੯. ਇਦ੍ਧਿਪਾਦਵਿਭਙ੍ਗੋ

੧. ਸੁਤ੍ਤਨ੍ਤਭਾਜਨੀਯਵਣ੍ਣਨਾ

੪੩੧. ਪਠਮੋ ਕਤ੍ਤੁਅਤ੍ਥੋ ‘‘ਇਜ੍ਝਤੀਤਿ ਇਦ੍ਧੀ’’ਤਿ. ਦੁਤਿਯੋ ਕਰਣਤ੍ਥੋ ‘‘ਇਜ੍ਝਨ੍ਤਿ ਏਤਾਯਾ’’ਤਿ. ਪਜ੍ਜਿਤਬ੍ਬਾ ਇਦ੍ਧਿ ਵੁਤ੍ਤਾ ‘‘ਇਦ੍ਧਿਂ ਪਜ੍ਜਨ੍ਤਿ ਪਾਪੁਣਨ੍ਤੀ’’ਤਿ ਕਤ੍ਤੁਸਾਧਨਸ੍ਸ ਇਦ੍ਧਿਸਦ੍ਦਸ੍ਸ ਕਰਣਸਾਧਨੇਨ ਪਾਦਸਦ੍ਦੇਨ ਸਮਾਨਾਧਿਕਰਣਤਾਯ ਅਸਮ੍ਭਵਤੋ, ਇਜ੍ਝਨਕਸ੍ਸ ਚ ਅਤ੍ਥਸ੍ਸ ਕਰਣਭੂਤੇਨ ਪਾਦੇਨ ਪਜ੍ਜਿਤਬ੍ਬਤ੍ਤਾ ‘‘ਇਦ੍ਧਿ ਏਵ ਪਾਦੋ’’ਤਿ ਸਦ੍ਦਯੋਜਨਾ ਨ ਸਮ੍ਭਵਤੀਤਿ ਇਮਮਤ੍ਥਮਾਹ ‘‘ਨ ਚ…ਪੇ… ਵਤ੍ਤੁ’’ਨ੍ਤਿ. ਇਦ੍ਧਿਕਿਰਿਯਾਕਰਣੇਨਾਤਿ ਇਜ੍ਝਨਕਿਰਿਯਾਯ ਕਰਣਭੂਤੇਨ ਅਤ੍ਥੇਨ ਸਾਧੇਤਬ੍ਬਾ ਚ ਇਦ੍ਧਿ ਪਜ੍ਜਿਤਬ੍ਬਾਤਿ ਯੋਜਨਾ. ਦ੍ਵਿਨ੍ਨਂ ਕਰਣਾਨਨ੍ਤਿ ਇਜ੍ਝਨਪਜ੍ਜਨਕਿਰਿਯਾਕਰਣਾਨਂ ਇਦ੍ਧਿਪਾਦਤ੍ਥਾਨਂ. ਨ ਅਸਮਾਨਾਧਿਕਰਣਤਾ ਸਮ੍ਭਵਤਿ ਪਟਿਸੇਧਦ੍ਵਯਂ ਪਕਤਿਯਂ ਠਪੇਤੀਤਿ. ਤਸ੍ਮਾਤਿ ਯਸ੍ਮਾ ਪਠਮੇਨਤ੍ਥੇਨ ਸਮਾਨਾਧਿਕਰਣਸਮਾਸੋ, ਦੁਤਿਯੇਨ ਸਾਮਿਵਚਨਸਮਾਸੋ ਇਦ੍ਧਿਪਾਦਸਦ੍ਦਾਨਂ ਨ ਯੁਜ੍ਜਤਿ, ਤਸ੍ਮਾ. ਯਥਾਵੁਤ੍ਤਾ ਵਾ ਪਠਮੇਨਤ੍ਥੇਨ ਸਮਾਨਾਧਿਕਰਣਸਮਾਸਵਸੇਨੇਵ ਯੋਜਨਾ ਯੁਜ੍ਜਤਿ ਪਾਦਸ੍ਸ ਪਜ੍ਜਮਾਨਕੋਟ੍ਠਾਸਭਾਵਤੋ. ਦੁਤਿਯੇਨਤ੍ਥੇਨ ਇਤਰਸਮਾਸੇਨੇਵ ਯੋਜਨਾ ਯੁਜ੍ਜਤਿ ਪਾਦਸ੍ਸ ਇਜ੍ਝਨਕਰਣੂਪਾਯਭਾਵਤੋ.

ਕੇਚੀਤਿ ਧਮ੍ਮਸਿਰਿਤ੍ਥੇਰਂ ਸਨ੍ਧਾਯ ਵਦਤਿ. ਦੁਵਿਧਤ੍ਥਾਯਾਤਿ ਨਿਬ੍ਬਤ੍ਤਿਅਤ੍ਥਾਯ, ਵੁਦ੍ਧਿਅਤ੍ਥਾਯ ਚ. ਵਿਸੁਨ੍ਤਿ ‘‘ਇਦ੍ਧਿ ਏਵ ਪਾਦੋ ਇਦ੍ਧਿਪਾਦੋ’’ਤਿ ਇਮਸ੍ਮਾ ਵਿਸੁਂ. ਸਮਾਸਯੋਜਨਾਵਸੇਨਾਤਿ ‘‘ਇਦ੍ਧਿਯਾ ਪਾਦੋ ਇਦ੍ਧਿਪਾਦੋ’’ਤਿ ਏਵਂ ਸਮਾਸਯੋਜਨਾਵਸੇਨ. ਯਥਾਯੁਤ੍ਤੋਤਿ ਕਤ੍ਤੁਕਰਣਤ੍ਥੇਸੁ ਯੋ ਯੋ ਯੁਤ੍ਤੋ. ਪਟਿਲਾਭਪੁਬ੍ਬਭਾਗਾਨਨ੍ਤਿ ਵਿਸੇਸਾਧਿਗਮਤਂਪੁਬ੍ਬਭਾਗਾਨਂ ਯਥਾਕ੍ਕਮਂ ਕਤ੍ਤਿਦ੍ਧਿਕਰਣਿਦ੍ਧਿਭਾਵਂ ਸਨ੍ਧਾਯ ਵੁਤ੍ਤੋਤਿ ਯੋਜਨਾ. ਉਤ੍ਤਰਚੂਲ਼ਭਾਜਨੀਯੇ ‘‘ਛਨ੍ਦੋਯੇਵ ਛਨ੍ਦਿਦ੍ਧਿਪਾਦੋ, ਚਿਤ੍ਤਮੇਵ, ਵੀਰਿਯਮੇਵ, ਵੀਮਂਸਾਵ ਵੀਮਂਸਿਦ੍ਧਿਪਾਦੋ’’ਤਿ ਵੁਤ੍ਤਤ੍ਤਾ ਆਹ ‘‘ਉਤ੍ਤਰਚੂਲ਼ਭਾਜਨੀਯੇ ਵਾ ਵੁਤ੍ਤੇਹਿ ਛਨ੍ਦਾਦੀਹਿ ਇਦ੍ਧਿਪਾਦੇਹੀ’’ਤਿਆਦਿ.

ਛਨ੍ਦਚਿਤ੍ਤਵੀਮਂਸਿਦ੍ਧਿਪਾਦੇਸੁ ਤਾਵ ਯੁਤ੍ਤਂ ਪਧਾਨਸਙ੍ਖਾਰਗ੍ਗਹਣਂ ਅਪੁਬ੍ਬਤ੍ਤਾ, ਵੀਰਿਯਿਦ੍ਧਿਪਾਦੇ ਪਨ ਕਥਨ੍ਤਿ ਚੋਦਨਂ ਸਨ੍ਧਾਯਾਹ ‘‘ਵੀਰਿਯਿਦ੍ਧਿਪਾਦਨਿਦ੍ਦੇਸੇ’’ਤਿਆਦਿ. ਯਦਿ ਦ੍ਵੇਯੇਵ ਸਮਨ੍ਨਾਗਮਙ੍ਗਾਨਿ, ਛਨ੍ਦਾਦਯੋ ਕਿਮਤ੍ਥਿਯਾਤਿ ਆਹ ‘‘ਸਮਾਧਿਵਿਸੇਸਨਾਨੀ’’ਤਿ. ਨ ਇਧ…ਪੇ… ਵੁਤ੍ਤਾ ਹੋਤਿ ਅਤਬ੍ਬਿਸੇਸਨਤ੍ਤਾ. ਯਦਿਪਿ ਸਮਾਧਿਵਿਸੇਸਨਸਮਨ੍ਨਾਗਮਙ੍ਗਦਸ੍ਸਨਤ੍ਥਂ ਦ੍ਵਿਕ੍ਖਤ੍ਤੁਂ ਵੀਰਿਯਂ ਆਗਤਨ੍ਤਿ ਵੁਤ੍ਤਂ, ਤਂ ਪਨ ‘‘ਵੀਰਿਯਸਮਾਧਿਸਮਨ੍ਨਾਗਤ’’ਨ੍ਤਿ ਏਤ੍ਤਾਵਤਾਪਿ ਸਿਦ੍ਧਂ ਹੋਤਿ. ਏਵਂ ਸਿਦ੍ਧੇ ਸਤਿ ਪੁਨ ਵਚਨਂ ਵੀਰਿਯਨ੍ਤਰਸਬ੍ਭਾਵਂ ਨੁ ਖੋ ਦੀਪੇਤੀਤਿ ਕਦਾਚਿ ਆਸਙ੍ਕੇਯ੍ਯਾਤਿ ਤਦਾਸਙ੍ਕਾਨਿਵਤ੍ਤਨਤ੍ਥਂ ‘‘ਵੀਰਿਯਞ੍ਚਾ’’ਤਿਆਦਿਮਾਹ. ਛਨ੍ਦਾਦੀਹਿ ਵਿਸਿਟ੍ਠੋਤਿ ਛਨ੍ਦਾਦੀਨਂ ਅਧਿਪਤਿਪਚ੍ਚਯਤਾਵਿਸੇਸੇਨ ਵਿਸਿਟ੍ਠੋ. ਤੇਨੇਵ ਹਿ ਛਨ੍ਦਾਦਿਮੁਖੇਨੇਵ ਇਦ੍ਧਿਪਾਦਾ ਦੇਸਿਤਾ. ਤਥਾ ਚ ਵੁਤ੍ਤਂ ‘‘ਛਨ੍ਦਂ ਚੇ ਭਿਕ੍ਖੁ ਅਧਿਪਤਿਂ ਕਰਿਤ੍ਵਾ ਲਭਤਿ ਸਮਾਧਿ’’ਨ੍ਤਿਆਦਿ. ਤਂਤਂਅਵਸ੍ਸਯਨਵਸੇਨਾਤਿ ਤਸ੍ਸ ਤਸ੍ਸ ਛਨ੍ਦਸ੍ਸ ਸਮਾਧਿਨੋ ਅਵਸ੍ਸਯਤਾਵਸੇਨ, ਪਚ੍ਚਯਵਿਸੇਸਤਾਯਾਤਿ ਅਤ੍ਥੋ. ਉਪਾਯਤ੍ਥੇਨ…ਪੇ… ਵੁਤ੍ਤਾ ਹੋਤਿ ਅਧਿਗਮੂਪਾਯਤਾਪਿ ਨਿਸ੍ਸਯਭਾਵੋਯੇਵਾਤਿ. ‘‘ਤੇਨੇਵਾ’’ਤਿਆਦਿਨਾ ਯਥਾਵੁਤ੍ਤਂ ਛਨ੍ਦਾਦੀਨਂ ਇਦ੍ਧਿਪਾਦਤਂ ਪਾਲ਼ਿਯਾਯੇਵ ਵਿਭਾਵੇਤਿ. ਤਤ੍ਥ ਤੇਨੇਵਾਤਿ ਛਨ੍ਦਾਦੀਨਂਯੇਵ ਉਪਾਯਤ੍ਥਭਾਵੇਨੇਵ ਇਦ੍ਧਿਪਾਦਭਾਵਸ੍ਸ ਅਧਿਪ੍ਪੇਤਤ੍ਤਾ. ਉਪਾਯਿਦ੍ਧਿਪਾਦਦਸ੍ਸਨਤ੍ਥਮੇਵਾਤਿ ਛਨ੍ਦਾਦਿਕੇ ਧੁਰੇ ਜੇਟ੍ਠਕੇ ਪੁਬ੍ਬਙ੍ਗਮੇ ਕਤ੍ਵਾ ਨਿਬ੍ਬਤ੍ਤਿਤਸਮਾਧਿ ਛਨ੍ਦਾਦੀਨਂ ਇਦ੍ਧਿਯਾ ਅਧਿਗਮੂਪਾਯਤਾਦਸ੍ਸਨਂ ਉਪਾਯਿਦ੍ਧਿਪਾਦਦਸ੍ਸਨਂ, ਤਦਤ੍ਥਮੇਵ ‘‘ਤਥਾਭੂਤਸ੍ਸ ਵੇਦਨਾਕ੍ਖਨ੍ਧੋ…ਪੇ… ਵਿਞ੍ਞਾਣਕ੍ਖਨ੍ਧੋ’’ਤਿ ਤਤ੍ਥ ਤਤ੍ਥ ਪਾਲ਼ਿਯਂ ਨਿਸ੍ਸਯਿਦ੍ਧਿਪਾਦਦਸ੍ਸਨਂ ਕਤਂ ਛਨ੍ਦਾਦਿਵਿਸਿਟ੍ਠਾਨਂਯੇਵ ਵੇਦਨਾਕ੍ਖਨ੍ਧਾਦੀਨਂ ਅਧਿਪ੍ਪੇਤਤ੍ਤਾ. ਏਵਞ੍ਚੇਤਂ ਸਮ੍ਪਟਿਚ੍ਛਿਤਬ੍ਬਂ. ਅਞ੍ਞਥਾ ਕੇਵਲਂ ਇਦ੍ਧਿਸਮ੍ਪਯੁਤ੍ਤਾਨਂਯੇਵ ਖਨ੍ਧਾਨਂ ਵਸੇਨ ਇਦ੍ਧਿਪਾਦਭਾਵੇ ਗਯ੍ਹਮਾਨੇ ਚਤੁਬ੍ਬਿਧਤਾ ਨ ਹੋਤਿ ਵਿਸੇਸਕਾਰਣਾਭਾਵਤੋਤਿ ਅਧਿਪ੍ਪਾਯੋ.

੪੩੩. ਤੋਸਨਂ ਸਤ੍ਥੁ ਆਰਾਧਨਂ, ਸਿਕ੍ਖਾਯ ਵਾ. ਥਾਮਭਾਵਤੋਤਿ ਥਿਰਭਾਵਤੋ. ਕੁਲਾਪਦੇਸੇ ਜਾਤਿਮਾ ਪੁਰਿਸ੍ਸਰੋ ਹੋਤੀਤਿ ‘‘ਪੁਬ੍ਬਙ੍ਗਮਤ੍ਤਾ ਚਿਤ੍ਤਸ੍ਸ ਵਿਸਿਟ੍ਠਜਾਤਿਸਦਿਸਤਾ’’ਤਿ ਵੁਤ੍ਤਂ. ਵਿਚਾਰਣਾਪਞ੍ਞਾਹੇਤੁਕਤ੍ਤਾ ਮਨ੍ਤਸ੍ਸ ਵੀਮਂਸਾਸਦਿਸਤਾ ਸੁਵਿਞ੍ਞੇਯ੍ਯਾਵਾਤਿ ਨ ਉਦ੍ਧਟਾ.

ਛਨ੍ਦਾਦਿਕੇਤਿ ਛਨ੍ਦਸਮਾਧਿਪਧਾਨਸਙ੍ਖਾਰਾ, ਵੀਰਿਯਚਿਤ੍ਤਵੀਮਂਸਾਸਮਾਧਿਪਧਾਨਸਙ੍ਖਾਰਾਤਿ ਇਮੇ ਤਯੋ ਤਯੋ ਧਮ੍ਮੇ. ਅਭੇਦਤੋ ਭੇਦਂ ਅਕਤ੍ਵਾ ਅਭਿਨ੍ਦਿਤ੍ਵਾ ਇਦ੍ਧਿਭਾਵਸਾਮਞ੍ਞੇਨ, ਇਦ੍ਧਿਪਾਦਭਾਵਸਾਮਞ੍ਞੇਨ ਚ ਸਙ੍ਗਣ੍ਹਿਤ੍ਵਾ. ਤੇਨਾਹ ‘‘ਸਮ੍ਪਿਣ੍ਡੇਤ੍ਵਾ’’ਤਿ. ਭੇਦਨਂ ਵਾ ਸਮ੍ਭੇਦਨਂ ਮਿਸ੍ਸੀਕਰਣਨ੍ਤਿ ਆਹ ‘‘ਅਮਿਸ੍ਸੇਤ੍ਵਾ’’ਤਿ. ਤਥਾ ਹਿ ‘‘ਸੇਸਾ ਪਨ ਸਮ੍ਪਯੁਤ੍ਤਕਾ ਚਤ੍ਤਾਰੋ ਖਨ੍ਧਾ ਇਦ੍ਧਿਪਾਦਾਯੇਵਾ’’ਤਿ (ਵਿਭ. ਅਟ੍ਠ. ੪੩੩) ਇਦ੍ਧਿਇਦ੍ਧਿਪਾਦੇ ਅਮਿਸ੍ਸੇਤ੍ਵਾਪਿ ਕਥਿਤਂ. ਵਿਸੇਸੇਨਾਤਿ ਭੇਦੇਨ ਚਤੂਸੁ ਇਦ੍ਧਿਪਾਦੇਸੁ ਅਸਮ੍ਮਿਸ੍ਸਭਾਵੇਨ ਆਵੇਣਿਕਤ੍ਤਾ. ਆਵੇਣਿਕਾ ਹਿ ਛਨ੍ਦਾਦਯੋ ਤਸ੍ਸ ਤਸ੍ਸ ਇਦ੍ਧਿਪਾਦਸ੍ਸ. ਅਵਿਸੇਸੇਨਾਤਿ ਅਭੇਦੇਨ, ਚਤੁਰਿਦ੍ਧਿਪਾਦਸਾਧਾਰਣਭਾਵੇਨਾਤਿ ਅਤ੍ਥੋ.

ਛਨ੍ਦਿਦ੍ਧਿਪਾਦਸਮਾਧਿਦ੍ਧਿਪਾਦਾਦਯੋਤਿ ਆਦਿ-ਸਦ੍ਦੇਨ ਪਧਾਨਸਙ੍ਖਾਰਂ, ਵੀਰਿਯਚਿਤ੍ਤਵੀਮਂਸਾ ਚ ਸਙ੍ਗਣ੍ਹਾਤਿ. ਪਾਦੋਤਿ ਤੇਹਿ ਸਮ੍ਪਯੁਤ੍ਤਂ ਚਤੁਕ੍ਖਨ੍ਧਮਾਹ. ‘‘ਛਨ੍ਦਿਦ੍ਧਿਪਾਦੇ ਪਵਿਸਨ੍ਤੀ’’ਤਿਆਦਿਨਾ ਵਿਸਿਟ੍ਠੇਸ੍ਵੇਵ ਪਵੇਸਂ ਅਵਤ੍ਵਾ. ਚਤੂਸੂਤਿ ਛਨ੍ਦੋ, ਸਮਾਧਿ, ਪਧਾਨਸਙ੍ਖਾਰਾ, ਤਂਸਮ੍ਪਯੁਤ੍ਤਾ ਖਨ੍ਧਾਤਿ ਏਵਂ ਚਤੂਸੁ. ਛਨ੍ਦਹੇਤੁਕੋ, ਛਨ੍ਦਾਧਿਕੋ ਵਾ ਸਮਾਧਿ ਅਧਿਪ੍ਪੇਤੋਤਿ ਆਹ ‘‘ਛਨ੍ਦਵਤੋ ਕੋ ਸਮਾਧਿ ਨ ਇਜ੍ਝਿਸ੍ਸਤੀ’’ਤਿ. ਇਤੀਤਿ ਏਵਂ ਅਨੇਨ ਪਕਾਰੇਨ, ਯਂ ਸਮਾਧਿਭਾਵਨਾਮੁਖਂ. ਸਮਾਧਿਭਾਵਨਾਨੁਯੋਗੇਨ ਭਾਵਿਤਾ ਖਨ੍ਧਾ ਸਮਾਧਿਭਾਵਿਤਾ.

‘‘ਯੇ ਹੀ’’ਤਿਆਦਿਨਾ ‘‘ਅਭਿਨਵਂ ਨਤ੍ਥੀ’’ਤਿ ਸਙ੍ਖੇਪਤੋ ਵੁਤ੍ਤਂ ਵਿਵਰਤਿ. ਤਿਣ੍ਣਨ੍ਤਿ ਛਨ੍ਦਸਮਾਧਿਪਧਾਨਸਙ੍ਖਾਰਾਨਂ. ਇਦਨ੍ਤਿ ‘‘ਇਮੇ ਹਿ ਤਯੋ’’ਤਿਆਦਿਵਚਨਂ. ਪੁਰਿਮਸ੍ਸਾਤਿ ‘‘ਛਨ੍ਦੋ ਸਮਾਧੀ’’ਤਿਆਦਿਵਚਨਸ੍ਸ. ਕਾਰਣਭਾਵੇਨਾਤਿ ਸਾਧਨਭਾਵੇਨ. ਤੇਨਾਤਿ ‘‘ਇਮੇ ਹਿ ਤਯੋ ਧਮ੍ਮਾ’’ਤਿਆਦਿਵਚਨੇਨ. ਯਸ੍ਮਾ ਛਨ੍ਦਾਦਯੋ ਤਯੋ ਧਮ੍ਮਾ ਅਞ੍ਞਮਞ੍ਞਂ, ਸਮ੍ਪਯੁਤ੍ਤਕਾਨਞ੍ਚ ਨਿਸ੍ਸਯਭਾਵੇਨ ਪਵਤ੍ਤਨ੍ਤਿ, ਤਸ੍ਮਾ ਤੇਸਮ੍ਪਿ ਇਦ੍ਧਿਪਾਦਭਾਵੋ ਵੁਤ੍ਤੋ. ਸੋ ਪਨ ਨਿਸ੍ਸਯਭਾਵੋ ਸਮ੍ਪਯੋਗਾਵਿਨਾਭਾਵੀਤਿ ਆਹ ‘‘ਤਦਨ੍ਤੋਗਧਤ੍ਤਾ’’ਤਿ, ਸਮ੍ਪਯੁਤ੍ਤਕਨ੍ਤੋਗਧਤ੍ਤਾਤਿ ਅਤ੍ਥੋ. ਛਨ੍ਦਾਦੀਨਂ ਵਿਯ ਸਮ੍ਪਯੁਤ੍ਤਕ੍ਖਨ੍ਧਾਨਂ ਸਭਾਵਤੋ ਇਦ੍ਧਿਭਾਵੋ ਨਤ੍ਥੀਤਿ ਆਹ ‘‘ਇਦ੍ਧਿਭਾਵਪਰਿਯਾਯੋ ਅਤ੍ਥੀ’’ਤਿ. ਤੇਨ ਵੁਤ੍ਤਂ ‘‘ਸੇਸਾ ਸਮ੍ਪਯੁਤ੍ਤਕਾ…ਪੇ… ਨ ਅਤ੍ਤਨੋ ਸਭਾਵੇਨਾ’’ਤਿ. ਏਕਦੇਸਸ੍ਸਾਤਿ ਛਨ੍ਦਾਦੀਨਂ. ਚਤੁਨ੍ਨਮ੍ਪਿ ਖਨ੍ਧਾਨਂ, ਛਨ੍ਦਾਦੀਨਂ ਵਾ ਚਤੁਨ੍ਨਂ. ਪੁਨਪੀਤਿ ‘‘ਸਮ੍ਪਯੁਤ੍ਤਕਾ ਪਨਾ’’ਤਿਆਦਿਂ ਸਨ੍ਧਾਯਾਹ. ਇਮਿਨਾ ਚਤੁਕ੍ਖਨ੍ਧਤਦੇਕਦੇਸਾਨਂ ਇਦ੍ਧਿਭਾਵਦੀਪਨੇਨ.

ਪੁਬ੍ਬੇ ਵੁਤ੍ਤਤੋ ਵਚਨਕ੍ਕਮੇਨ ਅਞ੍ਞਨ੍ਤਿ ਆਹ ‘‘ਅਪੁਬ੍ਬਨ੍ਤਿ ਕਤ੍ਵਾ’’ਤਿ. ਕੇਨਟ੍ਠੇਨ ਇਦ੍ਧਿ ਪਟਿਲਾਭੋ, ਕੇਨਟ੍ਠੇਨ ਪਾਦੋ ਪੁਬ੍ਬਭਾਗੋਤਿ ਯਥਾਕ੍ਕਮਂ ਯੋਜਨਾ. ਯਦਿ ਪਤਿਟ੍ਠਾਨਟ੍ਠੇਨ ਪਾਦੋ, ਨਿਸ੍ਸਯਿਦ੍ਧਿਪਾਦੋਯੇਵ ਵੁਤ੍ਤੋ ਸਿਯਾ, ਨ ਉਪਾਯਿਦ੍ਧਿਪਾਦੋਤਿ ਆਹ ‘‘ਉਪਾਯੋ ਚਾ’’ਤਿਆਦਿ. ਸਬ੍ਬਤ੍ਥਾਤਿ ਸੁਤ੍ਤਨ੍ਤਭਾਜਨੀਯੇ, ਅਭਿਧਮ੍ਮਭਾਜਨੀਯੇ ਚ. ਤੇਨਾਹ ‘‘ਸੁਤ੍ਤਨ੍ਤਭਾਜਨੀਯੇ ਹੀ’’ਤਿਆਦਿ. ਸਮਾਧਿਵਿਸੇਸਨਭਾਵੇਨਾਤਿ ‘‘ਛਨ੍ਦਾਧਿਪਤਿ, ਛਨ੍ਦਹੇਤੁਕੋ, ਛਨ੍ਦਾਧਿਕੋ ਵਾ ਸਮਾਧਿ ਛਨ੍ਦਸਮਾਧੀ’’ਤਿਆਦਿਨਾ ਸਮਾਧਿਸ੍ਸ ਵਿਸੇਸਨਭਾਵੇਨ. ‘‘ਸਮਾਧਿਸੇਵਨਵਸੇਨਾ’’ਤਿ ਚ ਪਾਠੋ. ਤਤ੍ਥ ਸਮਾਧਿਸੇਵਨਵਸੇਨਾਤਿ ਛਨ੍ਦਾਧਿਕੇ ਅਧਿਪਤਿਂ ਕਰਿਤ੍ਵਾ ਸਮਾਧਿਸ੍ਸ ਆਸੇਵਨਵਸੇਨ. ਉਪਾਯਭੂਤਾਨਨ੍ਤਿ ‘‘ਛਨ੍ਦਵਤੋ ਚੇ ਸਮਾਧਿ ਇਜ੍ਝਤਿ, ਮਯ੍ਹੇਵ ਇਜ੍ਝਤੀ’’ਤਿ ਸਮਾਧਿਆਸੇਵਨਾਯ ਉਪਾਯਭੂਤਾਨਂ.

ਸੁਤ੍ਤਨ੍ਤਭਾਜਨੀਯਵਣ੍ਣਨਾ ਨਿਟ੍ਠਿਤਾ.

੨. ਅਭਿਧਮ੍ਮਭਾਜਨੀਯਵਣ੍ਣਨਾ

੪੪੪. ਸਾਧਿਪਤਿਵਾਰਾਨਿ ਅਟ੍ਠਸਤਾਨਿ, ਤੇਸੁ ਪਚ੍ਚੇਕਂ ਚਤ੍ਤਾਰੋ ਇਦ੍ਧਿਪਾਦਾ ਨ ਸਮ੍ਭਵਨ੍ਤੀਤਿ ਆਹ ‘‘ਸਾਧਿਪਤਿਵਾਰਾਨਂ ਪਰਿਪੁਣ੍ਣਾਨਂ ਅਭਾਵਾ’’ਤਿ. ਤਤ੍ਥ ਕਾਰਣਮਾਹ ‘‘ਨ ਹਿ ਅਧਿਪਤੀਨਂ ਅਧਿਪਤਯੋ ਵਿਜ੍ਜਨ੍ਤੀ’’ਤਿ. ਯਦਿ ਹਿ ਅਧਿਪਤੀ ਸਿਯੁਂ ਸਾਧਿਪਤੀਤਿ ਇਦ੍ਧਿਪਾਦਭੇਦੇਨ ਦ੍ਵਤ੍ਤਿਂਸ ਨਯਸਤਾਨਿ, ਸੁਦ੍ਧਿਕਾਨਿ ਅਟ੍ਠਾਤਿ ਚਤ੍ਤਾਰਿ ਨਯਸਹਸ੍ਸਾਨਿ ਭਵੇਯ੍ਯੁਂ, ਤਂ ਪਨ ਨਤ੍ਥੀਤਿ ਅਧਿਪ੍ਪਾਯੋ. ਯਤ੍ਤਕਾ ਪਨ ਨਯਾ ਇਧ ਲਬ੍ਭਨ੍ਤਿ, ਤਂ ਦਸ੍ਸੇਤੁਂ ‘‘ਏਕੇਕਸ੍ਮਿਂ ਪਨਾ’’ਤਿਆਦਿ ਵੁਤ੍ਤਂ. ਸੁਦ੍ਧਿਕਾਨਿ ਅਟ੍ਠ ਨਯਸਤਾਨਿ ਸਾਧਿਪਤਿਕਾਨਿਪਿ ਅਟ੍ਠੇਵਾਤਿ ਚਤੁਨ੍ਨਂ ਮਗ੍ਗਾਨਂ ਵਸੇਨ ਸੋਲ਼ਸ ਨਯਸਤਾਨਿ.

ਅਭਿਧਮ੍ਮਭਾਜਨੀਯਵਣ੍ਣਨਾ ਨਿਟ੍ਠਿਤਾ.

੩. ਪਞ੍ਹਪੁਚ੍ਛਕਵਣ੍ਣਨਾ

ਸਯਂ ਜੇਟ੍ਠਕਭਾਵੇਨ ਪਵਤ੍ਤਨਤੋ ਚਤ੍ਤਾਰੋ ਅਧਿਪਤਯੋ ਅਞ੍ਞਮਞ੍ਞਂ ਗਰੁਂ ਨ ਕਰੋਨ੍ਤਿ. ਤਸ੍ਮਾ ‘‘ਚਤ੍ਤਾਰੋ ਇਦ੍ਧਿਪਾਦਾ ਨ ਮਗ੍ਗਾਧਿਪਤਿਨੋ’’ਤਿ ਵੁਤ੍ਤਾ. ਤੇਨਾਹ ‘‘ਅਞ੍ਞਮਞ੍ਞਸ੍ਸ ਪਨ ਅਧਿਪਤਯੋ ਨ ਭਵਨ੍ਤੀ’’ਤਿ. ਏਤਮਤ੍ਥਨ੍ਤਿ ‘‘ਅਧਿਪਤਯੋ ਅਞ੍ਞਮਞ੍ਞਸ੍ਸ ਅਧਿਪਤੀ ਨ ਭਵਨ੍ਤੀ’’ਤਿ ਏਤਮਤ੍ਥਂ. ਅਧਿਪਤਿਨੋਤਿ ਅਧਿਪਤਿ ਭਵਿਤੁਂ ਸਮਤ੍ਥਸ੍ਸ. ਅਧਿਪਤਿਂ ਨ ਕਰੋਨ੍ਤੀਤਿ ਅਧਿਪਤਿਂ ਕਤ੍ਵਾ ਗਰੁਂ ਕਤ੍ਵਾ ਨਪ੍ਪਵਤ੍ਤਨ੍ਤਿ. ਅਧਿਪਤੀਨਂ ਸਹਭਾਵੇਤਿ ਅਧਿਪਤਿਕਿਚ੍ਚਕਰਣੇਨ ਸਹਪਵਤ੍ਤਿਯਂ. ‘‘ਅਵੀਮਂਸਾਧਿਪਤਿਕਸ੍ਸ ਮਗ੍ਗਸ੍ਸ ਅਭਾਵਾ’’ਤਿ ਇਦਂ ‘‘ਅਧਿਪਤਿਤਾਸਮਤ੍ਥਾ ਧਮ੍ਮਾ ਅਧਿਪਤਿਭਾਵੇਨੇਵ ਪਵਤ੍ਤੇਯ੍ਯੁ’’ਨ੍ਤਿ ਦੋਸਾਰੋਪਨਵਸੇਨਾਹ, ਨ ਯਥਾਧਿਗਤਵਸੇਨ. ਅਧਿਪਤਿਧਮ੍ਮਾਨਞ੍ਹਿ ਪੁਬ੍ਬਾਭਿਸਙ੍ਖਾਰੇ ਸਤਿ ਅਧਿਪਤਿਭਾਵੇਨ ਪਵਤ੍ਤਿ, ਨ ਅਞ੍ਞਥਾਤਿ ਸਹਭਾਵੇਪਿ ਤਦਭਾਵਂ ਸਨ੍ਧਾਯ ਵਿਸੇਸਨਂ ਨ ਕਤ੍ਤਬ੍ਬਂ ਸਿਯਾਤਿ ਸਕ੍ਕਾ ਵਤ੍ਤੁਂ. ਅਞ੍ਞਮਞ੍ਞਾਧਿਪਤਿਕਰਣਭਾਵੇਤਿ ਅਞ੍ਞਮਞ੍ਞਂ ਅਧਿਪਤਿਂ ਕਤ੍ਵਾ ਪਵਤ੍ਤਿਯਂ. ਵੀਮਂਸਾਧਿਪਤਿਕਤ੍ਤਵਚਨਨ੍ਤਿ ਵੀਮਂਸਾਧਿਪਤਿਕਭਾਵਸ੍ਸ ਵਚਨਂ. ਨ ਵਤ੍ਤਬ੍ਬਂ ਸਿਯਾ ਸਬ੍ਬੇਸਮ੍ਪਿ ਅਧਿਪਤੀਨਂ ਸਾਧਿਪਤਿਕਤ੍ਤਾਤਿ ਅਧਿਪ੍ਪਾਯੋ. ਸਹਭਾਵੋ ਪਟਿਕ੍ਖਿਤ੍ਤੋ ਏਵ ਸਾਧਿਪਤਿਭਾਵਸ੍ਸ ਅਨੇਕਂਸਿਕਤਾਵਚਨਤੋ.

ਪਞ੍ਹਪੁਚ੍ਛਕਵਣ੍ਣਨਾ ਨਿਟ੍ਠਿਤਾ.

ਇਦ੍ਧਿਪਾਦਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.