੧੦. ਗਵੇਸੀਸੁਤ੍ਤਵਣ੍ਣਨਾ

੧੮੦. ਦਸਮੇ ਸੁਕਾਰਣਨ੍ਤਿ ਬੋਧਿਪਰਿਪਾਚਨਸ੍ਸ ਏਕਨ੍ਤਿਕਂ ਸੁਨ੍ਦਰਂ ਕਾਰਣਂ. ਮਨ੍ਦਹਸਿਤਨ੍ਤਿ ਈਸਕਂ ਹਸਿਤਂ. ਕਹਂ ਕਹਨ੍ਤਿ ਹਾਸਸਦ੍ਦਸ੍ਸ ਅਨੁਕਰਣਮੇਤਂ. ਹਟ੍ਠਪ੍ਪਹਟ੍ਠਾਕਾਰਮਤ੍ਤਨ੍ਤਿ ਹਟ੍ਠਸ੍ਸ ਪਹਟ੍ਠਾਕਾਰਮਤ੍ਤਂ. ਯਥਾ ਗਹਿਤਸਙ੍ਕੇਤਾ ‘‘ਪਹਟ੍ਠੋ ਭਗਵਾ’’ਤਿ ਸਞ੍ਜਾਨਨ੍ਤਿ, ਏਵਂ ਆਕਾਰਨਿਦਸ੍ਸਨਮਤ੍ਤਂ.

ਇਦਾਨਿ ਇਮਿਨਾ ਪਸਙ੍ਗੇਨ ਹਾਸਸਮੁਟ੍ਠਾਨਂ ਵਿਭਾਗਤੋ ਦਸ੍ਸੇਤੁਂ ‘‘ਹਸਿਤਞ੍ਚ ਨਾਮੇਤ’’ਨ੍ਤਿਆਦਿ ਆਰਦ੍ਧਂ. ਤਤ੍ਥ ਅਜ੍ਝੁਪੇਕ੍ਖਨਵਸੇਨਪਿ ਹਾਸੋ ਨ ਸਮ੍ਭਵਤਿ, ਪਗੇਵ ਦੋਮਨਸ੍ਸਵਸੇਨਾਤਿ ਆਹ ‘‘ਤੇਰਸਹਿ ਸੋਮਨਸ੍ਸਸਹਗਤਚਿਤ੍ਤੇਹੀ’’ਤਿ. ਨਨੁ ਚ ਕੇਚਿ ਕੋਧਵਸੇਨਪਿ ਹਸਨ੍ਤੀਤਿ? ਨ, ਤੇ ਸਮ੍ਪਿਯਨ੍ਤਿ ਕੋਧਵਤ੍ਥੁਂ ਤਤ੍ਥ ‘‘ਮਯਂ ਦਾਨਿ ਯਥਾਕਾਮਕਾਰਿਤਂ ਆਪਜ੍ਜਿਸ੍ਸਾਮਾ’’ਤਿ ਦੁਵਿਞ੍ਞੇਯ੍ਯਨ੍ਤਰੇਨ ਸੋਮਨਸ੍ਸਚਿਤ੍ਤੇਨੇਵ ਹਾਸਸ੍ਸ ਉਪ੍ਪਜ੍ਜਨਤੋ. ਤੇਸੂਤਿ ਪਞ੍ਚਸੁ ਸੋਮਨਸ੍ਸਸਹਗਤਕਿਰਿਯਚਿਤ੍ਤੇਸੁ. ਬਲਵਾਰਮ੍ਮਣੇਤਿ ਉਲ਼ਾਰਤਮੇ ਆਰਮ੍ਮਣੇ ਯਮਕਪਾਟਿਹਾਰਿਯਸਦਿਸੇ. ਦੁਬ੍ਬਲਾਰਮ੍ਮਣੇਤਿ ਅਨੁਲ਼ਾਰਆਰਮ੍ਮਣੇ.

‘‘ਇਮਸ੍ਮਿਂ ਪਨ ਠਾਨੇ…ਪੇ… ਉਪ੍ਪਾਦੇਤੀ’’ਤਿ ਇਦਂ ਪੋਰਾਣਟ੍ਠਕਥਾਯਂ ਤਥਾ ਆਗਤਤ੍ਤਾ ਵੁਤ੍ਤਂ, ਨ ਸਹੇਤੁਕਸੋਮਨਸ੍ਸਸਹਗਤਚਿਤ੍ਤੇਹਿ ਭਗਵਤੋ ਸਿਤਂ ਨ ਹੋਤੀਤਿ ਦਸ੍ਸਨਤ੍ਤਂ. ਅਭਿਧਮ੍ਮਟੀਕਾਯਂ (ਧ. ਸ. ਮੂਲਟੀ. ੯੬੮) ਪਨ ‘‘ਅਤੀਤਂਸਾਦੀਸੁ ਅਪ੍ਪਟਿਹਤਂ ਞਾਣਂ ਵਤ੍ਵਾ ‘ਇਮੇਹਿ ਧਮ੍ਮੇਹਿ ਸਮਨ੍ਨਾਗਤਸ੍ਸ ਬੁਦ੍ਧਸ੍ਸ ਭਗਵਤੋ ਸਬ੍ਬਂ ਕਾਯਕਮ੍ਮਂ ਞਾਣਪੁਬ੍ਬਙ੍ਗਮਂ ਞਾਣਾਨੁਪਰਿਵਤ੍ਤੀ’ਤਿਆਦਿਵਚਨਤੋ (ਮਹਾਨਿ. ੧੫੬; ਪਟਿ. ਮ. ੩.੫) ‘ਭਗਵਤੋ ਇਦਂ ਚਿਤ੍ਤਂ ਉਪ੍ਪਜ੍ਜਤੀ’ਤਿ ਵੁਤ੍ਤਵਚਨਂ ਵਿਚਾਰੇਤਬ੍ਬ’’ਨ੍ਤਿ ਵੁਤ੍ਤਂ. ਤਤ੍ਥ ਇਮਿਨਾ ਹਸਿਤੁਪ੍ਪਾਦਚਿਤ੍ਤੇਨ ਪਵਤ੍ਤਿਯਮਾਨਮ੍ਪਿ ਭਗਵਤੋ ਸਿਤਕਰਣਂ ਪੁਬ੍ਬੇਨਿਵਾਸਅਨਾਗਤਂਸਸਬ੍ਬਞ੍ਞੁਤਞ੍ਞਾਣਾਨਂ ਅਨੁਵਤ੍ਤਕਤ੍ਤਾ ਞਾਣਾਨੁਪਰਿਵਤ੍ਤਿਯੇਵਾਤਿ ਏਵਂ ਪਨ ਞਾਣਾਨੁਪਰਿਵਤ੍ਤਿਭਾਵੇ ਸਤਿ ਨ ਕੋਚਿ ਪਾਲ਼ਿਅਟ੍ਠਕਥਾਨਂ ਵਿਰੋਧੋ. ਤਥਾ ਹਿ ਅਭਿਧਮ੍ਮਟ੍ਠਕਥਾਯਂ (ਧ. ਸ. ਅਟ੍ਠ. ੫੬੮) ‘‘ਤੇਸਂ ਞਾਣਾਨਂ ਚਿਣ੍ਣਪਰਿਯਨ੍ਤੇ ਇਦਂ ਚਿਤ੍ਤਂ ਉਪ੍ਪਜ੍ਜਤੀ’’ਤਿ ਵੁਤ੍ਤਂ. ਅਵਸ੍ਸਞ੍ਚੇਤਂ ਏਵਂ ਇਚ੍ਛਿਤਬ੍ਬਂ, ਅਞ੍ਞਥਾ ਆਵਜ੍ਜਨਚਿਤ੍ਤਸ੍ਸਪਿ ਭਗਵਤੋ ਤਥਾਰੂਪੇ ਕਾਲੇ ਨ ਯੁਜ੍ਜੇਯ੍ਯ. ਤਸ੍ਸਪਿ ਹਿ ਵਿਞ੍ਞਤ੍ਤਿਸਮੁਟ੍ਠਾਪਕਭਾਵਸ੍ਸ ਨਿਚ੍ਛਿਤਤ੍ਤਾ. ਤਥਾ ਹਿ ਵੁਤ੍ਤਂ ‘‘ਏਵਞ੍ਚ ਕਤ੍ਵਾ ਮਨੋਦ੍ਵਾਰਾਵਜ੍ਜਨਸ੍ਸਪਿ ਵਿਞ੍ਞਤ੍ਤਿਸਮੁਟ੍ਠਾਪਕਤ੍ਤਂ ਉਪਪਨ੍ਨਂ ਹੋਤੀ’’ਤਿ (ਧ. ਸ. ਮੂਲਟੀ. ੧ ਕਾਯਕਮ੍ਮਦ੍ਵਾਰਕਥਾਵਣ੍ਣਨਾ) ਨ ਚ ਵਿਞ੍ਞਤ੍ਤਿਸਮੁਟ੍ਠਾਪਕਤ੍ਤੇ ਤਂਸਮੁਟ੍ਠਾਨਕਾਯਵਿਞ੍ਞਤ੍ਤਿਯਾ ਕਾਯਕਮ੍ਮਾਦਿਭਾਵਂ ਆਪਜ੍ਜਨਭਾਵੋ ਵਿਸ੍ਸਜ੍ਜਤੀਤਿ.

ਹਸਿਤਨ੍ਤਿ ਸਿਤਮੇਵ ਸਨ੍ਧਾਯ ਵਦਤਿ. ਤੇਨਾਹ ‘‘ਏਵਂ ਅਪ੍ਪਮਤ੍ਤਕਮ੍ਪੀ’’ਤਿ. ਸਮੋਸਰਿਤਾ ਵਿਜ੍ਜੁਲਤਾ. ਸਾ ਹਿ ਇਤਰਵਿਜ੍ਜੁਲਤਾ ਵਿਯ ਖਣਟ੍ਠਿਤਿਯਾ ਸੀਘਨਿਰੋਧਾ ਚ ਨ ਹੋਤਿ, ਅਪਿਚ ਖੋ ਦਨ੍ਧਨਿਰੋਧਾ, ਨ ਚ ਸਬ੍ਬਕਾਲਿਕਾ. ਦੀਧਿਤਿ ਪਾਵਕਮਹਾਮੇਘਤੋ ਵਾ ਚਾਤੁਦ੍ਦੀਪਿਕਮਹਾਮੇਘਤੋ ਵਾ ਨਿਚ੍ਛਰਤਿ. ਤੇਨਾਹ ‘‘ਚਾਤੁਦ੍ਦੀਪਿਕਮਹਾਮੇਘਮੁਖਤੋ’’ਤਿ. ਅਯਂ ਕਿਰ ਤਾਸਂ ਰਸ੍ਮੀਨਂ ਧਮ੍ਮਤਾ, ਯਦਿਦਂ ਤਿਕ੍ਖਤ੍ਤੁਂ ਸੀਸਂ ਪਦਕ੍ਖਿਣਂ ਕਤ੍ਵਾ ਦਾਠਗ੍ਗੇਸੁਯੇਵ ਅਨ੍ਤਰਧਾਨਂ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਗਵੇਸੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਉਪਾਸਕਵਗ੍ਗਵਣ੍ਣਨਾ ਨਿਟ੍ਠਿਤਾ.