੭. ਛਲ਼ਙ੍ਗਦਾਨਸੁਤ੍ਤਵਣ੍ਣਨਾ

੩੭. ਸਤ੍ਤਮੇ ਦਕ੍ਖਨ੍ਤਿ ਵਡ੍ਢਨ੍ਤਿ ਏਤਾਯਾਤਿ ਦਕ੍ਖਿਣਾ, ਪਰਿਚ੍ਚਾਗਮਯਂ ਪੁਞ੍ਞਂ, ਤਸ੍ਸੂਪਕਰਣਭੂਤੋ ਦੇਯ੍ਯਧਮ੍ਮੋ ਚ. ਇਧ ਪਨ ਦੇਯ੍ਯਧਮ੍ਮੋ ਅਧਿਪ੍ਪੇਤੋ. ਤੇਨੇਵਾਹ ‘‘ਦਕ੍ਖਿਣਂ ਪਤਿਟ੍ਠਾਪੇਤੀ’’ਤਿ. ਇਤੋ ਉਟ੍ਠਿਤੇਨਾਤਿ ਇਤੋ ਖੇਤ੍ਤਤੋ ਉਪ੍ਪਨ੍ਨੇਨ. ਰਾਗੋ ਵਿਨਯਤਿ ਏਤੇਨਾਤਿ ਰਾਗਵਿਨਯੋ, ਰਾਗਸ੍ਸ ਸਮੁਚ੍ਛੇਦਿਕਾ ਪਟਿਪਦਾ. ਤੇਨਾਹ ‘‘ਰਾਗਵਿਨਯਪਟਿਪਦਂ ਪਟਿਪਨ੍ਨਾ’’ਤਿ.

‘‘ਪੁਬ੍ਬੇਵ ਦਾਨਾ ਸੁਮਨੋ’’ਤਿਆਦਿਗਾਥਾਯ ਪੁਬ੍ਬੇਵ ਦਾਨਾ ਮੁਞ੍ਚਚੇਤਨਾਯ ਪੁਬ੍ਬੇ ਦਾਨੂਪਕਰਣਸਮ੍ਭਰਣਤੋ ਪਟ੍ਠਾਯ ਸੁਮਨੋ ‘‘ਸਮ੍ਪਤ੍ਤੀਨਂ ਨਿਦਾਨਂ ਅਨੁਗਾਮਿਕਦਾਨਂ ਦਸ੍ਸਾਮੀ’’ਤਿ ਸੋਮਨਸ੍ਸਿਤੋ ਭਵੇਯ੍ਯ. ਦਦਂ ਚਿਤ੍ਤਂ ਪਸਾਦਯੇਤਿ ਦਦਨ੍ਤੋ ਦੇਯ੍ਯਧਮ੍ਮਂ ਦਕ੍ਖਿਣੇਯ੍ਯਹਤ੍ਥੇ ਪਤਿਟ੍ਠਾਪੇਨ੍ਤੋ ‘‘ਅਸਾਰਤੋ ਧਨਤੋ ਸਾਰਾਦਾਨਂ ਕਰੋਮੀ’’ਤਿ ਅਤ੍ਤਨੋ ਚਿਤ੍ਤਂ ਪਸਾਦੇਯ੍ਯ. ਦਤ੍ਵਾ ਅਤ੍ਤਮਨੋ ਹੋਤੀਤਿ ਦਕ੍ਖਿਣੇਯ੍ਯਾਨਂ ਦੇਯ੍ਯਧਮ੍ਮਂ ਪਰਿਚ੍ਚਜਿਤ੍ਵਾ ‘‘ਪਣ੍ਡਿਤਪਞ੍ਞਤ੍ਤਂ ਨਾਮ ਮਯਾ ਅਨੁਟ੍ਠਿਤਂ, ਅਹੋ ਸਾਧੁ ਸੁਟ੍ਠੂ’’ਤਿ ਅਤ੍ਤਮਨੋ ਪਮੁਦਿਤੋ ਪੀਤਿਸੋਮਨਸ੍ਸਜਾਤੋ ਹੋਤਿ. ਏਸਾਤਿ ਯਾ ਅਯਂ ਪੁਬ੍ਬਚੇਤਨਾ ਮੁਞ੍ਚਚੇਤਨਾ ਅਪਰਚੇਤਨਾਤਿ ਇਮਾਸਂ ਕਮ੍ਮਫਲਾਨਂ ਸਦ੍ਧਾਨੁਗਤਾਨਂ ਸੋਮਨਸ੍ਸਪਰਿਗ੍ਗਹਿਤਾਨਂ ਤਿਵਿਧਾਨਂ ਚੇਤਨਾਨਂ ਪਾਰਿਪੂਰੀ, ਏਸਾ.

ਸੀਲਸਞ੍ਞਮੇਨਾਤਿ ਕਾਯਿਕਵਾਚਸਿਕਸਂਵਰੇਨ. ਹਤ੍ਥਪਾਦੇਤਿ ਦਕ੍ਖਿਣੇਯ੍ਯਾਨਂ ਹਤ੍ਥਪਾਦੇ. ਮੁਖਂ ਵਿਕ੍ਖਾਲੇਤ੍ਵਾਤਿ ਤੇਸਂਯੇਵ ਮੁਖਂ ਵਿਕ੍ਖਾਲੇਤ੍ਵਾ, ਅਤ੍ਤਨਾਵ ਮੁਖੋਦਕਂ ਦਤ੍ਵਾਤਿ ਅਧਿਪ੍ਪਾਯੋ.

ਛਲ਼ਙ੍ਗਦਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.