੬. ਦੁਤਿਯਸਞ੍ਞਾਸੁਤ੍ਤਵਣ੍ਣਨਾ

੪੯. ਛਟ੍ਠੇ ਨ੍ਹਾਰੁਵਿਲੇਖਨਨ੍ਤਿ ਚਮ੍ਮਂ ਲਿਖਨ੍ਤਾਨਂ ਚਮ੍ਮਂ ਲਿਖਿਤ੍ਵਾ ਛਡ੍ਡਿਤਕਸਟਂ. ‘‘ਏਸੋਹਮਸ੍ਮੀ’’ਤਿਆਦਿਨਾ ਅਹਂਕਰਣਂ ਅਹਙ੍ਕਾਰੋ. ‘‘ਏਤਂ ਮਮਾ’’ਤਿ ਮਮਂਕਰਣਂ ਮਮਙ੍ਕਾਰੋ. ਤੇਨਾਹ ‘‘ਅਹਙ੍ਕਾਰਦਿਟ੍ਠਿਤੋ’’ਤਿਆਦਿ. ਤਿਸ੍ਸੋ ਵਿਧਾਤਿ ਸੇਯ੍ਯਸਦਿਸਹੀਨਵਸੇਨ ਤਯੋ ਮਾਨਾ. ‘‘ਏਕਵਿਧੇਨ ਰੂਪਸਙ੍ਗਹੋ’’ਤਿਆਦੀਸੁ (ਧ. ਸ. ੫੮੪) ਕੋਟ੍ਠਾਸੋ ‘‘ਵਿਧਾ’’ਤਿ ਵੁਤ੍ਤੋ. ‘‘ਕਥਂਵਿਧਂ ਸੀਲਵਨ੍ਤਂ ਵਦਨ੍ਤਿ, ਕਥਂਵਿਧਂ ਪਞ੍ਞਵਨ੍ਤਂ ਵਦਨ੍ਤੀ’’ਤਿਆਦੀਸੁ (ਸਂ. ਨਿ. ੧.੯੫) ਪਕਾਰੋ. ‘‘ਤਿਸ੍ਸੋ ਇਮਾ, ਭਿਕ੍ਖਵੇ, ਵਿਧਾ. ਕਤਮਾ ਤਿਸ੍ਸੋ? ਸੇਯ੍ਯੋਹਮਸ੍ਮੀਤਿ ਵਿਧਾ’’ਤਿ (ਵਿਭ. ੯੨੦) ਏਤ੍ਥ ਮਾਨੋ ‘‘ਵਿਧਾ’’ਤਿ ਵੁਤ੍ਤੋ. ਇਧਾਪਿ ਮਾਨੋਵ ਅਧਿਪ੍ਪੇਤੋ. ਮਾਨੋ ਹਿ ਵਿਦਹਨਤੋ ਹੀਨਾਦਿਵਸੇਨ ਤਿਵਿਧਾ. ਤੇਨਾਕਾਰੇਨ ਦਹਨਤੋ ਉਪਦਹਨਤੋ ‘‘ਵਿਧਾ’’ਤਿ ਵੁਚ੍ਚਤਿ.

ਦੁਤਿਯਸਞ੍ਞਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.