੧੦. ਵਸ੍ਸੂਪਨਾਯਿਕਸੁਤ੍ਤਵਣ੍ਣਨਾ

੧੦. ਦਸਮੇ ਅਪਞ੍ਞਤ੍ਤਾਤਿ ਅਨਨੁਞ੍ਞਾਤਾ, ਅਵਿਹਿਤਾ ਵਾ. ਵਸ੍ਸੇਤਿ ਵਸ੍ਸਾਰਤ੍ਤਂ ਸਨ੍ਧਾਯ ਵਦਤਿ, ਉਤੁਵਸ੍ਸੇਤਿ ਹੇਮਨ੍ਤਂ ਸਨ੍ਧਾਯ. ਏਕਿਨ੍ਦ੍ਰਿਯਂ ਜੀਵਂ ਵਿਹੇਠੇਨ੍ਤਾਤਿ ਰੁਕ੍ਖਲਤਾਦੀਸੁ ਜੀਵਸਞ੍ਞਿਤਾਯ ਏਵਮਾਹਂਸੁ. ਏਕਿਨ੍ਦ੍ਰਿਯਨ੍ਤਿ ਚ ਕਾਯਿਨ੍ਦ੍ਰਿਯਂ ਅਤ੍ਥੀਤਿ ਮਞ੍ਞਮਾਨਾ ਵਦਨ੍ਤਿ. ਸਙ੍ਘਾਤਂ ਆਪਾਦੇਨ੍ਤਾਤਿ ਵਿਨਾਸਂ ਆਪਾਦੇਨ੍ਤਾ. ਸਂਕਸਾਯਿਸ੍ਸਨ੍ਤੀਤਿ ਅਪ੍ਪੋਸ੍ਸੁਕ੍ਕਾ ਨਿਬਦ੍ਧਵਾਸਂ ਵਸਿਸ੍ਸਨ੍ਤਿ. ਅਪਰਜ੍ਜੁਗਤਾਯ ਆਸਾਲ਼੍ਹਿਯਾ ਉਪਗਨ੍ਤਬ੍ਬਾਤਿ ਏਤ੍ਥ ਅਪਰਜ੍ਜੁ ਗਤਾਯ ਅਸ੍ਸਾਤਿ ਅਪਰਜ੍ਜੁਗਤਾ, ਤਸ੍ਸਾ ਅਪਰਜ੍ਜੁਗਤਾਯ ਅਤਿਕ੍ਕਨ੍ਤਾਯ, ਅਪਰਸ੍ਮਿਂ ਦਿਵਸੇਤਿ ਅਤ੍ਥੋ, ਤਸ੍ਮਾ ਆਸਾਲ਼੍ਹਿਪੁਣ੍ਣਮਾਯ ਅਨਨ੍ਤਰੇ ਪਾਟਿਪਦਦਿਵਸੇ ਉਪਗਨ੍ਤਬ੍ਬਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਮਾਸਗਤਾਯ ਆਸਾਲ਼੍ਹਿਯਾ ਉਪਗਨ੍ਤਬ੍ਬਾਤਿ ਮਾਸੋ ਗਤਾਯ ਅਸ੍ਸਾਤਿ ਮਾਸਗਤਾ, ਤਸ੍ਸਾ ਮਾਸਗਤਾਯ ਅਤਿਕ੍ਕਨ੍ਤਾਯ, ਮਾਸੇ ਪਰਿਪੁਣ੍ਣੇਤਿ ਅਤ੍ਥੋ. ਤਸ੍ਮਾ ਆਸਾਲ਼੍ਹਿਪੁਣ੍ਣਮਤੋ ਪਰਾਯ ਪੁਣ੍ਣਮਾਯ ਅਨਨ੍ਤਰੇ ਪਾਟਿਪਦਦਿਵਸੇ ਉਪਗਨ੍ਤਬ੍ਬਾਤਿ ਅਤ੍ਥੋ ਦਟ੍ਠਬ੍ਬੋ.

ਵਸ੍ਸੂਪਨਾਯਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਕਮ੍ਮਕਾਰਣਵਗ੍ਗਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਨਿਟ੍ਠਿਤਾ.