(੧੫) ੫. ਤਿਕਣ੍ਡਕੀਵਗ੍ਗੋ
੧. ਅਵਜਾਨਾਤਿਸੁਤ੍ਤਵਣ੍ਣਨਾ
੧੪੧. ਪਞ੍ਚਮਸ੍ਸ ਪਠਮੇ ਦਤ੍ਵਾ ਅਵਜਾਨਾਤੀਤਿ ਏਤ੍ਥ ਏਕੋ ਭਿਕ੍ਖੁ ਮਹਾਪੁਞ੍ਞੋ ਚਤੁਪਚ੍ਚਯਲਾਭੀ ਹੋਤਿ, ਸੋ ਚੀਵਰਾਦੀਨਿ ਲਭਿਤ੍ਵਾ ਅਞ੍ਞਂ ਅਪ੍ਪਪੁਞ੍ਞਂ ਆਪੁਚ੍ਛਤਿ. ਸੋਪਿ ਤਸ੍ਮਿਂ ਪੁਨਪ੍ਪੁਨਂ ਆਪੁਚ੍ਛਨ੍ਤੇਪਿ ਗਣ੍ਹਾਤਿਯੇਵ. ਅਥਸ੍ਸ ਇਤਰੋ ਥੋਕਂ ਕੁਪਿਤੋ ਹੁਤ੍ਵਾ ਮਙ੍ਕੁਭਾਵਂ ਉਪ੍ਪਾਦੇਤੁਕਾਮੋ ਵਦਤਿ ‘‘ਅਯਂ ਅਤ੍ਤਨੋ ਧਮ੍ਮਤਾਯ ਚੀਵਰਾਦੀਨਿ ਨ ਲਭਤਿ, ਅਮ੍ਹੇ ਨਿਸ੍ਸਾਯ ਲਭਤੀ’’ਤਿ. ਏਵਮ੍ਪਿ ਦਤ੍ਵਾ ਅਵਜਾਨਾਤਿ ਨਾਮ. ਏਕੋ ਪਨ ਏਕੇਨ ਸਦ੍ਧਿਂ ਦ੍ਵੇ ਤੀਣਿ ਵਸ੍ਸਾਨਿ ਵਸਨ੍ਤੋ ਪੁਬ੍ਬੇ ਤਂ ਪੁਗ੍ਗਲਂ ਗਰੁਂ ਕਤ੍ਵਾ ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਚਿਤ੍ਤੀਕਾਰਂ ਨ ਕਰੋਤਿ, ਆਸਨਨਿਸਿਨ੍ਨਟ੍ਠਾਨਮ੍ਪਿ ਨ ਗਚ੍ਛਤਿ. ਅਯਮ੍ਪਿ ਪੁਗ੍ਗਲੋ ਸਂਵਾਸੇਨ ਅਵਜਾਨਾਤਿ ਨਾਮ. ਆਧੇਯ੍ਯਮੁਖੋਤਿ ਆਦਿਤੋ ਧੇਯ੍ਯਮੁਖੋ, ਪਠਮਵਚਨਸ੍ਮਿਂਯੇਵ ਠਪਿਤਮੁਖੋਤਿ ਅਤ੍ਥੋ. ਤਤ੍ਥਾਯਂ ਨਯੋ – ਏਕੋ ਪੁਗ੍ਗਲੋ ਸਾਰੁਪ੍ਪਂਯੇਵ ਭਿਕ੍ਖੁਂ ‘‘ਅਸਾਰੁਪ੍ਪੋ ਏਸੋ’’ਤਿ ਕਥੇਤਿ. ਤਂ ਸੁਤ੍ਵਾ ਏਸ ਨਿਟ੍ਠਂ ਗਚ੍ਛਤਿ, ਪੁਨ ਅਞ੍ਞੇਨ ਸਭਾਗੇਨ ਭਿਕ੍ਖੁਨਾ ‘‘ਸਾਰੁਪ੍ਪੋ ਅਯ’’ਨ੍ਤਿ ਵੁਤ੍ਤੇਪਿ ਤਸ੍ਸ ਵਚਨਂ ਨ ਗਣ੍ਹਾਤਿ. ਅਸੁਕੇਨ ਨਾਮ ‘‘ਅਸਾਰੁਪ੍ਪੋ ਅਯ’’ਨ੍ਤਿ ਅਮ੍ਹਾਕਂ ਕਥਿਤਨ੍ਤਿ ਪੁਰਿਮਭਿਕ੍ਖੁਨੋਵ ਕਥਂ ਗਣ੍ਹਾਤਿ. ਅਪਰੋਪਿਸ੍ਸ ਦੁਸ੍ਸੀਲਂ ‘‘ਸੀਲਵਾ’’ਤਿ ਕਥੇਤਿ. ਤਸ੍ਸ ਵਚਨਂ ਸਦ੍ਦਹਿਤ੍ਵਾ ਪੁਨ ਅਞ੍ਞੇਨ ‘‘ਅਸਾਰੁਪ੍ਪੋ ਏਸੋ ਭਿਕ੍ਖੁ, ਨਾਯਂ ਤੁਮ੍ਹਾਕਂ ਸਨ੍ਤਿਕਂ ਉਪਸਙ੍ਕਮਿਤੁਂ ਯੁਤ੍ਤੋ’’ਤਿ ਵੁਤ੍ਤੇਪਿ ਤਸ੍ਸ ਵਚਨਂ ਅਗ੍ਗਹੇਤ੍ਵਾ ਪੁਰਿਮਂਯੇਵ ਕਥਂ ਗਣ੍ਹਾਤਿ. ਅਪਰੋ ਵਣ੍ਣਮ੍ਪਿ ਕਥਿਤਂ ਗਣ੍ਹਾਤਿ, ਅਵਣ੍ਣਮ੍ਪਿ ਕਥਿਤਂ ਗਣ੍ਹਾਤਿਯੇਵ. ਅਯਮ੍ਪਿ ਆਧੇਯ੍ਯਮੁਖੋਯੇਵ ਨਾਮ ਆਧਾਤਬ੍ਬਮੁਖੋ, ਯਂ ਯਂ ਸੁਣਾਤਿ, ਤਤ੍ਥ ਤਤ੍ਥ ਠਪਿਤਮੁਖੋਤਿ ਅਤ੍ਥੋ.
ਲੋਲੋਤਿ ਸਦ੍ਧਾਦੀਨਂ ਇਤ੍ਤਰਕਾਲਪ੍ਪਤਿਤਤ੍ਤਾ ਅਸ੍ਸਦ੍ਧਿਯਾਦੀਹਿ ਲੁਲਿਤਭਾਵੇਨ ਲੋਲੋ. ਇਤ੍ਤਰਭਤ੍ਤੀਤਿਆਦੀਸੁ ਪੁਨਪ੍ਪੁਨਂ ਭਜਨੇਨ ਸਦ੍ਧਾਵ ਭਤ੍ਤਿਪੇਮਂ. ਸਦ੍ਧਾਪੇਮਮ੍ਪਿ ਗੇਹਸ੍ਸਿਤਪੇਮਮ੍ਪਿ ਵਟ੍ਟਤਿ, ਪਸਾਦੋ ਸਦ੍ਧਾਪਸਾਦੋ. ਏਵਂ ਪੁਗ੍ਗਲੋ ਲੋਲੋ ਹੋਤੀਤਿ ਏਵਂ ਇਤ੍ਤਰਸਦ੍ਧਾਦਿਤਾਯ ਪੁਗ੍ਗਲੋ ਲੋਲੋ ਨਾਮ ਹੋਤਿ. ਹਲਿਦ੍ਦਿਰਾਗੋ ਵਿਯ, ਥੁਸਰਾਸਿਮ੍ਹਿ ਕੋਟ੍ਟਿਤਖਾਨੁਕੋ ਵਿਯ, ਅਸ੍ਸਪਿਟ੍ਠਿਯਂ ਠਪਿਤਕੁਮ੍ਭਣ੍ਡਂ ਵਿਯ ਚ ਅਨਿਬਦ੍ਧਟ੍ਠਾਨੇ ਮੁਹੁਤ੍ਤੇਨ ਕੁਪ੍ਪਤਿ. ਮਨ੍ਦੋ ਮੋਮੂਹੋਤਿ ਅਞ੍ਞਾਣਭਾਵੇਨ ਮਨ੍ਦੋ, ਅਵਿਸਯਤਾਯ ਮੋਮੂਹੋ, ਮਹਾਮੂਲ਼੍ਹੋਤਿ ਅਤ੍ਥੋ.
ਅਵਜਾਨਾਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨-੩. ਆਰਭਤਿਸੁਤ੍ਤਾਦਿਵਣ੍ਣਨਾ
੧੪੨-੩. ਦੁਤਿਯੇ ਆਰਭਤੀਤਿ ਏਤ੍ਥ ਆਰਮ੍ਭ-ਸਦ੍ਦੋ ਕਮ੍ਮਕਿਰਿਯਹਿਂਸਨਵੀਰਿਯਕੋਪਨਾਪਤ੍ਤਿਵੀਤਿਕ੍ਕਮੇਸੁ ਵਤ੍ਤਤਿ. ਤਥਾ ਹੇਸ ‘‘ਯਂ ਕਿਞ੍ਚਿ ਦੁਕ੍ਖਂ ਸਮ੍ਭੋਤਿ, ਸਬ੍ਬਂ ਆਰਮ੍ਭਪਚ੍ਚਯਾ’’ਤਿ (ਸੁ. ਨਿ. ੭੪੯) ਕਮ੍ਮੇ ਆਗਤੋ. ‘‘ਮਹਾਰਮ੍ਭਾ ਮਹਾਯਞ੍ਞਾ, ਨ ਤੇ ਹੋਨ੍ਤਿ ਮਹਪ੍ਫਲਾ’’ਤਿ (ਸਂ. ਨਿ. ੧.੧੨੦; ਅ. ਨਿ. ੪.੩੯) ਕਿਰਿਯਾਯ. ‘‘ਸਮਣਂ ਗੋਤਮਂ ਉਦ੍ਦਿਸ੍ਸ ਪਾਣਂ ਆਰਭਨ੍ਤੀ’’ਤਿ (ਮ. ਨਿ. ੨.੫੧) ਹਿਂਸਨੇ. ‘‘ਆਰਮ੍ਭਥ ਨਿਕ੍ਖਮਥ, ਯੁਞ੍ਜਥ ਬੁਦ੍ਧਸਾਸਨੇ’’ਤਿ (ਸਂ. ਨਿ. ੧.੧੮੫; ਨੇਤ੍ਤਿ. ੨੯; ਪੇਟਕੋ. ੩੮; ਮਿ. ਪ. ੫.੧.੪) ਵੀਰਿਯੇ. ‘‘ਬੀਜਗਾਮਭੂਤਗਾਮਸਮਾਰਮ੍ਭਾ ਪਟਿਵਿਰਤੋ ਹੋਤੀ’’ਤਿ (ਦੀ. ਨਿ. ੧.੧੦, ੧੯੫; ਮ. ਨਿ. ੧.੨੯੩) ਕੋਪਨੇ. ‘‘ਆਰਭਤਿ ਚ ਵਿਪ੍ਪਟਿਸਾਰੀ ਚ ਹੋਤੀ’’ਤਿ (ਅ. ਨਿ. ੫.੧੪੨; ਪੁ. ਪ. ੧੯੧) ਅਯਂ ਪਨ ਆਪਤ੍ਤਿਵੀਤਿਕ੍ਕਮੇ ਆਗਤੋ, ਤਸ੍ਮਾ ਆਪਤ੍ਤਿਵੀਤਿਕ੍ਕਮਵਸੇਨ ਆਰਭਤਿ ਚੇਵ, ਤਪ੍ਪਚ੍ਚਯਾ ਚ ਵਿਪ੍ਪਟਿਸਾਰੀ ਹੋਤੀਤਿ ਅਯਮੇਤ੍ਥ ਅਤ੍ਥੋ. ਯਥਾਭੂਤਂ ਨਪ੍ਪਜਾਨਾਤੀਤਿ ਅਨਧਿਗਤਤ੍ਤਾ ਯਥਾਸਭਾਵਤੋ ਨ ਜਾਨਾਤਿ. ਯਤ੍ਥਸ੍ਸਾਤਿ ਯਸ੍ਮਿਂ ਅਸ੍ਸ, ਯਂ ਠਾਨਂ ਪਤ੍ਵਾ ਏਤਸ੍ਸ ਪੁਗ੍ਗਲਸ੍ਸ ਉਪ੍ਪਨ੍ਨਾ ਪਾਪਕਾ ਅਕੁਸਲਾ ਧਮ੍ਮਾ ਅਪਰਿਸੇਸਾ ਨਿਰੁਜ੍ਝਨ੍ਤੀਤਿ ਅਤ੍ਥੋ. ਕਿਂ ਪਨ ਪਤ੍ਵਾ ਤੇ ਨਿਰੁਜ੍ਝਨ੍ਤੀਤਿ? ਅਰਹਤ੍ਤਮਗ੍ਗਂ, ਫਲਪ੍ਪਤ੍ਤਸ੍ਸ ਪਨ ਨਿਰੁਦ੍ਧਾ ਨਾਮ ਹੋਨ੍ਤਿ. ਏਵਂ ਸਨ੍ਤੇਪਿ ਇਧ ਮਗ੍ਗਕਿਚ੍ਚਵਸੇਨ ਪਨ ਫਲਮੇਵ ਵੁਤ੍ਤਨ੍ਤਿ ਵੇਦਿਤਬ੍ਬਂ.
ਆਰਭਤੀ ਨ ਵਿਪ੍ਪਟਿਸਾਰੀ ਹੋਤੀਤਿ ਆਪਤ੍ਤਿਂ ਆਪਜ੍ਜਤਿ, ਤਂ ਪਨੇਸ ਦੇਸੇਤੁਂ ਸਭਾਗਪੁਗ੍ਗਲਂ ਪਰਿਯੇਸਤਿ, ਤਸ੍ਮਾ ਨ ਵਿਪ੍ਪਟਿਸਾਰੀ ਹੋਤਿ. ਨ ਆਰਭਤਿ ਵਿਪ੍ਪਟਿਸਾਰੀ ਹੋਤੀਤਿ ਆਪਤ੍ਤਿਂ ਨ ਆਪਜ੍ਜਤਿ, ਵਿਨਯਪਞ੍ਞਤ੍ਤਿਯਂ ਪਨ ਅਕੋਵਿਦਤ੍ਤਾ ਅਨਾਪਤ੍ਤਿਯਾ ਆਪਤ੍ਤਿਸਞ੍ਞੀ ਹੁਤ੍ਵਾ ਵਿਪ੍ਪਟਿਸਾਰੀ ਹੋਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ‘‘ਨ ਆਰਭਤਿ ਨ ਵਿਪ੍ਪਟਿਸਾਰੀ ਹੋਤੀ’’ਤਿ ਯੋ ਵੁਤ੍ਤੋ, ਕਤਰੋ ਸੋ ਪੁਗ੍ਗਲੋ? ਓਸ੍ਸਟ੍ਠਵੀਰਿਯਪੁਗ੍ਗਲੋ. ਸੋ ਹਿ ‘‘ਕਿਂ ਮੇ ਇਮਸ੍ਮਿਂ ਕਾਲੇ ਪਰਿਨਿਬ੍ਬਾਨੇਨ, ਅਨਾਗਤੇ ਮੇਤ੍ਤੇਯ੍ਯਸਮ੍ਮਾਸਮ੍ਬੁਦ੍ਧਕਾਲੇ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਵਿਸੁਦ੍ਧਸੀਲੋਪਿ ਪਟਿਪਤ੍ਤਿਂ ਨ ਪੂਰੇਤਿ. ਸੋ ਹਿ ‘‘ਕਿਮਤ੍ਥਂ ਆਯਸ੍ਮਾ ਪਮਤ੍ਤੋ ਵਿਹਰਤਿ, ਪੁਥੁਜ੍ਜਨਸ੍ਸ ਨਾਮ ਗਤਿ ਅਨਿਬਦ੍ਧਾ, ਤਸ੍ਮਾ ਹਿ ਮੇਤ੍ਤੇਯ੍ਯਸਮ੍ਮਾਸਮ੍ਬੁਦ੍ਧਸ੍ਸ ਸਮ੍ਮੁਖੀਭਾਵਂ ਲਭੇਯ੍ਯਾਸਿ, ਅਰਹਤ੍ਤਤ੍ਥਾਯ ਵਿਪਸ੍ਸਨਂ ਭਾਵੇਹੀ’’ਤਿ ਓਵਦਿਤਬ੍ਬੋਵ.
ਸਾਧੂਤਿ ਆਯਾਚਨਤ੍ਥੇ ਨਿਪਾਤੋ. ਇਦਂ ਵੁਤ੍ਤਂ ਹੋਤਿ – ਯਾਵ ਅਪਰਦ੍ਧਂ ਵਤ ਆਯਸ੍ਮਤਾ, ਏਵਂ ਸਨ੍ਤੇਪਿ ਮਯਂ ਆਯਸ੍ਮਨ੍ਤਂ ਯਾਚਾਮ, ਦੇਸੇਤਬ੍ਬਯੁਤ੍ਤਕਸ੍ਸ ਦੇਸਨਾਯ, ਵੁਟ੍ਠਾਤਬ੍ਬਯੁਤ੍ਤਕਸ੍ਸ ਵੁਟ੍ਠਾਨੇਨ, ਆਵਿਕਾਤਬ੍ਬਯੁਤ੍ਤਕਸ੍ਸ ਆਵਿਕਿਰਿਯਾਯ ਆਰਮ੍ਭਜੇ ਆਸਵੇ ਪਹਾਯ ਸੁਦ੍ਧਨ੍ਤੇ ਠਿਤਭਾਵਪਚ੍ਚਵੇਕ੍ਖਣੇਨ ਵਿਪ੍ਪਟਿਸਾਰਜੇ ਆਸਵੇ ਪਟਿਵਿਨੋਦੇਤ੍ਵਾ ਨੀਹਰਿਤ੍ਵਾ ਵਿਪਸ੍ਸਨਾਚਿਤ੍ਤਞ੍ਚੇਵ ਵਿਪਸ੍ਸਨਾਪਞ੍ਞਞ੍ਚ ਵਡ੍ਢੇਤੂਤਿ. ਅਮੁਨਾ ਪਞ੍ਚਮੇਨ ਪੁਗ੍ਗਲੇਨਾਤਿ ਏਤੇਨ ਪਞ੍ਚਮੇਨ ਖੀਣਾਸਵਪੁਗ੍ਗਲੇਨ. ਸਮਸਮੋ ਭਵਿਸ੍ਸਤੀਤਿ ਲੋਕੁਤ੍ਤਰਗੁਣੇਹਿ ਸਮਭਾਵੇਨੇਵ ਸਮੋ ਭਵਿਸ੍ਸਤੀਤਿ ਏਵਂ ਖੀਣਾਸਵੇਨ ਓਵਦਿਤਬ੍ਬੋਤਿ ਅਤ੍ਥੋ. ਤਤਿਯਂ ਉਤ੍ਤਾਨਮੇਵ.
ਆਰਭਤਿਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੪-੬. ਤਿਕਣ੍ਡਕੀਸੁਤ੍ਤਾਦਿਵਣ੍ਣਨਾ
੧੪੪-੬. ਚਤੁਤ੍ਥੇ ਪਟਿਕੂਲੇਤਿ ਅਮਨੁਞ੍ਞੇ ਅਨਿਟ੍ਠੇ. ਅਪ੍ਪਟਿਕੂਲਸਞ੍ਞੀਤਿ ਇਟ੍ਠਾਕਾਰੇਨੇਵ ਪਵਤ੍ਤਚਿਤ੍ਤੋ. ਇਟ੍ਠਸ੍ਮਿਂ ਵਤ੍ਥੁਸ੍ਮਿਂ ਅਸੁਭਾਯ ਵਾ ਫਰਤਿ, ਅਨਿਚ੍ਚਤੋ ਵਾ ਉਪਸਂਹਰਤਿ ਉਪਨੇਤਿ ਪਵਤ੍ਤੇਤਿ. ਅਨਿਟ੍ਠਸ੍ਮਿਂ ਵਤ੍ਥੁਸ੍ਮਿਨ੍ਤਿ ਅਨਿਟ੍ਠੇ ਸਤ੍ਤਸਞ੍ਞਿਤੇ ਆਰਮ੍ਮਣੇ. ਮੇਤ੍ਤਾਯ ਵਾ ਫਰਤੀਤਿ ਮੇਤ੍ਤਂ ਹਿਤੇਸਿਤਂ ਉਪਸਂਹਰਨ੍ਤੋ ਸਬ੍ਬਤ੍ਥਕਮੇਵ ਵਾ ਤਤ੍ਥ ਫਰਤਿ. ਧਾਤੁਤੋ ਵਾ ਉਪਸਂਹਰਤੀਤਿ ਧਮ੍ਮਸਭਾਵਚਿਨ੍ਤਨੇਨ ਧਾਤੁਤੋ ਪਚ੍ਚਵੇਕ੍ਖਣਾਯ ਧਾਤੁਮਨਸਿਕਾਰਂ ਵਾ ਤਤ੍ਥ ਪਵਤ੍ਤੇਤਿ. ਤਦੁਭਯਂ ਅਭਿਨਿਵਜ੍ਜੇਤ੍ਵਾਤਿ ਸਭਾਵਤੋ ਆਨੁਭਾਵਤੋ ਚ ਉਪਤਿਟ੍ਠਨ੍ਤਂ ਆਰਮ੍ਮਣੇ ਪਟਿਕੂਲਭਾਵਂ ਅਪ੍ਪਟਿਕੂਲਭਾਵਞ੍ਚਾਤਿ ਤਂ ਉਭਯਂ ਪਹਾਯ ਅਗ੍ਗਹੇਤ੍ਵਾ, ਸਬ੍ਬਸ੍ਮਿਂ ਪਨ ਤਸ੍ਮਿਂ ਮਜ੍ਝਤ੍ਤੋ ਹੁਤ੍ਵਾਤਿ ਵੁਤ੍ਤਂ ਹੋਤਿ. ਮਜ੍ਝਤ੍ਤੋ ਹੁਤ੍ਵਾ ਵਿਹਰਿਤੁਕਾਮੋ ਪਨ ਕਿਂ ਕਰੋਤੀਤਿ? ਇਟ੍ਠਾਨਿਟ੍ਠੇਸੁ ਆਪਾਥਂ ਗਤੇਸੁ ਨੇਵ ਸੋਮਨਸ੍ਸਿਤੋ ਹੋਤਿ, ਨ ਦੋਮਨਸ੍ਸਿਤੋ ਹੋਤਿ. ਉਪੇਕ੍ਖਕੋ ਵਿਹਰੇਯ੍ਯਾਤਿ ਇਟ੍ਠੇ ਅਰਜ੍ਜਨ੍ਤੋ ਅਨਿਟ੍ਠੇ ਅਦੁਸ੍ਸਨ੍ਤੋ ਯਥਾ ਅਞ੍ਞੇ ਅਸਮਪੇਕ੍ਖਨੇਨ ਮੋਹਂ ਉਪ੍ਪਾਦੇਨ੍ਤਿ, ਏਵਂ ਅਨੁਪ੍ਪਾਦੇਨ੍ਤੋ ਛਸੁ ਆਰਮ੍ਮਣੇਸੁ ਛਲ਼ਙ੍ਗੁਪੇਕ੍ਖਾਯ ਉਪੇਕ੍ਖਕੋ ਵਿਹਰੇਯ੍ਯ. ਤੇਨੇਵਾਹ ‘‘ਛਲ਼ਙ੍ਗੁਪੇਕ੍ਖਾਵਸੇਨ ਪਞ੍ਚਮੋ’’ਤਿ. ਇਟ੍ਠਾਨਿਟ੍ਠਛਲ਼ਾਰਮ੍ਮਣਾਪਾਥੇ ਪਰਿਸੁਦ੍ਧਪਕਤਿਭਾਵਾਵਿਜਹਨਲਕ੍ਖਣਾਯ ਛਸੁ ਦ੍ਵਾਰੇਸੁ ਪਵਤ੍ਤਨਤੋ ‘‘ਛਲ਼ਙ੍ਗੁਪੇਕ੍ਖਾ’’ਤਿ ਲਦ੍ਧਨਾਮਾਯ ਤਤ੍ਰਮਜ੍ਝਤ੍ਤੁਪੇਕ੍ਖਾਯ ਵਸੇਨ ਪਞ੍ਚਮੋ ਵਾਰੋ ਵੁਤ੍ਤੋਤਿ ਅਤ੍ਥੋ. ਪਞ੍ਚਮਂ ਛਟ੍ਠਞ੍ਚ ਉਤ੍ਤਾਨਮੇਵ.
ਤਿਕਣ੍ਡਕੀਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੭-੧੦. ਅਸਪ੍ਪੁਰਿਸਦਾਨਸੁਤ੍ਤਾਦਿਵਣ੍ਣਨਾ
੧੪੭-੧੫੦. ਸਤ੍ਤਮੇ ਅਸਕ੍ਕਚ੍ਚਨ੍ਤਿ ਅਨਾਦਰਂ ਕਤ੍ਵਾ. ਦੇਯ੍ਯਧਮ੍ਮਸ੍ਸ ਅਸਕ੍ਕਚ੍ਚਕਰਣਂ ਨਾਮ ਅਸਮ੍ਪਨ੍ਨਂ ਕਰੋਤੀਤਿ ਆਹ ‘‘ਨ ਸਕ੍ਕਰਿਤ੍ਵਾ ਸੁਚਿਂ ਕਤ੍ਵਾ ਦੇਤੀ’’ਤਿ, ਉਤ੍ਤਣ੍ਡੁਲਾਦਿਦੋਸਵਿਰਹਿਤਂ ਸੁਚਿਸਮ੍ਪਨ੍ਨਂ ਕਤ੍ਵਾ ਨ ਦੇਤੀਤਿ ਅਤ੍ਥੋ. ਅਚਿਤ੍ਤੀਕਤ੍ਵਾਤਿ ਨ ਚਿਤ੍ਤੇ ਕਤ੍ਵਾ, ਨ ਪੂਜੇਤ੍ਵਾਤਿ ਅਤ੍ਥੋ. ਪੂਜੇਨ੍ਤੋ ਹਿ ਪੂਜੇਤਬ੍ਬਵਤ੍ਥੁਂ ਚਿਤ੍ਤੇ ਠਪੇਤਿ, ਨ ਤਤੋ ਬਹਿ ਕਰੋਤਿ. ਚਿਤ੍ਤਂ ਵਾ ਅਚ੍ਛਰਿਯਂ ਕਤ੍ਵਾ ਪਟਿਪਤ੍ਤਿਵਿਕਰਣਂ ਸਮ੍ਭਾਵਨਕਿਰਿਯਾ, ਤਪ੍ਪਟਿਕ੍ਖੇਪਤੋ ਅਚਿਤ੍ਤੀਕਰਣਂ ਅਸਮ੍ਭਾਵਨਕਿਰਿਯਾ. ਅਗਾਰਵੇਨ ਦੇਤੀਤਿ ਪੁਗ੍ਗਲੇ ਅਗਰੁਂ ਕਰੋਨ੍ਤੋ ਨਿਸੀਦਨਟ੍ਠਾਨੇ ਅਸਮ੍ਮਜ੍ਜਿਤ੍ਵਾ ਯਤ੍ਥ ਵਾ ਤਤ੍ਥ ਵਾ ਨਿਸੀਦਾਪੇਤ੍ਵਾ ਯਂ ਵਾ ਤਂ ਵਾ ਆਧਾਰਕਂ ਠਪੇਤ੍ਵਾ ਦਾਨਂ ਦੇਤਿ. ਅਸਹਤ੍ਥਾਤਿ ਨ ਅਤ੍ਤਨੋ ਹਤ੍ਥੇਨ ਦੇਤਿ, ਦਾਸਕਮ੍ਮਕਰੋਦੀਹਿ ਦਾਪੇਤਿ. ਅਪਵਿਦ੍ਧਂ ਦੇਤੀਤਿ ਅਨ੍ਤਰਾ ਅਪਵਿਦ੍ਧਂ ਵਿਚ੍ਛੇਦਂ ਕਤ੍ਵਾ ਦੇਤਿ. ਤੇਨਾਹ ‘‘ਨ ਨਿਰਨ੍ਤਰਂ ਦੇਤੀ’’ਤਿ. ਅਥ ਵਾ ਅਪਵਿਦ੍ਧਂ ਦੇਤੀਤਿ ਉਚ੍ਛਿਟ੍ਠਾਦਿਛਡ੍ਡਨੀਯਧਮ੍ਮਂ ਵਿਯ ਅਵਕ੍ਖਿਤ੍ਤਕਂ ਕਤ੍ਵਾ ਦੇਤਿ. ਤੇਨਾਹ ‘‘ਛਡ੍ਡੇਤੁਕਾਮੋ ਵਿਯ ਦੇਤੀ’’ਤਿ. ‘‘ਅਦ੍ਧਾ ਇਮਸ੍ਸ ਦਾਨਸ੍ਸ ਫਲਮੇਵ ਆਗਚ੍ਛਤੀ’’ਤਿ ਏਵਂ ਯਸ੍ਸ ਕਮ੍ਮਸ੍ਸਕਤਾਦਿਟ੍ਠਿ ਅਤ੍ਥਿ, ਸੋ ਆਗਮਨਦਿਟ੍ਠਿਕੋ, ਅਯਂ ਪਨ ਨ ਤਾਦਿਸੋਤਿ ਅਨਾਗਮਨਦਿਟ੍ਠਿਕੋ. ਤੇਨਾਹ ‘‘ਕਤਸ੍ਸ ਨਾਮ ਫਲਂ ਆਗਮਿਸ੍ਸਤੀ’’ਤਿਆਦਿ. ਅਟ੍ਠਮਾਦੀਸੁ ਨਤ੍ਥਿ ਵਤ੍ਤਬ੍ਬਂ.
ਅਸਪ੍ਪੁਰਿਸਦਾਨਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
ਤਿਕਣ੍ਡਕੀਵਗ੍ਗਵਣ੍ਣਨਾ ਨਿਟ੍ਠਿਤਾ.
ਤਤਿਯਪਣ੍ਣਾਸਕਂ ਨਿਟ੍ਠਿਤਂ.