾਯੋ, ਨ ਲੋਕੁਤ੍ਤਰਪਰਿਯਾਯੋ. ਤਥਾ ਹੇਟ੍ਠਾਪਿ ਲੋਕਿਯਾਭਿਞ੍ਞਾਪਟਿਸਮ੍ਭਿਦਾਹਿ ਵਿਨਾਵ ਅਰਹਤ੍ਤੇ ਅਧਿਗਤੇ ਨਤ੍ਥੇਵ ਉਤ੍ਤਰਿਂਕਰਣੀਯਨ੍ਤਿ ਸਕ੍ਕਾ ਵਤ੍ਤੁਂ ਯਦਤ੍ਥਂ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤਿ, ਤਸ੍ਸ ਸਿਦ੍ਧਤ੍ਤਾ. ਇਧ ਪਨ ਲੋਕਿਯਾਭਿਞ੍ਞਾਪਿ ਆਗਤਾ ਏਵ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਸੁਭਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ.