(੮) ੩. ਸਨਿਮਿਤ੍ਤਵਗ੍ਗਵਣ੍ਣਨਾ

੭੮-੭੯. ਤਤਿਯਸ੍ਸ ਪਠਮੇ ਨਿਮੀਯਤਿ ਏਤ੍ਥ ਫਲਂ ਅਵਸੇਸਪਚ੍ਚਯੇਹਿ ਪਕ੍ਖਿਪੀਯਤਿ ਵਿਯਾਤਿ ਨਿਮਿਤ੍ਤਂ, ਕਾਰਣਨ੍ਤਿ ਆਹ ‘‘ਸਨਿਮਿਤ੍ਤਾਤਿ ਸਕਾਰਣਾ’’ਤਿ. ਦੁਤਿਯਾਦੀਸੂਤਿ ਦੁਤਿਯਸੁਤ੍ਤਾਦੀਸੁ. ਏਸੇਵ ਨਯੋਤਿ ਇਮਿਨਾ ਨਿਦਾਨਾਦਿਪਦਾਨਮ੍ਪਿ ਕਾਰਣਪਰਿਯਾਯਮੇਵ ਦੀਪੇਤਿ. ਨਿਦਦਾਤਿ ਫਲਨ੍ਤਿ ਨਿਦਾਨਂ, ਹਿਨੋਤਿ ਫਲਂ ਪਤਿਟ੍ਠਾਤਿ ਏਤੇਨਾਤਿ ਹੇਤੁ, ਸਙ੍ਖਰੋਤਿ ਫਲਨ੍ਤਿ ਸਙ੍ਖਾਰੋ, ਪਟਿਚ੍ਚ ਏਤਸ੍ਮਾ ਫਲਂ ਏਤੀਤਿ ਪਚ੍ਚਯੋ, ਰੁਪ੍ਪਤਿ ਨਿਰੁਪ੍ਪਤਿ ਫਲਂ ਏਤ੍ਥਾਤਿ ਰੂਪਨ੍ਤਿ ਏਵਂ ਨਿਦਾਨਾਦਿਪਦਾਨਮ੍ਪਿ ਹੇਤੁਪਰਿਯਾਯਤਾ ਵੇਦਿਤਬ੍ਬਾ.

੮੪. ਸਤ੍ਤਮੇ ਪਚ੍ਚਯਭੂਤਾਯਾਤਿ ਸਹਜਾਤਾਦਿਪਚ੍ਚਯਭੂਤਾਯ.

੮੭. ਦਸਮੇ ਸਮੇਚ੍ਚ ਸਮ੍ਭੁਯ੍ਯ ਪਚ੍ਚਯੇਹਿ ਕਤੋਤਿ ਸਙ੍ਖਤੋ, ਸਙ੍ਖਤੋ ਧਮ੍ਮੋ ਆਰਮ੍ਮਣਂ ਏਤੇਸਨ੍ਤਿ ਸਙ੍ਖਤਾਰਮ੍ਮਣਾ. ਮਗ੍ਗਕ੍ਖਣੇ ਨ ਹੋਨ੍ਤਿ ਨਾਮ ਪਹੀਯਨ੍ਤੀਤਿ ਕਤ੍ਵਾ. ਨਾਹੇਸੁਨ੍ਤਿ ਏਤ੍ਥ ‘‘ਵੁਚ੍ਚਨ੍ਤੀ’’ਤਿ ਅਜ੍ਝਾਹਰਿਤਬ੍ਬਂ. ਯਾਵ ਅਰਹਤ੍ਤਾ ਦੇਸਨਾ ਦੇਸਿਤਾ ਤਂਤਂਸੁਤ੍ਤਪਰਿਯੋਸਾਨੇ ‘‘ਨ ਹੋਨ੍ਤੀ’’ਤਿ ਵੁਤ੍ਤਤ੍ਤਾ.

ਸਨਿਮਿਤ੍ਤਵਗ੍ਗਵਣ੍ਣਨਾ ਨਿਟ੍ਠਿਤਾ.