੪. ਦਾਨਵਗ੍ਗੋ

੧-੪. ਪਠਮਦਾਨਸੁਤ੍ਤਾਦਿਵਣ੍ਣਨਾ

੩੧-੩੪. ਚਤੁਤ੍ਥਸ੍ਸ ਪਠਮੇ ਆਸਜ੍ਜਾਤਿ ਯਸ੍ਸ ਦੇਤਿ, ਤਸ੍ਸ ਆਗਮਨਹੇਤੁ ਤੇਨ ਸਮਾਗਮਨਿਮਿਤ੍ਤਂ. ਭਯਾਤਿ ਭਯਹੇਤੁ. ਨਨੁ ਭਯਂ ਨਾਮ ਲਦ੍ਧਕਾਮਤਾਰਾਗਾਦਯੋ ਵਿਯ ਚੇਤਨਾਯ ਅਵਿਸੁਦ੍ਧਿਕਰਂ, ਤਂ ਕਸ੍ਮਾ ਇਧ ਗਹਿਤਨ੍ਤਿ? ਨਯਿਦਂ ਤਾਦਿਸਂ ਵੋਹਾਰਭਯਾਦਿਂ ਸਨ੍ਧਾਯ ਵੁਤ੍ਤਨ੍ਤਿ ਦਸ੍ਸੇਤੁਂ ‘‘ਅਯਂ ਅਦਾਯਕੋ ਅਕਾਰਕੋ’’ਤਿਆਦਿ ਵੁਤ੍ਤਂ. ਅਦਾਸਿ ਮੇਤਿ ਯਂ ਪੁਬ੍ਬੇ ਕਤਂ ਉਪਕਾਰਂ ਚਿਨ੍ਤੇਤ੍ਵਾ ਦੀਯਤਿ, ਤਂ ਸਨ੍ਧਾਯ ਵੁਤ੍ਤਂ. ਦਸ੍ਸਤਿ ਮੇਤਿ ਪਚ੍ਚੁਪਕਾਰਾਸੀਸਾਯ ਯਂ ਦੀਯਤਿ, ਤਂ ਸਨ੍ਧਾਯ ਵਦਤਿ. ਸਾਹੁ ਦਾਨਨ੍ਤਿ ਦਾਨਂ ਨਾਮੇਤਂ ਪਣ੍ਡਿਤਪਞ੍ਞਤ੍ਤਨ੍ਤਿ ਸਾਧੁਸਮਾਚਾਰੇ ਠਤ੍ਵਾ ਦੇਤਿ. ਅਲਙ੍ਕਾਰਤ੍ਥਨ੍ਤਿ ਉਪਸੋਭਨਤ੍ਥਂ. ਦਾਨਞ੍ਹਿ ਦਤ੍ਵਾ ਤਂ ਪਚ੍ਚਵੇਕ੍ਖਨ੍ਤਸ੍ਸ ਪਾਮੋਜ੍ਜਪੀਤਿਸੋਮਨਸ੍ਸਾਦਯੋ ਉਪ੍ਪਜ੍ਜਨ੍ਤਿ, ਲੋਭਦੋਸਇਸ੍ਸਾਮਚ੍ਛੇਰਾਦਯੋਪਿ ਵਿਦੂਰੀ ਭਵਨ੍ਤਿ. ਇਦਾਨਿ ਦਾਨਂ ਅਨੁਕੂਲਧਮ੍ਮਪਰਿਬ੍ਰੂਹਨੇਨ ਪਚ੍ਚਨੀਕਧਮ੍ਮਵਿਦੂਰੀਕਰਣੇਨ ਚ ਭਾਵਨਾਚਿਤ੍ਤਸ੍ਸ ਉਪਸੋਭਨਾਯ ਚ ਪਰਿਕ੍ਖਾਰਾਯ ਚ ਹੋਤੀਤਿ ‘‘ਅਲਙ੍ਕਾਰਤ੍ਥਞ੍ਚੇਵ ਪਰਿਕ੍ਖਾਰਤ੍ਥਞ੍ਚ ਦੇਤੀ’’ਤਿ ਵੁਤ੍ਤਂ. ਤੇਨਾਹ ‘‘ਦਾਨਞ੍ਹਿ ਚਿਤ੍ਤਂ ਮੁਦੁਂ ਕਰੋਤੀ’’ਤਿਆਦਿ. ਮੁਦੁਚਿਤ੍ਤੋ ਹੋਤਿ ਲਦ੍ਧਾ ਦਾਯਕੇ ‘‘ਇਮਿਨਾ ਮਯ੍ਹਂ ਸਙ੍ਗਹੋ ਕਤੋ’’ਤਿ, ਦਾਤਾਪਿ ਲਦ੍ਧਰਿ. ਤੇਨ ਵੁਤ੍ਤਂ ‘‘ਉਭਿਨ੍ਨਮ੍ਪਿ ਚਿਤ੍ਤਂ ਮੁਦੁਂ ਕਰੋਤੀ’’ਤਿ.

ਅਦਨ੍ਤਦਮਨਨ੍ਤਿ ਅਦਨ੍ਤਾ ਅਨਸ੍ਸਵਾਪਿਸ੍ਸ ਦਾਨੇਨ ਦਨ੍ਤਾ ਅਸ੍ਸਵਾ ਹੋਨ੍ਤਿ, ਵਸੇ ਵਤ੍ਤਨ੍ਤਿ. ਅਦਾਨਂ ਦਨ੍ਤਦੂਸਕਨ੍ਤਿ ਅਦਾਨਂ ਪੁਬ੍ਬੇ ਦਨ੍ਤਾਨਂ ਅਸ੍ਸਵਾਨਮ੍ਪਿ ਵਿਘਾਤੁਪ੍ਪਾਦਨੇਨ ਚਿਤ੍ਤਂ ਦੂਸੇਤਿ. ਉਨ੍ਨਮਨ੍ਤਿ ਦਾਯਕਾ ਪਿਯਂਵਦਾ ਚ ਪਰੇਸਂ ਗਰੁਚਿਤ੍ਤੀਕਾਰਟ੍ਠਾਨਤਾਯ. ਨਮਨ੍ਤਿਪਟਿਗ੍ਗਾਹਕਾ ਦਾਨੇਨ ਪਿਯਵਾਚਾਯ ਚ ਲਦ੍ਧਸਙ੍ਗਹਾਸਙ੍ਗਾਹਕਾਨਂ.

ਚਿਤ੍ਤਾਲਙ੍ਕਾਰਦਾਨਮੇਵ ਉਤ੍ਤਮਂ ਅਨੁਪਕ੍ਕਿਲਿਟ੍ਠਤਾਯ ਸੁਪਰਿਸੁਦ੍ਧਤਾਯ ਗੁਣਵਿਸੇਸਪਚ੍ਚਯਤਾਯ ਚ. ਦੁਤਿਯਾਦੀਨਿ ਉਤ੍ਤਾਨਤ੍ਥਾਨੇਵ.

ਪਠਮਦਾਨਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੫. ਦਾਨੂਪਪਤ੍ਤਿਸੁਤ੍ਤਵਣ੍ਣਨਾ

੩੫. ਪਞ੍ਚਮੇ ਦਾਨਪਚ੍ਚਯਾਤਿ ਦਾਨਕਾਰਣਾ, ਦਾਨਮਯਪੁਞ੍ਞਸ੍ਸ ਕਤਤ੍ਤਾ ਉਪਚਿਤਤ੍ਤਾਤਿ ਅਤ੍ਥੋ. ਉਪਪਤ੍ਤਿਯੋਤਿ ਮਨੁਸ੍ਸੇਸੁ ਦੇਵੇਸੁ ਚ ਨਿਬ੍ਬਤ੍ਤਿਯੋ. ਠਪੇਤੀਤਿ ਏਕਵਾਰਮੇਵ ਅਨੁਪ੍ਪਜ੍ਜਿਤ੍ਵਾ ਯਥਾ ਉਪਰਿ ਤੇਨੇਵਾਕਾਰੇਨ ਪਵਤ੍ਤਤਿ, ਏਵਂ ਠਪੇਤਿ. ਤਦੇਵ ਚਸ੍ਸ ਅਧਿਟ੍ਠਾਨਨ੍ਤਿ ਆਹ ‘‘ਤਸ੍ਸੇਵ ਵੇਵਚਨ’’ਨ੍ਤਿ. ਵਡ੍ਢੇਤੀਤਿ ਬ੍ਰੂਹੇਤਿ ਨ ਹਾਪੇਤਿ. ਵਿਮੁਤ੍ਤਨ੍ਤਿ ਅਧਿਮੁਤ੍ਤਂ, ਨਿਨ੍ਨਂ ਪੋਣਂ ਪਬ੍ਭਾਰਨ੍ਤਿ ਅਤ੍ਥੋ. ਵਿਮੁਤ੍ਤਨ੍ਤਿ ਵਾ ਵਿਸ੍ਸਟ੍ਠਂ. ਨਿਪ੍ਪਰਿਯਾਯਤੋ ਉਤ੍ਤਰਿ ਨਾਮ ਪਣੀਤਂ ਮਜ੍ਝੇਪਿ ਹੀਨਮਜ੍ਝਿਮਵਿਭਾਗਸ੍ਸ ਲਬ੍ਭਨਤੋਤਿ ਵੁਤ੍ਤਂ ‘‘ਉਤ੍ਤਰਿ ਅਭਾਵਿਤਨ੍ਤਿ ਤਤੋ ਉਪਰਿਮਗ੍ਗਫਲਤ੍ਥਾਯ ਅਭਾਵਿਤ’’ਨ੍ਤਿ. ਸਂਵਤ੍ਤਤਿ ਤਥਾਪਣਿਹਿਤਂ ਦਾਨਮਯਂ ਚਿਤ੍ਤਂ. ਯਂ ਪਨ ਪਾਲ਼ਿਯਂ ‘‘ਤਞ੍ਚ ਖੋ’’ਤਿਆਦਿ ਵੁਤ੍ਤਂ, ਤਂ ਤਤ੍ਰੁਪਪਤ੍ਤਿਯਾ ਵਿਬਨ੍ਧਕਰਦੁਸ੍ਸੀਲ੍ਯਾਭਾਵਦਸ੍ਸਨਪਰਂ ਦਟ੍ਠਬ੍ਬਂ, ਨ ਦਾਨਮਯਸ੍ਸ ਪੁਞ੍ਞਸ੍ਸ ਕੇਵਲਸ੍ਸ ਤਂਸਂਵਤ੍ਤਨਤਾਦਸ੍ਸਨਪਰਨ੍ਤਿ ਦਟ੍ਠਬ੍ਬਂ. ਸਮੁਚ੍ਛਿਨ੍ਨਰਾਗਸ੍ਸਾਤਿ ਸਮੁਚ੍ਛਿਨ੍ਨਕਾਮਰਾਗਸ੍ਸ. ਤਸ੍ਸ ਹਿ ਸਿਯਾ ਬ੍ਰਹ੍ਮਲੋਕੇ ਉਪਪਤ੍ਤਿ, ਨ ਸਮੁਚ੍ਛਿਨ੍ਨਭਵਰਾਗਸ੍ਸ. ਵੀਤਰਾਗਗ੍ਗਹਣੇਨ ਚੇਤ੍ਥ ਕਾਮੇਸੁ ਵੀਤਰਾਗਤਾ ਅਧਿਪ੍ਪੇਤਾ, ਯਾਯ ਬ੍ਰਹ੍ਮਲੋਕੂਪਪਤ੍ਤਿ ਸਿਯਾ. ਤੇਨਾਹ ‘‘ਦਾਨਮਤ੍ਤੇਨੇਵਾ’’ਤਿਆਦਿ. ਯਦਿ ਏਵਂ ਦਾਨਂ ਤਤ੍ਥ ਕਿਮਤ੍ਥਿਯਨ੍ਤਿ ਆਹ ‘‘ਦਾਨਂ ਪਨਾ’’ਤਿਆਦਿ. ਦਾਨੇਨ ਮੁਦੁਚਿਤ੍ਤੋਤਿ ਬਦ੍ਧਾਘਾਤੇ ਵੇਰਿਪੁਗ੍ਗਲੇਪਿ ਅਤ੍ਤਨੋ ਦਾਨਸਮ੍ਪਟਿਚ੍ਛਨੇਨ ਮੁਦੁਭੂਤਚਿਤ੍ਤੋ.

ਦਾਨੂਪਪਤ੍ਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਪੁਞ੍ਞਕਿਰਿਯਵਤ੍ਥੁਸੁਤ੍ਤਵਣ੍ਣਨਾ

੩੬. ਛਟ੍ਠੇ ਪੁਜ੍ਜਭਵਫਲਂ ਨਿਬ੍ਬਤ੍ਤੇਨ੍ਤਿ, ਅਤ੍ਤਨੋ ਸਨ੍ਤਾਨਂ ਪੁਨਨ੍ਤੀਤਿ ਵਾ ਪੁਞ੍ਞਾਨਿ ਚ ਤਾਨਿ ਹੇਤੁਪਚ੍ਚਯੇਹਿ ਕਤ੍ਤਬ੍ਬਤੋ ਕਿਰਿਯਾ ਚਾਤਿ ਪੁਞ੍ਞਕਿਰਿਯਾ, ਤਾਯੇਵ ਚ ਤੇਸਂ ਤੇਸਂ ਪਿਯਮਨਾਪਤਾਦਿਆਨਿਸਂਸਾਨਂ ਵਤ੍ਥੁਭਾਵਤੋ ਪੁਞ੍ਞਕਿਰਿਯਵਤ੍ਥੂਨਿ.

ਅਨੁਚ੍ਛਿਨ੍ਨਭਵਮੂਲਸ੍ਸ ਅਨੁਗ੍ਗਹਵਸੇਨ, ਪੂਜਾਵਸੇਨ ਵਾ ਅਤ੍ਤਨੋ ਦੇਯ੍ਯਧਮ੍ਮਸ੍ਸ ਪਰਸ੍ਸ ਪਰਿਚ੍ਚਾਗਚੇਤਨਾ ਦੀਯਤਿ ਏਤੇਨਾਤਿ ਦਾਨਂ, ਦਾਨਮੇਵ ਦਾਨਮਯਂ. ਪਦਪੂਰਣਮਤ੍ਤਂ ਮਯ-ਸਦ੍ਦੋ. ਚੀਵਰਾਦੀਸੁ ਚਤੂਸੁ ਪਚ੍ਚਯੇਸੁ (ਦੀ. ਨਿ. ਅਟ੍ਠ. ੩.੩੦੫), ਅਨ੍ਨਾਦੀਸੁ ਵਾ ਦਸਸੁ ਦਾਨਵਤ੍ਥੂਸੁ, ਰੂਪਾਦੀਸੁ ਵਾ ਛਸੁ ਆਰਮ੍ਮਣੇਸੁ ਤਂ ਤਂ ਦੇਨ੍ਤਸ੍ਸ ਤੇਸਂ ਉਪ੍ਪਾਦਨਤੋ ਪਟ੍ਠਾਯ ਪੁਬ੍ਬਭਾਗੇ ਪਰਿਚ੍ਚਾਗਕਾਲੇ ਪਚ੍ਛਾ ਸੋਮਨਸ੍ਸਚਿਤ੍ਤੇਨ ਅਨੁਸ੍ਸਰਣੇ ਚਾਤਿ ਤੀਸੁ ਕਾਲੇਸੁ ਪਵਤ੍ਤਚੇਤਨਾ ਦਾਨਮਯਂ ਪੁਞ੍ਞਕਿਰਿਯਵਤ੍ਥੁ ਨਾਮ.

ਨਿਚ੍ਚਸੀਲਉਪੋਸਥਸੀਲਾਦਿਵਸੇਨ ਪਞ੍ਚ ਅਟ੍ਠ ਦਸ ਵਾ ਸੀਲਾਨਿ ਸਮਾਦਿਯਨ੍ਤਸ੍ਸ ‘‘ਸੀਲਪੂਰਣਤ੍ਥਂ ਪਬ੍ਬਜਿਸ੍ਸਾਮੀ’’ਤਿ ਵਿਹਾਰਂ ਗਚ੍ਛਨ੍ਤਸ੍ਸ ਪਬ੍ਬਜਨ੍ਤਸ੍ਸ, ਮਨੋਰਥਂ ਮਤ੍ਥਕਂ ਪਾਪੇਤ੍ਵਾ ‘‘ਪਬ੍ਬਜਿਤੋ ਵਤਮ੍ਹਿ ਸਾਧੁ ਸੁਟ੍ਠੂ’’ਤਿ ਆਵਜ੍ਜੇਨ੍ਤਸ੍ਸ, ਸਦ੍ਧਾਯ ਪਾਤਿਮੋਕ੍ਖਂ ਪਰਿਪੂਰੇਨ੍ਤਸ੍ਸ, ਪਞ੍ਞਾਯ ਚੀਵਰਾਦਿਕੇ ਪਚ੍ਚਯੇ ਪਚ੍ਚਵੇਕ੍ਖਨ੍ਤਸ੍ਸ, ਸਤਿਯਾ ਆਪਾਥਗਤੇਸੁ ਰੂਪਾਦੀਸੁ ਚਕ੍ਖੁਦ੍ਵਾਰਾਦੀਨਿ ਸਂਵਰਨ੍ਤਸ੍ਸ, ਵੀਰਿਯੇਨ ਆਜੀਵਂ ਸੋਧੇਨ੍ਤਸ੍ਸ ਚ ਪਵਤ੍ਤਚੇਤਨਾ ਸੀਲਤਿ, ਸੀਲੇਤੀਤਿ ਵਾ ਸੀਲਮਯਂ ਪੁਞ੍ਞਕਿਰਿਯਵਤ੍ਥੁ ਨਾਮ.

ਪਟਿਸਮ੍ਭਿਦਾਯਂ (ਪਟਿ. ਮ. ੧.੪੮) ਵੁਤ੍ਤੇਨ ਵਿਪਸ੍ਸਨਾਮਗ੍ਗੇਨ ਚਕ੍ਖੁਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਵਿਪਸ੍ਸਨ੍ਤਸ੍ਸ, ਸੋਤਂ…ਪੇ… ਘਾਨਂ…ਪੇ… ਜਿਵ੍ਹਂ…ਪੇ… ਕਾਯਂ…ਪੇ… ਰੂਪੇ…ਪੇ… ਧਮ੍ਮੇ…ਪੇ… ਚਕ੍ਖੁਵਿਞ੍ਞਾਣਂ…ਪੇ… ਮਨੋਵਿਞ੍ਞਾਣਂ…ਪੇ… ਚਕ੍ਖੁਸਮ੍ਫਸ੍ਸਂ …ਪੇ… ਮਨੋਸਮ੍ਫਸ੍ਸਂ…ਪੇ… ਚਕ੍ਖੁਸਮ੍ਫਸ੍ਸਜਂ ਵੇਦਨਂ…ਪੇ… ਮਨੋਸਮ੍ਫਸ੍ਸਜਂ ਵੇਦਨਂ…ਪੇ… ਜਰਾਮਰਣਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਵਿਪਸ੍ਸਨ੍ਤਸ੍ਸ ਯਾ ਚੇਤਨਾ, ਯਾ ਚ ਪਥਵੀਕਸਿਣਾਦੀਸੁ ਸਬ੍ਬਾਸੁ ਅਟ੍ਠਤ੍ਤਿਂਸਾਯ ਆਰਮ੍ਮਣੇਸੁ ਪਵਤ੍ਤਾ ਝਾਨਚੇਤਨਾ, ਯਾ ਚ ਅਨਵਜ੍ਜੇਸੁ ਕਮ੍ਮਾਯਤਨਸਿਪ੍ਪਾਯਤਨਵਿਜ੍ਜਾਟ੍ਠਾਨੇਸੁ ਪਰਿਚਯਮਨਸਿਕਾਰਾਦਿਵਸੇਨ ਪਵਤ੍ਤਾ ਚੇਤਨਾ, ਸਬ੍ਬਾ ਸਾ ਭਾਵੇਤਿ ਏਤਾਯਾਤਿ ਭਾਵਨਾਮਯਂ ਵੁਤ੍ਤਨਯੇਨ ਪੁਞ੍ਞਕਿਰਿਯਵਤ੍ਥੁ ਚਾਤਿ ਭਾਵਨਾਮਯਂ ਪੁਞ੍ਞਕਿਰਿਯਵਤ੍ਥੁ.

ਏਕਮੇਕਞ੍ਚੇਤ੍ਥ ਯਥਾਰਹਂ ਪੁਬ੍ਬਭਾਗਤੋ ਪਟ੍ਠਾਯ ਕਰੋਨ੍ਤਸ੍ਸ ਕਾਯਕਮ੍ਮਂ ਹੋਤਿ. ਤਦਤ੍ਥਂ ਵਾਚਂ ਨਿਚ੍ਛਾਰੇਨ੍ਤਸ੍ਸ ਵਚੀਕਮ੍ਮਂ. ਕਾਯਙ੍ਗਂ ਵਾਚਙ੍ਗਞ੍ਚ ਅਚੋਪੇਤ੍ਵਾ ਮਨਸਾ ਚਿਨ੍ਤਯਨ੍ਤਸ੍ਸ ਮਨੋਕਮ੍ਮਂ. ਅਨ੍ਨਾਦੀਨਿ ਦੇਨ੍ਤਸ੍ਸ ਚਾਪਿ ‘‘ਅਨ੍ਨਦਾਨਾਦੀਨਿ ਦੇਮੀ’’ਤਿ ਵਾ, ਦਾਨਪਾਰਮਿਂ ਆਵਜ੍ਜੇਤ੍ਵਾ ਵਾ ਦਾਨਕਾਲੇ ਦਾਨਮਯਂ ਪੁਞ੍ਞਕਿਰਿਯਵਤ੍ਥੁ ਹੋਤਿ. ਯਥਾ ਹਿ ਕੇਵਲਂ ‘‘ਅਨ੍ਨਦਾਨਾਦੀਨਿ ਦੇਮੀ’’ਤਿ ਦਾਨਕਾਲੇ ਦਾਨਮਯਂ ਪੁਞ੍ਞਕਿਰਿਯਵਤ੍ਥੁ ਹੋਤਿ, ਏਵਂ ‘‘ਇਦਂ ਦਾਨਮਯਂ ਸਮ੍ਮਾਸਮ੍ਬੋਧਿਯਾ ਪਚ੍ਚਯੋ ਹੋਤੂ’’ਤਿ ਦਾਨਪਾਰਮਿਂ ਆਵਜ੍ਜੇਤ੍ਵਾ ਦਾਨਕਾਲੇਪਿ ਦਾਨਸੀਸੇਨੇਵ ਪਵਤ੍ਤਿਤਤ੍ਤਾ. ਵਤ੍ਤਸੀਸੇ ਠਤ੍ਵਾ ਦਦਨ੍ਤੋ ‘‘ਏਤਂ ਦਾਨਂ ਨਾਮ ਮਯ੍ਹਂ ਕੁਲਵਂਸਹੇਤੁ ਪਵੇਣਿਚਾਰਿਤ੍ਤ’’ਨ੍ਤਿ ਚਾਰਿਤ੍ਤਸੀਸੇਨ ਵਾ ਦੇਨ੍ਤੋ ਚਾਰਿਤ੍ਤਸੀਲਤ੍ਤਾ ਸੀਲਮਯਂ. ਖਯਤੋ ਵਯਤੋ ਸਮ੍ਮਸਨਂ ਪਟ੍ਠਪੇਤ੍ਵਾ ਦਦਤੋ ਭਾਵਨਾਮਯਂ ਪੁਞ੍ਞਕਿਰਿਯਵਤ੍ਥੁ ਹੋਤਿ. ਯਥਾ ਹਿ ਦੇਯ੍ਯਧਮ੍ਮਪਰਿਚ੍ਚਾਗਵਸੇਨ ਵਤ੍ਤਮਾਨਾਪਿ ਦਾਨਚੇਤਨਾ ਵਤ੍ਤਸੀਸੇ ਠਤ੍ਵਾ ਦਦਤੋ ਸੀਲਮਯਂ ਪੁਞ੍ਞਕਿਰਿਯਵਤ੍ਥੁ ਹੋਤਿ ਪੁਬ੍ਬਾਭਿਸਙ੍ਖਾਰਸ੍ਸ ਅਪਰਭਾਗੇ ਚੇਤਨਾਯ ਚ ਤਥਾਪਵਤ੍ਤਤ੍ਤਾ.

ਪੁਞ੍ਞਕਿਰਿਯਵਤ੍ਥੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭-੮. ਸਪ੍ਪੁਰਿਸਦਾਨਸੁਤ੍ਤਾਦਿਵਣ੍ਣਨਾ

੩੭-੩੮. ਸਤ੍ਤਮੇ ਵਿਚੇਯ੍ਯ ਦੇਤੀਤਿ ਏਤ੍ਥ ਦ੍ਵੇ ਵਿਚਿਨਨਾਨਿ ਦਕ੍ਖਿਣੇਯ੍ਯਵਿਚਿਨਨਂ, ਦਕ੍ਖਿਣਾਵਿਚਿਨਨਞ੍ਚ. ਤੇਸੁ ਵਿਪਨ੍ਨਸੀਲੇ ਇਤੋ ਬਹਿਦ੍ਧਾ ਪਞ੍ਚਨਵੁਤਿ ਪਾਸਣ੍ਡਭੇਦੇ ਚ ਦਕ੍ਖਿਣੇਯ੍ਯੇ ਪਹਾਯ ਸੀਲਾਦਿਗੁਣਸਮ੍ਪਨ੍ਨਾਨਂ ਸਾਸਨੇ ਪਬ੍ਬਜਿਤਾਨਂ ਦਾਨਂ ਦਕ੍ਖਿਣੇਯ੍ਯਵਿਚਿਨਨਂ ਨਾਮ. ਲਾਮਕਲਾਮਕੇ ਪਚ੍ਚਯੇ ਅਪਨੇਤ੍ਵਾ ਪਣੀਤਪਣੀਤੇ ਵਿਚਿਨਿਤ੍ਵਾ ਤੇਸਂ ਦਾਨਂ ਦਕ੍ਖਿਣਾਵਿਚਿਨਨਂ ਨਾਮ. ਤੇਨਾਹ ‘‘ਇਮਸ੍ਸ ਦਿਨ੍ਨਂ ਮਹਪ੍ਫਲਂ ਭਵਿਸ੍ਸਤੀ’’ਤਿਆਦਿ. ਅਟ੍ਠਮੇ ਨਤ੍ਥਿ ਵਤ੍ਤਬ੍ਬਂ.

ਸਪ੍ਪੁਰਿਸਦਾਨਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੯-੧੦. ਅਭਿਸਨ੍ਦਸੁਤ੍ਤਾਦਿਵਣ੍ਣਨਾ

੩੯-੪੦. ਨਵਮੇ ਪੁਞ੍ਞਾਭਿਸਨ੍ਦਾਤਿ ਪੁਞ੍ਞਨਦਿਯੋ. ਕੁਸਲਾਭਿਸਨ੍ਦਾਤਿ ਕੁਸਲਾਨਂ ਪਵਾਹਾ. ਸੁਖਸ੍ਸਾਹਾਰਾਤਿ ਸੁਖਪਚ੍ਚਯਾ. ਅਗ੍ਗਾਨੀਤਿ ਞਾਤਤ੍ਤਾ ਅਗ੍ਗਞ੍ਞਾਨਿ. ਚਿਰਰਤ੍ਤਂ ਞਾਤਤ੍ਤਾ ਰਤ੍ਤਞ੍ਞਾਨਿ. ਅਰਿਯਾਨਂ ਸਾਧੂਨਂ ਵਂਸਾਨੀਤਿ ਞਾਤਤ੍ਤਾ ਵਂਸਞ੍ਞਾਨਿ. ਪੋਰਾਣਾਨਂ ਆਦਿਪੁਰਿਸਾਨਂ ਏਤਾਨੀਤਿ ਪੋਰਾਣਾਨਿ. ਸਬ੍ਬਸੋ ਕੇਨਚਿਪਿ ਪਕਾਰੇਨ ਸਾਧੂਹਿ ਨ ਕਿਣ੍ਣਾਨਿ ਨ ਖਿਤ੍ਤਾਨਿ ਛਡ੍ਡਿਤਾਨੀਤਿ ਅਸਂਕਿਣ੍ਣਾਨਿ. ਅਯਞ੍ਚ ਨਯੋ ਨੇਸਂ ਯਥਾ ਅਤੀਤੇ, ਏਵਂ ਏਤਰਹਿ ਅਨਾਗਤੇ ਚਾਤਿ ਆਹ ‘‘ਅਸਂਕਿਣ੍ਣਪੁਬ੍ਬਾਨਿ ਨ ਸਂਕਿਯਨ੍ਤਿ ਨ ਸਂਕਿਯਿਸ੍ਸਨ੍ਤੀ’’ਤਿ. ਤਤੋ ਏਵ ਅਪ੍ਪਟਿਕੁਟ੍ਠਾਨਿ. ਨ ਹਿ ਕਦਾਚਿ ਵਿਞ੍ਞੂ ਸਮਣਬ੍ਰਾਹ੍ਮਣਾ ਹਿਂਸਾਦਿਪਾਪਧਮ੍ਮਂ ਅਨੁਜਾਨਨ੍ਤਿ. ਅਪਰਿਮਾਣਾਨਂ ਸਤ੍ਤਾਨਂ ਅਭਯਂ ਦੇਤੀਤਿ ਸਬ੍ਬੇਸੁ ਭੂਤੇਸੁ ਨਿਹਿਤਦਣ੍ਡਤ੍ਤਾ ਸਕਲਸ੍ਸਪਿ ਸਤ੍ਤਕਾਯਸ੍ਸ ਭਯਾਭਾਵਂ ਦੇਤਿ. ਅਵੇਰਨ੍ਤਿ ਵੇਰਾਭਾਵਂ. ਅਬ੍ਯਾਬਜ੍ਝਨ੍ਤਿ ਨਿਦ੍ਦੁਕ੍ਖਤਂ. ਏਵਮੇਤ੍ਥ ਸਙ੍ਖੇਪਤੋ ਪਾਲ਼ਿਵਣ੍ਣਨਾ ਵੇਦਿਤਬ੍ਬਾ. ਦਸਮੇ ਨਤ੍ਥਿ ਵਤ੍ਤਬ੍ਬਂ.

ਅਭਿਸਨ੍ਦਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਦਾਨਵਗ੍ਗਵਣ੍ਣਨਾ ਨਿਟ੍ਠਿਤਾ.