੪. ਪਰਿਸਾਸੁਤ੍ਤਵਣ੍ਣਨਾ

੯੬. ਚਤੁਤ੍ਥੇ ਪਚ੍ਚਯਬਾਹੁਲ੍ਲਿਕਾਤਿ ਚੀਵਰਾਦਿਬਾਹੁਲ੍ਲਾਯ ਪਟਿਪਨ੍ਨਾ. ਅਵੀਤਤਣ੍ਹਤਾਯ ਹਿ ਤਂ ਤਂ ਪਰਿਕ੍ਖਾਰਜਾਤਂ ਬਹੁਂ ਲਨ੍ਤਿ ਆਦਿਯਨ੍ਤੀਤਿ ਬਹੁਲਾ, ਤੇ ਏਵ ਬਾਹੁਲਿਕਾ ਯਥਾ ‘‘ਵੇਨਯਿਕੋ’’ਤਿ (ਮ. ਨਿ. ੧.੨੪੬; ਅ. ਨਿ. ੮.੧੧; ਪਾਰਾ. ੮). ਤੇ ਪਚ੍ਚਯਬਾਹੁਲ੍ਲਾਯ ਯੁਤ੍ਤਪ੍ਪਯੁਤ੍ਤਾ ਹੋਨ੍ਤੀਤਿ ਚੀਵਰਾਦਿਬਾਹੁਲ੍ਲਾਯ ਪਟਿਪਨ੍ਨਾ ਨਾਮ ਹੋਨ੍ਤਿ. ਸਿਕ੍ਖਾਯ ਅਗਾਰਵਭਾਵਤੋ ਸਿਥਿਲਂ ਅਗਾਲ਼੍ਹਂ ਗਣ੍ਹਨ੍ਤੀਤਿ ਸਾਥਲਿਕਾ. ਸਿਥਿਲਨ੍ਤਿ ਚ ਭਾਵਨਪੁਂਸਕਨਿਦ੍ਦੇਸੋ. ਸਿਥਿਲਸਦ੍ਦੇਨ ਸਮਾਨਤ੍ਥਸ੍ਸ ਸਥਲਸਦ੍ਦਸ੍ਸ ਵਸੇਨ ਸਾਥਲਿਕਾਤਿ ਪਦਸਿਦ੍ਧਿ ਵੇਦਿਤਬ੍ਬਾ. ਅਵਗਮਨਟ੍ਠੇਨਾਤਿ ਅਧੋਗਮਨਟ੍ਠੇਨ, ਓਰਮ੍ਭਾਗਿਯਭਾਵੇਨਾਤਿ ਅਤ੍ਥੋ. ਨਿਕ੍ਖਿਤ੍ਤਧੁਰਾਤਿ ਓਰੋਪਿਤਧੁਰਾ ਉਜ੍ਜਿਤੁਸ੍ਸਾਹਾ. ਉਪਧਿਵਿਵੇਕੋ ਨਿਬ੍ਬਾਨਂ. ਦੁਵਿਧਮ੍ਪਿ ਵੀਰਿਯਨ੍ਤਿ ਕਾਯਿਕਂ ਚੇਤਸਿਕਞ੍ਚ ਵੀਰਿਯਂ.

ਭਣ੍ਡਨਂ ਜਾਤਂ ਏਤੇਸਨ੍ਤਿ ਭਣ੍ਡਨਜਾਤਾ. ਵਿਸੇਸਨਸ੍ਸ ਪਰਨਿਪਾਤਵਸੇਨ ਚੇਤਂ ਵੁਤ੍ਤਂ. ਅਟ੍ਠਕਥਾਯਂ ਪਨ ਵਿਸੇਸਨਸ੍ਸ ਪੁਬ੍ਬਨਿਪਾਤਵਸੇਨੇਵ ਅਤ੍ਥਂ ਦਸ੍ਸੇਨ੍ਤੋ ‘‘ਜਾਤਭਣ੍ਡਨਾ’’ਤਿ ਆਹ. ਕਲਹੋ ਜਾਤੋ ਏਤੇਸਨ੍ਤਿ ਕਲਹਜਾਤਾਤਿ ਏਤ੍ਥਾਪਿ ਏਸੇਵ ਨਯੋ. ਕਲਹਸ੍ਸ ਪੁਬ੍ਬਭਾਗੋਤਿ ਕਲਹਸ੍ਸ ਹੇਤੁਭੂਤਾ ਪਟਿਭਾਗਾ ਤਂਸਦਿਸੀ ਚ ਅਨਿਟ੍ਠਕਿਰਿਯਾ. ਹਤ੍ਥਪਰਾਮਾਸਾਦਿਵਸੇਨਾਤਿ ਕੁਜ੍ਝਿਤ੍ਵਾ ਅਞ੍ਞਮਞ੍ਞਸ੍ਸ ਹਤ੍ਥੇ ਗਹੇਤ੍ਵਾ ਪਲਪਨਅਚ੍ਛਿਨ੍ਦਨਾਦਿਵਸੇਨ. ‘‘ਅਯਂ ਧਮ੍ਮੋ, ਨਾਯਂ ਧਮ੍ਮੋ’’ਤਿਆਦਿਨਾ ਵਿਰੁਦ੍ਧਵਾਦਭੂਤਂ ਵਿਵਾਦਂ ਆਪਨ੍ਨਾਤਿ ਵਿਵਾਦਪਨ੍ਨਾ. ਤੇਨਾਹ ‘‘ਵਿਰੁਦ੍ਧਵਾਦਂ ਆਪਨ੍ਨਾ’’ਤਿ. ਮੁਖਸਨ੍ਨਿਸ੍ਸਿਤਤਾਯ ਵਾਚਾ ਇਧ ‘‘ਮੁਖ’’ਨ੍ਤਿ ਅਧਿਪ੍ਪੇਤਾਤਿ ਆਹ ‘‘ਫਰੁਸਾ ਵਾਚਾ ਮੁਖਸਤ੍ਤਿਯੋ’’ਤਿ.

ਸਤਿਪਿ ਉਭਯੇਸਂ ਕਲਾਪਾਨਂ ਪਰਮਤ੍ਥਤੋ ਭੇਦੇ ਪਚੁਰਜਨੇਹਿ ਪਨ ਦੁਵਿਞ੍ਞੇਯ੍ਯਨਾਨਤ੍ਤਂ ਖੀਰੋਦਕਸਮ੍ਮੋਦਿਤਂ ਅਚ੍ਚਨ੍ਤਮੇਤਂ ਸਂਸਟ੍ਠਂ ਵਿਯ ਹੁਤ੍ਵਾ ਤਿਟ੍ਠਤੀਤਿ ਆਹ ‘‘ਖੀਰੋਦਕਂ ਵਿਯ ਭੂਤਾ’’ਤਿ. ਯਥਾ ਖੀਰਞ੍ਚ ਉਦਕਞ੍ਚ ਅਞ੍ਞਮਞ੍ਞਂ ਸਂਸਨ੍ਦਤਿ, ਵਿਸੁਂ ਨ ਹੋਤਿ, ਏਕਤ੍ਤਂ ਵਿਯ ਉਪੇਤਿ, ਏਵਂ ਸਾਮਗ੍ਗਿਵਸੇਨ ਏਕਤ੍ਤੂਪਗਤਚਿਤ੍ਤੁਪ੍ਪਾਦਾਤਿ ਅਤ੍ਥੋ. ਮੇਤ੍ਤਚਿਤ੍ਤਂ ਪਚ੍ਚੁਪਟ੍ਠਾਪੇਤ੍ਵਾ ਓਲੋਕਨਂ ਚਕ੍ਖੂਨਿ ਵਿਯ ਚਕ੍ਖੂਨਿ ਨਾਮਾਤਿ ਆਹ ‘‘ਉਪਸਨ੍ਤੇਹਿ ਮੇਤ੍ਤਚਕ੍ਖੂਹੀ’’ਤਿ. ਪਿਯਭਾਵਦੀਪਕਾਨਿ ਹਿ ਚਕ੍ਖੂਨਿ ਪਿਯਚਕ੍ਖੂਨਿ. ਪਮੁਦਿਤਸ੍ਸ ਪੀਤਿ ਜਾਯਤੀਤਿ ਪਮੋਦਪਚ੍ਚਯਬਲਵਪੀਤਿਮਾਹ. ਪਞ੍ਚਵਣ੍ਣਾ ਪੀਤਿ ਉਪ੍ਪਜ੍ਜਤੀਤਿ ਖੁਦ੍ਦਿਕਾਦਿਭੇਦੇਨ ਪਞ੍ਚਪ੍ਪਕਾਰਾ ਪੀਤਿ ਉਪ੍ਪਜ੍ਜਤਿ. ਪੀਤਿਮਨਸ੍ਸਾਤਿ ਤਾਯ ਪੀਤਿਯਾ ਪੀਣਿਤਮਨਸ੍ਸ, ਪਸ੍ਸਦ੍ਧਿਆਵਹੇਹਿ ਉਲ਼ਾਰੇਹਿ ਪੀਤਿਵੇਗੇਹਿ ਤਿਨ੍ਤਚਿਤ੍ਤਸ੍ਸਾਤਿ ਅਤ੍ਥੋ. ਵਿਗਤਦਰਥੋਤਿ ਕਿਲੇਸਪਰਿਲ਼ਾਹਾਨਂ ਦੂਰੀਭਾਵੇਨ ਵੂਪਸਨ੍ਤਦਰਥੋ.

ਕੇਨ ਉਦਕੇਨ ਦਾਰਿਤੋ ਪਬ੍ਬਤਪ੍ਪਦੇਸੋਤਿ ਕਤ੍ਵਾ ਆਹ ‘‘ਕਨ੍ਦਰੋ ਨਾਮਾ’’ਤਿਆਦਿ. ਉਦਕਸ੍ਸ ਯਥਾਨਿਨ੍ਨਂ ਪਵਤ੍ਤਿਯਾ ਨਦਿਨਿਬ੍ਬਤ੍ਤਨਭਾਵੇਨ ‘‘ਨਦਿਕੁਞ੍ਜੋ’’ਤਿਪਿ ਵੁਚ੍ਚਤਿ. ਸਾਵਟ੍ਟਾ ਨਦਿਯੋ ਪਦਰਾ. ਅਟ੍ਠ ਮਾਸੇਤਿ ਹੇਮਨ੍ਤਗਿਮ੍ਹਉਤੁਵਸੇਨ ਅਟ੍ਠ ਮਾਸੇ. ਖੁਦ੍ਦਕਾ ਉਦਕਵਾਹਿਨਿਯੋ ਸਾਖਾ ਵਿਯਾਤਿ ਸਾਖਾ. ਖੁਦ੍ਦਕਸੋਬ੍ਭਾ ਕੁਸੁਬ੍ਭਾ ਓਕਾਰਸ੍ਸ ਉਕਾਰਂ ਕਤ੍ਵਾ. ਯਤ੍ਥ ਉਪਰਿ ਉਨ੍ਨਤਪ੍ਪਦੇਸਤੋ ਉਦਕਂ ਆਗਨ੍ਤ੍ਵਾ ਤਿਟ੍ਠਤਿ ਚੇਵ ਸਨ੍ਦਤਿ ਚ, ਤੇ ਕੁਸੁਬ੍ਭਾ ਖੁਦ੍ਦਕਆਵਾਟਾ. ਖੁਦ੍ਦਕਨਦਿਯੋਤਿ ਪਬ੍ਬਤਪਾਦਾਦਿਤੋ ਨਿਕ੍ਖਨ੍ਤਾ ਖੁਦ੍ਦਕਾ ਨਦਿਯੋ.

ਪਰਿਸਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.