੩. ਉਗ੍ਗਹਸੁਤ੍ਤਵਣ੍ਣਨਾ

੩੩. ਤਤਿਯੇ ਸਬ੍ਬਪਠਮਂ ਉਟ੍ਠਾਨਸੀਲਾਤਿ ਰਤ੍ਤਿਯਾ ਵਿਭਾਯਨਵੇਲਾਯ ਸਾਮਿਕੇ ਪਰਿਜਨੇ ਸੇਯ੍ਯਾਯ ਅਵੁਟ੍ਠਿਤੇ ਸਬ੍ਬਪਠਮਂ ਉਟ੍ਠਾਨਸੀਲਾ. ਸਾਮਿਕਂ ਦਿਸ੍ਵਾ ਨਿਸਿਨ੍ਨਾਸਨਤੋ ਅਗ੍ਗਿਦਡ੍ਢਾ ਵਿਯ ਪਠਮਮੇਵ ਵੁਟ੍ਠਹਨ੍ਤੀਤਿ ਵਾ ਪੁਬ੍ਬੁਟ੍ਠਾਯਿਨਿਯੋ. ਕਿਂਕਾਰਨ੍ਤਿ ਕਿਂਕਰਣੀਯਂ, ਕਿਂਕਰਣਭਾਵੇਨ ਪੁਚ੍ਛਿਤ੍ਵਾ ਕਾਤਬ੍ਬਵੇਯ੍ਯਾਵਚ੍ਚਨ੍ਤਿ ਅਤ੍ਥੋ. ਤਂ ਪਟਿਸ੍ਸੁਣਨ੍ਤਾ ਵਿਚਰਨ੍ਤੀਤਿ ਕਿਂਕਾਰਪ੍ਪਟਿਸ੍ਸਾਵਿਨਿਯੋ. ਮਨਾਪਂਯੇਵ ਕਿਰਿਯਂ ਕਰੋਨ੍ਤਿ ਸੀਲੇਨਾਤਿ ਮਨਾਪਚਾਰਿਨਿਯੋ. ਪਿਯਮੇਵ ਵਦਨ੍ਤਿ ਸੀਲੇਨਾਤਿ ਪਿਯਵਾਦਿਨਿਯੋ.

ਤਤ੍ਰੁਪਾਯਾਯਾਤਿ ਤਤ੍ਰ ਕਮ੍ਮੇ ਸਾਧੇਤਬ੍ਬਉਪਾਯਭੂਤਾਯ ਵੀਮਂਸਾਯ. ਤੇਨਾਹ ‘‘ਤਸ੍ਮਿਂ ਉਣ੍ਣਾਕਪ੍ਪਾਸਸਂਵਿਧਾਨੇ’’ਤਿਆਦਿ. ਅਲਂ ਕਾਤੁਨ੍ਤਿ ਕਾਤੁਂ ਸਮਤ੍ਥਾ. ਅਲਂ ਸਂਵਿਧਾਤੁਨ੍ਤਿ ਵਿਚਾਰੇਤੁਂ ਸਮਤ੍ਥਾ. ਤੇਨਾਹ ‘‘ਅਲਂ ਕਾਤੁਂ ਅਲਂ ਸਂਵਿਧਾਤੁਨ੍ਤਿ ਅਤ੍ਤਨਾ ਕਾਤੁਮ੍ਪਿ ਪਰੇਹਿ ਕਾਰਾਪੇਤੁਮ੍ਪੀ’’ਤਿਆਦਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਉਗ੍ਗਹਸੁਤ੍ਤਵਣ੍ਣਨਾ ਨਿਟ੍ਠਿਤਾ.