੮-੯. ਅਗ੍ਗਿਕ੍ਖਨ੍ਧੋਪਮਸੁਤ੍ਤਾਦਿਵਣ੍ਣਨਾ

੭੨-੭੩. ਅਟ੍ਠਮੇ ਪਸ੍ਸਥ ਨੂਤਿ ਅਪਿ ਪਸ੍ਸਥ. ਮਹਨ੍ਤਨ੍ਤਿ ਵਿਪੁਲਂ. ਅਗ੍ਗਿਕ੍ਖਨ੍ਧਨ੍ਤਿ ਅਗ੍ਗਿਸਮੂਹਂ. ਆਦਿਤ੍ਤਨ੍ਤਿ ਪਦਿਤ੍ਤਂ. ਸਮ੍ਪਜ੍ਜਲਿਤਨ੍ਤਿ ਸਮਨ੍ਤਤੋ ਪਜ੍ਜਲਿਤਂ ਅਚ੍ਚਿਵਿਪ੍ਫੁਲਿਙ੍ਗਾਨਿ ਮੁਞ੍ਚਨ੍ਤਂ. ਸਜੋਤਿਭੂਤਨ੍ਤਿ ਸਮਨ੍ਤਤੋ ਉਟ੍ਠਿਤਾਹਿ ਜਾਲਾਹਿ ਏਕਪ੍ਪਭਾਸਮੁਦਯਭੂਤਂ. ਤਂ ਕਿਂ ਮਞ੍ਞਥਾਤਿ ਤਂ ਇਦਾਨਿ ਮਯਾ ਵੁਚ੍ਚਮਾਨਤ੍ਥਂ ਕਿਂ ਮਞ੍ਞਥਾਤਿ ਅਨੁਮਤਿਗ੍ਗਹਣਤ੍ਥਂ ਪੁਚ੍ਛਤਿ. ਯਦੇਤ੍ਥ ਸਤ੍ਥਾ ਅਗ੍ਗਿਕ੍ਖਨ੍ਧਾਲਿਙ੍ਗਨਂ ਕਞ੍ਞਾਲਿਙ੍ਗਨਞ੍ਚ ਆਨੇਸਿ, ਤਮਤ੍ਥਂ ਵਿਭਾਵੇਤੁਂ ‘‘ਆਰੋਚਯਾਮੀ’’ਤਿਆਦਿਮਾਹ.

ਦੁਸ੍ਸੀਲਸ੍ਸਾਤਿ ਨਿਸ੍ਸੀਲਸ੍ਸ ਸੀਲਵਿਰਹਿਤਸ੍ਸ. ਪਾਪਧਮ੍ਮਸ੍ਸਾਤਿ ਦੁਸ੍ਸੀਲਤ੍ਤਾ ਏਵ ਹੀਨਜ੍ਝਾਸਯਤਾਯ ਲਾਮਕਸਭਾਵਸ੍ਸ. ਅਸੁਚਿਸਙ੍ਕਸ੍ਸਰਸਮਾਚਾਰਸ੍ਸਾਤਿ ਅਪਰਿਸੁਦ੍ਧਤਾਯ ਅਸੁਚਿ ਹੁਤ੍ਵਾ ਸਙ੍ਕਾਯ ਸਰਿਤਬ੍ਬਸਮਾਚਾਰਸ੍ਸ. ਦੁਸ੍ਸੀਲੋ ਹਿ ਕਿਞ੍ਚਿਦੇਵ ਅਸਾਰੁਪ੍ਪਂ ਦਿਸ੍ਵਾ ‘‘ਇਦਂ ਅਸੁਕੇਨ ਕਤਂ ਭਵਿਸ੍ਸਤੀ’’ਤਿ ਪਰੇਸਂ ਆਸਙ੍ਕਾ ਹੋਤਿ. ਕੇਨਚਿਦੇਵ ਕਰਣੀਯੇਨ ਮਨ੍ਤਯਨ੍ਤੇ ਭਿਕ੍ਖੂ ਦਿਸ੍ਵਾ ‘‘ਕਚ੍ਚਿ ਨੁ ਖੋ ਇਮੇ ਮਯਾ ਕਤਕਮ੍ਮਂ ਜਾਨਿਤ੍ਵਾ ਮਨ੍ਤੇਨ੍ਤੀ’’ਤਿ ਅਤ੍ਤਨੋਯੇਵ ਸਙ੍ਕਾਯ ਸਰਿਤਬ੍ਬਸਮਾਚਾਰੋ. ਪਟਿਚ੍ਛਨ੍ਨਕਮ੍ਮਨ੍ਤਸ੍ਸਾਤਿ ਲਜ੍ਜਿਤਬ੍ਬਤਾਯ ਪਟਿਚ੍ਛਾਦੇਤਬ੍ਬਕਮ੍ਮਨ੍ਤਸ੍ਸ. ਅਸ੍ਸਮਣਸ੍ਸਾਤਿ ਨ ਸਮਣਸ੍ਸ. ਸਲਾਕਗ੍ਗਹਣਾਦੀਸੁ ‘‘ਅਹਮ੍ਪਿ ਸਮਣੋ’’ਤਿ ਮਿਚ੍ਛਾਪਟਿਞ੍ਞਾਯ ਸਮਣਪਟਿਞ੍ਞਸ੍ਸ. ਅਸੇਟ੍ਠਚਾਰਿਤਾਯ ਅਬ੍ਰਹ੍ਮਚਾਰਿਸ੍ਸ. ਉਪੋਸਥਾਦੀਸੁ ‘‘ਅਹਮ੍ਪਿ ਬ੍ਰਹ੍ਮਚਾਰੀ’’ਤਿ ਮਿਚ੍ਛਾਪਟਿਞ੍ਞਾਯ ਬ੍ਰਹ੍ਮਚਾਰਿਪਟਿਞ੍ਞਸ੍ਸ. ਪੂਤਿਨਾ ਕਮ੍ਮੇਨ ਸੀਲਵਿਪਤ੍ਤਿਯਾ ਅਨ੍ਤੋ ਅਨੁਪਵਿਟ੍ਠਤ੍ਤਾ ਅਨ੍ਤੋਪੂਤਿਕਸ੍ਸ. ਛਦ੍ਵਾਰੇਹਿ ਰਾਗਾਦਿਕਿਲੇਸਾਨੁਸ੍ਸਵਨੇਨ ਤਿਨ੍ਤਤ੍ਤਾ ਅਵਸ੍ਸੁਤਸ੍ਸ. ਸਞ੍ਜਾਤਰਾਗਾਦਿਕਚਵਰਤ੍ਤਾ ਸੀਲਵਨ੍ਤੇਹਿ ਛਡ੍ਡੇਤਬ੍ਬਤ੍ਤਾ ਚ ਕਸਮ੍ਬੁਜਾਤਸ੍ਸ.

ਵਾਲਰਜ੍ਜੁਯਾਤਿ ਵਾਲੇਹਿ ਕਤਰਜ੍ਜੁਯਾ. ਸਾ ਹਿ ਖਰਤਰਾ ਹੋਤਿ. ਘਂਸੇਯ੍ਯਾਤਿ ਮਥਨਵਸੇਨ ਘਂਸੇਯ੍ਯ. ਤੇਲਧੋਤਾਯਾਤਿ ਤੇਲੇਨ ਨਿਸਿਤਾਯ. ਪਚ੍ਚੋਰਸ੍ਮਿਨ੍ਤਿ ਪਤਿਉਰਸ੍ਮਿਂ, ਅਭਿਮੁਖੇ ਉਰਮਜ੍ਝੇਤਿ ਅਧਿਪ੍ਪਾਯੋ. ਅਯੋਸਙ੍ਕੁਨਾਤਿ ਸਣ੍ਡਾਸੇਨ. ਫੇਣੁਦ੍ਦੇਹਕਨ੍ਤਿ ਫੇਣਂ ਉਦ੍ਦੇਹੇਤ੍ਵਾ ਉਦ੍ਦੇਹੇਤ੍ਵਾ, ਅਨੇਕਵਾਰਂ ਫੇਣਂ ਉਟ੍ਠਾਪੇਤ੍ਵਾਤਿ ਅਤ੍ਥੋ. ਏਵਮੇਤ੍ਥ ਸਙ੍ਖੇਪਤੋ ਪਾਲ਼ਿਵਣ੍ਣਨਾ ਵੇਦਿਤਬ੍ਬਾ. ਨਵਮਂ ਉਤ੍ਤਾਨਮੇਵ.

ਅਗ੍ਗਿਕ੍ਖਨ੍ਧੋਪਮਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.