੧੧. ਮਗ੍ਗਙ੍ਗਵਿਭਙ੍ਗੋ

੨. ਅਭਿਧਮ੍ਮਭਾਜਨੀਯਵਣ੍ਣਨਾ

੪੯੦. ਅਭਿਧਮ੍ਮੇਤਿ ਧਮ੍ਮਸਙ੍ਗਹੇ. ਸੋ ਹਿ ਨਿਬ੍ਬਤ੍ਤਿਤਾਭਿਧਮ੍ਮਦੇਸਨਾ, ਨ ਵਿਭਙ੍ਗਦੇਸਨਾ ਵਿਯ ਸੁਤ੍ਤਨ੍ਤਨਯਵਿਮਿਸ੍ਸਾ. ਅਰਿਯੋਪਪਦਤਂ ਨ ਕਰੋਤਿ ਵਿਨਾਪਿ ਤੇਨਸ੍ਸ ਅਰਿਯਭਾਵਸਿਦ੍ਧਿਤੋ. ਤੇਨਾਹ ਅਟ੍ਠਕਥਾਯਂ ‘‘ਯਥਾ ਹੀ’’ਤਿਆਦਿ.

੪੯੩. ‘‘ਲੋਕਿਯਕਾਲੇਨਾ’’ਤਿ ਇਦਂ ਪੁਬ੍ਬਭਾਗਭਾਵਨਾਨੁਭਾਵੇਨ ਕਿਚ੍ਚਾਤਿਰੇਕਸਿਦ੍ਧੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਏਤੇਸਨ੍ਤਿ ਸਮ੍ਮਾਦਿਟ੍ਠਿਆਦੀਨਂ. ਅਪ੍ਪਹਾਨੇ, ਪਹਾਨੇ ਚ ਆਦੀਨਵਾਨਿਸਂਸਵਿਭਾਵਨਾਦਿਨਾ ਵਿਸੇਸਪ੍ਪਚ੍ਚਯਤ੍ਤਾ ਸਮ੍ਮਾਦਿਟ੍ਠਿਆਦੀਨਿ ਮਿਚ੍ਛਾਵਾਚਾਦੀਨਿ ਪਜਹਾਪੇਨ੍ਤੀਤਿ ਵੁਤ੍ਤਾਨਿ. ਮਿਚ੍ਛਾਵਾਚਾਦਿਤੋ ਨਿਵਤ੍ਤਿ ਸਮ੍ਮਾਵਾਚਾਦਿਕਿਰਿਯਾਤਿ ਵੁਤ੍ਤਂ ‘‘ਸਮ੍ਮਾਵਾਚਾਦਿਕਿਰਿਯਾ ਹਿ ਵਿਰਤੀ’’ਤਿ. ਸਮ੍ਮਾਦਿਟ੍ਠਿਆਦਯੋ ਵਿਯ ਨ ਕਾਰਾਪਕਭਾਵੇਨ, ਤਂਸਮਙ੍ਗੀਪੁਗ੍ਗਲੋ ਵਿਯ ਨ ਕਤ੍ਤੁਭਾਵੇਨ. ਲੋਕੁਤ੍ਤਰਕ੍ਖਣੇਪੀਤਿ ਨ ਕੇਵਲਂ ਲੋਕਿਯਕ੍ਖਣੇਯੇਵ, ਅਥ ਖੋ ਲੋਕੁਤ੍ਤਰਕ੍ਖਣੇਪਿ.

ਖਨ੍ਧੋਪਧਿਂ ਵਿਪਚ੍ਚਤੀਤਿ ਪਟਿਸਨ੍ਧਿਦਾਯਿਕਂ ਸਨ੍ਧਾਯਾਹ. ਤਤ੍ਥ ਵਿਪਚ੍ਚਤੀਤਿ ਪਵਤ੍ਤਿਵਿਪਾਕਦਾਯਿਕਂ.

ਏਕੇਕਨ੍ਤਿ ‘‘ਤਤ੍ਥ ਕਤਮਾ ਸਮ੍ਮਾਦਿਟ੍ਠੀ’’ਤਿਆਦਿਨਾ ਏਕੇਕਂ ਅਙ੍ਗਂ ਪੁਚ੍ਛਿਤ੍ਵਾ. ਤਸ੍ਸ ਤਸ੍ਸੇਵਾਤਿ ਏਕੇਕਅਙ੍ਗਸ੍ਸੇਵ, ਨ ਅਙ੍ਗਸਮੁਦਾਯਸ੍ਸ. ਸਹ ਪਨ ਪੁਚ੍ਛਿਤ੍ਵਾਤਿ ‘‘ਤਤ੍ਥ ਕਤਮੋ ਪਞ੍ਚਙ੍ਗਿਕੋ ਮਗ੍ਗੋ’’ਤਿ ਪੁਚ੍ਛਿਤ੍ਵਾ. ਏਕਤੋ ਵਿਸ੍ਸਜ੍ਜਨਪਟਿਨਿਦ੍ਦੇਸਤ੍ਤਾਤਿ ਯਦਿਪਿ ‘‘ਤਤ੍ਥ ਕਤਮਾ ਸਮ੍ਮਾਦਿਟ੍ਠਿ? ਯਾ ਪਞ੍ਞਾ’’ਤਿਆਦਿਨਾ (ਵਿਭ. ੪੯੫) ਵਿਸ੍ਸਜ੍ਜਨਂ ਕਤਂ, ‘‘ਤਤ੍ਥ ਕਤਮੋ ਪਞ੍ਚਙ੍ਗਿਕੋ ਮਗ੍ਗੋ’’ਤਿ (ਵਿਭ. ੪੯੪) ਪਨ ਏਕਤੋ ਕਤਾਯ ਪੁਚ੍ਛਾਯ ਵਿਸ੍ਸਜ੍ਜਨਵਸੇਨ ਪਟਿਨਿਦ੍ਦੇਸਭਾਵਤੋ ਨ ਪਾਟਿਯੇਕ੍ਕਂ ਪੁਚ੍ਛਾਵਿਸ੍ਸਜ੍ਜਨਂ ਨਾਮ ਹੋਤਿ. ਕਸ੍ਮਾ ਪਨੇਤ੍ਥ ਪਞ੍ਚਙ੍ਗਿਕਵਾਰੇ ਏਵ ਪਾਟਿਯੇਕ੍ਕਂ ਪੁਚ੍ਛਾਵਿਸ੍ਸਜ੍ਜਨਂ ਕਤਂ, ਨ ਅਟ੍ਠਙ੍ਗਿਕਵਾਰੇਤਿ ਚੋਦਨਂ ਸਨ੍ਧਾਯਾਹ ‘‘ਤਤ੍ਥਾ’’ਤਿਆਦਿ. ਏਕੇਕਮੁਖਾਯਾਤਿ ਸਮ੍ਮਾਦਿਟ੍ਠਿਆਦਿਮੁਖਾਯ. ਤੇਨ ਵੁਤ੍ਤਂ ‘‘ਅਰਿਯਂ ਵੋ, ਭਿਕ੍ਖਵੇ, ਸਮ੍ਮਾਦਿਟ੍ਠਿਂ ਦੇਸੇਸ੍ਸਾਮਿ ਸਉਪਨਿਸਂ ਸਪਰਿਕ੍ਖਾਰ’’ਨ੍ਤਿਆਦਿ (ਸਂ. ਨਿ. ੫.੨੮). ਪੁਬ੍ਬਸੁਦ੍ਧਿਯਾ ਸਿਜ੍ਝਨ੍ਤਿ. ਤਥਾ ਹਿ ਵੁਤ੍ਤਂ ‘‘ਪੁਬ੍ਬੇਵ ਖੋ ਪਨਸ੍ਸ ਕਾਯਕਮ੍ਮਂ ਵਚੀਕਮ੍ਮਂ ਆਜੀਵੋ ਸੁਪਰਿਸੁਦ੍ਧੋ ਹੋਤੀ’’ਤਿ (ਮ. ਨਿ. ੩.੪੩੧), ਤਸ੍ਮਾ ਸਮ੍ਮਾਵਾਚਾਦਿਮੁਖਾ ਭਾਵਨਾ ਨਤ੍ਥੀਤਿ ਅਧਿਪ੍ਪਾਯੋ. ਤੇਨਾਹ ‘‘ਨ ਮਗ੍ਗਸ੍ਸ ਉਪਚਾਰੇਨਾ’’ਤਿ.

ਅਭਿਧਮ੍ਮਭਾਜਨੀਯਵਣ੍ਣਨਾ ਨਿਟ੍ਠਿਤਾ.

ਮਗ੍ਗਙ੍ਗਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.