੨-੪. ਅਧਿਵੁਤ੍ਤਿਪਦਸੁਤ੍ਤਾਦਿਵਣ੍ਣਨਾ

੨੨-੨੪. ਦੁਤਿਯੇ ਅਧਿਵਚਨਪਦਾਨਨ੍ਤਿ ਪਞ੍ਞਤ੍ਤਿਪਦਾਨਂ. ਦਾਸਾਦੀਸੁ ਸਿਰਿਵਡ੍ਢਕਾਦਿਸਦ੍ਦਾ ਵਿਯ ਵਚਨਮਤ੍ਤਮੇਵ ਅਧਿਕਾਰਂ ਕਤ੍ਵਾ ਪਵਤ੍ਤਿਯਾ ਅਧਿਵਚਨਂ ਪਞ੍ਞਤ੍ਤਿ. ਅਥ ਵਾ ਅਧਿਸਦ੍ਦੋ ਉਪਰਿਭਾਗੇ. ਵੁਚ੍ਚਤੀਤਿ ਵਚਨਂ, ਉਪਰਿ ਵਚਨਂ ਅਧਿਵਚਨਂ, ਉਪਾਦਾਭੂਤਰੂਪਾਦੀਨਂ ਉਪਰਿ ਪਞ੍ਞਪਿਯਮਾਨਾ ਉਪਾਦਾਪਞ੍ਞਤ੍ਤੀਤਿ ਅਤ੍ਥੋ, ਤਸ੍ਮਾ ਪਞ੍ਞਤ੍ਤਿਦੀਪਕਪਦਾਨੀਤਿ ਅਤ੍ਥੋ ਦਟ੍ਠਬ੍ਬੋ. ਤਸ੍ਸ ਪਦਾਨਿ ਪਦਟ੍ਠਾਨਾਨਿ ਅਧਿਵਚਨਪਦਾਨਿ. ਤੇਨਾਹ ‘‘ਤੇਸਂ ਯੇ’’ਤਿਆਦਿ. ਤੇਸਨ੍ਤਿ ਅਧਿਵਚਨਾਨਂ. ਯੇਤਿ ਖਨ੍ਧਾਦਯੋ. ਅਧਿਵੁਤ੍ਤਿਤਾਯ ਅਧਿਵੁਤ੍ਤਿਯੋਤਿ ਦਿਟ੍ਠਿਯੋ ਵੁਚ੍ਚਨ੍ਤਿ. ਅਧਿਕਞ੍ਹਿ ਸਭਾਵਧਮ੍ਮੇਸੁ ਸਸ੍ਸਤਾਦਿਂ, ਪਕਤਿਆਦਿਂ, ਦ੍ਰਬ੍ਯਾਦਿਂ, ਜੀਵਾਦਿਂ, ਕਾਯਾਦਿਞ੍ਚ, ਅਭੂਤਂ ਅਤ੍ਥਂ ਅਜ੍ਝਾਰੋਪੇਤ੍ਵਾ ਦਿਟ੍ਠਿਯੋ ਪਵਤ੍ਤਨ੍ਤੀਤਿ. ਤੇਨਾਹ ‘‘ਅਥ ਵਾ’’ਤਿਆਦਿ. ਤਤਿਯਚਤੁਤ੍ਥਾਨਿ ਸੁਵਿਞ੍ਞੇਯ੍ਯਾਨਿ.

ਅਧਿਵੁਤ੍ਤਿਪਦਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.