੪. ਦੇਵਦੂਤਵਗ੍ਗੋ
੧. ਸਬ੍ਰਹ੍ਮਕਸੁਤ੍ਤਵਣ੍ਣਨਾ
੩੧. ਚਤੁਤ੍ਥਸ੍ਸ ਪਠਮੇ ਸਬ੍ਰਹ੍ਮਕਾਨੀਤਿ ਸਸੇਟ੍ਠਕਾਨਿ. ਯੇਸਨ੍ਤਿ ਯੇਸਂ ਕੁਲਾਨਂ. ਪੁਤ੍ਤਾਨਨ੍ਤਿ ਪੁਤ੍ਤੇਹਿ. ਪੂਜਿਤਸਦ੍ਦਯੋਗੇਨ ਹਿ ਇਦਂ ਕਰਣਤ੍ਥੇ ਸਾਮਿਵਚਨਂ. ਤੇਨਾਤਿ ਆਹਾਰਾਦਿਨਾ. ਪਟਿਜਗ੍ਗਿਤਾ ਗੋਪਿਤਾਤਿ ਯਥਾਕਾਲਂ ਤਸ੍ਸ ਤਸ੍ਸ ਦਾਤਬ੍ਬਸ੍ਸ ਦਾਨੇਨ ਵੇਯ੍ਯਾਵਚ੍ਚਸ੍ਸ ਚ ਕਰਣੇਨ ਪਟਿਜਗ੍ਗਿਤਾ ਚੇਵ ਉਪ੍ਪਨ੍ਨਾਨਤ੍ਥਪ੍ਪਹਰਣੇਨ ਗੋਪਿਤਾ ਚ ਹੋਨ੍ਤਿ. ਤੇਸਨ੍ਤਿ ਮਾਤਾਪਿਤੂਨਂ. ਬ੍ਰਹ੍ਮਾਦਿਭਾਵਸਾਧਨਤ੍ਥਨ੍ਤਿ ਤੇਸਂ ਗੁਣਾਨਂ ਅਤ੍ਥਿਤਾਯ ਲੋਕੇ ਬ੍ਰਹ੍ਮਾ ਨਾਮ ਵੁਚ੍ਚਤਿ, ਆਚਰਿਯੋ ਨਾਮ ਵੁਚ੍ਚਤਿ, ਆਹੁਨੇਯ੍ਯੋ ਨਾਮ ਵੁਚ੍ਚਤਿ, ਤੇ ਮਾਤਾਪਿਤੂਨਂ ਪੁਤ੍ਤਕਂ ਪਟਿਲਭਨ੍ਤੀਤਿ ਦਸ੍ਸਨਵਸੇਨ ਨੇਸਂ ਬ੍ਰਹ੍ਮਾਦਿਭਾਵਸਾਧਨਤ੍ਥਂ ‘‘ਬਹੁਕਾਰਾ’’ਤਿ, ਵਤ੍ਵਾ ਤਂ ਤੇਸਂ ਬਹੁਕਾਰਤਂ ਨਾਨਾਕਾਰਤੋ ਦਸ੍ਸੇਤੁਂ ‘‘ਆਪਾਦਕਾ’’ਤਿਆਦਿ ਵੁਤ੍ਤਂ. ਮਾਤਾਪਿਤਰੋ ਹਿ ਪੁਤ੍ਤਾਨਂ ਜੀਵਿਤਸ੍ਸ ਆਪਾਦਕਾ, ਸਰੀਰਸ੍ਸ ਪੋਸਕਾ, ਆਚਾਰਸਮਾਚਾਰਾਨਂ ਸਿਕ੍ਖਾਪਕਾ ਸਕਲਸ੍ਸਪਿ ਇਮਸ੍ਸ ਲੋਕਸ੍ਸ ਦਸ੍ਸੇਤਾਰੋ. ਤੇਨਾਹ ‘‘ਪੁਤ੍ਤਾਨਂ ਹੀ’’ਤਿਆਦਿ. ਇਟ੍ਠਾਰਮ੍ਮਣਂ ਤਾਵ ਤੇ ਦਸ੍ਸੇਨ੍ਤੁ, ਅਨਿਟ੍ਠਾਰਮ੍ਮਣਂ ਕਥਨ੍ਤਿ? ਤਮ੍ਪਿ ਦਸ੍ਸੇਤਬ੍ਬਮੇਵ ਵਜ੍ਜਨੀਯਭਾਵਜਾਨਾਪਨਤ੍ਥਂ.
ਅਵਿਜਹਿਤਾ ਹੋਨ੍ਤੀਤਿ ਤਾਸਂ ਭਾਵਨਾਯ ਬ੍ਰਹ੍ਮਾਨਂ ਬ੍ਰਹ੍ਮਲੋਕੇ ਉਪ੍ਪਨ੍ਨਤ੍ਤਾ ਅਵਿਜਹਿਤਾ ਹੋਨ੍ਤਿ ਭਾਵਨਾ. ਲੋਭਨੀਯਵਯਸ੍ਮਿਂ ਪਠਮਯੋਬ੍ਬਨੇ ਅਤਿਵਿਯ ਮੁਦੁਭਾਵਪ੍ਪਤ੍ਤਦਸ੍ਸਨਤ੍ਥਂ ਸਤਵਿਹਤਗ੍ਗਹਣਂ. ਪਾਟਿਯੇਕ੍ਕਨ੍ਤਿ ਵਿਸੁਂ. ਇਮਿਨਾ ਕਾਰਣੇਨਾਤਿ ਇਮਿਨਾ ਯਥਾਵੁਤ੍ਤੇਨ ਪੁਤ੍ਤੇਸੁ ਪਵਤ੍ਤਿਤੇਹਿ ਅਤਿਕ੍ਕਮੇਨ ਮੇਤ੍ਤਾਦਿਸਮੁਪ੍ਪਤ੍ਤਿਸਙ੍ਖਾਤੇਨ ਕਾਰਣੇਨ.
ਥਰੁਸਿਪ੍ਪਨ੍ਤਿ ਅਸਿਸਤ੍ਤਿਕੁਨ੍ਤਕਲਾਪਾਦਿਆਯੁਧਸਿਪ੍ਪਂ. ਮੁਦ੍ਦਾਗਣਨਾਤਿ ਅਙ੍ਗੁਲਿਸਂਕੋਚਨਾਦਿਨਾ ਹਤ੍ਥਮੁਦ੍ਦਾਯ ਗਣਨਾ. ਆਦਿਸਦ੍ਦੇਨ ਪਾਣਾਦੀਨਂ ਸਙ੍ਗਹੋ. ਪਚ੍ਛਾਚਰਿਯਾ ਨਾਮ ਮਾਤਾਪਿਤੂਨਂ ਸਨ੍ਤਿਕੇ ਉਗ੍ਗਹਿਤਗਹਟ੍ਠਵਤ੍ਤਸ੍ਸੇਵ ਪੁਗ੍ਗਲਸ੍ਸ ਯਥਾਸਕਂ ਹਤ੍ਥਾਚਰਿਯਾਦੀਨਂ ਸਿਪ੍ਪਗ੍ਗਾਹਾਪਨਨ੍ਤਿ ਕਤ੍ਵਾ ਸਬ੍ਬਪਠਮਂ ਆਚਰਿਯਾ ਨਾਮਾਤਿ ਯੋਜੇਤਬ੍ਬਂ. ਆਨੀਯ ਹੁਤਂ ਆਹੁਤਂ. ਪਕਾਰੇਹਿ ਹੁਤਂ ਪਾਹੁਤਂ. ਅਭਿਸਙ੍ਖਤਨ੍ਤਿ ਤਸ੍ਸੇਵ ਵੇਵਚਨਂ.
ਨਮੋ ਕਰੇਯ੍ਯਾਤਿ ਸਾਯਂ ਪਾਤਂ ਉਪਟ੍ਠਾਨਂ ਗਨ੍ਤ੍ਵਾ ‘‘ਇਦਂ ਮਯ੍ਹਂ ਉਤ੍ਤਮਪੁਞ੍ਞਕ੍ਖੇਤ੍ਤ’’ਨ੍ਤਿ ਨਮਕ੍ਕਾਰਂ ਕਰੇਯ੍ਯ. ਤਾਯ ਨਂ ਪਾਰਿਚਰਿਯਾਯਾਤਿ ਏਤ੍ਥ ਨਨ੍ਤਿ ਨਿਪਾਤਮਤ੍ਤਂ, ਯਥਾਵੁਤ੍ਤਪਰਿਚਰਣੇਨਾਤਿ ਅਤ੍ਥੋ. ਅਥ ਵਾ ਪਾਰਿਚਰਿਯਾਯਾਤਿ ਭਰਣਕਿਚ੍ਚਕਰਣਕੁਲਵਂਸਪ੍ਪਤਿਟ੍ਠਾਨਾਪਨਾਦਿਨਾ ਪਞ੍ਚਵਿਧਉਪਟ੍ਠਾਨੇਨ. ਵੁਤ੍ਤਞ੍ਹੇਤਂ –
‘‘ਪਞ੍ਚਹਿ ਖੋ, ਗਹਪਤਿਪੁਤ੍ਤ, ਠਾਨੇਹਿ ਪੁਤ੍ਤੇਨ ਪੁਰਤ੍ਥਿਮਾ ਦਿਸਾ ਮਾਤਾਪਿਤਰੋ ਪਚ੍ਚੁਪਟ੍ਠਾਤਬ੍ਬਾ – ‘ਭਤੋ ਨੇਸਂ ਭਰਿਸ੍ਸਾਮਿ, ਕਿਚ੍ਚਂ ਨੇਸਂ ਕਰਿਸ੍ਸਾਮਿ, ਕੁਲਵਂਸਂ ਠਪੇਸ੍ਸਾਮਿ, ਦਾਯਜ੍ਜਂ ਪਟਿਪਜ੍ਜਾਮਿ, ਅਥ ਵਾ ਪਨ ਪੇਤਾਨਂ ਕਾਲਕਤਾਨਂ ਦਕ੍ਖਿਣਂ ਅਨੁਪ੍ਪਦਸ੍ਸਾਮੀ’ਤਿ. ਇਮੇਹਿ ਖੋ, ਗਹਪਤਿਪੁਤ੍ਤ, ਪਞ੍ਚਹਿ ਠਾਨੇਹਿ ਪੁਤ੍ਤੇਨ ਪੁਰਤ੍ਥਿਮਾ ਦਿਸਾ ਮਾਤਾਪਿਤਰੋ ਪਚ੍ਚੁਪਟ੍ਠਿਤਾ ਪਞ੍ਚਹਿ ਠਾਨੇਹਿ ਪੁਤ੍ਤਂ ਅਨੁਕਮ੍ਪਨ੍ਤਿ, ਪਾਪਾ ਨਿਵਾਰੇਨ੍ਤਿ, ਕਲ੍ਯਾਣੇ ਨਿਵੇਸੇਨ੍ਤਿ, ਸਿਪ੍ਪਂ ਸਿਕ੍ਖਾਪੇਨ੍ਤਿ, ਪਤਿਰੂਪੇਨ ਦਾਰੇਨ ਸਂਯੋਜੇਨ੍ਤਿ, ਸਮਯੇ ਦਾਯਜ੍ਜਂ ਨਿਯ੍ਯਾਦੇਨ੍ਤੀ’’ਤਿ (ਦੀ. ਨਿ. ੩.੨੬੭).
ਅਪਿਚ ਯੋ ਮਾਤਾਪਿਤਰੋ ਤੀਸੁ ਵਤ੍ਥੂਸੁ ਅਭਿਪ੍ਪਸਨ੍ਨੇ ਕਤ੍ਵਾ ਸੀਲੇਸੁ ਵਾ ਪਤਿਟ੍ਠਾਪੇਤ੍ਵਾ ਪਬ੍ਬਜ੍ਜਾਯ ਵਾ ਨਿਯੋਜੇਤ੍ਵਾ ਉਪਟ੍ਠਹਤਿ, ਅਯਂ ਮਾਤਾਪਿਤੂਪਟ੍ਠਾਕਾਨਂ ਅਗ੍ਗੋਤਿ ਵੇਦਿਤਬ੍ਬੋ. ਸਾ ਪਨਾਯਂ ਪਾਰਿਚਰਿਯਾ ਪੁਤ੍ਤਸ੍ਸ ਉਭਯਲੋਕਹਿਤਸੁਖਾਵਹਾਤਿ ਤਂ ਦਸ੍ਸੇਤੁਂ ‘‘ਇਧੇਵ ਨਂ ਪਸਂਸਨ੍ਤਿ, ਪੇਚ੍ਚ ਸਗ੍ਗੇ ਪਮੋਦਤੀ’’ਤਿ ਵੁਤ੍ਤਂ. ਪਸਂਸਨ੍ਤੀਤਿ ‘‘ਅਯਂ ਪੁਗ੍ਗਲੋ ਮਤ੍ਤੇਯ੍ਯੋ ਪੇਤ੍ਤੇਯ੍ਯੋ ਸਗ੍ਗਸਂਵਤ੍ਤਨਿਯਂ ਪਟਿਪਦਂ ਪੂਰੇਤੀ’’ਤਿ ਇਧੇਵ ਨਂ ਪਸਂਸਨ੍ਤਿ. ਆਮੋਦਤਿ ਆਦਿਤੋ ਪਟ੍ਠਾਯ ਮੋਦਪ੍ਪਤ੍ਤਿਯਾ. ਪਮੋਦਤਿ ਨਾਨਪ੍ਪਕਾਰਮੋਦਸਮ੍ਪਵਤ੍ਤਿਯਾ.
ਸਬ੍ਰਹ੍ਮਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਆਨਨ੍ਦਸੁਤ੍ਤਵਣ੍ਣਨਾ
੩੨. ਦੁਤਿਯੇ ਤਥਾਜਾਤਿਕੋਤਿ ਤਥਾਸਭਾਵੋ. ਚਿਤ੍ਤੇਕਗ੍ਗਤਾਲਾਭੋਤਿ ਚਿਤ੍ਤੇਕਗ੍ਗਤਾਯ ਅਧਿਗਮੋ. ਰੂਪਮੇਵ ਕਿਲੇਸੁਪ੍ਪਤ੍ਤਿਯਾ ਕਾਰਣਭਾਵਤੋ ਰੂਪਨਿਮਿਤ੍ਤਂ. ਏਸ ਨਯੋ ਸੇਸੇਸੁਪਿ. ਸਸ੍ਸਤਾਦਿਨਿਮਿਤ੍ਤਨ੍ਤਿ ਸਸ੍ਸਤੁਚ੍ਛੇਦਭਾਵਨਿਮਿਤ੍ਤਂ. ਪੁਗ੍ਗਲਨਿਮਿਤ੍ਤਨ੍ਤਿ ਪੁਗ੍ਗਲਾਭਿਨਿਵੇਸਨਨਿਮਿਤ੍ਤਂ. ਧਮ੍ਮਨਿਮਿਤ੍ਤਨ੍ਤਿ ਧਮ੍ਮਾਰਮ੍ਮਣਸਙ੍ਖਾਤਂ ਨਿਮਿਤ੍ਤਂ. ‘‘ਸਿਯਾ ਨੁ ਖੋ, ਭਨ੍ਤੇ’’ਤਿ ਥੇਰੇਨ ਪੁਟ੍ਠੋ ਭਗਵਾ ‘‘ਸਿਯਾ’’ਤਿ ਅਵੋਚ ਲੋਕੁਤ੍ਤਰਸਮਾਧਿਪ੍ਪਟਿਲਾਭਂ ਸਨ੍ਧਾਯ. ਸੋ ਹਿ ਨਿਬ੍ਬਾਨਂ ਸਨ੍ਤਂ ਪਣੀਤਨ੍ਤਿ ਚ ਪਸ੍ਸਤਿ. ਤੇਨਾਹ ‘‘ਇਧਾਨਨ੍ਦਾ’’ਤਿਆਦਿ.
ਨਿਬ੍ਬਾਨਂ ਸਨ੍ਤਨ੍ਤਿ ਸਮਾਪਤ੍ਤਿਂ ਅਪ੍ਪੇਤ੍ਵਾਤਿ ਨਿਬ੍ਬਾਨਂ ਸਨ੍ਤਨ੍ਤਿ ਆਭੁਜਿਤ੍ਵਾ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ. ਦਿਵਸਮ੍ਪੀਤਿਆਦਿਨਾ ਅਸਙ੍ਖਤਾਯ ਧਾਤੁਯਾ ਅਚ੍ਚਨ੍ਤਸਨ੍ਤਪਣੀਤਾਦਿਭਾਵਂ ਦਸ੍ਸੇਤਿ. ਅਟ੍ਠਵਿਧੇਤਿ ‘‘ਸਨ੍ਤਂ ਪਣੀਤਂ ਸਬ੍ਬਸਙ੍ਖਾਰਸਮਥੋ ਸਬ੍ਬੂਪਧਿਪਟਿਨਿਸ੍ਸਗ੍ਗੋ ਤਣ੍ਹਾਕ੍ਖਯੋ ਵਿਰਾਗੋ ਨਿਰੋਧੋ ਨਿਬ੍ਬਾਨ’’ਨ੍ਤਿ ਏਵਂ ਅਟ੍ਠਵਿਧੇ ਆਭੋਗਸਞ੍ਞਿਤੇ ਸਮਨ੍ਨਾਹਾਰੇ. ਨਿਦ੍ਧਾਰਣੇ ਚੇਤਂ ਭੁਮ੍ਮਂ. ਇਮਸ੍ਮਿਂ ਠਾਨੇ…ਪੇ… ਲਬ੍ਭਨ੍ਤੇਵਾਤਿ ‘‘ਇਧਾਨਨ੍ਦ, ਭਿਕ੍ਖੁਨੋ ਏਵਂ ਹੋਤੀ’’ਤਿ ਆਗਤੇ ਇਮਸ੍ਮਿਂ ਸੁਤ੍ਤਪ੍ਪਦੇਸੇ ਏਕੋਪਿ ਆਭੋਗਸਮਨ੍ਨਾਹਾਰੋ ਚੇਪਿ ਸਬ੍ਬੇ ਅਟ੍ਠਪਿ ਆਭੋਗਸਮਨ੍ਨਾਹਾਰਾ ਲਬ੍ਭਨ੍ਤੇਵ ਸਮਨ੍ਨਾਹਰਤਂ ਅਤ੍ਥਾਵਹਤ੍ਤਾ.
ਞਾਣੇਨ ਜਾਨਿਤ੍ਵਾਤਿ ਵਿਪਸ੍ਸਨਾਞਾਣਸਹਿਤੇਨ ਮਗ੍ਗਞਾਣੇਨ ਜਾਨਿਤ੍ਵਾ. ਪਰਾਨਿ ਚ ਓਪਰਾਨਿ ਚ ਚਕ੍ਖਾਦੀਨਿ ਆਯਤਨਾਨਿ. ਸਨ੍ਤਤਾਯਾਤਿ ਪਟਿਪ੍ਪਸ੍ਸਦ੍ਧਿਤਾਯ. ਕਾਯਦੁਚ੍ਚਰਿਤਾਦਿਧੂਮਵਿਰਹਿਤੋਤਿ ਕਾਯਦੁਚ੍ਚਰਿਤਾਦਿ ਏਵ ਸਨ੍ਤਾਪਨਟ੍ਠੇਨ ਧੂਮੋ, ਤੇਨ ਵਿਰਹਿਤੋ. ਅਨੀਘੋਤਿ ਅਪਾਪੋ. ਜਾਤਿਜਰਾਗਹਣੇਨੇਵ ਬ੍ਯਾਧਿਮਰਣਮ੍ਪਿ ਗਹਿਤਮੇਵਾਤਿ ਤਬ੍ਭਾਵਭਾਵਤੋਤਿ ਵੁਤ੍ਤਂ.
ਆਨਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਸਾਰਿਪੁਤ੍ਤਸੁਤ੍ਤਵਣ੍ਣਨਾ
੩੩. ਤਤਿਯੇ, ‘‘ਸਾਰਿਪੁਤ੍ਤ, ਮਯਾ ਸਂਖਿਤ੍ਤੇਨ ਦੇਸਿਤਂ ਧਮ੍ਮਂ ਤਾਦਿਸੇਨਪਿ ਨ ਸੁਕਰਂ ਵਿਞ੍ਞਾਤੁ’’ਨ੍ਤਿ ਇਮਿਨਾ ਅਧਿਪ੍ਪਾਯੇਨੇਵ ਵਦਨ੍ਤੋ ਥੇਰਸ੍ਸ ਞਾਣਂ ਸਬ੍ਬਮਤਿਕ੍ਕਮਂ. ਅਞ੍ਞਾਤਾਰੋ ਚ ਦੁਲ੍ਲਭਾਤਿ ਹਿ ਇਮਿਨਾ ਸਾਮਞ੍ਞਵਚਨੇਨ ਸਾਰਿਪੁਤ੍ਤਤ੍ਥੇਰਮ੍ਪਿ ਅਨ੍ਤੋਗਧਂ ਕਤ੍ਵਾ ਦਸ੍ਸੇਨ੍ਤੋ ਤੇਨਪਿ ਅਤ੍ਤਨੋ ਦੇਸਨਾਯ ਦੁਪ੍ਪਟਿਵਿਦ੍ਧਭਾਵਂ ਦਸ੍ਸੇਤਿ.
ਸਮ੍ਮਾਤਿ ਹੇਤੁਨਾ ਕਾਰਣੇਨ. ਤੇਨਾਹ ‘‘ਉਪਾਯੇਨਾ’’ਤਿਆਦਿ. ਮਾਨਾਭਿਸਮਯਾਤਿ ਮਾਨਸ੍ਸ ਦਸ੍ਸਨਾਭਿਸਮਯਾ. ਪਹਾਨਾਭਿਸਮਯੋਤਿ ਚ ਦਸ੍ਸਨਾਭਿਸਮਯੋਤਿ ਚ ਪਰਿਞ੍ਞਾਭਿਸਮਯੋ ਵੁਤ੍ਤੋ. ਅਰਹਤ੍ਤਮਗ੍ਗੋ ਹਿ ਪਰਿਞ੍ਞਾਕਿਚ੍ਚਸਿਦ੍ਧਿਯਾ ਕਿਚ੍ਚਵਸੇਨ ਮਾਨਂ ਪਸ੍ਸਤਿ, ਅਸਮ੍ਮੋਹਪ੍ਪਟਿਵੇਧਵਸੇਨਾਤਿ ਵੁਤ੍ਤਂ ਹੋਤਿ, ਅਯਮਸ੍ਸ ਦਸ੍ਸਨਾਭਿਸਮਯੋ. ਤੇਨ ਦਿਟ੍ਠੋ ਪਨ ਪਹਾਨਾਭਿਸਮਯੋ ਚ. ਦਸ੍ਸਨਾਭਿਸਮਯੇਨ ਹਿ ਪਰਿਞ੍ਞਾਭਿਸਮਯਮੇਵ ਪਹੀਯਤਿ. ਦਿਟ੍ਠਵਿਸੇਨ ਦਿਟ੍ਠਸਤ੍ਤਾਨਂ ਜੀਵਿਤਂ ਵਿਯ ਅਯਮਸ੍ਸ ਪਹਾਨਾਭਿਸਮਯੋ. ਅਟ੍ਠਕਥਾਯਂ ਪਨ ਪਹਾਨਾਭਿਸਮਯਸ੍ਸ ਦਸ੍ਸਨਾਭਿਸਮਯਨਾਨਨ੍ਤਰਿਯਕਤ੍ਤਾ ‘‘ਪਹਾਨਾਭਿਸਮਯੇਨ’’ਇਚ੍ਚੇਵ ਵੁਤ੍ਤਂ. ਪਹਾਨਾਭਿਸਮਯੇ ਹਿ ਗਹਿਤੇ ਦਸ੍ਸਨਾਭਿਸਮਯੋ ਗਹਿਤੋਵ ਹੋਤਿ.
ਅਨ੍ਤਮਕਾਸਿ ਦੁਕ੍ਖਸ੍ਸਾਤਿ ਅਰਹਤ੍ਤਮਗ੍ਗੇਨ ਮਾਨਸ੍ਸ ਪਹੀਨਤ੍ਤਾ ਯੇ ਇਮੇ ‘‘ਕਾਯਬਨ੍ਧਨਸ੍ਸ ਅਨ੍ਤੋ ਜੀਰਤਿ (ਚੂਲ਼ਵ. ੨੭੮), ਹਰਿਤਨ੍ਤਂ ਵਾ’’ਤਿ (ਮ. ਨਿ. ੧.੩੦੪) ਏਵਂ ਵੁਤ੍ਤਅਨ੍ਤਿਮਮਰਿਯਾਦਨ੍ਤੋ ਚ ‘‘ਅਨ੍ਤਮਿਦਂ, ਭਿਕ੍ਖਵੇ, ਜੀਵਿਕਾਨ’’ਨ੍ਤਿ (ਸਂ. ਨਿ. ੩.੮੦; ਇਤਿਵੁ. ੯੧) ਏਵਂ ਵੁਤ੍ਤਲਾਮਕਨ੍ਤੋ ਚ ‘‘ਸਕ੍ਕਾਯੋ ਏਕੋ ਅਨ੍ਤੋ’’ਤਿ (ਸਂ. ਨਿ. ੩.੧੦੩) ਏਵਂ ਵੁਤ੍ਤਕੋਟ੍ਠਾਸਨ੍ਤੋ ਚ ‘‘ਏਸੇਵਨ੍ਤੋ ਦੁਕ੍ਖਸ੍ਸ ਸਪਚ੍ਚਯਸਙ੍ਖਯਾ’’ਤਿ ਏਵਂ ਵੁਤ੍ਤਕੋਟ੍ਠਾਸਨ੍ਤੋ ਚਾਤਿ ਚਤ੍ਤਾਰੋ ਅਨ੍ਤਾ, ਤੇਸੁ ਸਬ੍ਬਸ੍ਸੇਵ ਵਟ੍ਟਦੁਕ੍ਖਸ੍ਸ ਅਦੁਂ ਚਤੁਤ੍ਥਕੋਟਿਸਙ੍ਖਾਤਂ ਅਨ੍ਤਮਕਾਸਿ, ਪਰਿਚ੍ਛੇਦਂ ਪਰਿਵਟੁਮਂ ਅਕਾਸਿ, ਅਨ੍ਤਿਮਸਮੁਦਯਮਤ੍ਤਾਵਸੇਸਂ ਦੁਕ੍ਖਮਕਾਸੀਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਵਟ੍ਟਦੁਕ੍ਖਸ੍ਸ ਅਨ੍ਤਮਕਾਸੀ’’ਤਿ.
ਨਨੁ ਚ ‘‘ਪਹਾਨ’’ਨ੍ਤਿ ਇਮਸ੍ਸ ਨਿਦ੍ਦੇਸੇ ਨਿਬ੍ਬਾਨਂ ਆਗਤਂ? ਇਧ ਪਟਿਪ੍ਪਸ੍ਸਦ੍ਧਿਪ੍ਪਹਾਨਸਙ੍ਖਾਤਂ ਅਰਹਤ੍ਤਫਲਂ ਵੁਤ੍ਤਂ, ਤਸ੍ਮਾ ਨਿਦ੍ਦੇਸੇਨਾਯਂ ਵਣ੍ਣਨਾ ਵਿਰੁਜ੍ਝਤੀਤਿ ਆਹ ‘‘ਨਿਦ੍ਦੇਸੇ ਪਨਾ’’ਤਿਆਦਿ. ਤਤ੍ਥ ਤਾਨਿ ਪਦਾਨਿ ਆਗਤਾਨੀਤਿ ਤਸ੍ਮਿਂ ਨਿਦ੍ਦੇਸੇ ‘‘ਪਹਾਨਂ ਵੂਪਸਮਂ ਪਟਿਨਿਸ੍ਸਗ੍ਗ’’ਨ੍ਤਿਆਦੀਨਿ (ਚੂਲ਼ਨਿ. ੭੫ ਉਦਯਮਾਣਵਪੁਚ੍ਛਾਨਿਦ੍ਦੇਸੋ) ਪਦਾਨਿ ਆਗਤਾਨਿ.
ਧਮ੍ਮਤਕ੍ਕਪੁਰੇਜਵਨ੍ਤਿ ਇਮਿਨਾ ਤਸ੍ਮਿਂ ਚਤੁਤ੍ਥਜ੍ਝਾਨਵਿਮੋਕ੍ਖੇ ਠਤ੍ਵਾ ਝਾਨਙ੍ਗਾਨਿ ਵਿਪਸ੍ਸਿਤ੍ਵਾ ਅਧਿਗਤਂ ਅਰਹਤ੍ਤਵਿਮੋਕ੍ਖਂ ਵਦਤਿ. ਅਰਹਤ੍ਤਵਿਮੋਕ੍ਖਸ੍ਸ ਹਿ ਮਗ੍ਗਸਮ੍ਪਯੁਤ੍ਤਸਮ੍ਮਾਸਙ੍ਕਪ੍ਪਸਙ੍ਖਾਤੋ ਧਮ੍ਮਤਕ੍ਕੋ ਪੁਰੇਜਵੋ ਹੋਤਿ.
ਸਾਰਿਪੁਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਨਿਦਾਨਸੁਤ੍ਤਵਣ੍ਣਨਾ
੩੪. ਚਤੁਤ੍ਥੇ ਪਿਣ੍ਡਕਰਣਤ੍ਥਾਯਾਤਿ ਆਯੂਹਨਵਸੇਨ ਰਾਸਿਕਰਣਤ੍ਥਾਯ. ਅਭਿਨ੍ਨਾਨੀਤਿ ਏਕਦੇਸੇਨਪਿ ਅਖਣ੍ਡਿਤਾਨਿ. ਭਿਨ੍ਨਕਾਲਤੋ ਪਟ੍ਠਾਯ ਹਿ ਬੀਜਂ ਬੀਜਕਿਚ੍ਚਾਯ ਨ ਉਪਕਪ੍ਪਤਿ. ਅਪੂਤੀਨੀਤਿ ਉਦਕਤੇਮਨੇਨ ਪੂਤਿਭਾਵਂ ਨ ਉਪਗਤਾਨਿ. ਪੂਤਿਬੀਜਞ੍ਹਿ ਬੀਜਤ੍ਥਾਯ ਨ ਉਪਕਪ੍ਪਤਿ. ਤੇਨਾਹ ‘‘ਪੂਤਿਭਾਵੇਨ ਅਬੀਜਤ੍ਤਂ ਅਪ੍ਪਤ੍ਤਾਨੀ’’ਤਿ. ਨ ਵਾਤੇਨ ਨ ਚ ਆਤਪੇਨ ਹਤਾਨੀਤਿ ਵਾਤੇਨ ਚ ਆਤਪੇਨ ਚ ਨ ਹਤਾਨਿ, ਨਿਰੋਜਤਂ ਨ ਪਾਪਿਤਾਨਿ. ਨਿਰੋਜਞ੍ਹਿ ਕਸਟਬੀਜਂ ਬੀਜਤ੍ਥਾਯ ਨ ਉਪਕਪ੍ਪਤਿ. ਸਾਰਾਦਾਨੀਤਿ ਤਣ੍ਡੁਲਸਾਰਸ੍ਸ ਆਦਾਨਤੋ ਸਾਰਾਦਾਨਿ. ਨਿਸ੍ਸਾਰਞ੍ਹਿ ਬੀਜਂ ਬੀਜਤ੍ਥਾਯ ਨ ਉਪਕਪ੍ਪਤਿ. ਤੇਨਾਹ ‘‘ਗਹਿਤਸਾਰਾਨੀ’’ਤਿ, ਪਤਿਟ੍ਠਿਤਸਾਰਾਨੀਤਿ ਅਤ੍ਥੋ. ਸਨ੍ਨਿਚਯਭਾਵੇਨ ਸੁਖਂ ਸਯਿਤਾਨੀਤਿ ਚਤ੍ਤਾਰੋ ਮਾਸੇ ਕੋਟ੍ਠਪਕ੍ਖਿਤ੍ਤਨਿਯਾਮੇਨੇਵ ਸੁਖਸਯਿਤਾਨਿ.
ਕਮ੍ਮਵਿਭਤ੍ਤੀਤਿ ਕਮ੍ਮਵਿਭਾਗੋ. ਦਿਟ੍ਠਧਮ੍ਮੋ ਵੁਚ੍ਚਤਿ ਪਚ੍ਚਕ੍ਖਭੂਤੋ ਪਚ੍ਚੁਪ੍ਪਨ੍ਨੋ ਅਤ੍ਤਭਾਵੋ, ਤਤ੍ਥ ਵੇਦਿਤਬ੍ਬਫਲਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਂ. ਪਚ੍ਚੁਪਨ੍ਨਭਵਤੋ ਅਨਨ੍ਤਰਂ ਵੇਦਿਤਬ੍ਬਫਲਂ ਕਮ੍ਮਂ ਉਪਪਜ੍ਜਵੇਦਨੀਯਂ. ਅਪਰਪਰਿਯਾਯਵੇਦਨੀਯਨ੍ਤਿ ਦਿਟ੍ਠਧਮ੍ਮਾਨਨ੍ਤਰਭਵਤੋ ਅਞ੍ਞਸ੍ਮਿਂ ਅਤ੍ਤਭਾਵਪਰਿਯਾਯੇ ਅਤ੍ਤਭਾਵਪਰਿਵਤ੍ਤੇ ਵੇਦਿਤਬ੍ਬਫਲਂ ਕਮ੍ਮਂ. ਪਟਿਪਕ੍ਖੇਹਿ ਅਨਭਿਭੂਤਤਾਯ ਪਚ੍ਚਯਵਿਸੇਸੇਨ ਪਟਿਲਦ੍ਧਵਿਸੇਸਤਾਯ ਚ ਬਲਵਭਾਵਪ੍ਪਤ੍ਤਾ ਤਾਦਿਸਸ੍ਸ ਪੁਬ੍ਬਾਭਿਸਙ੍ਖਾਰਸ੍ਸ ਵਸੇਨ ਸਾਤਿਸਯਾ ਹੁਤ੍ਵਾ ਪਵਤ੍ਤਾ ਪਠਮਜਵਨਚੇਤਨਾ ਤਸ੍ਮਿਂਯੇਵ ਅਤ੍ਤਭਾਵੇ ਫਲਦਾਯਿਨੀ ਦਿਟ੍ਠਧਮ੍ਮਵੇਦਨੀਯਕਮ੍ਮਂ ਨਾਮ. ਸਾ ਹਿ ਵੁਤ੍ਤਾਕਾਰੇਨ ਬਲਵਤੀ ਜਵਨਸਨ੍ਤਾਨੇ ਗੁਣਵਿਸੇਸਯੁਤ੍ਤੇਸੁ ਉਪਕਾਰਾਨੁਪਕਾਰਵਸਪ੍ਪਵਤ੍ਤਿਯਾ ਆਸੇਵਨਾਲਾਭੇਨ ਅਪ੍ਪਵਿਪਾਕਤਾਯ ਚ ਪਠਮਜਵਨਚੇਤਨਾ ਇਤਰਦ੍ਵਯਂ ਵਿਯ ਪਵਤ੍ਤਸਨ੍ਤਾਨੁਪਰਮਾਪੇਕ੍ਖਂ ਓਕਾਸਲਾਭਾਪੇਕ੍ਖਞ੍ਚ ਕਮ੍ਮਂ ਨ ਹੋਤੀਤਿ ਇਧੇਵ ਪੁਪ੍ਫਮਤ੍ਤਂ ਵਿਯ ਪਵਤ੍ਤਿਵਿਪਾਕਮਤ੍ਤਂ ਫਲਂ ਦੇਤਿ. ਤਥਾ ਅਸਕ੍ਕੋਨ੍ਤਨ੍ਤਿ ਕਮ੍ਮਸ੍ਸ ਵਿਪਾਕਦਾਨਂ ਨਾਮ ਉਪਧਿਪ੍ਪਯੋਗਾਦਿਪਚ੍ਚਯਨ੍ਤਰਸਮਵਾਯੇਨੇਵ ਹੋਤੀਤਿ ਤਦਭਾਵਤੋ ਤਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦਾਤੁਂ ਅਸਕ੍ਕੋਨ੍ਤਂ. ਅਹੋਸਿਕਮ੍ਮਨ੍ਤਿ ਅਹੋਸਿ ਏਵ ਕਮ੍ਮਂ, ਨ ਤਸ੍ਸ ਵਿਪਾਕੋ ਅਹੋਸਿ ਅਤ੍ਥਿ ਭਵਿਸ੍ਸਤਿ ਚਾਤਿ ਏਵਂ ਵੇਦਿਤਬ੍ਬਂ ਕਮ੍ਮਂ.
ਅਤ੍ਥਸਾਧਿਕਾਤਿ ਦਾਨਾਦਿਪਾਣਾਤਿਪਾਤਾਦਿਅਤ੍ਥਸ੍ਸ ਨਿਪ੍ਫਾਦਿਕਾ. ਕਾ ਪਨ ਸਾਤਿ ਆਹ ‘‘ਸਤ੍ਤਮਜਵਨਚੇਤਨਾ’’ਤਿ. ਸਾ ਹਿ ਸਨ੍ਨਿਟ੍ਠਾਪਕਚੇਤਨਾ ਵੁਤ੍ਤਨਯੇਨ ਪਟਿਲਦ੍ਧਵਿਸੇਸਾ ਪੁਰਿਮਜਵਨਚੇਤਨਾਹਿ ਲਦ੍ਧਾਸੇਵਨਾ ਚ ਸਮਾਨਾ ਅਨਨ੍ਤਰਤ੍ਤਭਾਵੇ ਵਿਪਾਕਦਾਯਿਨੀ ਉਪਪਜ੍ਜਵੇਦਨੀਯਕਮ੍ਮਂ ਨਾਮ. ਪੁਰਿਮਉਪਮਾਯਯੇਵਾਤਿ ਮਿਗਲੁਦ੍ਦਕੋਪਮਾਯਯੇਵ.
ਸਤਿ ਸਂਸਾਰਪ੍ਪਵਤ੍ਤਿਯਾਤਿ ਇਮਿਨਾ ਅਸਤਿ ਸਂਸਾਰਪ੍ਪਵਤ੍ਤਿਯਂ ਅਹੋਸਿਕਮ੍ਮਪਕ੍ਖੇ ਤਿਟ੍ਠਤਿ ਵਿਪਚ੍ਚਨੋਕਾਸਸ੍ਸ ਅਭਾਵਤੋਤਿ ਦੀਪੇਤਿ. ਯਂ ਗਰੁਕਨ੍ਤਿ ਯਂ ਅਕੁਸਲਂ ਮਹਾਸਾਵਜ੍ਜਂ, ਕੁਸਲਞ੍ਚ ਮਹਾਨੁਭਾਵਂ ਕਮ੍ਮਂ. ਕੁਸਲਂ ਵਾ ਹਿ ਹੋਤੁ ਅਕੁਸਲਂ ਵਾ, ਯਂ ਗਰੁਕਂ ਮਾਤੁਘਾਤਾਦਿਕਮ੍ਮਂ ਵਾ ਮਹਗ੍ਗਤਕਮ੍ਮਂ ਵਾ, ਤਦੇਵ ਪਠਮਂ ਵਿਪਚ੍ਚਤਿ. ਤੇਨਾਹ ‘‘ਕੁਸਲਾਕੁਸਲੇਸੁ ਪਨਾ’’ਤਿਆਦਿ. ਯਂ ਬਹੁਲਨ੍ਤਿ ਯਂ ਬਹੁਲਂ ਅਭਿਣ੍ਹਸੋ ਕਤਂ ਸਮਾਸੇਵਿਤਂ. ਤੇਨਾਹ ‘‘ਕੁਸਲਾਕੁਸਲੇਸੁ ਪਨ ਯਂ ਬਹੁਲਂ ਹੋਤੀ’’ਤਿਆਦਿ. ਯਦਾਸਨ੍ਨਂ ਨਾਮ ਮਰਣਕਾਲੇ ਅਨੁਸ੍ਸਰਿਤਂ ਕਮ੍ਮਂ, ਆਸਨ੍ਨਕਾਲੇ ਕਤੇ ਪਨ ਵਤ੍ਤਬ੍ਬਮੇਵ ਨਤ੍ਥੀਤਿ ਆਹ ‘‘ਯਂ ਪਨ ਕੁਸਲਾਕੁਸਲੇਸੁ ਆਸਨ੍ਨਮਰਣੇ’’ਤਿਆਦਿ. ਅਨੁਸ੍ਸਰਿਤੁਨ੍ਤਿ ਪਰਿਬ੍ਯਤ੍ਤਭਾਵੇਨ ਅਨੁਸ੍ਸਰਿਤੁਂ.
ਤੇਸਂ ਅਭਾਵੇਤਿ ਤੇਸਂ ਯਂਗਰੁਕਾਦੀਨਂ ਤਿਣ੍ਣਂ ਕਮ੍ਮਾਨਂ ਅਭਾਵੇ. ਯਤ੍ਥ ਕਤ੍ਥਚਿ ਵਿਪਾਕਂ ਦੇਤੀਤਿ ਪਟਿਸਨ੍ਧਿਜਨਕਵਸੇਨ ਵਿਪਾਕਂ ਦੇਤਿ. ਪਟਿਸਨ੍ਧਿਜਨਕਵਸੇਨ ਹਿ ਗਰੁਕਾਦਿਕਮ੍ਮਚਤੁਕ੍ਕਂ ਵੁਤ੍ਤਂ. ਤਤ੍ਥ ਗਰੁਕਂ ਸਬ੍ਬਪਠਮਂ ਵਿਪਚ੍ਚਤਿ, ਗਰੁਕੇ ਅਸਤਿ ਬਹੁਲੀਕਤਂ, ਤਸ੍ਮਿਂ ਅਸਤਿ ਯਦਾਸਨ੍ਨਂ, ਤਸ੍ਮਿਂ ਅਸਤਿ ‘‘ਕਟਤ੍ਤਾ ਵਾ ਪਨਾ’’ਤਿ ਵੁਤ੍ਤਂ ਪੁਰਿਮਜਾਤੀਸੁ ਕਤਕਮ੍ਮਂ ਵਿਪਚ੍ਚਤਿ. ਬਹੁਲਾਸਨ੍ਨਪੁਬ੍ਬਕਤੇਸੁ ਚ ਬਲਾਬਲਂ ਜਾਨਿਤਬ੍ਬਂ. ਪਾਪਤੋ ਪਾਪਨ੍ਤਰਂ ਕਲ੍ਯਾਣਞ੍ਚ, ਕਲ੍ਯਾਣਤੋ ਕਲ੍ਯਾਣਨ੍ਤਰਂ ਪਾਪਞ੍ਚ ਬਹੁਲੀਕਤਂ. ਤਤੋ ਮਹਤੋਵ ਪੁਬ੍ਬਕਤਾਦਿ ਅਪ੍ਪਞ੍ਚ ਬਹੁਲਾਨੁਸ੍ਸਰਣੇਨ ਵਿਪ੍ਪਟਿਸਾਰਾਦਿਜਨਨਤੋ, ਪਟਿਪਕ੍ਖਸ੍ਸ ਅਪਰਿਪੁਣ੍ਣਤਾਯ ਆਰਦ੍ਧਵਿਪਾਕਸ੍ਸ ਕਮ੍ਮਸ੍ਸ ਕਮ੍ਮਸੇਸਸ੍ਸ ਵਾ ਅਪਰਪਰਿਯਾਯਵੇਦਨੀਯਸ੍ਸ ਅਪਰਿਕ੍ਖੀਣਤਾਯ ਸਨ੍ਤਤਿਯਾ ਪਰਿਣਾਮਵਿਸੇਸਤੋਤਿ ਤੇਹਿ ਤੇਹਿ ਕਾਰਣੇਹਿ ਆਯੂਹਿਤਫਲਂ ਪਠਮਂ ਵਿਪਚ੍ਚਤਿ. ਮਹਾਨਾਰਦਕਸ੍ਸਪਜਾਤਕੇ (ਜਾ. ੨.੨੨.੧੧੫੩ ਆਦਯੋ) ਵਿਦੇਹਰਞ੍ਞੋ ਸੇਨਾਪਤਿ ਅਲਾਤੋ, ਬੀਜਕੋ ਦਾਸੋ, ਰਾਜਕਞ੍ਞਾ ਰੁਚਾ ਚ ਏਤ੍ਥ ਨਿਦਸ੍ਸਨਂ. ਤਥਾ ਹਿ ਵੁਤ੍ਤਂ ਭਗਵਤਾ –
‘‘ਤਤ੍ਰਾਨਨ੍ਦ, ਯ੍ਵਾਯਂ ਪੁਗ੍ਗਲੋ ਇਧ ਪਾਣਾਤਿਪਾਤੀ…ਪੇ… ਮਿਚ੍ਛਾਦਿਟ੍ਠਿ. ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤਿ, ਪੁਬ੍ਬੇ ਵਾਸ੍ਸ ਤਂ ਕਤਂ ਹੋਤਿ ਪਾਪਕਮ੍ਮਂ ਦੁਕ੍ਖਵੇਦਨੀਯਂ, ਪਚ੍ਛਾ ਵਾਸ੍ਸ ਤਂ ਕਤਂ ਹੋਤਿ ਪਾਪਕਮ੍ਮਂ ਦੁਕ੍ਖਵੇਦਨੀਯਂ, ਮਰਣਕਾਲੇ ਵਾਸ੍ਸ ਹੋਤਿ ਮਿਚ੍ਛਾਦਿਟ੍ਠਿ ਸਮਤ੍ਤਾ ਸਮਾਦਿਨ੍ਨਾ, ਤੇਨ ਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤੀ’’ਤਿ –
ਆਦਿ. ਸਬ੍ਬਂ ਮਹਾਕਮ੍ਮਵਿਭਙ੍ਗਸੁਤ੍ਤਂ (ਮ. ਨਿ. ੩.੩੦੩) ਵਿਤ੍ਥਾਰੇਤਬ੍ਬਂ. ਕਿਂ ਬਹੁਨਾ. ਯਂ ਤਂ ਤਥਾਗਤਸ੍ਸ ਮਹਾਕਮ੍ਮਵਿਭਙ੍ਗਞਾਣਂ, ਤਸ੍ਸੇਵਾਯਂ ਵਿਸਯੋ, ਯਦਿਦਂ ਤਸ੍ਸ ਤਸ੍ਸ ਕਮ੍ਮਸ੍ਸ ਤੇਨ ਤੇਨ ਕਾਰਣੇਨ ਪੁਬ੍ਬਾਪਰਵਿਪਾਕਤਾ ਸਮਤ੍ਥੀਯਤਿ.
ਇਦਾਨਿ ਜਨਕਾਦਿਕਮ੍ਮਚਤੁਕ੍ਕਂ ਵਿਭਜਨ੍ਤੋ ‘‘ਜਨਕਂ ਨਾਮਾ’’ਤਿਆਦਿਮਾਹ. ਪਵਤ੍ਤਿਂ ਨ ਜਨੇਤੀਤਿ ਪਵਤ੍ਤਿਵਿਪਾਕਂ ਨ ਜਨੇਤਿ. ਪਠਮਨਯੇ ਜਨਕਕਮ੍ਮਸ੍ਸ ਪਟਿਸਨ੍ਧਿਵਿਪਾਕਮਤ੍ਤਸ੍ਸੇਵ ਵੁਤ੍ਤਤ੍ਤਾ ਤਸ੍ਸ ਪਵਤ੍ਤਿਵਿਪਾਕਦਾਯਕਤ੍ਤਮ੍ਪਿ ਅਨੁਜਾਨਨ੍ਤੋ ‘‘ਅਪਰੋ ਨਯੋ’’ਤਿਆਦਿਮਾਹ. ਤਤ੍ਥ ਪਟਿਸਨ੍ਧਿਦਾਨਾਦਿਵਸੇਨ ਵਿਪਾਕਸਨ੍ਤਾਨਸ੍ਸ ਨਿਬ੍ਬਤ੍ਤਕਂ ਜਨਕਂ. ਸੁਖਦੁਕ੍ਖਸਨ੍ਤਾਨਸ੍ਸ ਨਾਮਰੂਪਪ੍ਪਬਨ੍ਧਸ੍ਸ ਵਾ ਚਿਰਤਰਂ ਪਵਤ੍ਤਿਹੇਤੁਭੂਤਂ ਉਪਤ੍ਥਮ੍ਭਕਂ. ਤੇਨਾਹ ‘‘ਸੁਖਦੁਕ੍ਖਂ ਉਪਤ੍ਥਮ੍ਭੇਤਿ, ਅਦ੍ਧਾਨਂ ਪਵਤ੍ਤੇਤੀ’’ਤਿ. ਉਪਪੀਲ਼ਕਂ ਸੁਖਦੁਕ੍ਖਪ੍ਪਬਨ੍ਧੇ ਪਵਤ੍ਤਮਾਨੇ ਸਣਿਕਂ ਸਣਿਕਂ ਹਾਪੇਤਿ. ਤੇਨਾਹ ‘‘ਸੁਖਦੁਕ੍ਖਂ ਪੀਲ਼ੇਤਿ ਬਾਧੇਤਿ, ਅਦ੍ਧਾਨਂ ਪਵਤ੍ਤਿਤੁਂ ਨ ਦੇਤੀ’’ਤਿ.
ਵਾਤਕਾਲ਼ਕੋ ਮਹਲ੍ਲਕੋ ਚੋਰੇ ਘਾਤੇਤੁਂ ਨ ਸਕ੍ਕੋਤੀਤਿ ਸੋ ਕਿਰ ਮਹਲ੍ਲਕਕਾਲੇ ਏਕਪ੍ਪਹਾਰੇਨ ਸੀਸਂ ਛਿਨ੍ਦਿਤੁਂ ਨ ਸਕ੍ਕੋਤਿ, ਦ੍ਵੇ ਤਯੋ ਵਾਰੇ ਪਹਰਨ੍ਤੋ ਮਨੁਸ੍ਸੇ ਕਿਲਮੇਤਿ, ਤਸ੍ਮਾ ਤੇ ਏਵਮਾਹਂਸੁ. ਅਨੁਲੋਮਿਕਂ ਖਨ੍ਤਿਂ ਪਟਿਲਭਿਤ੍ਵਾਤਿ ਸੋਤਾਪਤ੍ਤਿਮਗ੍ਗਸ੍ਸ ਓਰਤੋ ਅਨੁਲੋਮਿਕਂ ਖਨ੍ਤਿਂ ਲਭਿਤ੍ਵਾ. ਤਰੁਣਵਚ੍ਛਾਯ ਗਾਵਿਯਾ ਮਦ੍ਦਿਤ੍ਵਾ ਜੀਵਿਤਕ੍ਖਯਂ ਪਾਪਿਤੋਤਿ ਏਕਾ ਕਿਰ ਯਕ੍ਖਿਨੀ ਧੇਨੁਵੇਸੇਨ ਆਗਨ੍ਤ੍ਵਾ ਉਰੇ ਪਹਰਿਤ੍ਵਾ ਮਾਰੇਸਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਨਗਰੇ ਭਵੋ ਨਾਗਰਿਯੋ.
ਘਾਤੇਤ੍ਵਾਤਿ ਉਪਚ੍ਛਿਨ੍ਦਿਤ੍ਵਾ. ਕਮ੍ਮਸ੍ਸ ਉਪਚ੍ਛਿਨ੍ਦਨਂ ਨਾਮ ਤਸ੍ਸ ਵਿਪਾਕਪ੍ਪਟਿਬਾਹਨਮੇਵਾਤਿ ਆਹ ‘‘ਤਸ੍ਸ ਵਿਪਾਕਂ ਪਟਿਬਾਹਿਤ੍ਵਾ’’ਤਿ. ਤਞ੍ਚ ਅਤ੍ਤਨੋ ਵਿਪਾਕੁਪ੍ਪਤ੍ਤਿਯਾ ਓਕਾਸਕਰਣਨ੍ਤਿ ਵੁਤ੍ਤਂ ‘‘ਅਤ੍ਤਨੋ ਵਿਪਾਕਸ੍ਸ ਓਕਾਸਂ ਕਰੋਤੀ’’ਤਿ. ਵਿਪਚ੍ਚਨਾਯ ਕਤੋਕਾਸਂ ਕਮ੍ਮਂ ਵਿਪਕ੍ਕਮ੍ਮੇਵ ਨਾਮ ਹੋਤੀਤਿ ਆਹ ‘‘ਏਵਂ ਪਨ ਕਮ੍ਮੇਨ ਕਤੇ ਓਕਾਸੇ ਤਂ ਵਿਪਾਕਂ ਉਪ੍ਪਨ੍ਨਂ ਨਾਮ ਵੁਚ੍ਚਤੀ’’ਤਿ. ਉਪਪੀਲ਼ਕਂ ਅਞ੍ਞਸ੍ਸ ਵਿਪਾਕਂ ਉਪਚ੍ਛਿਨ੍ਦਤਿ, ਨ ਸਯਂ ਅਤ੍ਤਨੋ ਵਿਪਾਕਂ ਦੇਤਿ. ਉਪਘਾਤਕਂ ਪਨ ਦੁਬ੍ਬਲਕਮ੍ਮਂ ਉਪਚ੍ਛਿਨ੍ਦਿਤ੍ਵਾ ਅਤ੍ਤਨੋ ਵਿਪਾਕਂ ਉਪ੍ਪਾਦੇਤੀਤਿ ਅਯਮੇਤੇਸਂ ਵਿਸੇਸੋ. ਕਿਞ੍ਚਿ ਬਹ੍ਵਾਬਾਧਤਾਦਿਪਚ੍ਚਯੂਪਸਨ੍ਨਿਪਾਤੇਨ ਵਿਪਾਕਸ੍ਸ ਵਿਬਾਧਕਂ ਉਪਪੀਲ਼ਕਂ, ਤਥਾ ਵਿਪਾਕਸ੍ਸੇਵ ਉਪਚ੍ਛੇਦਕਂ. ਉਪਘਾਤਕਕਮ੍ਮਂ ਪਨ ਉਪਘਾਤੇਤ੍ਵਾ ਅਤ੍ਤਨੋ ਵਿਪਾਕਸ੍ਸ ਓਕਾਸਕਰਣੇਨ ਵਿਪਚ੍ਚਨੇ ਸਤਿ ਜਨਕਮੇਵ ਸਿਯਾ. ਜਨਕਾਦਿਭਾਵੋ ਨਾਮ ਵਿਪਾਕਂ ਪਤਿ ਇਚ੍ਛਿਤਬ੍ਬੋ, ਨ ਕਮ੍ਮਂ ਪਤੀਤਿ ਵਿਪਾਕਸ੍ਸੇਵ ਉਪਘਾਤਕਤਾ ਯੁਤ੍ਤਾ ਵਿਯ ਦਿਸ੍ਸਤਿ, ਵੀਮਂਸਿਤਬ੍ਬਂ.
ਅਪਰੋ ਨਯੋ – ਯਸ੍ਮਿਂ ਕਮ੍ਮੇ ਕਤੇ ਪਟਿਸਨ੍ਧਿਯਂ ਪਵਤ੍ਤੇ ਚ ਵਿਪਾਕਕਟਤ੍ਤਾਰੂਪਾਨਂ ਉਪ੍ਪਤ੍ਤਿ ਹੋਤਿ, ਤਂ ਜਨਕਂ. ਯਸ੍ਮਿਂ ਪਨ ਕਤੇ ਅਞ੍ਞੇਨ ਜਨਿਤਸ੍ਸ ਇਟ੍ਠਸ੍ਸ ਵਾ ਅਨਿਟ੍ਠਸ੍ਸ ਵਾ ਫਲਸ੍ਸ ਵਿਬਾਧਕਵਿਚ੍ਛੇਦਕਪਚ੍ਚਯਾਨੁਪ੍ਪਤ੍ਤਿਯਾ ਉਪਬ੍ਰੂਹਨਪਚ੍ਚਯੁਪ੍ਪਤ੍ਤਿਯਾ ਜਨਕਸਾਮਤ੍ਥਿਯਾਨੁਰੂਪਂ ਪਰਿਸੁਦ੍ਧਿਚਿਰਤਰਪ੍ਪਬਨ੍ਧਾ ਹੋਤਿ, ਤਂ ਉਪਤ੍ਥਮ੍ਭਕਂ. ਜਨਕੇਨ ਨਿਬ੍ਬਤ੍ਤਿਤਂ ਕੁਸਲਫਲਂ ਵਾ ਅਕੁਸਲਫਲਂ ਵਾ ਯੇਨ ਪਚ੍ਚਨੀਕਭੂਤੇਨ ਰੋਗਧਾਤੁਵਿਸਮਤਾਦਿਨਿਮਿਤ੍ਤਤਾਯ ਵਿਬਾਧਯਤਿ, ਤਂ ਉਪਪੀਲ਼ਕਂ. ਯੇਨ ਪਨ ਕਮ੍ਮੁਨਾ ਜਨਕਸਾਮਤ੍ਥਿਯਵਸੇਨ ਚਿਰਤਰਪ੍ਪਬਨ੍ਧਾਰਹਮ੍ਪਿ ਸਮਾਨਂ ਫਲਂ ਵਿਚ੍ਛੇਦਕਪਚ੍ਚਯੁਪ੍ਪਤ੍ਤਿਯਾ ਉਪਹਞ੍ਞਤਿ ਵਿਚ੍ਛਿਜ੍ਜਤਿ, ਤਂ ਉਪਘਾਤਕਨ੍ਤਿ ਅਯਮੇਤ੍ਥ ਸਾਰੋ.
ਤਤ੍ਥ ਕੇਚਿ ਦੁਤਿਯਸ੍ਸ ਕੁਸਲਭਾਵਂ ਇਤ੍ਥਤ੍ਤਮਾਗਤਸ੍ਸ ਅਪ੍ਪਾਬਾਧਦੀਘਾਯੁਕਤਾਸਂਵਤ੍ਤਨਵਸੇਨ, ਪਚ੍ਛਿਮਾਨਂ ਦ੍ਵਿਨ੍ਨਂ ਅਕੁਸਲਭਾਵਂ ਬਹ੍ਵਾਬਾਧਅਪ੍ਪਾਯੁਕਤਾਸਂਵਤ੍ਤਨਵਸੇਨ ਵਣ੍ਣੇਨ੍ਤਿ. ਤਥਾ ਚ ਵੁਤ੍ਤਂ ਮਜ੍ਝਿਮਨਿਕਾਯੇ ਚੂਲ਼ਕਮ੍ਮਵਿਭਙ੍ਗਸੁਤ੍ਤਵਣ੍ਣਨਾਯਂ (ਮ. ਨਿ. ਅਟ੍ਠ. ੩.੨੯੦) –
‘‘ਚਤ੍ਤਾਰਿ ਹਿ ਕਮ੍ਮਾਨਿ – ਉਪਪੀਲ਼ਕਂ, ਉਪਚ੍ਛੇਦਕਂ, ਜਨਕਂ, ਉਪਤ੍ਥਮ੍ਭਕਨ੍ਤਿ. ਬਲਵਕਮ੍ਮੇਨ ਹਿ ਨਿਬ੍ਬਤ੍ਤਂ ਪਵਤ੍ਤੇ ਉਪਪੀਲ਼ਕਂ ਆਗਨ੍ਤ੍ਵਾ ਅਤ੍ਥਤੋ ਏਵਂ ਵਦਤਿ ਨਾਮ ‘ਸਚਾਹਂ ਪਠਮਤਰਂ ਜਾਨੇਯ੍ਯਂ, ਨ ਤੇ ਇਧ ਨਿਬ੍ਬਤ੍ਤਿਤੁਂ ਦਦੇਯ੍ਯਂ, ਚਤੂਸੁਯੇਵ ਤਂ ਅਪਾਯੇਸੁ ਨਿਬ੍ਬਤ੍ਤਾਪੇਯ੍ਯਂ. ਹੋਤੁ, ਤ੍ਵਂ ਯਤ੍ਥ ਕਤ੍ਥਚਿ ਨਿਬ੍ਬਤ੍ਤ, ਅਹਂ ਉਪਪੀਲ਼ਕਕਮ੍ਮਂ ਨਾਮ ਤਂ ਪੀਲ਼ੇਤ੍ਵਾ ਨਿਰੋਜਂ ਨਿਯੂਸਂ ਕਸਟਂ ਕਰਿਸ੍ਸਾਮੀ’ਤਿ. ਤਤੋ ਪਟ੍ਠਾਯ ਤਂ ਤਾਦਿਸਂ ਕਰੋਤਿ. ਕਿਂ ਕਰੋਤਿ? ਪਰਿਸ੍ਸਯਂ ਉਪਨੇਤਿ, ਭੋਗੇ ਵਿਨਾਸੇਤਿ.
‘‘ਤਤ੍ਥ ਦਾਰਕਸ੍ਸ ਮਾਤੁਕੁਚ੍ਛਿਯਂ ਨਿਬ੍ਬਤ੍ਤਕਾਲਤੋ ਪਟ੍ਠਾਯ ਮਾਤੁ ਅਸ੍ਸਾਦੋ ਵਾ ਸੁਖਂ ਵਾ ਨ ਹੋਤਿ, ਮਾਤਾਪਿਤੂਨਂ ਪੀਲ਼ਾਵ ਉਪ੍ਪਜ੍ਜਤਿ. ਏਵਂ ਪਰਿਸ੍ਸਯਂ ਉਪਨੇਤਿ. ਦਾਰਕਸ੍ਸ ਪਨ ਮਾਤੁਕੁਚ੍ਛਿਮ੍ਹਿ ਨਿਬ੍ਬਤ੍ਤਕਾਲਤੋ ਪਟ੍ਠਾਯ ਗੇਹੇ ਭੋਗਾ ਉਦਕਂ ਪਤ੍ਵਾ ਲੋਣਂ ਵਿਯ ਰਾਜਾਦੀਨਂ ਵਸੇਨ ਨਸ੍ਸਨ੍ਤਿ, ਕੁਮ੍ਭਦੋਹਨਧੇਨੁਯੋ ਖੀਰਂ ਨ ਦੇਨ੍ਤਿ, ਸੂਰਤਾ ਗੋਣਾ ਚਣ੍ਡਾ ਹੋਨ੍ਤਿ, ਕਾਣਾ ਹੋਨ੍ਤਿ, ਖਞ੍ਜਾ ਹੋਨ੍ਤਿ, ਗੋਮਣ੍ਡਲੇ ਰੋਗੋ ਪਤਤਿ, ਦਾਸਾਦਯੋ ਵਚਨਂ ਨ ਕਰੋਨ੍ਤਿ, ਵਾਪਿਤਂ ਸਸ੍ਸਂ ਨ ਜਾਯਤਿ, ਗੇਹਗਤਂ ਗੇਹੇ, ਅਰਞ੍ਞਗਤਂ ਅਰਞ੍ਞੇ ਨਸ੍ਸਤਿ, ਅਨੁਪੁਬ੍ਬੇਨ ਘਾਸਚ੍ਛਾਦਨਮਤ੍ਤਂ ਦੁਲ੍ਲਭਂ ਹੋਤਿ, ਗਬ੍ਭਪਰਿਹਾਰੋ ਨ ਹੋਤਿ, ਵਿਜਾਤਕਾਲੇ ਮਾਤੁ ਥਞ੍ਞਂ ਛਿਜ੍ਜਤਿ, ਦਾਰਕੋ ਪਰਿਹਾਰਂ ਅਲਭਨ੍ਤੋ ਪੀਲ਼ਿਤੋ ਨਿਰੋਜੋ ਨਿਯੂਸੋ ਕਸਟੋ ਹੋਤਿ. ਇਦਂ ਉਪਪੀਲ਼ਕਕਮ੍ਮਂ ਨਾਮ.
‘‘ਦੀਘਾਯੁਕਕਮ੍ਮੇਨ ਪਨ ਨਿਬ੍ਬਤ੍ਤਸ੍ਸ ਉਪਚ੍ਛੇਦਕਕਮ੍ਮਂ ਆਗਨ੍ਤ੍ਵਾ ਆਯੁਂ ਛਿਨ੍ਦਤਿ. ਯਥਾ ਹਿ ਪੁਰਿਸੋ ਅਟ੍ਠੁਸਭਗਮਨਂ ਕਤ੍ਵਾ ਸਰਂ ਖਿਪੇਯ੍ਯ, ਤਮਞ੍ਞੋ ਧਨੁਤੋ ਮੁਤ੍ਤਮਤ੍ਤਂ ਮੁਗ੍ਗਰੇਨ ਪਹਰਿਤ੍ਵਾ ਤਤ੍ਥੇਵ ਪਾਤੇਯ੍ਯ, ਏਵਂ ਦੀਘਾਯੁਕਕਮ੍ਮੇਨ ਨਿਬ੍ਬਤ੍ਤਸ੍ਸ ਉਪਚ੍ਛੇਦਕਕਮ੍ਮਂ ਆਯੁਂ ਛਿਨ੍ਦਤਿ. ਕਿਂ ਕਰੋਤਿ? ਚੋਰਾਨਂ ਅਟਵਿਂ ਪਵੇਸੇਤਿ, ਵਾਲ਼ਮਚ੍ਛੋਦਕਂ ਓਤਾਰੇਤਿ, ਅਞ੍ਞਤਰਂ ਵਾ ਪਨ ਸਪਰਿਸ੍ਸਯਠਾਨਂ ਉਪਨੇਤਿ. ਇਦਂ ਉਪਚ੍ਛੇਦਕਕਮ੍ਮਂ ਨਾਮ. ‘ਉਪਘਾਤਕ’ਨ੍ਤਿਪਿ ਏਤਸ੍ਸੇਵ ਨਾਮਂ. ਪਟਿਸਨ੍ਧਿਨਿਬ੍ਬਤ੍ਤਕਂ ਪਨ ਕਮ੍ਮਂ ਜਨਕਕਮ੍ਮਂ ਨਾਮ. ਅਪ੍ਪਭੋਗਕੁਲਾਦੀਸੁ ਨਿਬ੍ਬਤ੍ਤਸ੍ਸ ਭੋਗਸਮ੍ਪਦਾਦਿਕਰਣੇਨ ਉਪਤ੍ਥਮ੍ਭਕਕਮ੍ਮਂ ਉਪਤ੍ਥਮ੍ਭਕਕਮ੍ਮਂ ਨਾਮ.
‘‘ਪਰਿਤ੍ਤਕਮ੍ਮੇਨਪਿ ਨਿਬ੍ਬਤ੍ਤਂ ਏਤਂ ਪਵਤ੍ਤੇ ਪਾਣਾਤਿਪਾਤਾਦਿਵਿਰਤਿਕਮ੍ਮਂ ਆਗਨ੍ਤ੍ਵਾ ਅਤ੍ਥਤੋ ਏਵਂ ਵਦਤਿ ਨਾਮ ‘ਸਚਾਹਂ ਪਠਮਤਰਂ ਜਾਨੇਯ੍ਯਂ, ਨ ਤੇ ਇਧ ਨਿਬ੍ਬਤ੍ਤਿਤੁਂ ਦਦੇਯ੍ਯਂ, ਦੇਵਲੋਕੇਯੇਵ ਤਂ ਨਿਬ੍ਬਤ੍ਤਾਪੇਯ੍ਯਂ, ਹੋਤੁ, ਤ੍ਵਂ ਯਤ੍ਥ ਕਤ੍ਥਚਿ ਨਿਬ੍ਬਤ੍ਤ, ਅਹਂ ਉਪਤ੍ਥਮ੍ਭਕਕਮ੍ਮਂ ਨਾਮ ਉਪਤ੍ਥਮ੍ਭਂ ਤੇ ਕਰਿਸ੍ਸਾਮੀ’ਤਿ ਉਪਤ੍ਥਮ੍ਭਂ ਕਰੋਤਿ. ਕਿਂ ਕਰੋਤਿ? ਪਰਿਸ੍ਸਯਂ ਨਾਸੇਤਿ, ਭੋਗੇ ਉਪ੍ਪਾਦੇਤਿ.
‘‘ਤਤ੍ਥ ਦਾਰਕਸ੍ਸ ਮਾਤੁਕੁਚ੍ਛਿਯਂ ਨਿਬ੍ਬਤ੍ਤਕਾਲਤੋ ਪਟ੍ਠਾਯ ਮਾਤਾਪਿਤੂਨਂ ਸੁਖਮੇਵ ਸਾਤਮੇਵ ਹੋਤਿ. ਯੇਪਿ ਪਕਤਿਯਾ ਮਨੁਸ੍ਸਾਮਨੁਸ੍ਸਪਰਿਸ੍ਸਯਾ ਹੋਨ੍ਤਿ, ਤੇ ਸਬ੍ਬੇ ਅਪਗਚ੍ਛਨ੍ਤਿ. ਏਵਂ ਪਰਿਸ੍ਸਯਂ ਨਾਸੇਤਿ. ਦਾਰਕਸ੍ਸ ਪਨ ਮਾਤੁਕੁਚ੍ਛਿਮ੍ਹਿ ਨਿਬ੍ਬਤ੍ਤਕਾਲਤੋ ਪਟ੍ਠਾਯ ਗੇਹੇ ਭੋਗਾਨਂ ਪਮਾਣਂ ਨ ਹੋਤਿ, ਨਿਧਿਕੁਮ੍ਭਿਯੋ ਪੁਰਤੋਪਿ ਪਚ੍ਛਤੋਪਿ ਗੇਹਂ ਪਰਿਵਟ੍ਟਮਾਨਾ ਪਵਿਸਨ੍ਤਿ. ਮਾਤਾਪਿਤਰੋ ਪਰੇਹਿ ਠਪਿਤਧਨਸ੍ਸਪਿ ਸਮ੍ਮੁਖੀਭਾਵਂ ਗਚ੍ਛਨ੍ਤਿ, ਧੇਨੁਯੋ ਬਹੁਖੀਰਾ ਹੋਨ੍ਤਿ, ਗੋਣਾ ਸੁਖਸੀਲਾ ਹੋਨ੍ਤਿ, ਵਪ੍ਪਟ੍ਠਾਨੇ ਸਸ੍ਸਾਨਿ ਸਮ੍ਪਜ੍ਜਨ੍ਤਿ, ਵਡ੍ਢਿਯਾ ਵਾ ਸਮ੍ਪਯੁਤ੍ਤਂ, ਤਾਵਕਾਲਿਕਂ ਵਾ ਦਿਨ੍ਨਂ ਧਨਂ ਅਚੋਦਿਤਾ ਸਯਮੇਵ ਆਹਰਿਤ੍ਵਾ ਦੇਨ੍ਤਿ, ਦਾਸਾਦਯੋ ਸੁਬ੍ਬਚਾ ਹੋਨ੍ਤਿ, ਕਮ੍ਮਨ੍ਤਾ ਨ ਪਰਿਹਾਯਨ੍ਤਿ, ਦਾਰਕੋ ਗਬ੍ਭਤੋ ਪਟ੍ਠਾਯ ਪਰਿਹਾਰਂ ਲਭਤਿ, ਕੋਮਾਰਿਕਵੇਜ੍ਜਾ ਸਨ੍ਨਿਹਿਤਾਵ ਹੋਨ੍ਤਿ. ਗਹਪਤਿਕੁਲੇ ਜਾਤੋ ਸੇਟ੍ਠਿਟ੍ਠਾਨਂ, ਅਮਚ੍ਚਕੁਲਾਦੀਸੁ ਜਾਤੋ ਸੇਨਾਪਤਿਟ੍ਠਾਨਾਦੀਨਿ ਲਭਤਿ. ਏਵਂ ਭੋਗੇ ਉਪ੍ਪਾਦੇਤਿ. ਸੋ ਅਪਰਿਸ੍ਸਯੋ ਸਭੋਗੋ ਚਿਰਂ ਜੀਵਤਿ. ਇਦਂ ਉਪਤ੍ਥਮ੍ਭਕਕਮ੍ਮਂ ਨਾਮ. ਇਮੇਸੁ ਚਤੂਸੁ ਪੁਰਿਮਾਨਿ ਦ੍ਵੇ ਅਕੁਸਲਾਨੇਵ, ਜਨਕਂ ਕੁਸਲਮ੍ਪਿ ਅਕੁਸਲਮ੍ਪਿ, ਉਪਤ੍ਥਮ੍ਭਕਂ ਕੁਸਲਮੇਵਾ’’ਤਿ.
ਏਤ੍ਥ ਵਿਬਾਧੂਪਘਾਤਾ ਨਾਮ ਕੁਸਲਵਿਪਾਕਮ੍ਹਿ ਨ ਯੁਤ੍ਤਾਤਿ ਅਧਿਪ੍ਪਾਯੇਨ ‘‘ਦ੍ਵੇ ਅਕੁਸਲਾਨੇਵਾ’’ਤਿ ਵੁਤ੍ਤਂ. ਦੇਵਦਤ੍ਤਾਦੀਨਂ ਪਨ ਨਾਗਾਦੀਨਂ ਇਤੋ ਅਨੁਪ੍ਪਦਿਨ੍ਨਯਾਪਨਕਪੇਤਾਨਞ੍ਚ ਨਰਕਾਦੀਸੁ ਅਕੁਸਲਵਿਪਾਕੂਪਤ੍ਥਮ੍ਭਨੂਪਪੀਲ਼ਨੂਪਘਾਤਕਾਨਿ ਸਨ੍ਤੀਤਿ ਚਤੁਨ੍ਨਮ੍ਪਿ ਕੁਸਲਾਕੁਸਲਭਾਵੋ ਨ ਵਿਰੁਜ੍ਝਤਿ. ਏਵਞ੍ਚ ਕਤ੍ਵਾ ਯਾ ਬਹੂਸੁ ਆਨਨ੍ਤਰਿਯੇਸੁ ਕਤੇਸੁ ਏਕੇਨ ਗਹਿਤਪ੍ਪਟਿਸਨ੍ਧਿਕਸ੍ਸ ਇਤਰੇਸਂ ਤਸ੍ਸ ਅਨੁਬਲਪ੍ਪਦਾਯਿਤਾ ਵੁਤ੍ਤਾ, ਸਾਪਿ ਸਮਤ੍ਥਿਤਾ ਹੋਤਿ.
ਸੁਤ੍ਤਨ੍ਤਪਰਿਯਾਯੇਨ ਏਕਾਦਸ ਕਮ੍ਮਾਨਿ ਵਿਭਜਿਤ੍ਵਾ ਇਦਾਨਿ ਅਭਿਧਮ੍ਮਪਰਿਯਾਪਨ੍ਨਂ ਦਸ੍ਸੇਨ੍ਤੋ ‘‘ਅਤ੍ਥੇਕਚ੍ਚਾਨਿ ਪਾਪਕਾਨਿ ਕਮ੍ਮਸਮਾਦਾਨਾਨੀ’’ਤਿਆਦਿਨਾ ਵਿਭਙ੍ਗਪਾਲ਼ਿਂ (ਵਿਭ. ੮੧੦) ਦਸ੍ਸੇਤਿ. ਤਤ੍ਥ ਗਤਿਸਮ੍ਪਤ੍ਤਿਪਟਿਬਾਲ਼੍ਹਾਨੀਤਿ ਗਤਿਸਮ੍ਪਤ੍ਤਿਯਾ ਪਟਿਬਾਹਿਤਾਨਿ ਨਿਵਾਰਿਤਾਨਿ ਪਟਿਸੇਧਿਤਾਨਿ. ਸੇਸਪਦੇਸੁਪਿ ਏਸੇਵ ਨਯੋ. ਤਤ੍ਥ ਚ ਗਤਿਸਮ੍ਪਤ੍ਤੀਤਿ ਸਮ੍ਪਨ੍ਨਗਤਿ ਦੇਵਲੋਕੋ ਚ ਮਨੁਸ੍ਸਲੋਕੋ ਚ. ਗਤਿਵਿਪਤ੍ਤੀਤਿ ਵਿਪਨ੍ਨਗਤਿ ਚਤ੍ਤਾਰੋ ਅਪਾਯਾ. ਉਪਧਿਸਮ੍ਪਤ੍ਤੀਤਿ ਅਤ੍ਤਭਾਵਸਮਿਦ੍ਧਿ. ਉਪਧਿਵਿਪਤ੍ਤੀਤਿ ਹੀਨਅਤ੍ਤਭਾਵਤਾ. ਕਾਲਸਮ੍ਪਤ੍ਤੀਤਿ ਸੁਰਾਜਸੁਮਨੁਸ੍ਸਕਾਲਸਙ੍ਖਾਤੋ ਸਮ੍ਪਨ੍ਨਕਾਲੋ. ਕਾਲਵਿਪਤ੍ਤੀਤਿ ਦੁਰਾਜਦੁਮ੍ਮਨੁਸ੍ਸਕਾਲਸਙ੍ਖਾਤੋ ਵਿਪਨ੍ਨਕਾਲੋ. ਪਯੋਗਸਮ੍ਪਤ੍ਤੀਤਿ ਸਮ੍ਮਾਪਯੋਗੋ. ਪਯੋਗਵਿਪਤ੍ਤੀਤਿ ਮਿਚ੍ਛਾਪਯੋਗੋ.
ਇਦਾਨਿ ਯਥਾਵੁਤ੍ਤਪਾਲ਼ਿਯਾ ਅਤ੍ਥਂ ਦਸ੍ਸੇਨ੍ਤੋ ‘‘ਤਤ੍ਥਾ’’ਤਿਆਦਿਮਾਹ. ਤਤ੍ਥ ਅਨਿਟ੍ਠਾਰਮ੍ਮਣਾਨੁਭਵਨਾਰਹੇ ਕਮ੍ਮੇ ਵਿਜ੍ਜਮਾਨੇਯੇਵਾਤਿ ਇਮਿਨਾ ਅਨਿਟ੍ਠਾਰਮ੍ਮਣਾਨੁਭਵਨਨਿਮ੍ਮਿਤ੍ਤਕਸ੍ਸ ਪਾਪਕਮ੍ਮਸ੍ਸ ਸਬ੍ਭਾਵਂ ਦਸ੍ਸੇਤਿ. ਤਂ ਕਮ੍ਮਨ੍ਤਿ ਤਂ ਪਾਪਕਂ ਕਮ੍ਮਂ. ਏਕਚ੍ਚਸ੍ਸ ਹਿ ਅਨਿਟ੍ਠਾਰਮ੍ਮਣਾਨੁਭਵਨਨਿਮਿਤ੍ਤਂ ਬਹੁਪਾਪਕਮ੍ਮਂ ਵਿਜ੍ਜਮਾਨਮ੍ਪਿ ਗਤਿਵਿਪਤ੍ਤਿਯਂ ਠਿਤਸ੍ਸੇਵ ਵਿਪਚ੍ਚਤਿ. ਯਦਿ ਪਨ ਸੋ ਏਕੇਨ ਕਲ੍ਯਾਣਕਮ੍ਮੇਨ ਗਤਿਸਮ੍ਪਤ੍ਤਿਯਂ ਦੇਵੇਸੁ ਵਾ ਮਨੁਸ੍ਸੇਸੁ ਵਾ ਨਿਬ੍ਬਤ੍ਤੇਯ੍ਯ, ਤਾਦਿਸੇ ਠਾਨੇ ਅਕੁਸਲਸ੍ਸ ਵਾਰੋ ਨਤ੍ਥਿ, ਏਕਨ੍ਤਂ ਕੁਸਲਸ੍ਸੇਵਾਤਿ ਤਂ ਕਮ੍ਮਂ ਗਤਿਸਮ੍ਪਤ੍ਤਿਪਟਿਬਾਲ਼੍ਹਂ ਨ ਵਿਪਚ੍ਚਤਿ. ਪਤਿਬਾਹਿਤਂ ਹੁਤ੍ਵਾਤਿ ਬਾਧਿਤਂ ਹੁਤ੍ਵਾ. ਅਤ੍ਤਭਾਵਸਮਿਦ੍ਧਿਯਨ੍ਤਿ ਸਰੀਰਸਮ੍ਪਤ੍ਤਿਯਂ. ਕਿਲਿਟ੍ਠਕਮ੍ਮਸ੍ਸਾਤਿ ਹਤ੍ਥਿਮੇਣ੍ਡਅਸ੍ਸਬਨ੍ਧਕਗੋਪਾਲਕਾਦਿਕਮ੍ਮਸ੍ਸ. ਪਲਾਯਿਤਬ੍ਬਯੁਤ੍ਤਕਾਲੇਤਿ ਹਤ੍ਥਿਆਦਿਪਚ੍ਚਤ੍ਥਿਕਸਮਾਗਮਕਾਲੇ. ਲਞ੍ਜਂ ਦੇਤੀਤਿ ਏਵਂ ਮੇ ਬਾਧਤਂ ਪਰੇਸਂ ਵਸੇ ਨ ਹੋਤੀਤਿ ਦੇਤਿ. ਚੋਰਿਕਯੁਤ੍ਤਕਾਲੇਤਿ ਪਕ੍ਖਬਲਾਦੀਨਂ ਲਬ੍ਭਮਾਨਕਾਲੇ. ਅਨ੍ਤਰਕਪ੍ਪੇਤਿ ਪਰਿਯੋਸਾਨਪ੍ਪਤ੍ਤੇ ਅਨ੍ਤਰਕਪ੍ਪੇ.
ਅਭਿਧਮ੍ਮਨਯੇਨ ਸੋਲ਼ਸ ਕਮ੍ਮਾਨਿ ਵਿਭਜਿਤ੍ਵਾ ਪਟਿਸਮ੍ਭਿਦਾਮਗ੍ਗਪਰਿਯਾਯੇਨ (ਪਟਿ. ਮ. ੧.੨੩੪-੨੩੫) ਦ੍ਵਾਦਸ ਕਮ੍ਮਾਨਿ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਅਪਰਾਨਿਪੀ’’ਤਿਆਦਿਮਾਹ. ਤਤ੍ਥ ਅਤੀਤਭਵੇਸੁ ਕਤਸ੍ਸ ਕਮ੍ਮਸ੍ਸ ਅਤੀਤਭਵੇਸੁਯੇਵ ਵਿਪਕ੍ਕਵਿਪਾਕਂ ਗਹੇਤ੍ਵਾ ‘‘ਅਹੋਸਿ ਕਮ੍ਮਂ ਅਹੋਸਿ ਕਮ੍ਮਵਿਪਾਕੋ’’ਤਿ ਵੁਤ੍ਤਨ੍ਤਿ ਆਹ ‘‘ਯਂ ਕਮ੍ਮਂ ਅਤੀਤੇ ਆਯੂਹਿਤ’’ਨ੍ਤਿਆਦਿ. ਵਿਪਾਕਵਾਰਨ੍ਤਿ ਵਿਪਚ੍ਚਨਾਵਸਰਂ ਵਿਪਾਕਵਾਰਂ. ‘‘ਵਿਪਾਕਵਾਰਂ ਲਭਤੀ’’ਤਿ ਇਮਿਨਾ ਵੁਤ੍ਤਮੇਵਤ੍ਥਂ ‘‘ਪਟਿਸਨ੍ਧਿਂ ਜਨੇਸੀ’’ਤਿਆਦਿਨਾ ਵਿਭਾਵੇਤਿ. ਤਤ੍ਥ ਪਟਿਸਨ੍ਧਿਂ ਜਨੇਸੀਤਿ ਇਮਿਨਾ ਚ ਪਟਿਸਨ੍ਧਿਦਾਯਕਸ੍ਸ ਕਮ੍ਮਸ੍ਸ ਪਵਤ੍ਤਿਵਿਪਾਕਦਾਯਿਤਾਪਿ ਵੁਤ੍ਤਾ ਹੋਤਿ. ਪਵਤ੍ਤਿਵਿਪਾਕਸ੍ਸੇਵ ਪਨ ਦਾਯਕਂ ਰੂਪਜਨਕਸੀਸੇਨ ਵਦਤਿ. ਤਸ੍ਸੇਵ ਅਤੀਤਸ੍ਸ ਕਮ੍ਮਸ੍ਸ ਦਿਟ੍ਠਧਮ੍ਮਵੇਦਨੀਯਸ੍ਸ ਉਪਪਜ੍ਜਵੇਦਨੀਯਸ੍ਸ ਚ ਪਚ੍ਚਯਵੇਕਲ੍ਲੇਨ ਅਤੀਤਭਵੇਸੁਯੇਵ ਅਵਿਪਕ੍ਕਵਿਪਾਕਞ੍ਚ, ਅਤੀਤੇਯੇਵ ਪਰਿਨਿਬ੍ਬੁਤਸ੍ਸ ਦਿਟ੍ਠਧਮ੍ਮਵੇਦਨੀਯਉਪਪਜ੍ਜਵੇਦਨੀਯਅਪਰਪਰਿਯਾਯਵੇਦਨੀਯਸ੍ਸ ਕਮ੍ਮਸ੍ਸ ਅਵਿਪਕ੍ਕਵਿਪਾਕਞ੍ਚ ਗਹੇਤ੍ਵਾ ‘‘ਅਹੋਸਿ ਕਮ੍ਮਂ ਨਾਹੋਸਿ ਕਮ੍ਮਵਿਪਾਕੋ’’ਤਿਪਿ ਵੁਤ੍ਤਨ੍ਤਿ ਆਹ ‘‘ਯਂ ਪਨ ਵਿਪਾਕਵਾਰਂ ਨ ਲਭੀ’’ਤਿਆਦਿ.
ਅਤੀਤਸ੍ਸੇਵ ਕਮ੍ਮਸ੍ਸ ਅਵਿਪਕ੍ਕਵਿਪਾਕਸ੍ਸ ਪਚ੍ਚੁਪ੍ਪਨ੍ਨਭਵੇ ਪਚ੍ਚਯਸਮ੍ਪਤ੍ਤਿਯਾ ਵਿਪਚ੍ਚਮਾਨਂ ਵਿਪਾਕਂ ਗਹੇਤ੍ਵਾ ‘‘ਅਹੋਸਿ ਕਮ੍ਮਂ ਅਤ੍ਥਿ ਕਮ੍ਮਵਿਪਾਕੋ’’ਤਿ ਵੁਤ੍ਤਨ੍ਤਿ ਆਹ ‘‘ਯਂ ਪਨ ਅਤੀਤੇ ਆਯੂਹਿਤ’’ਨ੍ਤਿਆਦਿਮਾਹ. ਅਤੀਤਸ੍ਸੇਵ ਕਮ੍ਮਸ੍ਸ ਅਤਿਕ੍ਕਨ੍ਤਵਿਪਾਕਕਾਲਸ੍ਸ ਚ ਪਚ੍ਚੁਪ੍ਪਨ੍ਨਭਵੇ ਪਰਿਨਿਬ੍ਬਾਯਨ੍ਤਸ੍ਸ ਚ ਅਵਿਪਚ੍ਚਮਾਨਵਿਪਾਕਂ ਗਹੇਤ੍ਵਾ ‘‘ਅਹੋਸਿ ਕਮ੍ਮਂ ਨਤ੍ਥਿ ਕਮ੍ਮਵਿਪਾਕੋ’’ਤਿ ਵੁਤ੍ਤਨ੍ਤਿ ਆਹ ‘‘ਅਲਦ੍ਧਵਿਪਾਕਵਾਰ’’ਨ੍ਤਿਆਦਿ. ਅਤੀਤਸ੍ਸੇਵ ਕਮ੍ਮਸ੍ਸ ਵਿਪਾਕਾਰਹਸ੍ਸ ਅਵਿਪਕ੍ਕਵਿਪਾਕਸ੍ਸ ਅਨਾਗਤਭਵੇ ਪਚ੍ਚਯਸਮ੍ਪਤ੍ਤਿਯਾ ਵਿਪਚ੍ਚਿਤਬ੍ਬਂ ਵਿਪਾਕਂ ਗਹੇਤ੍ਵਾ ‘‘ਅਹੋਸਿ ਕਮ੍ਮਂ ਭਵਿਸ੍ਸਤਿ ਕਮ੍ਮਵਿਪਾਕੋ’’ਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਯਂ ਪਨ ਅਤੀਤੇ ਆਯੂਹਿਤ’’ਨ੍ਤਿਆਦਿਮਾਹ. ਅਤੀਤਸ੍ਸੇਵ ਕਮ੍ਮਸ੍ਸ ਅਤਿਕ੍ਕਨ੍ਤਵਿਪਾਕਕਾਲਸ੍ਸ ਚ ਅਨਾਗਤਭਵੇ ਪਰਿਨਿਬ੍ਬਾਯਿਤਬ੍ਬਸ੍ਸ ਅਵਿਪਚ੍ਚਿਤਬ੍ਬਵਿਪਾਕਞ੍ਚ ਗਹੇਤ੍ਵਾ ‘‘ਅਹੋਸਿ ਕਮ੍ਮਂ ਨ ਭਵਿਸ੍ਸਤਿ ਕਮ੍ਮਵਿਪਾਕੋ’’ਤਿ ਵੁਤ੍ਤਨ੍ਤਿ ਆਹ ‘‘ਯਂ ਅਨਾਗਤੇ ਵਿਪਾਕਵਾਰਂ ਨ ਲਭਿਸ੍ਸਤੀ’’ਤਿਆਦਿ. ਏਵਂ ਤਾਵ ਅਤੀਤਕਮ੍ਮਂ ਅਤੀਤਪਚ੍ਚੁਪ੍ਪਨ੍ਨਾਨਾਗਤਵਿਪਾਕਾਵਿਪਾਕਵਸੇਨ ਛਧਾ ਦਸ੍ਸਿਤਂ.
ਇਦਾਨਿ ਪਚ੍ਚੁਪ੍ਪਨ੍ਨਭਵੇ ਕਤਸ੍ਸ ਦਿਟ੍ਠਧਮ੍ਮਵੇਦਨੀਯਸ੍ਸ ਇਧੇਵ ਵਿਪਚ੍ਚਮਾਨਂ ਵਿਪਾਕਂ ਗਹੇਤ੍ਵਾ ‘‘ਅਤ੍ਥਿ ਕਮ੍ਮਂ ਅਤ੍ਥਿ ਕਮ੍ਮਵਿਪਾਕੋ’’ਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਯਂ ਪਨ ਏਤਰਹਿ ਆਯੂਹਿਤ’’ਨ੍ਤਿਆਦਿਮਾਹ. ਯਂ ਪਨ ਏਤਰਹਿ ਵਿਪਾਕਵਾਰਂ ਨ ਲਭਤੀਤਿਆਦਿਨਾ ਤਸ੍ਸੇਵ ਪਚ੍ਚੁਪ੍ਪਨ੍ਨਸ੍ਸ ਕਮ੍ਮਸ੍ਸ ਪਚ੍ਚਯਵੇਕਲ੍ਲੇਨ ਇਧ ਅਵਿਪਚ੍ਚਮਾਨਞ੍ਚ ਦਿਟ੍ਠੇਵ ਧਮ੍ਮੇ ਪਰਿਨਿਬ੍ਬਾਯਨ੍ਤਸ੍ਸ ਇਧ ਅਵਿਪਚ੍ਚਮਾਨਞ੍ਚ ਵਿਪਾਕਂ ਗਹੇਤ੍ਵਾ ‘‘ਅਤ੍ਥਿ ਕਮ੍ਮਂ ਨਤ੍ਥਿ ਕਮ੍ਮਵਿਪਾਕੋ’’ਤਿ ਵੁਤ੍ਤਨ੍ਤਿ ਦਸ੍ਸੇਤਿ. ਪਚ੍ਚੁਪ੍ਪਨ੍ਨਸ੍ਸੇਵ ਕਮ੍ਮਸ੍ਸ ਉਪਪਜ੍ਜਵੇਦਨੀਯਸ੍ਸ ਅਪਰਪਰਿਯਾਯਵੇਦਨੀਯਸ੍ਸ ਚ ਅਨਾਗਤਭਵੇ ਵਿਪਚ੍ਚਿਤਬ੍ਬਵਿਪਾਕਂ ਗਹੇਤ੍ਵਾ ‘‘ਅਤ੍ਥਿ ਕਮ੍ਮਂ ਭਵਿਸ੍ਸਤਿ ਕਮ੍ਮਵਿਪਾਕੋ’’ਤਿ ਵੁਤ੍ਤਨ੍ਤਿ ਆਹ ‘‘ਯਂ ਪਨ ਏਤਰਹਿ ਆਯੂਹਿਤਂ ਅਨਾਗਤੇ ਵਿਪਾਕਵਾਰਂ ਲਭਿਸ੍ਸਤੀ’’ਤਿਆਦਿ. ਪਚ੍ਚੁਪ੍ਪਨ੍ਨਸ੍ਸੇਵ ਕਮ੍ਮਸ੍ਸ ਉਪਪਜ੍ਜਵੇਦਨੀਯਸ੍ਸ ਪਚ੍ਚਯਵੇਕਲ੍ਲੇਨ ਅਨਾਗਤਭਵੇ ਅਵਿਪਚ੍ਚਿਤਬ੍ਬਞ੍ਚ ਅਨਾਗਤਭਵੇ ਪਰਿਨਿਬ੍ਬਾਯਿਤਬ੍ਬਸ੍ਸ ਅਪਰਪਰਿਯਾਯਵੇਦਨੀਯਸ੍ਸ ਅਵਿਪਚ੍ਚਿਤਬ੍ਬਞ੍ਚ ਵਿਪਾਕਂ ਗਹੇਤ੍ਵਾ ‘‘ਅਤ੍ਥਿ ਕਮ੍ਮਂ ਨ ਭਵਿਸ੍ਸਤਿ ਕਮ੍ਮਵਿਪਾਕੋ’’ਤਿ ਵੁਤ੍ਤਨ੍ਤਿ ਆਹ ‘‘ਯਂ ਪਨ ਵਿਪਾਕਵਾਰਂ ਨ ਲਭਿਸ੍ਸਤੀ’’ਤਿਆਦਿ.
ਏਵਞ੍ਚ ਪਚ੍ਚੁਪ੍ਪਨ੍ਨਕਮ੍ਮਂ ਪਚ੍ਚੁਪ੍ਪਨ੍ਨਾਨਾਗਤਵਿਪਾਕਾਵਿਪਾਕਵਸੇਨ ਚਤੁਧਾ ਦਸ੍ਸੇਤ੍ਵਾ ਇਦਾਨਿ ਅਨਾਗਤਭਵੇ ਕਤਸ੍ਸ ਕਮ੍ਮਸ੍ਸ ਅਨਾਗਤੇ ਵਿਪਚ੍ਚਿਤਬ੍ਬਵਿਪਾਕਂ ਗਹੇਤ੍ਵਾ ‘‘ਭਵਿਸ੍ਸਤਿ ਕਮ੍ਮਂ ਭਵਿਸ੍ਸਤਿ ਕਮ੍ਮਵਿਪਾਕੋ’’ਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਯਂ ਪਨਾਨਾਗਤੇ ਆਯੂਹਿਸ੍ਸਤੀ’’ਤਿਆਦਿਮਾਹ. ਤਸ੍ਸੇਵ ਅਨਾਗਤਸ੍ਸ ਕਮ੍ਮਸ੍ਸ ਪਚ੍ਚਯਵੇਕਲ੍ਲੇਨ ਅਵਿਪਚ੍ਚਿਤਬ੍ਬਞ੍ਚ ਅਨਾਗਤਭਵੇ ਪਰਿਨਿਬ੍ਬਾਯਿਤਬ੍ਬਸ੍ਸ ਅਵਿਪਚ੍ਚਿਤਬ੍ਬਞ੍ਚ ਵਿਪਾਕਂ ਗਹੇਤ੍ਵਾ ‘‘ਭਵਿਸ੍ਸਤਿ ਕਮ੍ਮਂ ਨ ਭਵਿਸ੍ਸਤਿ ਕਮ੍ਮਵਿਪਾਕੋ’’ਤਿ ਵੁਤ੍ਤਨ੍ਤਿ ਆਹ ‘‘ਯਂ ਪਨ ਵਿਪਾਕਵਾਰਂ ਨ ਲਭਿਸ੍ਸਤੀ’’ਤਿਆਦਿ. ਏਵਂ ਅਨਾਗਤਕਮ੍ਮਂ ਅਨਾਗਤਵਿਪਾਕਾਵਿਪਾਕਵਸੇਨ ਦ੍ਵਿਧਾ ਦਸ੍ਸਿਤਂ. ਏਵਨ੍ਤਿਆਦਿਨਾ ਯਥਾਵੁਤ੍ਤਦ੍ਵਾਦਸਕਮ੍ਮਾਨਿ ਨਿਗਮੇਤਿ.
ਇਦਾਨਿ ਸਬ੍ਬੇਸੁ ਯਥਾਵੁਤ੍ਤਪ੍ਪਭੇਦੇਸੁ ਕਮ੍ਮੇਸੁ ਯਾਨਿ ਅਭਿਧਮ੍ਮਨਯੇਨ ਵਿਭਤ੍ਤਾਨਿ ਸੋਲ਼ਸ ਕਮ੍ਮਾਨਿ, ਯਾਨਿ ਚ ਪਟਿਸਮ੍ਭਿਦਾਮਗ੍ਗਪਰਿਯਾਯੇਨ ਵਿਭਤ੍ਤਾਨਿ ਦ੍ਵਾਦਸ ਕਮ੍ਮਾਨਿ, ਤਾਨਿ ਸਬ੍ਬਾਨਿ ਸੁਤ੍ਤਨ੍ਤਿਕਪਰਿਯਾਯੇਨ ਵਿਭਤ੍ਤੇਸੁ ਏਕਾਦਸਵਿਧੇਸੁਯੇਵ ਕਮ੍ਮੇਸੁ ਅਨ੍ਤੋਗਧਾਨਿ, ਤਾਨਿ ਚ ਦਿਟ੍ਠਧਮ੍ਮਵੇਦਨੀਯਉਪਪਜ੍ਜਵੇਦਨੀਯਅਪਰਪਰਿਯਾਯਵੇਦਨੀਯੇਸੁ ਤੀਸੁਯੇਵ ਅਨ੍ਤੋਗਧਾਨੀਤਿ ਦਸ੍ਸੇਨ੍ਤੋ ‘‘ਇਤਿ ਇਮਾਨਿ ਚੇਵਾ’’ਤਿਆਦਿਮਾਹ. ਤਤ੍ਥ ਅਤ੍ਤਨੋ ਠਾਨਾ ਓਸਕ੍ਕਿਤ੍ਵਾਤਿ ਅਤ੍ਤਨੋ ਯਥਾਵੁਤ੍ਤਦ੍ਵਾਦਸਸੋਲ਼ਸਪ੍ਪਭੇਦਸਙ੍ਖਾਤਟ੍ਠਾਨਤੋ ਪਰਿਹਾਪੇਤ੍ਵਾ, ਤਂ ਤਂ ਪਭੇਦਂ ਹਿਤ੍ਵਾਤਿ ਵੁਤ੍ਤਂ ਹੋਤਿ. ਏਕਾਦਸ ਕਮ੍ਮਾਨਿਯੇਵ ਭਵਨ੍ਤੀਤਿ ਤਂਸਭਾਵਾਨਂਯੇਵ ਕਮ੍ਮਾਨਂ ਦ੍ਵਾਦਸਧਾ ਸੋਲ਼ਸਧਾ ਚ ਵਿਭਜਿਤ੍ਵਾ ਵੁਤ੍ਤਤ੍ਤਾ ਏਵਮਾਹ. ਯਸ੍ਮਾ ਏਕਾਦਸਧਾ ਵੁਤ੍ਤਕਮ੍ਮਾਨਿ ਦਿਟ੍ਠਧਮ੍ਮਵੇਦਨੀਯਾਨਿ ਵਾ ਸਿਯੁਂ ਉਪਪਜ੍ਜਵੇਦਨੀਯਾਨਿ ਵਾ ਅਪਰਪਰਿਯਾਯਵੇਦਨੀਯਾਨਿ ਵਾ, ਤਸ੍ਮਾ ਵੁਤ੍ਤਂ ‘‘ਤੀਣਿਯੇਵ ਕਮ੍ਮਾਨਿ ਹੋਨ੍ਤੀ’’ਤਿ.
ਤੇਸਂ ਸਙ੍ਕਮਨਂ ਨਤ੍ਥੀਤਿ ਤੇਸਂ ਦਿਟ੍ਠਧਮ੍ਮਵੇਦਨੀਯਾਦੀਨਂ ਸਙ੍ਕਮਨਂ ਨਤ੍ਥਿ, ਸਙ੍ਕਮਨਂ ਉਪਪਜ੍ਜਵੇਦਨੀਯਾਦਿਭਾਵਾਪਤ੍ਤਿ. ਤੇਨਾਹ ‘‘ਯਥਾਠਾਨੇਯੇਵ ਤਿਟ੍ਠਨ੍ਤੀ’’ਤਿ, ਅਤ੍ਤਨੋ ਦਿਟ੍ਠਧਮ੍ਮਵੇਦਨੀਯਾਦਿਟ੍ਠਾਨੇਯੇਵ ਤਿਟ੍ਠਨ੍ਤੀਤਿ ਅਤ੍ਥੋ. ਦਿਟ੍ਠਧਮ੍ਮਵੇਦਨੀਯਮੇਵ ਹਿ ਪਠਮਜਵਨਚੇਤਨਾ, ਉਪਪਜ੍ਜਵੇਦਨੀਯਮੇਵ ਸਤ੍ਤਮਜਵਨਚੇਤਨਾ, ਮਜ੍ਝੇ ਪਞ੍ਚ ਅਪਰਪਰਿਯਾਯਵੇਦਨੀਯਮੇਵਾਤਿ ਨਤ੍ਥਿ ਤੇਸਂ ਅਞ੍ਞਮਞ੍ਞਂ ਸਙ੍ਗਹੋ, ਤਸ੍ਮਾ ਅਤ੍ਤਨੋ ਅਤ੍ਤਨੋ ਦਿਟ੍ਠਧਮ੍ਮਵੇਦਨੀਯਾਦਿਸਭਾਵੇਯੇਵ ਤਿਟ੍ਠਨ੍ਤਿ. ਤੇਨੇਵ ਭਗਵਤਾ – ‘‘ਦਿਟ੍ਠੇ ਵਾ ਧਮ੍ਮੇ, ਉਪਪਜ੍ਜ ਵਾ, ਅਪਰੇ ਵਾ ਪਰਿਯਾਯੇ’’ਤਿ ਤਯੋ ਵਿਕਪ੍ਪਾ ਦਸ੍ਸਿਤਾ. ਤੇਨੇਵਾਹ ‘‘ਦਿਟ੍ਠਧਮ੍ਮਵੇਦਨੀਯਂ ਕਮ੍ਮ’’ਨ੍ਤਿਆਦਿ. ਤਤ੍ਥ ‘‘ਦਿਟ੍ਠੇ ਵਾ ਧਮ੍ਮੇ’’ਤਿ ਸਤ੍ਥਾ ਨ ਵਦੇਯ੍ਯਾਤਿ ਅਸਤਿ ਨਿਯਾਮੇ ਨ ਵਦੇਯ੍ਯ. ਯਸ੍ਮਾ ਪਨ ਤੇਸਂ ਸਙ੍ਕਮਨਂ ਨਤ੍ਥਿ, ਨਿਯਤਸਭਾਵਾ ਹਿ ਤਾਨਿ, ਤਸ੍ਮਾ ਸਤ੍ਥਾ ‘‘ਦਿਟ੍ਠੇ ਵਾ ਧਮ੍ਮੇ’’ਤਿਆਦਿਮਵੋਚ.
ਸੁਕ੍ਕਪਕ੍ਖੇਤਿ ‘‘ਅਲੋਭੋ ਨਿਦਾਨਂ ਕਮ੍ਮਾਨਂ ਸਮੁਦਯਾਯਾ’’ਤਿਆਦਿਨਾ ਆਗਤੇ ਕੁਸਲਪਕ੍ਖੇ. ਨਿਰੁਦ੍ਧੇਤਿ ਅਰਿਯਮਗ੍ਗਾਧਿਗਮੇਨ ਅਨੁਪ੍ਪਾਦਨਿਰੋਧੇਨ ਨਿਰੁਦ੍ਧੇ. ਤਾਲਵਤ੍ਥੁ ਵਿਯ ਕਤਨ੍ਤਿ ਯਥਾ ਤਾਲੇ ਛਿਨ੍ਨੇ ਠਿਤਟ੍ਠਾਨੇ ਕਿਞ੍ਚਿ ਨ ਹੋਤਿ, ਏਵਂ ਕਮ੍ਮੇ ਪਹੀਨੇ ਕਿਞ੍ਚਿ ਨ ਹੋਤੀਤਿ ਅਤ੍ਥੋ. ਤਾਲਵਤ੍ਥੂਤਿ ਵਾ ਮਤ੍ਥਕਚ੍ਛਿਨ੍ਨੋ ਤਾਲੋ ਵੁਤ੍ਤੋ ਪਤ੍ਤਫਲਮਕੁਲਸੂਚਿਆਦੀਨਂ ਅਭਾਵਤੋ. ਤਤੋ ਏਵ ਸੋ ਅਵਿਰੁਲ਼੍ਹਿਧਮ੍ਮੋ. ਏਵਂ ਪਹੀਨਕਮ੍ਮੋ ਸਤ੍ਤਸਨ੍ਤਾਨੋ. ਤੇਨਾਹ ‘‘ਮਤ੍ਥਕਚ੍ਛਿਨ੍ਨਤਾਲੋ ਵਿਯਾ’’ਤਿ. ਅਨੁਅਭਾਵਂ ਕਤਂ ਪਚ੍ਛਤੋ ਧਮ੍ਮਪ੍ਪਵਤ੍ਤਿਯਾ ਅਭਾਵਤੋ. ਤੇਨਾਹ ‘‘ਯਥਾ’’ਤਿਆਦਿ. ਅਪ੍ਪਵਤ੍ਤਿਕਤਕਾਲੋ ਵਿਯਾਤਿ ਬੀਜਾਨਂ ਸਬ੍ਬਸੋ ਅਪ੍ਪਵਤ੍ਤਿਯਾ ਕਤਕਾਲੋ ਵਿਯ. ਛਿਨ੍ਨਮੂਲਕਾਨਨ੍ਤਿ ਕਿਲੇਸਮੂਲਸ੍ਸ ਸਬ੍ਬਸੋ ਛਿਨ੍ਨਤ੍ਤਾ ਛਿਨ੍ਨਮੂਲਕਾਨਂ. ਕਿਲੇਸਾ ਹਿ ਖਨ੍ਧਾਨਂ ਮੂਲਾਨਿ.
ਵੇਦਨੀਯਨ੍ਤਿ ਵੇਦਿਤਬ੍ਬਂ. ਅਞ੍ਞਂ ਵਤ੍ਥੁ ਨਤ੍ਥੀਤਿ ਅਞ੍ਞਂ ਅਧਿਟ੍ਠਾਨਂ ਨਤ੍ਥਿ. ਸੁਗਤਿਸਞ੍ਞਿਤਾਪਿ ਹੇਟ੍ਠਿਮਨ੍ਤੇਨ ਸਙ੍ਖਾਰਦੁਕ੍ਖਤੋ ਅਨਪਗਤਤ੍ਤਾ ਦੁਗ੍ਗਤਿਯੋ ਏਵਾਤਿ ਵੁਤ੍ਤਂ ‘‘ਸਬ੍ਬਾ ਦੁਗ੍ਗਤਿਯੋ’’ਤਿ, ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ. ਲੋਭੋ ਏਤਸ੍ਸ ਕਾਰਣਭੂਤੋ ਅਤ੍ਥੀਤਿ ਲੋਭਂ, ਲੋਭਨਿਮਿਤ੍ਤਂ ਕਮ੍ਮਂ. ਤਥਾ ਦੋਸਨ੍ਤਿ ਏਤ੍ਥਾਪਿ. ਤੇਨਾਹ ‘‘ਲੋਭਦੋਸਸੀਸੇਨ ਲੋਭਜਞ੍ਚ ਦੋਸਜਞ੍ਚ ਕਮ੍ਮਮੇਵ ਨਿਦ੍ਦਿਟ੍ਠ’’ਨ੍ਤਿ. ਵਟ੍ਟਵਿਵਟ੍ਟਨ੍ਤਿ ਵਟ੍ਟਞ੍ਚ ਵਿਵਟ੍ਟਞ੍ਚ.
ਨਿਦਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਹਤ੍ਥਕਸੁਤ੍ਤਵਣ੍ਣਨਾ
੩੫. ਪਞ੍ਚਮੇ ਆਲ਼ਵਿਯਨ੍ਤਿ ਆਲ਼ਵਿਰਟ੍ਠੇ, ਨ ਆਲ਼ਵਿਨਗਰੇ. ਤੇਨਾਹ ‘‘ਆਲ਼ਵਿਯਨ੍ਤਿ ਆਲ਼ਵਿਰਟ੍ਠੇ’’ਤਿ. ਅਥਾਤਿ ਅਵਿਚ੍ਛੇਦਤ੍ਥੇ ਨਿਪਾਤੋ. ਤਤ੍ਥ ਭਗਵਤੋ ਨਿਸਜ੍ਜਾਯ ਅਵਿਚ੍ਛਿਨ੍ਨਾਯ ਏਵਾਤਿ ਅਤ੍ਥੋ. ਤੇਨਾਹ ‘‘ਏਵ’’ਨ੍ਤਿਆਦਿ. ਹਤ੍ਥਤੋ ਹਤ੍ਥਂ ਗਤਤ੍ਤਾਤਿ ਆਲ਼ਵਕਸ੍ਸ ਯਕ੍ਖਸ੍ਸ ਹਤ੍ਥਤੋ ਸਮ੍ਮਾਸਮ੍ਬੁਦ੍ਧਸ੍ਸ ਹਤ੍ਥਂ, ਤਤੋ ਰਾਜਪੁਰਿਸਾਨਂ ਹਤ੍ਥਂ ਗਤਤ੍ਤਾ.
ਮਾਘਸ੍ਸਾਤਿ ਮਾਘਮਾਸਸ੍ਸ. ਏਵਂ ਫਗ੍ਗੁਨਸ੍ਸਾਤਿ ਏਤ੍ਥਾਪਿ. ਖੁਰਨ੍ਤਰੇਹਿ ਕਦ੍ਦਮੋ ਉਗ੍ਗਨ੍ਤ੍ਵਾ ਤਿਟ੍ਠਤੀਤਿ ਕਦ੍ਦਮੋ ਖੁਰਨ੍ਤਰੇਹਿ ਉਗ੍ਗਨ੍ਤ੍ਵਾ ਤਿਟ੍ਠਤਿ. ਚਤੂਹਿ ਦਿਸਾਹਿ ਵਾਯਨ੍ਤੋ ਵਾਤੋ ਵੇਰਮ੍ਭੋਤਿ ਵੁਚ੍ਚਤਿ ਵੇਰਮ੍ਭਵਾਤਸਦਿਸਤ੍ਤਾ.
ਪਞ੍ਚਦ੍ਵਾਰਕਾਯਨ੍ਤਿ ਪਞ੍ਚਦ੍ਵਾਰਾਨੁਸਾਰੇਨ ਪਵਤ੍ਤਂ ਵਿਞ੍ਞਾਣਕਾਯਂ. ਖੋਭਯਮਾਨਾਤਿ ਕਿਲੇਸਖੋਭਵਸੇਨ ਖੋਭਯਮਾਨਾ ਚਿਤ੍ਤਂ ਸਙ੍ਖੋਭਂ ਕਰੋਨ੍ਤਾ. ਚੇਤਸਿਕਾਤਿ ਮਨੋਦ੍ਵਾਰਿਕਚਿਤ੍ਤਸਨ੍ਨਿਸ੍ਸਿਤਾ. ਤੇਨਾਹ ‘‘ਮਨੋਦ੍ਵਾਰਂ ਖੋਭਯਮਾਨਾ’’ਤਿ. ਸੋ ਰਾਗੋਤਿ ਤਂਸਦਿਸੋ ਰਾਗੋ. ਭਵਤਿ ਹਿ ਤਂਸਦਿਸੇ ਤਬ੍ਬੋਹਾਰੋ ਯਥਾ ‘‘ਸਾ ਏਵ ਤਿਤ੍ਤਿਰਿਕਾ, ਤਾਨਿ ਏਵ ਓਸਧਾਨੀ’’ਤਿ. ਯਾਦਿਸੋ ਹਿ ਏਕਸ੍ਸ ਪੁਗ੍ਗਲਸ੍ਸ ਉਪ੍ਪਜ੍ਜਨਕਰਾਗੋ, ਤਾਦਿਸੋ ਏਵ ਤਤੋ ਅਞ੍ਞਸ੍ਸ ਰਾਗਭਾਵਸਾਮਞ੍ਞਤੋ. ਤੇਨ ਵੁਤ੍ਤਂ ‘‘ਤਥਾਰੂਪੋ ਰਾਗੋ’’ਤਿਆਦਿ. ਇਚ੍ਛਿਤਾਲਾਭੇਨ ਰਜਨੀਯੇਸੁ ਵਾ ਨਿਰੁਦ੍ਧੇਸੁ ਵਤ੍ਥੂਸੁ ਦੋਮਨਸ੍ਸੁਪ੍ਪਤ੍ਤਿਯਾ ਦੋਸਪਰਿਲ਼ਾਹਾਨਂ ਸਮ੍ਭਵੋ ਵੇਦਿਤਬ੍ਬੋ.
ਨ ਲਿਮ੍ਪਤਿ ਅਨੁਪਲਿਤ੍ਤਚਿਤ੍ਤਤ੍ਤਾ. ਸੀਤਿਭੂਤੋ ਨਿਬ੍ਬੁਤਸਬ੍ਬਪਰਿਲ਼ਾਹਤ੍ਤਾ. ਆਸਤ੍ਤਿਯੋ ਵੁਚ੍ਚਨ੍ਤਿ ਤਣ੍ਹਾਯੋ ਤਤ੍ਥ ਤਤ੍ਥ ਆਸਞ੍ਜਨਟ੍ਠੇਨ. ਦਰਥਨ੍ਤਿ ਪਰਿਲ਼ਾਹਜਾਤਂ. ਚੇਤਸੋਤਿ ਸਾਮਿਵਚਨਂ.
ਹਤ੍ਥਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਦੇਵਦੂਤਸੁਤ੍ਤਵਣ੍ਣਨਾ
੩੬. ਛਟ੍ਠੇ ਦੇਵਦੂਤਾਨੀਤਿ ਲਿਙ੍ਗਵਿਪਲ੍ਲਾਸਂ ਕਤ੍ਵਾ ਵੁਤ੍ਤਨ੍ਤਿ ਆਹ ‘‘ਦੇਵਦੂਤਾ’’ਤਿ, ਉਭਯਲਿਙ੍ਗਂ ਵਾ ਏਤਂ ਪਦਂ, ਤਸ੍ਮਾ ਨਪੁਂਸਕਲਿਙ੍ਗਵਸੇਨ ਪਾਲ਼ਿਯਂ ਵੁਤ੍ਤਸ੍ਸ ਪੁਲ੍ਲਿਙ੍ਗਵਸੇਨ ਅਤ੍ਥਦਸ੍ਸਨਂ ਕਤਂ. ਦੇਵੋਤਿ ਮਚ੍ਚੂਤਿ ਅਭਿਭਵਨਟ੍ਠੇਨ ਸਤ੍ਤਾਨਂ ਅਤ੍ਤਨੋ ਵਸੇ ਵਤ੍ਤਾਪਨਤੋ ਮਚ੍ਚੁਰਾਜਾ ‘‘ਦੇਵੋ’’ਤਿ ਵੁਚ੍ਚਤਿ. ਯਥਾ ਹਿ ਦੇਵੋ ਪਕਤਿਸਤ੍ਤੇ ਅਭਿਭਵਤਿ, ਏਵਂ ਮਚ੍ਚੁ ਸਬ੍ਬਸਤ੍ਤੇ ਅਭਿਭਵਤਿ, ਤਸ੍ਮਾ ਦੇਵੋ ਵਿਯਾਤਿ ਦੇਵੋ. ‘‘ਤਸ੍ਸ ਦੂਤਾ’’ਤਿ ਵਤ੍ਵਾ ਇਦਾਨਿਸ੍ਸ ਦੂਤੇ ਤੇਸਂ ਦੂਤਭਾਵਞ੍ਚ ਵਿਭਾਵੇਤੁਂ ‘‘ਜਿਣ੍ਣਬ੍ਯਾਧਿਮਤਾ ਹੀ’’ਤਿਆਦਿ ਵੁਤ੍ਤਂ. ਤੇਨ ਚੋਦਨਤ੍ਥੇਨ ਦੇਵਸ੍ਸ ਦੂਤਾ ਵਿਯਾਤਿ ਦੇਵਦੂਤਾਤਿ ਦਸ੍ਸੇਤਿ. ‘‘ਅਹਂ ਅਸੁਕਂ ਪਮਦ੍ਦਿਤੁਂ ਆਗਮਿਸ੍ਸਾਮਿ, ਤੁਵਂ ਤਸ੍ਸ ਕੇਸੇ ਗਹੇਤ੍ਵਾ ਮਾ ਵਿਸ੍ਸਜ੍ਜੇਹੀ’’ਤਿ ਮਚ੍ਚੁਦੇਵਸ੍ਸ ਆਣਾਕਰਾ ਦੂਤਾ ਵਿਯਾਤਿ ਹਿ ਦੂਤਾਤਿ ਵੁਚ੍ਚਨ੍ਤਿ.
ਇਦਾਨਿ ਸਦ੍ਧਾਤਬ੍ਬਟ੍ਠੇਨ ਦੇਵਾ ਵਿਯ ਦੂਤਾਤਿ ਦੇਵਦੂਤਾਤਿ ਦਸ੍ਸੇਨ੍ਤੋ ‘‘ਦੇਵਾ ਵਿਯ ਦੂਤਾ’’ਤਿਆਦਿਮਾਹ. ਤਤ੍ਥ ਅਲਙ੍ਕਤਪ੍ਪਟਿਯਤ੍ਤਾਯਾਤਿ ਇਦਂ ਅਤ੍ਤਨੋ ਦਿਬ੍ਬਾਨੁਭਾਵਂ ਆਵਿਕਤ੍ਵਾ ਠਿਤਾਯਾਤਿ ਦਸ੍ਸਨਤ੍ਥਂ ਵੁਤ੍ਤਂ. ਦੇਵਤਾਯ ਬ੍ਯਾਕਰਣਸਦਿਸਮੇਵ ਹੋਤਿ ਨ ਚਿਰਸ੍ਸੇਵ ਜਰਾਬ੍ਯਾਧਿਮਰਣਸ੍ਸ ਸਮ੍ਭਵਤੋ. ਵਿਸੁਦ੍ਧਿਦੇਵਾਨਨ੍ਤਿ ਖੀਣਾਸਵਬ੍ਰਹ੍ਮਾਨਂ. ਤੇ ਹਿ ਚਰਿਮਭਵੇ ਬੋਧਿਸਤ੍ਤਾਨਂ ਜਿਣ੍ਣਾਦਿਭੇਦਂ ਦਸ੍ਸੇਨ੍ਤਿ, ਤਸ੍ਮਾ ਅਨ੍ਤਿਮਭਵਿਕਬੋਧਿਸਤ੍ਤਾਨਂ ਵਿਸੁਦ੍ਧਿਦੇਵੇਹਿ ਉਪਟ੍ਠਾਪਿਤਭਾਵਂ ਉਪਾਦਾਯ ਤਦਞ੍ਞੇਸਮ੍ਪਿ ਤੇਹਿ ਅਨੁਪਟ੍ਠਾਪਿਤਾਨਮ੍ਪਿ ਤਥਾ ਵੋਹਰਿਤਬ੍ਬਤਾ ਪਰਿਯਾਯਸਿਦ੍ਧਾਤਿ ਵੇਦਿਤਬ੍ਬਾ. ਦਿਸ੍ਵਾਵਾਤਿ ਵਿਸੁਦ੍ਧਿਦੇਵੇਹਿ ਦਸ੍ਸਿਤੇ ਦਿਸ੍ਵਾਵ. ਤਤੋਯੇਵ ਹਿ ਤੇ ਵਿਸੁਦ੍ਧਿਦੇਵਾਨਂ ਦੂਤਾ ਵੁਤ੍ਤਾ.
ਕਸ੍ਮਾ ਆਰਦ੍ਧਨ੍ਤਿ ਕੇਵਲਂ ਦੇਵਦੂਤੇ ਏਵ ਸਰੂਪਤੋ ਅਦਸ੍ਸੇਤ੍ਵਾਤਿ ਅਧਿਪ੍ਪਾਯੋ. ਦੇਵਾਨਂ ਦੂਤਾਨਂ ਦਸ੍ਸਨੂਪਾਯਤ੍ਤਾ ਤਥਾ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਦੇਵਦੂਤਾ…ਪੇ… ਸਮਨੁਯੁਞ੍ਜਤੀ’’ਤਿ ਆਹ. ਤਤ੍ਥ ਦੇਵਦੂਤਾ…ਪੇ… ਦਸ੍ਸਨਤ੍ਥਨ੍ਤਿ ਦੇਵਦੂਤਾਨਂ ਅਨੁਯੁਞ੍ਜਨਟ੍ਠਾਨੂਪਗਸ੍ਸ ਕਮ੍ਮਸ੍ਸ ਦਸ੍ਸਨਤ੍ਥਂ.
ਏਕਚ੍ਚੇ ਥੇਰਾਤਿ ਅਨ੍ਧਕਾਦਿਕੇ ਵਿਞ੍ਞਾਣਵਾਦਿਨੋ ਚ ਸਨ੍ਧਾਯ ਵਦਤਿ. ਨੇਰਯਿਕੇ ਨਿਰਯੇ ਪਾਲੇਨ੍ਤਿ ਤਤੋ ਨਿਗ੍ਗਨ੍ਤੁਂ ਅਪ੍ਪਦਾਨਵਸੇਨ ਰਕ੍ਖਨ੍ਤੀਤਿ ਨਿਰਯਪਾਲਾ. ਅਥ ਵਾ ਨਿਰਯਪਾਲਤਾਯ ਨੇਰਯਿਕਾਨਂ ਨਿਰਯਦੁਕ੍ਖੇਨ ਪਰਿਯੋਨਦ੍ਧਾਯ ਅਲਂ ਸਮਤ੍ਥਾਤਿ ਨਿਰਯਪਾਲਾ. ਤਨ੍ਤਿ ‘‘ਨਤ੍ਥਿ ਨਿਰਯਪਾਲਾ’’ਤਿ ਵਚਨਂ. ਪਟਿਸੇਧਿਤਮੇਵਾਤਿ ‘‘ਅਤ੍ਥਿ ਨਿਰਯੇਸੁ ਨਿਰਯਪਾਲਾ ਅਤ੍ਥਿ ਚ ਕਾਰਣਿਕਾ’’ਤਿਆਦਿਨਾ ਨਯੇਨ ਅਭਿਧਮ੍ਮੇ (ਕਥਾ. ੮੬੬) ਪਟਿਸੇਧਿਤਮੇਵ. ਯਦਿ ਨਿਰਯਪਾਲਾ ਨਾਮ ਨ ਸਿਯੁਂ, ਕਮ੍ਮਕਾਰਣਾਪਿ ਨ ਭਵੇਯ੍ਯ. ਸਤਿ ਹਿ ਕਾਰਣਿਕੇ ਕਮ੍ਮਕਾਰਣਾਯ ਭਵਿਤਬ੍ਬਨ੍ਤਿ ਅਧਿਪ੍ਪਾਯੋ. ਤੇਨਾਹ ‘‘ਯਥਾ ਹੀ’’ਤਿਆਦਿ. ਏਤ੍ਥਾਹ – ‘‘ਕਿਂ ਪਨੇਤੇ ਨਿਰਯਪਾਲਾ ਨੇਰਯਿਕਾ, ਉਦਾਹੁ ਅਨੇਰਯਿਕਾ’’ਤਿ. ਕਿਞ੍ਚੇਤ੍ਥ – ਯਦਿ ਤਾਵ ਨੇਰਯਿਕਾ ਨਿਰਯਸਂਵਤ੍ਤਨਿਯੇਨ ਕਮ੍ਮੇਨ ਨਿਬ੍ਬਤ੍ਤਾ, ਸਯਮ੍ਪਿ ਨਿਰਯਦੁਕ੍ਖਂ ਪਚ੍ਚਨੁਭਵੇਯ੍ਯੁਂ, ਤਥਾ ਸਤਿ ਅਞ੍ਞੇਸਂ ਨੇਰਯਿਕਾਨਂ ਘਾਤਨਾਯ ਅਸਮਤ੍ਥਾ ਸਿਯੁਂ, ‘‘ਇਮੇ ਨੇਰਯਿਕਾ ਇਮੇ ਨਿਰਯਪਾਲਾ’’ਤਿ ਵਵਤ੍ਥਾਨਞ੍ਚ ਨ ਸਿਯਾ. ਯੇ ਚ ਯੇ ਘਾਤੇਨ੍ਤਿ, ਤੇਹਿ ਸਮਾਨਰੂਪਬਲਪ੍ਪਮਾਣੇਹਿ ਇਤਰੇਸਂ ਭਯਸਨ੍ਤਾਸਾ ਨ ਸਿਯੁਂ. ਅਥ ਅਨੇਰਯਿਕਾ, ਨੇਸਂ ਤਤ੍ਥ ਕਥਂ ਸਮ੍ਭਵੋਤਿ? ਵੁਚ੍ਚਤੇ – ਅਨੇਰਯਿਕਾ ਨਿਰਯਪਾਲਾ ਅਨਿਰਯਗਤਿਸਂਵਤ੍ਤਨਿਯਕਮ੍ਮਨਿਬ੍ਬਤ੍ਤਿਤੋ. ਨਿਰਯੂਪਪਤ੍ਤਿਸਂਵਤ੍ਤਨਿਯਕਮ੍ਮਤੋ ਹਿ ਅਞ੍ਞੇਨੇਵ ਕਮ੍ਮੁਨਾ ਤੇ ਨਿਬ੍ਬਤ੍ਤਨ੍ਤਿ ਰਕ੍ਖਸਜਾਤਿਕਤ੍ਤਾ. ਤਥਾ ਹਿ ਵਦਨ੍ਤਿ ਸਬ੍ਬਤ੍ਥਿਵਾਦਿਨੋ –
‘‘ਕੋਧਾ ਕੁਰੂਰਕਮ੍ਮਨ੍ਤਾ, ਪਾਪਾਭਿਰੁਚਿਨੋ ਤਥਾ;
ਦੁਕ੍ਖਿਤੇਸੁ ਚ ਨਨ੍ਦਨ੍ਤਿ, ਜਾਯਨ੍ਤਿ ਯਮਰਕ੍ਖਸਾ’’ਤਿ.
ਤਤ੍ਥ ਯਦੇਕੇ ਵਦਨ੍ਤਿ ‘‘ਯਾਤਨਾਦੁਕ੍ਖਂ ਪਟਿਸਂਵੇਦੇਯ੍ਯੁਂ, ਅਥ ਵਾ ਅਞ੍ਞਮਞ੍ਞਂ ਘਾਤੇਯ੍ਯੁ’’ਨ੍ਤਿਆਦਿ, ਤਯਿਦਂ ਅਸਾਰਂ ਨਿਰਯਪਾਲਾਨਂ ਨੇਰਯਿਕਭਾਵਸ੍ਸੇਵ ਅਭਾਵਤੋ. ਯਦਿਪਿ ਅਨੇਰਯਿਕਾ ਨਿਰਯਪਾਲਾ, ਅਯੋਮਯਾਯ ਪਨ ਆਦਿਤ੍ਤਾਯ ਸਮ੍ਪਜ੍ਜਲਿਤਾਯ ਸਜੋਤਿਭੂਤਾਯ ਨਿਰਯਭੂਮਿਯਾ ਪਰਿਕ੍ਕਮਮਾਨਾ ਕਥਂ ਦਾਹਦੁਕ੍ਖਂ ਨਾਨੁਭਵਨ੍ਤੀਤਿ? ਕਮ੍ਮਾਨੁਭਾਵਤੋ. ਯਥਾ ਹਿ ਇਦ੍ਧਿਮਨ੍ਤੋ ਚੇਤੋਵਸਿਪ੍ਪਤ੍ਤਾ ਮਹਾਮੋਗ੍ਗਲ੍ਲਾਨਾਦਯੋ ਨੇਰਯਿਕੇ ਅਨੁਕਮ੍ਪਨ੍ਤਾ ਇਦ੍ਧਿਬਲੇਨ ਨਿਰਯਭੂਮਿਂ ਉਪਗਤਾ ਦਾਹਦੁਕ੍ਖੇਨ ਨ ਬਾਧੀਯਨ੍ਤਿ, ਏਵਂ ਸਮ੍ਪਦਮਿਦਂ ਦਟ੍ਠਬ੍ਬਂ.
ਇਦ੍ਧਿਵਿਸਯਸ੍ਸ ਅਚਿਨ੍ਤੇਯ੍ਯਭਾਵਤੋਤਿ ਚੇ? ਇਦਮ੍ਪਿ ਤਂਸਮਾਨਂ ਕਮ੍ਮਵਿਪਾਕਸ੍ਸ ਅਚਿਨ੍ਤੇਯ੍ਯਭਾਵਤੋ. ਤਥਾਰੂਪੇਨ ਹਿ ਕਮ੍ਮੁਨਾ ਤੇ ਨਿਬ੍ਬਤ੍ਤਾ ਯਥਾ ਨਿਰਯਦੁਕ੍ਖੇਨ ਅਬਾਧਿਤਾ ਏਵ ਹੁਤ੍ਵਾ ਨੇਰਯਿਕੇ ਘਾਤੇਨ੍ਤਿ, ਨ ਚੇਤ੍ਤਕੇਨ ਬਾਹਿਰਵਿਸਯਾਭਾਵੋ ਯੁਜ੍ਜਤਿ ਇਟ੍ਠਾਨਿਟ੍ਠਤਾਯ ਪਚ੍ਚੇਕਂ ਦ੍ਵਾਰਪੁਰਿਸੇਸੁਪਿ ਵਿਭਤ੍ਤਸਭਾਵਤ੍ਤਾ. ਤਥਾ ਹਿ ਏਕਚ੍ਚਸ੍ਸ ਦ੍ਵਾਰਸ੍ਸ ਪੁਰਿਸਸ੍ਸ ਚ ਇਟ੍ਠਂ ਏਕਚ੍ਚਸ੍ਸ ਅਨਿਟ੍ਠਂ, ਏਕਚ੍ਚਸ੍ਸ ਚ ਅਨਿਟ੍ਠਂ ਏਕਚ੍ਚਸ੍ਸ ਇਟ੍ਠਂ ਹੋਤਿ. ਏਵਞ੍ਚ ਕਤ੍ਵਾ ਯਦੇਕੇ ਵਦਨ੍ਤਿ ‘‘ਨਤ੍ਥਿ ਕਮ੍ਮਵਸੇਨ ਤੇਜਸਾ ਪਰੂਪਤਾਪਨ’’ਨ੍ਤਿਆਦਿ, ਤਦਪਾਹਤਂ ਹੋਤਿ. ਯਂ ਪਨ ਵਦਨ੍ਤਿ ‘‘ਅਨੇਰਯਿਕਾਨਂ ਤੇਸਂ ਕਥਂ ਤਤ੍ਥ ਸਮ੍ਭਵੋ’’ਤਿ ਨਿਰਯੇ ਨੇਰਯਿਕਾਨਂ ਯਾਤਨਾਸਬ੍ਭਾਵਭਾਵਤੋ. ਨੇਰਯਿਕਸਤ੍ਤਯਾਤਨਾਯੋਗ੍ਗਞ੍ਹਿ ਅਤ੍ਤਭਾਵਂ ਨਿਬ੍ਬਤ੍ਤੇਨ੍ਤਂ ਕਮ੍ਮਂ ਤਾਦਿਸਨਿਕਨ੍ਤਿ ਵਿਨਾਮਿਤਂ ਨਿਰਯਟ੍ਠਾਨੇ ਏਵ ਨਿਬ੍ਬਤ੍ਤੇਤਿ. ਤੇ ਹਿ ਨੇਰਯਿਕੇਹਿ ਅਧਿਕਤਰਬਲਾਰੋਹਪਰਿਣਾਹਾ ਅਤਿਵਿਯ ਭਯਾਨਕਦਸ੍ਸਨਾ ਕੁਰੂਰਤਰਪਯੋਗਾ ਚ ਹੋਨ੍ਤਿ. ਏਤੇਨੇਵ ਤਤ੍ਥ ਨੇਰਯਿਕਾਨਂ ਵਿਬਾਧਕਕਾਕਸੁਨਖਾਦੀਨਮ੍ਪਿ ਨਿਬ੍ਬਤ੍ਤਿਯਾ ਅਤ੍ਥਿਭਾਵੋ ਸਂਵਣ੍ਣਿਤੋਤਿ ਦਟ੍ਠਬ੍ਬੋ.
ਕਥਮਞ੍ਞਗਤਿਕੇਹਿ ਅਞ੍ਞਗਤਿਕਬਾਧਨਨ੍ਤਿ ਚ ਨ ਵਤ੍ਤਬ੍ਬਂ ਅਞ੍ਞਤ੍ਥਾਪਿ ਤਥਾ ਦਸ੍ਸਨਤੋ. ਯਂ ਪਨੇਕੇ ਵਦਨ੍ਤਿ ‘‘ਅਸਤ੍ਤਸਭਾਵਾ ਏਵ ਨਿਰਯੇ ਨਿਰਯਪਾਲਾ ਨਿਰਯੇ ਸੁਨਖਾਦਯੋ ਚਾ’’ਤਿ, ਤਮ੍ਪੇਤੇਸਂ ਮਤਿਮਤ੍ਤਂ ਅਞ੍ਞਤ੍ਥ ਤਥਾ ਅਦਸ੍ਸਨਤੋ. ਨ ਹਿ ਕਾਚਿ ਅਤ੍ਥਿ ਤਾਦਿਸੀ ਧਮ੍ਮਪ੍ਪਵਤ੍ਤਿ, ਯਾ ਅਸਤ੍ਤਸਭਾਵਾ, ਸਮ੍ਪਤਿਸਤ੍ਤੇਹਿ ਅਪ੍ਪਯੋਜਿਤਾ ਚ ਅਤ੍ਥਕਿਚ੍ਚਂ ਸਾਧੇਨ੍ਤੀ ਦਿਟ੍ਠਪੁਬ੍ਬਾ. ਪੇਤਾਨਂ ਪਾਨੀਯਨਿਵਾਰਕਾਨਂ ਦਣ੍ਡਾਦਿਹਤ੍ਥਾਨਞ੍ਚ ਪੁਰਿਸਾਨਂ ਸਬ੍ਭਾਵੇ ਅਸਤ੍ਤਭਾਵੇ ਚ ਵਿਸੇਸਕਾਰਣਂ ਨਤ੍ਥੀਤਿ ਤਾਦਿਸਾਨਂ ਸਬ੍ਭਾਵੇ ਕਿਂ ਪਾਪਕਾਨਂ ਵਤ੍ਤਬ੍ਬਂ. ਸੁਪਿਨੋਪਘਾਤੋਪਿ ਅਤ੍ਥਕਿਚ੍ਚਸਮਤ੍ਥਤਾਯ ਅਪ੍ਪਮਾਣਂ ਦਸ੍ਸਨਾਦਿਮਤ੍ਤੇਨਪਿ ਤਦਤ੍ਥਸਿਦ੍ਧਿਤੋ. ਤਥਾ ਹਿ ਸੁਪਿਨੇ ਆਹਾਰੂਪਭੋਗਾਦਿਨਾ ਨ ਅਤ੍ਥਸਿਦ੍ਧਿ, ਇਦ੍ਧਿਨਿਮ੍ਮਾਨਰੂਪਂ ਪਨੇਤ੍ਥ ਲਦ੍ਧਪਰਿਹਾਰਂ ਇਦ੍ਧਿਵਿਸਯਸ੍ਸ ਅਚਿਨ੍ਤੇਯ੍ਯਭਾਵਤੋ. ਇਧਾਪਿ ਕਮ੍ਮਵਿਪਾਕਸ੍ਸ ਅਚਿਨ੍ਤੇਯ੍ਯਭਾਵਤੋਤਿ ਚੇ? ਤਂ ਨ, ਅਸਿਦ੍ਧਤ੍ਤਾ. ਨੇਰਯਿਕਾਨਂ ਕਮ੍ਮਵਿਪਾਕੋ ਨਿਰਯਪਾਲਾਤਿ ਸਿਦ੍ਧਮੇਤ੍ਤਂ, ਵੁਤ੍ਤਨਯੇਨ ਪਾਲ਼ਿਤੋ ਚ ਤੇਸਂ ਸਤ੍ਤਭਾਵੋ ਏਵ ਸਿਦ੍ਧੋ. ਸਕ੍ਕਾ ਹਿ ਵਤ੍ਤੁਂ ਸਤ੍ਤਸਙ੍ਖਾਤਾ ਨਿਰਯਪਾਲਸਞ੍ਞਿਤਾ ਧਮ੍ਮਪ੍ਪਵਤ੍ਤਿ ਸਾਭਿਸਨ੍ਧਿਕਪਰੂਪਘਾਤਿ ਅਤ੍ਥਕਿਚ੍ਚਸਬ੍ਭਾਵਤੋ ਓਜਾਹਾਰਾਦਿ ਰਕ੍ਖਸਸਨ੍ਤਤਿ ਵਿਯ. ਅਭਿਸਨ੍ਧਿਪੁਬ੍ਬਕਤਾ ਚੇਤ੍ਥ ਨ ਸਕ੍ਕਾ ਪਟਿਕ੍ਖਿਪਿਤੁਂ ਤਥਾ ਤਥਾ ਅਭਿਸਨ੍ਧਿਯਾ ਘਾਤਨਤੋ. ਤਤੋ ਏਵ ਨ ਸਙ੍ਘਾਤਪਬ੍ਬਤੇਹਿ ਅਨੇਕਨ੍ਤਿਕਤਾ. ਯੇ ਪਨ ਵਦਨ੍ਤਿ ‘‘ਭੂਤਵਿਸੇਸਾ ਏਵ ਤੇ ਵਣ੍ਣਸਣ੍ਠਾਨਾਦਿਵਿਸੇਸਵਨ੍ਤੋ ਭੇਰਵਾਕਾਰਾ ਨਰਕਪਾਲਾਤਿ ਸਮਞ੍ਞਂ ਲਭਨ੍ਤੀ’’ਤਿ, ਤਦਸਿਦ੍ਧਂ ਉਜੁਕਮੇਵ ਪਾਲ਼ਿਯਂ ‘‘ਅਤ੍ਥਿ ਨਿਰਯੇ ਨਿਰਯਪਾਲਾ’’ਤਿ ਵਾਦਸ੍ਸ ਪਤਿਟ੍ਠਾਪਿਤਤ੍ਤਾ.
ਅਪਿਚ ਯਥਾ ਅਰਿਯਵਿਨਯੇ ਨਰਕਪਾਲਾਨਂ ਭੂਤਮਤ੍ਤਤਾ ਅਸਿਦ੍ਧਾ, ਤਥਾ ਪਞ੍ਞਤ੍ਤਿਮਤ੍ਤਵਾਦਿਨੋਪਿ ਭੂਤਮਤ੍ਤਤਾ ਅਸਿਦ੍ਧਾ ਸਬ੍ਬਸੋ ਰੂਪਧਮ੍ਮਾਨਂ ਅਤ੍ਥਿਭਾਵਸ੍ਸੇਵ ਅਪ੍ਪਟਿਜਾਨਨਤੋ. ਨ ਹਿ ਤਸ੍ਸ ਭੂਤਾਨਿ ਨਾਮ ਪਰਮਤ੍ਥਤੋ ਸਨ੍ਤਿ. ਯਦਿ ਪਰਮਤ੍ਥਂ ਗਹੇਤ੍ਵਾ ਵੋਹਰਤਿ, ਅਥ ਕਸ੍ਮਾ ਚਕ੍ਖੁਰੂਪਾਦੀਨਿ ਪਟਿਕ੍ਖਿਪਤੀਤਿ? ਤਿਟ੍ਠਤੇਸਾ ਅਨਵਟ੍ਠਿਤਤਕ੍ਕਾਨਂ ਅਪ੍ਪਹੀਨਵਿਪਲ੍ਲਾਸਾਨਂ ਵਾਦਵੀਮਂਸਾ. ਏਵਂ ਅਤ੍ਥੇਵ ਨਿਰਯੇ ਨਿਰਯਪਾਲਾਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ. ਸਤਿ ਚ ਨੇਸਂ ਸਬ੍ਭਾਵੇ ਅਸਤਿਪਿ ਬਾਹਿਰੇ ਵਿਸਯੇ ਨਰਕੇ ਵਿਯ ਦੇਸਾਦਿਨਿਯਮੋ ਹੋਤੀਤਿ ਵਾਦੋ ਨ ਸਿਜ੍ਝਤਿ, ਸਤਿ ਏਵ ਪਨ ਬਾਹਿਰੇ ਵਿਸਯੇ ਦੇਸਾਦਿਨਿਯਮੋਤਿ ਦਟ੍ਠਬ੍ਬਂ.
ਦੇਵਦੂਤਸਰਾਪਨਵਸੇਨ ਸਤ੍ਤੇ ਯਥੂਪਚਿਤੇ ਪੁਞ੍ਞਕਮ੍ਮੇ ਯਮੇਤਿ ਨਿਯਮੇਤੀਤਿ ਯਮੋ. ਤਸ੍ਸ ਯਮਸ੍ਸ ਵੇਮਾਨਿਕਪੇਤਾਨਂ ਰਾਜਭਾਵਤੋ ਰਞ੍ਞੋ. ਤੇਨਾਹ ‘‘ਯਮਰਾਜਾ ਨਾਮ ਵੇਮਾਨਿਕਪੇਤਰਾਜਾ’’ਤਿ. ਕਮ੍ਮਵਿਪਾਕਨ੍ਤਿ ਅਕੁਸਲਕਮ੍ਮਵਿਪਾਕਂ. ਵੇਮਾਨਿਕਪੇਤਾ ਹਿ ਕਣ੍ਹਸੁਕ੍ਕਵਸੇਨ ਮਿਸ੍ਸਕਂ ਕਮ੍ਮਂ ਕਤ੍ਵਾ ਵਿਨਿਪਾਤਿਕਦੇਵਤਾ ਵਿਯ ਸੁਕ੍ਕੇਨ ਕਮ੍ਮੁਨਾ ਪਟਿਸਨ੍ਧਿਂ ਗਣ੍ਹਨ੍ਤਿ. ਤਥਾ ਹਿ ਮਗ੍ਗਫਲਭਾਗਿਨੋਪਿ ਹੋਨ੍ਤਿ, ਪਵਤ੍ਤਿਯਂ ਪਨ ਕਮ੍ਮਾਨੁਰੂਪਂ ਕਦਾਚਿ ਪੁਞ੍ਞਫਲਂ, ਕਦਾਚਿ ਅਪੁਞ੍ਞਫਲਂ ਪਚ੍ਚਨੁਭਵਨ੍ਤਿ. ਯੇਸਂ ਪਨ ਅਰਿਯਮਗ੍ਗੋ ਉਪ੍ਪਜ੍ਜਤਿ, ਤੇਸਂ ਮਗ੍ਗਾਧਿਗਮਤੋ ਪਟ੍ਠਾਯ ਪੁਞ੍ਞਫਲਮੇਵ ਉਪ੍ਪਜ੍ਜਤੀਤਿ ਦਟ੍ਠਬ੍ਬਂ. ਅਪੁਞ੍ਞਫਲਂ ਪੁਬ੍ਬੇ ਵਿਯ ਕਟੁਕਂ ਨ ਹੋਤਿ, ਮਨੁਸ੍ਸਤ੍ਤਭਾਵੇ ਠਿਤਾਨਂ ਵਿਯ ਮੁਦੁਕਮੇਵ ਹੋਤੀਤਿ ਅਪਰੇ. ਧਮ੍ਮਿਕੋ ਰਾਜਾਤਿ ਏਤ੍ਥ ਤਸ੍ਸ ਧਮ੍ਮਿਕਭਾਵੋ ਧਮ੍ਮਦੇਵਪੁਤ੍ਤਸ੍ਸ ਵਿਯ ਉਪ੍ਪਤ੍ਤਿਨਿਯਤੋ ਧਮ੍ਮਤਾਵਸੇਨ ਵੇਦਿਤਬ੍ਬੋ. ਦ੍ਵਾਰੇਸੂਤਿ ਅਵੀਚਿਮਹਾਨਰਕਸ੍ਸ ਚਤੂਸੁ ਦ੍ਵਾਰੇਸੁ. ਖੀਣਾਸਵਾ ਬ੍ਰਾਹ੍ਮਣਾ ਨਾਮ ਉਕ੍ਕਟ੍ਠਨਿਦ੍ਦੇਸੇਨ.
ਅਨੁਯੋਗਵਤ੍ਤਨ੍ਤਿ ਅਨੁਯੋਗੇ ਕਤੇ ਵਤ੍ਤਿਤਬ੍ਬਵਤ੍ਤਂ. ਆਰੋਪੇਨ੍ਤੋਤਿ ਕਾਰਾਪੇਨ੍ਤੋ, ਅਤ੍ਤਨੋ ਪੁਚ੍ਛਂ ਉਦ੍ਦਿਸ੍ਸ ਪਟਿਵਚਨਂ ਦਾਪੇਨ੍ਤੋ ਪੁਚ੍ਛਤਿ. ਪਰਸ੍ਸ ਹਿ ਅਧਿਪ੍ਪਾਯਂ ਞਾਤੁਂ ਇਚ੍ਛਨ੍ਤੋ ਤਦੁਪਗਂ ਪਯੋਗਂ ਕਰੋਨ੍ਤੋ ਪੁਚ੍ਛਤਿ ਨਾਮ. ਲਦ੍ਧਿਨ੍ਤਿ ਗਾਹਂ. ਪਤਿਟ੍ਠਾਪੇਨ੍ਤੋਤਿ ਤਤ੍ਥ ਨਿਚ੍ਚਕਾਲਂ ਕਾਰਾਪੇਨ੍ਤੋ. ਕਾਰਣਂ ਪੁਚ੍ਛਨ੍ਤੋਤਿ ਯੁਤ੍ਤਿਂ ਪੁਚ੍ਛਨ੍ਤੋ. ਸਮਨੁਭਾਸਤੀਤਿ ਯਥਾਨੁਯੁਤ੍ਤਮਤ੍ਥਂ ਵਿਭੂਤਂ ਕਤ੍ਵਾ ਕਥੇਤਿ.
ਜਿਣ੍ਣਨ੍ਤਿ ਜਰਾਪਤ੍ਤਿਯਾ ਜਿਣ੍ਣਂ. ਏਕਚ੍ਚੋ ਦਹਰਕਾਲਤੋ ਪਟ੍ਠਾਯ ਪਣ੍ਡੁਰੋਗਾਦਿਨਾ ਅਭਿਭੂਤਕਾਯਤਾਯ ਜਿਣ੍ਣਸਦਿਸੋ ਹੋਤਿ, ਅਯਂ ਨ ਤਥਾ ਜਰਾਪਤ੍ਤਿਯਾ ਜਿਣ੍ਣੋਤਿ ਦਸ੍ਸੇਤਿ. ਗੋਪਾਨਸੀ ਵਿਯ ਵਙ੍ਕਨ੍ਤਿ ਵਙ੍ਕਗੋਪਾਨਸੀ ਵਿਯ ਵਙ੍ਕਂ. ਨ ਹਿ ਵਙ੍ਕਭਾਵਸ੍ਸ ਨਿਦਸ੍ਸਨਤ੍ਥਂ ਅਵਙ੍ਕਗੋਪਾਨਸੀ ਗਯ੍ਹਤਿ. ਭਗ੍ਗਨ੍ਤਿ ਭਗ੍ਗਸਰੀਰਂ ਕਟਿਯਂ ਭਗ੍ਗਕਾਯਤ੍ਤਾ. ਤੇਨਾਹ ‘‘ਇਮਿਨਾਪਿਸ੍ਸ ਵਙ੍ਕਭਾਵਮੇਵ ਦੀਪੇਤੀ’’ਤਿ. ਦਣ੍ਡਪਟਿਸਰਣਨ੍ਤਿ ਠਾਨਗਮਨੇਸੁ ਦਣ੍ਡੋ ਪਟਿਸਰਣਂ ਏਤਸ੍ਸਾਤਿ ਦਣ੍ਡਪਟਿਸਰਣਂ ਤੇਨ ਵਿਨਾ ਵਤ੍ਤਿਤੁਂ ਅਸਮਤ੍ਥਤ੍ਤਾ. ਤੇਨਾਹ ‘‘ਦਣ੍ਡਦੁਤਿਯ’’ਨ੍ਤਿ. ਜਰਾਤੁਰਨ੍ਤਿ ਜਰਾਯ ਪਤ੍ਥਤਸਂਕਿਲਨ੍ਤਕਾਯਂ. ਸਬ੍ਬਸੋ ਕਿਮਿਹਤਂ ਵਿਯ ਮਹਾਖਲ੍ਲਾਟਂ ਸੀਸਮਸ੍ਸਾਤਿ ਮਹਾਖਲ੍ਲਾਟਸੀਸਂ. ਸਞ੍ਜਾਤਵਲਿਨ੍ਤਿ ਸਮਨ੍ਤਤੋ ਜਾਤਵਲਿਕਂ. ਜਰਾਧਮ੍ਮੋਤਿ ਜਰਾਪਕਤਿਕੋ. ਤੇਨਾਹ ‘‘ਜਰਾਸਭਾਵੋ’’ਤਿ. ਸਭਾਵੋ ਚ ਨਾਮ ਤੇਜੋਧਾਤੁਯਾ ਉਣ੍ਹਤਾ ਵਿਯ ਨ ਕਦਾਚਿ ਵਿਗਚ੍ਛਤੀਤਿ ਆਹ ‘‘ਅਪਰਿਮੁਤ੍ਤੋ ਜਰਾਯਾ’’ਤਿਆਦਿ.
ਅਤ੍ਥਤੋ ਏਵਂ ਵਦਤਿ ਨਾਮ, ਵਾਚਾਯ ਅਵਦਨ੍ਤੋਪਿ ਅਤ੍ਥਾਪਤ੍ਤਿਤੋ ਏਵਂ ਵਦਨ੍ਤੋ ਵਿਯ ਹੋਤਿ ਵਿਞ੍ਞੂਨਨ੍ਤਿ ਅਤ੍ਥੋ. ਤਰੁਣੋ ਅਹੋਸਿਂ ਯੋਬ੍ਬਨੇਨ ਸਮਨ੍ਨਾਗਤੋ. ਊਰੂਨਂ ਬਲਂ ਏਤਸ੍ਸ ਅਤ੍ਥੀਤਿ ਊਰੁਬਲੀ. ਤੇਨ ਦੂਰੇਪਿ ਗਮਨਾਗਮਨਲਙ੍ਘਨਾਦਿਸਮਤ੍ਥਤਂ ਦਸ੍ਸੇਤਿ, ਬਾਹੁਬਲੀਤਿ ਪਨ ਇਮਿਨਾ ਹਤ੍ਥੇਹਿ ਕਾਤਬ੍ਬਕਿਚ੍ਚਸਮਤ੍ਥਤਂ, ਜਵਗ੍ਗਹਣੇਨ ਵੇਗਸਾ ਪਵਤ੍ਤਿਸਮਤ੍ਥਤਂ. ਅਨ੍ਤਰਹਿਤਾਤਿ ਨਟ੍ਠਾ. ਏਤ੍ਥ ਚ ਨ ਖੋ ਪਨਾਹਨ੍ਤਿਆਦਿ ਜਰਾਯ ਦੇਵਦੂਤਭਾਵਦਸ੍ਸਨਂ. ਤੇਨਾਹ ‘‘ਤੇਨੇਸ ਦੇਵਦੂਤੋ ਨਾਮ ਜਾਤੋ’’ਤਿ. ਆਬਾਧਸ੍ਸ ਅਤ੍ਥਿਤਾਯ ਆਬਾਧਿਕਂ. ਵਿਵਿਧਂ ਦੁਕ੍ਖਂ ਆਦਹਤੀਤਿ ਬ੍ਯਾਧਿ, ਵਿਸੇਸੇਨ ਵਾ ਆਧਿਯਤਿ ਏਤੇਨਾਤਿ ਬ੍ਯਾਧਿ, ਬ੍ਯਾਧਿ ਸਂਜਾਤੋ ਏਤਸ੍ਸਾਤਿ ਬ੍ਯਾਧਿਤਂ. ਏਸ ਨਯੋ ਦੁਕ੍ਖਿਤਨ੍ਤਿ ਏਤ੍ਥਾਪਿ.
ਦੁਤਿਯਂ ਦੇਵਦੂਤਨ੍ਤਿ ਏਤ੍ਥਾਪਿ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਬ੍ਯਾਧਿਨਾ ਅਭਿਹਤੋਤਿ ਬ੍ਯਾਧਿਨਾ ਬਾਧਿਤੋ, ਉਪਦ੍ਦੁਤੋਤਿ ਅਤ੍ਥੋ.
ਵਿਪਰਿਭਿਨ੍ਨਵਣ੍ਣੋਤਿ ਵਿਪਰਿਭਿਨ੍ਨਨੀਲਵਣ੍ਣੋ. ਤਞ੍ਹਿ ਯਤ੍ਥ ਯਤ੍ਥ ਗਹਿਤਪੁਬ੍ਬਕਂ, ਤਤ੍ਥ ਤਤ੍ਥ ਪਣ੍ਡੁਵਣ੍ਣਂ, ਮਂਸੁਸ੍ਸਦਟ੍ਠਾਨੇ ਰਤ੍ਤਵਣ੍ਣਂ, ਯੇਭੁਯ੍ਯੇਨ ਚ ਨੀਲਸਾਟਕਪਾਰੁਤਂ ਵਿਯ ਹੋਤਿ. ਤੇਨ ਵੁਤ੍ਤਂ ‘‘ਵਿਪਰਿਭਿਨ੍ਨਨੀਲਵਣ੍ਣੋ’’ਤਿ.
‘‘ਕੋ ਲਭਤਿ, ਕੋ ਨ ਲਭਤੀ’’ਤਿ ਨਿਰਯੁਪਗਸ੍ਸੇਵ ਵਸੇਨਾਯਂ ਵਿਚਾਰਣਾਤਿ ‘‘ਯੇਨ ਤਾਵ ਬਹੁ ਪਾਪਂ ਕਤ’’ਨ੍ਤਿਆਦਿ ਆਰਦ੍ਧਂ. ਬਹੁ ਪਾਪਂ ਕਤਨ੍ਤਿ ਬਹੁਸੋ ਪਾਪਂ ਕਤਂ. ਤੇਨ ਪਾਪਸ੍ਸ ਬਹੁਲੀਕਰਣਮਾਹ. ਬਹੂਤਿ ਵਾ ਮਹਨ੍ਤਂ. ਮਹਤ੍ਥੋਪਿ ਹਿ ਬਹੁਸਦ੍ਦੋ ਦਿਸ੍ਸਤਿ ‘‘ਬਹੁ ਵਤ ਕਤਂ ਅਸ੍ਸਾ’’ਤਿਆਦੀਸੁ, ਗਰੁਕਨ੍ਤਿ ਵੁਤ੍ਤਂ ਹੋਤਿ. ਸੋ ਗਰੁਕਂ ਬਹੁਲਂ ਵਾ ਪਾਪਂ ਕਤ੍ਵਾ ਠਿਤੋ ਨਿਰਯੇ ਨਿਬ੍ਬਤ੍ਤਤਿਯੇਵ, ਨ ਯਮਪੁਰਿਸੇਹਿ ਯਮਸ੍ਸ ਸਨ੍ਤਿਕਂ ਨੀਯਤੀਤਿ. ਪਰਿਤ੍ਤਨ੍ਤਿ ਪਮਾਣਪਰਿਤ੍ਤਤਾਯ ਕਾਲਪਰਿਤ੍ਤਤਾਯ ਚ ਪਰਿਤ੍ਤਂ. ਪੁਰਿਮਸ੍ਮਿਂ ਅਤ੍ਥੇ ਅਗਰੂਤਿ ਅਤ੍ਥੋ, ਦੁਤਿਯਸ੍ਮਿਂ ਅਬਹੁਲਨ੍ਤਿ. ਯਥਾਵੁਤ੍ਤਮਤ੍ਥਂ ਉਪਮਾਯ ਵਿਭਾਵੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਕਤ੍ਤਬ੍ਬਮੇਵ ਕਰੋਨ੍ਤੀਤਿ ਦਣ੍ਡਮੇਵ ਕਰੋਨ੍ਤਿ. ਅਨੁਵਿਜ੍ਜਿਤ੍ਵਾਤਿ ਵੀਮਂਸਿਤ੍ਵਾ. ਵਿਨਿਚ੍ਛਯਟ੍ਠਾਨਨ੍ਤਿ ਅਟ੍ਟਕਰਣਟ੍ਠਾਨਂ. ਪਰਿਤ੍ਤਪਾਪਕਮ੍ਮਾਤਿ ਦੁਬ੍ਬਲਪਾਪਕਮ੍ਮਾ. ਅਤ੍ਤਨੋ ਧਮ੍ਮਤਾਯਾਤਿ ਪਰੇਹਿ ਅਸਾਰਿਯਮਾਨੇਪਿ ਅਤ੍ਤਨੋ ਧਮ੍ਮਤਾਯ ਸਰਨ੍ਤਿ. ਤੇ ਹਿ ਪਾਪਕਮ੍ਮਸ੍ਸ ਦੁਬ੍ਬਲਭਾਵਤੋ ਕਤੂਪਚਿਤਸ੍ਸ ਚ ਓਕਾਸਾਰਹਕੁਸਲਕਮ੍ਮਸ੍ਸ ਬਲਵਭਾਵਤੋ ਅਤ੍ਤਨੋ ਧਮ੍ਮਤਾਯਪਿ ਸਰਨ੍ਤਿ. ਸਾਰਿਯਮਾਨਾਪੀਤਿ ‘‘ਇਦਂ ਨਾਮ ਤਯਾ ਕਤਂ ਪੁਞ੍ਞਕਮ੍ਮ’’ਨ੍ਤਿ ਪਰੇਹਿ ਸਾਰਿਯਮਾਨਾਪਿ.
ਆਕਾਸਚੇਤਿਯਨ੍ਤਿ ਗਿਰਿਸਿਖਰੇ ਅਬ੍ਭੋਕਾਸੇ ਵਿਵਟਙ੍ਗਣੇ ਕਤਚੇਤਿਯਂ. ਰਤ੍ਤਪਟੇਨਾਤਿ ਰਤ੍ਤਵਣ੍ਣੇਨ ਪਟੇਨ ਪੂਜੇਸਿ ਪਟਾਕਂ ਕਤ੍ਵਾ. ਅਗ੍ਗਿਜਾਲਸਦ੍ਦਨ੍ਤਿ ਪਟਪਟਾਯਨ੍ਤਂ ਨਰਕੇ ਅਗ੍ਗਿਜਾਲਸਦ੍ਦਂ ਸੁਤ੍ਵਾਵ. ਅਤ੍ਤਨਾ ਪੂਜਿਤਪਟਂ ਅਨੁਸ੍ਸਰੀਤਿ ਤਦਾ ਪਟਾਕਾਯ ਵਾਤਪ੍ਪਹਾਰਸਦ੍ਦੇ ਨਿਮਿਤ੍ਤਸ੍ਸ ਗਹਿਤਤ੍ਤਾ ‘‘ਮਯਾ ਤਦਾ ਆਕਾਸਚੇਤਿਯੇ ਪੂਜਿਤਰਤ੍ਤਪਟਸਦ੍ਦੋ ਵਿਯਾ’’ਤਿ ਅਤ੍ਤਨਾ ਪੂਜਿਤਪਟਂ ਅਨੁਸ੍ਸਰਿ.
ਸੁਮਨਪੁਪ੍ਫਕੁਮ੍ਭੇਨਾਤਿ ਕੁਮ੍ਭਪਰਿਮਾਣੇਨ ਸੁਮਨਪੁਪ੍ਫਰਾਸਿਨਾ. ‘‘ਦਸਾਧਿਕਂ ਨਾਲ਼ਿਸਹਸ੍ਸਕੁਮ੍ਭ’’ਨ੍ਤਿ ਕੇਚਿ, ‘‘ਪਞ੍ਚਅਮ੍ਬਣ’’ਨ੍ਤਿ ਅਪਰੇ. ਤੀਹਿਪਿਨ ਸਰਤਿ ਬਲਵਤੋ ਪਾਪਕਮ੍ਮੇਨ ਬ੍ਯਾਮੋਹਿਤੋ. ਤੁਣ੍ਹੀ ਅਹੋਸੀਤਿ ‘‘ਕਮ੍ਮਾਰਹੋ ਅਯ’’ਨ੍ਤਿ ਤਤ੍ਥ ਪਟਿਕਾਰਂ ਅਪਸ੍ਸਨ੍ਤੋ ਤੁਣ੍ਹੀ ਅਹੋਸਿ.
ਏਕਪਕ੍ਖਚ੍ਛਦਨਮਤ੍ਤਾਹੀਤਿ ਮਜ੍ਝਿਮਪ੍ਪਮਾਣਸ੍ਸ ਗੇਹਸ੍ਸ ਏਕਚ੍ਛਦਨਪ੍ਪਮਾਣੇਹਿ. ਸੁਤ੍ਤਾਹਤਂ ਕਰਿਤ੍ਵਾਤਿ ਕਾਲ਼ਸੁਤ੍ਤਂ ਪਾਤੇਤ੍ਵਾ. ਯਥਾ ਰਥੋ ਸਬ੍ਬਸੋ ਪਜ੍ਜਲਿਤੋ ਹੋਤਿ ਅਯੋਮਯੋ, ਏਵਂ ਯੁਗਾਦਯੋਪਿਸ੍ਸ ਪਜ੍ਜਲਿਤਾ ਸਜੋਤਿਭੂਤਾ ਏਵ ਹੋਨ੍ਤੀਤਿ ਆਹ ‘‘ਸਦ੍ਧਿਂ…ਪੇ… ਰਥੇ ਯੋਜੇਤ੍ਵਾ’’ਤਿ. ਮਹਾਕੂਟਾਗਾਰਪ੍ਪਮਾਣਨ੍ਤਿ ਸਤ੍ਤਭੂਮਕਮਹਾਕੂਟਾਗਾਰਪ੍ਪਮਾਣਂ.
ਵਿਭਤ੍ਤੋਤਿ ਸਤ੍ਤਾਨਂ ਸਾਧਾਰਣੇਨ ਪਾਪਕਮ੍ਮੁਨਾ ਵਿਭਤ੍ਤੋ. ਹੀਨਂ ਕਾਯਨ੍ਤਿ ਹੀਨਂ ਸਤ੍ਤਨਿਕਾਯਂ, ਹੀਨਂ ਵਾ ਅਤ੍ਤਭਾਵਂ. ਉਪਾਦਾਨੇਤਿ ਚਤੁਬ੍ਬਿਧੇ ਉਪਾਦਾਨੇ. ਅਤ੍ਥਤੋ ਪਨ ਤਣ੍ਹਾਦਿਟ੍ਠਿਗ੍ਗਾਹੋਤਿ ਆਹ ‘‘ਤਣ੍ਹਾਦਿਟ੍ਠਿਗ੍ਗਹਣੇ’’ਤਿ. ਸਮ੍ਭਵਤਿ ਜਰਾਮਰਣਂ ਏਤੇਨਾਤਿ ਸਮ੍ਭਵੋ, ਉਪਾਦਾਨਨ੍ਤਿ ਆਹ ‘‘ਜਾਤਿਯਾ ਚ ਮਰਣਸ੍ਸ ਛ ਕਾਰਣਭੂਤੇ’’ਤਿ. ਅਨੁਪਾਦਾਤਿ ਅਨੁਪਾਦਾਯ. ਤੇਨਾਹ ‘‘ਅਨੁਪਾਦਿਯਿਤ੍ਵਾ’’ਤਿ. ਸਕਲਵਟ੍ਟਦੁਕ੍ਖਂ ਅਤਿਕ੍ਕਨ੍ਤਾਤਿ ਚਰਿਮਚਿਤ੍ਤਨਿਰੋਧੇਨ ਵਟ੍ਟਦੁਕ੍ਖਸ੍ਸ ਕਿਲੇਸਾਨਮ੍ਪਿ ਅਸਮ੍ਭਵਤੋ ਸਬ੍ਬਂ ਵਟ੍ਟਦੁਕ੍ਖਂ ਅਤਿਕ੍ਕਨ੍ਤਾ.
ਦੇਵਦੂਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਚਤੁਮਹਾਰਾਜਸੁਤ੍ਤਵਣ੍ਣਨਾ
੩੭. ਸਤ੍ਤਮੇ ਅਮਾ ਸਹ ਵਤ੍ਤਨ੍ਤਿ ਤਸ੍ਮਿਂ ਤਸ੍ਮਿਂ ਕਿਚ੍ਚੇਤਿ ਅਮਚ੍ਚਾ, ਸਹਿਤਾ. ਪਰਿਸਤਿ ਭਵਾਤਿ ਪਾਰਿਸਜ੍ਜਾ, ਪਰਿਵਾਰਟ੍ਠਾਨਿਯਾ ਪਰਿਸਾਪਰਿਯਾਪਨ੍ਨਾ. ਤੇਨਾਹ ‘‘ਪਰਿਚਾਰਿਕਦੇਵਤਾ’’ਤਿ. ਤਾਤਾਤਿ ਆਲਪਨਂ. ਏਵਨ੍ਤਿ ‘‘ਕਚ੍ਚਿ ਬਹੂ ਮਨੁਸ੍ਸਾ’’ਤਿਆਦਿਨਾ ਵੁਤ੍ਤਾਕਾਰੇਨ. ਅਟ੍ਠ ਵਾਰੇਤਿ ਏਕਸ੍ਮਿਂ ਅਡ੍ਢਮਾਸੇ ਚਤੁਕ੍ਖਤ੍ਤੁਂ ਤਥਾ ਇਤਰਸ੍ਮਿਨ੍ਤਿ ਏਵਂ ਅਟ੍ਠ ਵਾਰੇ. ਅਧਿਟ੍ਠਹਨ੍ਤੀਤਿ ਅਧਿਤਿਟ੍ਠਨ੍ਤਿ. ਪਟਿਜਾਗਰੋਨ੍ਤੀਤਿ ਪਟਿ ਪਟਿ ਜਾਗਰੋਨ੍ਤਿ. ਪੁਞ੍ਞਂ ਕਰੋਨ੍ਤਾ ਹਿ ਸਤ੍ਤਾ ਜਾਗਰੋਨ੍ਤਿ ਨਾਮ ਕਾਤਬ੍ਬਕਿਚ੍ਚਪ੍ਪਸੁਤਤ੍ਤਾ, ਇਤਰੇ ਪਨ ਸੁਪਨ੍ਤਿ ਨਾਮ ਸਹਿਤਪਰਹਿਤਵਿਮੁਤ੍ਤਤ੍ਤਾ. ਚਾਤੁਦ੍ਦਸਿਉਪੋਸਥਸ੍ਸ ਅਨੁਗਮਨਂ ਵਿਯ ਪਨ੍ਨਰਸਿਉਪੋਸਥਸ੍ਸ ਪਚ੍ਚੁਗ੍ਗਮਨਂ ਨ ਲਬ੍ਭਤਿ ਦਿਵਸਾਭਾਵਤੋ.
ਤਤੋਤਿ ਤਤੋ ਤਤੋ. ਤਂ ਉਪਨਿਸ੍ਸਾਯਾਤਿ ਤਾ ਤਾ ਗਾਮਨਿਗਮਰਾਜਧਾਨਿਯੋ ਉਪਨਿਸ੍ਸਾਯ. ਅਧਿਵਤ੍ਥਾਤਿ ਆਰਾਮਵਨਰੁਕ੍ਖਾਦੀਸੁ ਅਧਿਵਤ੍ਥਾ ਦੇਵਤਾ. ਤੇਤਿ ਤੇ ਦੇਵਾ. ਸਨ੍ਧਾਯ ਕਥੇਤੀਤਿ ਭਗਵਾ ਕਥੇਤਿ. ਵੁਤ੍ਤਨ੍ਤਿ ਅਟ੍ਠਕਥਾਯਂ ਵੁਤ੍ਤਂ.
ਨਿਚ੍ਚਂ ਨਿਬਦ੍ਧਂ ਉਪੋਸਥੋ ਸਂਵਚ੍ਛਰੇ ਸਂਵਚ੍ਛਰੇ ਪਟਿ ਪਟਿ ਹਰਿਤਬ੍ਬਤੋ ਪਵਤ੍ਤੇਤਬ੍ਬਤੋ ਪਾਟਿਹਾਰਿਯਪਕ੍ਖੋ ਨਾਮ. ਗੁਣਙ੍ਗੇਹੀਤਿ ਉਪੋਸਥਙ੍ਗੇਹਿ.
ਵੁਤ੍ਥਵਾਸੋਤਿ ਵੁਸਿਤਬ੍ਰਹ੍ਮਚਰਿਯਵਾਸੋ. ਕਤ੍ਤਬ੍ਬਕਿਚ੍ਚਨ੍ਤਿ ਦੁਕ੍ਖਾਦੀਸੁ ਪਰਿਞ੍ਞਾਤਾਦਿਕਿਚ੍ਚਂ. ਓਤਾਰੇਤ੍ਵਾਤਿ ਛਡ੍ਡੇਤ੍ਵਾ. ਪਰਿਕ੍ਖੀਣਭਵਸਂਯੋਜਨੋਤਿ ਸਬ੍ਬਸੋ ਖੀਣਭਵਬਨ੍ਧਨੋ. ਕਾਰਣੇਨ ਜਾਨਿਤ੍ਵਾਤਿ ਵਿਪਸ੍ਸਨਾਪਞ੍ਞਾਸਹਿਤਾਯ ਮਗ੍ਗਪਞ੍ਞਾਯ ਚਤ੍ਤਾਰਿ ਅਰਿਯਸਚ੍ਚਾਨਿ ਜਾਨਿਤ੍ਵਾ.
ਜਾਨਨ੍ਤੋਤਿ ‘‘ਅਰਹਨ੍ਤਾਨਂ ਅਨੁਕਰਣਪ੍ਪਟਿਪਤ੍ਤਿ ਏਸਾ, ਯਦਿਦਂ ਸਮ੍ਮਦੇਵ ਉਪੋਸਥਾਨੁਟ੍ਠਾਨ’’ਨ੍ਤਿ ਏਵਂ ਉਪੋਸਥਕਮ੍ਮਸ੍ਸ ਗੁਣਂ ਜਾਨਨ੍ਤੋ. ਏਵਰੂਪੇਨਾਤਿ ਯਾਦਿਸੋ ਭਗਵਤੋ ਉਪੋਸਥਭਾਵੋ ਵਿਹਿਤੋ, ਏਵਰੂਪੇਨ ਅਰਹਨ੍ਤਾਨੁਕਰਣੇਨ ਉਪੋਸਥਕਮ੍ਮੇਨ. ਸਕ੍ਕਾ ਪਹਿਤਤ੍ਤੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਖੀਣਾਸਵਸਮ੍ਪਤ੍ਤਿਂ ਪਾਪੁਣਿਤੁਂ. ਅਟ੍ਠਮਂ ਉਤ੍ਤਾਨਤ੍ਥਮੇਵ ਸਤ੍ਤਮੇ ਵੁਤ੍ਤਨਯਤ੍ਤਾ.
ਚਤੁਮਹਾਰਾਜਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਸੁਖੁਮਾਲਸੁਤ੍ਤਵਣ੍ਣਨਾ
੩੯. ਨਵਮੇ ਨਿਦ੍ਦੁਕ੍ਖੋਤਿ ਕਾਯਿਕਚੇਤਸਿਕਦੁਕ੍ਖਵਿਰਹਿਤੋ. ਸਦੁਕ੍ਖੇ ਹਿ ਸਵਿਘਾਤੇ ਸੁਖੁਮਾਲਤ੍ਤਾ ਅਨਵਸਰਾ, ਤਸ੍ਮਾ ਸੁਖਿਤੋ ਨਿਦ੍ਦੁਕ੍ਖਤਾਯ ਸੁਖੁਮਾਲੋ ਨਾਮ. ਯਾਵਸ੍ਸ ਸੁਖੁਮਾਲਤ੍ਤਾ ਪਰਮੁਕ੍ਕਂਸਗਤਾਤਿ ਆਹ ‘‘ਪਰਮਸੁਖੁਮਾਲੋ’’ਤਿ. ਅਤਿਵਿਯ ਸੁਖੁਮਾਲੋਤਿ ਅਤ੍ਥੋ. ਅਨ੍ਤਮਤੀਤਂ ਅਚ੍ਚਨ੍ਤਂ. ਸਬ੍ਬਦਾ ਸੁਖੁਮਾਲੋਤਿ ਆਹ ‘‘ਸਤਤਨਿਦ੍ਦੁਕ੍ਖੋ’’ਤਿ. ਚਰਿਯਕਾਲੇਤਿ ਬੋਧਿਚਰਿਯਾਯ ਚਰਣਕਾਲੇ. ਤੇਨਾਤਿ ਬੋਧਿਸਤ੍ਤੇਨ. ਅਞ੍ਞਤ੍ਥ ਪਨ ਪਦੁਮਨ੍ਤਿ ਰਤ੍ਤਂ ਕਮਲਂ. ਪੁਣ੍ਡਰੀਕਨ੍ਤਿ ਸੇਤਂ ਵੁਚ੍ਚਤਿ. ਇਤਰਾਤਿ ਇਤਰਪੋਕ੍ਖਰਣਿਯੋ. ‘‘ਬੋਧਿਸਤ੍ਤਸ੍ਸ ਕਿਰਾ’’ਤਿਆਦਿਕਂ ਪੋਕ੍ਖਰਣੀਨਂ ਉਪ੍ਪਤ੍ਤਿਦਸ੍ਸਨਂ. ਕੁਦ੍ਦਾਲਕਮ੍ਮਕਾਰੇਤਿ ਖਣਕੇ. ਪੋਕ੍ਖਰਣਿਟ੍ਠਾਨਾਨੀਤਿ ਪੋਕ੍ਖਰਣਿਖਣਨਯੋਗ੍ਗਟ੍ਠਾਨਾਨਿ. ਗਣ੍ਹਾਪੇਸੀਤਿ ਖਣਾਪੇਸਿ. ਪੋਕ੍ਖਰਣਿਸਦ੍ਦੋ ਚੇਤ੍ਥ ਤਾਦਿਸੇ ਜਲਾਸਯੇ ਨਿਰੁਲ਼੍ਹੋ ਦਟ੍ਠਬ੍ਬੋ ਪਙ੍ਕਜਾਦਿਸਦ੍ਦਾ ਵਿਯ. ਸੋਪਾਨਬਾਹੁਕਾਨਂ ਮਤ੍ਥਕਟ੍ਠਾਨਂ ਉਣ੍ਹੀਸਨ੍ਤਿ ਅਧਿਪ੍ਪੇਤਂ. ਉਦਕਸੇਚਨਨਾਲ਼ਿਕਾਤਿ ਉਦਕਚ੍ਛਟਾਵਿਸ੍ਸਜ੍ਜਨਨਾਲ਼ਿਯਨ੍ਤਾਨਿ. ਪਞ੍ਚਵਿਧਾਤਿ ਵਣ੍ਣਵਸੇਨ ਜਾਤਿਵਸੇਨ ਚ.
ਖੋ ਪਨਸ੍ਸਾਤਿ ਨਿਪਾਤਮਤ੍ਤਂ. ਕਾਸਿਕ-ਸਦ੍ਦੋ ਅਤਿਵਿਯ ਸਣ੍ਹੇ ਸੁਖੁਮੇ ਮਹਗ੍ਘਵਤ੍ਥੇ ਨਿਰੁਲ਼੍ਹੋ, ਅਞ੍ਞਸ੍ਮਿਮ੍ਪਿ ਤਥਾਜਾਤਿਕੇ ਰੁਲ਼੍ਹਿਵਸੇਨ ਪਵਤ੍ਤਤੀਤਿ ਦਟ੍ਠਬ੍ਬਂ. ਤੇਨਾਹ ‘‘ਅਕਾਸਿਕਂ ਚਨ੍ਦਨ’’ਨ੍ਤਿ. ਹੇਮਨ੍ਤੇ ਵਾਸੋ ਹੇਮਨ੍ਤਂ, ਹੇਮਨ੍ਤਂ ਅਰਹਤੀਤਿ ਹੇਮਨ੍ਤਿਕੋ, ਪਾਸਾਦੋ. ‘‘ਇਤਰੇਸੁਪਿ ਏਸੇਵ ਨਯੋ’’ਤਿ ਵਤ੍ਵਾ ਤਦੇਵ ਨੇਸਂ ਅਰਹਤਂ ਦਸ੍ਸੇਤੁਂ ‘‘ਤਤ੍ਥ ਹੇਮਨ੍ਤਿਕੋ’’ਤਿਆਦਿ ਵੁਤ੍ਤਂ. ਸਜਾਲਾਨੀਤਿ ਸਜਾਲਵਾਤਪਾਨਾਨਿ, ਉਦਕਯਨ੍ਤਾਨੀਤਿ ਉਦਕਧਾਰਾਵਿਸ੍ਸਨ੍ਦਨਕਯਨ੍ਤਾਨਿ. ਪਾਸਾਦਮਤ੍ਥਕੇਤਿ ਪਾਸਾਦਸ੍ਸ ਉਪਰਿਆਕਾਸਤਲੇ. ਬਨ੍ਧਿਤ੍ਵਾਤਿ ਪਯੋਜਿਤਯਨ੍ਤੇ ਸੁਕ੍ਖਮਹਿਂਸਚਮ੍ਮਂ ਬਨ੍ਧਿਤ੍ਵਾ. ਯਨ੍ਤਂ ਪਰਿਵਤ੍ਤੇਤ੍ਵਾਤਿ ਯਥਾਪਯੋਜਿਤਂ ਯਨ੍ਤਂ ਪਾਸਾਣਾਰੋਪਨਤ੍ਥਞ੍ਚੇਵ ਪੁਨ ਤੇਸਂ ਵਿਸ੍ਸਜ੍ਜਨਤ੍ਥਞ੍ਚ ਪਰਿਵਤ੍ਤੇਤ੍ਵਾ. ਤਸ੍ਮਿਂ ਵਿਸ੍ਸਜ੍ਜੇਨ੍ਤੀਤਿ ਛਦਨਪਿਟ੍ਠੇ ਬਦ੍ਧਸੁਕ੍ਖਮਹਿਂਸਚਮ੍ਮੇ ਵਿਸ੍ਸਜ੍ਜੇਨ੍ਤਿ.
ਸਹਸ੍ਸਥਾਮਨ੍ਤਿ ਪੁਰਿਸਸਹਸ੍ਸਬਲਂ, ਪੁਰਿਸਸਹਸ੍ਸੇਨ ਵਹਿਤਬ੍ਬਭਾਰਵਹਂ. ਪਲ੍ਲਙ੍ਕੇ ਨਿਸਿਨ੍ਨੋਵਾਤਿ ਰਤਨਮਯਪਲ੍ਲਙ੍ਕੇ ਯਥਾਨਿਸਿਨ੍ਨੋ ਏਵ. ਉਪ੍ਪਤਨਾਕਾਰਪਤ੍ਤਨ੍ਤਿ ਉਪ੍ਪਤਿਤ੍ਵਾ ਠਿਤਂ ਵਿਯ. ਜਿਯਂ ਪੋਥੇਨ੍ਤਸ੍ਸਾਤਿ ਜਿਯਾਘਾਤਂ ਕਰੋਨ੍ਤਸ੍ਸ. ਜਿਯਪ੍ਪਹਾਰਸਦ੍ਦੋਤਿ ਜਿਯਾਘਾਤਸਦ੍ਦੋ. ਯਨ੍ਤੇ ਬਦ੍ਧਨ੍ਤਿ ਯਨ੍ਤਬਦ੍ਧਂ ਕਤ੍ਵਾ ਠਪਿਤਂ. ਸਦ੍ਦਨ੍ਤਰੇਤਿ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਸਦ੍ਦਸਵਨਟ੍ਠਾਨੇ. ਗਾਵੁਤਸ੍ਸ ਚਤੁਤ੍ਥੋ ਭਾਗੋ ਕੋਸੋਤਿਪਿ ਵੁਚ੍ਚਤਿ ਦ੍ਵਿਸਹਸ੍ਸਦਣ੍ਡਪ੍ਪਮਾਣਟ੍ਠਾਨਂ.
ਸਬ੍ਬਟ੍ਠਾਨਾਨੀਤਿ ਮਹਾਪੁਰਿਸਸ੍ਸ ਤਾਨਿ ਤਾਨਿ ਸਬ੍ਬਾਨਿ ਵਸਨਟ੍ਠਾਨਾਨਿ. ਸਿਖਾਬਦ੍ਧੋਤਿ ਪੁਰਿਸਸਭਾਵਸ੍ਸੇਵ ਵਿਸੇਸਤੋ ਦਸ੍ਸਨਮੇਤਂ. ਨ ਉਪ੍ਪਿਲਾਵਿਤਭਾਵਤ੍ਥਨ੍ਤਿ ਉਪ੍ਪਿਲਾਵਿਤਭਾਵਸਙ੍ਖਾਤਂ ਅਤ੍ਥਂ ਨ ਕਥੇਸੀਤਿ ਅਤ੍ਥੋ. ਤਸ੍ਸ ਹਿ ਬੋਧਿਮੂਲੇਯੇਵ ਸੇਤੁਘਾਤੋ. ਤੇਨੇਵਾਤਿ ਅਪ੍ਪਮਾਦਲਕ੍ਖਣਸ੍ਸ ਦੀਪਨਤੋ ਏਵ. ਅਤ੍ਤਾਨਂ ਅਤਿਕ੍ਕਮਿਤ੍ਵਾਤਿ ਅਤ੍ਤਨੋ ਜਰਾਪਤ੍ਤਿਂ ਅਚਿਨ੍ਤੇਤ੍ਵਾ ਅਟ੍ਟੀਯਤਿ. ਨ ਪਨੇਸ ਮਗ੍ਗੇਨ ਪਹੀਨੋ ਤਦਾ ਮਗ੍ਗਸ੍ਸ ਅਨਧਿਗਤਤ੍ਤਾ. ਸਿਕ੍ਖਂ ਪਟਿਕ੍ਖਿਪਿਤ੍ਵਾਤਿ ਯਥਾਸਮਾਦਿਨ੍ਨਸਿਕ੍ਖਂ ਪਹਾਯ.
ਅਵਿਪਰੀਤਬ੍ਯਾਧਿਆਦਿਸਭਾਵਾਵਾਤਿ ਏਕਨ੍ਤੇਨ ਬ੍ਯਾਧਿਆਦਿਸਭਾਵਾ ਏਵ. ਏਵਂ ਜਿਗੁਚ੍ਛਾਵਿਹਾਰੇਨਾਤਿ ਏਵਂ ਸਕਲਸ੍ਸੇਵ ਵਟ੍ਟਦੁਕ੍ਖਸ੍ਸ ਜਿਗੁਚ੍ਛਨਵਿਹਾਰੇਨ ਵਿਹਰਨ੍ਤਸ੍ਸ. ਏਵਂ ਜਿਗੁਚ੍ਛਨਨ੍ਤਿ ਏਵਂ ਪਰਸ੍ਸ ਜਿਗੁਚ੍ਛਨਂ. ਪਰਂ ਅਜਿਗੁਚ੍ਛਮਾਨੋਤਿ ਕਰੁਣਾਯਨੇਨ ਏਵਂ ਪਰਂ ਅਜਿਗੁਚ੍ਛਨ੍ਤੋ. ਅਭਿਭੋਸ੍ਮੀਤਿ ਅਭਿਭਵਿਤਾ ਅਸ੍ਮਿ. ਉਸ੍ਸਾਹੋ ਅਹੂਤਿ ਚਤੁਰਙ੍ਗਸਮਨ੍ਨਾਗਤਂ ਵੀਰਿਯਮੇਵ ਚਤੁਬ੍ਬਿਧਸਮ੍ਮਪ੍ਪਧਾਨਵੀਰਿਯਞ੍ਚ ਅਹੋਸਿ, ਯੇਨ ਮਗ੍ਗਬ੍ਰਹ੍ਮਚਰਿਯਪਰਾਯਣੋ ਜਾਤੋ.
ਸੁਖੁਮਾਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਆਧਿਪਤੇਯ੍ਯਸੁਤ੍ਤਵਣ੍ਣਨਾ
੪੦. ਦਸਮੇ ਅਭਿਭਵਿਤ੍ਵਾ ਪਵਤ੍ਤਨਟ੍ਠੇਨ ਅਧਿਪਤਿ ਯਂ ਕਿਞ੍ਚਿ ਜੇਟ੍ਠਕਂ ਨ ਕਾਰਕਂ ਅਤ੍ਤਾਨਂ ਅਧਿਪਤੀਤਿ ਕਤ੍ਵਾ ਅਤ੍ਤਾ ਏਵ ਅਧਿਪਤਿ, ਤਤੋ ਆਗਤਂ ਅਤ੍ਤਾਧਿਪਤੇਯ੍ਯਂ. ਤੇਨਾਹ ‘‘ਅਤ੍ਤਾਨ’’ਨ੍ਤਿਆਦਿ. ਲੋਕਨ੍ਤਿ ਸਤ੍ਤਲੋਕਂ. ਸੋ ਚ ਖੋ ਇਦ੍ਧਿਵਿਧਾਦਿਗੁਣਵਿਸੇਸਯੁਤ੍ਤੋ ਅਧਿਪ੍ਪੇਤੋ ਅਧਿਪਤਿਭਾਵਸ੍ਸ ਅਧਿਪ੍ਪੇਤਤ੍ਤਾ. ਨਵਵਿਧਂ ਲੋਕੁਤ੍ਤਰਧਮ੍ਮਨ੍ਤਿ ਉਕ੍ਕਟ੍ਠਨਿਦ੍ਦੇਸੇਨ ਵੁਤ੍ਤਂ. ਇਤਿ ਭਵੋਤਿ ਏਵਂ ਸਮ੍ਪਤ੍ਤਿਭਵੋ, ਤਤ੍ਥ ਏਵਂ ਅਭਿਵੁਦ੍ਧੀਤਿ. ਸਮ੍ਪਤ੍ਤਿਭਵਸ੍ਸ ਹੇਤੂਤਿ ਤਂਤਂਸਮ੍ਪਤ੍ਤਿਭਵਸ੍ਸ ਤਤ੍ਥ ਚ ਅਭਿਵੁਦ੍ਧਿਯਾ ਹੇਤੁ. ਜਾਤਿਨਿਮਿਤ੍ਤਸ੍ਸ ਕਮ੍ਮਭਵਸ੍ਸ ਕਤੂਪਚਿਤਤ੍ਤਾ ਜਾਤਿ ਅਨ੍ਤੋਪਵਿਟ੍ਠਾ. ਜਰਾਦੀਸੁਪਿ ਏਸੇਵ ਨਯੋ ਹੇਤੁਸਿਦ੍ਧਿਯਾ ਫਲਸਿਦ੍ਧਿਤੋ.
ਅਸਲ੍ਲੀਨਨ੍ਤਿ ਨ ਸਙ੍ਕੋਚਪ੍ਪਤ੍ਤਂ. ਉਪਟ੍ਠਿਤਾਤਿ ਕਾਯਾਦਿਸਭਾਵਸਲ੍ਲਕ੍ਖਣਵਸੇਨ ਉਪਟ੍ਠਿਤਾ. ਅਸਮ੍ਮੁਟ੍ਠਾ ਸਮ੍ਮੋਸਾਭਾਵਤੋ. ਅਸਾਰਦ੍ਧੋਤਿ ਸਾਰਮ੍ਭਸ੍ਸ ਸਾਰਮ੍ਭਹੇਤੂਨਞ੍ਚ ਵਿਕ੍ਖਮ੍ਭਨੇਨ ਅਸਾਰਦ੍ਧੋ. ਏਕਗ੍ਗਂ ਅਨੇਕਗ੍ਗਭਾਵਸ੍ਸ ਦੂਰਸਮੁਸ੍ਸਾਪਿਤਤ੍ਤਾ. ਨਿਮ੍ਮਲਂ ਕਤ੍ਵਾਤਿ ਰਾਗਾਦਿਮਲਾਨਂ ਅਪਨਯਨੇਨ ਮਲਰਹਿਤਂ ਕਤ੍ਵਾ. ਗੋਪਾਯਤੀਤਿ ਸਂਕਿਲੇਸਾਨਤ੍ਥਤੋ ਰਕ੍ਖਤਿ. ਅਯਨ੍ਤਿ ਏਵਂਪਟਿਪਨ੍ਨੋ ਭਿਕ੍ਖੁ. ਸੁਦ੍ਧਮਤ੍ਤਾਨਂ ਪਰਿਹਰਤਿ ਅਸੁਦ੍ਧਭਾਵਸ੍ਸ ਕਿਲੇਸਸ੍ਸਪਿ ਅਭਾਵਤੋ.
ਅਤਿਕ੍ਕਮਿਤ੍ਵਾ ਮਞ੍ਞਸੀਤਿ ਅਸਕ੍ਖਿਂ ਕਤ੍ਵਾ ਮਞ੍ਞਸਿ. ਤਾਯ ਤਣ੍ਹਾਯ ਨਿਬ੍ਬਤ੍ਤੋਤਿ ਤਮ੍ਮਯੋ, ਤਣ੍ਹਾਵਸਿਕੋ. ਤਸ੍ਸ ਭਾਵੋ ਤਮ੍ਮਯਤਾ, ਤਸ੍ਸਾ ਤਮ੍ਮਯਤਾਯ ਅਭਾਵੇਨ. ਨ ਹਾਯਤਿ ਪਞ੍ਞਾਦਿਗੁਣਵੇਪੁਲ੍ਲਪ੍ਪਤ੍ਤਿਯਾ.
ਆਧਿਪਤੇਯ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਦੇਵਦੂਤਵਗ੍ਗਵਣ੍ਣਨਾ ਨਿਟ੍ਠਿਤਾ.