(੨੧) ੧. ਕਿਮਿਲਵਗ੍ਗੋ

੧-੪. ਕਿਮਿਲਸੁਤ੍ਤਾਦਿਵਣ੍ਣਨਾ

੨੦੧-੪. ਪਞ੍ਚਮਸ੍ਸ ਪਠਮਦੁਤਿਯਾਨਿ ਉਤ੍ਤਾਨਤ੍ਥਾਨੇਵ. ਤਤਿਯੇ ਅਧਿਵਾਸਨਂ ਖਮਨਂ, ਪਰੇਸਂ ਦੁਕ੍ਕਟਂ ਦੁਰੁਤ੍ਤਞ੍ਚ ਪਟਿਵਿਰੋਧਾਕਰਣੇਨ ਅਤ੍ਤਨੋ ਉਪਰਿ ਆਰੋਪੇਤ੍ਵਾ ਵਾਸਨਂ ਅਧਿਵਾਸਨਂ, ਤਦੇਵ ਖਨ੍ਤੀਤਿ ਅਧਿਵਾਸਨਕ੍ਖਨ੍ਤਿ. ਸੁਭੇ ਰਤੋਤਿ ਸੂਰਤੋ, ਸੁਟ੍ਠੁ ਵਾ ਪਾਪਤੋ ਓਰਤੋ ਵਿਰਤੋ ਸੋਰਤੋ, ਤਸ੍ਸ ਭਾਵੋ ਸੋਰਚ੍ਚਂ. ਤੇਨਾਹ ‘‘ਸੋਰਚ੍ਚੇਨਾਤਿ ਸੁਚਿਸੀਲਤਾਯਾ’’ਤਿ. ਸਾ ਹਿ ਸੋਭਨਕਮ੍ਮਰਤਤਾ, ਸੁਟ੍ਠੁ ਵਾ ਪਾਪਤੋ ਓਰਤਭਾਵੋ ਵਿਰਤਤਾ. ਚਤੁਤ੍ਥੇ ਨਤ੍ਥਿ ਵਤ੍ਤਬ੍ਬਂ.

ਕਿਮਿਲਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੫. ਚੇਤੋਖਿਲਸੁਤ੍ਤਵਣ੍ਣਨਾ

੨੦੫. ਪਞ੍ਚਮੇ ਚੇਤੋਖਿਲਾ ਨਾਮ ਅਤ੍ਥਤੋ ਵਿਚਿਕਿਚ੍ਛਾ ਕੋਧੋ ਚ. ਤੇ ਪਨ ਯਸ੍ਮਿਂ ਸਨ੍ਤਾਨੇ ਉਪ੍ਪਜ੍ਜਨ੍ਤਿ, ਤਸ੍ਸ ਖਰਭਾਵੋ ਕਕ੍ਖਲ਼ਭਾਵੋ ਹੁਤ੍ਵਾ ਉਪਤਿਟ੍ਠਨ੍ਤਿ, ਪਗੇਵ ਅਤ੍ਤਨਾ ਸਮ੍ਪਯੁਤ੍ਤਚਿਤ੍ਤਸ੍ਸਾਤਿ ਆਹ ‘‘ਚਿਤ੍ਤਸ੍ਸ ਥਦ੍ਧਭਾਵਾ’’ਤਿ. ਯਥਾ ਲਕ੍ਖਣਪਾਰਿਪੂਰਿਯਾ ਗਹਿਤਾਯ ਸਬ੍ਬਾ ਸਤ੍ਥੁ ਰੂਪਕਾਯਸਿਰੀ ਗਹਿਤਾ ਏਵ ਨਾਮ ਹੋਤਿ ਏਵਂ ਸਬ੍ਬਞ੍ਞੁਤਾਯ ਸਬ੍ਬਧਮ੍ਮਕਾਯਸਿਰੀ ਗਹਿਤਾ ਏਵ ਨਾਮ ਹੋਤੀਤਿ ਤਦੁਭਯਵਤ੍ਥੁਕਮੇਵ ਕਙ੍ਖਂ ਦਸ੍ਸੇਨ੍ਤੋ ‘‘ਸਰੀਰੇ ਕਙ੍ਖਮਾਨੋ’’ਤਿਆਦਿਮਾਹ. ਵਿਚਿਨਨ੍ਤੋਤਿ ਧਮ੍ਮਸਭਾਵਂ ਵੀਮਂਸਨ੍ਤੋ. ਕਿਚ੍ਛਤੀਤਿ ਕਿਲਮਤਿ. ਵਿਨਿਚ੍ਛੇਤੁਂ ਨ ਸਕ੍ਕੋਤੀਤਿ ਸਨ੍ਨਿਟ੍ਠਾਤੁਂ ਨ ਸਕ੍ਕੋਤਿ. ਆਤਪਤਿ ਕਿਲੇਸੇਤਿ ਆਤਪ੍ਪਂ, ਸਮ੍ਮਾਵਾਯਾਮੋਤਿ ਆਹ ‘‘ਆਤਪ੍ਪਾਯਾਤਿ ਕਿਲੇਸਸਨ੍ਤਾਪਨਵੀਰਿਯਕਰਣਤ੍ਥਾਯਾ’’ਤਿ. ਪੁਨਪ੍ਪੁਨਂ ਯੋਗਾਯਾਤਿ ਭਾਵਨਂ ਪੁਨਪ੍ਪੁਨਂ ਯੁਞ੍ਜਨਾਯ. ਸਤਤਕਿਰਿਯਾਯਾਤਿ ਭਾਵਨਾਯ ਨਿਰਨ੍ਤਰਪ੍ਪਯੋਗਾਯ.

ਪਟਿਵੇਧਧਮ੍ਮੇ ਕਙ੍ਖਮਾਨੋਤਿ ਏਤ੍ਥ ਕਥਂ ਲੋਕੁਤ੍ਤਰਧਮ੍ਮੇ ਕਙ੍ਖਾ ਪਵਤ੍ਤੀਤਿ? ਨ ਆਰਮ੍ਮਣਕਰਣਵਸੇਨ, ਅਨੁਸ੍ਸੁਤਾਕਾਰਪਰਿਵਿਤਕ੍ਕਲਦ੍ਧੇ ਪਰਿਕਪ੍ਪਿਤਰੂਪੇ ਕਙ੍ਖਾ ਪਵਤ੍ਤਤੀਤਿ ਦਸ੍ਸੇਨ੍ਤੋ ਆਹ ‘‘ਵਿਪਸ੍ਸਨਾ…ਪੇ… ਵਦਨ੍ਤਿ, ਤਂ ਅਤ੍ਥਿ ਨੁ ਖੋ ਨਤ੍ਥੀਤਿ ਕਙ੍ਖਤੀ’’ਤਿ. ਸਿਕ੍ਖਾਤਿ ਚੇਤ੍ਥ ਪੁਬ੍ਬਭਾਗਸਿਕ੍ਖਾ ਵੇਦਿਤਬ੍ਬਾ. ਕਾਮਞ੍ਚੇਤ੍ਥ ਵਿਸੇਸੁਪ੍ਪਤ੍ਤਿਯਾ ਮਹਾਸਾਵਜ੍ਜਤਾਯ ਚੇਵ ਸਂਵਾਸਨਿਮਿਤ੍ਤਂ ਘਟਨਾਹੇਤੁ ਅਭਿਣ੍ਹੁਪ੍ਪਤ੍ਤਿਕਤਾਯ ਚ ਸਬ੍ਰਹ੍ਮਚਾਰੀਸੂਤਿ ਕੋਪਸ੍ਸ ਵਿਸਯੋ ਵਿਸੇਸੇਤ੍ਵਾ ਵੁਤ੍ਤੋ, ਅਞ੍ਞਤ੍ਥਾਪਿ ਕੋਪੋ ਨ ਚੇਤੋਖਿਲੋਤਿ ਨ ਸਕ੍ਕਾ ਵਿਞ੍ਞਾਤੁਨ੍ਤਿ ਕੇਚਿ. ਯਦਿ ਏਵਂ ਵਿਚਿਕਿਚ੍ਛਾਯਪਿ ਅਯਂ ਨਯੋ ਆਪਜ੍ਜਤਿ, ਤਸ੍ਮਾ ਯਥਾਰੁਤਵਸੇਨ ਗਹੇਤਬ੍ਬਂ.

ਚੇਤੋਖਿਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬-੮. ਵਿਨਿਬਨ੍ਧਸੁਤ੍ਤਾਦਿਵਣ੍ਣਨਾ

੨੦੬-੮. ਛਟ੍ਠੇ ਪਵਤ੍ਤਿਤੁਂ ਅਪ੍ਪਦਾਨਵਸੇਨ ਕੁਸਲਚਿਤ੍ਤਂ ਵਿਨਿਬਨ੍ਧਨ੍ਤੀਤਿ ਚੇਤਸੋਵਿਨਿਬਨ੍ਧਾ. ਤਂ ਪਨ ਵਿਨਿਬਨ੍ਧਨ੍ਤਾ ਮੁਟ੍ਠਿਗ੍ਗਾਹਂ ਗਣ੍ਹਨ੍ਤਾ ਵਿਯ ਹੋਨ੍ਤੀਤਿ ਆਹ ‘‘ਚਿਤ੍ਤਂ ਵਿਨਿਬਨ੍ਧਿਤ੍ਵਾ’’ਤਿਆਦਿ. ਕਾਮਗਿਦ੍ਧੋ ਪੁਗ੍ਗਲੋ ਵਤ੍ਥੁਕਾਮੇਪਿ ਕਿਲੇਸਕਾਮੇਪਿ ਅਸ੍ਸਾਦੇਤਿ ਅਭਿਨਨ੍ਦਤੀਤਿ ਵੁਤ੍ਤਂ ‘‘ਵਤ੍ਥੁਕਾਮੇਪਿ ਕਿਲੇਸਕਾਮੇਪੀ’’ਤਿ. ਅਤ੍ਤਨੋ ਕਾਯੇਤਿ ਅਤ੍ਤਨੋ ਨਾਮਕਾਯੇ, ਅਤ੍ਤਭਾਵੇ ਵਾ. ਬਹਿਦ੍ਧਾਰੂਪੇਤਿ ਪਰੇਸਂ ਕਾਯੇ ਅਨਿਨ੍ਦ੍ਰਿਯਬਦ੍ਧਰੂਪੇ ਚ. ਉਦਰਂ ਅਵਦਿਹਤਿ ਉਪਚਿਨੋਤਿ ਪੂਰੇਤੀਤਿ ਉਦਰਾਵਦੇਹਕਂ. ਸੇਯ੍ਯਸੁਖਨ੍ਤਿ ਸੇਯ੍ਯਾਯ ਸਯਨਵਸੇਨ ਉਪ੍ਪਜ੍ਜਨਕਸੁਖਂ. ਸਮ੍ਪਰਿਵਤ੍ਤਕਨ੍ਤਿ ਸਮ੍ਪਰਿਵਤ੍ਤਿਤ੍ਵਾ. ਪਣਿਧਾਯਾਤਿ ਤਣ੍ਹਾਵਸੇਨੇਵ ਪਣਿਦਹਿਤ੍ਵਾ. ਇਤਿ ਪਞ੍ਚਵਿਧੋਪਿ ਲੋਭਵਿਸੇਸੋ ਏਵ ‘‘ਚੇਤੋਵਿਨਿਬਨ੍ਧੋ’’ਤਿ ਵੁਤ੍ਤੋਤਿ ਵੇਦਿਤਬ੍ਬੋ. ਸਤ੍ਤਮਟ੍ਠਮੇਸੁ ਨਤ੍ਥਿ ਵਤ੍ਤਬ੍ਬਂ.

ਵਿਨਿਬਨ੍ਧਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੯-੧੦. ਗੀਤਸ੍ਸਰਸੁਤ੍ਤਾਦਿਵਣ੍ਣਨਾ

੨੦੯-੨੧੦. ਨਵਮੇ ਆਯਤਕੋ ਨਾਮ ਗੀਤਸ੍ਸਰੋ ਤਂ ਤਂ ਵਤ੍ਤਂ ਭਿਨ੍ਦਿਤ੍ਵਾ ਅਕ੍ਖਰਾਨਿ ਵਿਨਾਸੇਤ੍ਵਾ ਪਵਤ੍ਤੋਤਿ ਆਹ ‘‘ਆਯਤਕੇਨਾ’’ਤਿਆਦਿ. ਧਮ੍ਮੇਹਿ ਸੁਤ੍ਤਵਤ੍ਤਂ ਨਾਮ ਅਤ੍ਥਿ, ਗਾਥਾਵਤ੍ਤਂ ਨਾਮ ਅਤ੍ਥਿ, ਤਂ ਵਿਨਾਸੇਤ੍ਵਾ ਅਤਿਦੀਘਂ ਕਾਤੁਂ ਨ ਵਟ੍ਟਤਿ. ਧਮ੍ਮਞ੍ਹਿ ਭਾਸਨ੍ਤੇਨ ਚਤੁਰਸ੍ਸੇਨ ਵਤ੍ਤੇਨ ਪਰਿਮਣ੍ਡਲਾਨਿ ਪਦਬ੍ਯਞ੍ਜਨਾਨਿ ਦਸ੍ਸੇਤਬ੍ਬਾਨਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਰਭਞ੍ਞ’’ਨ੍ਤਿ (ਚੂਲ਼ਵ. ੨੪੯) ਚ ਵਚਨਤੋ ਸਰੇਨ ਧਮ੍ਮਂ ਭਣਿਤੁਂ ਵਟ੍ਟਤਿ. ਸਰਭਞ੍ਞੇ ਕਿਰ ਤਰਙ੍ਗਵਤ੍ਤਧੋਤਕਵਤ੍ਤਭਾਗਗ੍ਗਹਕਵਤ੍ਤਾਦੀਨਿ ਦ੍ਵਤ੍ਤਿਂਸ ਵਤ੍ਤਾਨਿ ਅਤ੍ਥਿ. ਤੇਸੁ ਯਂ ਇਚ੍ਛਤਿ, ਤਂ ਕਾਤੁਂ ਲਭਤੀਤਿ. ਦਸਮੇ ਨਤ੍ਥਿ ਵਤ੍ਤਬ੍ਬਂ.

ਗੀਤਸ੍ਸਰਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਕਿਮਿਲਵਗ੍ਗਵਣ੍ਣਨਾ ਨਿਟ੍ਠਿਤਾ.