੪. ਧਮ੍ਮਞ੍ਞੂਸੁਤ੍ਤਵਣ੍ਣਨਾ

੬੮. ਚਤੁਤ੍ਥੇ ਸੁਤ੍ਤਗੇਯ੍ਯਾਦਿਧਮ੍ਮਂ ਜਾਨਾਤੀਤਿ ਧਮ੍ਮਞ੍ਞੂ. ਤਸ੍ਸ ਤਸ੍ਸੇਵ ਸੁਤ੍ਤਗੇਯ੍ਯਾਦਿਨਾ ਭਾਸਿਤਸ੍ਸ ਤਦਞ੍ਞਸ੍ਸ ਸੁਤ੍ਤਪਦਤ੍ਥਸ੍ਸ ਬੋਧਕਸ੍ਸ ਸਦ੍ਦਸ੍ਸ ਅਤ੍ਥਕੁਸਲਤਾਵਸੇਨ ਅਤ੍ਥਂ ਜਾਨਾਤੀਤਿ ਅਤ੍ਥਞ੍ਞੂ. ‘‘ਏਤ੍ਤਕੋਮ੍ਹਿ ਸੀਲੇਨ ਸਮਾਧਿਨਾ ਪਞ੍ਞਾਯਾ’’ਤਿ ਏਵਂ ਯਥਾ ਅਤ੍ਤਨੋ ਪਮਾਣਜਾਨਨਵਸੇਨ ਅਤ੍ਤਾਨਂ ਜਾਨਾਤੀਤਿ ਅਤ੍ਤਞ੍ਞੂ. ਪਟਿਗ੍ਗਹਣਪਰਿਭੋਗਪਰਿਯੇਸਨਵਿਸ੍ਸਜ੍ਜਨੇਸੁ ਮਤ੍ਤਂ ਜਾਨਾਤੀਤਿ ਮਤ੍ਤਞ੍ਞੂ. ਨਿਦ੍ਦੇਸੇ ਪਨ ਪਟਿਗ੍ਗਹਣਮਤ੍ਤਞ੍ਞੁਤਾਯ ਏਵ ਪਰਿਭੋਗਾਦਿਮਤ੍ਤਞ੍ਞੁਤਾ ਪਬੋਧਿਤਾ ਹੋਤੀਤਿ ਪਟਿਗ੍ਗਹਣਮਤ੍ਤਞ੍ਞੁਤਾਵ ਦਸ੍ਸਿਤਾ. ‘‘ਅਯਂ ਕਾਲੋ ਉਦ੍ਦੇਸਸ੍ਸ, ਅਯਂ ਕਾਲੋ ਪਰਿਪੁਚ੍ਛਾਯ, ਅਯਂ ਕਾਲੋ ਯੋਗਸ੍ਸ ਅਧਿਗਮਾਯਾ’’ਤਿ ਏਵਂ ਕਾਲਂ ਜਾਨਾਤੀਤਿ ਕਾਲਞ੍ਞੂ. ਤਤ੍ਥ ਪਞ੍ਚ ਵਸ੍ਸਾਨਿ ਉਦ੍ਦੇਸਸ੍ਸ ਕਾਲੋ, ਦਸ ਪਰਿਪੁਚ੍ਛਾਯ, ਇਦਂ ਅਤਿਸਮ੍ਬਾਧਂ, ਅਤਿਕ੍ਖਪਞ੍ਞਸ੍ਸ ਤਾਵਤਾ ਕਾਲੇਨ ਤੀਰੇਤੁਂ ਅਸਕ੍ਕੁਣੇਯ੍ਯਤ੍ਤਾ ਦਸ ਵਸ੍ਸਾਨਿ ਉਦ੍ਦੇਸਸ੍ਸ ਕਾਲੋ, ਵੀਸਤਿ ਪਰਿਪੁਚ੍ਛਾਯ, ਤਤੋ ਪਰਂ ਯੋਗੇ ਕਮ੍ਮਂ ਕਾਤਬ੍ਬਂ. ਖਤ੍ਤਿਯਪਰਿਸਾਦਿਕਂ ਅਟ੍ਠਵਿਧਂ ਪਰਿਸਂ ਜਾਨਾਤੀਤਿ ਪਰਿਸਞ੍ਞੂ. ਭਿਕ੍ਖੁਪਰਿਸਾਦਿਕਂ ਚਤੁਬ੍ਬਿਧਂ, ਖਤ੍ਤਿਯਪਰਿਸਾਦਿਕਂ ਮਨੁਸ੍ਸਪਰਿਸਂਯੇਵ ਪੁਨ ਚਤੁਬ੍ਬਿਧਂ ਗਹੇਤ੍ਵਾ ਅਟ੍ਠਵਿਧਂ ਵਦਨ੍ਤਿ ਅਪਰੇ. ਨਿਦ੍ਦੇਸੇ ਪਨਸ੍ਸ ਖਤ੍ਤਿਯਪਰਿਸਾਦਿਚਤੁਬ੍ਬਿਧਪਰਿਸਗ੍ਗਹਣਂ ਨਿਦਸ੍ਸਨਮਤ੍ਤਂ ਦਟ੍ਠਬ੍ਬਂ. ‘‘ਇਮਂ ਮੇ ਸੇਵਨ੍ਤਸ੍ਸ ਅਕੁਸਲਾ ਧਮ੍ਮਾ ਪਰਿਹਾਯਨ੍ਤਿ, ਕੁਸਲਾ ਧਮ੍ਮਾ ਅਭਿਵਡ੍ਢਨ੍ਤਿ, ਤਸ੍ਮਾ ਅਯਂ ਪੁਗ੍ਗਲੋ ਸੇਵਿਤਬ੍ਬੋ, ਵਿਪਰਿਯਾਯਤੋ ਅਞ੍ਞੋ ਅਸੇਵਿਤਬ੍ਬੋ’’ਤਿ ਸੇਵਿਤਬ੍ਬਾਸੇਵਿਤਬ੍ਬਪੁਗ੍ਗਲਂ ਜਾਨਾਤੀਤਿ ਪੁਗ੍ਗਲਪਰੋਪਰਞ੍ਞੂ. ਏਵਞ੍ਹਿ ਤੇਸਂ ਪੁਗ੍ਗਲਾਨਂ ਪਰੋਪਰਂ ਉਕ੍ਕਟ੍ਠਨਿਹੀਨਤਂ ਜਾਨਾਤਿ ਨਾਮ. ਨਿਦ੍ਦੇਸੇਪਿਸ੍ਸ ਸੇਵਿਤਬ੍ਬਾਸੇਵਿਤਬ੍ਬਪੁਗ੍ਗਲੇ ਵਿਭਾਵਨਮੇਵ ਸਮਣਕਥਾਕਤਨ੍ਤਿ ਦਟ੍ਠਬ੍ਬਂ.

ਧਮ੍ਮਞ੍ਞੂਸੁਤ੍ਤਵਣ੍ਣਨਾ ਨਿਟ੍ਠਿਤਾ.