੩. ਅਨੁਤ੍ਤਰਿਯਵਗ੍ਗੋ
੧-੨. ਸਾਮਕਸੁਤ੍ਤਾਦਿਵਣ੍ਣਨਾ
੨੧-੨੨. ਤਤਿਯਸ੍ਸ ਪਠਮੇ ਕੇਵਲਕਪ੍ਪਨ੍ਤਿ ਏਤ੍ਥ ਕੇਵਲ-ਸਦ੍ਦੋ ਅਨਵਸੇਸਤ੍ਥੋ, ਕਪ੍ਪ-ਸਦ੍ਦੋ ਸਮਨ੍ਤਭਾਵਤ੍ਥੋ. ਤਸ੍ਮਾ ਕੇਵਲਕਪ੍ਪਂ ਪੋਕ੍ਖਰਣਿਯਨ੍ਤਿ ਏਵਮਤ੍ਥੋ ਦਟ੍ਠਬ੍ਬੋ. ਅਨਵਸੇਸਂ ਫਰਿਤੁਂ ਸਮਤ੍ਥਸ੍ਸਪਿ ਓਭਾਸਸ੍ਸ ਕੇਨਚਿ ਕਾਰਣੇਨ ਏਕਦੇਸਫਰਣਮ੍ਪਿ ਸਿਯਾ, ਅਯਂ ਪਨ ਸਬ੍ਬਸੋਵ ਫਰਤੀਤਿ ਦਸ੍ਸੇਤੁਂ ਸਮਨ੍ਤਤ੍ਥੋ ਕਪ੍ਪ-ਸਦ੍ਦੋ ਗਹਿਤੋ. ਅਤ੍ਤਨੋ ਓਭਾਸੇਨ ਫਰਿਤ੍ਵਾਤਿ ਵਤ੍ਥਾਲਙ੍ਕਾਰਸਰੀਰਸਮੁਟ੍ਠਿਤੇਨ ਓਭਾਸੇਨ ਫਰਿਤ੍ਵਾ, ਚਨ੍ਦਿਮਾ ਵਿਯ ਏਕੋਭਾਸਂ ਏਕਪਜ੍ਜੋਤਂ ਕਰਿਤ੍ਵਾਤਿ ਅਤ੍ਥੋ. ਸਮਨੁਞ੍ਞੋਤਿ ਸਮ੍ਮਦੇਵ ਕਤਮਨੁਞ੍ਞੋ. ਤੇਨਾਹ ‘‘ਸਮਾਨਚਿਤ੍ਤੋ’’ਤਿ, ਸਮਾਨਜ੍ਝਾਸਯੋਤਿ ਅਤ੍ਥੋ. ਦੁਕ੍ਖਂ ਵਚੋ ਏਤਸ੍ਮਿਨ੍ਤਿ ਦੁਬ੍ਬਚੋ, ਤਸ੍ਸ ਕਮ੍ਮਂ ਦੋਵਚਸ੍ਸਂ, ਤਸ੍ਸ ਪੁਗ੍ਗਲਸ੍ਸ ਅਨਾਦਰਿਯਵਸੇਨ ਪਵਤ੍ਤਾ ਚੇਤਨਾ, ਤਸ੍ਸ ਭਾਵੋ ਅਤ੍ਥਿਤਾ ਦੋਵਚਸ੍ਸਤਾ. ਅਥ ਵਾ ਦੋਵਚਸ੍ਸਮੇਵ ਦੋਵਚਸ੍ਸਤਾ. ਸਾ ਅਤ੍ਥਤੋ ਸਙ੍ਖਾਰਕ੍ਖਨ੍ਧੋ ਹੋਤਿ. ਚੇਤਨਾਪਧਾਨੋ ਹਿ ਸਙ੍ਖਾਰਕ੍ਖਨ੍ਧੋ. ਚਤੁਨ੍ਨਂ ਵਾ ਖਨ੍ਧਾਨਂ ਅਪਦਕ੍ਖਿਣਗ੍ਗਾਹਿਤਾਕਾਰੇਨ ਪਵਤ੍ਤਾਨਂ ਏਤਂ ਅਧਿਵਚਨਨ੍ਤਿ ਵਦਨ੍ਤਿ. ਪਾਪਾ ਅਸ੍ਸਦ੍ਧਾਦਯੋ ਪੁਗ੍ਗਲਾ ਏਤਸ੍ਸ ਮਿਤ੍ਤਾਤਿ ਪਾਪਮਿਤ੍ਤੋ, ਤਸ੍ਸ ਭਾਵੋ ਪਾਪਮਿਤ੍ਤਤਾ. ਸਾਪਿ ਅਤ੍ਥਤੋ ਦੋਵਚਸ੍ਸਤਾ ਵਿਯ ਦਟ੍ਠਬ੍ਬਾ. ਯਾਯ ਹਿ ਚੇਤਨਾਯ ਪੁਗ੍ਗਲੋ ਪਾਪਮਿਤ੍ਤੋ ਪਾਪਸਮ੍ਪਵਙ੍ਕੋ ਨਾਮ ਹੋਤਿ, ਸਾ ਚੇਤਨਾ ਪਾਪਮਿਤ੍ਤਤਾ. ਚਤ੍ਤਾਰੋਪਿ ਵਾ ਅਰੂਪਿਨੋ ਖਨ੍ਧਾ ਤਦਾਕਾਰਪ੍ਪਵਤ੍ਤਾ ਪਾਪਮਿਤ੍ਤਤਾ. ਦੁਤਿਯਂ ਉਤ੍ਤਾਨਮੇਵ.
ਸਾਮਕਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੩. ਭਯਸੁਤ੍ਤਵਣ੍ਣਨਾ
੨੩. ਤਤਿਯੇ ਸਮ੍ਭਵਤਿ ਜਾਤਿਮਰਣਂ ਏਤੇਨਾਤਿ ਸਮ੍ਭਵੋ, ਉਪਾਦਾਨਨ੍ਤਿ ਆਹ ‘‘ਜਾਤਿਯਾ ਚ ਮਰਣਸ੍ਸ ਚ ਸਮ੍ਭਵੇ ਪਚ੍ਚਯਭੂਤੇ’’ਤਿ. ਅਨੁਪਾਦਾਤਿ ਅਨੁਪਾਦਾਯ. ਤੇਨਾਹ ‘‘ਅਨੁਪਾਦਿਯਿਤ੍ਵਾ’’ਤਿ. ਜਾਤਿਮਰਣਾਨਿ ਸਮ੍ਮਾ ਖੀਯਨ੍ਤਿ ਏਤ੍ਥਾਤਿ ਜਾਤਿਮਰਣਸਙ੍ਖਯੋ, ਨਿਬ੍ਬਾਨਨ੍ਤਿ ਆਹ ‘‘ਜਾਤਿਮਰਣਾਨਂ ਸਙ੍ਖਯਸਙ੍ਖਾਤੇ ਨਿਬ੍ਬਾਨੇ’’ਤਿ. ਸਬ੍ਬਦੁਕ੍ਖਂ ਉਪਚ੍ਚਗੁਨ੍ਤਿ ਸਕਲਮ੍ਪਿ ਵਟ੍ਟਦੁਕ੍ਖਂ ਅਤਿਕ੍ਕਨ੍ਤਾ ਚਰਿਮਚਿਤ੍ਤਨਿਰੋਧੇਨ ਵਟ੍ਟਦੁਕ੍ਖਲੇਸਸ੍ਸਪਿ ਅਸਮ੍ਭਵਤੋ.
ਭਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਹਿਮਵਨ੍ਤਸੁਤ੍ਤਵਣ੍ਣਨਾ
੨੪. ਚਤੁਤ੍ਥੇ ਸਮਾਪਤ੍ਤਿਕੁਸਲੋ ਹੋਤੀਤਿ ਸਮਾਪਜ੍ਜਨਕੁਸਲੋ ਹੋਤਿ. ਤੇਨਾਹ ‘‘ਸਮਾਪਜ੍ਜਿਤੁਂ ਕੁਸਲੋ’’ਤਿ. ਤਤ੍ਥ ਅਨ੍ਤੋਗਤਹੇਤੁਅਤ੍ਥੋ ਠਿਤਿ-ਸਦ੍ਦੋ, ਤਸ੍ਮਾ ਠਪਨਕੁਸਲੋਤਿ ਅਤ੍ਥੋਤਿ ਆਹ ‘‘ਸਮਾਧਿਂ ਠਪੇਤੁਂ ਸਕ੍ਕੋਤੀਤਿ ਅਤ੍ਥੋ’’ਤਿ. ਤਤ੍ਥ ਠਪੇਤੁਂ ਸਕ੍ਕੋਤੀਤਿ ਸਤ੍ਤਟ੍ਠਅਚ੍ਛਰਾਮਤ੍ਤਂ ਖਣਂ ਝਾਨਂ ਠਪੇਤੁਂ ਸਕ੍ਕੋਤਿ ਅਧਿਟ੍ਠਾਨਵਸਿਭਾਵਸ੍ਸ ਨਿਪ੍ਫਾਦਿਤਤ੍ਤਾ. ਯਥਾਪਰਿਚ੍ਛੇਦੇਨਾਤਿ ਯਥਾਪਰਿਚ੍ਛਿਨ੍ਨਕਾਲੇਨ. ਵੁਟ੍ਠਾਤੁਂ ਸਕ੍ਕੋਤਿ ਵੁਟ੍ਠਾਨਵਸਿਭਾਵਸ੍ਸ ਨਿਪ੍ਫਾਦਿਤਤ੍ਤਾ. ਕਲ੍ਲਂ ਸਞ੍ਜਾਤਂ ਅਸ੍ਸਾਤਿ ਕਲ੍ਲਿਤਂ, ਤਸ੍ਮਿਂ ਕਲ੍ਲਿਤੇ ਕਲ੍ਲਿਤਭਾਵੇ ਕੁਸਲੋ ਕਲ੍ਲਿਤਕੁਸਲੋ. ਹਾਸੇਤੁਂ ਤੋਸੇਤੁਂ ਸਮ੍ਪਹਂਸੇਤੁਂ. ਕਲ੍ਲਂ ਕਾਤੁਨ੍ਤਿ ਸਮਾਧਾਨਸ੍ਸ ਪਟਿਪਕ੍ਖਧਮ੍ਮਾਨਂ ਦੂਰੀਕਰਣੇਨ ਸਹਕਾਰੀਕਾਰਣਾਨਞ੍ਚ ਸਮਪ੍ਪਧਾਨੇਨ ਸਮਾਪਜ੍ਜਨੇ ਚਿਤ੍ਤਂ ਸਮਤ੍ਥਂ ਕਾਤੁਂ. ਸਮਾਧਿਸ੍ਸ ਗੋਚਰਕੁਸਲੋਤਿ ਸਮਾਧਿਸ੍ਮਿਂ ਨਿਪ੍ਫਾਦੇਤਬ੍ਬੇ ਤਸ੍ਸ ਗੋਚਰੇ ਕਮ੍ਮਟ੍ਠਾਨਸਞ੍ਞਿਤੇ ਪਵਤ੍ਤਿਟ੍ਠਾਨੇ ਭਿਕ੍ਖਾਚਾਰਗੋਚਰੇ ਸਤਿਸਮ੍ਪਜਞ੍ਞਯੋਗਤੋ ਕੁਸਲੋ ਛੇਕੋ. ਤੇਨਾਹ ‘‘ਸਮਾਧਿਸ੍ਸ ਅਸਪ੍ਪਾਯੇ ਅਨੁਪਕਾਰਕੇ ਧਮ੍ਮੇ ਵਜ੍ਜੇਤ੍ਵਾ’’ਤਿਆਦਿ. ਪਠਮਜ੍ਝਾਨਾਦਿਸਮਾਧਿਂ ਅਭਿਨੀਹਰਿਤੁਨ੍ਤਿ ਪਠਮਜ੍ਝਾਨਾਦਿਸਮਾਧਿਂ ਵਿਸੇਸਭਾਗਿਯਤਾਯ ਅਭਿਨੀਹਰਿਤੁਂ ਉਪਨੇਤੁਂ.
ਹਿਮਵਨ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਅਨੁਸ੍ਸਤਿਟ੍ਠਾਨਸੁਤ੍ਤਵਣ੍ਣਨਾ
੨੫. ਪਞ੍ਚਮੇ ਅਨੁਸ੍ਸਤਿਕਾਰਣਾਨੀਤਿ ਅਨੁਸ੍ਸਤਿਯੋ ਏਵ ਦਿਟ੍ਠਧਮ੍ਮਿਕਸਮ੍ਪਰਾਯਿਕਾਦਿਹਿਤਸੁਖਾਨਂ ਹੇਤੁਭਾਵਤੋ ਕਾਰਣਾਨਿ. ਨਿਕ੍ਖਨ੍ਤਨ੍ਤਿ ਨਿਸ੍ਸਟਂ. ਮੁਤ੍ਤਨ੍ਤਿ ਵਿਸ੍ਸਟ੍ਠਂ. ਵੁਟ੍ਠਿਤਨ੍ਤਿ ਅਪੇਤਂ. ਸਬ੍ਬਮੇਤਂ ਵਿਕ੍ਖਮ੍ਭਨਮੇਵ ਸਨ੍ਧਾਯ ਵਦਤਿ. ਗੇਧਮ੍ਹਾਤਿ ਪਞ੍ਚਕਾਮਗੁਣਤੋ. ਇਦਮ੍ਪੀਤਿ ਬੁਦ੍ਧਾਨੁਸ੍ਸਤਿਵਸੇਨ ਲਦ੍ਧਂ ਉਪਚਾਰਜ੍ਝਾਨਮਾਹ. ਆਰਮ੍ਮਣਂ ਕਰਿਤ੍ਵਾਤਿ ਪਚ੍ਚਯਂ ਕਰਿਤ੍ਵਾ, ਪਾਦਕਂ ਕਤ੍ਵਾਤਿ ਅਤ੍ਥੋ.
ਅਨੁਸ੍ਸਤਿਟ੍ਠਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਮਹਾਕਚ੍ਚਾਨਸੁਤ੍ਤਵਣ੍ਣਨਾ
੨੬. ਛਟ੍ਠੇ ਸਮ੍ਬਾਧੇਤਿ ਵਾ ਤਣ੍ਹਾਸਂਕਿਲੇਸਾਦੀਨਂ ਸਮ੍ਪੀਲ਼ੇ ਸਙ੍ਕਰੇ ਘਰਾਵਾਸੇ. ਓਕਾਸਾ ਵੁਚ੍ਚਨ੍ਤੀਤਿ ਮਗ੍ਗਫਲਸੁਖਾਧਿਗਮਾਯ ਓਕਾਸਭਾਵਤੋ ਓਕਾਸਾਤਿ ਵੁਚ੍ਚਨ੍ਤਿ. ਓਕਾਸਾਧਿਗਮੋਤਿ ਲੋਕੁਤ੍ਤਰਧਮ੍ਮਸ੍ਸ ਅਧਿਗਮਾਯ ਅਧਿਗਨ੍ਤਬ੍ਬਓਕਾਸੋ. ਵਿਸੁਜ੍ਝਨਤ੍ਥਾਯਾਤਿ ਰਾਗਾਦੀਹਿ ਮਲੇਹਿ ਅਭਿਜ੍ਝਾਵਿਸਮਲੋਭਾਦੀਹਿ ਚ ਉਪਕ੍ਕਿਲਿਟ੍ਠਚਿਤ੍ਤਾਨਂ ਵਿਸੁਦ੍ਧਤ੍ਥਾਯ. ਸਾ ਪਨਾਯਂ ਚਿਤ੍ਤਸ੍ਸ ਵਿਸੁਦ੍ਧਿ ਸਿਜ੍ਝਮਾਨਾ ਯਸ੍ਮਾ ਸੋਕਾਦੀਨਂ ਅਨੁਪਾਦਾਯ ਸਂਵਤ੍ਤਤਿ, ਤਸ੍ਮਾ ਵੁਤ੍ਤਂ ‘‘ਸੋਕਪਰਿਦੇਵਾਨਂ ਸਮਤਿਕ੍ਕਮਾਯਾ’’ਤਿਆਦਿ. ਤਤ੍ਥ ਸੋਚਨਂ ਞਾਤਿਬ੍ਯਸਨਾਦਿਨਿਮਿਤ੍ਤਂ ਚੇਤਸੋ ਸਨ੍ਤਾਪੋ ਅਨ੍ਤੋਤਾਪੋ ਅਨ੍ਤੋਨਿਜ੍ਝਾਨਂ ਸੋਕੋ, ਞਾਤਿਬ੍ਯਸਨਾਦਿਨਿਮਿਤ੍ਤਮੇਵ ਸੋਚਿਕਤਾ. ‘‘ਕਹਂ ਏਕਪੁਤ੍ਤਕਾ’’ਤਿਆਦਿਨਾ (ਮ. ਨਿ. ੨.੩੫੩-੩੫੪; ਸਂ. ਨਿ. ੨.੬੩) ਪਰਿਦੇਵਨਵਸੇਨ ਲਪਨਂ ਪਰਿਦੇਵੋ. ਸਮਤਿਕ੍ਕਮਨਤ੍ਥਾਯਾਤਿ ਪਹਾਨਾਯ. ਆਯਤਿਂ ਅਨੁਪ੍ਪਜ੍ਜਨਞ੍ਹਿ ਇਧ ਸਮਤਿਕ੍ਕਮੋ. ਦੁਕ੍ਖਦੋਮਨਸ੍ਸਾਨਂ ਅਤ੍ਥਙ੍ਗਮਾਯਾਤਿ ਕਾਯਿਕਦੁਕ੍ਖਸ੍ਸ ਚ ਚੇਤਸਿਕਦੋਮਨਸ੍ਸਸ੍ਸ ਚਾਤਿ ਇਮੇਸਂ ਦ੍ਵਿਨ੍ਨਂ ਅਤ੍ਥਙ੍ਗਮਾਯ, ਨਿਰੋਧਾਯਾਤਿ ਅਤ੍ਥੋ. ਞਾਯਤਿ ਨਿਚ੍ਛਯੇਨ ਕਮਤਿ ਨਿਬ੍ਬਾਨਂ, ਤਂ ਵਾ ਞਾਯਤਿ ਪਟਿਵਿਜ੍ਝਤਿ ਏਤੇਨਾਤਿ ਞਾਯੋ, ਅਰਿਯਮਗ੍ਗੋ. ਇਧ ਪਨ ਸਹ ਪੁਬ੍ਬਭਾਗੇਨ ਅਰਿਯਮਗ੍ਗੋ ਗਹਿਤੋਤਿ ਆਹ ‘‘ਸਹਵਿਪਸ੍ਸਨਕਸ੍ਸ ਮਗ੍ਗਸ੍ਸ ਅਧਿਗਮਨਤ੍ਥਾਯਾ’’ਤਿ. ਅਪਚ੍ਚਯਪਰਿਨਿਬ੍ਬਾਨਸ੍ਸਾਤਿ ਅਨੁਪਾਦਿਸੇਸਨਿਬ੍ਬਾਨਂ ਸਨ੍ਧਾਯ ਵਦਤਿ. ਪਚ੍ਚਯਵਸੇਨ ਅਨੁਪ੍ਪਨ੍ਨਂ ਅਸਙ੍ਖਤਂ ਅਮਤਧਾਤੁਮੇਵ. ਸੇਸਮੇਤ੍ਥ ਉਤ੍ਤਾਨਮੇਵ.
ਮਹਾਕਚ੍ਚਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਪਠਮਸਮਯਸੁਤ੍ਤਵਣ੍ਣਨਾ
੨੭. ਸਤ੍ਤਮੇ ਵਡ੍ਢੇਤੀਤਿ ਮਨਸੋ ਵਿਵਟ੍ਟਨਿਸ੍ਸਿਤਂ ਵਡ੍ਢਿਂ ਆਵਹਤਿ. ਮਨੋਭਾਵਨੀਯੋਤਿ ਵਾ ਮਨਸਾ ਭਾਵਿਤੋ ਸਮ੍ਭਾਵਿਤੋ. ਯਞ੍ਚ ਆਵਜ੍ਜਤੋ ਮਨਸਿ ਕਰੋਤੋ ਚਿਤ੍ਤਂ ਵਿਨੀਵਰਣਂ ਹੋਤਿ. ਇਮਸ੍ਮਿਂ ਪਕ੍ਖੇ ਕਮ੍ਮਸਾਧਨੋ ਸਮ੍ਭਾਵਨਤ੍ਥੋ ਭਾਵਨੀਯ-ਸਦ੍ਦੋ. ‘‘ਥਿਨਮਿਦ੍ਧਵਿਨੋਦਨਕਮ੍ਮਟ੍ਠਾਨ’’ਨ੍ਤਿ ਵਤ੍ਵਾ ਤਦੇਵ ਵਿਭਾਵੇਨ੍ਤੋ ‘‘ਆਲੋਕਸਞ੍ਞਂ ਵਾ’’ਤਿਆਦਿਮਾਹ. ਵੀਰਿਯਾਰਮ੍ਭਵਤ੍ਥੁਆਦੀਨਂ ਵਾਤਿ ਏਤ੍ਥ ਆਦਿ-ਸਦ੍ਦੇਨ ਇਧ ਅਵੁਤ੍ਤਾਨਂ ਅਤਿਭੋਜਨੇ ਨਿਮਿਤ੍ਤਗ੍ਗਾਹਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਵੁਤ੍ਤਞ੍ਹੇਤਂ ‘‘ਛ ਧਮ੍ਮਾ ਥਿਨਮਿਦ੍ਧਸ੍ਸ ਪਹਾਨਾਯ ਸਂਵਤ੍ਤਨ੍ਤਿ ਅਤਿਭੋਜਨੇ ਨਿਮਿਤ੍ਤਗ੍ਗਾਹੋ, ਇਰਿਯਾਪਥਸਮ੍ਪਰਿਵਤ੍ਤਨਤਾ, ਆਲੋਕਸਞ੍ਞਾਮਨਸਿਕਾਰੋ, ਅਬ੍ਭੋਕਾਸਵਾਸੋ, ਕਲ੍ਯਾਣਮਿਤ੍ਤਤਾ, ਸਪ੍ਪਾਯਕਥਾ’’ਤਿ (ਇਤਿਵੁ. ਅਟ੍ਠ. ੧੧੧). ਅਨ੍ਤਰਾਯਸਦ੍ਦਪਰਿਯਾਯੋ ਇਧ ਅਨ੍ਤਰਾ-ਸਦ੍ਦੋਤਿ ਆਹ ‘‘ਅਨਨ੍ਤਰਾਯੇਨਾ’’ਤਿ.
ਪਠਮਸਮਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਦੁਤਿਯਸਮਯਸੁਤ੍ਤਵਣ੍ਣਨਾ
੨੮. ਅਟ੍ਠਮੇ ਮਣ੍ਡਲਸਣ੍ਠਾਨਮਾਲ਼ਸਙ੍ਖੇਪੇਨ ਕਤਾ ਭੋਜਨਸਾਲਾ ਮਣ੍ਡਲਮਾਲ਼ਾਤਿ ਅਧਿਪ੍ਪੇਤਾਤਿ ਆਹ ‘‘ਭੋਜਨਸਾਲਾਯਾ’’ਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.
ਦੁਤਿਯਸਮਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਉਦਾਯੀਸੁਤ੍ਤਵਣ੍ਣਨਾ
੨੯. ਨਵਮੇ ਦਿਟ੍ਠਧਮ੍ਮੋ ਵੁਚ੍ਚਤਿ ਪਚ੍ਚਕ੍ਖੋ ਅਤ੍ਤਭਾਵੋਤਿ ਆਹ ‘‘ਇਮਸ੍ਮਿਂਯੇਵ ਅਤ੍ਤਭਾਵੇ’’ਤਿ. ਸੁਖਵਿਹਾਰਤ੍ਥਾਯਾਤਿ ਨਿਕ੍ਕਿਲੇਸਤਾਯ ਨਿਰਾਮਿਸੇਨ ਸੁਖੇਨ ਵਿਹਾਰਤ੍ਥਾਯ. ਆਲੋਕਸਞ੍ਞਂ ਮਨਸਿ ਕਰੋਤੀਤਿ ਸੂਰਿਯਚਨ੍ਦਪਜ੍ਜੋਤਮਣਿਉਕ੍ਕਾਵਿਜ੍ਜੁਆਦੀਨਂ ਆਲੋਕੋ ਦਿਵਾ ਰਤ੍ਤਿਞ੍ਚ ਉਪਲਦ੍ਧੋ, ਯਥਾਲਦ੍ਧਵਸੇਨੇਵ ਆਲੋਕਂ ਮਨਸਿ ਕਰੋਤਿ, ਚਿਤ੍ਤੇ ਠਪੇਤਿ. ਤਥਾ ਚ ਨਂ ਮਨਸਿ ਕਰੋਤਿ, ਯਥਾਸ੍ਸ ਸੁਭਾਵਿਤਾਲੋਕਕਸਿਣਸ੍ਸ ਵਿਯ ਕਸਿਣਾਲੋਕੋ ਯਥਿਚ੍ਛਕਂ ਯਾਵਦਿਚ੍ਛਕਞ੍ਚ ਸੋ ਆਲੋਕੋ ਰਤ੍ਤਿਯਂ ਉਪਤਿਟ੍ਠਤਿ. ਯੇਨ ਤਤ੍ਥ ਦਿਵਾਸਞ੍ਞਂ ਠਪੇਤਿ, ਦਿਵਾਰਿਵ ਵਿਗਤਥਿਨਮਿਦ੍ਧੋ ਹੋਤਿ. ਤੇਨਾਹ ‘‘ਯਥਾ ਦਿਵਾ ਤਥਾ ਰਤ੍ਤਿ’’ਨ੍ਤਿ. ਦਿਵਾਤਿ ਸਞ੍ਞਂ ਠਪੇਤੀਤਿ ਵੁਤ੍ਤਨਯੇਨ ਮਨਸਿ ਕਤ੍ਵਾ ਦਿਵਾਰਿਵ ਸਞ੍ਞਂ ਉਪ੍ਪਾਦੇਤਿ. ਯਥਾਨੇਨ ਦਿਵਾ…ਪੇ… ਤਥੇਵ ਤਂ ਮਨਸਿ ਕਰੋਤੀਤਿ ਯਥਾਨੇਨ ਦਿਵਾ ਉਪਲਦ੍ਧੋ ਸੂਰਿਯਾਲੋਕੋ, ਏਵਂ ਰਤ੍ਤਿਮ੍ਪਿ ਦਿਵਾ ਦਿਟ੍ਠਾਕਾਰੇਨੇਵ ਤਂ ਆਲੋਕਂ ਮਨਸਿ ਕਰੋਤਿ. ਯਥਾ ਚਨੇਨ ਰਤ੍ਤਿਂ…ਪੇ… ਮਨਸਿ ਕਰੋਤੀਤਿ ਯਥਾ ਰਤ੍ਤਿਯਂ ਚਨ੍ਦਾਲੋਕੋ ਉਪਲਦ੍ਧੋ, ਏਵਂ ਦਿਵਾਪਿ ਰਤ੍ਤਿਂ ਦਿਟ੍ਠਾਕਾਰੇਨੇਵ ਤਂ ਆਲੋਕਂ ਮਨਸਿ ਕਰੋਤਿ, ਚਿਤ੍ਤੇ ਠਪੇਤਿ. ਵਿਵਟੇਨਾਤਿ ਥਿਨਮਿਦ੍ਧੇਨ ਅਪਿਹਿਤਤ੍ਤਾ ਵਿਵਟੇਨ. ਅਨੋਨਦ੍ਧੇਨਾਤਿ ਅਸਞ੍ਛਾਦਿਤੇਨ. ਸਹੋਭਾਸਕਨ੍ਤਿ ਸਞ੍ਞਾਣੋਭਾਸਂ. ਦਿਬ੍ਬਚਕ੍ਖੁਞਾਣਂ ਰੂਪਗਤਸ੍ਸ ਦਿਬ੍ਬਸ੍ਸ ਇਤਰਸ੍ਸ ਚ ਦਸ੍ਸਨਟ੍ਠੇਨ ਇਧ ਞਾਣਦਸ੍ਸਨਨ੍ਤਿ ਅਧਿਪ੍ਪੇਤਨ੍ਤਿ ਆਹ ‘‘ਦਿਬ੍ਬਚਕ੍ਖੁਸਙ੍ਖਾਤਸ੍ਸਾ’’ਤਿਆਦਿ.
ਉਦ੍ਧਂ ਜੀਵਿਤਪਰਿਯਾਦਾਨਾਤਿ ਜੀਵਿਤਕ੍ਖਯਤੋ ਉਪਰਿ ਮਰਣਤੋ ਪਰਂ. ਸਮੁਗ੍ਗਤੇਨਾਤਿ ਉਟ੍ਠਿਤੇਨ. ਧੁਮਾਤਤ੍ਤਾਤਿ ਉਦ੍ਧਂ ਉਦ੍ਧਂ ਧੁਮਾਤਤ੍ਤਾ ਸੂਨਤ੍ਤਾ. ਸੇਤਰਤ੍ਤੇਹਿ ਵਿਪਰਿਭਿਨ੍ਨਂ ਵਿਮਿਸ੍ਸਿਤਂ ਨੀਲਂ, ਪੁਰਿਮਵਣ੍ਣਵਿਪਰਿਣਾਮਭੂਤਂ ਵਾ ਨੀਲਂ ਵਿਨੀਲਂ, ਵਿਨੀਲਮੇਵ ਵਿਨੀਲਕਨ੍ਤਿ ਕ-ਕਾਰੇਨ ਪਦਵਡ੍ਢਨਮਾਹ ਅਨਤ੍ਥਨ੍ਤਰਤੋ ਯਥਾ ‘‘ਪੀਤਕਂ ਲੋਹਿਤਕ’’ਨ੍ਤਿ. ਪਟਿਕੂਲਤ੍ਤਾਤਿ ਜਿਗੁਚ੍ਛਨੀਯਤ੍ਤਾ. ਕੁਚ੍ਛਿਤਂ ਵਿਨੀਲਂ ਵਿਨੀਲਕਨ੍ਤਿ ਕੁਚ੍ਛਨਤ੍ਥੋ ਵਾ ਅਯਂ ਕ-ਕਾਰੋਤਿ ਦਸ੍ਸੇਤੁਂ ਵੁਤ੍ਤਂ ਯਥਾ ‘‘ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤੀ’’ਤਿ (ਦੀ. ਨਿ. ੩.੩੧੬; ਅ. ਨਿ. ੫.੨੧੩). ਪਰਿਭਿਨ੍ਨਟ੍ਠਾਨੇਹਿ ਕਾਕਧਙ੍ਕਾਦੀਹਿ. ਵਿਸ੍ਸਨ੍ਦਮਾਨਂ ਪੁਬ੍ਬਨ੍ਤਿ ਵਿਸ੍ਸਵਨ੍ਤਪੁਬ੍ਬਂ, ਤਹਂ ਤਹਂ ਪਗ੍ਘਰਨ੍ਤਪੁਬ੍ਬਨ੍ਤਿ ਅਤ੍ਥੋ. ਤਥਾਭਾਵਨ੍ਤਿ ਵਿਸ੍ਸਨ੍ਦਮਾਨਪੁਬ੍ਬਤਂ.
ਸੋ ਭਿਕ੍ਖੂਤਿ ਯੋ ‘‘ਪਸ੍ਸੇਯ੍ਯ ਸਰੀਰਂ ਸੀਵਥਿਕਾਯ ਛਡ੍ਡਿਤ’’ਨ੍ਤਿ ਵੁਤ੍ਤੋ, ਸੋ ਭਿਕ੍ਖੁ. ਉਪਸਂਹਰਤਿ ਸਦਿਸਤਂ. ਅਯਮ੍ਪਿ ਖੋਤਿਆਦਿ ਉਪਸਂਹਰਣਾਕਾਰਦਸ੍ਸਨਂ. ਆਯੂਤਿ ਰੂਪਜੀਵਿਤਿਨ੍ਦ੍ਰਿਯਂ. ਅਰੂਪਜੀਵਿਤਿਨ੍ਦ੍ਰਿਯਂ ਪਨੇਤ੍ਥ ਵਿਞ੍ਞਾਣਗਤਿਕਮੇਵ. ਉਸ੍ਮਾਤਿ ਕਮ੍ਮਜਤੇਜੋ. ਏਵਂਪੂਤਿਕਸਭਾਵੋਤਿ ਏਵਂ ਅਤਿਵਿਯ ਪੂਤਿਸਭਾਵੋ ਆਯੁਆਦਿਵਿਗਮੇ ਵਿਯਾਤਿ ਅਧਿਪ੍ਪਾਯੋ. ਏਦਿਸੋ ਭਵਿਸ੍ਸਤੀਤਿ ਏਵਂਭਾਵੀਤਿ ਆਹ ‘‘ਏਵਮੇਵਂ ਉਦ੍ਧੁਮਾਤਾਦਿਭੇਦੋ ਭਵਿਸ੍ਸਤੀ’’ਤਿ.
ਲੁਞ੍ਚਿਤ੍ਵਾ ਲੁਞ੍ਚਿਤ੍ਵਾਤਿ ਉਪ੍ਪਾਟੇਤ੍ਵਾ ਉਪ੍ਪਾਟੇਤ੍ਵਾ. ਸੇਸਾਵਸੇਸਮਂਸਲੋਹਿਤਯੁਤ੍ਤਨ੍ਤਿ ਸਬ੍ਬਸੋ ਅਕ੍ਖਾਦਿਤਤ੍ਤਾ ਤਹਂ ਤਹਂ ਸੇਸੇਨ ਅਪ੍ਪਾਵਸੇਸੇਨ ਮਂਸਲੋਹਿਤੇਨ ਯੁਤ੍ਤਂ. ਅਞ੍ਞੇਨ ਹਤ੍ਥਟ੍ਠਿਕਨ੍ਤਿ ਅਵਿਸੇਸੇਨ ਹਤ੍ਥਟ੍ਠਿਕਾਨਂ ਵਿਪ੍ਪਕਿਣ੍ਣਤਾ ਜੋਤਿਤਾਤਿ ਅਨਵਸੇਸਤੋ ਤੇਸਂ ਵਿਪ੍ਪਕਿਣ੍ਣਤਂ ਦਸ੍ਸੇਨ੍ਤੋ ‘‘ਚਤੁਸਟ੍ਠਿਭੇਦਮ੍ਪੀ’’ਤਿਆਦਿਮਾਹ. ਤੇਰੋਵਸ੍ਸਿਕਾਨੀਤਿ ਤਿਰੋਵਸ੍ਸਗਤਾਨਿ. ਤਾਨਿ ਪਨ ਸਂਵਚ੍ਛਰਂ ਵੀਤਿਵਤ੍ਤਾਨਿ ਹੋਨ੍ਤੀਤਿ ਆਹ ‘‘ਅਤਿਕ੍ਕਨ੍ਤਸਂਵਚ੍ਛਰਾਨੀ’’ਤਿ. ਪੁਰਾਣਤਾਯ ਘਨਭਾਵਵਿਗਮੇਨ ਵਿਚੁਣ੍ਣਤਾ ਇਧ ਪੂਤਿਭਾਵੋ. ਸੋ ਯਥਾ ਹੋਤਿ, ਤਂ ਦਸ੍ਸੇਨ੍ਤੋ ‘‘ਅਬ੍ਭੋਕਾਸੇ’’ਤਿਆਦਿਮਾਹ. ਅਨੇਕਧਾਤੂਨਨ੍ਤਿ ਚਕ੍ਖੁਧਾਤੁਆਦੀਨਂ, ਕਾਮਧਾਤੁਆਦੀਨਂ ਵਾ. ਸਤਿਯਾ ਚ ਞਾਣਸ੍ਸ ਚ ਅਤ੍ਥਾਯਾਤਿ ‘‘ਅਭਿਕ੍ਕਨ੍ਤੇ ਪਟਿਕ੍ਕਨ੍ਤੇ ਸਮ੍ਪਜਾਨਕਾਰੀ ਹੋਤੀ’’ਤਿਆਦਿਨਾ (ਦੀ. ਨਿ. ੧.੨੧੪; ੨.੩੭੬; ਮ. ਨਿ. ੧.੧੦੯) ਵੁਤ੍ਤਾਯ ਸਤ੍ਤਟ੍ਠਾਨਿਕਾਯ ਸਤਿਯਾ ਚੇਵ ਤਂਸਮ੍ਪਯੁਤ੍ਤਞਾਣਸ੍ਸ ਚ ਅਤ੍ਥਾਯ.
ਉਦਾਯੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਅਨੁਤ੍ਤਰਿਯਸੁਤ੍ਤਵਣ੍ਣਨਾ
੩੦. ਦਸਮੇ ਨਿਹੀਨਨ੍ਤਿ ਲਾਮਕਂ, ਕਿਲਿਟ੍ਠਂ ਵਾ. ਗਾਮਵਾਸਿਕਾਨਨ੍ਤਿ ਬਾਲਾਨਂ. ਪੁਥੁਜ੍ਜਨਾਨਂ ਇਦਨ੍ਤਿ ਪੋਥੁਜ੍ਜਨਿਕਂ. ਤੇਨਾਹ ‘‘ਪੁਥੁਜ੍ਜਨਾਨਂ ਸਨ੍ਤਕ’’ਨ੍ਤਿ, ਪੁਥੁਜ੍ਜਨੇਹਿ ਸੇਵਿਤਬ੍ਬਤ੍ਤਾ ਤੇਸਂ ਸਨ੍ਤਕਨ੍ਤਿ ਵੁਤ੍ਤਂ ਹੋਤਿ. ਅਨਰਿਯਨ੍ਤਿ ਨ ਨਿਦ੍ਦੋਸਂ. ਨਿਦ੍ਦੋਸਟ੍ਠੋ ਹਿ ਅਰਿਯਟ੍ਠੋ. ਤੇਨਾਹ ‘‘ਨ ਉਤ੍ਤਮਂ ਨ ਪਰਿਸੁਦ੍ਧ’’ਨ੍ਤਿ. ਅਰਿਯੇਹਿ ਵਾ ਨ ਸੇਵਿਤਬ੍ਬਨ੍ਤਿ ਅਨਰਿਯਂ. ਅਨਤ੍ਥਸਂਹਿਤਨ੍ਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਾਦਿਵਿਵਿਧਵਿਪੁਲਾਨਤ੍ਥਸਹਿਤਂ. ਤਾਦਿਸਞ੍ਚ ਅਤ੍ਥਸਨ੍ਨਿਸ੍ਸਿਤਂ ਨ ਹੋਤੀਤਿ ਆਹ ‘‘ਨ ਅਤ੍ਥਸਨ੍ਨਿਸ੍ਸਿਤ’’ਨ੍ਤਿ. ਨ ਵਟ੍ਟੇ ਨਿਬ੍ਬਿਨ੍ਦਨਤ੍ਥਾਯਾਤਿ ਚਤੁਸਚ੍ਚਕਮ੍ਮਟ੍ਠਾਨਾਭਾਵਤੋ. ਅਸਤਿ ਪਨ ਵਟ੍ਟੇ ਨਿਬ੍ਬਿਦਾਯ ਵਿਰਾਗਾਦੀਨਂ ਅਸਮ੍ਭਵੋਯੇਵਾਤਿ ਆਹ ‘‘ਨ ਵਿਰਾਗਾਯਾ’’ਤਿਆਦਿ.
ਅਨੁਤ੍ਤਮਂ ਅਨੁਤ੍ਤਰਿਯਨ੍ਤਿ ਆਹ ‘‘ਏਤਂ ਅਨੁਤ੍ਤਰ’’ਨ੍ਤਿ. ਹਤ੍ਥਿਸ੍ਮਿਨ੍ਤਿ ਨਿਮਿਤ੍ਤਤ੍ਥੇ ਭੁਮ੍ਮਨ੍ਤਿ ਆਹ ‘‘ਹਤ੍ਥਿਨਿਮਿਤ੍ਤਂ ਸਿਕ੍ਖਿਤਬ੍ਬ’’ਨ੍ਤਿ. ਹਤ੍ਥਿਵਿਸਯਤ੍ਤਾ ਹਤ੍ਥਿਸਨ੍ਨਿਸ੍ਸਿਤਤ੍ਤਾ ਚ ਹਤ੍ਥਿਸਿਪ੍ਪਂ ‘‘ਹਤ੍ਥੀ’’ਤਿ ਗਹੇਤ੍ਵਾ ‘‘ਹਤ੍ਥਿਸ੍ਮਿਮ੍ਪਿ ਸਿਕ੍ਖਤੀ’’ਤਿ ਵੁਤ੍ਤਂ. ਤਸ੍ਮਾ ਹਤ੍ਥਿਸਿਪ੍ਪੇ ਸਿਕ੍ਖਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਸੇਸਪਦੇਸੁਪਿ ਏਸੇਵ ਨਯੋ.
ਲਿਙ੍ਗਬ੍ਯਤ੍ਤਯੇਨ ਵਿਭਤ੍ਤਿਬ੍ਯਤ੍ਤਯੇਨ ਪਾਰਿਚਰਿਯੇਤਿ ਵੁਤ੍ਤਨ੍ਤਿ ਆਹ ‘‘ਪਾਰਿਚਰਿਯਾਯ ਪਚ੍ਚੁਪਟ੍ਠਿਤਾ’’ਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.
ਅਨੁਤ੍ਤਰਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਅਨੁਤ੍ਤਰਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.