੨. ਤਿਠਾਨਸੁਤ੍ਤਵਣ੍ਣਨਾ

੪੨. ਦੁਤਿਯੇ ਮਚ੍ਛਰਿਯਮੇਵ ਮਲਂ ਮਚ੍ਛਰਿਯਮਲਂ, ਚਿਤ੍ਤਸ੍ਸ ਮਲੀਨਸਭਾਵਾਪਾਦਨਤੋ ਵਿਗਤਂ ਮਚ੍ਛਰਿਯਮਲਂ ਏਤ੍ਥਾਤਿ ਵਿਗਤਮਚ੍ਛਰਿਯਮਲਂ. ਗੇਧਾਭਾਵੇਨ ਕੋਚਿ ਕਿਞ੍ਚਿ ਦੇਨ੍ਤੋਪਿ ਤਤ੍ਥ ਆਸਤ੍ਤਿਂ ਨ ਵਿਸ੍ਸਜ੍ਜੇਤਿ, ਅਯਂ ਪਨ ਨ ਤਾਦਿਸੋਤਿ ਆਹ ‘‘ਵਿਸ੍ਸਟ੍ਠਚਾਗੋ’’ਤਿ. ਮਲੀਨਹਤ੍ਥੋਵ ਚਿਤ੍ਤਵਿਸੁਦ੍ਧਿਯਾ ਅਭਾਵਤੋ. ਧੋਤਹਤ੍ਥੋਵ ਧੋਤਹਤ੍ਥੇਨ ਕਾਤਬ੍ਬਕਿਚ੍ਚਸਾਧਨਤੋ. ਤੇਨ ਵੁਤ੍ਤਂ – ‘‘ਚਿਤ੍ਤੇ ਸੁਦ੍ਧੇ ਵਿਸੁਜ੍ਝਨ੍ਤਿ, ਇਤਿ ਵੁਤ੍ਤਂ ਮਹੇਸਿਨਾ’’ਤਿ. ਯਾਚਿਤੁਂ ਯੁਤ੍ਤੋ ਯਾਚਕਾਨਂ ਮਨੋਰਥਪੂਰਣਤੋ. ਯਾਚਯੋਗੋ ਪਯੋਗਾਸਹੇਹਿ ਯਾਚਕੇਹਿ ਸੁਟ੍ਠੁ ਯੁਤ੍ਤਭਾਵਤੋ. ਤਂਸਮਙ੍ਗੀ ਏਵ ਤਤ੍ਥ ਰਤੋ ਨਾਮ, ਨ ਚਿਤ੍ਤਮਤ੍ਤੇਨੇਵਾਤਿ ਆਹ ‘‘ਦਾਨਂ…ਪੇ… ਰਤੋ ਨਾਮ ਹੋਤੀ’’ਤਿ.

‘‘ਉਚ੍ਚਾ, ਭਨ੍ਤੇ’’ਤਿ ਵਤ੍ਵਾ ਅਯਂ ਮਂ ਉਚ੍ਚਤੋ ਵਦਤੀਤਿ ਚਿਨ੍ਤੇਯ੍ਯਾਤਿ ਪੁਨ ‘‘ਨਾਤਿਉਚ੍ਚਾ ਤੁਮ੍ਹੇ’’ਤਿ ਆਹ, ਸਰੀਰੇਨਾਤਿ ਅਧਿਪ੍ਪਾਯੋ. ਮੇਚਕਵਣ੍ਣਸ੍ਸਾਤਿ ਨੀਲੋਭਾਸਸ੍ਸ. ਪੁਚ੍ਛੀਤਿ ਭਿਕ੍ਖੂ ਪੁਚ੍ਛਿ. ਭੂਮਿਯਂ ਲੇਖਂ ਲਿਖਨ੍ਤੋ ਅਚ੍ਛੀਤਿ ਪਠਮਂ ਮਞ੍ਚੇ ਨਿਪਜ੍ਜਿਤ੍ਵਾ ਉਟ੍ਠਾਯ ਭੂਮਿਯਂ ਲੇਖਂ ਲਿਖਨ੍ਤੋ ਅਚ੍ਛਿ ‘‘ਅਖੀਣਾਸਵੋਤਿ ਮਞ੍ਞਨਾ ਹੋਤੂ’’ਤਿ. ਤਥਾ ਹਿ ਰਾਜਾ ਖੀਣਾਸਵਸ੍ਸ ਨਾਮ…ਪੇ… ਨਿਵਤ੍ਤਿ. ਧਜਪਗ੍ਗਹਿਤਾਵਾਤਿ ਪਗ੍ਗਹਿਤਧਜਾਵ. ਸਿਲਾਚੇਤਿਯਟ੍ਠਾਨਨ੍ਤਿ ਥੂਪਾਰਾਮਸ੍ਸ ਚ ਮਹਾਚੇਤਿਯਸ੍ਸ ਚ ਅਨ੍ਤਰੇ ਸਿਲਾਯ ਕਤਚੇਤਿਯਟ੍ਠਾਨਂ. ਚੇਤਿਯਂ…ਪੇ… ਅਟ੍ਠਾਸਿ ਸਾਵਕਸ੍ਸ ਤਂ ਕੂਟਾਗਾਰਨ੍ਤਿ ਕਤ੍ਵਾ.

ਪਚ੍ਛਾਭਾਗੇਨਾਤਿ ਧਮ੍ਮਕਥਿਕਸ੍ਸ ਥੇਰਸ੍ਸ ਪਿਟ੍ਠਿਪਸ੍ਸੇਨ. ਗੋਨਸੋਤਿ ਮਣ੍ਡਲਸਪ੍ਪੋ. ਧਮ੍ਮਸ੍ਸਵਨਨ੍ਤਰਾਯ ਬਹੂਨਂ ਸਗ੍ਗਮਗ੍ਗਪ੍ਪਟਿਲਾਭਨ੍ਤਰਾਯੋ ਭਵੇਯ੍ਯਾਤਿ ਅਧਿਪ੍ਪਾਯੇਨ ‘‘ਧਮ੍ਮਸ੍ਸਵਨਨ੍ਤਰਾਯਂ ਨ ਕਰਿਸ੍ਸਾਮੀ’’ਤਿ ਚਿਨ੍ਤੇਸਿ. ਵਿਸਂ ਵਿਕ੍ਖਮ੍ਭੇਤ੍ਵਾਤਿ ਵਿਪਸ੍ਸਨਾਤੇਜੇਨ ਵਿਸਵੇਗਂ ਵਿਕ੍ਖਮ੍ਭੇਤ੍ਵਾ. ਗਾਥਾਸਹਸ੍ਸਨ੍ਤਿ ਗਾਥਾਸਹਸ੍ਸਵਨ੍ਤਂ. ਪਟ੍ਠਾਨਗਾਥਾਯਾਤਿ ਪਟ੍ਠਾਪਨਗਾਥਾਯ, ਆਦਿਗਾਥਾਯਾਤਿ ਅਤ੍ਥੋ. ਪਟ੍ਠਾਨ…ਪੇ… ਅਵਸਾਨਗਾਥਂ ਏਵ ਵਵਤ੍ਥਪੇਸਿ, ਨ ਦ੍ਵਿਨ੍ਨਂ ਅਨ੍ਤਰੇ ਵੁਤ੍ਤਂ ਕਿਲਨ੍ਤਕਾਯਤ੍ਤਾ. ਸਰਭਾਣਂ ਸਾਯਨ੍ਹਧਮ੍ਮਕਥਾ. ਪਗ੍ਗਣ੍ਹਾਤੀਤਿ ਪਚ੍ਚਕ੍ਖਂ ਕਰੋਨ੍ਤੀ ਗਣ੍ਹਾਤਿ, ਸਕ੍ਕਚ੍ਚਂ ਸੁਣਾਤੀਤਿ ਅਤ੍ਥੋ. ਧਮ੍ਮਕਥਨਦਿਵਸੇ ਧਮ੍ਮਕਥਿਕਾਨਂ ਅਕਿਲਮਨਤ੍ਥਂ ਸਦ੍ਧਾ ਉਪਾਸਕਾ ਸਿਨਿਦ੍ਧਭੋਜਨਂ ਮਧੁਪਾਨਕਞ੍ਚ ਦੇਨ੍ਤਿ ਸਰਸ੍ਸ ਮਧੁਰਭਾਵਾਯ ਸਪ੍ਪਿਮਧੁਕਤੇਲਾਦਿਞ੍ਚ ਭੇਸਜ੍ਜਂ. ਤੇਨਾਹ ‘‘ਅਰਿਯਵਂਸਂ ਕਥੇਸ੍ਸਾਮੀ’’ਤਿਆਦਿ. ਚਤੂਹਿ ਦਾਠਾਹਿ ਡਂਸਿਤ੍ਵਾਤਿ ਦਲ਼੍ਹਦਟ੍ਠਭਾਵਦਸ੍ਸਨਂ. ਚਰਿਸ੍ਸਾਮੀਤਿ ਸਮ੍ਮਾਨੇਸ੍ਸਾਮਿ, ਸਕ੍ਕਚ੍ਚਂ ਸੁਣਿਸ੍ਸਾਮੀਤਿ ਅਤ੍ਥੋ. ਨਿਮ੍ਮਥੇਤ੍ਵਾਤਿ ਨਿਮ੍ਮਦ੍ਦਿਤ੍ਵਾ, ਅਪਨੇਤ੍ਵਾਤਿ ਅਤ੍ਥੋ.

ਤਿਠਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.