੫-੬. ਪੁਞ੍ਞਾਭਿਸਨ੍ਦਸੁਤ੍ਤਾਦਿਵਣ੍ਣਨਾ

੪੫-੪੬. ਪਞ੍ਚਮੇ ਅਸਙ੍ਖੇਯ੍ਯੋਤਿ ਆਲ਼੍ਹਕਗਣਨਾਯ ਅਸਙ੍ਖੇਯ੍ਯੋ. ਯੋਜਨਵਸੇਨ ਪਨਸ੍ਸ ਸਙ੍ਖਾ ਅਤ੍ਥਿ ਹੇਟ੍ਠਾ ਮਹਾਪਥਵਿਯਾ ਉਪਰਿ ਆਕਾਸੇਨ ਪਰਿਸਮਨ੍ਤਤੋ ਚਕ੍ਕਵਾਲ਼ਪਬ੍ਬਤੇਨ ਮਜ੍ਝੇ ਤਤ੍ਥ ਤਤ੍ਥ ਠਿਤਕੇਹਿ ਦੀਪਪਬ੍ਬਤਪਰਿਯਨ੍ਤੇਹਿ ਪਰਿਚ੍ਛਿਨ੍ਨਤ੍ਤਾ ਜਾਨਨ੍ਤੇਨ ਯੋਜਨਤੋ ਸਙ੍ਖਾਤੁਂ ਸਕ੍ਕਾਤਿ ਕਤ੍ਵਾ. ਮਹਾਸਰੀਰਮਚ੍ਛਕੁਮ੍ਭੀਲਯਕ੍ਖਰਕ੍ਖਸਮਹਾਨਾਗਦਾਨਵਾਦੀਨਂ ਸਵਿਞ੍ਞਾਣਕਾਨਂ ਬਲਵਾਮੁਖਪਾਤਾਲਾਦੀਨਂ ਅਵਿਞ੍ਞਾਣਕਾਨਂ ਭੇਰਵਾਰਮ੍ਮਣਾਨਂ ਵਸੇਨ ਬਹੁਭੇਰਵਂ. ਪੁਥੂਤਿ ਬਹੂ. ਸਵਨ੍ਤੀਤਿ ਸਨ੍ਦਮਾਨਾ. ਉਪਯਨ੍ਤੀਤਿ ਉਪਗਚ੍ਛਨ੍ਤਿ. ਛਟ੍ਠਂ ਉਤ੍ਤਾਨਮੇਵ.

ਪੁਞ੍ਞਾਭਿਸਨ੍ਦਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.