੫. ਧਮ੍ਮਿਕਵਗ੍ਗੋ

੧. ਨਾਗਸੁਤ੍ਤਵਣ੍ਣਨਾ

੪੩. ਪਞ੍ਚਮਸ੍ਸ ਪਠਮੇ ਪਰਿਸਿਞ੍ਚਿਤੁਨ੍ਤਿ (ਮ. ਨਿ. ਅਟ੍ਠ. ੧.੨੭੨) ਯੋ ਚੁਣ੍ਣਮਤ੍ਤਿਕਾਦੀਹਿ ਗਤ੍ਤਾਨਿ ਉਬ੍ਬਟ੍ਟੇਨ੍ਤੋ ਮਲ੍ਲਕਮੁਟ੍ਠਾਦੀਹਿ ਵਾ ਘਂਸਨ੍ਤੋ ਨਹਾਯਤਿ, ਸੋ ‘‘ਨਹਾਯਤੀ’’ਤਿ ਵੁਚ੍ਚਤਿ. ਯੋ ਤਥਾ ਅਕਤ੍ਵਾ ਪਕਤਿਯਾਵ ਨਹਾਯਤਿ, ਸੋ ‘‘ਪਰਿਸਿਞ੍ਚਤੀ’’ਤਿ ਵੁਚ੍ਚਤਿ. ਭਗਵਤੋ ਚ ਸਰੀਰੇ ਤਥਾ ਹਰਿਤਬ੍ਬਂ ਰਜੋਜਲ੍ਲਂ ਨਾਮ ਨੁਪਲਿਮ੍ਪਤਿ ਅਚ੍ਛਛਵਿਭਾਵਤੋ, ਉਤੁਗ੍ਗਹਣਤ੍ਥਂ ਪਨ ਭਗਵਾ ਕੇਵਲਂ ਉਦਕੇ ਓਤਰਤਿ. ਤੇਨਾਹ ‘‘ਗਤ੍ਤਾਨਿ ਪਰਿਸਿਞ੍ਚਿਤੁ’’ਨ੍ਤਿ.

ਪੁਬ੍ਬਕੋਟ੍ਠਕੋਤਿ ਪਾਚੀਨਕੋਟ੍ਠਕੋ. ਸਾਵਤ੍ਥਿਯਂ ਕਿਰ ਜੇਤਵਨਵਿਹਾਰੋ ਕਦਾਚਿ ਮਹਾ, ਕਦਾਚਿ ਖੁਦ੍ਦਕੋ. ਤਥਾ ਹਿ ਸੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਯੋਜਨਿਕੋ ਅਹੋਸਿ, ਸਿਖਿਸ੍ਸ ਤਿਗਾਵੁਤੋ, ਵੇਸ੍ਸਭੁਸ੍ਸ ਅਡ੍ਢਯੋਜਨਿਕੋ, ਕਕੁਸਨ੍ਧਸ੍ਸ ਗਾਵੁਤਪ੍ਪਮਾਣੋ, ਕੋਣਾਗਮਨਸ੍ਸ ਅਡ੍ਢਗਾਵੁਤਪ੍ਪਮਾਣੋ, ਕਸ੍ਸਪਸ੍ਸ ਵੀਸਤਿਉਸਭਪ੍ਪਮਾਣੋ, ਅਮ੍ਹਾਕਂ ਭਗਵਤੋ ਕਾਲੇ ਅਟ੍ਠਕਰੀਸਪ੍ਪਮਾਣੋ ਜਾਤੋ. ਤਮ੍ਪਿ ਨਗਰਂ ਤਸ੍ਸ ਵਿਹਾਰਸ੍ਸ ਕਦਾਚਿ ਪਾਚੀਨਤੋ ਹੋਤਿ, ਕਦਾਚਿ ਦਕ੍ਖਿਣਤੋ, ਕਦਾਚਿ ਪਚ੍ਛਿਮਤੋ, ਕਦਾਚਿ ਉਤ੍ਤਰਤੋ. ਜੇਤਵਨਗਨ੍ਧਕੁਟਿਯਂ ਪਨ ਚਤੁਨ੍ਨਂ ਮਞ੍ਚਪਾਦਾਨਂ ਪਤਿਟ੍ਠਿਤਟ੍ਠਾਨਂ ਅਚਲਮੇਵ. ਚਤ੍ਤਾਰਿ ਹਿ ਅਚਲਚੇਤਿਯਟ੍ਠਾਨਾਨਿ ਨਾਮ ਮਹਾਬੋਧਿਪਲ੍ਲਙ੍ਕਟ੍ਠਾਨਂ, ਇਸਿਪਤਨੇ ਧਮ੍ਮਚਕ੍ਕਪ੍ਪਵਤ੍ਤਨਟ੍ਠਾਨਂ, ਸਙ੍ਕਸ੍ਸਨਗਰੇ ਦੇਵੋਰੋਹਨਕਾਲੇ ਸੋਪਾਨਸ੍ਸ ਪਤਿਟ੍ਠਾਨਟ੍ਠਾਨਂ, ਮਞ੍ਚਪਾਦਟ੍ਠਾਨਨ੍ਤਿ. ਅਯਂ ਪਨ ਪੁਬ੍ਬਕੋਟ੍ਠਕੋ ਕਸ੍ਸਪਦਸਬਲਸ੍ਸ ਵੀਸਤਿਉਸਭਵਿਹਾਰਕਾਲੇ ਪਾਚੀਨਦ੍ਵਾਰਕੋਟ੍ਠਕੋ ਅਹੋਸਿ. ਸੋ ਇਦਾਨਿ ‘‘ਪੁਬ੍ਬਕੋਟ੍ਠਕੋ’’ਤ੍ਵੇਵ ਪਞ੍ਞਾਯਤਿ.

ਕਸ੍ਸਪਦਸਬਲਸ੍ਸ ਕਾਲੇ ਅਚਿਰਵਤੀ ਨਗਰਂ ਪਰਿਕ੍ਖਿਪਿਤ੍ਵਾ ਸਨ੍ਦਮਾਨਾ ਪੁਬ੍ਬਕੋਟ੍ਠਕਂ ਪਤ੍ਵਾ ਉਦਕੇਨ ਭਿਨ੍ਦਿਤ੍ਵਾ ਮਹਨ੍ਤਂ ਉਦਕਰਹਦਂ ਮਾਪੇਸਿ ਸਮਤਿਤ੍ਤਿਕਂ ਅਨੁਪੁਬ੍ਬਗਮ੍ਭੀਰਂ. ਤਤ੍ਥ ਏਕਂ ਰਞ੍ਞੋ ਨ੍ਹਾਨਤਿਤ੍ਥਂ, ਏਕਂ ਨਾਗਰਾਨਂ, ਏਕਂ ਭਿਕ੍ਖੁਸਙ੍ਘਸ੍ਸ, ਏਕਂ ਬੁਦ੍ਧਾਨਨ੍ਤਿ ਏਵਂ ਪਾਟਿਏਕ੍ਕਾਨਿ ਨ੍ਹਾਨਤਿਤ੍ਥਾਨਿ ਹੋਨ੍ਤਿ ਰਮਣੀਯਾਨਿਵਿਪ੍ਪਕਿਣ੍ਣਰਜਤਪਟ੍ਟਸਦਿਸਵਾਲੁਕਾਨਿ. ਇਤਿ ਭਗਵਤਾ ਆਯਸ੍ਮਤਾ ਆਨਨ੍ਦੇਨ ਸਦ੍ਧਿਂ ਯੇਨ ਅਯਂ ਏਵਰੂਪੋ ਪੁਬ੍ਬਕੋਟ੍ਠਕੋ, ਤੇਨੁਪਸਙ੍ਕਮਿ ਗਤ੍ਤਾਨਿ ਪਰਿਸਿਞ੍ਚਿਤੁਂ. ਅਥਾਯਸ੍ਮਾ ਆਨਨ੍ਦੋ ਉਦਕਸਾਟਿਕਂ ਉਪਨਾਮੇਸਿ. ਭਗਵਾ ਸੁਰਤ੍ਤਦੁਪਟ੍ਟਂ ਅਪਨੇਤ੍ਵਾ ਉਦਕਸਾਟਿਕਂ ਨਿਵਾਸੇਸਿ. ਥੇਰੋ ਦੁਪਟ੍ਟੇਨ ਸਦ੍ਧਿਂ ਮਹਾਚੀਵਰਂ ਅਤ੍ਤਨੋ ਹਤ੍ਥਗਤਂ ਅਕਾਸਿ. ਭਗਵਾ ਉਦਕਂ ਓਤਰਿ, ਸਹੋਤਰਣੇਨੇਵਸ੍ਸ ਉਦਕੇ ਮਚ੍ਛਕਚ੍ਛਪਾ ਸਬ੍ਬੇ ਸੁਵਣ੍ਣਵਣ੍ਣਾ ਅਹੇਸੁਂ, ਯਨ੍ਤਨਾਲ਼ਿਕਾਹਿ ਸੁਵਣ੍ਣਰਸਧਾਰਾਨਿ ਸਿਞ੍ਚਨਕਾਲੋ ਵਿਯ ਸੁਵਣ੍ਣਪਟਪ੍ਪਸਾਰਣਕਾਲੋ ਵਿਯ ਚ ਅਹੋਸਿ. ਅਥ ਭਗਵਤੋ ਨਹਾਨਵਤ੍ਤਂ ਦਸ੍ਸੇਤ੍ਵਾ ਪਚ੍ਚੁਤ੍ਤਿਣ੍ਣਸ੍ਸ ਥੇਰੋ ਸੁਰਤ੍ਤਦੁਪਟ੍ਟਂ ਉਪਨਾਮੇਸਿ. ਭਗਵਾ ਤਂ ਨਿਵਾਸੇਤ੍ਵਾ ਵਿਜ੍ਜੁਲ੍ਲਤਾਸਦਿਸਂ ਕਾਯਬਨ੍ਧਨਂ ਬਨ੍ਧਿਤ੍ਵਾ ਮਹਾਚੀਵਰਂ ਅਨ੍ਤਨ੍ਤੇਨ ਸਂਹਰਿਤ੍ਵਾ ਪਦੁਮਗਬ੍ਭਸਦਿਸਂ ਕਤ੍ਵਾ ਉਪਨੀਤਂ ਦ੍ਵੀਸੁ ਕਣ੍ਣੇਸੁ ਗਹੇਤ੍ਵਾ ਅਟ੍ਠਾਸਿ. ਤੇਨ ਵੁਤ੍ਤਂ ‘‘ਪੁਬ੍ਬਕੋਟ੍ਠਕੇ ਗਤ੍ਤਾਨਿ ਪਰਿਸਿਞ੍ਚਿਤ੍ਵਾ ਏਕਚੀਵਰੋ ਅਟ੍ਠਾਸੀ’’ਤਿ.

ਏਵਂ ਠਿਤਸ੍ਸ ਪਨ ਭਗਵਤੋ ਸਰੀਰਂ ਵਿਕਸਿਤਪਦੁਮਪੁਪ੍ਫਸਦਿਸਂ ਸਬ੍ਬਪਾਲਿਫੁਲ੍ਲਂ ਪਾਰਿਚ੍ਛਤ੍ਤਕਂ, ਤਾਰਾਮਰੀਚਿਵਿਕਸਿਤਞ੍ਚ ਗਗਨਤਲਂ ਸਿਰਿਯਾ ਅਵਹਸਮਾਨਂ ਵਿਯ ਵਿਰੋਚਿਤ੍ਥ, ਬ੍ਯਾਮਪ੍ਪਭਾਪਰਿਕ੍ਖੇਪਵਿਲਾਸਿਨੀ ਚਸ੍ਸ ਦ੍ਵਤ੍ਤਿਂਸਵਰਲਕ੍ਖਣਮਾਲਾ ਗਨ੍ਥਿਤ੍ਵਾ ਠਪਿਤਾ ਦ੍ਵਤ੍ਤਿਂਸ ਚਨ੍ਦਿਮਾ ਵਿਯ, ਦ੍ਵਤ੍ਤਿਂਸ ਸੂਰਿਯਾ ਵਿਯ, ਪਟਿਪਾਟਿਯਾ ਠਪਿਤਦ੍ਵਤ੍ਤਿਂਸਚਕ੍ਕਵਤ੍ਤਿਦ੍ਵਤ੍ਤਿਂਸਦੇਵਰਾਜਦ੍ਵਤ੍ਤਿਂਸਮਹਾਬ੍ਰਹ੍ਮਾਨੋ ਵਿਯ ਚ ਅਤਿਵਿਯ ਵਿਰੋਚਿਤ੍ਥ. ਯਸ੍ਮਾ ਚ ਭਗਵਤੋ ਸਰੀਰਂ ਸੁਧਨ੍ਤਚਾਮੀਕਰਸਮਾਨਵਣ੍ਣਂ, ਸੁਪਰਿਸੋਧਿਤਪਵਾਲ਼ਰੁਚਿਰਤੋਰਣਂ, ਸੁਵਿਸੁਦ੍ਧਨੀਲਰਤਨਾਵਲਿਸਦਿਸਕੇਸਤਨੁਰੁਹਂ, ਤਸ੍ਮਾ ਤਹਂ ਤਹਂ ਵਿਨਿਗ੍ਗਤਸੁਜਾਤਜਾਤਿਹਿਙ੍ਗੁਲਕਰਸੂਪਸੋਭਿਤਂ ਉਪਰਿ ਸਤਮੇਘਰਤਨਾਵਲਿਸੁਚ੍ਛਾਦਿਤਂ ਜਙ੍ਗਮਮਿਵ ਕਨਕਗਿਰਿਸਿਖਰਂ ਵਿਰੋਚਿਤ੍ਥ. ਤਸ੍ਮਿਞ੍ਚ ਸਮਯੇ ਦਸਬਲਸ੍ਸ ਸਰੀਰਤੋ ਨਿਕ੍ਖਮਿਤ੍ਵਾ ਛਬ੍ਬਣ੍ਣਰਸ੍ਮਿਯੋ ਸਮਨ੍ਤਤੋ ਅਸੀਤਿਹਤ੍ਥਪ੍ਪਮਾਣੇ ਪਦੇਸੇ ਆਧਾਵਨ੍ਤੀ ਵਿਧਾਵਨ੍ਤੀ ਰਤਨਾਵਲਿਰਤਨਦਾਮਰਤਨਚੁਣ੍ਣਵਿਪ੍ਪਕਿਣ੍ਣਂ ਵਿਯ ਪਸਾਰਿਤਰਤਨਚਿਤ੍ਤਕਞ੍ਚਨਪਟ੍ਟਮਿਵ ਆਸਿਞ੍ਚਮਾਨਲਾਖਾਰਸਧਾਰਾਚਿਤ੍ਤਮਿਵ ਉਕ੍ਕਾਸਤਨਿਪਾਤਸਮਾਕੁਲਮਿਵ ਨਿਰਨ੍ਤਰਵਿਪ੍ਪਕਿਣ੍ਣਕਣਿਕਾਰਕਿਙ੍ਕਿਣਿਕਪੁਪ੍ਫਮਿਵ ਵਾਯੁਵੇਗਸਮੁਦ੍ਧਤਚਿਨਪਿਟ੍ਠਚੁਣ੍ਣਰਞ੍ਜਿਤਮਿਵ ਇਨ੍ਦਧਨੁਵਿਜ੍ਜੁਲ੍ਲਤਾਵਿਤਾਨਸਨ੍ਥਤਮਿਵ ਚ ਗਗਨਤਲਂ, ਤਂ ਠਾਨਂ ਪਵਨਞ੍ਚ ਸਮ੍ਮਾ ਫਰਨ੍ਤਿ. ਵਣ੍ਣਭੂਮਿ ਨਾਮੇਸਾ. ਏਵਰੂਪੇਸੁ ਠਾਨੇਸੁ ਬੁਦ੍ਧਾਨਂ ਸਰੀਰਵਣ੍ਣਂ ਵਾ ਗੁਣਵਣ੍ਣਂ ਵਾ ਚੁਣ੍ਣਿਯਪਦੇਹਿ ਵਾ ਗਾਥਾਹਿ ਵਾ ਅਤ੍ਥਞ੍ਚ ਉਪਮਾਯੋ ਚ ਕਾਰਣਾਨਿ ਚ ਆਹਰਿਤ੍ਵਾ ਪਟਿਬਲੇਨ ਧਮ੍ਮਕਥਿਕੇਨ ਪੂਰੇਤ੍ਵਾ ਕਥੇਤੁਂ ਵਟ੍ਟਤਿ. ਏਵਰੂਪੇਸੁ ਹਿ ਠਾਨੇਸੁ ਧਮ੍ਮਕਥਿਕਸ੍ਸ ਥਾਮੋ ਵੇਦਿਤਬ੍ਬੋ. ਪੁਬ੍ਬਸਦਿਸਾਨਿ ਕੁਰੁਮਾਨੋਤਿ ਨਿਰੁਦਕਾਨਿ ਕੁਰੁਮਾਨੋ, ਸੁਕ੍ਖਾਪਯਮਾਨੋਤਿ ਅਤ੍ਥੋ. ਸੋਦਕੇ ਗਤ੍ਤੇ ਚੀਵਰਂ ਪਾਰੁਪਨ੍ਤਸ੍ਸ ਹਿ ਚੀਵਰੇ ਕਣ੍ਣਿਕਾਨਿ ਉਟ੍ਠਹਨ੍ਤਿ, ਪਰਿਕ੍ਖਾਰਭਣ੍ਡਂ ਦੁਸ੍ਸਤਿ, ਬੁਦ੍ਧਾਨਂ ਪਨ ਸਰੀਰੇ ਰਜੋਜਲ੍ਲਂ ਨ ਉਪਲਿਮ੍ਪਤਿ, ਪਦੁਮਪਤ੍ਤੇ ਉਕ੍ਖਿਤ੍ਤਉਦਕਬਿਨ੍ਦੁ ਵਿਯ ਉਦਕਂ ਵਿਨਿਵਟ੍ਟੇਤ੍ਵਾ ਗਚ੍ਛਤਿ. ਏਵਂ ਸਨ੍ਤੇਪਿ ਸਿਕ੍ਖਾਗਾਰਵਤਾਯ ਭਗਵਾ ‘‘ਪਬ੍ਬਜਿਤਵਤ੍ਤਂ ਨਾਮੇਤ’’ਨ੍ਤਿ ਮਹਾਚੀਵਰਂ ਉਭੋਸੁ ਕਣ੍ਣੇਸੁ ਗਹੇਤ੍ਵਾ ਪੁਰਤੋ ਕਾਯਂ ਪਟਿਚ੍ਛਾਦੇਤ੍ਵਾ ਅਟ੍ਠਾਸਿ.

ਤਾਲ਼ਿਤਞ੍ਚ ਵਾਦਿਤਞ੍ਚ ਤਾਲ਼ਿਤਵਾਦਿਤਂ, ਤੂਰਿਯਾਨਂ ਤਾਲ਼ਿਤਵਾਦਿਤਂ ਤੂਰਿਯਤਾਲ਼ਿਤਵਾਦਿਤਂ. ਮਹਨ੍ਤਞ੍ਚ ਤਂ ਤੂਰਿਯਤਾਲ਼ਿਤਵਾਦਿਤਞ੍ਚਾਤਿ ਮਹਾਤੂਰਿਯਤਾਲ਼ਿਤਵਾਦਿਤਂ. ਤੇਨਾਹ ‘‘ਮਹਨ੍ਤੇਨਾ’’ਤਿਆਦਿ. ਅਥ ਵਾ ਭੇਰਿਮੁਦਿਙ੍ਗਪਣਵਾਦਿਤੂਰਿਯਾਨਂ ਤਾਲ਼ਿਤਂ ਵੀਣਾਵੇਲ਼ੁਗੋਮੁਖਿਆਦੀਨਂ ਵਾਦਿਤਞ੍ਚ ਤੂਰਿਯਤਾਲ਼ਿਤਵਾਦਿਤਨ੍ਤਿ ਵਾ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਅਭਿਞ੍ਞਾਪਾਰਂ ਗਤੋਤਿ ਅਭਿਞ੍ਞਾਪਾਰਗੂ. ਏਵਂ ਸੇਸੇਸੁਪਿ. ਸੋ ਹਿ ਭਗਵਾ ਸਬ੍ਬਧਮ੍ਮੇ ਅਭਿਜਾਨਨ੍ਤੋ ਗਤੋਤਿ ਅਭਿਞ੍ਞਾਪਾਰਗੂ. ਤੇਸੁ ਪਞ੍ਚੁਪਾਦਾਨਕ੍ਖਨ੍ਧੇ ਪਰਿਜਾਨਨ੍ਤੋ ਗਤੋਤਿ ਪਰਿਞ੍ਞਾਪਾਰਗੂ. ਸਬ੍ਬਕਿਲੇਸੇ ਪਜਹਨ੍ਤੋ ਗਤੋਤਿ ਪਹਾਨਪਾਰਗੂ. ਚਤ੍ਤਾਰੋ ਮਗ੍ਗੇ ਭਾਵੇਨ੍ਤੋ ਗਤੋਤਿ ਭਾਵਨਾਪਾਰਗੂ. ਨਿਰੋਧਂ ਸਚ੍ਛਿਕਰੋਨ੍ਤੋ ਗਤੋਤਿ ਸਚ੍ਛਿਕਿਰਿਯਾਪਾਰਗੂ. ਸਬ੍ਬਸਮਾਪਤ੍ਤਿਂ ਸਮਾਪਜ੍ਜਨ੍ਤੋ ਗਤੋਤਿ ਸਮਾਪਤ੍ਤਿਪਾਰਗੂ. ਸੁਬ੍ਰਹ੍ਮਦੇਵਪੁਤ੍ਤਾਦਯੋਤਿ ਏਤ੍ਥ ਸੋ ਕਿਰ ਦੇਵਪੁਤ੍ਤੋ ਅਚ੍ਛਰਾਸਙ੍ਘਪਰਿਵੁਤੋ ਨਨ੍ਦਨਕੀਲ਼ਿਤਂ ਕਤ੍ਵਾ ਪਾਰਿਚ੍ਛਤ੍ਤਕਮੂਲੇ ਪਞ੍ਞਤ੍ਤਾਸਨੇ ਨਿਸੀਦਿ. ਤਂ ਪਞ੍ਚਸਤਾ ਪਰਿਵਾਰੇਤ੍ਵਾ ਨਿਸਿਨ੍ਨਾ, ਪਞ੍ਚਸਤਾ ਰੁਕ੍ਖਂ ਅਭਿਰੁਹਿਤ੍ਵਾ ਮਧੁਰਸ੍ਸਰੇਨ ਗਾਯਿਤ੍ਵਾ ਪੁਪ੍ਫਾਨਿ ਪਾਤੇਨ੍ਤਿ. ਤਾਨਿ ਗਹੇਤ੍ਵਾ ਇਤਰਾ ਏਕਤੋਵਣ੍ਟਿਕਮਾਲਾਵ ਗਨ੍ਥੇਨ੍ਤਿ. ਅਥ ਰੁਕ੍ਖਂ ਅਭਿਰੁਲ਼੍ਹਾ ਉਪਚ੍ਛੇਦਕਵਸੇਨ ਏਕਪ੍ਪਹਾਰੇਨੇਵ ਕਾਲਂ ਕਤ੍ਵਾ ਅਵੀਚਿਮ੍ਹਿ ਨਿਬ੍ਬਤ੍ਤਾ ਮਹਾਦੁਕ੍ਖਂ ਅਨੁਭਵਨ੍ਤਿ. ਅਥ ਕਾਲੇ ਗਚ੍ਛਨ੍ਤੇ ਦੇਵਪੁਤ੍ਤੋ ‘‘ਇਮਾਸਂ ਨੇਵ ਸਦ੍ਦੋ ਸੁਯ੍ਯਤਿ, ਨ ਪੁਪ੍ਫਾਨਿ ਪਾਤੇਨ੍ਤਿ, ਕਹਂ ਨੁ ਖੋ ਗਤਾ’’ਤਿ ਆਵਜ੍ਜੇਨ੍ਤੋ ਨਿਰਯੇ ਨਿਬ੍ਬਤ੍ਤਭਾਵਂ ਦਿਸ੍ਵਾ ਪਿਯਵਤ੍ਥੁਕਸੋਕੇਨ ਰੁਪ੍ਪਮਾਨੋ ਚਿਨ੍ਤੇਸਿ – ‘‘ਏਤਾ ਤਾਵ ਯਥਾਕਮ੍ਮੇਨ ਗਤਾ, ਮਯ੍ਹਂ ਆਯੁਸਙ੍ਖਾਰੋ ਕਿਤ੍ਤਕੋ’’ਤਿ. ਸੋ ‘‘ਸਤ੍ਤਮੇ ਦਿਵਸੇ ਮਯਾਪਿ ਅਵਸੇਸਾਹਿ ਪਞ੍ਚਸਤਾਹਿ ਸਦ੍ਧਿਂ ਕਾਲਂ ਕਤ੍ਵਾ ਤਤ੍ਥੇਵ ਨਿਬ੍ਬਤ੍ਤਿਤਬ੍ਬ’’ਨ੍ਤਿ ਦਿਸ੍ਵਾ ਬਲਵਤਰੇਨ ਸੋਕੇਨ ਸਮਪ੍ਪਿਤੋ. ‘‘ਇਮਂ ਮਯ੍ਹਂ ਸੋਕਂ ਸਦੇਵਕੇ ਲੋਕੇ ਅਞ੍ਞਤ੍ਰ ਤਥਾਗਤਾ ਨਿਬ੍ਬਾਪੇਤੁਂ ਸਮਤ੍ਥੋ ਨਤ੍ਥੀ’’ਤਿ ਚਿਨ੍ਤੇਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ –

‘‘ਨਿਚ੍ਚਂ ਉਤ੍ਰਸ੍ਤਮਿਦਂ ਚਿਤ੍ਤਂ, ਨਿਚ੍ਚਂ ਉਬ੍ਬਿਗ੍ਗਮਿਦਂ ਮਨੋ;

ਅਨੁਪ੍ਪਨ੍ਨੇਸੁ ਕਿਚ੍ਛੇਸੁ, ਅਥੋ ਉਪ੍ਪਤਿਤੇਸੁ ਚ;

ਸਚੇ ਅਤ੍ਥਿ ਅਨੁਤ੍ਰਸ੍ਤਂ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ. (ਸਂ. ਨਿ. ੧.੯੮) –

ਇਮਂ ਗਾਥਮਭਾਸਿ. ਭਗਵਾਪਿਸ੍ਸ –

‘‘ਨਾਞ੍ਞਤ੍ਰ ਬੋਜ੍ਝਾ ਤਪਸਾ, ਨਾਞ੍ਞਤ੍ਰਿਨ੍ਦ੍ਰਿਯਸਂਵਰਾ;

ਨਾਞ੍ਞਤ੍ਰ ਸਬ੍ਬਨਿਸ੍ਸਗ੍ਗਾ, ਸੋਤ੍ਥਿਂ ਪਸ੍ਸਾਮਿ ਪਾਣਿਨ’’ਨ੍ਤਿ. (ਸਂ. ਨਿ. ੧.੯੮) –

ਧਮ੍ਮਂ ਦੇਸੇਸਿ. ਸੋ ਦੇਸਨਾਪਰਿਯੋਸਾਨੇ ਵਿਗਤਸੋਕੋ ਪਞ੍ਚਹਿ ਅਚ੍ਛਰਾਸਤੇਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਭਗਵਨ੍ਤਂ ਨਮਸ੍ਸਮਾਨੋ ਅਟ੍ਠਾਸਿ. ਤਂ ਸਨ੍ਧਾਯੇਤਂ ਵੁਤ੍ਤਂ ‘‘ਦੁਕ੍ਖਪ੍ਪਤ੍ਤਾ ਸੁਬ੍ਰਹ੍ਮਦੇਵਪੁਤ੍ਤਾਦਯੋ’’ਤਿ. ਆਦਿ-ਸਦ੍ਦੇਨ ਚਨ੍ਦਸੂਰਿਯਦੇਵਪੁਤ੍ਤਾਦਯੋ ਸਙ੍ਗਣ੍ਹਾਤਿ. ਚਤੂਹਿ ਕਾਰਣੇਹੀਤਿ ਆਰਕਤ੍ਤਾ, ਅਰੀਨਂ ਅਰਾਨਞ੍ਚ ਹਤਤ੍ਤਾ, ਪਚ੍ਚਯਾਦੀਨਂ ਅਰਹਤ੍ਤਾ, ਪਾਪਕਰਣੇ ਰਹਾਭਾਵਾਤਿ ਇਮੇਹਿ ਚਤੂਹਿ ਕਾਰਣੇਹਿ.

ਦਸਵਿਧਸਂਯੋਜਨਾਨੀਤਿ ਓਰਮ੍ਭਾਗਿਯੁਦ੍ਧਮ੍ਭਾਗਿਯਭੇਦਤੋ ਦਸਵਿਧਸਂਯੋਜਨਾਨਿ. ਸਬ੍ਬੇ ਅਚ੍ਚਰੁਚੀਤਿ ਸਬ੍ਬਸਤ੍ਤੇ ਅਤਿਕ੍ਕਮਿਤ੍ਵਾ ਪਵਤ੍ਤਰੁਚਿ. ਅਟ੍ਠਮਕਨ੍ਤਿ ਸੋਤਾਪਤ੍ਤਿਮਗ੍ਗਟ੍ਠਂ ਸਨ੍ਧਾਯ ਵਦਤਿ. ਸੋਤਾਪਨ੍ਨੋਤਿ ਫਲਟ੍ਠੋ ਗਹਿਤੋ.

ਸੋਰਚ੍ਚਨ੍ਤਿ ‘‘ਤਤ੍ਥ ਕਤਮਂ ਸੋਰਚ੍ਚਂ? ਯੋ ਕਾਯਿਕੋ ਅਵੀਤਿਕ੍ਕਮੋ, ਵਾਚਸਿਕੋ ਅਵੀਤਿਕ੍ਕਮੋ, ਕਾਯਿਕਵਾਚਸਿਕੋ ਅਵੀਤਿਕ੍ਕਮੋ, ਇਦਂ ਵੁਚ੍ਚਤਿ ਸੋਰਚ੍ਚਂ, ਸਬ੍ਬਾਪਿ ਸੀਲਸਂਵਰੋ ਸੋਰਚ੍ਚ’’ਨ੍ਤਿ (ਧ. ਸ. ੧੩੪੯) ਵਚਨਤੋ ਸੁਚਿਸੀਲਂ ‘‘ਸੋਰਚ੍ਚ’’ਨ੍ਤਿ ਵੁਤ੍ਤਂ. ਕਰੂਣਾਤਿ ਕਰੁਣਾਬ੍ਰਹ੍ਮਵਿਹਾਰਮਾਹ. ਕਰੁਣਾਪੁਬ੍ਬਭਾਗੋਤਿ ਤਸ੍ਸ ਪੁਬ੍ਬਭਾਗਂ ਉਪਚਾਰਜ੍ਝਾਨਂ ਵਦਤਿ.

ਦੁਵਿਧੇਨ ਝਾਨੇਨਾਤਿ ਆਰਮ੍ਮਣੂਪਨਿਜ੍ਝਾਨਲਕ੍ਖਣੂਪਨਿਜ੍ਝਾਨਭੇਦਤੋ ਦੁਵਿਧੇਨ ਝਾਨਮਨੇਨ. ਪਞ੍ਚਵਿਧਮਿਚ੍ਛਾਜੀਵਵਸੇਨਾਤਿ ਕੁਹਨਾਲਪਨਾਨੇਮਿਤ੍ਤਿਕਤਾਨਿਪ੍ਪੇਸਿਕਤਾਲਾਭੇਨਲਾਭਂਨਿਜਿਗੀਸਨਤਾਸਙ੍ਖਾਤ- ਪਞ੍ਚਵਿਧਮਿਚ੍ਛਾਜੀਵਵਸੇਨ. ਨ ਲਿਪ੍ਪਤੀਤਿ ਨ ਅਲ੍ਲੀਯਤਿ ਅਨੁਸਯਤੋ ਆਰਮ੍ਮਣਕਰਣਤੋ ਵਾ ਤਣ੍ਹਾਦਿਟ੍ਠਿਅਭਿਨਿਵੇਸਾਭਾਵਤੋ. ਸੇਸਮੇਤ੍ਥ ਉਤ੍ਤਾਨਮੇਵ.

ਨਾਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਮਿਗਸਾਲਾਸੁਤ੍ਤਵਣ੍ਣਨਾ

੪੪. ਦੁਤਿਯੇ ਸਮਸਮਗਤਿਯਾਤਿ ਕ-ਕਾਰਸ੍ਸ ਯ-ਕਾਰਵਸੇਨ ਨਿਦ੍ਦੇਸੋਤਿ ਆਹ ‘‘ਸਮਭਾਵੇਨੇਵ ਸਮਗਤਿਕਾ’’ਤਿ. ਭਵਿਸ੍ਸਨ੍ਤੀਤਿ ਅਤੀਤਤ੍ਥੇ ਅਨਾਗਤਵਚਨਂ ਕਤਨ੍ਤਿ ਆਹ ‘‘ਭਵਿਸ੍ਸਨ੍ਤੀਤਿ ਜਾਤਾ’’ਤਿ. ਪੁਰਾਣਸ੍ਸ ਹਿ ਇਸਿਦਤ੍ਤਸ੍ਸ ਚ ਸਮਗਤਿਕਂ ਸਨ੍ਧਾਯ ਸਾ ਏਵਮਾਹ.

ਅਮ੍ਮਕਾਤਿ ਮਾਤੁਗਾਮੋ. ਉਪਚਾਰਵਚਨਞ੍ਹੇਤਂ. ਇਤ੍ਥੀਸੁ ਯਦਿਦਂ ਅਮ੍ਮਕਾ ਮਾਤੁਗਾਮੋ ਜਨਨੀ ਜਨਿਕਾਤਿ. ਤੇਨਾਹ ‘‘ਇਤ੍ਥੀ ਹੁਤ੍ਵਾ ਇਤ੍ਥਿਸਞ੍ਞਾਯ ਏਵ ਸਮਨ੍ਨਾਗਤਾ’’ਤਿ.

ਦਿਟ੍ਠਿਯਾ ਪਟਿਵਿਜ੍ਝਿਤਬ੍ਬਂ ਅਪ੍ਪਟਿਵਿਦ੍ਧਂ ਹੋਤੀਤਿ ਅਤ੍ਥਤੋ ਕਾਰਣਤੋ ਚ ਪਞ੍ਞਾਯ ਪਟਿਵਿਜ੍ਝਿਤਬ੍ਬਂ ਅਪ੍ਪਟਿਵਿਦ੍ਧਂ ਹੋਤਿ, ਨਿਜ੍ਜਟਂ ਨਿਗ੍ਗੁਮ੍ਬਂ ਕਤ੍ਵਾ ਯਾਥਾਵਤੋ ਅਵਿਦਿਤਂ ਹੋਤਿ. ਸਮਯੇ ਸਮਯੇ ਕਿਲੇਸੇਹਿ ਵਿਮੁਚ੍ਚਨਕਂ ਪੀਤਿਪਾਮੋਜ੍ਜਂ ਇਧ ਸਾਮਾਯਿਕਂ ਮ-ਕਾਰੇ ਅਕਾਰਸ੍ਸ ਦੀਘਂ ਕਤ੍ਵਾ. ਤੇਨਾਹ – ‘‘ਸਾਮਾਯਿਕਮ੍ਪਿ ਵਿਮੁਤ੍ਤਿਂ ਨ ਲਭਤੀਤਿ ਕਾਲਾਨੁਕਾਲਂ ਧਮ੍ਮਸ੍ਸਵਨਂ ਨਿਸ੍ਸਾਯ ਪੀਤਿਪਾਮੋਜ੍ਜਂ ਨ ਲਭਤੀ’’ਤਿ. ਪਮਿਣਨ੍ਤੀਤਿ ਏਤ੍ਥ ਆਰਮ੍ਭਤ੍ਥੋ ਪ-ਸਦ੍ਦੋਤਿ ਆਹ ‘‘ਤੁਲੇਤੁਂ ਆਰਭਨ੍ਤੀ’’ਤਿ. ਪਣੀਤੋਤਿ ਵਿਸਿਟ੍ਠੋ.

ਤਦਨ੍ਤਰਨ੍ਤਿ ਵਚਨਵਿਪਲ੍ਲਾਸੇਨ ਉਪਯੋਗਤ੍ਥੇ ਸਾਮਿਵਚਨਂ ਕਤਨ੍ਤਿ ਆਹ ‘‘ਤਂ ਅਨ੍ਤਰਂ ਤਂ ਕਾਰਣ’’ਨ੍ਤਿ. ਲੋਭਸ੍ਸ ਅਪਰਾਪਰੁਪ੍ਪਤ੍ਤਿਯਾ ਬਹੁਵਚਨਵਸੇਨ ‘‘ਲੋਭਧਮ੍ਮਾ’’ਤਿ ਵੁਤ੍ਤਾ. ਸੀਲੇਨ ਵਿਸੇਸੀ ਅਹੋਸਿ ਮੇਥੁਨਧਮ੍ਮਵਿਰਤਿਯਾ ਸਮਨ੍ਨਾਗਤਤ੍ਤਾ.

ਮਿਗਸਾਲਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩-੬. ਇਣਸੁਤ੍ਤਾਦਿਵਣ੍ਣਨਾ

੪੫-੪੮. ਤਤਿਯੇ ਦਲਿਦ੍ਦੋ ਨਾਮ ਦੁਗ੍ਗਤੋ, ਤਸ੍ਸ ਭਾਵੋ ਦਾਲਿਦ੍ਦਿਯਂ. ਨ ਏਤਸ੍ਸ ਸਕਂ ਸਾਪਤੇਯ੍ਯਨ੍ਤਿ ਅਸ੍ਸਕੋ, ਅਸਾਪਤੇਯ੍ਯੋ. ਤੇਨਾਹ ‘‘ਅਤ੍ਤਨੋ ਸਨ੍ਤਕੇਨ ਰਹਿਤੋ’’ਤਿ. ‘‘ਬੁਦ੍ਧੋ ਧਮ੍ਮੋ ਸਙ੍ਘੋ’’ਤਿ ਵੁਤ੍ਤੇ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’’ਤਿ ਕੇਨਚਿ ਅਕਮ੍ਪਿਯਭਾਵੇਨ ਓਕਪ੍ਪਨਂ ਰਤਨਤ੍ਤਯਗੁਣੇ ਓਗਾਹੇਤ੍ਵਾ ਕਪ੍ਪਨਂ ਓਕਪ੍ਪਨਸਦ੍ਧਾ ਨਾਮ. ‘‘ਇਦਂ ਅਕੁਸਲਂ ਕਮ੍ਮਂ ਨੋ ਸਕਂ, ਇਦਂ ਪਨ ਕਮ੍ਮਂ ਸਕ’’ਨ੍ਤਿ ਏਵਂ ਬ੍ਯਤਿਰੇਕਤੋ ਅਨ੍ਵਯਤੋ ਚ ਕਮ੍ਮਸ੍ਸਕਤਜਾਨਨਪਞ੍ਞਾ ਕਮ੍ਮਸ੍ਸਕਤਪਞ੍ਞਾ. ਤਿਵਿਧਞ੍ਹਿ ਦੁਚ੍ਚਰਿਤਂ ਅਤ੍ਤਨਾ ਕਤਮ੍ਪਿ ਸਕਕਮ੍ਮਂ ਨਾਮ ਨ ਹੋਤਿ ਅਤ੍ਥਭਞ੍ਜਨਤੋ. ਸੁਚਰਿਤਂ ਸਕਕਮ੍ਮਂ ਨਾਮ ਅਤ੍ਥਜਨਨਤੋ. ਇਣਾਦਾਨਸ੍ਮਿਨ੍ਤਿ ਪਚ੍ਚਤ੍ਤਵਚਨਤ੍ਥੇ ਏਤਂ ਭੁਮ੍ਮਨ੍ਤਿ ਆਹ ‘‘ਇਣਗ੍ਗਹਣਂ ਵਦਾਮੀ’’ਤਿ.

ਕਟਗ੍ਗਾਹੋਤਿ ਕਤਂ ਸਬ੍ਬਸੋ ਸਿਦ੍ਧਮੇਵ ਕਤ੍ਵਾ ਗਹਣਂ. ਸੋ ਪਨ ਵਿਜਯਲਾਭੋ ਹੋਤੀਤਿ ਆਹ ‘‘ਜਯਗ੍ਗਾਹੋ’’ਤਿ. ਹਿਰਿਮਨੋ ਏਤਸ੍ਸਾਤਿ ਹਿਰਿਮਨੋਤਿ ਆਹ ‘‘ਹਿਰਿਸਮ੍ਪਯੁਤ੍ਤਚਿਤ੍ਤੋ’’ਤਿ, ਪਾਪਜਿਗੁਚ੍ਛਨਲਕ੍ਖਣਾਯ ਹਿਰਿਯਾ ਸਮ੍ਪਯੁਤ੍ਤਚਿਤ੍ਤੋਤਿ ਅਤ੍ਥੋ. ਓਤ੍ਤਪ੍ਪਤਿ ਉਬ੍ਬਿਜ੍ਜਤਿ ਭਾਯਤਿ ਸੀਲੇਨਾਤਿ ਓਤ੍ਤਪ੍ਪੀ, ਓਤ੍ਤਪ੍ਪੇਨ ਸਮਨ੍ਨਾਗਤੋ. ਨਿਰਾਮਿਸਂ ਸੁਖਨ੍ਤਿ ਤਤਿਯਜ੍ਝਾਨਸੁਖਂ ਦੂਰਸਮੁਸ੍ਸਾਰਿਤਕਾਮਾਮਿਸਤ੍ਤਾ. ਉਪੇਕ੍ਖਨ੍ਤਿ ਚਤੁਤ੍ਥਜ੍ਝਾਨੁਪੇਕ੍ਖਂ, ਨ ਯਂ ਕਿਞ੍ਚਿ ਉਪੇਕ੍ਖਾਵੇਦਨਨ੍ਤਿ ਆਹ ‘‘ਚਤੁਤ੍ਥਜ੍ਝਾਨੁਪੇਕ੍ਖ’’ਨ੍ਤਿ. ਆਰਦ੍ਧਵੀਰਿਯੋਤਿ ਪਗ੍ਗਹਿਤਪਰਿਪੁਣ੍ਣਕਾਯਿਕਚੇਤਸਿਕਵੀਰਿਯੋਤਿ ਅਤ੍ਥੋ. ਯੋ ਗਣਸਙ੍ਗਣਿਕਂ ਵਿਨੋਦੇਤ੍ਵਾ ਚਤੂਸੁ ਇਰਿਯਾਪਥੇਸੁ ਅਟ੍ਠਆਰਮ੍ਭਵਤ੍ਥੁਵਸੇਨ ਏਕਕੋ ਹੋਤਿ, ਤਸ੍ਸ ਕਾਯਿਕਂ ਵੀਰਿਯਂ ਆਰਦ੍ਧਂ ਨਾਮ ਹੋਤਿ. ਚਿਤ੍ਤਸਙ੍ਗਣਿਕਂ ਵਿਨੋਦੇਤ੍ਵਾ ਅਟ੍ਠਸਮਾਪਤ੍ਤਿਵਸੇਨ ਏਕਕੋ ਹੋਤਿ. ਗਮਨੇ ਉਪ੍ਪਨ੍ਨਕਿਲੇਸਸ੍ਸ ਠਾਨਂ ਪਾਪੁਣਿਤੁਂ ਨ ਦੇਤਿ, ਠਾਨੇ ਉਪ੍ਪਨ੍ਨਕਿਲੇਸਸ੍ਸ ਨਿਸਜ੍ਜਂ, ਨਿਸਜ੍ਜਾਯ ਉਪ੍ਪਨ੍ਨਕਿਲੇਸਸ੍ਸ ਸਯਨਂ ਪਾਪੁਣਿਤੁਂ ਨ ਦੇਤਿ, ਉਪ੍ਪਨ੍ਨਟ੍ਠਾਨੇਯੇਵ ਕਿਲੇਸੇ ਨਿਗ੍ਗਣ੍ਹਾਤਿ. ਅਯਂ ਚੇਤਸਿਕਂ ਵੀਰਿਯਂ ਆਰਦ੍ਧਂ ਨਾਮ ਹੋਤਿ. ਪਟਿਪਕ੍ਖਦੂਰੀਭਾਵੇਨ ਸੇਟ੍ਠਟ੍ਠੇਨ ਚ ਏਕੋ ਉਦੇਤੀਤਿ ਏਕੋਦਿ, ਏਕਗ੍ਗਤਾ. ਤਸ੍ਸ ਯੋਗਤੋ ਏਕਗ੍ਗਚਿਤ੍ਤੋ ਇਧ ਏਕੋਦਿ. ਪਟਿਪਕ੍ਖਤੋ ਅਤ੍ਤਾਨਂ ਨਿਪਾਤਿ, ਤਂ ਵਾ ਨਿਪਯਤਿ ਵਿਸੋਸੇਤੀਤਿ ਨਿਪਕੋ. ਅਞ੍ਞਤਰਂ ਕਾਯਾਦਿਭੇਦਂ ਆਰਮ੍ਮਣਂ ਸਾਤਿਸਯਾਯ ਸਤਿਯਾ ਸਰਤੀਤਿ ਸਤੋ. ਤੇਨਾਹ ‘‘ਏਕਗ੍ਗਚਿਤ੍ਤੋ’’ਤਿਆਦਿ.

ਅਕੁਪ੍ਪਾ ਮੇ ਵਿਮੁਤ੍ਤੀਤਿ ਮਯ੍ਹਂ ਅਰਹਤ੍ਤਫਲਵਿਮੁਤ੍ਤਿ ਅਕੁਪ੍ਪਤਾਯ ਅਕੁਪ੍ਪਾਰਮ੍ਮਣਤਾਯ ਚ ਅਕੁਪ੍ਪਾ. ਸਾ ਹਿ ਰਾਗਾਦੀਹਿ ਨ ਕੁਪ੍ਪਤੀਤਿ ਅਕੁਪ੍ਪਤਾਯਪਿ ਅਕੁਪ੍ਪਾ. ਅਕੁਪ੍ਪਂ ਨਿਬ੍ਬਾਨਮਸ੍ਸਾ ਆਰਮ੍ਮਣਨ੍ਤਿ ਅਕੁਪ੍ਪਾਰਮ੍ਮਣਤਾਯਪਿ ਅਕੁਪ੍ਪਾ. ਤੇਨੇਵਾਹ ‘‘ਅਕੁਪ੍ਪਾਰਮ੍ਮਣਤ੍ਤਾ’’ਤਿਆਦਿ. ਭਵਸਂਯੋਜਨਾਨਨ੍ਤਿ ਕਾਮਰਾਗਪਟਿਘਮਾਨਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਭਵਰਾਗਇਸ੍ਸਾਮਚ੍ਛਰਿਯ- ਅਵਿਜ੍ਜਾਸਙ੍ਖਾਤਾਨਂ ਦਸਨ੍ਨਂ ਸਂਯੋਜਨਾਨਂ. ਇਮਾਨਿ ਹਿ ਸਤ੍ਤੇ ਭਵੇਸੁ ਸਂਯੋਜੇਨ੍ਤਿ ਉਪਨਿਬਨ੍ਧਨ੍ਤਿ ਭਵਾਭਵੇਨ ਸਂਯੋਜੇਨ੍ਤਿ, ਤਸ੍ਮਾ ਭਵਸਂਯੋਜਨਾਨੀਤਿ ਵੁਚ੍ਚਨ੍ਤਿ. ਖੀਣਾਸਵੋ ਉਤ੍ਤਮਅਣਣੋ ਕਿਲੇਸਇਣਾਨਂ ਅਭਾਵਤੋ. ਅਞ੍ਞੇ ਹਿ ਸਤ੍ਤਾ ਯਾਵ ਨ ਕਿਲੇਸਾ ਪਹੀਯਨ੍ਤਿ, ਤਾਵ ਸਇਣਾ ਨਾਮ ਅਸੇਰਿਵਿਹਾਰਭਾਵਤੋ. ਚਤੁਤ੍ਥਾਦੀਨਿ ਉਤ੍ਤਾਨਤ੍ਥਾਨਿ.

ਇਣਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭. ਖੇਮਸੁਤ੍ਤਵਣ੍ਣਨਾ

੪੯. ਸਤ੍ਤਮੇ ਵੁਤ੍ਥਬ੍ਰਹ੍ਮਚਰਿਯਵਾਸੋਤਿ ਨਿਵੁਤ੍ਥਬ੍ਰਹ੍ਮਚਰਿਯਵਾਸੋ. ਕਤਕਰਣੀਯੋਤਿ ਏਤ੍ਥ ਕਰਣੀਯਨ੍ਤਿ ਪਰਿਞ੍ਞਾਪਹਾਨਭਾਵਨਾਸਚ੍ਛਿਕਿਰਿਯਮਾਹ. ਤਂ ਪਨ ਯਸ੍ਮਾ ਚਤੂਹਿ ਮਗ੍ਗੇਹਿ ਪਚ੍ਚੇਕਂ ਚਤੂਸੁ ਸਚ੍ਚੇਸੁ ਕਤ੍ਤਬ੍ਬਤ੍ਤਾ ਸੋਲ਼ਸਵਿਧਂ ਵੇਦਿਤਬ੍ਬਂ. ਤੇਨਾਹ ‘‘ਚਤੂਹਿ ਮਗ੍ਗੇਹਿ ਕਤ੍ਤਬ੍ਬ’’ਨ੍ਤਿ. ਖਨ੍ਧਕਿਲੇਸਅਭਿਸਙ੍ਖਾਰਸਙ੍ਖਾਤਾ ਤਯੋ ਓਸੀਦਾਪਨਟ੍ਠੇਨ ਭਾਰਾ ਵਿਯਾਤਿ ਭਾਰਾ. ਤੇ ਓਹਿਤਾ ਓਰੋਪਿਤਾ ਨਿਕ੍ਖਿਤ੍ਤਾ ਪਾਤਿਤਾ ਏਤੇਨਾਤਿ ਓਹਿਤਭਾਰੋ. ਤੇਨਾਹ ‘‘ਖਨ੍ਧਭਾਰਂ…ਪੇ… ਓਤਾਰੇਤ੍ਵਾ ਠਿਤੋ’’ਤਿ. ਅਨੁਪ੍ਪਤ੍ਤੋ ਸਦਤ੍ਥਨ੍ਤਿ ਅਨੁਪ੍ਪਤ੍ਤਸਦਤ੍ਥੋ. ਸਦਤ੍ਥੋਤਿ ਚ ਸਕਤ੍ਥਮਾਹ ਕ-ਕਾਰਸ੍ਸ ਦ-ਕਾਰਂ ਕਤ੍ਵਾ. ਏਤ੍ਥ ਹਿ ਅਰਹਤ੍ਤਂ ਅਤ੍ਤਨੋ ਯੋਨਿਸੋਮਨਸਿਕਾਰਾਯਤ੍ਤਤ੍ਤਾ ਅਤ੍ਤੂਪਨਿਬਨ੍ਧਟ੍ਠੇਨ ਸਸਨ੍ਤਾਨਪਰਿਯਾਪਨ੍ਨਤ੍ਤਾ ਅਤ੍ਤਾਨਂ ਅਵਿਜਹਨਟ੍ਠੇਨ ਅਤ੍ਤਨੋ ਉਤ੍ਤਮਤ੍ਥੇਨ ਚ ਅਤ੍ਤਨੋ ਅਤ੍ਥਤ੍ਤਾ ‘‘ਸਕਤ੍ਥੋ’’ਤਿ ਵੁਚ੍ਚਤਿ. ਤੇਨਾਹ ‘‘ਸਦਤ੍ਥੋ ਵੁਚ੍ਚਤਿ ਅਰਹਤ੍ਤ’’ਨ੍ਤਿ. ਸਮ੍ਮਦਞ੍ਞਾ ਵਿਮੁਤ੍ਤੋਤਿ ਸਮ੍ਮਾ ਅਞ੍ਞਾਯ ਵਿਮੁਤ੍ਤੋ, ਅਚ੍ਛਿਨ੍ਨਭੂਤਾਯ ਮਗ੍ਗਪਞ੍ਞਾਯ ਸਮ੍ਮਾ ਯਥਾਭੂਤਂ ਦੁਕ੍ਖਾਦੀਸੁ ਯੋ ਯਥਾ ਜਾਨਿਤਬ੍ਬੋ, ਤਥਾ ਜਾਨਿਤ੍ਵਾ ਵਿਮੁਤ੍ਤੋਤਿ ਅਤ੍ਥੋ. ਤੇਨਾਹ ‘‘ਸਮ੍ਮਾ ਹੇਤੁਨਾ’’ਤਿਆਦਿ. ਵਿਮੁਤ੍ਤੋਤਿ ਚ ਦ੍ਵੇ ਵਿਮੁਤ੍ਤਿਯੋ ਸਬ੍ਬਸ੍ਸ ਚਿਤ੍ਤਸਂਕਿਲੇਸਸ੍ਸ ਮਗ੍ਗੋ ਨਿਬ੍ਬਾਨਾਧਿਮੁਤ੍ਤਿ ਚ. ਨਿਬ੍ਬਾਨੇ ਅਧਿਮੁਚ੍ਚਨਂ ਤਤ੍ਥ ਨਿਨ੍ਨਪੋਣਪਬ੍ਭਾਰਤਾਯ. ਅਰਹਾ ਸਬ੍ਬਕਿਲੇਸੇਹਿ ਵਿਮੁਤ੍ਤਚਿਤ੍ਤਤ੍ਤਾ ਚਿਤ੍ਤਵਿਮੁਤ੍ਤਿਯਾ ਵਿਮੁਤ੍ਤੋ. ਨਿਬ੍ਬਾਨਂ ਅਧਿਮੁਤ੍ਤਤ੍ਤਾ ਨਿਬ੍ਬਾਨੇ ਵਿਮੁਤ੍ਤੋ. ਸੇਸਮੇਤ੍ਥ ਉਤ੍ਤਾਨਮੇਵ.

ਖੇਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਇਨ੍ਦ੍ਰਿਯਸਂਵਰਸੁਤ੍ਤਵਣ੍ਣਨਾ

੫੦. ਅਟ੍ਠਮੇ ਉਪਨਿਸੀਦਤਿ ਫਲਂ ਏਤ੍ਥਾਤਿ ਕਾਰਣਂ ਉਪਨਿਸਾ. ਯਥਾਭੂਤਞਾਣਦਸ੍ਸਨਨ੍ਤਿ ਯਥਾਸਭਾਵਜਾਨਨਸਙ੍ਖਾਤਂ ਦਸ੍ਸਨਂ. ਏਤੇਨ ਤਰੁਣਵਿਪਸ੍ਸਨਂ ਦਸ੍ਸੇਤਿ. ਤਰੁਣਵਿਪਸ੍ਸਨਾ ਹਿ ਬਲਵਵਿਪਸ੍ਸਨਾਯ ਪਚ੍ਚਯੋ ਹੋਤਿ. ਤਰੁਣਵਿਪਸ੍ਸਨਾਤਿ ਨਾਮਰੂਪਪਰਿਗ੍ਗਹੇ ਞਾਣਂ, ਪਚ੍ਚਯਪਰਿਗ੍ਗਹੇ ਞਾਣਂ, ਸਮ੍ਮਸਨੇ ਞਾਣਂ, ਮਗ੍ਗਾਮਗ੍ਗੇ ਵਵਤ੍ਥਪੇਤ੍ਵਾ ਠਿਤਞਾਣਨ੍ਤਿ ਚਤੁਨ੍ਨਂ ਞਾਣਾਨਂ ਅਧਿਵਚਨਂ. ਨਿਬ੍ਬਿਨ੍ਦਤਿ ਏਤਾਯਾਤਿ ਨਿਬ੍ਬਿਦਾ. ਬਲਵਵਿਪਸ੍ਸਨਾਤਿ ਭਯਤੁਪਟ੍ਠਾਨੇ ਞਾਣਂ ਆਦੀਨਵਾਨੁਪਸ੍ਸਨੇ ਞਾਣਂ ਮੁਚ੍ਚਿਤੁਕਮ੍ਯਤਾਞਾਣਂ ਸਙ੍ਖਾਰੁਪੇਕ੍ਖਾਞਾਣਨ੍ਤਿ ਚਤੁਨ੍ਨਂ ਞਾਣਾਨਂ ਅਧਿਵਚਨਂ. ਪਟਿਸਙ੍ਖਾਨੁਪਸ੍ਸਨਾ ਪਨ ਮੁਚ੍ਚਿਤੁਕਮ੍ਯਤਾਪਕ੍ਖਿਕਾ ਏਵ. ‘‘ਯਾਵ ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧਿ, ਤਾਵ ਤਰੁਣਵਿਪਸ੍ਸਨਾ’’ਤਿ ਹਿ ਵਚਨਤੋ ਉਪਕ੍ਕਿਲੇਸਵਿਮੁਤ੍ਤਉਦਯਬ੍ਬਯਞਾਣਤੋ ਬਲਵਵਿਪਸ੍ਸਨਾ. ਵਿਰਜ੍ਜਤਿ ਅਰਿਯੋ ਸਙ੍ਖਾਰਤੋ ਏਤੇਨਾਤਿ ਵਿਰਾਗੋ, ਅਰਿਯਮਗ੍ਗੋ. ਅਰਹਤ੍ਤਫਲਨ੍ਤਿ ਉਕ੍ਕਟ੍ਠਨਿਦ੍ਦੇਸਤੋ ਵੁਤ੍ਤਂ. ਇਨ੍ਦ੍ਰਿਯਸਂਵਰਸ੍ਸ ਸੀਲਰਕ੍ਖਣਹੇਤੁਤ੍ਤਾ ਵੁਤ੍ਤਂ ‘‘ਸੀਲਾਨੁਰਕ੍ਖਣਇਨ੍ਦ੍ਰਿਯਸਂਵਰੋ ਕਥਿਤੋ’’ਤਿ.

ਇਨ੍ਦ੍ਰਿਯਸਂਵਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਆਨਨ੍ਦਸੁਤ੍ਤਵਣ੍ਣਨਾ

੫੧. ਨਵਮੇ ਥੇਰਾ ਭਿਕ੍ਖੂ ਵਿਹਰਨ੍ਤਿ ਬਹੁਸ੍ਸੁਤਾ ਆਗਤਾਗਮਾਤਿਆਦਿਪਾਲ਼ਿਪਦੇਸੁ ਇਮਿਨਾਵ ਨਯੇਨ ਅਤ੍ਥੋ ਦਟ੍ਠਬ੍ਬੋ – ਸੀਲਾਦਿਗੁਣਾਨਂ ਥਿਰਭਾਵਪ੍ਪਤ੍ਤਿਯਾ ਥੇਰਾ. ਸੁਤ੍ਤਗੇਯ੍ਯਾਦਿ ਬਹੁ ਸੁਤਂ ਏਤੇਸਨ੍ਤਿ ਬਹੁਸ੍ਸੁਤਾ. ਵਾਚੁਗ੍ਗਤਧਾਰਣੇਨ ਸਮ੍ਮਦੇਵ ਗਰੂਨਂ ਸਨ੍ਤਿਕੇ ਆਗਮਿਤਭਾਵੇਨ ਆਗਤੋ ਪਰਿਯਤ੍ਤਿਧਮ੍ਮਸਙ੍ਖਾਤੋ ਆਗਮੋ ਏਤੇਸਨ੍ਤਿ ਆਗਤਾਗਮਾ. ਸੁਤ੍ਤਾਤਿਧਮ੍ਮਸਙ੍ਖਾਤਸ੍ਸ ਧਮ੍ਮਸ੍ਸ ਧਾਰਣੇਨ ਧਮ੍ਮਧਰਾ. ਵਿਨਯਧਾਰਣੇਨ ਵਿਨਯਧਰਾ. ਤੇਸਂਯੇਵ ਧਮ੍ਮਵਿਨਯਾਨਂ ਮਾਤਿਕਾਯ ਧਾਰਣੇਨ ਮਾਤਿਕਾਧਰਾ. ਤਤ੍ਥ ਤਤ੍ਥ ਧਮ੍ਮਪਰਿਪੁਚ੍ਛਾਯ ਪਰਿਪੁਚ੍ਛਤਿ. ਤਂ ਅਤ੍ਥਪਰਿਪੁਚ੍ਛਾਯ ਪਰਿਪਞ੍ਹਤਿ ਵੀਮਂਸਤਿ ਵਿਚਾਰੇਤਿ. ਇਦਂ, ਭਨ੍ਤੇ, ਕਥਂ, ਇਮਸ੍ਸ ਕ੍ਵਤ੍ਥੋਤਿ ਪਰਿਪੁਚ੍ਛਨਪਞ੍ਹਨਾਕਾਰਦਸ੍ਸਨਂ. ਆਵਿਵਟਞ੍ਚੇਵ ਪਾਲ਼ਿਯਾ ਅਤ੍ਥਂ ਪਦੇਸਨ੍ਤਰਪਾਲ਼ਿਦਸ੍ਸਨੇਨ ਆਗਮਤੋ ਵਿਵਰਨ੍ਤਿ. ਅਨੁਤ੍ਤਾਨੀਕਤਞ੍ਚ ਯੁਤ੍ਤਿਵਿਭਾਵਨੇਨ ਉਤ੍ਤਾਨੀਕਰੋਨ੍ਤਿ. ਕਙ੍ਖਾਟ੍ਠਾਨਿਯੇਸੁ ਧਮ੍ਮੇਸੁ ਸਂਸਯੁਪ੍ਪਤ੍ਤਿਯਾ ਹੇਤੁਯਾ ਗਣ੍ਠਿਟ੍ਠਾਨਭੂਤੇਸੁ ਪਾਲ਼ਿਪਦੇਸੁ ਯਾਥਾਵਤੋ ਵਿਨਿਚ੍ਛਯਦਾਨੇਨ ਕਙ੍ਖਂ ਪਟਿਵਿਨੋਦੇਨ੍ਤਿ.

ਆਨਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਖਤ੍ਤਿਯਸੁਤ੍ਤਵਣ੍ਣਨਾ

੫੨. ਦਸਮੇ ਭੋਗੇ ਅਧਿਪ੍ਪਾਯੋ ਏਤੇਸਨ੍ਤਿ ਭੋਗਾਧਿਪ੍ਪਾਯਾ. ਪਞ੍ਞਤ੍ਥਾਯ ਏਤੇਸਂ ਮਨੋ ਉਪਵਿਚਰਤੀਤਿ ਪਞ੍ਞੂਪਵਿਚਾਰਾ. ਪਥਵਿਯਾ ਦਾਯਤ੍ਥਾਯ ਵਾ ਚਿਤ੍ਤਂ ਅਭਿਨਿਵੇਸੋ ਏਤੇਸਨ੍ਤਿ ਪਥਵੀਭਿਨਿਵੇਸਾ. ਮਨ੍ਤਾ ਅਧਿਟ੍ਠਾਨਂ ਪਤਿਟ੍ਠਾ ਏਤੇਸਨ੍ਤਿ ਮਨ੍ਤਾਧਿਟ੍ਠਾਨਾ. ਇਮਿਨਾ ਨਯੇਨ ਸੇਸਪਦਾਨਿਪਿ ਵੇਦਿਤਬ੍ਬਾਨਿ. ਸੇਸਂ ਉਤ੍ਤਾਨਮੇਵ.

ਖਤ੍ਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਅਪ੍ਪਮਾਦਸੁਤ੍ਤਵਣ੍ਣਨਾ

੫੩. ਏਕਾਦਸਮੇ ਜਙ੍ਗਲਾਨਨ੍ਤਿ ਏਤ੍ਥ ਯੋ ਨਿਪਿਚ੍ਛਲੋ ਨ ਅਨੂਪੋ ਨਿਰੁਦਕਤਾਯ ਥਦ੍ਧਲੂਖੋ ਭੂਮਿਪ੍ਪਦੇਸੋ, ਸੋ ‘‘ਜਙ੍ਗਲੋ’’ਤਿ ਵੁਚ੍ਚਤਿ. ਤਬ੍ਬਹੁਲਤਾਯ ਪਨ ਇਧ ਸਬ੍ਬੋ ਭੂਮਿਪ੍ਪਦੇਸੋ ਜਙ੍ਗਲੋ. ਤਸ੍ਮਿਂ ਜਙ੍ਗਲੇ ਜਾਤਾ ਭਵਾਤਿ ਵਾ ਜਙ੍ਗਲਾ, ਤੇਸਂ ਜਙ੍ਗਲਾਨਂ. ਏਵਞ੍ਹਿ ਨਦਿਚਰਾਨਮ੍ਪਿ ਹਤ੍ਥੀਨਂ ਸਙ੍ਗਹੋ ਕਤੋ ਹੋਤਿ ਸਮੋਧਾਤਬ੍ਬਾਨਂ ਵਿਯ ਸਮੋਧਾਯਕਾਨਮ੍ਪਿ ਇਧ ਜਙ੍ਗਲਗ੍ਗਹਣੇਨ ਗਹੇਤਬ੍ਬਤੋ. ਪਥਵੀਤਲਚਾਰੀਨਨ੍ਤਿ ਇਮਿਨਾ ਜਲਚਾਰਿਨੋ ਚ ਨਿਵਤ੍ਤੇਤਿ ਅਦਿਸ੍ਸਮਾਨਪਾਦਤ੍ਤਾ. ‘‘ਪਾਣਾਨ’’ਨ੍ਤਿ ਸਾਧਾਰਣਵਚਨਮ੍ਪਿ ‘‘ਪਦਜਾਤਾਨੀ’’ਤਿ ਸਦ੍ਦਨ੍ਤਰਸਨ੍ਨਿਧਾਨੇਨ ਵਿਸੇਸਨਿਵਿਟ੍ਠਮੇਵ ਹੋਤੀਤਿ ਆਹ ‘‘ਸਪਾਦਕਪਾਣਾਨ’’ਨ੍ਤਿ. ‘‘ਮੁਤ੍ਤਗਤ’’ਨ੍ਤਿਆਦੀਸੁ (ਮ. ਨਿ. ੨.੧੧੯; ਅ. ਨਿ. ੯.੧੧) ਗਤ-ਸਦ੍ਦੋ ਵਿਯ ਇਧ ਜਾਤ-ਸਦ੍ਦੋ ਅਨਤ੍ਥਨ੍ਤਰੋਤਿ ਆਹ ‘‘ਪਦਜਾਤਾਨੀਤਿ ਪਦਾਨੀ’’ਤਿ. ਸਮੋਧਾਨਨ੍ਤਿ ਸਮਵਰੋਧਂ, ਅਨ੍ਤੋਗਧਂ ਵਾ. ਤੇਨਾਹ ‘‘ਓਧਾਨਂ ਉਪਨਿਕ੍ਖੇਪਂ ਗਚ੍ਛਨ੍ਤੀ’’ਤਿ. ਕੂਟਙ੍ਗਮਾਤਿ ਪਾਰਿਮਨ੍ਤੇਨ ਕੂਟਂ ਉਪਗਚ੍ਛਨ੍ਤਿ. ਕੂਟਨਿਨ੍ਨਾਤਿ ਕੂਟਚ੍ਛਿਦ੍ਦਮਗ੍ਗੇ ਪਵਿਸਨਵਸੇਨ ਕੂਟੇ ਨਿਨ੍ਨਾ. ਕੂਟਸਮੋਸਰਣਾਤਿ ਛਿਦ੍ਦੇ ਅਨੁਪਵਿਸਨਵਸੇਨ ਚ ਆਹਚ੍ਚ ਅਵਤ੍ਥਾਨੇਨ ਚ ਕੂਟੇ ਸਮੋਦਹਿਤ੍ਵਾ ਠਿਤਾ. ਵਣ੍ਟੇ ਪਤਮਾਨੇ ਸਬ੍ਬਾਨਿ ਭੂਮਿਯਂ ਪਤਨ੍ਤੀਤਿ ਆਹ ‘‘ਵਣ੍ਟਾਨੁਵਤ੍ਤਕਾਨਿ ਭਵਨ੍ਤੀ’’ਤਿ.

ਅਪ੍ਪਮਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੨. ਧਮ੍ਮਿਕਸੁਤ੍ਤਵਣ੍ਣਨਾ

੫੪. ਦ੍ਵਾਦਸਮੇ ਜਾਤਿਭੂਮਿਯਨ੍ਤਿ ਏਤ੍ਥ ਜਨਨਂ ਜਾਤਿ, ਜਾਤਿਯਾ ਭੂਮਿ ਜਾਤਿਭੂਮਿ, ਜਾਤਟ੍ਠਾਨਂ. ਤਂ ਖੋ ਪਨੇਤਂ ਨੇਵ ਕੋਸਲਮਹਾਰਾਜਾਦੀਨਂ, ਨ ਚਙ੍ਕਿਬ੍ਰਾਹ੍ਮਣਾਦੀਨਂ, ਨ ਸਕ੍ਕਸੁਯਾਮਸਨ੍ਤੁਸਿਤਾਦੀਨਂ, ਨ ਅਸੀਤਿਮਹਾਸਾਵਕਾਨਂ, ਨ ਅਞ੍ਞੇਸਂ ਸਤ੍ਤਾਨਂ ‘‘ਜਾਤਿਭੂਮੀ’’ਤਿ ਵੁਚ੍ਚਤਿ. ਯਸ੍ਸ ਪਨ ਜਾਤਦਿਵਸੇ ਦਸਸਹਸ੍ਸੀ ਲੋਕਧਾਤੁ ਏਕਦ੍ਧਜਮਾਲਾਵਿਪ੍ਪਕਿਣ੍ਣਕੁਸੁਮਵਾਸਚੁਣ੍ਣਗਣਸੁਗਨ੍ਧਾ ਸਬ੍ਬਪਾਲਿਫੁਲ੍ਲਮਿਵ ਨਨ੍ਦਨਵਨਂ ਵਿਰੋਚਮਾਨਾ ਪਦੁਮਿਨਿਪਣ੍ਣੇ ਉਦਕਬਿਨ੍ਦੁ ਵਿਯ ਅਕਮ੍ਪਿਤ੍ਥ, ਜਚ੍ਚਨ੍ਧਾਦੀਨਞ੍ਚ ਰੂਪਦਸ੍ਸਨਾਦੀਨਿ ਅਨੇਕਾਨਿ ਪਾਟਿਹਾਰਿਯਾਨਿ ਪਵਤ੍ਤਿਂਸੁ. ਤਸ੍ਸ ਸਬ੍ਬਞ੍ਞੁਬੋਧਿਸਤ੍ਤਸ੍ਸ ਜਾਤਟ੍ਠਾਨਂ, ਸਾਤਿਸਯਸ੍ਸ ਪਨ ਜਨਕਕਪਿਲਵਤ੍ਥੁਸਨ੍ਨਿਸ੍ਸਯੋ ‘‘ਜਾਤਿਭੂਮੀ’’ਤਿ ਵੁਚ੍ਚਤਿ. ਜਾਤਿਭੂਮਕਾ ਉਪਾਸਕਾਤਿ ਜਾਤਿਭੂਮਿਵਾਸਿਨੋ ਉਪਾਸਕਾ. ਸਨ੍ਤਨੇਤ੍ਵਾ ਸਬ੍ਬਸੋ ਤਨੇਤ੍ਵਾ ਪਤ੍ਥਰਿਤ੍ਵਾ ਠਿਤਮੂਲਾਨਿ ਮੂਲਸਨ੍ਤਾਨਕਾਨਿ. ਤਾਨਿ ਪਨ ਅਤ੍ਥਤੋ ਮੂਲਾਨਿਯੇਵਾਤਿ ਆਹ ‘‘ਮੂਲਸਨ੍ਤਾਨਕਾਨਨ੍ਤਿ ਮੂਲਾਨ’’ਨ੍ਤਿ.

ਜਾਤਦਿਵਸੇ ਆਵੁਧਾਨਂ ਜੋਤਿਤਤ੍ਤਾ, ਰਞ੍ਞੋ ਅਪਰਿਮਿਤਸ੍ਸ ਚ ਸਤ੍ਤਕਾਯਸ੍ਸ ਅਨਤ੍ਥਤੋ ਪਰਿਪਾਲਨਸਮਤ੍ਥਤਾਯ ਚ ‘‘ਜੋਤਿਪਾਲੋ’’ਤਿ ਲਦ੍ਧਨਾਮਤ੍ਤਾ ਵੁਤ੍ਤਂ ‘‘ਨਾਮੇਨ ਜੋਤਿਪਾਲੋ’’ਤਿ. ਗੋਵਿਨ੍ਦੋਤਿ ਗੋਵਿਨ੍ਦਿਯਾਭਿਸੇਕੇਨ ਅਭਿਸਿਤ੍ਤੋ, ਗੋਵਿਨ੍ਦਸ੍ਸ ਠਾਨੇ ਠਪਨਾਭਿਸੇਕੇਨ ਅਭਿਸਿਤ੍ਤੋਤਿ ਅਤ੍ਥੋ. ਤਂ ਕਿਰ ਤਸ੍ਸ ਬ੍ਰਾਹ੍ਮਣਸ੍ਸ ਕੁਲਪਰਮ੍ਪਰਾਗਤਂ ਠਾਨਨ੍ਤਰਂ. ਤੇਨਾਹ ‘‘ਠਾਨੇਨ ਮਹਾਗੋਵਿਨ੍ਦੋ’’ਤਿ. ਗਵਂ ਪਞ੍ਞਞ੍ਚ ਵਿਨ੍ਦਤਿ ਪਟਿਲਭਤੀਤਿ ਗੋਵਿਨ੍ਦੋ, ਮਹਨ੍ਤੋ ਗੋਵਿਨ੍ਦੋਤਿ ਮਹਾਗੋਵਿਨ੍ਦੋ. ਗੋਤਿ ਹਿ ਪਞ੍ਞਾਯੇਤਂ ਅਧਿਵਚਨਂ ‘‘ਗਚ੍ਛਤਿ ਅਤ੍ਥੇ ਬੁਜ੍ਝਤੀ’’ਤਿ ਕਤ੍ਵਾ. ਮਹਾਗੋਵਿਨ੍ਦੋ ਚ ਅਮ੍ਹਾਕਂ ਬੋਧਿਸਤ੍ਤੋਯੇਵ. ਸੋ ਕਿਰ ਦਿਸਮ੍ਪਤਿਸ੍ਸ ਨਾਮ ਰਞ੍ਞੋ ਪੁਰੋਹਿਤਸ੍ਸ ਗੋਵਿਨ੍ਦਬ੍ਰਾਹ੍ਮਣਸ੍ਸ ਪੁਤ੍ਤੋ ਹੁਤ੍ਵਾ ਅਤ੍ਤਨੋ ਪਿਤੁਸ੍ਸ ਚ ਰਞ੍ਞੋ ਚ ਅਚ੍ਚਯੇਨ ਤਸ੍ਸ ਪੁਤ੍ਤੋ ਰੇਣੁ, ਸਹਾਯਾ ਚਸ੍ਸ ਸਤ੍ਤਭੂ, ਬ੍ਰਹ੍ਮਦਤ੍ਤੋ, ਵੇਸ੍ਸਭੂ, ਭਰਤੋ, ਦ੍ਵੇ ਧਤਰਟ੍ਠਾਤਿ ਇਮੇ ਸਤ੍ਤ ਰਾਜਾਨੋ ਯਥਾ ਅਞ੍ਞਮਞ੍ਞਂ ਨ ਵਿਵਦਨ੍ਤਿ. ਏਵਂ ਰਜ੍ਜੇ ਪਤਿਟ੍ਠਾਪੇਤ੍ਵਾ ਤੇਸਂ ਅਤ੍ਥਧਮ੍ਮੇ ਅਨੁਸਾਸਨ੍ਤੇ ਜਮ੍ਬੁਦੀਪਤਲੇ ਸਬ੍ਬੇਸਂ ਰਾਜਾਵ ਰਞ੍ਞਂ, ਬ੍ਰਹ੍ਮਾਵ ਬ੍ਰਾਹ੍ਮਣਾਨਂ, ਦੇਵੋਵ ਗਹਪਤਿਕਾਨਂ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ ਉਤ੍ਤਮਗਾਰਵਟ੍ਠਾਨਂ ਅਹੋਸਿ. ਤੇਨ ਵੁਤ੍ਤਂ ‘‘ਰੇਣੁਆਦੀਨਂ ਸਤ੍ਤਨ੍ਨਂ ਰਾਜੂਨਂ ਪੁਰੋਹਿਤੋ’’ਤਿ. ਇਮੇਵ ਸਤ੍ਤ ਭਾਰਧਾਰਾ ਮਹਾਰਾਜਾਨੋ. ਵੁਤ੍ਤਞ੍ਹੇਤਂ –

‘‘ਸਤ੍ਤਭੂ ਬ੍ਰਹ੍ਮਦਤ੍ਤੋ ਚ, ਵੇਸ੍ਸਭੂ ਭਰਤੋ ਸਹ;

ਰੇਣੁ ਦ੍ਵੇ ਚ ਧਤਰਟ੍ਠਾ, ਤਦਾਸੁਂ ਸਤ੍ਤ ਭਾਰਧਾ’’ਤਿ. (ਦੀ. ਨਿ. ਅਟ੍ਠ. ੨.੩੦੮);

ਰਞ੍ਞੋ ਦਿਟ੍ਠਧਮ੍ਮਿਕਸਮ੍ਪਰਾਯਿਕਤ੍ਥਾਨਂ ਪੁਰੋ ਵਿਧਾਨਤੋ ਪੁਰੇ ਸਂਵਿਧਾਨਤੋ ਪੁਰੋਹਿਤੋ. ਕੋਧਾਮਗਨ੍ਧੇਨਾਤਿ ਕੋਧਸਙ੍ਖਾਤੇਨ ਪੂਤਿਗਨ੍ਧੇਨ. ਕਰੁਣਾ ਅਸ੍ਸ ਅਤ੍ਥੀਤਿ ਕਰੁਣਨ੍ਤਿ ਸਪੁਬ੍ਬਭਾਗਕਰੁਣਜ੍ਝਾਨਂ ਵੁਤ੍ਤਨ੍ਤਿ ਆਹ ‘‘ਕਰੁਣਾਯ ਚ ਕਰੁਣਾਪੁਬ੍ਬਭਾਗੇ ਚ ਠਿਤਾ’’ਤਿ. ਯਕਾਰੋ ਸਨ੍ਧਿਵਸੇਨ ਆਗਤੋਤਿ ਆਹ ‘‘ਯੇਤੇਤਿ ਏਤੇ’’ਤਿ. ਅਰਹਤ੍ਤਤੋ ਪਟ੍ਠਾਯ ਸਤ੍ਤਮੋਤਿ ਸਕਦਾਗਾਮੀ. ਸਕਦਾਗਾਮਿਂ ਉਪਾਦਾਯਾਤਿ ਸਕਦਾਗਾਮਿਭਾਵਂ ਪਟਿਚ੍ਚ. ਸਕਦਾਗਾਮਿਸ੍ਸ ਹਿ ਪਞ੍ਚਿਨ੍ਦ੍ਰਿਯਾਨਿ ਸਕਦਾਗਾਮਿਭਾਵਂ ਪਟਿਚ੍ਚ ਮੁਦੂਨਿ ਨਾਮ ਹੋਨ੍ਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਧਮ੍ਮਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਧਮ੍ਮਿਕਵਗ੍ਗਵਣ੍ਣਨਾ ਨਿਟ੍ਠਿਤਾ.

ਪਠਮਪਣ੍ਣਾਸਕਂ ਨਿਟ੍ਠਿਤਂ.

੨. ਦੁਤਿਯਪਣ੍ਣਾਸਕਂ