(੬) ੧. ਪੁਗ੍ਗਲਵਗ੍ਗਵਣ੍ਣਨਾ

੫੩. ਦੁਤਿਯਪਣ੍ਣਾਸਕਸ੍ਸ ਪਠਮੇ ਹਿਤਗ੍ਗਹਣੇਨ ਮੇਤ੍ਤਾ ਵੁਤ੍ਤਾ ਹੋਤਿ, ਨ ਕਰੁਣਾ, ਅਨੁਕਮ੍ਪਾਗਹਣੇਨ ਪਨ ਕਰੁਣਾਤਿ ਚਕ੍ਕਵਤ੍ਤਿਨਾ ਸਦ੍ਧਿਂ ਗਹਿਤਤ੍ਤਾ ‘‘ਲੋਕਾਨੁਕਮ੍ਪਾਯਾ’’ਤਿ ਨ ਵੁਤ੍ਤਂ. ਨਿਪ੍ਪਰਿਯਾਯਤੋ ਲੋਕਾਨੁਕਮ੍ਪਾ ਨਾਮ ਸਮ੍ਮਾਸਮ੍ਬੁਦ੍ਧਾਧੀਨਾਤਿ. ਦ੍ਵੇਤਿ ਮਨੁਸ੍ਸਦੇਵਸਮ੍ਪਤ੍ਤਿਵਸੇਨ ਦ੍ਵੇ ਸਮ੍ਪਤ੍ਤਿਯੋ. ਤਾ ਦ੍ਵੇ, ਨਿਬ੍ਬਾਨਸਮ੍ਪਤ੍ਤਿ ਚਾਤਿ ਤਿਸ੍ਸੋ.

੫੪. ਦੁਤਿਯੇ ਬਹੁਸੋ ਲੋਕੇ ਨ ਚਿਣ੍ਣਾ ਨ ਪਵਤ੍ਤਾ ਮਨੁਸ੍ਸਾਤਿ ਆਚਿਣ੍ਣਮਨੁਸ੍ਸਾ. ਕਦਾਚਿਦੇਵ ਹਿ ਨੇਸਂ ਲੋਕੇ ਨਿਬ੍ਬਤ੍ਤਿ ਅਭੂਤਪੁਬ੍ਬਾ ਭੂਤਾਤਿ ਅਬ੍ਭੁਤਮਨੁਸ੍ਸਾ.

੫੫. ਤਤਿਯੇ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਅਨੁਤਾਪਂ ਕਰੋਤਿ ਤਸ੍ਸ ਏਕਬੁਦ੍ਧਖੇਤ੍ਤਭਾਵਤੋ.

੫੬. ਚਤੁਤ੍ਥੇ ਥੂਪਸ੍ਸ ਯੁਤ੍ਤਾਤਿ ਧਾਤੁਯੋ ਪਕ੍ਖਿਪਿਤ੍ਵਾ ਥੂਪਕਰਣਸ੍ਸ ਯੁਤ੍ਤਾ.

੫੭. ਪਞ੍ਚਮੇ ਅਤ੍ਤਨੋ ਆਨੁਭਾਵੇਨਾਤਿ ਸਯਮ੍ਭੁਞਾਣੇਨ. ਬੁਦ੍ਧਾਤਿ ਬੁਦ੍ਧਵਨ੍ਤੋ.

੫੮. ਛਟ੍ਠੇ ਪਹੀਨਤ੍ਤਾ ਨ ਭਾਯਤੀਤਿ ਅਤ੍ਤਸਿਨੇਹਾਭਾਵਤੋ ਨ ਭਾਯਤਿ. ਸਕ੍ਕਾਯਦਿਟ੍ਠਿਗ੍ਗਹਣਞ੍ਚੇਤ੍ਥ ਨਿਦਸ੍ਸਨਮਤ੍ਤਂ, ਅਤ੍ਤਸਿਨੇਹਸ੍ਸ ਪਟਿਘਸ੍ਸ ਤਦੇਕਟ੍ਠਸਮ੍ਮੋਹਸ੍ਸ ਚ ਵਸੇਨ ਭਾਯਨਂ ਹੋਤੀਤਿ ਤੇਸਮ੍ਪਿ ਪਹੀਨਤ੍ਤਾ ਨ ਭਾਯਤਿ, ਅਞ੍ਞਥਾ ਸੋਤਾਪਨ੍ਨਾਦੀਨਂ ਅਭਯੇਨ ਭਵਿਤਬ੍ਬਂ ਸਿਯਾ. ਸਕ੍ਕਾਯਦਿਟ੍ਠਿਯਾ ਬਲਵਤ੍ਤਾਤਿ ਏਤ੍ਥ ਅਹਂਕਾਰਸਮ੍ਮੋਹਨਤਾਦੀਨਮ੍ਪਿ ਬਲਵਤ੍ਤਾਤਿ ਵਤ੍ਤਬ੍ਬਂ.

੫੯. ਸਤ੍ਤਮੇ ਅਸ੍ਸਾਜਾਨੀਯੋਤਿ ਲਿਖਨ੍ਤਿ, ਉਸਭਾਜਾਨੀਯੋਤਿ ਪਨ ਪਾਠੋਤਿ.

੬੧. ਨਵਮੇ ਤਤ੍ਥਾਤਿ ਅਨ੍ਤਰਾਪਣੇ. ਏਕੋਤਿ ਦ੍ਵੀਸੁ ਕਿਨ੍ਨਰੇਸੁ ਏਕੋ. ਅਮ੍ਬਿਲਿਕਾਫਲਞ੍ਚ ਅਦ੍ਦਸਾਤਿ ਆਨੇਤ੍ਵਾ ਸਮ੍ਬਨ੍ਧੋ. ਅਮ੍ਬਿਲਿਕਾਫਲਨ੍ਤਿ ਤਿਨ੍ਤਿਣੀਫਲਨ੍ਤਿ ਵਦਨ੍ਤਿ, ਚਤੁਰਮ੍ਬਿਲਨ੍ਤਿ ਅਪਰੇ. ਦ੍ਵੇ ਅਤ੍ਥੇਤਿ ਪਾਲ਼ਿਯਂ ਵੁਤ੍ਤੇ ਦ੍ਵੇ ਅਤ੍ਥੇ.

੬੨. ਦਸਮੇ ਯਥਾਆਰਦ੍ਧੇ ਕਿਚ੍ਚੇ ਵਤ੍ਤਮਾਨੇ ਅਨ੍ਤਰਾ ਏਵ ਪਟਿਗਮਨਂ ਪਟਿਵਾਨਂ, ਨਤ੍ਥਿ ਏਤਸ੍ਸ ਪਟਿਵਾਨਨ੍ਤਿ ਅਪ੍ਪਟਿਵਾਨੋ. ਤਤ੍ਥ ਅਸਂਕੋਚਪ੍ਪਤ੍ਤੋ. ਤੇਨਾਹ ‘‘ਅਨੁਕ੍ਕਣ੍ਠਿਤੋ’’ਤਿਆਦਿ.

੬੩. ਏਕਾਦਸਮੇ ਸਨ੍ਨਿਵਾਸਨ੍ਤਿ ਸਹਵਾਸਂ. ਯਥਾ ਅਸਪ੍ਪੁਰਿਸਾ ਸਹ ਵਸਨ੍ਤਾ ਅਞ੍ਞਮਞ੍ਞਂ ਅਗਾਰਵੇਨ ਅਨਾਦਰਿਯਂ ਕਰੋਨ੍ਤਿ, ਤਪ੍ਪਟਿਕ੍ਖੇਪੇਨ ਸਪ੍ਪੁਰਿਸਾਨਂ ਸਗਾਰਵਪ੍ਪਟਿਪਤ੍ਤਿਦਸ੍ਸਨਪਰਮਿਦਂ ਸੁਤ੍ਤਂ ਦਟ੍ਠਬ੍ਬਂ.

੬੪. ਦ੍ਵਾਦਸਮੇ ਦ੍ਵੀਸੁਪਿ ਪਕ੍ਖੇਸੂਤਿ ਵਿਵਾਦਾਪਨ੍ਨਾਨਂ ਭਿਕ੍ਖੂਨਂ ਦ੍ਵੀਸੁਪਿ ਪਕ੍ਖੇਸੁ. ਸਂਸਰਮਾਨਾਤਿ ਪਵਤ੍ਤਮਾਨਾ. ਦਿਟ੍ਠਿਪਲ਼ਾਸੋਤਿ ਦਿਟ੍ਠਿਸਨ੍ਨਿਸ੍ਸਯੋ ਪਲ਼ਾਸੋ ਯੁਗਗ੍ਗਾਹੋ. ਆਘਾਤੇਨ੍ਤੋਤਿ ਆਹਨਨ੍ਤੋ ਬਾਧੇਨ੍ਤੋ. ਅਨਭਿਰਾਧਨਵਸੇਨਾਤਿ ਯਸ੍ਸ ਉਪ੍ਪਜ੍ਜਤਿ, ਤਸ੍ਸ ਤਦਞ੍ਞੇਸਞ੍ਚ ਅਤ੍ਥਸ੍ਸ ਅਨਭਿਰਾਧਨਵਸੇਨ. ਸਬ੍ਬਮ੍ਪੇਤਨ੍ਤਿ ਵਚੀਸਂਸਾਰੋਤਿ ਸਬ੍ਬਮ੍ਪੇਤਂ. ਅਤ੍ਤਨੋ ਚਿਤ੍ਤੇ ਪਰਿਸਾਯ ਚ ਚਿਤ੍ਤੇਤਿ ਆਨੇਤ੍ਵਾ ਸਮ੍ਬਨ੍ਧੋ.

ਪੁਗ੍ਗਲਵਗ੍ਗਵਣ੍ਣਨਾ ਨਿਟ੍ਠਿਤਾ.