੭. ਕਣ੍ਹਸੁਤ੍ਤਵਣ੍ਣਨਾ

੭. ਸਤ੍ਤਮੇ ਯਥਾ ‘‘ਕਣ੍ਹਾ ਗਾਵੀ’’ਤਿਆਦੀਸੁ ਕਾਲ਼ਵਣ੍ਣੇਨ ਸਮਨ੍ਨਾਗਤਾ ‘‘ਕਣ੍ਹਾ’’ਤਿ ਵੁਚ੍ਚਤਿ, ਨ ਏਵਂ ਕਾਲ਼ਵਣ੍ਣਤਾਯ ਧਮ੍ਮਾ ‘‘ਕਣ੍ਹਾ’’ਤਿ ਵੁਚ੍ਚਨ੍ਤਿ, ਅਥ ਖੋ ਕਣ੍ਹਾਭਿਜਾਤਿਨਿਬ੍ਬਤ੍ਤਿਹੇਤੁਤੋ ਅਪ੍ਪਭਸ੍ਸਰਭਾਵਕਰਣਤੋ ਵਾ ‘‘ਕਣ੍ਹਾ’’ਤਿ ਵੁਚ੍ਚਨ੍ਤੀਤਿ ਦਸ੍ਸੇਨ੍ਤੋ ‘‘ਨ ਕਾਲ਼ਵਣ੍ਣਤਾਯਾ’’ਤਿਆਦਿਮਾਹ. ਕਣ੍ਹਤਾਯਾਤਿ ਕਣ੍ਹਾਭਿਜਾਤਿਤਾਯ. ਕਣ੍ਹਾਭਿਜਾਤੀਤਿ ਚ ਅਪਾਯਾ ਵੁਚ੍ਚਨ੍ਤਿ ਮਨੁਸ੍ਸੇਸੁ ਚ ਦੋਭਗ੍ਗਿਯਂ. ਸਰਸੇਨਾਤਿ ਸਭਾਵੇਨ. ਨ ਹਿਰੀਯਤਿ ਨ ਲਜ੍ਜਤੀਤਿ ਅਹਿਰਿਕੋ, ਪੁਗ੍ਗਲੋ, ਚਿਤ੍ਤਂ, ਤਂ ਸਮ੍ਪਯੁਤ੍ਤਧਮ੍ਮਸਮੁਦਾਯੋ ਵਾ. ਤਸ੍ਸ ਭਾਵੋ ਅਹਿਰਿਕ੍ਕਨ੍ਤਿ ਵਤ੍ਤਬ੍ਬੇ ਏਕਸ੍ਸ ਕ-ਕਾਰਸ੍ਸ ਲੋਪਂ ਕਤ੍ਵਾ ਅਹਿਰਿਕਨ੍ਤਿ ਵੁਤ੍ਤਨ੍ਤਿ ਆਹ ‘‘ਅਹਿਰਿਕਨ੍ਤਿ ਅਹਿਰਿਕਭਾਵੋ’’ਤਿ. ਨ ਓਤ੍ਤਪ੍ਪਤੀਤਿ ਅਨੋਤ੍ਤਾਪੀ, ਪੁਗ੍ਗਲੋ, ਯਥਾਵੁਤ੍ਤਧਮ੍ਮਸਮੁਦਾਯੋ ਵਾ, ਤਸ੍ਸ ਭਾਵੋ ਅਨੋਤ੍ਤਪ੍ਪਨ੍ਤਿ ਆਹ ‘‘ਅਨੋਤ੍ਤਾਪਿਭਾਵੋ’’ਤਿ.

ਕਣ੍ਹਸੁਤ੍ਤਵਣ੍ਣਨਾ ਨਿਟ੍ਠਿਤਾ.