੧-੮. ਸਂਖਿਤ੍ਤੂਪੋਸਥਸੁਤ੍ਤਾਦਿਵਣ੍ਣਨਾ

੪੧-੪੮. ਪਞ੍ਚਮਸ੍ਸ ਪਠਮਾਦੀਸੁ ਨਤ੍ਥਿ ਵਤ੍ਤਬ੍ਬਂ. ਛਟ੍ਠੇ (ਸਂ. ਨਿ. ਟੀ. ੧.੧.੧੬੫) ਪਞ੍ਚ ਅਙ੍ਗਾਨਿ ਏਤਸ੍ਸਾਤਿ ਪਞ੍ਚਙ੍ਗਂ, ਪਞ੍ਚਙ੍ਗਮੇਵ ਪਞ੍ਚਙ੍ਗਿਕਂ, ਤਸ੍ਸ ਪਞ੍ਚਙ੍ਗਿਕਸ੍ਸ. ਮਹਤੀ ਦਦ੍ਦਰੀ ਵੀਣਾਵਿਸੇਸੋਪਿ ਆਤਤਮੇਵਾਤਿ ‘‘ਚਮ੍ਮਪਰਿਯੋਨਦ੍ਧੇਸੂ’’ਤਿ ਵਿਸੇਸਨਂ ਕਤਂ. ਏਕਤਲਤੂਰਿਯਂ ਕੁਮ੍ਭਥੁਨਦਦ੍ਦਰਿਕਾਦਿ. ਉਭਯਤਲਂ ਭੇਰਿਮੁਦਿਙ੍ਗਾਦਿ. ਚਮ੍ਮਪਰਿਯੋਨਦ੍ਧਂ ਹੁਤ੍ਵਾ ਵਿਨਿਬਦ੍ਧਂ ਆਤਤਵਿਤਤਂ. ਸਬ੍ਬਸੋ ਪਰਿਯੋਨਦ੍ਧਂ ਨਾਮ ਚਤੁਰਸ੍ਸਅਮ੍ਬਣਂ ਪਣਵਾਦਿ ਚ. ਗੋਮੁਖੀਆਦੀਨਮ੍ਪਿ ਏਤ੍ਥੇਵ ਸਙ੍ਗਹੋ ਦਟ੍ਠਬ੍ਬੋ. ਵਂਸਾਦੀਤਿ ਆਦਿ-ਸਦ੍ਦੇਨ ਸਙ੍ਖਾਦੀਨਂ ਸਙ੍ਗਹੋ. ਸਮ੍ਮਾਦੀਤਿ ਸਮ੍ਮਤਾਲ਼ਕਂਸਤਾਲ਼ਸਿਲਾਸਲਾਕਤਾਲ਼ਾਦਿ. ਤਤ੍ਥ ਸਮ੍ਮਤਾਲ਼ਂ ਨਾਮ ਦਨ੍ਤਮਯਤਾਲ਼ਂ. ਕਂਸਤਾਲ਼ਂ ਲੋਹਮਯਂ. ਸਿਲਾਮਯਂ ਅਯੋਪਤ੍ਤੇਨ ਚ ਵਾਦਨਤਾਲ਼ਂ ਸਿਲਾਸਲਾਕਤਾਲ਼ਂ. ਸੁਮੁਚ੍ਛਿਤਸ੍ਸਾਤਿ ਸੁਟ੍ਠੁ ਪਟਿਯਤ੍ਤਸ੍ਸ. ਪਮਾਣੇਤਿ ਨਾਤਿਦਲ਼੍ਹਨਾਤਿਸਿਥਿਲਸਙ੍ਖਾਤੇ ਮਜ੍ਝਿਮੇ ਮੁਚ੍ਛਨਾਪਮਾਣੇ. ਛੇਕੋਤਿ ਪਟੁ ਪਟ੍ਠੋ. ਸੋ ਚਸ੍ਸ ਪਟੁਭਾਵੋ ਮਨੋਹਰੋਤਿ ਆਹ ‘‘ਸੁਨ੍ਦਰੋ’’ਤਿ. ਰਞ੍ਜੇਤੁਨ੍ਤਿ ਰਾਗਂ ਉਪ੍ਪਾਦੇਤੁਂ. ਖਮਤੇਵਾਤਿ ਰੋਚਤੇਵ. ਨ ਨਿਬ੍ਬਿਨ੍ਦਤੀਤਿ ਨ ਤਜ੍ਜੇਤਿ, ਸੋਤਸੁਖਭਾਵਤੋ ਪਿਯਾਯਿਤਬ੍ਬੋਵ ਹੋਤਿ.

ਭਤ੍ਤਾਰਂ ਨਾਤਿਮਞ੍ਞਤੀਤਿ ਸਾਮਿਕਂ ਮੁਞ੍ਚਿਤ੍ਵਾ ਅਞ੍ਞਂ ਮਨਸਾਪਿ ਨ ਪਤ੍ਥੇਤਿ. ਉਟ੍ਠਾਹਿਕਾਤਿ ਉਟ੍ਠਾਨਵੀਰਿਯਸਮ੍ਪਨ੍ਨਾ. ਅਨਲਸਾਤਿ ਨਿਕ੍ਕੋਸਜ੍ਜਾ. ਸਙ੍ਗਹਿਤਪਰਿਜ੍ਜਨਾਤਿ ਸਮ੍ਮਾਨਨਾਦੀਹਿ ਚੇਵ ਛਣਾਦੀਸੁ ਪੇਸੇਤਬ੍ਬ-ਪਿਯਭਣ੍ਡਾਦਿਪਣ੍ਣਾਕਾਰਪੇਸਨਾਦੀਹਿ ਚ ਸਙ੍ਗਹਿਤਪਰਿਜਨਾ. ਇਧ ਪਰਿਜਨੋ ਨਾਮ ਸਾਮਿਕਸ੍ਸ ਚੇਵ ਅਤ੍ਤਨੋ ਚ ਞਾਤਿਜਨੋ. ਸਮ੍ਭਤਨ੍ਤਿ ਕਸਿਵਣਿਜ੍ਜਾਦੀਨਿ ਕਤ੍ਵਾ ਆਭਤਧਨਂ. ਸਤ੍ਤਮਟ੍ਠਮਾਨਿ ਉਤ੍ਤਾਨਤ੍ਥਾਨਿ.

ਸਂਖਿਤ੍ਤੂਪੋਸਥਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.