੨. ਅਭਿਧਮ੍ਮਭਾਜਨੀਯਵਣ੍ਣਨਾ

੩੪. ਤਂ ਵਤ੍ਵਾਤਿ ਤਂ ਭੂਮਿਵਸੇਨ ਜਾਨਿਤਬ੍ਬਤਂ ‘‘ਸਬ੍ਬਾਪਿ ਚਤੁਭੂਮਿਕਵੇਦਨਾ’’ਤਿਆਦਿਨਾ ਵਤ੍ਵਾ. ਸਮ੍ਪਯੁਤ੍ਤਤੋ ਦਸ੍ਸਿਤਤਾਦੀਤਿ ਏਤ੍ਥ ਆਦਿ-ਸਦ੍ਦੇਨ ਹੇਤੁਜਾਤਿਭੂਮਿਇਨ੍ਦ੍ਰਿਯਵਤ੍ਥੁਸਮ੍ਫਸ੍ਸਜਭੇਦਤੋ ਦਸ੍ਸਿਤਤਂ ਅਨਵਸੇਸਤੋ ਸਙ੍ਗਣ੍ਹਾਤਿ.

ਯਦਿਪਿ ਤਂ-ਸਦ੍ਦੋ ਪੁਬ੍ਬੇ ਵੁਤ੍ਤਸ੍ਸ ਸਾਮਞ੍ਞਤੋ ਪਟਿਨਿਦ੍ਦੇਸੋ, ਤਥਾਪਿ ਅਨਨ੍ਤਰਮੇਵ ਪਚ੍ਚਾਮਸਿਤੁਂ ਯੁਤ੍ਤੋ ਇਤਰਤ੍ਥ ਅਸਮ੍ਭਵਤੋਤਿ ਆਹ ‘‘ਅਟ੍ਠ…ਪੇ… ਯੋਜਨਾ’’ਤਿ. ‘‘ਅਟ੍ਠਵਿਧਤ੍ਤਾਭਾਵਤੋ’’ਤਿ ਇਮਿਨਾ ਤਂ ਅਸਮ੍ਭਵਂ ਦਸ੍ਸੇਤਿ.

ਪੂਰਣਤ੍ਥਮੇਵ ਵੁਤ੍ਤੋ, ਅਪੁਬ੍ਬਤਾਭਾਵਤੋਤਿ ਅਤ੍ਥੋ.

ਗਹਣਵਡ੍ਢਨਵਸੇਨਾਤਿ ਗਹਣਸ੍ਸ ਵਡ੍ਢਨਵਸੇਨ. ਗਹਣਨ੍ਤਿ ਚੇਤ੍ਥ ਕਥਨਂ ਦਟ੍ਠਬ੍ਬਂ, ਤਸ੍ਸ ਵਡ੍ਢਨਂ ਤਸ੍ਮਿਂ ਤਸ੍ਮਿਂ ਠਾਨੇ ਅਵੁਤ੍ਤਸ੍ਸ ਕਥਨਂ. ਤੇਨਾਹ ‘‘ਪੁਬ੍ਬੇ ਗਹਿਤਤੋ ਅਞ੍ਞਸ੍ਸ ਗਹਣਂ ਵਡ੍ਢਨ’’ਨ੍ਤਿ, ਤਤੋ ਏਵ ਚ ‘‘ਪੁਰਿਮਗਹਿਤੇ ਅਞ੍ਞੁਪਚਯਵਸੇਨਾ’’ਤਿ ਵੁਤ੍ਤਂ. ‘‘ਵਡ੍ਢਨਸਦ੍ਦੋ ਛੇਦਨਤ੍ਥੋ’’ਤਿ ਇਦਂ ਯਥਾ ਅਸਿਵਾ ‘‘ਸਿਵਾ’’ਤਿ, ਦਿਟ੍ਠਞ੍ਚ ‘‘ਅਦਿਟ੍ਠ’’ਨ੍ਤਿ ਵੁਚ੍ਚਤਿ, ਏਵਂ ਦਟ੍ਠਬ੍ਬਂ. ਨਯਨੀਹਰਣਨ੍ਤਿ ਨੀਯਤੀਤਿ ਨਯੋ, ਦੇਸਨਾ, ਤਸ੍ਸ ਨੀਹਰਣਂ ਪਵਤ੍ਤਨਂ. ਵਡ੍ਢਨਕਨਯੋਤਿ ਯਥਾਵੁਤ੍ਤਵਡ੍ਢਨਕਵਸੇਨ ਪਵਤ੍ਤੋ ਦੇਸਨਾਨਯੋ. ਅਞ੍ਞੇ ਭੇਦਾਤਿ ਏਕਵਿਧਚਤੁਬ੍ਬਿਧਾਦਯੋ ਭੇਦਾ. ਯਦਿ ਅਵਿਸਿਟ੍ਠਾ, ਕਸ੍ਮਾ ਵੁਤ੍ਤਾਤਿ ਆਹ ‘‘ਤਥਾਪੀ’’ਤਿਆਦਿ. ਤਤ੍ਥ ਪਞ੍ਞਾਪ੍ਪਭੇਦਜਨਨਤ੍ਥਨ੍ਤਿ ਧਮ੍ਮਵਿਸਯਾਯ ਪਭੇਦਗਤਾਯ ਪਞ੍ਞਾਯ ਵਿਨੇਯ੍ਯਾਨਂ ਨਿਬ੍ਬਤ੍ਤਨਤ੍ਥਂ, ਵਿਜ੍ਜਾਟ੍ਠਾਨਾਦਿਵਸੇਨ ਵਿਨੇਯ੍ਯਾਨਂ ਧਮ੍ਮਪਟਿਸਮ੍ਭਿਦਾਯ ਉਪ੍ਪਾਦਨਤ੍ਥਨ੍ਤਿ ਅਤ੍ਥੋ. ਅਭਿਞ੍ਞੇਯ੍ਯਧਮ੍ਮਵਿਭਾਗਤਾਯ ਸਮ੍ਮਸਨਵਾਰਸ੍ਸ ਵਿਸਯਭਾਵਤੋ ਵੁਤ੍ਤਂ ‘‘ਏਕੇਕਸ੍ਸ ਵਾਰਸ੍ਸ ਗਹਿਤਸ੍ਸ ਨਿਯ੍ਯਾਨਮੁਖਭਾਵਤੋ’’ਤਿ. ਇਤਰੇਪਿ ਭੇਦਾ ਵੁਤ੍ਤਾਤਿ ਦੁਵਿਧਤਿਵਿਧਭੇਦਾਨਂ ਯਂ ਨਾਨਤ੍ਤਂ, ਤਸ੍ਸ ਵਸੇਨ ਇਤਰੇ ਭੇਦਾ ਅਨਾਨਤ੍ਤਾਪਿ ਯਥਾਵੁਤ੍ਤਕਾਰਣਤੋ ਵੁਤ੍ਤਾ. ‘‘ਨ ਕੇਵਲ’’ਨ੍ਤਿਆਦਿਨਾ ਭੇਦਾਨਂ ਅਞ੍ਞਮਞ੍ਞਪੇਕ੍ਖਤਂ ਦਸ੍ਸੇਤ੍ਵਾ ‘‘ਤਸ੍ਮਾ’’ਤਿਆਦਿਨਾ ਤੇਸਂ ਵਿਸਿਟ੍ਠਤਂ ਦਸ੍ਸੇਤਿ.

ਯਥਾ ਦੁਕਮੂਲਕਾਦੀਸੁ ਭੇਦਾ ਗਣਨਾਨੁਪੁਬ੍ਬਿਯਾ ਪਵਤ੍ਤਾ ਪਭੇਦਨ੍ਤਰਾਪੇਕ੍ਖਾ, ਨ ਏਵਮੇਤੇ. ਏਤੇ ਪਨ ਸਤ੍ਤਵਿਧਾਦਿਭੇਦਾ ਪਭੇਦਨ੍ਤਰਨਿਰਪੇਕ੍ਖਾ ਕੇਵਲਂ ਬਹੁਵਿਧਭਾਵਸਾਮਞ੍ਞੇਨੇਵ ਵੁਤ੍ਤਾਤਿ ਦਸ੍ਸੇਤਿ ‘‘ਅਞ੍ਞਪ੍ਪਭੇਦਨਿਰਪੇਕ੍ਖਾ’’ਤਿਆਦਿਨਾ. ਦੁਕਤਿਕਪਦਤ੍ਥਾਨਂ ਯਥਾਰਹਂ ਅਪੇਕ੍ਖਿਤਬ੍ਬਾਪੇਕ੍ਖਕਭਾਵੇਨ ਵੁਤ੍ਤਤ੍ਤਾ ਯਥਾ ਦੁਕੇ ਠਪੇਤ੍ਵਾ ਵੁਤ੍ਤਾ ਤਿਕਾ ਤਤ੍ਥ ਪਕ੍ਖਿਤ੍ਤਾ ਨਾਮ ਜਾਤਾ, ਏਵਂ ਤਿਕਦੁਕਪਦਤ੍ਥਾਨਂ ਅਪੇਕ੍ਖਿਤਬ੍ਬਾਪੇਕ੍ਖਕਭਾਵੇਨ ਵੁਤ੍ਤਤ੍ਤਾ ਦੁਕੇ ਵਤ੍ਵਾ ਵੁਤ੍ਤੇਸੁਪਿ ਤਿਕੇਸੁ ਤੇ ਪਕ੍ਖਿਤ੍ਤਾ ਨਾਮ ਹੋਨ੍ਤੀਤਿ ਆਹ ‘‘ਪਰਤੋ…ਪੇ… ਯੋਜਿਤਤ੍ਤਾ’’ਤਿ.

ਸਮਾਨਵੀਥਿਯਨ੍ਤਿ ਏਕਵੀਥਿਯਂ. ਚਕ੍ਖੁਸਙ੍ਘਟ੍ਟਨਾਯਾਤਿ ਚਕ੍ਖੁਰੂਪਪਟਿਘਾਤੇਨ. ਸੋਤਿ ਚਕ੍ਖੁਰੂਪਪਟਿਘਾਤੋ. ਤਦੁਪ੍ਪਾਦਿਕਾਤਿ ਤਸ੍ਸ ਚਕ੍ਖੁਸਮ੍ਫਸ੍ਸਸ੍ਸ ਉਪ੍ਪਾਦਿਕਾ. ਸਾਤਿ ਆਵਜ੍ਜਨਵੇਦਨਾ. ਨਨੁ ਚ ਵੇਦਨਾਪਚ੍ਚਯੋ ਫਸ੍ਸੋ ਵੁਤ੍ਤੋ, ਨ ਫਸ੍ਸਪਚ੍ਚਯਾ ਵੇਦਨਾਤਿ? ਨ, ਵੇਦਨਾਸੀਸੇਨ ਚਿਤ੍ਤੁਪ੍ਪਾਦਸ੍ਸ ਗਹਿਤਤ੍ਤਾਤਿ. ਤਪ੍ਪਯੋਜਨਤ੍ਤਾਤਿ ਚਕ੍ਖੁਸਮ੍ਫਸ੍ਸਪਯੋਜਨਤ੍ਤਾ. ਪਯੋਜਯਤੀਤਿ ਪਯੋਜਨਂ, ਫਲਂ.

ਰੂਪਾਵਚਰਾਰੂਪਾਵਚਰਾਨਂ ਵਿਪਾਕਾਨਨ੍ਤਿ ਅਧਿਪ੍ਪਾਯੋ. ਤੇ ਹਿ ਇਧ ਅਗ੍ਗਹਿਤਾ. ਤੇਨੇਵਾਹ ‘‘ਤੇਸਂ ਸਯਮੇਵ ਮਨੋਦ੍ਵਾਰਭੂਤਤ੍ਤਾ’’ਤਿਆਦਿ. ਤਤੋਤਿ ਭਵਙ੍ਗਤੋ. ਚਕ੍ਖੁਸਮ੍ਫਸ੍ਸਪਚ੍ਚਯਾਦਿਕੁਸਲਾਦੀਨਨ੍ਤਿ ਏਤ੍ਥ ਪੁਰਿਮੇਨ ਆਦਿ-ਸਦ੍ਦੇਨ ‘‘ਸੋਤਸਮ੍ਫਸ੍ਸਪਚ੍ਚਯਾ’’ਤਿ ਏਵਮਾਦਯੋ ਸਙ੍ਗਹਿਤਾ, ਦੁਤਿਯੇਨ ਅਕੁਸਲਾਦਯੋ. ‘‘ਕਾਮਾਵਚਰਅਟ੍ਠਕੁਸਲਚਿਤ੍ਤਵਸੇਨਾ’’ਤਿਆਦਿਨਾ ਕੁਸਲਾਬ੍ਯਾਕਤਾਨਮ੍ਪਿ ਕਾਮਾਵਚਰਾਨਂਯੇਵ ਯੋਜਿਤਤ੍ਤਾ ਵੁਤ੍ਤਂ ‘‘ਸਮਾਨਵੀਥਿਯਂ ਲਬ੍ਭਮਾਨਤਾ ਅਟ੍ਠਕਥਾਯਂ ਵੁਤ੍ਤਾ’’ਤਿ. ਵੇਦਨਾਪੀਤਿਸਨਿਦਸ੍ਸਨਤ੍ਤਿਕਵਜ੍ਜਾਨਂ ਏਕੂਨਵੀਸਤਿਯਾ ਤਿਕਾਨਂ ਵਸੇਨ ਏਕੂਨਵੀਸਤਿਚਤੁਵੀਸਤਿਕਾ. ਯਦਿ ਅਸਮਾਨਵੀਥਿਯਮ੍ਪਿ ਕੁਸਲਾਦੀਨਂ ਲਬ੍ਭਮਾਨਤਾ ਯੋਜੇਤਬ੍ਬਾ, ਅਥ ਕਸ੍ਮਾ ਸਮਾਨਵੀਥਿਯਂਯੇਵ ਯੋਜਿਤਾਤਿ ਆਹ ‘‘ਅਟ੍ਠਕਥਾਯਂ ਪਨਾ’’ਤਿਆਦਿ. ਤੇਨੇਵਾਤਿ ਅਸਮਾਨਵੀਥਿਯਂ ਅਪ੍ਪਟਿਕ੍ਖਿਤ੍ਤਤ੍ਤਾਯੇਵ.

ਚਿਤ੍ਤਸਮ੍ਬਨ੍ਧੋਤਿ ਚਿਤ੍ਤੇਨ ਸਮ੍ਬਨ੍ਧੋ ਚਿਤ੍ਤਸਮ੍ਬਨ੍ਧਂ ਕਤ੍ਵਾ ਚਿਤ੍ਤਸੀਸੇਨ ਵੇਦਨਾਯ ਕਥਨਂ. ਤਿਕਭੂਮਿਵਸੇਨਾਤਿ ਕੁਸਲਤ੍ਤਿਕਾਦਿਤਿਕਵਸੇਨ, ਕਾਮਾਵਚਰਾਦਿਭੂਮਿਵਸੇਨ ਚ. ਦ੍ਵਾਰਤਿਕਵਸੇਨਾਤਿ ਚਕ੍ਖਾਦਿਉਪ੍ਪਤ੍ਤਿਦ੍ਵਾਰਵਸੇਨ, ਕੁਸਲਤ੍ਤਿਕਾਦਿਤਿਕਵਸੇਨ ਚ. ਯਤ੍ਥ ਕਤ੍ਥਚੀਤਿ ਦੀਪੇਤਬ੍ਬਸ੍ਸ ਅਤ੍ਥਸ੍ਸ ਵਿਸੇਸਾਭਾਵਤੋ ਸਤ੍ਤਵਿਧਭੇਦਾਦੀਸੁ ਯਤ੍ਥ ਕਤ੍ਥਚਿ. ਨ ਚ ਦ੍ਵਾਰਂ ਅਨਾਮਟ੍ਠਨ੍ਤਿ ਯੋਜਨਾ. ਤੇਨ ਸਤ੍ਤਵਿਧਭੇਦਤੋ ਤਿਂਸਵਿਧਭੇਦੇ ਵਿਸੇਸਂ ਦਸ੍ਸੇਤਿ. ਯਦਿਪਿ ਉਭਯਤ੍ਥ ਭੂਮਿਯੋ ਆਗਤਾ, ਰੂਪਾਵਚਰਾਦਿਭੂਮਿਆਮਸਨੇਨ ਪਨ ਅਸਮਾਨਵੀਥਿਯਂ ਲਬ੍ਭਮਾਨਤਾ ਦਸ੍ਸਿਤਾਤਿ ਆਹ ‘‘ਅਤਿਬ੍ਯਤ੍ਤਾ ਚ ਏਤ੍ਥ ਸਮਾਨਾਸਮਾਨਵੀਥੀਸੁ ਲਬ੍ਭਮਾਨਤਾ’’ਤਿ. ਸੁਖਦੀਪਨਾਨਿ ਹੋਨ੍ਤਿ ਦ੍ਵਾਰਭੂਮਿਆਮਸਨਮੁਖੇਨ ਵੇਦਨਾਕ੍ਖਨ੍ਧਸ੍ਸ ਵਿਭਤ੍ਤਤ੍ਤਾ. ਨ ਭੂਮਿਯੋ ਅਪੇਕ੍ਖਿਤ੍ਵਾ ਠਪਿਤਾਤਿ ਕਥੇਤਬ੍ਬਭਾਵੇਨ ਭੂਮਿਯੋ ਅਪੇਕ੍ਖਿਤ੍ਵਾ ਨ ਠਪਿਤਾ, ਭੂਮਿਵਿਭਾਗੇਨ ਨ ਕਥਿਤਾਤਿ ਅਤ੍ਥੋ. ਅਪੇਕ੍ਖਿਤਬ੍ਬਰਹਿਤਾਤਿ ਦ੍ਵਾਰਭੂਮੀਨਂ ਅਗ੍ਗਹਿਤਤ੍ਤਾ ਆਕਙ੍ਖਿਤਬ੍ਬਦ੍ਵਾਰਾਦਿਵਿਸੇਸਰਹਿਤਾ.

‘‘ਉਪਨਿਸ੍ਸਯਕੋਟਿਯਾ’’ਤਿ ਏਤ੍ਥ ਨਿਪ੍ਪਰਿਯਾਯਤੋ ਪਰਿਯਾਯਤੋ ਚ ਉਪਨਿਸ੍ਸਯਕੋਟਿਦਸ੍ਸਨਮੁਖੇਨ ਇਧਾਧਿਪ੍ਪੇਤਉਪਨਿਸ੍ਸਯਕੋਟਿਂ ਦਸ੍ਸੇਤੁਂ ‘‘ਸਦ੍ਧਂ ਉਪਨਿਸ੍ਸਾਯਾ’’ਤਿਆਦਿ ਵੁਤ੍ਤਂ. ਤਤ੍ਥ ਉਪਨਿਸ੍ਸਯਾਨਨ੍ਤਿ ਵੇਦਨਾਯ ਉਪਨਿਸ੍ਸਯਭੂਤਾਨਂ. ਦਸ੍ਸਨਨ੍ਤਿ ਚਕ੍ਖੁਵਿਞ੍ਞਾਣਂ, ਦਿਸ੍ਵਾ ਵਾ ਗਹਣਂ. ਉਪਨਿਸ੍ਸਯਨ੍ਤਭਾਵੇਨਾਤਿ ਲਾਮਕੂਪਨਿਸ੍ਸਯਭਾਵੇਨ. ਯਦਿ ਘਾਯਨਾਦੀਨਿ ਉਪਨਿਸ੍ਸਯੋ ਭਵੇਯ੍ਯੁਂ, ਪਕਤੂਪਨਿਸ੍ਸਯਾਨੇਵ ਸਿਯੁਂ. ਪਕਤੂਪਨਿਸ੍ਸਯੋ ਚ ਨਾਨਾਵੀਥਿਯਂਯੇਵਾਤਿ ਤਦਲਾਭਵਚਨਂ ਇਧ ਨਾਨਾਵੀਥਿਜੋਤਕਨ੍ਤਿ ਦਸ੍ਸੇਤਿ ‘‘ਘਾਨਾਦਿਦ੍ਵਾਰੇਸੂ’’ਤਿਆਦਿਨਾ. ਕਸਿਣਪਰਿਕਮ੍ਮਾਦੀਨਨ੍ਤਿ ਕਸਿਣਪਰਿਕਮ੍ਮਸਮਾਪਤ੍ਤਿਨਿਬ੍ਬਤ੍ਤਨਵਿਪਸ੍ਸਨਾਵਡ੍ਢਨਾਦੀਨਂ. ਤਦਲਾਭੋਤਿ ਉਪਨਿਸ੍ਸਯਾਲਾਭੋ, ਸੋ ਚ ਘਾਯਨਾਦੀਹਿ ਪਰੇਸਂ ਪਟਿਪਤ੍ਤਿਯਾ ਜਾਨਿਤੁਂ ਅਸਕ੍ਕੁਣੇਯ੍ਯਤ੍ਤਾ. ਅਨ੍ਤਿਮਭਵਿਕਬੋਧਿਸਤ੍ਤਾਦੀਨਂ ਸਵਨੇਨ ਵਿਨਾ ਤਂਫੁਸਨਂ ਸਿਯਾ ਮੂਲੂਪਨਿਸ੍ਸਯੋਤਿ ‘‘ਯੇਭੁਯ੍ਯੇਨਾ’’ਤਿ ਵੁਤ੍ਤਂ.

ਸਮ੍ਪਨ੍ਨਜ੍ਝਾਸਯੋਤਿ ਵਿਵਟ੍ਟੂਪਨਿਸ੍ਸਯਸਮ੍ਪਤ੍ਤਿਯਾ ਸਮ੍ਪਨ੍ਨਜ੍ਝਾਸਯੋ. ਤੇਨਾਤਿ ‘‘ਏਵਂ ਚਕ੍ਖੁਵਿਞ੍ਞਾਣ’’ਨ੍ਤਿ ਵਚਨੇਨ. ਤਦੁਪਨਿਸ੍ਸਯਨ੍ਤਿ ਤਤੋ ਪਰਂ ਉਪ੍ਪਨ੍ਨਕਸਿਣਰੂਪਦਸ੍ਸਨਾਦੀਨਂ ਉਪਨਿਸ੍ਸਯਭੂਤਂ.

ਥਾਮਗਮਨਂ ਨਾਮ ਕਾਮਰਾਗਾਦੀਨਂਯੇਵ ਆਵੇਣਿਕੋ ਸਭਾਵੋਤਿ ਆਹ ‘‘ਅਪ੍ਪਹੀਨਕਾਮਰਾਗਾਦਿਕਸ੍ਸ ਵਾ’’ਤਿ. ‘‘ਰਾਗੋ ਉਪ੍ਪਨ੍ਨੋ’’ਤਿਆਦਿਨਾ ਇਟ੍ਠਾਨਿਟ੍ਠਾਰਮ੍ਮਣੇ ਰਾਗਪਟਿਘਾਨਂ ਉਪ੍ਪਤ੍ਤਿਵਿਚਾਰਣਾਵ ਵੁਤ੍ਤਾ, ਨ ਨੇਸਂ ਕਿਚ੍ਚਵਿਸੇਸੋਤਿ ਕਿਚ੍ਚਵਿਸੇਸੇਨ ਵੁਤ੍ਤੇ ਦਸ੍ਸੇਨ੍ਤੋ ‘‘ਅਸਮਪੇਕ੍ਖਨਾਯਾ’’ਤਿਆਦਿਮਾਹ. ਪਵਤ੍ਤਾ ਵੇਦਨਾਤਿ ਅਤ੍ਥੋ. ਪਕਾਰਨ੍ਤਰੇਨਾਤਿ ਚਕ੍ਖੁਸਮ੍ਫਸ੍ਸਪਚ੍ਚਯਾ ਉਪ੍ਪਨ੍ਨਕਿਲੇਸਾਨਂ ਸਮਤਿਕ੍ਕਮਨਸਙ੍ਖਾਤੇਨ ਪਕਾਰਨ੍ਤਰੇਨ. ਤਥਾ ਭਾਵਨਾਵਸੇਨਾਤਿ ਏਤ੍ਥ ਤਥਾ-ਸਦ੍ਦੇਨ ਚਕ੍ਖੁਸਮ੍ਫਸ੍ਸਸ੍ਸ ਚਤੁਭੂਮਿਕਵੇਦਨਾਯ ਉਪਨਿਸ੍ਸਯਭਾਵੋ ਏਵ ਪਕਾਰਨ੍ਤਰੇਨ ਕਥਿਤੋਤਿ ਇਮਮੇਵਤ੍ਥਂ ਆਕਡ੍ਢਤਿ. ਭਾਵਨਾਯੇਵੇਤ੍ਥ ਪਕਾਰਨ੍ਤਰਂ.

ਸਬ੍ਬਂ ਸਮ੍ਮਸਨਂ ਭਾਵਨਾਤਿ ਵੇਦਿਤਬ੍ਬਾ, ਨ ਨੀਵਰਣਪ੍ਪਹਾਨਪਰਿਞ੍ਞਾਵ.

ਅਞ੍ਞਮਞ੍ਞਸ੍ਸ ਚਾਤਿ ਫੋਟ੍ਠਬ੍ਬਮਹਾਭੂਤੇਸੁ ਇਤਰੀਤਰਸ੍ਸ, ਆਪੋਧਾਤੁਯਾ ਚ ਵਸੇਨ.

ਤੇਸਨ੍ਤਿ ਜਾਤਿਆਦੀਨਂ, ਕਮ੍ਮਤ੍ਥੇ ਚੇਤਂ ਸਾਮਿਵਚਨਂ. ਸਹਜਾਤਸ੍ਸ ਮਨੋਸਮ੍ਫਸ੍ਸਸ੍ਸ ਬਲਵਪਚ੍ਚਯਭਾਵਂ ਦਸ੍ਸੇਤੀਤਿ ਸਮ੍ਬਨ੍ਧੋ. ਤਸ੍ਸ ਵਾ ਦਸ੍ਸਨਸ੍ਸਾਤਿ ਤਸ੍ਸ ਵਾ ਜਾਤਿਆਦਿਕੇ ਭਯਤੋ ਦਸ੍ਸਨਵਸੇਨ ਪਵਤ੍ਤਸ੍ਸ ਕਾਮਾਵਚਰਞਾਣਸ੍ਸ.

ਤਦੇਵ ਅਤ੍ਤਨੋ ਫਲਸ੍ਸੇਵ ਫਲਭਾਵੇਨਾਤਿ ‘‘ਮਨੋਸਮ੍ਫਸ੍ਸੋ’’ਤਿ ਫਸ੍ਸਸ੍ਸ ਕਾਰਣਭਾਵੇਨ ਯਂ ਵੁਤ੍ਤਂ, ਤਦੇਵ ਵਿਞ੍ਞਾਣਂ ਅਤ੍ਤਨੋ ਫਲਸ੍ਸ ਫਲਭਾਵੇਨ ਵੁਤ੍ਤਸ੍ਸ ਫਸ੍ਸਸ੍ਸ ‘‘ਚਕ੍ਖੁਸਮ੍ਫਸ੍ਸਜ’’ਨ੍ਤਿਆਦਿਨਾ ਫਲਭਾਵੇਨ ਵਤ੍ਤੁਂ ਨ ਯੁਤ੍ਤਂ. ‘‘ਮਨੋਸਮ੍ਫਸ੍ਸੋ’’ਤਿਆਦਿਨਾ ਲਬ੍ਭਮਾਨੋਪਿ ਵਿਞ੍ਞਾਣਂ ਪਟਿਚ੍ਚ ਫਸ੍ਸਸ੍ਸ ਪਚ੍ਚਯਭਾਵੋ ਹੇਤੁਫਲਸਙ੍ਕਰਪਰਿਹਰਣਤ੍ਥਂ ਨ ਵੁਤ੍ਤੋਤਿ ਵਤ੍ਵਾ ਯਦਿਪਿ ਫਸ੍ਸੋ ਵਿਞ੍ਞਾਣਸ੍ਸ ਪਚ੍ਚਯੋ ਹੋਤਿ, ਨ ਪਨ ਫਸ੍ਸਸ੍ਸ ਵਿਯ ਵਿਞ੍ਞਾਣਂ ਸੋ ਤਸ੍ਸ ਵਿਸੇਸਪਚ੍ਚਯੋ ਹੋਤੀਤਿ ਵਿਞ੍ਞਾਣਸ੍ਸ ਚਕ੍ਖੁਸਮ੍ਫਸ੍ਸਜਾਦਿਤਾ ਨ ਵੁਤ੍ਤਾਤਿ ਦਸ੍ਸੇਤੁਂ ‘‘ਯਸ੍ਮਾ ਵਾ’’ਤਿਆਦਿ ਵੁਤ੍ਤਂ.

ਅਭਿਧਮ੍ਮਭਾਜਨੀਯਵਣ੍ਣਨਾ ਨਿਟ੍ਠਿਤਾ.