੨. ਵੇਦਨਾਕ੍ਖਨ੍ਧਨਿਦ੍ਦੇਸਵਣ੍ਣਨਾ

੮. ਚਕ੍ਖਾਦਯੋ ਪਸਾਦਾਤਿ ਓਲ਼ਾਰਿਕਤ੍ਤਭਾਵਪਰਿਯਾਪਨ੍ਨਾ ਚਕ੍ਖੁਸੋਤਘਾਨਜਿਵ੍ਹਾਪਸਾਦਾ, ਮਨੋਮਯਤ੍ਤਭਾਵਪਰਿਯਾਪਨ੍ਨਾ ਚਕ੍ਖੁਸੋਤਪ੍ਪਸਾਦਾ ਚ. ਕਾਯਵੋਹਾਰਂ ਅਰਹਨ੍ਤੀਤਿ ਕਾਯਨ੍ਤੋਗਧਤ੍ਤਾ ਕਾਯੇਕਦੇਸਤ੍ਤਾ ਚ ਕਾਯੋਤਿ ਵਤ੍ਤਬ੍ਬਤਂ ਅਰਹਨ੍ਤਿ. ਕਾਯੋਤਿ ਹਿ ਅਤ੍ਤਭਾਵੋਪਿ ਵੁਚ੍ਚਤਿ ‘‘ਸਕ੍ਕਾਯਦਿਟ੍ਠੀ’’ਤਿਆਦੀਸੁ (ਸਂ. ਨਿ. ੧.੨੧; ੩.੧੫੫), ਕਰਜਕਾਯੋਪਿ ‘‘ਸੋ ਇਮਮ੍ਹਾ ਕਾਯਾ ਅਞ੍ਞਂ ਕਾਯਂ ਅਭਿਨਿਮ੍ਮਿਨਾਤੀ’’ਤਿਆਦੀਸੁ (ਪਟਿ. ਮ. ੩.੧੪). ਤਬ੍ਬਤ੍ਥੁਕਾਤਿ ਚਕ੍ਖਾਦਿਨਿਸ੍ਸਿਤਾ ਕਾਯਿਕਾਤਿ ਪਰਿਯਾਯੇਨ ਵੁਤ੍ਤਾ, ਨਿਪ੍ਪਰਿਯਾਯੇਨ ਪਨ ਚੇਤਸਿਕਾਵ. ਯਥਾਹ ‘‘ਯਂ ਤਸ੍ਮਿਂ ਸਮਯੇ ਤਜ੍ਜਾਚਕ੍ਖੁਵਿਞ੍ਞਾਣਧਾਤੁਸਮ੍ਫਸ੍ਸਜਂ ਚੇਤਸਿਕਂ ਨੇਵ ਸਾਤਂ ਨਾਸਾਤਂ ਚੇਤੋਸਮ੍ਫਸ੍ਸਜਂ ਅਦੁਕ੍ਖਮਸੁਖਂ ਵੇਦਯਿਤ’’ਨ੍ਤਿਆਦਿ (ਧ. ਸ. ੧੫੨). ‘‘ਨ ਹਿ ਚਕ੍ਖਾਦਯੋ ਕਾਯਪ੍ਪਸਾਦਾ ਹੋਨ੍ਤੀ’’ਤਿ ਇਮਿਨਾ ਕਾਯਪਸਾਦਨਿਸ੍ਸਿਤਾ ਵੇਦਨਾ ਨਿਪ੍ਪਰਿਯਾਯੇਨ ਕਾਯਿਕਾਤਿ ਦਸ੍ਸੇਤਿ. ਕਾਯਿਕਚੇਤਸਿਕਾਦਿਭਾਵੇਨਾਤਿ ਆਦਿ-ਸਦ੍ਦੇਨ ਕੁਸਲਾਕੁਸਲਾਬ੍ਯਾਕਤਾਦਿਭਾਵਾ ਸਙ੍ਗਯ੍ਹਨ੍ਤਿ. ਤੇਨਾਤਿ ਸੁਖਾਦਿਵੇਦਨੇਕਦੇਸਸ੍ਸ ਅਦ੍ਧਾਸਮਯਵਸੇਨ ਅਤੀਤਾਦਿਭਾਵਾਭਾਵੇਨ. ਕੇਚਿ ਪਨੇਤ੍ਥ ‘‘ਹੇਟ੍ਠਾ ਦਸ੍ਸਿਤਨਯਤ੍ਤਾ ਪਾਕਟਤ੍ਤਾ ਅਦ੍ਧਾਵਸੇਨ, ਏਕਮੁਹੁਤ੍ਤਾਦਿਪੁਬ੍ਬਣ੍ਹਾਦੀਸੁ ਉਤੁਆਦਿਨਾ ਰੂਪਸ੍ਸ ਵਿਯ ਵੇਦਨਾਯ ਵਿਭਾਗੋ ਨ ਗਯ੍ਹਤੀਤਿ ਸਮਯਵਸੇਨ ਚ ਅਤੀਤਾਦਿਭੇਦੋ ਨ ਦਸ੍ਸਿਤੋ’’ਤਿ ਵਦਨ੍ਤਿ. ਸਨ੍ਤਾਨਵਸੇਨ ਪਵਤ੍ਤਾਨਮ੍ਪਿ ਵੇਦਨਾਨਂ ਚਿਤ੍ਤੇਨ ਸਮੂਹਤੋ ਗਹੇਤਬ੍ਬਤਂ ਸਨ੍ਧਾਯਾਹ ‘‘ਵੇਦਨਾਸਮੁਦਾਯੋ’’ਤਿ. ਤੇਹੀਤਿ ਅਦ੍ਧਾਸਮਯਵਸੇਨ ਅਤੀਤਾਦਿਭਾਵੇਹਿ. ਏਤ੍ਥਾਤਿ ਏਤਸ੍ਮਿਂ ਵਿਭਙ੍ਗੇ. ਤੇਤਿ ‘‘ਵੇਦਨੇਕਦੇਸਾ’’ਤਿ ਵੁਤ੍ਤਾ ਕਾਯਿਕਚੇਤਸਿਕਾਦਿਭਾਵੇਨ ਭਿਨ੍ਨਾ ਸੁਖਾਦਿਵੇਦਨਾਵਿਸੇਸਾ. ਯਦਿ ਵੇਦਨੇਕਦੇਸਾ ਏਤ੍ਥ ਗਹਿਤਾ, ਖਣਪਰਿਚ੍ਛਿਨ੍ਨਾਵ ਤੇ ਗਹੇਤਬ੍ਬਾ, ਨ ਸਨ੍ਤਤਿਪਰਿਚ੍ਛਿਨ੍ਨਾਤਿ ਆਹ ‘‘ਏਕਸਨ੍ਤਤਿਯਂ ਪਨਾ’’ਤਿਆਦਿ. ਤੇਸੂਤਿ ਸੁਖਾਦਿਭੇਦੇਸੁ. ਭੇਦੋਤਿ ਵਿਸੇਸੋ. ਤਸ੍ਸਾਤਿ ਸੁਖਾਦਿਵਿਸੇਸਸ੍ਸ. ਯਥਾ ਚੇਤ੍ਥ, ਏਵਂ ‘‘ਤਂਸਹਿਤਤਦੁਪ੍ਪਾਦਕਾ’’ਤਿ ਏਤ੍ਥਾਪਿ ਤਂ-ਸਦ੍ਦੇਨ ਸੁਖਾਦਿਵਿਸੇਸੋ ਪਚ੍ਚਾਮਟ੍ਠੋਤਿ ਵੇਦਿਤਬ੍ਬੋ. ਸਨ੍ਤਤਿ ਪਰਿਚ੍ਛੇਦਿਕਾ ਭਵਿਤੁਂ ਅਰਹਤੀਤਿ ਸਮ੍ਬਨ੍ਧੋ. ਸਨ੍ਤਤਿਖਣਵਸੇਨੇਵ ਪਰਿਚ੍ਛੇਦੋ ਵੁਤ੍ਤੋ, ਨ ਅਦ੍ਧਾਸਮਯਵਸੇਨਾਤਿ ਅਧਿਪ੍ਪਾਯੋ.

‘‘ਪੁਬ੍ਬਨ੍ਤਾਪਰਨ੍ਤਮਜ੍ਝਗਤਾ’’ਤਿ ਨਿਟ੍ਠਿਤਹੇਤੁਕਿਚ੍ਚਾ ਅਨਿਟ੍ਠਿਤਪਚ੍ਚਯਕਿਚ੍ਚਾਤਿ ਵੁਤ੍ਤਾ, ਤਂ ਪਨ ਅਤਿਕ੍ਕਨ੍ਤਹੇਤੁਪਚ੍ਚਯਕਿਚ੍ਚਨ੍ਤਿ ਏਵਂ ਵੁਤ੍ਤਸ੍ਸ ਨਯਸ੍ਸ ਉਪਲਕ੍ਖਣਨ੍ਤਿ ਆਹ ‘‘ਪੁਬ੍ਬਨ੍ਤਾਪਰਨ੍ਤਮਜ੍ਝਗਤਾਤਿ ਏਤੇਨ ਹੇਤੁਪਚ੍ਚਯਕਿਚ੍ਚਵਸੇਨ ਵੁਤ੍ਤਨਯਂ ਦਸ੍ਸੇਤੀ’’ਤਿ. ਏਤ੍ਥ ਕੁਸਲਾਕੁਸਲਕਿਰਿਯਵੇਦਨਾਨਂ ਰੂਪਸ੍ਸ ਵਿਯ, ਵਿਪਾਕਾਨਂ ਵਿਯ ਚ ਅਯਂ ਨਾਮ ਜਨਕਹੇਤੂਤਿ ਨਿਪ੍ਪਰਿਯਾਯੇਨ ਨ ਸਕ੍ਕਾ ਵਤ੍ਤੁਂ, ਪਰਿਯਾਯੇਨ ਪਨ ਅਨਨ੍ਤਰਪਚ੍ਚਯਭੂਤੋ ਹੇਤੂਤਿ ਵਤ੍ਤਬ੍ਬੋ.

੧੧. ਸਨ੍ਤਾਪਨਕਿਚ੍ਚਨ੍ਤਿ ਪਰਿਡਹਨਕਿਚ੍ਚਂ. ਜਾਤਿਆਦਿਸਙ੍ਕਰਨ੍ਤਿ ਜਾਤਿਸਭਾਵਪੁਗ੍ਗਲਲੋਕਿਯਲੋਕੁਤ੍ਤਰਤੋ ਸਙ੍ਕਰਂ ਸਮ੍ਭੇਦਂ ਅਕਤ੍ਵਾ. ਸਮਾਨਜਾਤਿਯਨ੍ਤਿ ਏਕਜਾਤਿਯਂ. ਸੁਖਤੋ ਤਜ੍ਜਾਤਿਯਾ ਅਦੁਕ੍ਖਮਸੁਖਾ ਪਣੀਤਾਤਿ ਯੋਜੇਤਬ੍ਬਾਤਿ ਸਮ੍ਬਨ੍ਧੋ. ਸਮਾਨਭੇਦੇਤਿ ਭੂਮਨ੍ਤਰਾਦਿਸਮਾਨਵਿਭਾਗੇ. ਉਪਬ੍ਰੂਹਿਤਾਨਂ ਧਾਤੂਨਨ੍ਤਿ ਉਲ਼ਾਰਰੂਪਸਮੁਟ੍ਠਾਪਨੇਨ ਪਣੀਤਾਨਂ ਰੂਪਧਮ੍ਮਾਨਂ. ਵਿਬਾਧਿਤਾਨਨ੍ਤਿ ਨਿਪ੍ਪੀਲ਼ਿਤਾਨਂ ਮਿਲਾਪਿਤਾਨਂ. ਉਭਯਨ੍ਤਿ ਸੁਖਾਦਿਦ੍ਵਯਂ. ਏਤ੍ਥ ਚ ਖੋਭਨਾ, ਆਲੁਲ਼ਨਾ ਚ ਕਾਯਿਕਸੁਖਸ੍ਸ ਵਸੇਨ ਵੇਦਿਤਬ੍ਬਾ. ਅਭਿਸਨ੍ਦਨਾ ਝਾਨਸੁਖਸ੍ਸ. ਮਦਯਨਾ ਕਾਮਸੁਖਸ੍ਸ. ਤਥਾ ਛਾਦਨਾ. ਆਸਿਞ੍ਚਨਾ ਸਬ੍ਬਸ੍ਸ. ਛਾਦਨਾ ਆਸਿਞ੍ਚਨਾ ਵਾ ਸਬ੍ਬਸ੍ਸ ਵਸੇਨ ਵੇਦਿਤਬ੍ਬਾ.

ਸਭਾਵਾਦਿਭੇਦੇਨ ਚਾਤਿ ਸਭਾਵਪੁਗ੍ਗਲਲੋਕਿਯਾਦਿਭੇਦੇਨ ਚ. ਏਕਨ੍ਤਪਣੀਤੇ ਲੋਕੁਤ੍ਤਰੇ ਹੀਨਪਣੀਤਾਨਂ ਪਟਿਪਦਾਨਂ ਵਸੇਨ ਹੀਨਪਣੀਤਤਾ. ਏਕਨ੍ਤਹੀਨੇ ਅਕੁਸਲੇ ਛਨ੍ਦਾਦਿਵਸੇਨ ਹੀਨਪਣੀਤਤਾ, ਓਲ਼ਾਰਿਕਸੁਖੁਮਤਾ ਚ. ਤਥਾ ਹਿ ਵੁਤ੍ਤਂ ਅਟ੍ਠਕਥਾਯਂ ‘‘ਯਾ ਓਲ਼ਾਰਿਕਾ, ਸਾ ਹੀਨਾ. ਯਾ ਸੁਖੁਮਾ, ਸਾ ਪਣੀਤਾ’’ਤਿ (ਵਿਭ. ਅਟ੍ਠ. ੧੧). ਅਕੁਸਲਾਦੀਸੁ ਦੋਸਸਹਗਤਾਦਿਅਨ੍ਤਰਭੇਦਵਸੇਨ ਉਪਾਦਾਯੁਪਾਦਾਯ ਓਲ਼ਾਰਿਕਸੁਖੁਮਤਾ ਤਂਤਂਵਾਪਨਵਸੇਨ ਵੁਚ੍ਚਤਿ, ਨ ਕੁਸਲਾਕੁਸਲਾਦਿਵਸੇਨਾਤਿ ਆਹ ‘‘ਤਂਤਂਵਾਪਨਵਸੇਨ ਕਥਨੇਪਿ ਪਰਿਵਤ੍ਤਨਂ ਨਤ੍ਥੀ’’ਤਿ. ਦੋਸੁਸ੍ਸਨ੍ਨਤਾਯਾਤਿ ਕਿਲੇਸਾਧਿਕਤਾਯ. ਤਥਾਤਿ ਦੋਸੁਸ੍ਸਨ੍ਨਤਾਯ. ਕਥਂ ਪਨ ਕੁਸਲੇਸੁ ਦੋਸੁਸ੍ਸਨ੍ਨਤਾ? ਉਪਨਿਸ੍ਸਯਵਸੇਨ, ਕਿਲੇਸਾਧਿਕੇਹਿ ਸਨ੍ਤਾਨੇ ਪਵਤ੍ਤਮਾਨਾ ਕੁਸਲਾ ਧਮ੍ਮਾ ਕਿਲੇਸੇਹਿ ਸਮ੍ਬਾਧਪ੍ਪਤ੍ਤਿਯਾ ਤਿਣਾਦੀਹਿ ਸਮ੍ਬਾਧਪ੍ਪਤ੍ਤਾਨਿ ਵਿਯ ਸਸ੍ਸਾਨਿ ਵਿਪੁਲਫਲਉਲ਼ਾਰਫਲਾ ਨ ਹੋਨ੍ਤੀਤਿ. ਤਥਾਤਿ ਮਨ੍ਦਦੋਸਤਾਯ. ਕੁਸਲਾਨਂ ਮਨ੍ਦਦੋਸਤਾਪਿ ਵੁਤ੍ਤਨਯਾਨੁਸਾਰੇਨ ਵੇਦਿਤਬ੍ਬਾ. ਓਲ਼ਾਰਿਕਸੁਖੁਮਨਿਕਨ੍ਤੀਤਿ ਏਤ੍ਥ ਅਨ੍ਤੋਗਧਵਿਸੇਸਂ ਨਿਕਨ੍ਤਿਯਾ ਓਲ਼ਾਰਿਕਸੁਖੁਮਤਾਸਾਮਞ੍ਞਂ ਵੁਤ੍ਤਂ. ਯਥਾ ਹੇਤ੍ਥ ਓਲ਼ਾਰਿਕਸਾਮਞ੍ਞੇਨ ਓਲ਼ਾਰਿਕੋਲ਼ਾਰਿਕਤਰੋਲ਼ਾਰਿਕਤਮਾ ਨਿਕਨ੍ਤਿਯੋ ਗਯ੍ਹਨ੍ਤਿ, ਤਥਾ ਸੁਖੁਮਸੁਖੁਮਤਰਸੁਖੁਮਤਮਾ ਸੁਖੁਮਤਾਸਾਮਞ੍ਞੇਨ ਗਯ੍ਹਨ੍ਤੀਤਿ. ਸੁਖੁਮਤਮਨਿਕਨ੍ਤਿਵਤ੍ਥੁਨ੍ਤਿ ਚੇਤ੍ਥ ਯਾਵ ਭਵਗ੍ਗਂ ਵਿਪਸ੍ਸਨਾਞਾਣਞ੍ਚ ਵੇਦਿਤਬ੍ਬਂ.

੧੩. ਯਦਿ ਸਿਯਾਤਿ ਯਦਿ ਅਸਮ੍ਪਯੋਗੋ ਵਿਸਂਸਟ੍ਠੋ ਸਿਯਾ.

ਸਨ੍ਤਿਕਤੋ ਅਕੁਸਲਤੋਤਿ ਅਕੁਸਲਭਾਵੇਨ ਸਨ੍ਤਿਕਤੋ ਲੋਭਸਹਗਤਾਦਿਅਕੁਸਲਵੇਦਯਿਤਤੋ. ਅਕੁਸਲਾਤਿ ਦੋਸਸਹਗਤਾਦਿਅਕੁਸਲਵੇਦਨਾ ਦੂਰੇਤਿ ਯਥਾ ਉਦ੍ਧਰੀਯਤਿ. ਤਤੋ ਦੂਰਤੋ ਕੁਸਲਤੋਤਿ ਤਤੋ ਅਕੁਸਲਤੋ ਦੂਰਤੋ ਕਾਮਾਵਚਰਾਦਿਕੁਸਲਵੇਦਯਿਤਤੋ ਕੁਸਲਾ ਕਾਮਾਵਚਰਾਦਿਕੁਸਲਵੇਦਨਾ. ‘‘ਨ ਸਕ੍ਕਾ’’ਤਿ ਵੁਤ੍ਤਂ ਉਦ੍ਧਰਿਤੁਂ ਅਸਕ੍ਕੁਣੇਯ੍ਯਤਂ ‘‘ਤਥਾ ਹਿ ਸਤੀ’’ਤਿਆਦਿਨਾ ਵਿਵਰਤਿ. ਤਸ੍ਮਾਤਿ ਯਸ੍ਮਾ ਦੂਰਤੋ ਸਨ੍ਤਿਕੁਦ੍ਧਰਣਂ ਵੁਤ੍ਤਨਯੇਨ ਸਨ੍ਤਿਕਤੋ ਸਨ੍ਤਿਕੁਦ੍ਧਰਣਮੇਵ ਹੋਤਿ, ਤਥਾ ਸਤਿ ਅਤ੍ਥਵਿਸੇਸੋ ਨ ਹੋਤਿ, ਉਪਾਦਾਯੁਪਾਦਾਯ ਦੂਰਸਨ੍ਤਿਕਤਾ ਇਧ ਵੁਚ੍ਚਤਿ. ਤਸ੍ਮਾ ਸਨ੍ਤਿਕਤੋ ਸਨ੍ਤਿਕੁਦ੍ਧਰਣਞ੍ਚ ਨ ਸਕ੍ਕਾ ਕਾਤੁਂ ਅਤ੍ਥਵਿਸੇਸਾਭਾਵਤੋ, ਅਨਧਿਪ੍ਪੇਤਤ੍ਤਾ ਚਾਤਿ ਅਧਿਪ੍ਪਾਯੋ.

ਨਨੁ ਚ ਅਤਿਸਯਵਚਨਿਚ੍ਛਾਵਸੇਨ ਅਤ੍ਥੇਵ ਅਤ੍ਥਵਿਸੇਸੋਤਿ ਚੋਦਨਂ ਮਨਸਿ ਕਤ੍ਵਾ ਆਹ ‘‘ਦੂਰਦੂਰਤਰਤਾਯ ਵਿਯ ਸਨ੍ਤਿਕਸਨ੍ਤਿਕਤਰਤਾਯ ਚ ਅਨਧਿਪ੍ਪੇਤਤ੍ਤਾ’’ਤਿ. ਯਾਤਿ ਅਕੁਸਲਵੇਦਨਾ. ਤਤੋਤਿ ਕੁਸਲਵੇਦਯਿਤਤੋ. ਇਧ ਵੁਤ੍ਤਸ੍ਸ ਦੂਰਸ੍ਸਾਤਿ ਇਮਸ੍ਮਿਂ ਵੇਦਨਾਕ੍ਖਨ੍ਧਵਿਭਙ੍ਗੇ ‘‘ਅਕੁਸਲਾ ਵੇਦਨਾ ਕੁਸਲਾਬ੍ਯਾਕਤਾਹਿ ਵੇਦਨਾਹਿ ਦੂਰੇ’’ਤਿਆਦਿਨਾ (ਵਿਭ. ੧੩) ਵੁਤ੍ਤਸ੍ਸ ਦੂਰਸ੍ਸ. ਦੂਰਤੋ ਅਚ੍ਚਨ੍ਤਵਿਸਭਾਗਤ੍ਤਾਤਿ ਯਤੋ ਯਂ ‘‘ਦੂਰੇ’’ਤਿ ਵੁਤ੍ਤਂ, ਤਤੋ ਅਚ੍ਚਨ੍ਤਵਿਸਦਿਸਤ੍ਤਾ ਤਸ੍ਸ ਵਸੇਨ ਦੂਰੇ ਸਨ੍ਤਿਕਂ ਨਤ੍ਥੀਤਿ ਨ ਸਕ੍ਕਾ ਦੂਰਤੋ ਸਨ੍ਤਿਕਂ ਉਦ੍ਧਰਿਤੁਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਹੇਟ੍ਠਾ ਯਾ ਵੇਦਨਾ ਯਾਯ ਵੇਦਨਾਯ ਦੂਰੇਤਿ ਵੁਤ੍ਤਾ, ਸਾ ਏਵ ਤਸ੍ਸਾ ਕੇਨਚਿਪਿ ਪਰਿਯਾਯੇਨ ਸਨ੍ਤਿਕੇਤਿ ਨ ਉਦ੍ਧਰਿਤਬ੍ਬਾਤਿ. ਸਨ੍ਤਿਕੇਤਿ ਵੁਤ੍ਤਵੇਦਨਂਯੇਵ ਸਨ੍ਧਾਯ ਵਦਤਿ. ਭਿਨ੍ਨੇਤਿ ਲੋਭਸਹਗਤਾਦਿਵਸੇਨ ਵਿਭਤ੍ਤੇ. ਤਤ੍ਥੇਵਾਤਿ ‘‘ਸਨ੍ਤਿਕੇ’’ਤਿ ਵੁਤ੍ਤਅਤ੍ਥੇ ਏਵ. ਇਦਂ ਵੁਤ੍ਤਂ ਹੋਤਿ – ‘‘ਅਕੁਸਲਾ ਵੇਦਨਾ ਅਕੁਸਲਾਯ ਵੇਦਨਾਯ ਸਨ੍ਤਿਕੇ’’ਤਿ ਏਵਂ ਵੁਤ੍ਤਅਕੁਸਲਾਯ ਵੇਦਨਾਯਮੇਵ ਲੋਭਸਹਗਤਾਦਿਵਸੇਨ ਵਿਭਤ੍ਤਾਯ ਦੂਰਭਾਵੋਪਿ ਲਬ੍ਭਤਿ. ਏਵਂ ਸੇਸੇਸੁਪੀਤਿ.

ਯਦਿ ਸਨ੍ਤਿਕਤੋ ਦੂਰਂ ਲਬ੍ਭਤਿ, ਯਦਗ੍ਗੇਨ ਦੂਰਂ ਲਬ੍ਭਤਿ, ਤਦਗ੍ਗੇਨ ਦੂਰਤੋ ਸਨ੍ਤਿਕਂ ਉਦ੍ਧਰਿਯੇਯ੍ਯਾਤਿ ਚੋਦਨਂ ਮਨਸਿ ਕਤ੍ਵਾ ਆਹ ‘‘ਉਪਾਦਾਯੁਪਾਦਾਯ ਦੂਰਤੋ ਚ ਸਨ੍ਤਿਕਂ ਨ ਸਕ੍ਕਾ ਉਦ੍ਧਰਿਤੁ’’ਨ੍ਤਿਆਦਿ. ਤਸ੍ਸਤ੍ਥੋ – ਯਂ ਸਨ੍ਤਿਕਤੋ ਦੂਰਂ ਲਬ੍ਭਤਿ, ਯਦਿਪਿ ਤਂ ਵਿਸਭਾਗਟ੍ਠੇਨ ਲਬ੍ਭਤਿ, ਤਥਾਪਿ ਯਂ ਤਤ੍ਥ ਸਨ੍ਤਿਕਂ ਲਬ੍ਭਤਿ, ਤਂ ਸਭਾਗਟ੍ਠੇਨੇਵ ਲਬ੍ਭਤੀਤਿ ਸਨ੍ਤਿਕਤੋਵ ਸਨ੍ਤਿਕਂ ਉਦ੍ਧਟਂ ਸਿਯਾਤਿ. ਤਸ੍ਮਾਤਿ ਯਸ੍ਮਾ ਵਿਸਭਾਗਟ੍ਠੇਨ ਦੂਰਤਾ, ਸਭਾਗਟ੍ਠੇਨ ਚ ਸਨ੍ਤਿਕਤਾ ਇਚ੍ਛਿਤਾ, ਤਸ੍ਮਾ. ਲੋਭਸਹਗਤਾਯ ਦੋਸਸਹਗਤਾ ਵਿਸਭਾਗਤਾਯ ਦੂਰੇ ਸਮਾਨਾ ਕਥਂ ਸਨ੍ਤਿਕੇ ਭਵੇਯ੍ਯਾਤਿ ਅਧਿਪ੍ਪਾਯੋ. ਨਨੁ ਤਾਸਂ ਅਕੁਸਲਸਭਾਗਤਾ ਲਬ੍ਭਤੇਵਾਤਿ ਤਤ੍ਥ ਉਤ੍ਤਰਮਾਹ ‘‘ਵਿਸਭਾਗਤਾ’’ਤਿਆਦਿ. ਤਤ੍ਥ ਭੇਦਂ ਅਗ੍ਗਹੇਤ੍ਵਾ ਨ ਪਵਤ੍ਤਤੀਤਿ ਭੇਦਂ ਵਿਸੇਸਂ ਅਸਦਿਸਤਂ ਗਹੇਤ੍ਵਾ ਏਵ ਪਵਤ੍ਤਤਿ ਵਿਸਭਾਗਤਾ. ਦੂਰਤਾਯਾਤਿ ਇਧਾਧਿਪ੍ਪੇਤਾਯ ਦੂਰਤਾਯ ਸਭਾਗਸ੍ਸ ਅਬ੍ਯਾਪਕਤ੍ਤਾ ਦੂਰਤੋ ਸਨ੍ਤਿਕੁਦ੍ਧਰਣਂ ਨ ਸਕ੍ਕਾ ਕਾਤੁਂ. ਸਤਿ ਹਿ ਸਭਾਗਬ੍ਯਾਪਕਤ੍ਤੇ ਸਿਯਾ ਸਨ੍ਤਿਕਤਾਤਿ ਦੂਰਤੋ ਸਨ੍ਤਿਕੁਦ੍ਧਰਣਂ ਸਕ੍ਕਾ ਕਾਤੁਨ੍ਤਿ ਅਧਿਪ੍ਪਾਯੋ. ‘‘ਨ ਹੀ’’ਤਿਆਦਿਨਾ ਤਮੇਵਤ੍ਥਂ ਪਾਕਟਂ ਕਰੋਤਿ. ਸਭਾਗਤਾਤਿ ਸਾਮਞ੍ਞਂ. ਭੇਦਨ੍ਤਿ ਵਿਸੇਸਂ. ਅਨ੍ਤੋਗਧਂ ਕਤ੍ਵਾਵਾਤਿ ਅਭਿਬ੍ਯਾਪੇਤ੍ਵਾਵ. ਵਿਸਭਾਗਬ੍ਯਾਪਕਤ੍ਤਾ ਸਨ੍ਤਿਕਤਾਯਾਤਿ ਇਧਾਧਿਪ੍ਪੇਤਵਿਸਭਾਗਂ ਬ੍ਯਾਪੇਤ੍ਵਾ ਪਵਤ੍ਤਨਤੋ ਹੇਟ੍ਠਾ ਵੁਤ੍ਤਸਨ੍ਤਿਕਤਾਯ ਸਨ੍ਤਿਕਤੋ ਦੂਰੁਦ੍ਧਰਣਂ ਸਕ੍ਕਾ ਕਾਤੁਂ. ਤਮੇਵਤ੍ਥਂ ‘‘ਅਕੁਸਲਤਾ ਹੀ’’ਤਿਆਦਿਨਾ ਪਾਕਟਂ ਕਰੋਤਿ.

ਵੇਦਨਾਕ੍ਖਨ੍ਧਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.