੨. ਦੁਕਨਿਦ੍ਦੇਸਵਣ੍ਣਨਾ

੮੯੧. ਬਨ੍ਧਤੀਤਿ ਕੁਜ੍ਝਨਾਕਾਰਂ ਬਨ੍ਧਤਿ ਘਟੇਤਿ. ਉਪਨਾਹੋ ਹਿ ਆਘਾਤਵਤ੍ਥੁਨਾ ਚਿਤ੍ਤਂ ਬਨ੍ਧਨ੍ਤੋ ਵਿਯ ਹੋਤਿ, ਯਤੋ ਅਞ੍ਞਥਾ ਪਵਤ੍ਤਿਤ੍ਵਾਪਿ ਅਵਿਦਿਤੇ ਉਪਨਾਹੇ ਆਘਾਤਵਤ੍ਥੁਸਨ੍ਨਿਸ੍ਸਿਤੋਵ ਹੋਤਿ.

੮੯੨. ਦਨ੍ਤੇਹਿ ਛਿਨ੍ਦਿਤ੍ਵਾਤਿ ਦਨ੍ਤੇਹਿ ਛਿਨ੍ਦਿਤ੍ਵਾ ਵਿਯ ਏਕਦੇਸਂ ਅਪਨੇਤ੍ਵਾ ਏਕਦੇਸਂ ਗਹੇਤ੍ਵਾਤਿ ਅਧਿਪ੍ਪਾਯੋ.

੮੯੪. ਅਚ੍ਚਯਂ ਕਤ੍ਵਾਤਿ ਵੀਤਿਕ੍ਕਮਂ ਕਤ੍ਵਾ. ਪਟਿਚ੍ਛਾਦਨੇਤਿ ਅਤ੍ਤਨਾ ਕਤਸ੍ਸ ਅਚ੍ਚਯਸ੍ਸ ਪਟਿਚ੍ਛਾਦਨੇ. ਵੋਚ੍ਛਿਨ੍ਦਨਂ ਵੀਤਿਕ੍ਕਮਕਿਰਿਯਾਯ ਅਪ੍ਪਟਿਜਾਨਵਸੇਨ ਉਪਚ੍ਛਿਨ੍ਦਨਂ, ਵੋਚ੍ਛਿਨ੍ਦਨੇਨ ਛਾਦਨਾ ਵੋਚ੍ਛਿਨ੍ਦਨਛਾਦਨਾ.

ਅਸਮ੍ਮਾਭਾਸਨੇ ਸਠ-ਸਦ੍ਦੋ ਲੋਕੇ ਨਿਰੁਲ਼੍ਹੋਤਿ ਆਹ ‘‘ਯੋ ਨ ਸਮ੍ਮਾ ਭਾਸਤਿ, ਸੋ ਸਠੋ’’ਤਿ. ਸਠਸ੍ਸ ਯਕ੍ਖਸੂਕਰਸਦਿਸਤਂ ਦਸ੍ਸੇਨ੍ਤੋ ‘‘ਕੁਚ੍ਛਿ ਵਾ ਪਿਠਿ ਵਾ ਜਾਨਿਤੁਂ ਨ ਸਕ੍ਕਾ’’ਤਿ ਆਹ, ਇਨ੍ਦਜਾਲਸਦਿਸੋ ਵਾ ਏਸੋ ਦਟ੍ਠਬ੍ਬੋ.

ਯੋ ਸਬ੍ਬਥਾ ਵਿਪਨ੍ਨਜ੍ਝਾਸਯੋਪਿ ਸਮਾਨੋ ਕਾਯਵਚੀਭੇਦਮਤ੍ਤੇਨ ਅਤ੍ਤਾਨਂ ਸਮ੍ਪਨ੍ਨਂ ਵਿਯ ਦਸ੍ਸੇਤ੍ਵਾ ਲੋਕਂ ਵਞ੍ਚੇਨ੍ਤੋ ਅਞ੍ਞਥਾ ਸਨ੍ਤਂ ਅਞ੍ਞਥਾ ਪਵੇਦੇਤਿ. ਤੇਨਾਹ ‘‘ਤੇਨੇਤਂ ਸਾਠੇਯ੍ਯਂ ਮਾਯਾਤੋ ਬਲਵਤਰਾ ਵਞ੍ਚਨਾਤਿ ਦਟ੍ਠਬ੍ਬ’’ਨ੍ਤਿ. ਸਨ੍ਤਦੋਸਪਟਿਚ੍ਛਾਦਨਮੇਵ ਹਿ ਮਾਯਾ. ਤੇਨੇਵਾਤਿ ਬਲਵਤਰਵਞ੍ਚਨਾਭਾਵੇਨੇਵ. ਦਲ਼੍ਹਕੇਰਾਟਿਯਞ੍ਹਿ ‘‘ਪਰਿਕ੍ਖਤਤਾ’’ਤਿ ਵੁਤ੍ਤਂ.

੯੦੮. ਅਭਾਵੇਪੀਤਿ ਪਿ-ਸਦ੍ਦੇਨ ‘‘ਕੋ ਪਨ ਵਾਦੋ ਭਾਵੇ’’ਤਿ ਦਸ੍ਸੇਤਿ. ਯਦਿਪਿ ਹਿ ਪੁਥੁਜ੍ਜਨਾਨਂ, ਏਕਚ੍ਚਾਨਞ੍ਚ ਸੇਕ੍ਖਾਨਂ ਯਥਾਰਹਂ ਅਤ੍ਤਾਭਿਨਿਵੇਸਾਦੀਹਿ ਕਤੂਪਕਾਰਂ ਰੂਪਰਾਗਾਦਿਸਂਯੋਜਨਕਿਚ੍ਚਂ ਸਾਧੇਤਿ, ਏਕਚ੍ਚਾਨਂ ਪਨ ਵਿਨਾ ਏਵ ਤੇਹੀਤਿ ਕਸ੍ਸਚਿਪਿ ਕਿਲੇਸਸ੍ਸ ਅਵਿਕ੍ਖਮ੍ਭਿਤਤ੍ਤਾ ਕਥਞ੍ਚਿਪਿ ਅਵਿਮੁਤ੍ਤੋ ਕਾਮਭਵੋ ਅਜ੍ਝਤ੍ਤਗ੍ਗਹਣਸ੍ਸ ਵਿਸੇਸਪਚ੍ਚਯੋਤਿ ‘‘ਅਜ੍ਝਤ੍ਤ’’ਨ੍ਤਿ ਵੁਚ੍ਚਤਿ, ਤਦਭਾਵਤੋ ‘‘ਬਹਿਦ੍ਧਾ’’ਤਿ ਲਦ੍ਧਵੋਹਾਰੇ ਰੂਪਾਰੂਪਭਵੇ ਕੇਵਲਮ੍ਪਿ ਸਂਯੋਜਨਕਿਚ੍ਚਂ ਸਾਧੇਨ੍ਤਂ ਪਵਤ੍ਤਤੀਤਿ, ਤਤੋ ਏਵ ਰੂਪਾਰੂਪਾਵਚਰਸਤ੍ਤਾਨਂ ਬਹਿਦ੍ਧਾਸਂਯੋਜਨਭਾਵਹੇਤਜਾਤਨ੍ਤਿ ਚ ‘‘ਬਹਿਦ੍ਧਾਸਂਯੋਜਨ’’ਨ੍ਤਿ ਵੁਚ੍ਚਤੀਤਿ ਇਮਮਤ੍ਥਮਾਹ ‘‘ਸਕ੍ਕਾਯਦਿਟ੍ਠਾਦੀਨਂ…ਪੇ… ਯੋਜਨਂ ਨਾਮਾ’’ਤਿ.

ਦੁਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.