੧੦. ਬੋਜ੍ਝਙ੍ਗਵਿਭਙ੍ਗੋ

੧. ਸੁਤ੍ਤਨ੍ਤਭਾਜਨੀਯਂ

ਪਠਮਨਯਵਣ੍ਣਨਾ

੪੬੬. ਪਤਿਟ੍ਠਾਨਂ ਇਧ ਸਂਸਾਰੇ ਅਵਟ੍ਠਾਨਂ, ਤਸ੍ਸ ਮੂਲਂ ਕਿਲੇਸਾਤਿ ਆਹ ‘‘ਕਿਲੇਸਵਸੇਨ ਪਤਿਟ੍ਠਾਨ’’ਨ੍ਤਿ. ਪਤਿਟ੍ਠਾਨਾਯ ਪਨ ਬ੍ਯਾਪਾਰਾਪਤ੍ਤਿ ਕਮ੍ਮਨ੍ਤਿ ਵੁਤ੍ਤਂ ‘‘ਅਭਿਸਙ੍ਖਾਰਵਸੇਨ ਆਯੂਹਨਾ’’ਤਿ. ਯਸ੍ਮਾ ਕਿਲੇਸੇਸੁ ਤਣ੍ਹਾਦਿਟ੍ਠਿਯੋ ਤਣ੍ਹਾਦਿਟ੍ਠਿਚਰਿਤਾਨਂ ਵਿਸੇਸਤੋ ਸਂਸਾਰਨਾਯਿਕਾ, ਕਿਲੇਸਸਹਿਤਮੇਵ ਚ ਕਮ੍ਮਂ ਪਤਿਟ੍ਠਾਨਾਯ ਹੋਤਿ, ਨ ਕੇਵਲਂ, ਤਸ੍ਮਾ ਵੁਤ੍ਤਂ ‘‘ਤਣ੍ਹਾਦਿਟ੍ਠੀਹਿ…ਪੇ… ਆਯੂਹਨਾ’’ਤਿ. ਤਥਾ ਤਣ੍ਹਾਯ ਭਵਸ੍ਸਾਦਭਾਵਤੋ, ਦਿਟ੍ਠਿਯਾ ਵਿਭਵਾਭਿਨਨ੍ਦਨਭੂਤਾਯ ਵਿਭਵਾਭਿਸਙ੍ਖਰਣਭਾਵਤੋ ‘‘ਤਣ੍ਹਾਵਸੇਨ ਪਤਿਟ੍ਠਾਨਂ, ਦਿਟ੍ਠਿਵਸੇਨ ਆਯੂਹਨਾ’’ਤਿ ਵੁਤ੍ਤਂ. ਦਿਟ੍ਠੀਸੁਪਿ ਅਨ੍ਤੋਮੁਖਪ੍ਪਵਤ੍ਤਾਯ ਭਵਦਿਟ੍ਠਿਯਾ ਵਿਸੇਸਤੋ ਸਂਸਾਰੇ ਅਵਟ੍ਠਾਨਂ, ਯਤੋ ਓਲੀਯਨਾਤਿ ਵੁਚ੍ਚਤੀਤਿ ਆਹ ‘‘ਸਸ੍ਸਤਦਿਟ੍ਠਿਯਾ ਪਤਿਟ੍ਠਾਨ’’ਨ੍ਤਿ. ਬਹਿਮੁਖਪ੍ਪਵਤ੍ਤਾਪਿ ਵਿਭਵਦਿਟ੍ਠਿ ਭਵਾਭਿਸਙ੍ਖਰਣਂ ਨਾਤਿਵਤ੍ਤਤੀਤਿ ਵੁਤ੍ਤਂ ‘‘ਉਚ੍ਛੇਦਦਿਟ੍ਠਿਯਾ ਆਯੂਹਨਾ’’ਤਿ. ਲਯਾਪਤ੍ਤਿ ਯਥਾਰਦ੍ਧਸ੍ਸ ਆਰਮ੍ਭਸ੍ਸ ਅਨਿਟ੍ਠਾਨਂ ਅਨ੍ਤੋਸਙ੍ਕੋਚਭਾਵਤੋਤਿ ਆਹ ‘‘ਲੀਨਵਸੇਨ ਪਤਿਟ੍ਠਾਨ’’ਨ੍ਤਿ. ਉਦ੍ਧਤਾਪਤ੍ਤਿ ਅਨੁਪਾਯਭੂਤਾ ਬ੍ਯਾਪਾਰਾਪਤ੍ਤਿ ਅਸਙ੍ਕੋਚਭਾਵਤੋਤਿ ਵੁਤ੍ਤਂ ‘‘ਉਦ੍ਧਚ੍ਚਵਸੇਨ ਆਯੂਹਨਾ’’ਤਿ. ਤਥਾ ਕੋਸਜ੍ਜਪਕ੍ਖਿਕਤ੍ਤਾ ਚ ਕਾਮਸੁਖਾਨੁਯੋਗਸ੍ਸ ਉਦ੍ਧਚ੍ਚਪਕ੍ਖਿਕਤ੍ਤਾ ਚ ਅਤ੍ਤਕਿਲਮਥਾਨੁਯੋਗਸ੍ਸ ਤਦੁਭਯਵਸੇਨ ਪਤਿਟ੍ਠਾਨਾਯੂਹਨਾ ਵੁਤ੍ਤਾ, ਇਤਰਂ ਵੁਤ੍ਤਨਯਾਨੁਸਾਰੇਨ ਵੇਦਿਤਬ੍ਬਂ. ਇਧਾਤਿ ਇਮਿਸ੍ਸਾ ਸਮ੍ਮੋਹਵਿਨੋਦਨਿਯਾ. ਅਵੁਤ੍ਤਾਨਨ੍ਤਿ ‘‘ਕਿਲੇਸਵਸੇਨ ਪਤਿਟ੍ਠਾਨ’’ਨ੍ਤਿਆਦੀਨਂ ਵਸੇਨ ਵੇਦਿਤਬ੍ਬਾ ਪਤਿਟ੍ਠਾਨਾਯੂਹਨਾਤਿ ਯੋਜਨਾ.

ਸਮਪ੍ਪਵਤ੍ਤੇ ਧਮ੍ਮੇਤਿ ਲੀਨੁਦ੍ਧਚ੍ਚਵਿਰਹੇਨ ਸਮਪ੍ਪਵਤ੍ਤੇ ਸਮ੍ਪਯੁਤ੍ਤਧਮ੍ਮੇ. ਪਟਿਸਞ੍ਚਿਕ੍ਖਤੀਤਿ ਪਤਿਰੂਪਂ ਸਙ੍ਕਲੇਤਿ ਗਣੇਤਿ ਤੁਲੇਤਿ. ਤੇਨਾਹ ‘‘ਉਪਪਤ੍ਤਿਤੋ ਇਕ੍ਖਤੀ’’ਤਿ. ਤਦਾਕਾਰੋਤਿ ਪਟਿਸਙ੍ਖਾਨਾਕਾਰੋ ਉਪਪਤ੍ਤਿਤੋ ਇਕ੍ਖਨਾਕਾਰੋ. ਏਵਞ੍ਚ ਕਤ੍ਵਾਤਿ ਪਟਿਸਙ੍ਖਾਨਸਭਾਵਤ੍ਤਾ ਏਵ ਉਪੇਕ੍ਖਾਸਮ੍ਬੋਜ੍ਝਙ੍ਗਸ੍ਸ. ਪਚ੍ਛਿਮਪਚ੍ਛਿਮਕਾਰਣਭਾਵੋਤਿ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਕਾਰਣਭਾਵੋ. ਪੁਰਿਮਂ ਪੁਰਿਮਞ੍ਹਿ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਵਿਸੇਸਪਚ੍ਚਯੋਤਿ.

੪੬੭. ਅਵਿਪਰੀਤਕਾਯਾਦਿਸਭਾਵਗ੍ਗਹਣਸਮਤ੍ਥਤਾਯ ਬਲਵਤੀ ਏਵ ਸਤਿ. ਪਞ੍ਞਾ ਗਹਿਤਾ ਸਤਿਨੇਪਕ੍ਕੇਨਾਤਿ ਅਤ੍ਥੋ. ਏਵਂਚਿਤ੍ਤੋਤਿ ਏਵਂ ਲਾਭਸਕ੍ਕਾਰਸਿਲੋਕਸਨ੍ਨਿਸ੍ਸਿਤਚਿਤ੍ਤੋ. ਚਿਰਕਤਵਤ੍ਤਾਦਿਵਸੇਨਾਤਿ ਚਿਰਕਤਵਤ੍ਤਾਦਿਸੀਸੇਨ. ‘‘ਵੁਤ੍ਤੋ’’ਤਿ ਇਮਿਨਾਪਿ ‘‘ਕਤ੍ਵਾ ਆਹ ਕਾਯਵਿਞ੍ਞਤ੍ਤਿਂ…ਪੇ… ਕੋਟ੍ਠਾਸ’’ਨ੍ਤਿ ਯੋਜਨਾ.

ਪਰੇਸਨ੍ਤਿ ਨ ਅਨਨ੍ਤਰਾਨਂ. ਸਬ੍ਬੇਸਂ…ਪੇ… ਯੋਜੇਤਬ੍ਬਾ ‘‘ਸਬ੍ਬੇ ਬੋਜ੍ਝਙ੍ਗਾ ਸਬ੍ਬੇਸਂ ਪਚ੍ਚਯਵਿਸੇਸਾ ਹੋਨ੍ਤਿਯੇਵਾ’’ਤਿ. ਕਾਮੇਤੀਤਿ ਕਾਮੋ, ਅਸ੍ਸਾਦਨਵਸੇਨ ਆਮਸਤੀਤਿ ਆਮਿਸਂ, ਕਾਮੋਵ ਆਮਿਸਨ੍ਤਿ ਕਾਮਾਮਿਸਂ, ਕਿਲੇਸਕਾਮੋ. ਵਤ੍ਥੁਕਾਮੋ ਪਨ ਆਮਸੀਯਤੀਤਿ ਆਮਿਸਂ. ਏਵਂ ਸੇਸਦ੍ਵਯਮ੍ਪਿ. ਤੇਸੁ ਲੋਕੀਯਨ੍ਤਿ ਏਤ੍ਥ ਸੁਖਵਿਸੇਸਾਤਿ ਲੋਕੋ, ਉਪਪਤ੍ਤਿਵਿਸੇਸੋ. ਵਟ੍ਟਂ ਸਂਸਾਰੋ. ਕਾਮਸ੍ਸਾਦਵਸੇਨ ਪਵਤ੍ਤੋ ਲੋਭੋ ਕਾਮਾਮਿਸਂ. ਭਵਵਿਸੇਸਪਤ੍ਥਨਾਵਸੇਨ ਪਵਤ੍ਤੋ ਲੋਕਾਮਿਸਂ. ਵਿਭਵੋ ਨਾਮ ਕਿਮਤ੍ਥਿਯੋ, ਕੋ ਵਾ ਤਂ ਅਭਿਪਤ੍ਥੇਯ੍ਯਾਤਿ ਵਟ੍ਟਾਨੁਗੇਧਭੂਤੋ ਲੋਭੋ ਵਟ੍ਟਾਮਿਸਨ੍ਤਿ ਚ ਵਦਨ੍ਤਿ. ਤਦਾਰਮ੍ਮਣਨ੍ਤਿ ਤਸ੍ਸਾ ਤਣ੍ਹਾਯ ਆਰਮ੍ਮਣਂ, ਰੂਪਾਦਿ. ਲੋਕਧਮ੍ਮਾ ਲਾਭਾਦਯੋ. ਵੁਤ੍ਤਾਵਸੇਸਾ ਸਬ੍ਬਾਵ ਤਣ੍ਹਾ ਸਂਸਾਰਜਨਕੋ ਰਾਗੋ.

ਪਠਮਨਯਵਣ੍ਣਨਾ ਨਿਟ੍ਠਿਤਾ.

ਦੁਤਿਯਨਯਵਣ੍ਣਨਾ

੪੬੮-੯. ਸਬ੍ਬੇ ਸਤ੍ਤਾਤਿ ਕਾਮਭਵਾਦੀਸੁ, ਸਞ੍ਞੀਭਵਾਦੀਸੁ, ਏਕਵੋਕਾਰਭਵਾਦੀਸੁ ਚ ਸਬ੍ਬਭਵੇਸੁ ਸਬ੍ਬੇ ਸਤ੍ਤਾ. ਆਹਾਰਤੋ ਠਿਤਿ ਏਤੇਸਨ੍ਤਿ ਆਹਾਰਟ੍ਠਿਤਿਕਾ, ਪਚ੍ਚਯਟ੍ਠਿਤਿਕਾ. ਯੇਨ ਪਚ੍ਚਯੇਨ ਤੇ ਤਿਟ੍ਠਨ੍ਤਿ, ਸੋ ਏਕੋਵ ਧਮ੍ਮੋ ਞਾਤਪਰਿਞ੍ਞਾਸਙ੍ਖਾਤਾਯ ‘‘ਆਹਾਰਟ੍ਠਿਤਿਕਾ’’ਤਿ ਅਭਿਞ੍ਞਾਯ ਅਭਿਞ੍ਞੇਯ੍ਯੋ. ਦ੍ਵੇ ਧਾਤੁਯੋਤਿ ਸਙ੍ਖਤਾਸਙ੍ਖਤਧਾਤੁਯੋ. ਤਿਸ੍ਸੋ ਧਾਤੁਯੋਤਿ ਕਾਮਧਾਤੁਰੂਪਧਾਤੁਅਰੂਪਧਾਤੁਯੋ. ਪਞ੍ਚ ਵਿਮੁਤ੍ਤਾਯਤਨਾਨੀਤਿ ‘‘ਇਧ, ਭਿਕ੍ਖਵੇ, ਭਿਕ੍ਖੁਨੋ ਸਤ੍ਥਾ ਧਮ੍ਮਂ ਦੇਸੇਤਿ ਅਞ੍ਞਤਰੋ ਵਾ ਗਰੁਟ੍ਠਾਨਿਯੋ’’ਤਿਆਦਿਨਾ (ਦੀ. ਨਿ. ੩.੩੨੨, ੩੫੫; ਅ. ਨਿ. ੫.੨੬) ਆਗਤਾਨਿ ਵਿਮੁਚ੍ਚਨਕਾਰਣਾਨਿ. ਅਨੁਤ੍ਤਰਿਯਾਨੀਤਿ ਦਸ੍ਸਨਾਨੁਤ੍ਤਰਿਯਾਦੀਨਿ ਛ ਅਨੁਤ੍ਤਰਿਯਾਨਿ. ਨਿਦ੍ਦਸਵਤ੍ਥੂਨੀਤਿ ਯੇਹਿ ਕਾਰਣੇਹਿ ਨਿਦ੍ਦਸੋ ਹੋਤਿ, ਤਾਨਿ ਨਿਦ੍ਦਸਵਤ੍ਥੂਨਿ ਨਾਮ. ਦੇਸਨਾਮਤ੍ਤਞ੍ਚੇਤਂ. ਖੀਣਾਸਵੋ ਹਿ ਦਸਵਸ੍ਸੋ ਹੁਤ੍ਵਾ ਪਰਿਨਿਬ੍ਬੁਤੋ ਪੁਨ ਦਸਵਸ੍ਸੋ ਨ ਹੋਤਿ. ਨ ਕੇਵਲਞ੍ਚ ਦਸਵਸ੍ਸੋ, ਨਵਵਸ੍ਸੋਪਿ…ਪੇ… ਏਕਮੁਹੁਤ੍ਤਿਕੋਪਿ ਨ ਹੋਤਿਯੇਵ ਪੁਨ ਪਟਿਸਨ੍ਧਿਯਾ ਅਭਾਵਾ, ਅਟ੍ਠੁਪ੍ਪਤ੍ਤਿਵਸੇਨ ਪਨੇਵਂ ਵੁਤ੍ਤਂ. ਤਾਨਿ ਪਨ ‘‘ਇਧ, ਭਿਕ੍ਖੁ, ਸਿਕ੍ਖਾਸਮਾਦਾਨੇ ਤਿਬ੍ਬਚ੍ਛਨ੍ਦੋ ਹੋਤੀ’’ਤਿਆਦਿਨਾ (ਦੀ. ਨਿ. ੩.੩੩੧) ਸੁਤ੍ਤੇ ਆਗਤਾਨਿਯੇਵ. ‘‘ਸਮ੍ਮਾਦਿਟ੍ਠਿਸ੍ਸ ਪੁਰਿਸਪੁਗ੍ਗਲਸ੍ਸ ਮਿਚ੍ਛਾਦਿਟ੍ਠਿ ਨਿਜ੍ਜਿਣ੍ਣਾ ਹੋਤੀ’’ਤਿਆਦੀਨਿ (ਦੀ. ਨਿ. ੩.੩੬੦; ਅ. ਨਿ. ੧੦.੧੦੬) ਦਸ ਨਿਜ੍ਜਰਵਤ੍ਥੂਨਿ. ਖਨ੍ਧਾਦਯੋਤਿ ਖਨ੍ਧਾਯਤਨਧਾਤਾਦਯੋ. ਵਿਨਨ੍ਧਨਨ੍ਤਿ ‘‘ਭਵਾਦਿਵਿਨਨ੍ਧਨਟ੍ਠੇਨ ਵਾਨਂ ਵੁਚ੍ਚਤਿ ਤਣ੍ਹਾ’’ਤਿ ਦਸ੍ਸੇਤਿ. ਗਮਨਨ੍ਤਿ ਅਸ੍ਸਾਦਨਵਸੇਨ ਆਰਮ੍ਮਣੇ ਪਵਤ੍ਤਿਮਾਹ. ਤੇਨ ਵੁਤ੍ਤਂ ‘‘ਪਿਯਰੂਪਸਾਤਰੂਪੇਸੂ’’ਤਿ.

ਵਿਪਸ੍ਸਨਾਸਹਗਤਨ੍ਤਿ ਵੇਦਿਤਬ੍ਬਂ ਵਿਞ੍ਞਤ੍ਤਿਸਮੁਟ੍ਠਾਪਕਤ੍ਤਾ. ‘‘ਮਗ੍ਗਂ ਅਪ੍ਪਤ੍ਤਂ ਕਾਯਿਕਂ ਵੀਰਿਯ’’ਨ੍ਤਿ ਵਿਸੇਸੇਤ੍ਵਾ ਵੁਤ੍ਤਤ੍ਤਾ ਪਨ ਲੋਕੁਤ੍ਤਰਵੀਰਿਯਮ੍ਪਿ ਪਰਿਯਾਯੇਨ ਕਾਯਿਕਂ ਨਾਮ ਅਤ੍ਥੀਤਿ ਦੀਪਿਤਂ ਹੋਤਿ.

ਰੂਪਾਵਚਰੇ ਪੀਤਿਸਮ੍ਬੋਜ੍ਝਙ੍ਗੋਤਿ ਨ ਵੁਚ੍ਚਤੀਤਿ ਆਹ ‘‘ਰੂਪਾਵਚਰੇ…ਪੇ… ਪਟਿਕ੍ਖਿਤ੍ਤਾ’’ਤਿ. ਯਥਾ ਵਿਪਸ੍ਸਨਾਸਹਗਤਾ ਪੀਤਿ ਪਰਿਯਾਯੇਨ ‘‘ਪੀਤਿਸਮ੍ਬੋਜ੍ਝਙ੍ਗੋ’’ਤਿ ਵੁਚ੍ਚਤਿ, ਏਵਂ ਰੂਪਾਵਚਰੇ ਪੀਤਿ ਨਿਬ੍ਬੇਧਭਾਗਿਯਾ ਵਤ੍ਤਬ੍ਬਾ ਸਿਯਾ. ਏਵਂ ਲਬ੍ਭਮਾਨਾਪਿ ਅਲਬ੍ਭਮਾਨਂ ਉਪਾਦਾਯ ਨ ਵੁਤ੍ਤਾ. ‘‘ਅਵਿਤਕ੍ਕਅਵਿਚਾਰਾ’’ਤਿ ਵਿਸੇਸਨਂ ਸਨ੍ਤਪਣੀਤਾਯ ਪੀਤਿਯਾ ਦਸ੍ਸਨਤ੍ਥਂ. ਬੋਜ੍ਝਙ੍ਗਭੂਤਾਤਿ ਪਰਿਯਾਯਬੋਜ੍ਝਙ੍ਗਭੂਤਾ. ਅਵਿਤਕ੍ਕਅਵਿਚਾਰੋ ਪੀਤਿ…ਪੇ… ਨ ਵੁਤ੍ਤੋ ਸਵਿਤਕ੍ਕਸਵਿਚਾਰਤ੍ਤਾ ਤਸ੍ਸ. ਨ ਹਿ ਕਾਮਾਵਚਰਾ ਅਵਿਤਕ੍ਕਅਵਿਚਾਰਾ ਪੀਤਿ ਅਤ੍ਥਿ.

ਇਧ ਵੁਤ੍ਤੋ ਪਰਿਯਾਯੇਨਾਤਿ ਅਤ੍ਥੋ. ਮਗ੍ਗਪਟਿਵੇਧਾਨੁਲੋਮਨਤੋ ਵਿਪਸ੍ਸਨਾਯ ਵਿਯ ਪਾਦਕਜ੍ਝਾਨੇਸੁਪਿ ਸਤਿਆਦਯੋ ‘‘ਬੋਜ੍ਝਙ੍ਗਾ’’ਤ੍ਵੇਵ ਵੁਚ੍ਚਨ੍ਤੀਤਿ ਆਹ ‘‘ਨਿਬ੍ਬੇਧਭਾਗਿਯਤ੍ਤਾ ਨ ਪਟਿਕ੍ਖਿਪਿਤਬ੍ਬੋ’’ਤਿ. ਏਵਂ ਕਸਿਣਜ੍ਝਾਨਾਦੀਸੁ ਬੋਜ੍ਝਙ੍ਗੇ ਉਦ੍ਧਰਨ੍ਤਾਨਂ ਅਧਿਪ੍ਪਾਯਂ ਵਤ੍ਵਾ ਅਨੁਦ੍ਧਰਨ੍ਤਾਨਂ ਅਧਿਪ੍ਪਾਯਂ ਵਤ੍ਤੁਂ ‘‘ਅਨੁਦ੍ਧਰਨ੍ਤਾ ਪਨਾ’’ਤਿਆਦਿਮਾਹ. ਤੇ ਹਿ ਆਸਨ੍ਨੇਕਨ੍ਤਕਿਚ੍ਚਨਿਬ੍ਬਤ੍ਤੀਹਿ ਵਿਪਸ੍ਸਨਾਕ੍ਖਣੇ ਬੋਜ੍ਝਙ੍ਗੇ ਉਦ੍ਧਰਨ੍ਤਿ, ਨ ਝਾਨਕ੍ਖਣੇ ਤਦਭਾਵਤੋ. ਤੇਨਾਹ ‘‘ਵਿਪਸ੍ਸਨਾਕਿਚ੍ਚਸ੍ਸ ਵਿਯ…ਪੇ… ਨ ਉਦ੍ਧਰਨ੍ਤੀ’’ਤਿ. ਕਸਿਣਨਿਸ੍ਸਨ੍ਦੋ ਅਰੂਪਾਨੀਤਿ ਆਹ ‘‘ਤਦਾਯਤ੍ਤਾਨੀ’’ਤਿ.

ਦੁਤਿਯਨਯਵਣ੍ਣਨਾ ਨਿਟ੍ਠਿਤਾ.

ਤਤਿਯਨਯਵਣ੍ਣਨਾ

੪੭੦-੧. ਵੋਸ੍ਸਜ੍ਜਨਂ ਪਹਾਨਂ ਵੋਸ੍ਸਗ੍ਗੋ, ਵੋਸ੍ਸਜ੍ਜਨਂ ਵਾ ਵਿਸ੍ਸਟ੍ਠਭਾਵੋ ਨਿਰਾਸਙ੍ਕਾਨੁਪ੍ਪਵੇਸੋਤਿ ਆਹ ‘‘ਵੋਸ੍ਸਗ੍ਗਸਦ੍ਦੋ…ਪੇ… ਦੁਵਿਧਤਾ ਵੁਤ੍ਤਾ’’ਤਿ. ਵਿਪਸ੍ਸਨਾਕ੍ਖਣੇ ਤਦਙ੍ਗਤਨ੍ਨਿਨ੍ਨਪ੍ਪਕਾਰੇਨ, ਮਗ੍ਗਕ੍ਖਣੇ ਸਮੁਚ੍ਛੇਦਤਦਾਰਮ੍ਮਣਕਰਣਪ੍ਪਕਾਰੇਨ.

ਤਤਿਯਨਯਵਣ੍ਣਨਾ ਨਿਟ੍ਠਿਤਾ.

ਸੁਤ੍ਤਨ੍ਤਭਾਜਨੀਯਵਣ੍ਣਨਾ ਨਿਟ੍ਠਿਤਾ.

੨. ਅਭਿਧਮ੍ਮਭਾਜਨੀਯਵਣ੍ਣਨਾ

੪੭੨. ਉਪੇਕ੍ਖਨਮੁਪੇਕ੍ਖਾਸਮ੍ਬੋਜ੍ਝਙ੍ਗਸ੍ਸ ਸਭਾਵੋ, ਸੋ ਚ ਸਮਾਧਿਵੀਰਿਯਸਮ੍ਬੋਜ੍ਝਙ੍ਗੋ ਵਿਯ ਸਮ੍ਪਯੁਤ੍ਤਾਨਂ ਊਨਾਧਿਕਭਾਵਬ੍ਯਾਵਟੋ ਅਹੁਤ੍ਵਾ ਤੇਸਂ ਅਨੂਨਾਨਧਿਕਭਾਵੇ ਮਜ੍ਝਤ੍ਤਾਕਾਰਪ੍ਪਵਤ੍ਤੀਤਿ ਇਮਮਤ੍ਥਂ ਆਹ ‘‘ਉਪੇਕ੍ਖਨਵਸੇਨਾ’’ਤਿਆਦਿਨਾ. ਤਤ੍ਥ ਉਪਪਤ੍ਤਿਤੋ ਇਕ੍ਖਨਨ੍ਤਿ ਪਟਿਸਙ੍ਖਾਨਮਾਹ.

ਅਭਿਧਮ੍ਮਭਾਜਨੀਯਵਣ੍ਣਨਾ ਨਿਟ੍ਠਿਤਾ.

ਬੋਜ੍ਝਙ੍ਗਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.