੭. ਭਾਵਨਾਸੁਤ੍ਤਵਣ੍ਣਨਾ

੭੧. ਸਤ੍ਤਮੇ ਅਤ੍ਥਸ੍ਸ ਅਸਾਧਿਕਾ ‘‘ਭਾਵਨਂ ਅਨਨੁਯੁਤ੍ਤਸ੍ਸਾ’’ਤਿ ਵੁਤ੍ਤਤ੍ਤਾ. ਸਮ੍ਭਾਵਨਤ੍ਥੇਤਿ ‘‘ਅਪਿ ਨਾਮ ਏਵਂ ਸਿਯਾ’’ਤਿ ਵਿਕਪ੍ਪਨਤ੍ਥੋ ਸਮ੍ਭਾਵਨਤ੍ਥੋ. ਏਵਞ੍ਹਿ ਲੋਕੇ ਸਿਲਿਟ੍ਠਵਚਨਂ ਹੋਤੀਤਿ ਏਕਮੇਵ ਸਙ੍ਖਂ ਅਵਤ੍ਵਾ ਅਪਰਾਯ ਸਙ੍ਖਾਯ ਸਦ੍ਧਿਂ ਵਚਨਂ ਲੋਕੇ ਸਿਲਿਟ੍ਠਵਚਨਂ ਹੋਤਿ ਯਥਾ ‘‘ਦ੍ਵੇ ਵਾ ਤੀਣਿ ਵਾ ਉਦਕਫੁਸਿਤਾਨੀ’’ਤਿ. ਸਮ੍ਮਾ ਅਧਿਸਯਿਤਾਨੀਤਿ ਪਾਦਾਦੀਹਿ ਅਤ੍ਤਨਾ ਨੇਸਂ ਕਿਞ੍ਚਿ ਉਪਘਾਤਂ ਅਕਰੋਨ੍ਤਿਯਾ ਬਹਿਵਾਤਾਦਿਪਰਿਸ੍ਸਯਪਰਿਹਰਣਤ੍ਥਂ ਸਮ੍ਮਦੇਵ ਉਪਰਿ ਸਯਿਤਾਨਿ. ਉਪਰਿਅਤ੍ਥੋ ਹੇਤ੍ਥ ਅਧਿ-ਸਦ੍ਦੋ. ਉਤੁਂ ਗਣ੍ਹਾਪੇਨ੍ਤਿਯਾਤਿ ਤੇਸਂ ਅਲ੍ਲਸਿਨੇਹਪਰਿਯਾਦਾਨਤ੍ਥਂ ਅਤ੍ਤਨੋ ਕਾਯੁਸ੍ਮਾਵਸੇਨ ਉਤੁਂ ਗਣ੍ਹਾਪੇਨ੍ਤਿਯਾ. ਤੇਨਾਹ ‘‘ਉਸ੍ਮੀਕਤਾਨੀ’’ਤਿ. ਸਮ੍ਮਾ ਪਰਿਭਾਵਿਤਾਨੀਤਿ ਸਮ੍ਮਦੇਵ ਸਬ੍ਬਸੋ ਕੁਕ੍ਕੁਟਵਾਸਨਾਯ ਵਾਸਿਤਾਨਿ. ਤੇਨਾਹ ‘‘ਕੁਕ੍ਕੁਟਗਨ੍ਧਂ ਗਾਹਾਪਿਤਾਨੀ’’ਤਿ. ਏਤ੍ਥ ਚ ਸਮ੍ਮਾਪਰਿਸੇਦਨਂ ਕੁਕ੍ਕੁਟਗਨ੍ਧਪਰਿਭਾਵਨਞ੍ਚ ਸਮ੍ਮਾਅਧਿਸਯਨਸਮ੍ਮਾਪਰਿਸੇਦਨਨਿਪ੍ਫਤ੍ਤਿਯਾ ਆਨੁਭਾਵਨਿਪ੍ਫਾਦਿਤਨ੍ਤਿ ਦਟ੍ਠਬ੍ਬਂ. ਸਮ੍ਮਾਅਧਿਸਯਨੇਨੇਵ ਹਿ ਇਤਰਦ੍ਵਯਂ ਇਜ੍ਝਤਿ. ਨ ਹਿ ਸਮ੍ਮਾਅਧਿਸਯਨਤੋ ਵਿਸੁਂ ਸਮ੍ਮਾਪਰਿਸੇਦਨਸ੍ਸ ਸਮ੍ਮਾਪਰਿਭਾਵਨਸ੍ਸ ਚ ਕਾਰਣਂ ਅਤ੍ਥਿ. ਤੇਨ ਪਨ ਸਦ੍ਧਿਂਯੇਵ ਇਤਰੇਸਂ ਦ੍ਵਿਨ੍ਨਮ੍ਪਿ ਇਜ੍ਝਨਤੋ ਵੁਤ੍ਤਂ.

ਤਿਵਿਧਕਿਰਿਯਾਕਰਣੇਨਾਤਿ ਸਮ੍ਮਾਅਧਿਸਯਨਾਦਿਤਿਵਿਧਕਿਰਿਯਾਕਰਣੇਨਾਤਿ ਅਤ੍ਥੋ. ਕਿਞ੍ਚਾਪਿ ‘‘ਏਵਂ ਅਹੋ ਵਤ ਮੇ’’ਤਿਆਦਿਨਾ ਨ ਇਚ੍ਛਾ ਉਪ੍ਪਜ੍ਜੇਯ੍ਯ ਕਾਰਣਸ੍ਸ ਪਨ ਸਮ੍ਪਾਦਿਤਤ੍ਤਾ, ਅਥ ਖੋ ਭਬ੍ਬਾਵ ਤੇ ਅਭਿਨਿਬ੍ਭਿਜ੍ਜਿਤੁਨ੍ਤਿ ਯੋਜਨਾ. ਕਸ੍ਮਾ ਭਬ੍ਬਾਤਿ ਆਹ ‘‘ਤੇ ਹਿ ਯਸ੍ਮਾ ਤਾਯਾ’’ਤਿਆਦਿ. ਸਯਮ੍ਪੀਤਿ ਅਣ੍ਡਾਨਿ. ਪਰਿਣਾਮਨ੍ਤਿ ਪਰਿਪਾਕਂ ਬਹਿਨਿਕ੍ਖਮਨਯੋਗ੍ਯਤਂ. ਯਥਾ ਕਪਾਲਸ੍ਸ ਤਨੁਤਾ ਆਲੋਕਸ੍ਸ ਅਨ੍ਤੋ ਪਞ੍ਞਾਯਮਾਨਸ੍ਸ ਕਾਰਣਂ, ਤਥਾ ਕਪਾਲਸ੍ਸ ਤਨੁਤਾਯ ਨਖਸਿਖਾਮੁਖਤੁਣ੍ਡਕਾਨਂ ਖਰਤਾਯ ਚ ਅਲ੍ਲਸਿਨੇਹਪਰਿਯਾਦਾਨਂ ਕਾਰਣਵਚਨਨ੍ਤਿ ਦਟ੍ਠਬ੍ਬਂ. ਤਸ੍ਮਾਤਿ ਆਲੋਕਸ੍ਸ ਅਨ੍ਤੋ ਪਞ੍ਞਾਯਮਾਨਤੋ ਸਯਞ੍ਚ ਪਰਿਪਾਕਗਤਤ੍ਤਾ.

ਓਪਮ੍ਮਸਮ੍ਪਟਿਪਾਦਨਨ੍ਤਿ ਓਪਮ੍ਮਤ੍ਥਸ੍ਸ ਉਪਮੇਯ੍ਯੇਨ ਸਮ੍ਮਦੇਵ ਪਟਿਪਾਦਨਂ. ਤਨ੍ਤਿ ਓਪਮ੍ਮਸਮ੍ਪਟਿਪਾਦਨਂ. ਏਵਨ੍ਤਿ ਇਦਾਨਿ ਵੁਚ੍ਚਮਾਨਾਕਾਰੇਨ. ਅਤ੍ਥੇਨਾਤਿ ਉਪਮੇਯ੍ਯਤ੍ਥੇਨ ਸਂਸਨ੍ਦੇਤ੍ਵਾ ਸਹ ਯੋਜੇਤ੍ਵਾ. ਸਮ੍ਪਾਦਨੇਨ ਸਮ੍ਪਯੁਤ੍ਤਧਮ੍ਮਵਸੇਨ ਞਾਣਸ੍ਸ ਤਿਕ੍ਖਭਾਵੋ ਵੇਦਿਤਬ੍ਬੋ. ਞਾਣਸ੍ਸ ਹਿ ਸਭਾਵਤੋ ਸਤਿਨੇਪਕ੍ਕਤੋ ਚ ਤਿਕ੍ਖਭਾਵੋ, ਸਮਾਧਿਵਸੇਨ ਖਰਭਾਵੋ, ਸਦ੍ਧਾਵਸੇਨ ਵਿਪ੍ਪਸਨ੍ਨਭਾਵੋ. ਪਰਿਣਾਮਕਾਲੋਤਿ ਬਲਵਵਿਪਸ੍ਸਨਾਕਾਲੋ. ਵਡ੍ਢਿਕਾਲੋਤਿ ਵੁਟ੍ਠਾਨਗਾਮਿਨਿਵਿਪਸ੍ਸਨਾਕਾਲੋ. ਅਨੁਲੋਮਟ੍ਠਾਨਿਯਾ ਹਿ ਵਿਪਸ੍ਸਨਾ ਗਹਿਤਗਬ੍ਭਾ ਨਾਮ ਤਦਾ ਮਗ੍ਗਗਬ੍ਭਸ੍ਸ ਗਹਿਤਤ੍ਤਾ. ਤਜ੍ਜਾਤਿਕਨ੍ਤਿ ਤਸ੍ਸ ਵਿਪਸ੍ਸਨਾਨੁਯੋਗਸ੍ਸ ਅਨੁਰੂਪਂ. ਸਤ੍ਥਾਪਿ ਅਵਿਜ੍ਜਣ੍ਡਕੋਸਂ ਪਹਰਤਿ, ਦੇਸਨਾਪਿ ਵਿਨੇਯ੍ਯਸਨ੍ਤਾਨਗਤਂ ਅਵਿਜ੍ਜਣ੍ਡਕੋਸਂ ਪਹਰਤਿ, ਯਥਾਠਾਨੇ ਠਾਤੁਂ ਨ ਦੇਤਿ.

ਓਲਮ੍ਬਕਸਙ੍ਖਾਤਨ੍ਤਿ ਓਲਮ੍ਬਕਸੁਤ੍ਤਸਙ੍ਖਾਤਂ. ‘‘ਪਲ’’ਨ੍ਤਿ ਹਿ ਤਸ੍ਸ ਸੁਤ੍ਤਸ੍ਸ ਨਾਮਂ. ਚਾਰੇਤ੍ਵਾ ਦਾਰੁਨੋ ਹੇਟ੍ਠਾ ਦੋਸਜਾਨਨਤ੍ਥਂ ਉਸ੍ਸਾਪੇਤ੍ਵਾ. ਗਣ੍ਡਂ ਹਰਤੀਤਿ ਪਲਗਣ੍ਡੋਤਿ ਏਤੇਨ ‘‘ਪਲੇਨ ਗਣ੍ਡਹਾਰੋ ਪਲਗਣ੍ਡੋਤਿ ਪਚ੍ਛਿਮਪਦੇ ਉਤ੍ਤਰਪਦਲੋਪੇਨ ਨਿਦ੍ਦੇਸੋ’’ਤਿ ਦਸ੍ਸੇਤਿ. ਗਹਣਟ੍ਠਾਨੇਤਿ ਹਤ੍ਥੇਨ ਗਹੇਤਬ੍ਬਟ੍ਠਾਨੇ. ਸਮ੍ਮਦੇਵ ਖਿਪੀਯਨ੍ਤਿ ਏਤੇਨ ਕਾਯਦੁਚ੍ਚਰਿਤਾਦੀਨੀਤਿ ਸਙ੍ਖੇਪੋ, ਪਬ੍ਬਜ੍ਜਾਵ ਸਙ੍ਖੇਪੋ ਪਬ੍ਬਜ੍ਜਾਸਙ੍ਖੇਪੋ. ਤੇਨ ਵਿਪਸ੍ਸਨਂ ਅਨੁਯੁਞ੍ਜਨ੍ਤਸ੍ਸ ਪੁਗ੍ਗਲਸ੍ਸ ਅਜਾਨਨ੍ਤਸ੍ਸੇਵ ਆਸਵਾਨਂ ਪਰਿਕ੍ਖਯੋ ਇਧ ਵਿਪਸ੍ਸਨਾਨਿਸਂਸੋਤਿ ਅਧਿਪ੍ਪੇਤੋ.

ਹੇਮਨ੍ਤਿਕੇਨ ਕਾਰਣਭੂਤੇਨ, ਭੁਮ੍ਮਤ੍ਥੇ ਵਾ ਏਤਂ ਕਰਣਵਚਨਂ, ਹੇਮਨ੍ਤਿਕੇਤਿ ਅਤ੍ਥੋ. ਪਟਿਪ੍ਪਸ੍ਸਮ੍ਭਨ੍ਤੀਤਿ ਪਟਿਪ੍ਪਸ੍ਸਦ੍ਧਫਲਾਨਿ ਹੋਨ੍ਤਿ. ਤੇਨਾਹ ‘‘ਪੂਤਿਕਾਨਿ ਭਵਨ੍ਤੀ’’ਤਿ. ਮਹਾਸਮੁਦ੍ਦੋ ਵਿਯ ਸਾਸਨਂ ਅਗਾਧਗਮ੍ਭੀਰਭਾਵਤੋ. ਨਾਵਾ ਵਿਯ ਯੋਗਾਵਚਰੋ ਮਹੋਘੁਤ੍ਤਰਤੋ. ਪਰਿਯਾਯਨਂ ਵਿਯਾਤਿ ਪਰਿਤੋ ਅਪਰਾਪਰਂ ਯਾਯਨਂ ਵਿਯ. ਖਜ੍ਜਮਾਨਾਨਨ੍ਤਿ ਖਾਦਨ੍ਤੇਨ ਵਿਯ ਉਦਕੇਨ ਖੇਪਿਯਮਾਨਬਨ੍ਧਨਾਨਂ. ਤਨੁਭਾਵੋਤਿ ਪਰਿਯੁਟ੍ਠਾਨਪਵਤ੍ਤਿਯਾ ਅਸਮਤ੍ਥਤਾਯ ਦੁਬ੍ਬਲਭਾਵੋ. ਵਿਪਸ੍ਸਨਾਞਾਣਪੀਤਿਪਾਮੋਜ੍ਜੇਹੀਤਿ ਵਿਪਸ੍ਸਨਾਞਾਣਸਮੁਟ੍ਠਿਤੇਹਿ ਪੀਤਿਪਾਮੋਜ੍ਜੇਹਿ. ਓਕ੍ਖਾਯਮਾਨੇਤਿ ਵਿਪਸ੍ਸਨਾਕਮ੍ਮਟ੍ਠਾਨੇ ਵੀਥਿਪ੍ਪਟਿਪਾਟਿਯਾ ਓਕ੍ਖਾਯਮਾਨੇ, ਪਟਿਸਙ੍ਖਾਨੁਪਸ੍ਸਨਾਯ ਵਾ ਓਕ੍ਖਾਯਮਾਨੇ. ਸਙ੍ਖਾਰੁਪੇਕ੍ਖਾਯ ਪਕ੍ਖਾਯਮਾਨੇ. ਦੁਬ੍ਬਲਤਾ ਦੀਪਿਤਾ ‘‘ਅਪ੍ਪਕਸਿਰੇਨੇਵ ਸਂਯੋਜਨਾਨਿ ਪਟਿਪ੍ਪਸ੍ਸਮ੍ਭਨ੍ਤਿ, ਪੂਤਿਕਾਨਿ ਭਵਨ੍ਤੀ’’ਤਿ ਵੁਤ੍ਤਤ੍ਤਾ.

ਭਾਵਨਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.