੪. ਦੇਵਤਾਵਗ੍ਗੋ

੧-੪. ਸੇਖਸੁਤ੍ਤਾਦਿਵਣ੍ਣਨਾ

੩੧-੩੪. ਚਤੁਤ੍ਥਸ੍ਸ ਪਠਮੇ ਸੇਖਾਨਂ ਪਟਿਲਦ੍ਧਗੁਣਸ੍ਸ ਪਰਿਹਾਨਿ ਨਾਮ ਨਤ੍ਥੀਤਿ ਆਹ ‘‘ਉਪਰੂਪਰਿਗੁਣਪਰਿਹਾਨਾਯਾ’’ਤਿ, ਉਪਰੂਪਰਿਲਦ੍ਧਬ੍ਬਾਨਂ ਮਗ੍ਗਫਲਾਨਂ ਪਰਿਹਾਨਾਯ ਅਨੁਪ੍ਪਾਦਾਯਾਤਿ ਅਤ੍ਥੋ. ਤਤਿਯਾਦੀਨਿ ਉਤ੍ਤਾਨਤ੍ਥਾਨੇਵ.

ਸੇਖਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੫. ਵਿਜ੍ਜਾਭਾਗਿਯਸੁਤ੍ਤਵਣ੍ਣਨਾ

੩੫. ਪਞ੍ਚਮੇ ਸਮ੍ਪਯੋਗਵਸੇਨ ਵਿਜ੍ਜਂ ਭਜਨ੍ਤਿ, ਸਹਜਾਤਅਞ੍ਞਮਞ੍ਞਨਿਸ੍ਸਯਸਮ੍ਪਯੁਤ੍ਤਅਤ੍ਥਿਅਵਿਗਤਾਦਿਪਚ੍ਚਯਵਸੇਨ ਤਾਯ ਸਹ ਏਕੀਭਾਵਂ ਗਚ੍ਛਨ੍ਤੀਤਿ ਵਿਜ੍ਜਾਭਾਗਿਯਾ. ਅਥ ਵਾ ਵਿਜ੍ਜਾਭਾਗੇ ਵਿਜ੍ਜਾਕੋਟ੍ਠਾਸੇ ਵਤ੍ਤਨ੍ਤਿ ਵਿਜ੍ਜਾਸਭਾਗਤਾਯ ਤਦੇਕਦੇਸੇ ਵਿਜ੍ਜਾਕੋਟ੍ਠਾਸੇ ਪਵਤ੍ਤਨ੍ਤੀਤਿ ਵਿਜ੍ਜਾਭਾਗਿਯਾ. ਤਤ੍ਥ ਵਿਪਸ੍ਸਨਾਞਾਣਂ, ਮਨੋਮਯਿਦ੍ਧਿ, ਛ ਅਭਿਞ੍ਞਾਤਿ ਅਟ੍ਠ ਵਿਜ੍ਜਾ. ਪੁਰਿਮੇਨ ਅਤ੍ਥੇਨ ਤਾਹਿ ਸਮ੍ਪਯੁਤ੍ਤਧਮ੍ਮਾ ਵਿਜ੍ਜਾਭਾਗਿਯਾ. ਪਚ੍ਛਿਮੇਨ ਅਤ੍ਥੇਨ ਤਾਸੁ ਯਾ ਕਾਚਿ ਏਕਾਵ ਵਿਜ੍ਜਾ ਵਿਜ੍ਜਾ, ਸੇਸਾ ਵਿਜ੍ਜਾਭਾਗਿਯਾ. ਏਵਂ ਵਿਜ੍ਜਾਪਿ ਵਿਜ੍ਜਾਯ ਸਮ੍ਪਯੁਤ੍ਤਧਮ੍ਮਾਪਿ ‘‘ਵਿਜ੍ਜਾਭਾਗਿਯਾ’’ਤ੍ਵੇਵ ਵੇਦਿਤਬ੍ਬਾ. ਇਧ ਪਨ ਵਿਪਸ੍ਸਨਾਞਾਣਸਮ੍ਪਯੁਤ੍ਤਾ ਸਞ੍ਞਾਵ ਵਿਜ੍ਜਾਭਾਗਿਯਾਤਿ ਆਗਤਾ, ਸਞ੍ਞਾਸੀਸੇਨ ਸੇਸਸਮ੍ਪਯੁਤ੍ਤਧਮ੍ਮਾਪਿ ਵੁਤ੍ਤਾ ਏਵਾਤਿ ਦਟ੍ਠਬ੍ਬਂ. ਅਨਿਚ੍ਚਾਨੁਪਸ੍ਸਨਾਞਾਣੇਤਿ ਅਨਿਚ੍ਚਾਨੁਪਸ੍ਸਨਾਞਾਣੇ ਨਿਸ੍ਸਯਪਚ੍ਚਯਭੂਤੇ ਉਪ੍ਪਨ੍ਨਸਞ੍ਞਾ, ਤੇਨ ਸਹਗਤਾਤਿ ਅਤ੍ਥੋ. ਸੇਸੇਸੁਪਿ ਏਸੇਵ ਨਯੋ.

ਵਿਜ੍ਜਾਭਾਗਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਵਿਵਾਦਮੂਲਸੁਤ੍ਤਵਣ੍ਣਨਾ

੩੬. ਛਟ੍ਠੇ ਕੋਧਨੋਤਿ ਕੁਜ੍ਝਨਸੀਲੋ. ਯਸ੍ਮਾ ਸੋ ਅਪ੍ਪਹੀਨਕੋਧਤਾਯ ਅਧਿਗਤਕੋਧੋ ਨਾਮ ਹੋਤਿ, ਤਸ੍ਮਾ ‘‘ਕੋਧੇਨ ਸਮਨ੍ਨਾਗਤੋ’’ਤਿ ਆਹ. ਉਪਨਾਹੋ ਏਤਸ੍ਸ ਅਤ੍ਥੀਤਿ ਉਪਨਾਹੀ, ਉਪਨਯ੍ਹਨਸੀਲੋਤਿ ਵਾ ਉਪਨਾਹੀ. ਵਿਵਾਦੋ ਨਾਮ ਉਪ੍ਪਜ੍ਜਮਾਨੋ ਯੇਭੁਯ੍ਯੇਨ ਪਠਮਂ ਦ੍ਵਿਨ੍ਨਂ ਵਸੇਨ ਉਪ੍ਪਜ੍ਜਤੀਤਿ ਵੁਤ੍ਤਂ ‘‘ਦ੍ਵਿਨ੍ਨਂ ਭਿਕ੍ਖੂਨਂ ਵਿਵਾਦੋ’’ਤਿ. ਸੋ ਪਨ ਯਥਾ ਬਹੂਨਂ ਅਨਤ੍ਥਾਵਹੋ ਹੋਤਿ, ਤਂ ਨਿਦਸ੍ਸਨਮੁਖੇਨ ਨਿਦਸ੍ਸੇਨ੍ਤੋ ‘‘ਕਥ’’ਨ੍ਤਿਆਦਿਮਾਹ. ਅਬ੍ਭਨ੍ਤਰਪਰਿਸਾਯਾਤਿ ਪਰਿਸਬ੍ਭਨ੍ਤਰੇ.

ਗੁਣਮਕ੍ਖਨਾਯ ਪਵਤ੍ਤੋਪਿ ਅਤ੍ਤਨੋ ਕਾਰਕਂ ਗੂਥੇਨ ਪਹਰਨ੍ਤਿਂ ਗੂਥੋ ਵਿਯ ਪਠਮਤਰਂ ਮਕ੍ਖੇਤੀਤਿ ਮਕ੍ਖੋ, ਸੋ ਏਤਸ੍ਸ ਅਤ੍ਥੀਤਿ ਮਕ੍ਖੀ. ਪਲ਼ਾਸਤੀਤਿ ਪਲ਼ਾਸੋ, ਪਰਸ੍ਸ ਗੁਣੇ ਡਂਸਿਤ੍ਵਾ ਵਿਯ ਅਪਨੇਤੀਤਿ ਅਤ੍ਥੋ. ਸੋ ਏਤਸ੍ਸ ਅਤ੍ਥੀਤਿ ਪਲ਼ਾਸੀ. ਪਲ਼ਾਸੀ ਪੁਗ੍ਗਲੋ ਹਿ ਦੁਤਿਯਸ੍ਸ ਧੁਰਂ ਨ ਦੇਤਿ, ਸਮਂ ਹਰਿਤ੍ਵਾ ਅਤਿਵਦਤਿ. ਤੇਨਾਹ ‘‘ਯੁਗਗ੍ਗਾਹਲਕ੍ਖਣੇਨ ਪਲ਼ਾਸੇਨ ਸਮਨ੍ਨਾਗਤੋ’’ਤਿ. ਇਸ੍ਸਤੀਤਿ ਇਸ੍ਸੁਕੀ. ਮਚ੍ਛਰਾਯਤੀਤਿ ਮਚ੍ਛਰਂ, ਤਂ ਏਤਸ੍ਸ ਅਤ੍ਥੀਤਿ ਮਚ੍ਛਰੀ. ਸਠਯਤਿ ਨ ਸਮ੍ਮਾ ਭਾਸਤੀਤਿ ਸਠੋ ਅਞ੍ਞਥਾ ਸਨ੍ਤਂ ਅਤ੍ਤਾਨਂ ਅਞ੍ਞਥਾ ਪਵੇਦਨਤੋ. ਮਾਯਾ ਏਤਸ੍ਸ ਅਤ੍ਥੀ ਮਾਯਾਵੀ. ਮਿਚ੍ਛਾ ਪਾਪਿਕਾ ਵਿਞ੍ਞੁਗਰਹਿਤਾ ਏਤਸ੍ਸ ਦਿਟ੍ਠੀਤਿ ਮਿਚ੍ਛਾਦਿਟ੍ਠਿ, ਕਮ੍ਮਪਥਪਰਿਯਾਪਨ੍ਨਾਯ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਵਤ੍ਥੁਕਾਯ ਮਿਚ੍ਛਤ੍ਤਪਰਿਯਾਪਨ੍ਨਾਯ ਅਨਿਯ੍ਯਾਨਿਕਾਯ ਦਿਟ੍ਠਿਯਾ ਸਮਨ੍ਨਾਗਤੋਤਿ ਅਤ੍ਥੋ. ਤੇਨਾਹ ‘‘ਨਤ੍ਥਿਕਵਾਦੀ’’ਤਿਆਦਿ.

ਸਂ ਅਤ੍ਤਨੋ ਦਿਟ੍ਠਿਂ, ਸਯਂ ਵਾ ਅਤ੍ਤਨਾ ਯਥਾਗਹਿਤਂ ਪਰਾਮਸਤਿ, ਸਭਾਵਂ ਅਤਿਕ੍ਕਮਿਤ੍ਵਾ ਪਰਤੋ ਆਮਸਤੀਤਿ ਸਨ੍ਦਿਟ੍ਠੀਪਰਾਮਾਸੀ. ਆਧਾਨਂ ਦਲ਼੍ਹਂ ਗਣ੍ਹਾਤੀਤਿ ਆਧਾਨਗ੍ਗਾਹੀ, ਦਲ਼੍ਹਗ੍ਗਾਹੀ, ‘‘ਇਦਮੇਵ ਸਚ੍ਚ’’ਨ੍ਤਿ ਥਿਰਗ੍ਗਾਹੀਤਿ ਅਤ੍ਥੋ. ਯੁਤ੍ਤਂ ਕਾਰਣਂ ਦਿਸ੍ਵਾਵ ਲਦ੍ਧਿਂ ਪਟਿਨਿਸ੍ਸਜ੍ਜਤੀਤਿ ਪਟਿਨਿਸ੍ਸਗ੍ਗੀ, ਦੁਕ੍ਖੇਨ ਕਿਚ੍ਛੇਨ ਕਸਿਰੇਨ ਬਹੁਮ੍ਪਿ ਕਾਰਣਂ ਦਸ੍ਸੇਤ੍ਵਾ ਨ ਸਕ੍ਕਾ ਪਟਿਨਿਸ੍ਸਗ੍ਗਂ ਕਾਤੁਨ੍ਤਿ ਦੁਪ੍ਪਟਿਨਿਸ੍ਸਗ੍ਗੀ. ਯੋ ਅਤ੍ਤਨੋ ਉਪ੍ਪਨ੍ਨਦਿਟ੍ਠਿਂ ‘‘ਇਦਮੇਵ ਸਚ੍ਚ’’ਨ੍ਤਿ ਦਲ਼੍ਹਂ ਗਣ੍ਹਿਤ੍ਵਾ ਅਪਿ ਬੁਦ੍ਧਾਦੀਹਿ ਕਾਰਣਂ ਦਸ੍ਸੇਤ੍ਵਾ ਵੁਚ੍ਚਮਾਨੋ ਨ ਪਟਿਨਿਸ੍ਸਜ੍ਜਤਿ. ਤਸ੍ਸੇਤਂ ਅਧਿਵਚਨਂ. ਤਾਦਿਸੋ ਹਿ ਪੁਗ੍ਗਲੋ ਯਂ ਯਦੇਵ ਧਮ੍ਮਂ ਵਾ ਅਧਮ੍ਮਂ ਵਾ ਸੁਣਾਤਿ, ਤਂ ਸਬ੍ਬਂ ‘‘ਏਵਂ ਅਮ੍ਹਾਕਂ ਆਚਰਿਯੇਹਿ ਕਥਿਤਂ, ਏਵਂ ਅਮ੍ਹੇਹਿ ਸੁਤ’’ਨ੍ਤਿ ਕੁਮ੍ਮੋਵ ਅਙ੍ਗਾਨਿ ਸਕੇ ਕਪਾਲੇ ਅਨ੍ਤੋਯੇਵ ਸਮੋਦਹਤਿ. ਯਥਾ ਹਿ ਕਚ੍ਛਪੋ ਅਤ੍ਤਨੋ ਹਤ੍ਥਪਾਦਾਦਿਕੇ ਅਙ੍ਗੇ ਕੇਨਚਿ ਘਟਿਤੇ ਸਬ੍ਬਾਨਿ ਅਙ੍ਗਾਨਿ ਅਤ੍ਤਨੋ ਕਪਾਲੇਯੇਵ ਸਮੋਦਹਤਿ, ਨ ਬਹਿ ਨੀਹਰਤਿ, ਏਵਮਯਮ੍ਪਿ ‘‘ਨ ਸੁਨ੍ਦਰੋ ਤਵ ਗਾਹੋ, ਛਡ੍ਡੇਹਿ ਨ’’ਨ੍ਤਿ ਵੁਤ੍ਤੋ ਤਂ ਨ ਵਿਸ੍ਸਜ੍ਜਤਿ, ਅਨ੍ਤੋਯੇਵ ਅਤ੍ਤਨੋ ਹਦਯੇ ਏਵ ਠਪੇਤ੍ਵਾ ਵਿਚਰਤਿ, ਕੁਮ੍ਭੀਲਗ੍ਗਾਹਂ ਗਣ੍ਹਾਤਿ. ਯਥਾ ਸੁਸੁਮਾਰਾ ਗਹਿਤਂ ਨ ਪਟਿਨਿਸ੍ਸਜ੍ਜਨ੍ਤਿ, ਏਵਂ ਗਣ੍ਹਾਤਿ.

ਵਿਵਾਦਮੂਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਛਲ਼ਙ੍ਗਦਾਨਸੁਤ੍ਤਵਣ੍ਣਨਾ

੩੭. ਸਤ੍ਤਮੇ ਦਕ੍ਖਨ੍ਤਿ ਵਡ੍ਢਨ੍ਤਿ ਏਤਾਯਾਤਿ ਦਕ੍ਖਿਣਾ, ਪਰਿਚ੍ਚਾਗਮਯਂ ਪੁਞ੍ਞਂ, ਤਸ੍ਸੂਪਕਰਣਭੂਤੋ ਦੇਯ੍ਯਧਮ੍ਮੋ ਚ. ਇਧ ਪਨ ਦੇਯ੍ਯਧਮ੍ਮੋ ਅਧਿਪ੍ਪੇਤੋ. ਤੇਨੇਵਾਹ ‘‘ਦਕ੍ਖਿਣਂ ਪਤਿਟ੍ਠਾਪੇਤੀ’’ਤਿ. ਇਤੋ ਉਟ੍ਠਿਤੇਨਾਤਿ ਇਤੋ ਖੇਤ੍ਤਤੋ ਉਪ੍ਪਨ੍ਨੇਨ. ਰਾਗੋ ਵਿਨਯਤਿ ਏਤੇਨਾਤਿ ਰਾਗਵਿਨਯੋ, ਰਾਗਸ੍ਸ ਸਮੁਚ੍ਛੇਦਿਕਾ ਪਟਿਪਦਾ. ਤੇਨਾਹ ‘‘ਰਾਗਵਿਨਯਪਟਿਪਦਂ ਪਟਿਪਨ੍ਨਾ’’ਤਿ.

‘‘ਪੁਬ੍ਬੇਵ ਦਾਨਾ ਸੁਮਨੋ’’ਤਿਆਦਿਗਾਥਾਯ ਪੁਬ੍ਬੇਵ ਦਾਨਾ ਮੁਞ੍ਚਚੇਤਨਾਯ ਪੁਬ੍ਬੇ ਦਾਨੂਪਕਰਣਸਮ੍ਭਰਣਤੋ ਪਟ੍ਠਾਯ ਸੁਮਨੋ ‘‘ਸਮ੍ਪਤ੍ਤੀਨਂ ਨਿਦਾਨਂ ਅਨੁਗਾਮਿਕਦਾਨਂ ਦਸ੍ਸਾਮੀ’’ਤਿ ਸੋਮਨਸ੍ਸਿਤੋ ਭਵੇਯ੍ਯ. ਦਦਂ ਚਿਤ੍ਤਂ ਪਸਾਦਯੇਤਿ ਦਦਨ੍ਤੋ ਦੇਯ੍ਯਧਮ੍ਮਂ ਦਕ੍ਖਿਣੇਯ੍ਯਹਤ੍ਥੇ ਪਤਿਟ੍ਠਾਪੇਨ੍ਤੋ ‘‘ਅਸਾਰਤੋ ਧਨਤੋ ਸਾਰਾਦਾਨਂ ਕਰੋਮੀ’’ਤਿ ਅਤ੍ਤਨੋ ਚਿਤ੍ਤਂ ਪਸਾਦੇਯ੍ਯ. ਦਤ੍ਵਾ ਅਤ੍ਤਮਨੋ ਹੋਤੀਤਿ ਦਕ੍ਖਿਣੇਯ੍ਯਾਨਂ ਦੇਯ੍ਯਧਮ੍ਮਂ ਪਰਿਚ੍ਚਜਿਤ੍ਵਾ ‘‘ਪਣ੍ਡਿਤਪਞ੍ਞਤ੍ਤਂ ਨਾਮ ਮਯਾ ਅਨੁਟ੍ਠਿਤਂ, ਅਹੋ ਸਾਧੁ ਸੁਟ੍ਠੂ’’ਤਿ ਅਤ੍ਤਮਨੋ ਪਮੁਦਿਤੋ ਪੀਤਿਸੋਮਨਸ੍ਸਜਾਤੋ ਹੋਤਿ. ਏਸਾਤਿ ਯਾ ਅਯਂ ਪੁਬ੍ਬਚੇਤਨਾ ਮੁਞ੍ਚਚੇਤਨਾ ਅਪਰਚੇਤਨਾਤਿ ਇਮਾਸਂ ਕਮ੍ਮਫਲਾਨਂ ਸਦ੍ਧਾਨੁਗਤਾਨਂ ਸੋਮਨਸ੍ਸਪਰਿਗ੍ਗਹਿਤਾਨਂ ਤਿਵਿਧਾਨਂ ਚੇਤਨਾਨਂ ਪਾਰਿਪੂਰੀ, ਏਸਾ.

ਸੀਲਸਞ੍ਞਮੇਨਾਤਿ ਕਾਯਿਕਵਾਚਸਿਕਸਂਵਰੇਨ. ਹਤ੍ਥਪਾਦੇਤਿ ਦਕ੍ਖਿਣੇਯ੍ਯਾਨਂ ਹਤ੍ਥਪਾਦੇ. ਮੁਖਂ ਵਿਕ੍ਖਾਲੇਤ੍ਵਾਤਿ ਤੇਸਂਯੇਵ ਮੁਖਂ ਵਿਕ੍ਖਾਲੇਤ੍ਵਾ, ਅਤ੍ਤਨਾਵ ਮੁਖੋਦਕਂ ਦਤ੍ਵਾਤਿ ਅਧਿਪ੍ਪਾਯੋ.

ਛਲ਼ਙ੍ਗਦਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮-੧੧. ਅਤ੍ਤਕਾਰੀਸੁਤ੍ਤਾਦਿਵਣ੍ਣਨਾ

੩੮-੪੧. ਅਟ੍ਠਮੇ ਕੁਸਲਕਿਰਿਯਾਯ ਆਦਿਆਰਮ੍ਭਭਾਵੇਨ ਪਵਤ੍ਤਵੀਰਿਯਂ ਠਿਤਸਭਾਵਤਾਯ ਸਭਾਵਧਾਰਣਟ੍ਠੇਨ ਧਾਤੂਤਿ ਵੁਤ੍ਤਨ੍ਤਿ ਆਹ – ‘‘ਆਰਮ੍ਭਧਾਤੂਤਿ ਆਰਭਨਵਸੇਨ ਪਵਤ੍ਤਵੀਰਿਯ’’ਨ੍ਤਿ. ਲਦ੍ਧਾਸੇਵਨਂ ਵੀਰਿਯਂ ਬਲਪ੍ਪਤ੍ਤਂ ਹੁਤ੍ਵਾ ਪਟਿਪਕ੍ਖੇ ਵਿਧਮਤੀਤਿ ਆਹ ‘‘ਨਿਕ੍ਕਮਧਾਤੂਤਿ ਕੋਸਜ੍ਜਤੋ ਨਿਕ੍ਖਮਨਸਭਾਵਂ ਵੀਰਿਯ’’ਨ੍ਤਿ. ਪਰਕ੍ਕਮਨਸਭਾਵੋਤਿ ਅਧਿਮਤ੍ਤਤਰਾਨਂ ਪਟਿਪਕ੍ਖਧਮ੍ਮਾਨਂ ਵਿਧਮਨਸਮਤ੍ਥਤਾਯ ਪਟੁਪਟੁਤਰਭਾਵੇਨ ਪਰਂ ਪਰਂ ਠਾਨਂ ਅਕ੍ਕਮਨਸਭਾਵੋ. ਨਵਮਾਦੀਸੁ ਨਤ੍ਥਿ ਵਤ੍ਤਬ੍ਬਂ.

ਅਤ੍ਤਕਾਰੀਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੧੨. ਨਾਗਿਤਸੁਤ੍ਤਵਣ੍ਣਨਾ

੪੨. ਦ੍ਵਾਦਸਮੇ ਮਾਹਂ ਨਾਗਿਤ ਯਸੇਨ ਸਮਾਗਮਨ੍ਤਿ ਮਾ ਅਹਂ ਯਸੇਨ ਸਮਾਗਮਨਂ ਪਤ੍ਥੇਮਿ. ਮਾ ਚ ਮਯਾ ਯਸੋਤਿ ਯਸੋ ਚ ਮਯਾ ਮਾ ਸਮਾਗਚ੍ਛਤੂਤਿ ਅਤ੍ਥੋ. ਇਮਿਨਾ ਅਤ੍ਤਨੋ ਲਾਭਸਕ੍ਕਾਰੇਨ ਅਨਤ੍ਥਿਕਤਂ ਵਿਭਾਵੇਤਿ. ਪਞ੍ਚਹਿ ਵਿਮੁਤ੍ਤੀਹੀਤਿ ਤਦਙ੍ਗਵਿਮੁਤ੍ਤਿਆਦੀਹਿ ਪਞ੍ਚਹਿ ਵਿਮੁਤ੍ਤੀਹਿ. ਸੇਸਮੇਤ੍ਥ ਉਤ੍ਤਾਨਮੇਵ.

ਨਾਗਿਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਦੇਵਤਾਵਗ੍ਗਵਣ੍ਣਨਾ ਨਿਟ੍ਠਿਤਾ.