੩. ਪਞ੍ਹਪੁਚ੍ਛਕਵਣ੍ਣਨਾ

ਨਨੁ ਚ ਚਤ੍ਤਾਰੋਪਿ ਅਧਿਪਤਯੋ ਏਕਕ੍ਖਣੇ ਲਬ੍ਭਨ੍ਤਿ, ਅਞ੍ਞਮਞ੍ਞਸ੍ਸ ਪਨ ਅਧਿਪਤਯੋ ਨ ਭਵਨ੍ਤਿ ‘‘ਚਤ੍ਤਾਰੋ ਇਦ੍ਧਿਪਾਦਾ ਨ ਮਗ੍ਗਾਧਿਪਤਿਨੋ’’ਤਿ ਵੁਤ੍ਤਤ੍ਤਾ. ਰਾਜਪੁਤ੍ਤੋਪਮਾਪਿ ਹਿ ਏਤਮਤ੍ਥਂ ਦੀਪੇਤੀਤਿ? ਨ, ਏਕਕ੍ਖਣੇ ਦੁਤਿਯਸ੍ਸ ਅਧਿਪਤਿਨੋ ਅਭਾਵਤੋ ਏਵ, ‘‘ਨ ਮਗ੍ਗਾਧਿਪਤਿਨੋ’’ਤਿ ਵੁਤ੍ਤਤ੍ਤਾ ਰਾਜਪੁਤ੍ਤੋਪਮਾ ਅਧਿਪਤਿਂ ਨ ਕਰੋਨ੍ਤੀਤਿ ਇਮਮੇਵਤ੍ਥਂ ਦੀਪੇਤਿ, ਨ ਅਧਿਪਤੀਨਂ ਸਹਭਾਵਂ. ਤਂ ਕਥਂ ਜਾਨਿਤਬ੍ਬਨ੍ਤਿ? ਪਟਿਕ੍ਖਿਤ੍ਤਤ੍ਤਾ. ਅਧਿਪਤਿਪਚ੍ਚਯਨਿਦ੍ਦੇਸੇ ਹਿ ਅਟ੍ਠਕਥਾਯਂ (ਪਟ੍ਠਾ. ਅਟ੍ਠ. ੧.੩) ਵੁਤ੍ਤਾ ‘‘ਕਸ੍ਮਾ ਪਨ ਯਥਾ ਹੇਤੁਪਚ੍ਚਯਨਿਦ੍ਦੇਸੇ ‘ਹੇਤੂ ਹੇਤੁਸਮ੍ਪਯੁਤ੍ਤਕਾਨ’ਨ੍ਤਿ ਵੁਤ੍ਤਂ, ਏਵਮਿਧ ‘ਅਧਿਪਤੀ ਅਧਿਪਤਿਸਮ੍ਪਯੁਤ੍ਤਕਾਨ’ਨ੍ਤਿ ਅਵਤ੍ਵਾ ‘ਛਨ੍ਦਾਧਿਪਤਿ ਛਨ੍ਦਸਮ੍ਪਯੁਤ੍ਤਕਾਨ’ਨ੍ਤਿਆਦਿਨਾ ਨਯੇਨ ਦੇਸਨਾ ਕਤਾਤਿ? ਏਕਕ੍ਖਣੇ ਅਭਾਵਤੋ’’ਤਿ. ਸਤਿ ਚ ਚਤੁਨ੍ਨਂ ਅਧਿਪਤੀਨਂ ਸਹਭਾਵੇ ‘‘ਅਰਿਯਮਗ੍ਗਸਮਙ੍ਗਿਸ੍ਸ ਵੀਮਂਸਾਧਿਪਤੇਯ੍ਯਂ ਮਗ੍ਗਂ ਭਾਵੇਨ੍ਤਸ੍ਸਾ’’ਤਿ ਵਿਸੇਸਨਂ ਨ ਕਤ੍ਤਬ੍ਬਂ ਸਿਯਾ ਅਵੀਮਂਸਾਧਿਪਤਿਕਸ੍ਸ ਮਗ੍ਗਸ੍ਸ ਅਭਾਵਾ. ਛਨ੍ਦਾਦੀਨਂ ਅਞ੍ਞਮਞ੍ਞਾਧਿਪਤਿਕਰਣਭਾਵੇ ਚ ‘‘ਵੀਮਂਸਂ ਠਪੇਤ੍ਵਾ ਤਂਸਮ੍ਪਯੁਤ੍ਤੋ’’ਤਿਆਦਿਨਾ ਛਨ੍ਦਾਦੀਨਂ ਵੀਮਂਸਾਧਿਪਤਿਕਤ੍ਤਵਚਨਂ ਨ ਵਤ੍ਤਬ੍ਬਂ ਸਿਯਾ. ਤਥਾ ‘‘ਚਤ੍ਤਾਰੋ ਅਰਿਯਮਗ੍ਗਾ ਸਿਯਾ ਮਗ੍ਗਾਧਿਪਤਿਨੋ, ਸਿਯਾ ਨ ਵਤ੍ਤਬ੍ਬਾ ਮਗ੍ਗਾਧਿਪਤਿਨੋ’’ਤਿ (ਧ. ਸ. ੧੪੨੯) ਏਵਮਾਦੀਹਿਪਿ ਅਧਿਪਤੀਨਂ ਸਹਭਾਵੋ ਪਟਿਕ੍ਖਿਤ੍ਤੋ ਏਵਾਤਿ.

ਪਞ੍ਹਪੁਚ੍ਛਕਵਣ੍ਣਨਾ ਨਿਟ੍ਠਿਤਾ.

ਇਦ੍ਧਿਪਾਦਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.