੫. ਉਦਕੂਪਮਾਸੁਤ੍ਤਵਣ੍ਣਨਾ

੧੫. ਪਞ੍ਚਮੇ ਏਕਨ੍ਤਕਾਲ਼ਕੇਹੀਤਿ ਨਤ੍ਥਿਕਵਾਦਅਹੇਤੁਕਵਾਦਅਕਿਰਿਯਵਾਦਸਙ੍ਖਾਤੇਹਿ ਨਿਯਤਮਿਚ੍ਛਾਦਿਟ੍ਠਿਧਮ੍ਮੇਹਿ. ਤੇਨਾਹ ‘‘ਨਿਯਤਮਿਚ੍ਛਾਦਿਟ੍ਠਿਂ ਸਨ੍ਧਾਯ ਵੁਤ੍ਤ’’ਨ੍ਤਿ. ਏਵਂ ਪੁਗ੍ਗਲੋਤਿ ਇਮਿਨਾ ਕਾਰਣੇਨ ਏਕਵਾਰਂ ਨਿਮੁਗ੍ਗੋ ਨਿਮੁਗ੍ਗੋਯੇਵ ਸੋ ਹੋਤਿ. ਏਤਸ੍ਸ ਹਿ ਪੁਨ ਭਵਤੋ ਵੁਟ੍ਠਾਨਂ ਨਾਮ ਨਤ੍ਥੀਤਿ ਵਦਨ੍ਤਿ ਮਕ੍ਖਲਿਗੋਸਾਲਾਦਯੋ ਵਿਯ. ਹੇਟ੍ਠਾ ਹੇਟ੍ਠਾ ਨਰਕਗ੍ਗੀਨਂਯੇਵ ਆਹਾਰੋ. ਸਾਧੁ ਸਦ੍ਧਾ ਕੁਸਲੇਸੂਤਿ ਕੁਸਲਧਮ੍ਮੇਸੁ ਸਦ੍ਧਾ ਨਾਮ ਸਾਹੁ ਲਦ੍ਧਕਾਤਿ ਉਮ੍ਮੁਜ੍ਜਤਿ, ਸੋ ਤਾਵਤ੍ਤਕੇਨੇਵ ਕੁਸਲੇਨ ਉਮ੍ਮੁਜ੍ਜਤਿ ਨਾਮ. ਸਾਧੁ ਹਿਰੀਤਿਆਦੀਸੁਪਿ ਏਸੇਵ ਨਯੋ. ਚਙ੍ਕਵਾਰੇਤਿ ਰਜਕਾਨਂ ਖਾਰਪਰਿਸ੍ਸਾਵਨੇ, ਸੁਰਾਪਰਿਸ੍ਸਾਵਨੇ ਵਾ. ਏਵਂ ਪੁਗ੍ਗਲੋਤਿ ‘‘ਏਵਂ ਸਾਧੁ ਸਦ੍ਧਾ’’ਤਿ ਇਮੇਸਂ ਸਦ੍ਧਾਦੀਨਂ ਵਸੇਨ ਏਕਵਾਰਂ ਉਮ੍ਮੁਜ੍ਜਿਤ੍ਵਾ ਤੇਸਂ ਪਰਿਹਾਨਿਯਾ ਪੁਨ ਨਿਮੁਜ੍ਜਤਿਯੇਵ ਦੇਵਦਤ੍ਤਾਦਯੋ ਵਿਯ. ਦੇਵਦਤ੍ਤੋ ਹਿ ਅਟ੍ਠ ਸਮਾਪਤ੍ਤਿਯੋ ਪਞ੍ਚ ਚ ਅਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾਪਿ ਪੁਨ ਬੁਦ੍ਧਾਨਂ ਪਟਿਪਕ੍ਖਤਾਯ ਤੇਹਿ ਗੁਣੇਹਿ ਪਰਿਹੀਨੋ ਰੁਹਿਰੁਪ੍ਪਾਦਕਮ੍ਮਂ ਸਙ੍ਘਭੇਦਕਮ੍ਮਞ੍ਚ ਕਤ੍ਵਾ ਕਾਯਸ੍ਸ ਭੇਦਾ ਦੁਤਿਯਚਿਤ੍ਤਵਾਰੇਨ ਚੁਤਿਚਿਤ੍ਤਮਨਨ੍ਤਰਾ ਨਿਰਯੇ ਨਿਬ੍ਬਤ੍ਤੋ. ਕੋਕਾਲਿਕੋ ਦ੍ਵੇ ਅਗ੍ਗਸਾਵਕੇ ਉਪਵਦਿਤ੍ਵਾ ਪਦੁਮਨਿਰਯੇ ਨਿਬ੍ਬਤ੍ਤੋ.

ਨੇਵ ਹਾਯਤਿ ਨੋ ਵਡ੍ਢਤੀਤਿ ਅਪ੍ਪਹੋਨਕਕਾਲੇਪਿ ਨ ਹਾਯਤਿ, ਪਹੋਨਕਕਾਲੇਪਿ ਨ ਵਡ੍ਢਤਿ. ਉਭਯਮ੍ਪਿ ਪਨੇਤਂ ਅਗਾਰਿਕੇਨਪਿ ਅਨਗਾਰਿਕੇਨਪਿ ਦੀਪੇਤਬ੍ਬਂ. ਏਕਚ੍ਚੋ ਹਿ ਅਗਾਰਿਕੋ ਅਪ੍ਪਹੋਨਕਕਾਲੇ ਪਕ੍ਖਿਕਭਤ੍ਤਂ ਵਸ੍ਸਿਕਂ ਵਾ ਉਪਨਿਬਨ੍ਧਾਪੇਸਿ, ਸੋ ਪਚ੍ਛਾ ਪਹੋਨਕਕਾਲੇਪਿ ਪਕ੍ਖਿਕਭਤ੍ਤਾਦਿਮਤ੍ਤਮੇਵ ਪਵਤ੍ਤੇਤਿ. ਅਨਗਾਰਿਕੋਪਿ ਆਦਿਮ੍ਹਿ ਅਪ੍ਪਹੋਨਕਕਾਲੇ ਉਦ੍ਦੇਸਂ ਧੁਤਙ੍ਗਂ ਵਾ ਗਣ੍ਹਾਤਿ, ਮੇਧਾਵੀ ਬਲਵੀਰਿਯਸਮ੍ਪਤ੍ਤਿਯਾ ਪਹੋਨਕਕਾਲੇ ਤਤੋ ਉਤ੍ਤਰਿਂ ਨ ਕਰੋਤਿ. ਏਵਂ ਪੁਗ੍ਗਲੋਤਿ ਏਵਂ ਇਮਾਯ ਸਦ੍ਧਾਦੀਨਂ ਠਿਤਿਯਾ ਪੁਗ੍ਗਲੋ ਉਮ੍ਮੁਜ੍ਜਿਤ੍ਵਾ ਠਿਤੋ ਨਾਮ ਹੋਤਿ. ਉਮ੍ਮੁਜ੍ਜਿਤ੍ਵਾ ਪਤਰਤੀਤਿ ਸਕਦਾਗਾਮਿਪੁਗ੍ਗਲੋ ਕਿਲੇਸਤਨੁਤਾਯ ਉਟ੍ਠਹਿਤ੍ਵਾ ਗਨ੍ਤਬ੍ਬਦਿਸਾਭਿਮੁਖੋ ਤਰਤਿ ਨਾਮ.

ਪਟਿਗਾਧਪ੍ਪਤ੍ਤੋ ਹੋਤੀਤਿ ਅਨਾਗਾਮਿਪੁਗ੍ਗਲਂ ਸਨ੍ਧਾਯ ਵਦਤਿ. ਇਮੇ ਪਨ ਸਤ੍ਤ ਪੁਗ੍ਗਲਾ ਉਦਕੋਪਮੇਨ ਦੀਪਿਤਾ. ਸਤ੍ਤ ਕਿਰ ਜਙ੍ਘਵਾਣਿਜਾ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਅਨ੍ਤਰਾਮਗ੍ਗੇ ਏਕਂ ਪੁਣ੍ਣਨਦਿਂ ਪਾਪੁਣਿਂਸੁ. ਤੇਸੁ ਪਠਮਂ ਓਤਿਣ੍ਣੋ ਉਦਕਭੀਰੁਕੋ ਪੁਰਿਸੋ ਓਤਿਣ੍ਣਟ੍ਠਾਨੇਯੇਵ ਨਿਮੁਜ੍ਜਿਤ੍ਵਾ ਪੁਨ ਸਣ੍ਠਾਤੁਂ ਨਾਸਕ੍ਖਿ, ਅਵਸ੍ਸਂਵ ਮਚ੍ਛਕਚ੍ਛਪਭਤ੍ਤਂ ਜਾਤੋ. ਦੁਤਿਯੋ ਓਤਿਣ੍ਣਟ੍ਠਾਨੇ ਨਿਮੁਜ੍ਜਿਤ੍ਵਾ ਸਕਿਂ ਉਟ੍ਠਹਿਤ੍ਵਾ ਪੁਨ ਨਿਮੁਗ੍ਗੋ ਉਟ੍ਠਾਤੁਂ ਨਾਸਕ੍ਖਿ, ਅਨ੍ਤੋਯੇਵ ਮਚ੍ਛਕਚ੍ਛਪਭਤ੍ਤਂ ਜਾਤੋ. ਤਤਿਯੋ ਨਿਮੁਜ੍ਜਿਤ੍ਵਾ ਉਟ੍ਠਿਤੋ ਮਜ੍ਝੇ ਨਦਿਯਾ ਠਤ੍ਵਾ ਨੇਵ ਓਰਤੋ ਆਗਨ੍ਤੁਂ, ਨ ਪਾਰਂ ਗਨ੍ਤੁਂ ਅਸਕ੍ਖਿ. ਚਤੁਤ੍ਥੋ ਉਟ੍ਠਾਯ ਠਿਤੋ ਉਤ੍ਤਰਣਤਿਤ੍ਥਂ ਓਲੋਕੇਸਿ. ਪਞ੍ਚਮੋ ਉਤ੍ਤਰਣਤਿਤ੍ਥਂ ਓਲੋਕੇਤ੍ਵਾ ਪਤਰਤਿ. ਛਟ੍ਠੋ ਤਂ ਦਿਸ੍ਵਾ ਪਾਰਿਮਤੀਰਂ ਗਨ੍ਤ੍ਵਾ ਕਟਿਪ੍ਪਮਾਣੇ ਉਦਕੇ ਠਿਤੋ. ਸਤ੍ਤਮੋ ਪਾਰਿਮਤੀਰਂ ਗਨ੍ਤ੍ਵਾ ਗਨ੍ਧਚੁਣ੍ਣਾਦੀਹਿ ਨ੍ਹਤ੍ਵਾ ਵਰਵਤ੍ਥਾਦੀਨਿ ਨਿਵਾਸੇਤ੍ਵਾ ਸੁਰਭਿਵਿਲੇਪਨਂ ਵਿਲਿਮ੍ਪਿਤ੍ਵਾ ਨੀਲੁਪ੍ਪਲਮਾਲਾਦੀਨਿ ਪਿਲਨ੍ਧਿਤ੍ਵਾ ਨਾਨਾਲਙ੍ਕਾਰਪ੍ਪਟਿਮਣ੍ਡਿਤੋ ਮਹਾਨਗਰਂ ਪਵਿਸਿਤ੍ਵਾ ਪਾਸਾਦਮਾਰੁਹਿਤ੍ਵਾ ਉਤ੍ਤਮਭੋਜਨਂ ਭੁਞ੍ਜਤਿ.

ਤਤ੍ਥ ਜਙ੍ਘਵਾਣਿਜਾ ਵਿਯ ਇਮੇ ਸਤ੍ਤ ਪੁਗ੍ਗਲਾ, ਨਦੀ ਵਿਯ ਵਟ੍ਟਂ, ਪਠਮਸ੍ਸ ਉਦਕਭੀਰੁਕਸ੍ਸ ਪੁਰਿਸਸ੍ਸ ਓਤਿਣ੍ਣਟ੍ਠਾਨੇਯੇਵ ਨਿਮੁਜ੍ਜਨਂ ਵਿਯ ਮਿਚ੍ਛਾਦਿਟ੍ਠਿਕਸ੍ਸ ਵਟ੍ਟੇ ਨਿਮੁਜ੍ਜਨਂ, ਉਮ੍ਮੁਜ੍ਜਿਤ੍ਵਾ ਨਿਮੁਜ੍ਜਨਪੁਰਿਸੋ ਵਿਯ ਸਦ੍ਧਾਦੀਨਂ ਉਪ੍ਪਤ੍ਤਿਮਤ੍ਥਕੇਨ ਉਮ੍ਮੁਜ੍ਜਿਤ੍ਵਾ ਤਾਸਂ ਹਾਨਿਯਾ ਨਿਮੁਗ੍ਗਪੁਗ੍ਗਲੋ, ਮਜ੍ਝੇ ਨਦਿਯਾ ਠਤ੍ਵਾ ਵਿਯ ਸਦ੍ਧਾਦੀਨਂ ਠਿਤਿਯਾ ਠਿਤਿਪੁਗ੍ਗਲੋ, ਉਤ੍ਤਰਣਤਿਤ੍ਥਂ ਓਲੋਕੇਨ੍ਤੋ ਵਿਯ ਸੋਤਾਪਨ੍ਨੋ, ਪਤਰਨ੍ਤਪੁਰਿਸੋ ਵਿਯ ਕਿਲੇਸਕਾਮਾਵਟ੍ਟਤਾਯ ਪਤਰਨ੍ਤੋ ਸਕਦਾਗਾਮੀ, ਤਰਿਤ੍ਵਾ ਕਟਿਮਤ੍ਤੇ ਉਦਕੇ ਠਿਤਪੁਰਿਸੋ ਵਿਯ ਅਨਾਵਟ੍ਟਧਮ੍ਮਤ੍ਤਾ ਅਨਾਗਾਮੀ, ਨ੍ਹਤ੍ਵਾ ਪਾਰਿਮਤੀਰਂ ਉਤ੍ਤਰਿਤ੍ਵਾ ਥਲੇ ਠਿਤਪੁਰਿਸੋ ਵਿਯ ਚਤ੍ਤਾਰੋ ਓਘੇ ਅਤਿਕ੍ਕਮਿਤ੍ਵਾ ਨਿਬ੍ਬਾਨਥਲੇ ਠਿਤੋ ਖੀਣਾਸਵਬ੍ਰਾਹ੍ਮਣੋ, ਥਲੇ ਠਿਤਪੁਰਿਸਸ੍ਸ ਨਗਰਂ ਪਵਿਸਿਤ੍ਵਾ ਪਾਸਾਦਂ ਆਰੁਯ੍ਹ ਉਤ੍ਤਮਭੋਜਨਭੁਞ੍ਜਨਂ ਵਿਯ ਖੀਣਾਸਵਸ੍ਸ ਨਿਬ੍ਬਾਨਾਰਮ੍ਮਣਸਮਾਪਤ੍ਤਿਂ ਅਪ੍ਪੇਤ੍ਵਾ ਵੀਤਿਨਾਮਨਂ ਵੇਦਿਤਬ੍ਬਂ.

ਉਦਕੂਪਮਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.