੫-੬. ਪਾਰਿਚ੍ਛਤ੍ਤਕਸੁਤ੍ਤਾਦਿਵਣ੍ਣਨਾ

੬੯-੭੦. ਪਞ੍ਚਮੇ ਪਤਿਤਪਲਾਸੋਤਿ ਪਤਿਤਪਤ੍ਤੋ. ਏਤ੍ਥ ਪਠਮਂ ਪਣ੍ਡੁਪਲਾਸਤਂ, ਦੁਤਿਯਂ ਪਨ੍ਨਪਲਾਸਤਞ੍ਚ ਵਤ੍ਵਾ ਤਤਿਯਂ ਜਾਲਕਜਾਤਤਾ, ਚਤੁਤ੍ਥਂ ਖਾਰਕਜਾਤਤਾ ਚ ਪਾਲ਼ਿਯਂ ਵੁਤ੍ਤਾ. ਦੀਘਨਿਕਾਯਟ੍ਠਕਥਾਯਂ ਪਨ ਮਹਾਗੋਵਿਨ੍ਦਸੁਤ੍ਤਵਣ੍ਣਨਾਯਂ (ਦੀ. ਨਿ. ਅਟ੍ਠ. ੨.੨੯੪) ਇਮਮੇਵ ਪਾਲ਼ਿਂ ਆਹਰਿਤ੍ਵਾ ਦਸ੍ਸੇਨ੍ਤੇਨ ਪਠਮਂ ਪਣ੍ਡੁਪਲਾਸਤਂ, ਦੁਤਿਯਂ ਪਨ੍ਨਪਲਾਸਤਞ੍ਚ ਵਤ੍ਵਾ ਤਤਿਯਂ ਖਾਰਕਜਾਤਤਾ, ਚਤੁਤ੍ਥਂ ਜਾਲਕਜਾਤਤਾ ਚ ਦਸ੍ਸਿਤਾ. ਏਵਞ੍ਹਿ ਤਤ੍ਥ ਵੁਤ੍ਤਂ – ‘‘ਪਾਰਿਚ੍ਛਤ੍ਤਕੇ ਪੁਪ੍ਫਮਾਨੇ ਏਕਂ ਵਸ੍ਸਂ ਉਪਟ੍ਠਾਨਂ ਗਚ੍ਛਨ੍ਤਿ, ਤੇ ਤਸ੍ਸ ਪਣ੍ਡੁਪਲਾਸਭਾਵਤੋ ਪਟ੍ਠਾਯ ਅਤ੍ਤਮਨਾ ਹੋਨ੍ਤਿ. ਯਥਾਹ –

ਯਸ੍ਮਿਂ, ਭਿਕ੍ਖਵੇ, ਸਮਯੇ ਦੇਵਾਨਂ ਤਾਵਤਿਂਸਾਨਂ ਪਾਰਿਚ੍ਛਤ੍ਤਕੋ ਕੋਵਿਲ਼ਾਰੋ, ਪਣ੍ਡੁਪਲਾਸੋ ਹੋਤਿ, ਅਤ੍ਤਮਨਾ, ਭਿਕ੍ਖਵੇ, ਦੇਵਾ ਤਾਵਤਿਂਸਾ ਤਸ੍ਮਿਂ ਸਮਯੇ ਹੋਨ੍ਤਿ ‘ਪਣ੍ਡੁਪਲਾਸੋ ਦਾਨਿ ਪਾਰਿਚ੍ਛਤ੍ਤਕੋ, ਕੋਵਿਲ਼ਾਰੋ, ਨ ਚਿਰਸ੍ਸੇਵ ਪਨ੍ਨਪਲਾਸੋ ਭਵਿਸ੍ਸਤੀ’ਤਿ. ਯਸ੍ਮਿਂ ਸਮਯੇ ਦੇਵਾਨਂ ਤਾਵਤਿਂਸਾਨਂ ਪਾਰਿਚ੍ਛਤ੍ਤਕੋ, ਕੋਵਿਲ਼ਾਰੋ, ਪਨ੍ਨਪਲਾਸੋ ਹੋਤਿ, ਜਾਲਕਜਾਤੋ ਹੋਤਿ, ਖਾਰਕਜਾਤੋ ਹੋਤਿ, ਕੁਟੁਮਲਕਜਾਤੋ ਹੋਤਿ, ਕੋਰਕਜਾਤੋ ਹੋਤਿ, ਅਤ੍ਤਮਨਾ, ਭਿਕ੍ਖਵੇ, ਦੇਵਾ ਤਾਵਤਿਂਸਾ ਤਸ੍ਮਿਂ ਸਮਯੇ ਹੋਨ੍ਤਿ ‘ਕੋਰਕਜਾਤੋ ਦਾਨਿ ਪਾਰਿਚ੍ਛਤ੍ਤਕੋ ਕੋਵਿਲ਼ਾਰੋ, ਨ ਚਿਰਸ੍ਸੇਵ ਸਬ੍ਬਪਾਲਿਫੁਲ੍ਲੋ ਭਵਿਸ੍ਸਤੀ’ਤਿ.

ਲੀਨਤ੍ਥਪ੍ਪਕਾਸਿਨਿਯਮ੍ਪਿ (ਦੀ. ਨਿ. ਟੀ. ੨.੨੯੪) ਏਤ੍ਥ ਏਵਮਤ੍ਥੋ ਦਸ੍ਸਿਤੋ – ਪਨ੍ਨਪਲਾਸੋਤਿ ਪਤਿਤਪਤ੍ਤੋ. ਖਾਰਕਜਾਤੋਤਿ ਜਾਤਖੁਦ੍ਦਕਮਕੁਲ਼ੋ. ਯੇ ਹਿ ਨੀਲਪਤ੍ਤਕਾ ਅਤਿਵਿਯ ਖੁਦ੍ਦਕਾ ਮਕੁਲ਼ਾ, ਤੇ ‘‘ਖਾਰਕਾ’’ਤਿ ਵੁਚ੍ਚਨ੍ਤਿ. ਜਾਲਕਜਾਤੋਤਿ ਤੇਹਿਯੇਵ ਖੁਦ੍ਦਕਮਕੁਲ਼ੇਹਿ ਜਾਤਜਾਲਕੋ ਸਬ੍ਬਸੋ ਜਾਲੋ ਵਿਯ ਜਾਤੋ. ਕੇਚਿ ਪਨ ‘‘ਜਾਲਕਜਾਤੋਤਿ ਏਕਜਾਲੋ ਵਿਯ ਜਾਤੋ’’ਤਿ ਅਤ੍ਥਂ ਵਦਨ੍ਤਿ. ਪਾਰਿਚ੍ਛਤ੍ਤਕੋ ਕਿਰ ਖਾਰਕਗ੍ਗਹਣਕਾਲੇ ਸਬ੍ਬਤ੍ਥਕਮੇਵ ਪਲ੍ਲਵਿਕੋ ਹੋਤਿ, ਤੇ ਚਸ੍ਸ ਪਲ੍ਲਵਾ ਪਭਸ੍ਸਰਪਵਾਲ਼ਵਣ੍ਣਸਮੁਜ੍ਜਲਾ ਹੋਨ੍ਤਿ. ਤੇਨ ਸੋ ਸਬ੍ਬਸੋ ਸਮੁਜ੍ਜਲਨ੍ਤੋ ਤਿਟ੍ਠਤਿ. ਕੁਟੁਮਲਜਾਤੋਤਿ ਸਞ੍ਜਾਤਮਹਾਮਕੁਲ਼ੋ. ਕੋਰਕਜਾਤੋਤਿ ਸਞ੍ਜਾਤਸੂਚਿਭੇਦੋ ਸਮ੍ਪਤਿਵਿਕਸਮਾਨਾਵਤ੍ਥੋ. ਸਬ੍ਬਪਾਲਿਫੁਲ੍ਲੋਤਿ ਸਬ੍ਬਸੋ ਫੁਲ੍ਲਿਤਵਿਕਸਿਤੋਤਿ. ਅਯਞ੍ਚ ਅਨੁਕ੍ਕਮੋ ਦੀਘਭਾਣਕਾਨਂ ਵਲ਼ਞ੍ਜਨਾਨੁਕ੍ਕਮੇਨ ਦਸ੍ਸਿਤੋ, ਨ ਏਤ੍ਥ ਆਚਰਿਯਸ੍ਸ ਵਿਰੋਧੋ ਆਸਙ੍ਕਿਤਬ੍ਬੋ.

ਕਨ੍ਤਨਕਵਾਤੋਤਿ ਦੇਵਾਨਂ ਪੁਞ੍ਞਕਮ੍ਮਪਚ੍ਚਯਾ ਪੁਪ੍ਫਾਨਂ ਛਿਨ੍ਦਨਕਵਾਤੋ. ਕਨ੍ਤਤੀਤਿ ਛਿਨ੍ਦਤਿ. ਸਮ੍ਪਟਿਚ੍ਛਨਕਵਾਤੋਤਿ ਛਿਨ੍ਨਾਨਂ ਛਿਨ੍ਨਾਨਂ ਪੁਪ੍ਫਾਨਂ ਸਮ੍ਪਟਿਗ੍ਗਣ੍ਹਕਵਾਤੋ. ਚਿਨਨ੍ਤੋਤਿ ਨਾਨਾਵਿਧਭਤ੍ਤਿਸਨ੍ਨਿਵੇਸਵਸੇਨ ਨਿਚਿਨਂ ਕਰੋਨ੍ਤੋ. ਅਞ੍ਞਤਰਦੇਵਤਾਨਨ੍ਤਿ ਨਾਮਗੋਤ੍ਤਵਸੇਨ ਅਪਞ੍ਞਾਤਦੇਵਤਾਨਂ. ਰੇਣੁਵਟ੍ਟੀਤਿ ਰੇਣੁਸਙ੍ਘਾਤੋ. ਕਣ੍ਣਿਕਂ ਆਹਚ੍ਚਾਤਿ ਸੁਧਮ੍ਮਾਯ ਕੂਟਂ ਆਹਨ੍ਤ੍ਵਾ.

ਅਨੁਫਰਣਾਨੁਭਾਵੋਤਿ ਖੀਣਾਸਵਸ੍ਸ ਭਿਕ੍ਖੁਨੋ ਕਿਤ੍ਤਿਸਦ੍ਦਸ੍ਸ ਯਾਵ ਬ੍ਰਹ੍ਮਲੋਕਾ ਅਨੁਫਰਣਸਙ੍ਖਾਤੋ ਆਨੁਭਾਵੋ. ਪਬ੍ਬਜ੍ਜਾਨਿਸ੍ਸਿਤਂ ਹੋਤੀਤਿ ਪਬ੍ਬਜ੍ਜਾਯ ਚਤੁਪਾਰਿਸੁਦ੍ਧਿਸੀਲਮ੍ਪਿ ਦਸ੍ਸਿਤਮੇਵਾਤਿ ਅਧਿਪ੍ਪਾਯੋ. ਪਠਮਜ੍ਝਾਨਸਨ੍ਨਿਸ੍ਸਿਤਨ੍ਤਿਆਦੀਸੁਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਇਧ ਪਨ ਉਭਯਤੋ ਪਰਿਚ੍ਛੇਦੋ ਹੇਟ੍ਠਾ ਸੀਲਤੋ ਉਪਰਿ ਅਰਹਤ੍ਤਤੋ ਚ ਪਰਿਚ੍ਛੇਦਸ੍ਸ ਦਸ੍ਸਿਤਤ੍ਤਾ. ਤੇਨੇਤਂ ਵੁਤ੍ਤਨ੍ਤਿ ਤੇਨ ਕਾਰਣੇਨ ਏਤਂ ‘‘ਚਤੁਪਾਰਿਸੁਦ੍ਧਿਸੀਲਂ ਪਬ੍ਬਜ੍ਜਾਨਿਸ੍ਸਿਤਂ ਹੋਤੀ’’ਤਿਆਦਿਵਚਨਂ ਵੁਤ੍ਤਂ. ਛਟ੍ਠਂ ਉਤ੍ਤਾਨਮੇਵ.

ਪਾਰਿਚ੍ਛਤ੍ਤਕਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.