(੧੨) ੨. ਆਯਾਚਨਵਗ੍ਗਵਣ੍ਣਨਾ

੧੩੧. ਸਦ੍ਧੋ ਭਿਕ੍ਖੂਤਿ ਸਦ੍ਧਾਯ ਸਮਨ੍ਨਾਗਤੋ ਭਿਕ੍ਖੁ. ਯੋ ਭਿਕ੍ਖੁ ਸਾਰਿਪੁਤ੍ਤਮੋਗ੍ਗਲ੍ਲਾਨੇਹਿ ਸਦਿਸਭਾਵਂ ਪਤ੍ਥੇਤਿ, ਸੋ ਯੇਹਿ ਗੁਣੇਹਿ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਏਤਦਗ੍ਗੇ ਠਪਿਤਾ, ਤੇ ਗੁਣੇ ਅਤ੍ਤਨੋ ਅਭਿਕਙ੍ਖੇਯ੍ਯਾਤਿ ਆਹ ‘‘ਯਾਦਿਸੋ ਸਾਰਿਪੁਤ੍ਤਤ੍ਥੇਰੋ ਪਞ੍ਞਾਯਾ’’ਤਿਆਦਿ. ਇਤੋ ਉਤ੍ਤਰਿ ਪਤ੍ਥੇਨ੍ਤੋ ਮਿਚ੍ਛਾ ਪਤ੍ਥੇਯ੍ਯਾਤਿ ਸਾਰਿਪੁਤ੍ਤਮੋਗ੍ਗਲ੍ਲਾਨਾਨਂ ਯੇ ਪਞ੍ਞਾਦਯੋ ਗੁਣਾ ਉਪਲਬ੍ਭਨ੍ਤਿ, ਤਤੋ ਉਤ੍ਤਰਿ ਪਤ੍ਥੇਨ੍ਤੋ ਮਿਚ੍ਛਾ ਪਤ੍ਥੇਯ੍ਯ. ਅਗ੍ਗਸਾਵਕਗੁਣਪਰਮਾ ਹਿ ਸਾਵਕਗੁਣਮਰਿਯਾਦਾ. ਤੇਸਂ ਸਾਵਕਗੁਣਾਨਂ ਯਦਿਦਂ ਅਗ੍ਗਸਾਵਕਗੁਣਾ, ਨ ਤਤੋ ਪਰਂ ਸਾਵਕਗੁਣਾ ਨਾਮ ਅਤ੍ਥਿ. ਤੇਨੇਵਾਹ ‘‘ਯਂ ਨਤ੍ਥਿ, ਤਸ੍ਸ ਪਤ੍ਥਿਤਤ੍ਤਾ’’ਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

੧੩੫. ਪਞ੍ਚਮੇ ਯਸ੍ਸ ਗੁਣਾ ਖਤਾ ਉਪਹਤਾ ਚ, ਸੋ ਖਤੋ ਉਪਹਤੋ ਨਾਮ ਹੋਤੀਤਿ ਆਹ ‘‘ਗੁਣਾਨਂ ਖਤਤ੍ਤਾ’’ਤਿਆਦਿ. ਖਤਤ੍ਤਾਤਿ ਛਿਨ੍ਨਤ੍ਤਾ. ਉਪਹਤਤ੍ਤਾਤਿ ਨਟ੍ਠਤ੍ਤਾ. ਤੇਨਾਹ ‘‘ਛਿਨ੍ਨਗੁਣਂ ਨਟ੍ਠਗੁਣਨ੍ਤਿ ਅਤ੍ਥੋ’’ਤਿ. ਅਪੁਞ੍ਞਸ੍ਸ ਪਸਵੋ ਨਾਮ ਅਤ੍ਥਤੋ ਪਟਿਲਾਭੋਤਿ ਆਹ ‘‘ਪਸਵਤੀਤਿ ਪਟਿਲਭਤੀ’’ਤਿ, ਅਤ੍ਤਨੋ ਸਨ੍ਤਾਨੇ ਉਪ੍ਪਾਦੇਤੀਤਿ ਅਤ੍ਥੋ. ਅਨਨੁਪਵਿਸਿਤ੍ਵਾਤਿ ਞਾਣੇਨ ਅਨੋਗਾਹੇਤ੍ਵਾ. ਸੇਸਮੇਤ੍ਥ ਛਟ੍ਠਾਦੀਨਿ ਚ ਸੁਵਿਞ੍ਞੇਯ੍ਯਾਨੇਵ.

ਆਯਾਚਨਵਗ੍ਗਵਣ੍ਣਨਾ ਨਿਟ੍ਠਿਤਾ.