੩. ਤਿਕਨਿਦ੍ਦੇਸਵਣ੍ਣਨਾ

੯੦੯. ਅਵਿਜ੍ਜਾਭਵਤਣ੍ਹਾਹਿ ਵਿਯ ਇਸ੍ਸਾਮਚ੍ਛਰਿਯਦੋਮਨਸ੍ਸਾਦਿਸਹਾਯਭੂਤੇਨ ਦੋਸੇਨਪਿ ਭਵਾਭਿਸਙ੍ਖਰਣਂ ਹੋਤੀਤਿ ‘‘ਅਕੁਸਲਮੂਲਾਨੇਵ ਵਟ੍ਟਮੂਲਾਨੀ’’ਤਿ. ਤੇਨਾਹ ‘‘ਤੀਹਿ…ਪੇ… ਕਥਿਤੋ’’ਤਿ.

੯੧੯. ਰੂਪਾਰੂਪਾਵਚਰਵਿਪਾਕਾਨਂ ਸਨ੍ਤਪਣੀਤਭਾਵੇਨ ਉਲ਼ਾਰਤਮਤ੍ਤਾ ਤਤ੍ਥ ਸਾਤਿਸਯੋ ਭਵਰਾਗੋ ਵੁਤ੍ਤੋ.

੯੨੦. ਮਾਨੇਨ ਠਪਨਾਤਿ ਮਾਨੇਨ ਸੇਯ੍ਯਾਦਿਵਸੇਨ ਅਤ੍ਤਨੋ ਠਪਨਾ. ਠਪਨਾਤਿ ਚ ਦਹਨਾ, ਪਗ੍ਗਣ੍ਹਨਾ ਵਾ.

੯੨੧. ਤਂਸਮ੍ਪਯੁਤ੍ਤਾਤਿ ਦੋਸਸਮ੍ਪਯੁਤ੍ਤਾ.

੯੨੨. ਤੇਸਂ ਵਣ੍ਣਭੇਦਨ੍ਤਿ ਤੇਸਂ ਜੀਵਾਨਂ ਵਣ੍ਣਵਿਸੇਸਂ, ਤੇਸਂ ਵਾ ਤਥਾ ਕਥੇਨ੍ਤਾਨਂ ਸੁਤ੍ਵਾ. ਬ੍ਯਾਪੀਤਿ ਸਕਲਲੋਕਬ੍ਯਾਪੀ, ਸਕਲਸਰੀਰਬ੍ਯਾਪੀ ਵਾ. ਪਰਿਮਣ੍ਡਲੋਤਿ ਪਰਮਾਣੁਪ੍ਪਮਾਣੋ ਹੁਤ੍ਵਾ ਪਰਿਮਣ੍ਡਲੋ. ਆਦਿ-ਸਦ੍ਦੇਨ ਅਙ੍ਗੁਟ੍ਠਪ੍ਪਮਾਣੋ ਵਯਪ੍ਪਮਾਣੋਤਿਆਦਿਕਂ ਸਙ੍ਗਣ੍ਹਾਤਿ.

੯੨੩. ਉਤੁਵਿਪਰਿਣਾਮਜੋ ਸੀਤਾਦਿਉਤੁਵਿਪਰਿਵਤ੍ਤਜਾਤੋ. ਓਪਕ੍ਕਮਿਕੋ ਅਤ੍ਤਨੋ, ਪਰਸ੍ਸ ਵਾ ਤਾਦਿਸਉਪਕ੍ਕਮਨਿਬ੍ਬਤ੍ਤੋ. ਵਿਸਮਪਰਿਹਾਰਜੋ ਚਿਰਾਸਨਚਿਰਟ੍ਠਾਨਾਦਿਨਾ ਕਾਯਸ੍ਸ ਵਿਸਮਪਰਿਹਰਣਤੋ ਜਾਤੋ. ਸਨ੍ਨਿਪਾਤਜੋ ਸਞ੍ਚਯਤੋ ਪਟ੍ਠਾਯ ਪਚ੍ਚੇਕਂ ਵਿਸਮਾਕਾਰਤੋ ਦੋਸਤ੍ਤਯਸਮੋਧਾਨਤੋ ਜਾਤੋ. ਕਮ੍ਮਸਮੁਟ੍ਠਾਨੋ ਉਤੁਵਿਪਰਿਣਾਮਾਦੀਹਿ ਵਿਨਾ ਕਮ੍ਮਤੋ ਸਮੁਟ੍ਠਿਤੋ. ਪਿਤ੍ਤਸੇਮ੍ਹਵਾਤਸਮੁਟ੍ਠਾਨਾ ਪਨ ਪਿਤ੍ਤਾਦੀਨਂ ਅਧਿਕਭਾਵੇਨੇਵ ਵੁਤ੍ਤਾ. ਸਬ੍ਬਸ੍ਸਾਪਿ ਹਿ ਰੋਗਸ੍ਸ ਦੋਸਤ੍ਤਯਂ ਆਸਨ੍ਨਕਾਰਣਂ ਦੋਸਪ੍ਪਕੋਪੇਨ ਵਿਨਾ ਅਭਾਵਤੋ. ਕਮ੍ਮਂ ਪਧਾਨਕਾਰਣਂ ਕਤੋਕਾਸੇ ਏਵ ਤਸ੍ਮਿਂ ਉਪ੍ਪਜ੍ਜਨਤੋ, ਇਤਰਂ ਪਨ ਤਸ੍ਸ ਸਹਕਾਰਿਕਾਰਣਂ ਦਟ੍ਠਬ੍ਬਂ. ਤਯਿਦਂ ਪੁਬ੍ਬੇਕਤਹੇਤੁਵਾਦਿਨੋ ਪਟਿਕ੍ਖਿਪਨ੍ਤਿ. ਉਪਪਜ੍ਜਵੇਦਨੀਯਫਲਮ੍ਪਿ ਪੁਬ੍ਬੇਕਤਹੇਤੁਕਪਕ੍ਖਿਕਮੇਵ ਅਤੀਤਦ੍ਧਿਕਤ੍ਤਾ ਕਮ੍ਮਸ੍ਸਾਤਿ ਅਰੁਚਿਸੂਚਨਤ੍ਥਂ ਕਿਰ-ਸਦ੍ਦਗ੍ਗਹਣਂ ਕਰੋਤਿ ‘‘ਉਪਪਜ੍ਜਵੇਦਨੀਯਞ੍ਚ ਕਿਰ ਪਟਿਕ੍ਖਿਪਨ੍ਤੀ’’ਤਿ.

੯੨੪. ਦਾਹਕਾਰਣਤਾਯਾਤਿ ਰਾਗਾਦਿਦਸਵਿਧਗ੍ਗਿਦਾਹਸ੍ਸ, ਨਰਕਗ੍ਗਿਦਾਹਸ੍ਸ ਚ ਕਾਰਣਤਾਯ.

੯੨੬. ਪੁਥੁਨਿਮਿਤ੍ਤਸਭਾਵੇਸੂਤਿ ਪੁਥੁ ਨਾਨਾਕਿਲੇਸਾਦੀਨਂ ਕਾਰਣਸਭਾਵੇਸੁ.

੯੩੧. ਅਦ੍ਦਨਂ ਅਦ੍ਦਾ ਮਦ੍ਦਵੋ, ਅਨੇਕਤ੍ਥਤ੍ਤਾ ਧਾਤੂਨਂ ਤਪ੍ਪਟਿਕ੍ਖੇਪੇਨ ਅਨਦ੍ਦਾਤਿ ਆਹ ‘‘ਅਮੁਦੁਤਾ ਵਾ ਅਨਦ੍ਦਾ’’ਤਿ.

੯੩੬. ਅਯੋਨਿਸੋਮਨਸਿਕਾਰਹੇਤੁਕਤ੍ਤਾ ਆਵਜ੍ਜਨਾਯ ਅਕੁਸਲਾਨੁਕੂਲਕਿਚ੍ਚਤਾ ਦਟ੍ਠਬ੍ਬਾ.

ਤਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.