੫. ਪਣ੍ਡਿਤਸੁਤ੍ਤਵਣ੍ਣਨਾ

੪੫. ਪਞ੍ਚਮੇ ਪਣ੍ਡਿਤਪਞ੍ਞਤ੍ਤਾਨੀਤਿ ਪਣ੍ਡਿਤੇਹਿ ਪਠਮਂ ਪਞ੍ਞਤ੍ਤਾਨਿ. ਕਥਿਤਾਨੀਤਿ ਸੇਯ੍ਯਸੋ ਕਥਿਤਾਨਿ. ਮਹਾਪੁਰਿਸੇਹੀਤਿ ਬੁਦ੍ਧਬੋਧਿਸਤ੍ਤੇਹਿ. ਕਰੁਣਾਤਿ ਕਰੁਣਾਚੇਤੋਵਿਮੁਤ੍ਤਿ ਵੁਤ੍ਤਾ. ਪੁਬ੍ਬਭਾਗੋਤਿ ਤਸ੍ਸ ਉਪਚਾਰੋ. ਦਮੋਤਿ ਇਨ੍ਦ੍ਰਿਯਸਂਵਰੋ ‘‘ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਦਮਨ’’ਨ੍ਤਿ ਕਤ੍ਵਾ. ਅਤ੍ਤਦਮਨਨ੍ਤਿ ਚਿਤ੍ਤਦਮਨਂ. ਪੁਣ੍ਣੋਵਾਦੇ (ਮ. ਨਿ. ੩.੩੯੬) ‘‘ਸਕ੍ਖਿਸ੍ਸਸਿ ਖੋ, ਤ੍ਵਂ ਪੁਣ੍ਣ, ਇਮਿਨਾ ਦਮੂਪਸਮੇਨਾ’’ਤਿ ਆਗਤਤ੍ਤਾ ਦਮੋਤਿ ਵੁਤ੍ਤਾ ਖਨ੍ਤਿਪਿ. ਆਲ਼ਵਕੇ ਆਲ਼ਵਕਸੁਤ੍ਤੇ (ਸਂ. ਨਿ. ੧.੨੪੬; ਸੁ. ਨਿ. ੧੯੦) ‘‘ਸਚ੍ਚਾ ਦਮਾ ਚਾਗਾ’’ਤਿ ਏਵਂ ਵੁਤ੍ਤਾ ਪਞ੍ਞਾਪਿ ਇਮਸ੍ਮਿਂ ਸੁਤ੍ਤੇ ‘‘ਦਮੋ’’ਤਿ ਵਤ੍ਤੁਂ ਵਟ੍ਟਤਿ. ਰਕ੍ਖਨਂ ਗੋਪਨਂ ਪਟਿਜਗ੍ਗਨਨ੍ਤਿ ਮਾਤਾਪਿਤੂਨਂ ਮਨੁਸ੍ਸਾਮਨੁਸ੍ਸਕਤੂਪਦ੍ਦਵਤੋ ਰਕ੍ਖਨਂ, ਬ੍ਯਾਧਿਆਦਿਅਨਤ੍ਥਤੋ ਗੋਪਨਂ, ਘਾਸਚ੍ਛਾਦਨਾਦੀਹਿ ਵੇਯ੍ਯਾਵਚ੍ਚਕਰਣੇਨ ਪਟਿਜਗ੍ਗਨਂ. ਸਨ੍ਤੋ ਨਾਮ ਸਬ੍ਬਕਿਲੇਸਦਰਥਪਰਿਲ਼ਾਹੂਪਸਮੇਨ ਉਪਸਨ੍ਤਕਾਯਵਚੀਸਮਾਚਾਰਤਾਯ ਚ. ਉਤ੍ਤਮਟ੍ਠੇਨ ਸਨ੍ਤਾਨਨ੍ਤਿ ਮਤ੍ਤੇਯ੍ਯਤਾਦੀਹਿ ਸੇਟ੍ਠਟ੍ਠੇਨ ਸਨ੍ਤਾਨਂ.

ਇਧ ਇਮੇਸਂਯੇਵ ਤਿਣ੍ਣਂ ਠਾਨਾਨਂ ਕਰਣੇਨਾਤਿ ਇਮਸ੍ਮਿਂ ਸੁਤ੍ਤੇ ਆਗਤਾਨਂ ਤਿਣ੍ਣਂ ਠਾਨਾਨਂ ਕਰਣੇਨ ਨਿਬ੍ਬਤ੍ਤਨੇਨ. ਏਤਾਨਿ…ਪੇ… ਕਾਰਣਾਨੀਤਿ ਮਾਤੁਪਟ੍ਠਾਨਂ ਪਿਤੁਪਟ੍ਠਾਨਨ੍ਤਿ ਏਤਾਨਿ ਦ੍ਵੇ ਉਤ੍ਤਮਪੁਰਿਸਾਨਂ ਕਾਰਣਾਨਿ. ਉਤ੍ਤਮਕਿਚ੍ਚਕਰਣੇਨ ਹਿ ਮਾਤਾਪਿਤੁਉਪਟ੍ਠਾਕਾ ‘‘ਉਤ੍ਤਮਪੁਰਿਸਾ’’ਤਿ ਵੁਤ੍ਤਾ. ਤੇਨਾਹ ‘‘ਮਾਤਾਪਿਤੁ…ਪੇ… ਵੁਤ੍ਤੋ’’ਤਿ. ਅਨੁਪਦ੍ਦਵਭਾਵੇਨ ਖੇਮਂ.

ਪਣ੍ਡਿਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.