੧. ਏਕਕਨਿਦ੍ਦੇਸਵਣ੍ਣਨਾ

੮੪੩-੪. ਅਤ੍ਥਿਪਟਿਚ੍ਚਂ ਨਾਮਾਤਿ ਅਤ੍ਥਿਤਾ ਪਟਿਚ੍ਚਤ੍ਥੋ ਨਾਮ, ਅਸਤਿਪਿ ਸਹਜਾਤਪੁਰੇਜਾਤਾਦਿਭਾਵੇ ਯਸ੍ਮਿਂ ਸਤਿ ਯਂ ਹੋਤਿ, ਸੋ ਤਸ੍ਸ ਪਚ੍ਚਯੋਤਿ ਕਤ੍ਵਾ ਯਥਾ ਤਥਾ ਅਤ੍ਥਿਤਾਮਤ੍ਤਂ ਇਧ ਪਟਿਚ੍ਚਤ੍ਥੋਤਿ ਅਤ੍ਥੋ. ਤਂ ਪਨ ਪਟਿਚ੍ਚਤ੍ਥਂ ਬ੍ਯਤਿਰੇਕਮੁਖੇਨ ਪਾਕਟਤਰਂ ਕਾਤੁਂ ‘‘ਯਥਾ’’ਤਿਆਦਿਮਾਹ. ਤਤ੍ਥ ਨਿਸ੍ਸਯਾਦਿਪਚ੍ਚਯਭਾਵੇਨ ਪਟਿਚ੍ਚਾਤਿ ਵੁਤ੍ਤਨ੍ਤਿ ਨਿਸ੍ਸਯਾਦਿਪਚ੍ਚਯਭਾਵਤੋ ਪਚ੍ਚਯਭੂਤਂ ਚਕ੍ਖਾਦਿ ‘‘ਪਟਿਚ੍ਚਾ’’ਤਿ ਵੁਤ੍ਤਂ. ਏਕਿਸ੍ਸਾ ਸੇਣਿਯਾਤਿ ਅਟ੍ਠਾਰਸਸੁ ਸੇਣੀਸੁ ਮਯਂ ਅਮੁਕਾਯ ਸੇਣਿਯਾ ਜਾਤਾਮ੍ਹ, ਨ ਅਞ੍ਞੇ ਵਿਯ ਅਪ੍ਪਞ੍ਞਾਤਾਤਿ ਏਵਮੇਤ੍ਥ ਅਤ੍ਥਂ ਵਦਨ੍ਤਿ.

ਪੁਰਤੋ ਕਰਣਂ ਪਮੁਖਭਾਵਕਰਣਂ. ਨਿਧਾਨਰਾਸੀਤਿ ਨਿਦਹਿਤ੍ਵਾ ਠਪਿਤਧਨਨਿਚਯੋ. ਯਸੋਤਿ ਇਸ੍ਸਰਿਯਂ. ਤਂ ਪਨ ਯੇਸੁ ਵਤ੍ਤਤਿ, ਤੇਸੁ ਪਟ੍ਠਾਪਕਆਣਾਕਰਣੇਹਿ ਪਾਕਟੋ ਹੋਤੀਤਿ ‘‘ਪਟ੍ਠਾਪਕਮਦੋ, ਆਣਾਕਰਣਮਦੋ’’ਤਿ ਚ ਵੁਤ੍ਤਂ.

੮੪੫. ਵਤ੍ਥੁਨਾਤਿ ਜਾਤਿਆਦਿਪਵਤ੍ਤਿਹੇਤੁਨਾ.

੮੪੬. ਪਤਿਟ੍ਠਾਭਾਵੋਤਿ ਕੁਸਲਕਮ੍ਮੇਸੁ ਪਤਿਟ੍ਠਾਨਾਭਾਵੋ, ਸੋ ਪਨ ਯਸ੍ਮਾ ਕੁਸਲਕਿਰਿਯਾਯ ਠਾਨਂ ਨ ਹੋਤਿ, ਤਸ੍ਮਾ ‘‘ਕੁਸਲਕਰਣੇ ਅਟ੍ਠਾਨ’’ਨ੍ਤਿ ਆਹ. ਪਮਾਦਸਙ੍ਖਾਤਸ੍ਸ ਅਤ੍ਥਸ੍ਸ ਏਵਮਾਦਿਕੋ ਪਰਿਯਾਯੋਤਿ ਯੋਜਨਾ. ਆਦਿ-ਸਦ੍ਦੇਨ ‘‘ਵਚੀਦੁਚ੍ਚਰਿਤੇ, ਮਨੋਦੁਚ੍ਚਰਿਤੇ ਚਿਤ੍ਤਸ੍ਸ ਵੋਸ੍ਸਗ੍ਗੋ, ਮਕ੍ਖੋ, ਪਲ਼ਾਸੋ’’ਤਿ ਚ ਏਵਮਾਦਿਕਸ੍ਸ ਸਙ੍ਗਹੋ ਦਟ੍ਠਬ੍ਬੋ. ‘‘ਪਮਾਦੋ ਪਮਜ੍ਜਨਾਦੀ’’ਤਿਆਦਿਕੋ ਤਦਤ੍ਥਪ੍ਪਕਾਸਕੋ, ‘‘ਚਿਤ੍ਤਸ੍ਸ ਵੋਸ੍ਸਗ੍ਗੋ ਵੋਸ੍ਸਗ੍ਗਾਨੁਪ੍ਪਾਦਨ’’ਨ੍ਤਿਆਦਿਕੋ ਤਪ੍ਪਰਿਯਾਯਪ੍ਪਕਾਸਕੋ ਬ੍ਯਞ੍ਜਨਪਰਿਯਾਯੋ ਚ ਅਪਰਿਯਨ੍ਤੋਤਿ ਸਮ੍ਬਨ੍ਧੋ. ‘‘ਚਤ੍ਤਾਰੋ ਖਨ੍ਧੇ ਦਸ੍ਸੇਤੀ’’ਤਿ ਇਮਿਨਾ ਸਤਿਵੋਸ੍ਸਗ੍ਗਾਕਾਰਪ੍ਪਵਤ੍ਤਾ ਚਤ੍ਤਾਰੋ ਅਕੁਸਲਕ੍ਖਨ੍ਧਾ ਪਮਾਦੋਤਿ ਵਦਤਿ.

੮੪੭. ਅਨਿਵਾਤਵੁਤ੍ਤਿਤਾਯ ਹੇਤੁਭੂਤੋ ਚਿਤ੍ਤਸਮ੍ਪਗ੍ਗਹੋ ਮਾਨਵਿਸੇਸੋ.

੮੪੮. ਉਤ੍ਤਰਭਾਵੋ ਉਤ੍ਤਰਿਯਂ, ਕਰਣੇਨ ਉਤ੍ਤਰਿਯਂ ਕਰਣੁਤ੍ਤਰਿਯਂ, ਸਾਰਮ੍ਭੇਨ ਪਰਸ੍ਸ ਕਿਰਿਯਤੋ ਉਤ੍ਤਰਿਕਿਰਿਯਾ.

੮੪੯. ਨੇਰੁਤ੍ਤਿਕਵਿਧਾਨੇਨਾਤਿ ਇ-ਕਾਰਚ੍ਚ-ਕਾਰਾਨਞ੍ਚ ਰ-ਕਾਰਤਾਪਾਦਨੇਨ.

ਅਤ੍ਤਹਿਤਂ ਅਤ੍ਤਾਤਿ ਉਤ੍ਤਰਪਦਲੋਪੇਨ ਨਿਦ੍ਦੇਸਮਾਹ ਯਥਾ ‘‘ਰੂਪਭਵੋ ਰੂਪਂ, ਭੀਮਸੇਨੋ ਭੀਮੋ’’ਤਿ ਚ. ਆਦਿਨ੍ਨੋ, ਪਤ੍ਤੋ ਵਾ ਅਤ੍ਥੋ ਅਤ੍ਤਾਤਿ ਨਿਰੁਤ੍ਤਿਨਯੇਨ ਪਦਸਿਦ੍ਧਿ ਵੇਦਿਤਬ੍ਬਾ.

ਮੁਦ੍ਦਿਤਸ੍ਸਾਤਿ ਅਙ੍ਕਿਤਸ੍ਸ.

੮੫੦. ਜਾਨਨ੍ਤਸ੍ਸੇਵ ਮਹਾਜਨਸ੍ਸ. ਉਪਾਦਾਨਾਦਿਪਚ੍ਚਯੇਤਿ ਇਨ੍ਧਨੁਦਕਚੀਵਰਾਦਿਕੇ ਪਾਰਿਪੂਰਿਹੇਤੁਕੇ.

੮੫੧. ਗਣ੍ਠਿਕਾ ਸਯਂ ਗਣ੍ਠਿਕਰਣਤੋ. ਪਤਿਰੂਪਵਚਨਤੋ, ਅਞ੍ਞੇਸਂ ਗਣ੍ਠਿਭੇਦਤੋ ਚ ਗਣ੍ਠਿਭੂਤਾ.

੮੫੨. ਅਭੇਜ੍ਜਨ੍ਤਰਤਾਯ ਸਮਾਸੇਵਿਤਤਾਯ ਸੁਟ੍ਠੁ ਆਸੇਵਿਤਤਾਯ.

੮੫੩. ਚਿਰਕਾਲਪਰਿਭਾਵਿਤਤ੍ਤੇਨ ਤੇਮਨਕਰਣਂ ਅਲ੍ਲਭਾਵਕਰਣਂ, ਲੋਭਵਸੇਨ ਅਵਸ੍ਸਵਨਨ੍ਤਿ ਅਤ੍ਥੋ.

ਏਵਂ ਸਨ੍ਤੇ ਕਥਂ ਖੀਯਨਨ੍ਤਿ ਨਿਦ੍ਦੇਸੋਤਿ ਆਹ ‘‘ਖੀਯਨਨ੍ਤਿ ਚਾ’’ਤਿਆਦਿ.

੮੫੪. ਚੀਵਰਮਣ੍ਡਨਾਦੀਨਨ੍ਤਿ ਚੀਵਰਮਣ੍ਡਨਾ ਪਤ੍ਤਮਣ੍ਡਨਾ ਸੇਨਾਸਨਮਣ੍ਡਨਾਤਿ ਇਮੇਸਂ. ਇਦਾਨਿ ਤਂ ਵਿਸੇਸਨਭਾਵਂ ਯੋਜੇਤ੍ਵਾ ਦਸ੍ਸੇਤੁਂ ‘‘ਚੀਵਰੇਨ ਹੀ’’ਤਿਆਦਿ ਵੁਤ੍ਤਂ.

੮੫੫. ਸਭਾਗਰਹਿਤੋ, ਸਭਾਗਪਟਿਪਕ੍ਖੋ ਵਾ ਅਸਭਾਗੋ, ਅਨਨੁਕੂਲਾਨਂ ਪਟਿਕ੍ਕੂਲਤਾ ਵਾ. ਤੇਨਾਹ ‘‘ਮਾਨਥਦ੍ਧਤਾ, ਵਿਰੋਧੋ ਵਾ’’ਤਿ.

੮੫੬. ਸਙ੍ਕਮ੍ਪਨਾ ਉਕ੍ਕਣ੍ਠਨਾਵਸੇਨ ਅਨਵਟ੍ਠਾਨਂ, ਅਨਵਧਾਨਂ ਵਾ. ਤਸ੍ਸ ਤਸ੍ਸ ਆਰਮ੍ਮਣਸ੍ਸ ਤਣ੍ਹਾਯਨਾ.

੮੫੭. ਕਾਯਸ੍ਸਾਤਿ ਨਾਮਕਾਯਸ੍ਸ. ਤਸ੍ਮਿਞ੍ਹਿ ਅਵਿਪ੍ਫਾਰਿਕੇ ਰੂਪਕਾਯੋਪਿ ਅਵਿਪ੍ਫਾਰਿਕੋ ਹੋਤਿ.

੮੬੦. ਰਾਗਾਦੀਨਨ੍ਤਿ ਰਾਗਮੋਹਅਹਿਰਿਕਾਨੋਤ੍ਤਪ੍ਪਵਿਚਿਕਿਚ੍ਛਾਦੀਨਂ.

੮੬੧. ਤਿਵਿਧਮ੍ਪਿ ਕੁਹਨਵਤ੍ਥੁਂ ਦਸ੍ਸੇਤੁਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਮਹਾਨਿਦ੍ਦੇਸੇ. ‘‘ਤਤ੍ਥ ਕਤਮਾ ਕੁਹਨਾ ਲਾਭਸਕ੍ਕਾਰਸਿਲੋਕਸਨ੍ਨਿਸ੍ਸਿਤਸ੍ਸਾ’’ਤਿਆਦਿਨਾ (ਵਿਭ. ੮੬੧) ਇਧ ਖੁਦ੍ਦਕਵਿਭਙ੍ਗੇ ਆਗਤਂ ਦੇਸਨਾਨਯਂ ਨਿਸ੍ਸਾਯ ਮਹਾਨਿਦ੍ਦੇਸਦੇਸਨਾ ਪਵਤ੍ਤਾਤਿ ਆਹ ‘‘ਨਿਸ੍ਸਯਭੂਤਾਯ ਇਮਾਯ ਪਾਲ਼ਿਯਾ’’ਤਿ.

ਅਨ੍ਤਰਹਿਤਾਨੀਤਿ ਅਨ੍ਤਵਿਕਲਾਨਿ ਛਿਨ੍ਦਨ੍ਤਾਨਿ.

ਲਾਭਸਕ੍ਕਾਰਸਿਲੋਕਹੇਤੁ ਸਮ੍ਭਾਵਨਾਧਿਪ੍ਪਾਯੇਨ ਸਂਯਤਾਕਾਰਦਸ੍ਸਨਂ ਕੋਹਞ੍ਞਨ੍ਤਿ ਆਹ ‘‘ਪਾਪਿਚ੍ਛਤਾਯ ਨਿਰਤ੍ਥਕਕਾਯਵਚੀਵਿਪ੍ਫਨ੍ਦਨਿਗ੍ਗਹਣਂ ਕੋਰਜ’’ਨ੍ਤਿ. ਯੋ ਸਂਵੇਗਬਹੁਲੋ ਕੁਕ੍ਕੁਚ੍ਚਕੋ ਪੁਬ੍ਬੇਨਾਪਰਂ ਅਤ੍ਤਨੋਪਿ ਕਿਰਿਯਂ ਪਰਿਸਙ੍ਕਨ੍ਤੋ ਪਚ੍ਚਵੇਕ੍ਖਮਾਨੋ ਤਿਟ੍ਠਤਿ, ਤਾਦਿਸਂ ਵਿਯ ਅਤ੍ਤਾਨਂ ਦਸ੍ਸੇਨ੍ਤੋ ‘‘ਅਤਿਪਰਿਸਙ੍ਕਿਤੋ’’ਤਿ ਵੁਤ੍ਤੋ.

੮੬੪. ਪਸਂਸਾਮੁਖੇਨ ਨਿਨ੍ਦਨਨ੍ਤਿ ਪਸਂਸਾਵਤ੍ਥੁਤੋ ਖਿਪਨਂ ਬਹਿ ਛਡ੍ਡਨਂ ਯਥਾ ‘‘ਅਦਾਯਕਂ ਅਹੋ ਦਾਨਪਤੀ’’ਤਿ.

੮੬੫. ਗਵੇਸਨਕਮ੍ਮਨ੍ਤਿ ਅਪ੍ਪਕੇਨ ਲਾਭੇਨ ਮਹਨ੍ਤਸ੍ਸ ਪਰਿਯੇਸਨਕਬ੍ਯਾਪਾਰੋ.

੮੬੬. ਪੋਕ੍ਖਰਂ ਵੁਚ੍ਚਤਿ ਸੁਨ੍ਦਰਂ, ਵਣ੍ਣਸ੍ਸ ਸੁਨ੍ਦਰਭਾਵੋ ਵਣ੍ਣਪਾਰਿਪੂਰੀ ਹੋਤੀਤਿ ਆਹ ‘‘ਵਣ੍ਣਪਾਰਿਪੂਰੀ ਵਾ ਵਣ੍ਣਪੋਕ੍ਖਰਤਾ’’ਤਿ.

੮੭੯. ਸੇਯ੍ਯਮਾਨਾਦਿਨਿਦ੍ਦੇਸੇਸੂਤਿ ‘‘ਤਤ੍ਥ ਕਤਮੋ ਸੇਯ੍ਯਸ੍ਸ ‘ਸੇਯ੍ਯੋਹਮਸ੍ਮੀ’ਤਿ ਮਾਨੋ’’ਤਿਆਦਿਨਾ (ਵਿਭ. ੮੬੯) ਨਿਦ੍ਦਿਟ੍ਠੇਸੁ ਨਵਸੁ ਮਾਨਨਿਦ੍ਦੇਸੇਸੁ. ‘‘ਸੇਯ੍ਯਾਦਿਪੁਗ੍ਗਲੋ’’ਤਿ ਇਦਂ ਤਤ੍ਥ ਪਾਲ਼ਿਯਂ ਸੇਯ੍ਯਾਦੀਨਂ ਨਵਨ੍ਨਂ ਪੁਗ੍ਗਲਾਨਂ ਆਮਟ੍ਠਤ੍ਤਾ ਵੁਤ੍ਤਂ. ਇਧ ਪਨ ਪੁਗ੍ਗਲਾਮਸਨੇ ਸਤਿ ਸੇਯ੍ਯਪੁਗ੍ਗਲੋ ਚ ਆਮਸਿਤਬ੍ਬੋ ਸਿਯਾ. ਤੇਨੇਵਾਹ ‘‘ਸੇਯ੍ਯਮਾਨਭਾਵੇਪੀ’’ਤਿ. ਸੇਯ੍ਯਮਾਨਭਾਵੇਪੀਤਿ ਪਿ-ਸਦ੍ਦੋ ਆਕਡ੍ਢਕੋ ਅਸੇਯ੍ਯਮਾਨਨਿਦ੍ਦੇਸੇਪਿ ਪੁਗ੍ਗਲਾਮਸਨਸ੍ਸ ਕਤਤ੍ਤਾ. ਯਸ੍ਸ ਕਸ੍ਸਚੀਤਿ ਸੇਯ੍ਯਾਦੀਸੁ ਯਸ੍ਸ ਕਸ੍ਸਚਿ ਪੁਗ੍ਗਲਸ੍ਸ.

੮੮੦. ਪੁਰਿਮਮਾਨਸ੍ਸਾਤਿ ਪੁਬ੍ਬੇ ਪਵਤ੍ਤਸ੍ਸ ਸਦਿਸਮਾਨਸ੍ਸ, ਹੀਨਮਾਨਸ੍ਸ ਵਾ, ਸਦਿਸਮਾਨਵਸੇਨੇਵ ਪਨ ਪਾਲ਼ਿ ਆਗਤਾ.

੮੮੧. ‘‘ਮਿਗਾਨਂ ਕੋਤ੍ਥੁਕੋ ਅਨ੍ਤੋ, ਪਕ੍ਖੀਨਂ ਪਨ ਵਾਯਸੋ’’ਤਿ (ਜਾ. ੧.੩.੧੩੫) ਵਚਨਤੋ ਆਹ ‘‘ਪਕ੍ਖਿਜਾਤੀਸੁ ਵਾਯਸੋ ਅਨ੍ਤੋ ਲਾਮਕੋ’’ਤਿ.

੮੮੨. ਵਿਰਾਗਨ੍ਤਿ ਅਰਹਤ੍ਤਂ.

੮੮੩. ਮਾਨਸਮ੍ਪਯੁਤ੍ਤਚ੍ਛਨ੍ਦੋ ਤਣ੍ਹਾਛਨ੍ਦੋ. ਮਾਨਸਭਾਵਂ ਅਨੁਗਤੋ ਸੇਯ੍ਯਾਦਿਤੋ ਸਮ੍ਪਗ੍ਗਣ੍ਹਨਵਸੇਨ ਪਵਤ੍ਤੋ ਮਾਨਸਮ੍ਪਯੁਤ੍ਤਕਤ੍ਤੁਕਮ੍ਯਤਾਛਨ੍ਦੋ ਵਾ ਮਾਨਚ੍ਛਨ੍ਦੋ.

੮੮੪. ਤਤ੍ਥਾਤਿ ਤਸ੍ਮਿਂ ਵਿਲਮ੍ਬਨੇ ਨਿਪ੍ਫਾਦੇਤਬ੍ਬੇ. ਯੁਤ੍ਤਂ ਅਨੁਚ੍ਛਵਿਕਂ. ਮੁਤ੍ਤਂ ਵਿਸ੍ਸਟ੍ਠਂ. ਸਿਲਿਟ੍ਠਂ ਸਹਿਤਂ, ਅਤ੍ਥਦ੍ਵਯਵਿਭਾਵਕਂ ਵਾ.

੮੮੮. ਅਨੁਦ੍ਦਯਸ੍ਸੇਵਾਤਿ ਮੇਤ੍ਤਾਯਨ੍ਤਸ੍ਸ ਵਿਯ ਅਨੁਕਮ੍ਪਨ੍ਤਸ੍ਸ ਵਿਯ ਵਿਕਪ੍ਪਨਾਤਿ ਆਹ ‘‘ਸਹਨਨ੍ਦਿਤਾਦਿਕਸ੍ਸਾ’’ਤਿ, ਮੇਤ੍ਤਾਦਿਪਤਿਰੂਪੇਨ ਪਵਤ੍ਤਗੇਹਸਿਤਸਿਨੇਹਸ੍ਸਾਤਿ ਅਤ੍ਥੋ. ਤੇਨਾਹ ‘‘ਤਾਦਿਸੋ ਰਾਗੋ’’ਤਿ. ਅਤ੍ਥੋ ਯੁਜ੍ਜਤੀਤਿ ਏਵਮ੍ਪਿ ‘‘ਤਤ੍ਥਾ’’ਤਿ ਪਾਲ਼ਿਪਦਸ੍ਸ ਅਤ੍ਥੋ ਯੁਜ੍ਜਤਿ. ਪਰਾਨੁਦ੍ਦਯਤਾਹੇਤੁਕੋ ਹਿ ਪਰਾਨੁਦ੍ਦਯਤਾਸਹਿਤੋ ਸੋ ਵਿਤਕ੍ਕੋਤਿ.

੮੯੦. ਕਾਮਗੁਣਪਾਰਿਪੂਰਿਯਾ ਯੇਭੁਯ੍ਯੇਨ ਲੋਕੋ ਸਮ੍ਭਾਵੇਤੀਤਿ ਆਹ ‘‘ਅਨਵਞ੍ਞਤ੍ਤਤ੍ਥਮੇਵ ਕਾਮਗੁਣੇ ਚ ਪਤ੍ਥੇਤੀ’’ਤਿ.

ਏਕਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.