੧-੫. ਪਠਮਆਘਾਤਪਟਿਵਿਨਯਸੁਤ੍ਤਾਦਿਵਣ੍ਣਨਾ

੧੬੧-੧੬੫. ਦੁਤਿਯਸ੍ਸ ਪਠਮੇ ਨਤ੍ਥਿ ਵਤ੍ਤਬ੍ਬਂ. ਦੁਤਿਯੇ ਆਘਾਤੋ ਪਟਿਵਿਨਯਤਿ ਏਤ੍ਥ, ਏਤੇਹੀਤਿ ਵਾ ਆਘਾਤਪਟਿਵਿਨਯਾ. ਤੇਨਾਹ ‘‘ਆਘਾਤੋ ਏਤੇਹਿ ਪਟਿਵਿਨੇਤਬ੍ਬੋ’’ਤਿਆਦਿ.

ਨਨ੍ਤਕਨ੍ਤਿ ਅਨਨ੍ਤਕਂ, ਅਨ੍ਤਵਿਰਹਿਤਂ ਵਤ੍ਥਖਣ੍ਡਂ. ਯਦਿ ਹਿ ਤਸ੍ਸ ਅਨ੍ਤੋ ਭਵੇਯ੍ਯ, ‘‘ਪਿਲੋਤਿਕਾ’’ਤਿ ਸਙ੍ਖਂ ਨ ਗਚ੍ਛੇਯ੍ਯ.

ਸੇਵਾਲੇਨਾਤਿ ਬੀਜਕਣ੍ਣਿਕਕੇਸਰਾਦਿਭੇਦੇਨ ਸੇਵਾਲੇਨ. ਉਦਕਪਪ੍ਪਟਕੇਨਾਤਿ ਨੀਲਮਣ੍ਡੂਕਪਿਟ੍ਠਿਵਣ੍ਣੇਨ ਉਦਕਪਿਟ੍ਠਿਂ ਛਾਦੇਤ੍ਵਾ ਨਿਬ੍ਬਤ੍ਤੇਨ ਉਦਕਪਿਟ੍ਠਿਕੇਨ. ਘਮ੍ਮੇਨ ਅਨੁਗਤੋਤਿ ਘਮ੍ਮੇਨ ਫੁਟ੍ਠੋ ਅਭਿਭੂਤੋ. ਚਿਤ੍ਤੁਪ੍ਪਾਦਨ੍ਤਿ ਪਟਿਘਸਮ੍ਪਯੁਤ੍ਤਚਿਤ੍ਤੁਪ੍ਪਾਦਂ.

ਵਿਸਭਾਗਵੇਦਨੁਪ੍ਪਤ੍ਤਿਯਾ ਕਕਚੇਨੇਵ ਇਰਿਯਾਪਥਪਵਤ੍ਤਿਨਿਵਾਰਣੇਨ ਛਿਨ੍ਦਨ੍ਤੋ ਆਬਾਧਤਿ ਪੀਲ਼ੇਤੀਤਿ ਆਬਾਧੋ, ਸੋ ਅਸ੍ਸ ਅਤ੍ਥੀਤਿ ਆਬਾਧਿਕੋ. ਤਂਸਮੁਟ੍ਠਾਨੇਨ ਦੁਕ੍ਖਿਤੋ ਸਞ੍ਜਾਤਦੁਕ੍ਖੋ. ਬਾਲ਼੍ਹਗਿਲਾਨੋਤਿ ਅਧਿਮਤ੍ਤਗਿਲਾਨੋ. ਗਾਮਨ੍ਤਨਾਯਕਸ੍ਸਾਤਿ ਗਾਮਨ੍ਤਸਮ੍ਪਾਪਕਸ੍ਸ.

ਪਸਨ੍ਨਭਾਵੇਨ ਉਦਕਸ੍ਸ ਅਚ੍ਛਭਾਵੋ ਵੇਦਿਤਬ੍ਬੋਤਿ ਆਹ ‘‘ਅਚ੍ਛੋਦਕਾਤਿ ਪਸਨ੍ਨੋਦਕਾ’’ਤਿ. ਸਾਦੁਰਸਤਾਯ ਸਾਤਤਾਤਿ ਆਹ ‘‘ਮਧੁਰੋਦਕਾ’’ਤਿ. ਤਨੁਕਮੇਵ ਸਲਿਲਂ ਵਿਸੇਸਤੋ ਸੀਤਲਂ, ਨ ਬਹਲਾਤਿ ਆਹ ‘‘ਤਨੁਸੀਤਸਲਿਲਾ’’ਤਿ. ਸੇਤਕਾਤਿ ਨਿਕ੍ਕਦ੍ਦਮਾ. ਸਚਿਕ੍ਖਲ੍ਲਾਦਿਵਸੇਨ ਹਿ ਉਦਕਸ੍ਸ ਵਿਵਣ੍ਣਤਾ. ਸਭਾਵਤੋ ਪਨ ਤਂ ਸੇਤਵਣ੍ਣਮੇਵ. ਤਤਿਯਾਦੀਨਿ ਉਤ੍ਤਾਨਤ੍ਥਾਨੇਵ.

ਪਠਮਆਘਾਤਪਟਿਵਿਨਯਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.