੩. ਨਗਰੋਪਮਸੁਤ੍ਤਵਣ੍ਣਨਾ

੬੭. ਤਤਿਯੇ ਪਚ੍ਚਨ੍ਤੇ ਭਵਂ ਪਚ੍ਚਨ੍ਤਿਮਂ. ‘‘ਰਥੋ ਸੀਲਪਰਿਕ੍ਖਾਰੋ, ਝਾਨਕ੍ਖੋ ਚਕ੍ਕਵੀਰਿਯੋ’’ਤਿਆਦੀਸੁ (ਸਂ. ਨਿ. ੫.੪) ਵਿਯ ਅਲਙ੍ਕਾਰਵਚਨੋ ਪਰਿਕ੍ਖਾਰਸਦ੍ਦੋਤਿ ਆਹ ‘‘ਨਗਰਾਲਙ੍ਕਾਰੇਹਿ ਅਲਙ੍ਕਤ’’ਨ੍ਤਿ. ਪਰਿਵਾਰਵਚਨੋਪਿ ਵਟ੍ਟਤਿਯੇਵ ‘‘ਸਤ੍ਤ ਸਮਾਧਿਪਰਿਕ੍ਖਾਰਾ’’ਤਿਆਦੀਸੁ (ਦੀ. ਨਿ. ੩.੩੩੦) ਵਿਯ. ਨੇਮਂ ਵੁਚ੍ਚਤਿ ਥਮ੍ਭਾਦੀਹਿ ਅਨੁਪਤਭੂਮਿਪ੍ਪਦੇਸੋਤਿ ਆਹ ‘‘ਗਮ੍ਭੀਰਆਵਾਟਾ’’ਤਿ, ਗਮ੍ਭੀਰਂ ਭੂਮਿਂ ਅਨੁਪ੍ਪਵਿਟ੍ਠਾਤਿ ਅਤ੍ਥੋ. ਸੁਟ੍ਠੁ ਸਨ੍ਨਿਸੀਦਾਪਿਤਾਤਿ ਭੂਮਿਂ ਨਿਖਨਿਤ੍ਵਾ ਸਮ੍ਮਦੇਵ ਠਪਿਤਾ.

ਅਨੁਪਰਿਯਾਯੇਤਿ ਏਤੇਨਾਤਿ ਅਨੁਪਰਿਯਾਯੋ, ਸੋਯੇਵ ਪਥੋਤਿ ਅਨੁਪਰਿਯਾਯਪਥੋ, ਪਰਿਤੋ ਪਾਕਾਰਸ੍ਸ ਅਨੁਯਾਯਮਗ੍ਗੋ.

ਹਤ੍ਥਿਂ ਆਰੋਹਨ੍ਤਿ ਆਰੋਹਾਪਯਨ੍ਤਿ ਚਾਤਿ ਹਤ੍ਥਾਰੋਹਾ (ਦੀ. ਨਿ. ਟੀ. ੧.੧੬੩). ਯੇਨ ਹਿ ਪਯੋਗੇਨ ਪੁਰਿਸੋ ਹਤ੍ਥਿਨੋ ਆਰੋਹਨਯੋਗ੍ਗੋ ਹੋਤਿ, ਹਤ੍ਥਿਸ੍ਸ ਤਂ ਪਯੋਗਂ ਵਿਧਾਯਨ੍ਤਾਨਂ ਸਬ੍ਬੇਸਮ੍ਪੇਤੇਸਂ ਗਹਣਂ. ਤੇਨਾਹ ‘‘ਸਬ੍ਬੇਪੀ’’ਤਿਆਦਿ. ਤਤ੍ਥ ਹਤ੍ਥਾਚਰਿਯਾ ਨਾਮ ਯੇ ਹਤ੍ਥਿਨੋ ਹਤ੍ਥਾਰੋਹਕਾਨਞ੍ਚ ਸਿਕ੍ਖਾਪਕਾ. ਹਤ੍ਥਿਵੇਜ੍ਜਾ ਨਾਮ ਹਤ੍ਥਿਭਿਸਕ੍ਕਾ. ਹਤ੍ਥਿਬਨ੍ਧਾ ਨਾਮ ਹਤ੍ਥੀਨਂ ਪਾਦਰਕ੍ਖਕਾ. ਆਦਿ-ਸਦ੍ਦੇਨ ਹਤ੍ਥੀਨਂ ਯਵਪਦਾਯਕਾਦਿਕੇ ਸਙ੍ਗਣ੍ਹਾਤਿ. ਅਸ੍ਸਾਰੋਹਾ ਰਥਿਕਾਤਿ ਏਤ੍ਥਾਪਿ ਏਸੇਵ ਨਯੋ. ਰਥੇ ਨਿਯੁਤ੍ਤਾ ਰਥਿਕਾ. ਰਥਰਕ੍ਖਾ ਨਾਮ ਰਥਸ੍ਸ ਆਣਿਰਕ੍ਖਕਾ. ਧਨੁਂ ਗਣ੍ਹਨ੍ਤਿ ਗਣ੍ਹਾਪੇਨ੍ਤਿ ਚਾਤਿ ਧਨੁਗ੍ਗਹਾ, ਇਸ੍ਸਾਸਾ ਧਨੁਸਿਪ੍ਪਸ੍ਸ ਸਿਕ੍ਖਾਪਕਾ ਚ. ਤੇਨਾਹ ‘‘ਧਨੁਆਚਰਿਯਾ ਇਸ੍ਸਾਸਾ’’ਤਿ. ਚੇਲੇਨ ਚੇਲਪਟਾਕਾਯ ਯੁਦ੍ਧੇ ਅਕਨ੍ਤਿ ਗਚ੍ਛਨ੍ਤੀਤਿ ਚੇਲਕਾਤਿ ਆਹ – ‘‘ਯੇ ਯੁਦ੍ਧੇ ਜਯਦ੍ਧਜਂ ਗਹੇਤ੍ਵਾ ਪੁਰਤੋ ਗਚ੍ਛਨ੍ਤੀ’’ਤਿ. ਯਥਾ ਤਥਾ ਠਿਤੇ ਸੇਨਿਕੇ ਬ੍ਰੂਹਕਰਣਵਸੇਨ ਤਤੋ ਤਤੋ ਚਲਯਨ੍ਤਿ ਉਚ੍ਚਾਲੇਨ੍ਤੀਤਿ ਚਲਕਾ. ਸਕੁਣਗ੍ਘਿਆਦਯੋ ਵਿਯ ਮਂਸਪਿਣ੍ਡਂ ਪਰਸੇਨਾਸਮੂਹਂ ਸਾਹਸਿਕਮਹਾਯੋਧਤਾਯ ਛੇਤ੍ਵਾ ਛੇਤ੍ਵਾ ਦਯਨ੍ਤਿ ਉਪ੍ਪਤਿਤ੍ਵਾ ਗਚ੍ਛਨ੍ਤੀਤਿ ਪਿਣ੍ਡਦਾਯਕਾ. ਦੁਤਿਯਵਿਕਪ੍ਪੇ ਪਿਣ੍ਡੇ ਦਯਨ੍ਤਿ ਜਨਸਮ੍ਮਦ੍ਦੇ ਉਪ੍ਪਤਨ੍ਤਾ ਵਿਯ ਗਚ੍ਛਨ੍ਤੀਤਿ ਪਿਣ੍ਡਦਾਯਕਾਤਿ ਅਤ੍ਥੋ ਵੇਦਿਤਬ੍ਬੋ. ਉਗ੍ਗਤੁਗ੍ਗਤਾਤਿ ਥਾਮਜਵਪਰਕ੍ਕਮਾਦਿਵਸੇਨ ਅਤਿਵਿਯ ਉਗ੍ਗਤਾ, ਉਦਗ੍ਗਾਤਿ ਅਤ੍ਥੋ. ਪਕ੍ਖਨ੍ਦਨ੍ਤੀਤਿ ਅਤ੍ਤਨੋ ਵੀਰਸੂਰਭਾਵੇਨ ਅਸਜ੍ਜਮਾਨਾ ਪਰਸੇਨਂ ਅਨੁਪਵਿਸਨ੍ਤੀਤਿ ਅਤ੍ਥੋ. ਥਾਮਜਵਬਲਪਰਕ੍ਕਮਾਦਿਸਮ੍ਪਤ੍ਤਿਯਾ ਮਹਾਨਾਗਾ ਵਿਯ ਮਹਾਨਾਗਾ. ਏਕਸੂਰਾਤਿ ਏਕਾਕਿਸੂਰਾ ਅਤ੍ਤਨੋ ਸੂਰਭਾਵੇਨੇਵ ਏਕਾਕਿਨੋ ਹੁਤ੍ਵਾ ਯੁਜ੍ਝਨਕਾ. ਸਜਾਲਿਕਾਤਿ ਸਵਮ੍ਮਿਕਾ. ਸਰਪਰਿਤ੍ਤਾਣਨ੍ਤਿ ਚਮ੍ਮਪਰਿਸਿਬ੍ਬਿਤਂ ਖੇਟਕਂ, ਚਮ੍ਮਮਯਂ ਵਾ ਫਲਕਂ. ਘਰਦਾਸਯੋਧਾਤਿ ਅਤ੍ਤਨੋ ਦਾਸਯੋਧਾ.

ਸਮ੍ਪਕ੍ਖਨ੍ਦਨਲਕ੍ਖਣਾਤਿ ਸਦ੍ਧੇਯ੍ਯਵਤ੍ਥੁਨੋ ਏਵਮੇਤਨ੍ਤਿ ਸਮ੍ਪਕ੍ਖਨ੍ਦਨਲਕ੍ਖਣਾ. ਸਮ੍ਪਸਾਦਨਲਕ੍ਖਣਾਤਿ ਪਸੀਦਿਤਬ੍ਬੇ ਵਤ੍ਥੁਸ੍ਮਿਂ ਪਸੀਦਨਲਕ੍ਖਣਾ. ਓਕਪ੍ਪਨਸਦ੍ਧਾਤਿ ਓਕ੍ਕਨ੍ਤਿਤ੍ਵਾ ਪਕ੍ਖਨ੍ਦਿਤ੍ਵਾ ਅਧਿਮੁਚ੍ਚਨਂ. ਪਸਾਦਨੀਯੇ ਵਤ੍ਥੁਸ੍ਮਿਂ ਪਸੀਦਨਂ ਪਸਾਦਸਦ੍ਧਾ. ਅਯਂ ਅਨੁਧਮ੍ਮੋਤਿ ਅਯਂ ਨਵਨ੍ਨਂ ਲੋਕੁਤ੍ਤਰਧਮ੍ਮਾਨਂ ਅਨੁਲੋਮਧਮ੍ਮੋ. ਨਿਬ੍ਬਿਦਾਬਹੁਲੋਤਿ ਉਕ੍ਕਣ੍ਠਨਾਬਹੁਲੋ. ਸਦ੍ਧਾ ਬਨ੍ਧਤਿ ਪਾਥੇਯ੍ਯਨ੍ਤਿ ਸਦ੍ਧਾ ਨਾਮਾਯਂ ਸਤ੍ਤਸ੍ਸ ਮਰਣਵਸੇਨ ਮਹਾਪਥਂ ਸਂਵਜਤੋ ਮਹਾਕਨ੍ਤਾਰਂ ਪਟਿਪਜ੍ਜਤੋ ਮਹਾਵਿਦੁਗ੍ਗਂ ਪਕ੍ਖਨ੍ਦਤੋ ਪਾਥੇਯ੍ਯਪੁਟਂ ਬਨ੍ਧਤਿ, ਸਮ੍ਬਲਂ ਵਿਸ੍ਸਜ੍ਜੇਤੀਤਿ ਅਤ੍ਥੋ. ਸਦ੍ਧਞ੍ਹਿ ਉਪ੍ਪਾਦੇਤ੍ਵਾ ਦਾਨਂ ਦੇਤਿ, ਸੀਲਂ ਰਕ੍ਖਤਿ, ਉਪੋਸਥਕਮ੍ਮਂ ਕਰੋਤਿ. ਤੇਨੇਤਂ ਵੁਤ੍ਤਂ ‘‘ਸਦ੍ਧਾ ਬਨ੍ਧਤਿ ਪਾਥੇਯ੍ਯ’’ਨ੍ਤਿ. ਸਿਰੀਤਿ ਇਸ੍ਸਰਿਯਂ. ਇਸ੍ਸਰਿਯੇ ਹਿ ਅਭਿਮੁਖੀਭੂਤੇ ਥਲਤੋਪਿ ਜਲਤੋਪਿ ਭੋਗਾ ਆਗਚ੍ਛਨ੍ਤਿਯੇਵ. ਤੇਨੇਤਂ ਵੁਤ੍ਤਂ ‘‘ਸਿਰੀ ਭੋਗਾਨਮਾਸਯੋ’’ਤਿ. ਸਦ੍ਧਾ ਦੁਤਿਯਾ ਪੁਰਿਸਸ੍ਸ ਹੋਤੀਤਿ ਪੁਰਿਸਸ੍ਸ ਦੇਵਲੋਕੇ, ਮਨੁਸ੍ਸਲੋਕੇ ਚੇਵ ਨਿਬ੍ਬਾਨਞ੍ਚ ਗਚ੍ਛਨ੍ਤਸ੍ਸ ਸਦ੍ਧਾ ਦੁਤਿਯਾ ਹੋਤਿ, ਸਹਾਯਕਿਚ੍ਚਂ ਸਾਧੇਤਿ. ਭਤ੍ਤਪੁਟਾਦੀਤਿ ਆਦਿ-ਸਦ੍ਦੇਨ ਦੁਤਿਯਿਕਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਅਨੇਕਸਰਸਤਾਤਿ ਅਨੇਕਸਭਾਵਤਾ, ਅਨੇਕਕਿਚ੍ਚਤਾ ਵਾ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਨਗਰੋਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.