(੮) ੩. ਯਮਕਵਗ੍ਗੋ

੧-੧੦. ਸਦ੍ਧਾਸੁਤ੍ਤਾਦਿਵਣ੍ਣਨਾ

੭੧-੮੦. ਅਟ੍ਠਮਸ੍ਸ ਪਠਮਾਦੀਨਿ ਉਤ੍ਤਾਨਤ੍ਥਾਨੇਵ. ਦਸਮੇ ਕੁਚ੍ਛਿਤਂ ਸੀਦਤੀਤਿ ਕੁਸੀਤੋ ਦ-ਕਾਰਸ੍ਸ ਤ-ਕਾਰਂ ਕਤ੍ਵਾ. ਯਸ੍ਸ ਧਮ੍ਮਸ੍ਸ ਵਸੇਨ ਪੁਗ੍ਗਲੋ ‘‘ਕੁਸੀਤੋ’’ਤਿ ਵੁਚ੍ਚਤਿ, ਸੋ ਕੁਸਿਤਭਾਵੋ ਇਧ ਕੁਸਿਤ-ਸਦ੍ਦੇਨ ਵੁਤ੍ਤੋ. ਵਿਨਾਪਿ ਹਿ ਭਾਵਜੋਤਨਸਦ੍ਦਂ ਭਾਵਤ੍ਥੋ ਵਿਞ੍ਞਾਯਤਿ ਯਥਾ ‘‘ਪਟਸ੍ਸ ਸੁਕ੍ਕ’’ਨ੍ਤਿ, ਤਸ੍ਮਾ ਕੁਸੀਤਭਾਵਵਤ੍ਥੂਨੀਤਿ ਅਤ੍ਥੋ. ਤੇਨਾਹ ‘‘ਕੋਸਜ੍ਜਕਾਰਣਾਨੀਤਿ ਅਤ੍ਥੋ’’ਤਿ. ਕਮ੍ਮਂ ਨਾਮ ਸਮਣਸਾਰੁਪ੍ਪਂ ਈਦਿਸਨ੍ਤਿ ਆਹ ‘‘ਚੀਵਰਵਿਚਾਰਣਾਦੀ’’ਤਿ. ਵੀਰਿਯਨ੍ਤਿ ਪਧਾਨਵੀਰਿਯਂ. ਤਂ ਪਨ ਚਙ੍ਕਮਨਵਸੇਨ ਕਰਣੇ ਕਾਯਿਕਨ੍ਤਿਪਿ ਵਤ੍ਤਬ੍ਬਤਂ ਲਭਤੀਤਿ ਆਹ ‘‘ਦੁਵਿਧਮ੍ਪੀ’’ਤਿ. ਪਤ੍ਤਿਯਾਤਿ ਪਾਪੁਣਨਤ੍ਥਂ. ਓਸੀਦਨਨ੍ਤਿ ਭਾਵਨਾਨੁਯੋਗੇ ਸਙ੍ਕੋਚੋ. ਮਾਸੇਹਿ ਆਚਿਤਂ ਨਿਚਿਤਂ ਵਿਯਾਤਿ ਮਾਸਾਚਿਤਂ, ਤਂ ਮਞ੍ਞੇ. ਯਸ੍ਮਾ ਮਾਸਾ ਤਿਨ੍ਤਾ ਵਿਸੇਸੇਨ ਗਰੁਕਾ ਹੋਨ੍ਤਿ, ਤਸ੍ਮਾ ‘‘ਯਥਾ ਤਿਨ੍ਤਮਾਸੋ’’ਤਿਆਦਿ ਵੁਤ੍ਤਂ. ਵੁਟ੍ਠਿਤੋ ਹੋਤਿ ਗਿਲਾਨਭਾਵਾਤਿ ਅਧਿਪ੍ਪਾਯੋ.

ਤੇਸਨ੍ਤਿ ਆਰਮ੍ਭਵਤ੍ਥੂਨਂ. ਇਮਿਨਾਵ ਨਯੇਨਾਤਿ ਇਮਿਨਾ ਕੁਸੀਤਵਤ੍ਥੂਸੁ ਵੁਤ੍ਤੇਨੇਵ ਨਯੇਨ ‘‘ਦੁਵਿਧਮ੍ਪਿ ਵੀਰਿਯਂ ਆਰਭਤੀ’’ਤਿਆਦਿਨਾ. ਇਦਂ ਪਠਮਨ੍ਤਿ ‘‘ਇਦਂ, ਹਨ੍ਦਾਹਂ, ਵੀਰਿਯਂ ਆਰਭਾਮੀ’’ਤਿ, ‘‘ਏਵਂ ਭਾਵਨਾਯ ਅਬ੍ਭੁਸ੍ਸਹਨਂ ਪਠਮਂ ਆਰਮ੍ਭਵਤ੍ਥੂ’’ਤਿਆਦਿਨਾ ਚ ਅਤ੍ਥੋ ਵੇਦਿਤਬ੍ਬੋ. ਯਥਾ ਤਥਾ ਪਠਮਂ ਪਵਤ੍ਤਂ ਅਬ੍ਭੁਸ੍ਸਹਨਞ੍ਹਿ ਉਪਰਿ ਵੀਰਿਯਾਰਮ੍ਭਸ੍ਸ ਕਾਰਣਂ ਹੋਤਿ. ਅਨੁਰੂਪਪਚ੍ਚਵੇਕ੍ਖਣਸਹਿਤਾਨਿ ਹਿ ਅਬ੍ਭੁਸ੍ਸਹਨਾਨਿ ਤਮ੍ਮੂਲਕਾਨਿ ਵਾ ਪਚ੍ਚਵੇਕ੍ਖਣਾਨਿ ਅਟ੍ਠ ਆਰਮ੍ਭਵਤ੍ਥੂਨੀਤਿ ਵੇਦਿਤਬ੍ਬਾਨਿ.

ਸਦ੍ਧਾਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਯਮਕਵਗ੍ਗਵਣ੍ਣਨਾ ਨਿਟ੍ਠਿਤਾ.

੮੧-੬੨੬. ਸੇਸਂ ਉਤ੍ਤਾਨਮੇਵ.

ਇਤਿ ਮਨੋਰਥਪੂਰਣਿਯਾ ਅਙ੍ਗੁਤ੍ਤਰਨਿਕਾਯ-ਅਟ੍ਠਕਥਾਯ

ਅਟ੍ਠਕਨਿਪਾਤਵਣ੍ਣਨਾਯ ਅਨੁਤ੍ਤਾਨਤ੍ਥਦੀਪਨਾ ਸਮਤ੍ਤਾ.