੧੪. ਸਿਕ੍ਖਾਪਦਵਿਭਙ੍ਗੋ
੧. ਅਭਿਧਮ੍ਮਭਾਜਨੀਯਵਣ੍ਣਨਾ
੭੦੩. ਪਤਿਟ੍ਠਾਨਟ੍ਠੇਨਾਤਿ ਸਮ੍ਪਯੋਗਵਸੇਨ ਉਪਨਿਸ੍ਸਯਵਸੇਨ ਚ ਓਕਾਸਭਾਵੇਨ. ਪਿਟ੍ਠਪੂਵਓਦਨਕਿਣ੍ਣਨਾਨਾਸਮ੍ਭਾਰੇ ਪਕ੍ਖਿਪਿਤ੍ਵਾ ਮਦ੍ਦਿਤ੍ਵਾ ਕਤਾ ਸੁਰਾ ਨਾਮ. ਮਧੁਕਾਦਿਪੁਪ੍ਫਪਨਸਾਦਿਫਲਉਚ੍ਛੁਮੁਦ੍ਦਿਕਾਦਿਨਾਨਾਸਮ੍ਭਾਰਾਨਂ ਰਸਾ ਚਿਰਪਰਿਵਾਸਿਤਾ ਮੇਰਯਂ ਨਾਮ, ਆਸਵੋਤਿ ਅਤ੍ਥੋ.
੭੦੪. ਤਂਸਮ੍ਪਯੁਤ੍ਤਤ੍ਤਾਤਿ ਵਿਰਤਿਸਮ੍ਪਯੁਤ੍ਤਤ੍ਤਾ, ਵਿਰਤਿਚੇਤਨਾਸਮ੍ਪਯੁਤ੍ਤਤ੍ਤਾ ਵਾ.
ਕਮ੍ਮਪਥਾ ਏਵਾਤਿ ਅਸਬ੍ਬਸਾਧਾਰਣੇਸੁ ਝਾਨਾਦਿਕੋਟ੍ਠਾਸੇਸੁ ਕਮ੍ਮਪਥਕੋਟ੍ਠਾਸਿਕਾ ਏਵਾਤਿ ਅਤ੍ਥੋ. ਸੁਰਾਪਾਨਮ੍ਪਿ ‘‘ਸੁਰਾਪਾਨਂ, ਭਿਕ੍ਖਵੇ, ਆਸੇਵਿਤਂ…ਪੇ… ਨਿਰਯਸਂਵਤ੍ਤਨਿਕ’’ਨ੍ਤਿ (ਅ. ਨਿ. ੮.੪੦) ਵਿਸੁਂ ਕਮ੍ਮਪਥਭਾਵੇਨ ਆਗਤਨ੍ਤਿ ਵਦਨ੍ਤਿ. ਏਵਂ ਸਤਿ ਏਕਾਦਸ ਕਮ੍ਮਪਥਾ ਸਿਯੁਂ, ਤਸ੍ਮਾਸ੍ਸ ਯਥਾਵੁਤ੍ਤੇਸ੍ਵੇਵ ਕਮ੍ਮਪਥੇਸੁ ਉਪਕਾਰਕਤ੍ਤਸਭਾਗਤ੍ਤਵਸੇਨ ਅਨੁਪਵੇਸੋ ਦਟ੍ਠਬ੍ਬੋ.
ਸਤ੍ਤਇਤ੍ਥਿਪੁਰਿਸਾਰਮ੍ਮਣਤਾ ਤਥਾਗਹਿਤਸਙ੍ਖਾਰਾਰਮ੍ਮਣਤਾਯ ਦਟ੍ਠਬ੍ਬਾ. ‘‘ਪਞ੍ਚ ਸਿਕ੍ਖਾਪਦਾ ਪਰਿਤ੍ਤਾਰਮ੍ਮਣਾ’’ਤਿ ਹਿ ਵੁਤ੍ਤਂ. ‘‘ਸਬ੍ਬਾਪਿ ਹਿ ਏਤਾ ਵੀਤਿਕ੍ਕਮਿਤਬ੍ਬਵਤ੍ਥੁਂ ਆਰਮ੍ਮਣਂ ਕਤ੍ਵਾ ਵੇਰਚੇਤਨਾਹਿ ਏਵ ਵਿਰਮਨ੍ਤੀ’’ਤਿ (ਵਿਭ. ਅਟ੍ਠ. ੭੦੪) ਚ ਵਕ੍ਖਤੀਤਿ.
ਗੋਰੂਪਸੀਲਕੋ ਪਕਤਿਭਦ੍ਦੋ. ਕਾਕਣਿਕਮਤ੍ਤਸ੍ਸ ਅਤ੍ਥਾਯਾਤਿਆਦਿ ਲੋਭਵਸੇਨ ਮੁਸਾਕਥਨੇ ਵੁਤ੍ਤਂ. ਦੋਸਵਸੇਨ ਮੁਸਾਕਥਨੇ ਚ ਨਿਟ੍ਠਪ੍ਪਤ੍ਤੋ ਸਙ੍ਘਭੇਦੋ ਗਹਿਤੋ. ਦੋਸਵਸੇਨ ਪਰਸ੍ਸ ਬ੍ਯਸਨਤ੍ਥਾਯ ਮੁਸਾਕਥਨੇ ਪਨ ਤਸ੍ਸ ਤਸ੍ਸ ਗੁਣਵਸੇਨ ਅਪ੍ਪਸਾਵਜ੍ਜਮਹਾਸਾਵਜ੍ਜਤਾ ਯੋਜੇਤਬ੍ਬਾ, ਮਨ੍ਦਾਧਿਮਤ੍ਤਬ੍ਯਸਨਿਚ੍ਛਾਵਸੇਨ ਚ. ਨਿਸ੍ਸਗ੍ਗਿਯਥਾਵਰਵਿਜ੍ਜਾਮਯਿਦ੍ਧਿਮਯਾ ਸਾਹਤ੍ਥਿਕਾਣਤ੍ਤਿਕੇਸ੍ਵੇਵ ਪਵਿਸਨ੍ਤੀਤਿ ਦ੍ਵੇ ਏਵ ਗਹਿਤਾ.
ਪਞ੍ਚਪਿ ਕਮ੍ਮਪਥਾ ਏਵਾਤਿ ਚੇਤਨਾਸਙ੍ਖਾਤਂ ਪਰਿਯਾਯਸੀਲਂ ਸਨ੍ਧਾਯ ਵੁਤ੍ਤਂ, ਵਿਰਤਿਸੀਲਂ ਪਨ ਮਗ੍ਗਕੋਟ੍ਠਾਸਿਕਨ੍ਤਿ. ਤੇਸਂ ਪਨਾਤਿ ਸੇਸਸੀਲਾਨਂ.
੭੧੨. ‘‘ਕੋਟ੍ਠਾਸਭਾਵੇਨਾ’’ਤਿ ਵੁਤ੍ਤਂ, ‘‘ਪਤਿਟ੍ਠਾਨਭਾਵੇਨਾ’’ਤਿ ਪਨ ਵਤ੍ਤਬ੍ਬਂ. ਏਤ੍ਥ ਪਨ ਸਿਕ੍ਖਾਪਦਵਾਰੇ ਪਹੀਨਪਞ੍ਚਾਭਬ੍ਬਟ੍ਠਾਨਸ੍ਸ ਅਰਹਤੋ ਵਿਰਮਿਤਬ੍ਬਵੇਰਸ੍ਸ ਸਬ੍ਬਥਾ ਅਭਾਵਾ ਕਿਰਿਯੇਸੁ ਵਿਰਤਿਯੋ ਨ ਸਨ੍ਤੀਤਿ ਨ ਉਦ੍ਧਟਾ, ਸੇਕ੍ਖਾਨਂ ਪਨ ਪਹੀਨਪਞ੍ਚਵੇਰਤ੍ਤੇਪਿ ਤਂਸਭਾਗਤਾਯ ਵੇਰਭੂਤਾਨਂ ਅਕੁਸਲਾਨਂ ਵੇਰਨਿਦਾਨਾਨਂ ਲੋਭਾਦੀਨਞ੍ਚ ਸਬ੍ਭਾਵਾ ਵਿਰਤੀਨਂ ਉਪ੍ਪਤ੍ਤਿ ਨ ਨ ਭਵਿਸ੍ਸਤਿ. ਅਕੁਸਲਸਮੁਟ੍ਠਿਤਾਨਿ ਚ ਕਾਯਕਮ੍ਮਾਦੀਨਿ ਤੇਸਂ ਕਾਯਦੁਚ੍ਚਰਿਤਾਦੀਨਿ ਵੇਰਾਨੇਵ, ਤੇਹਿ ਚ ਤੇਸਂ ਵਿਰਤਿਯੋ ਹੋਨ੍ਤੇਵ, ਯਤੋ ਨਫਲਭੂਤਸ੍ਸਪਿ ਉਪਰਿਮਗ੍ਗਤ੍ਤਯਸ੍ਸ ਅਟ੍ਠਙ੍ਗਿਕਤਾ ਹੋਤਿ. ਸਿਕ੍ਖਾਵਾਰੇ ਚ ਅਭਾਵੇਤਬ੍ਬਤਾਯ ਫਲਧਮ੍ਮਾਪਿ ਨ ਸਿਕ੍ਖਿਤਬ੍ਬਾ, ਨਾਪਿ ਸਿਕ੍ਖਿਤਸਿਕ੍ਖਸ੍ਸ ਉਪ੍ਪਜ੍ਜਮਾਨਾ ਕਿਰਿਯਧਮ੍ਮਾਤਿ ਨ ਕੇਚਿ ਅਬ੍ਯਾਕਤਾ ਸਿਕ੍ਖਾਤਿ ਉਦ੍ਧਟਾ.
ਅਭਿਧਮ੍ਮਭਾਜਨੀਯਵਣ੍ਣਨਾ ਨਿਟ੍ਠਿਤਾ.
੨. ਪਞ੍ਹਪੁਚ੍ਛਕਵਣ੍ਣਨਾ
੭੧੪. ਸਮ੍ਪਤ੍ਤਵਿਰਤਿਵਸੇਨਾਤਿ ਸਮ੍ਪਤ੍ਤੇ ਪਚ੍ਚੁਪ੍ਪਨ੍ਨੇ ਆਰਮ੍ਮਣੇ ਯਥਾਵਿਰਮਿਤਬ੍ਬਤੋ ਵਿਰਤਿਵਸੇਨਾਤਿ ਅਤ੍ਥੋ.
ਪਞ੍ਹਪੁਚ੍ਛਕਵਣ੍ਣਨਾ ਨਿਟ੍ਠਿਤਾ.
ਸਿਕ੍ਖਾਪਦਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.