(੯) ੪. ਥੇਰਵਗ੍ਗੋ

੧-੮. ਵਾਹਨਸੁਤ੍ਤਾਦਿਵਣ੍ਣਨਾ

੮੧-੮੮. ਚਤੁਤ੍ਥਸ੍ਸ ਪਠਮੇ ਵਿਮਰਿਯਾਦੀਕਤੇਨਾਤਿ ਨਿਮ੍ਮਰਿਯਾਦੀਕਤੇਨ. ਚੇਤਸਾਤਿ ਏਵਂਵਿਧੇਨ ਚਿਤ੍ਤੇਨ ਵਿਹਰਤਿ. ਤਤ੍ਥ ਦ੍ਵੇ ਮਰਿਯਾਦਾ ਕਿਲੇਸਮਰਿਯਾਦਾ ਚ ਆਰਮ੍ਮਣਮਰਿਯਾਦਾ ਚ. ਸਚੇ ਹਿਸ੍ਸ ਰੂਪਾਦਿਕੇ ਆਰਬ੍ਭ ਰਾਗਾਦਯੋ ਉਪ੍ਪਜ੍ਜੇਯ੍ਯੁਂ, ਕਿਲੇਸਮਰਿਯਾਦਾ ਤੇਨ ਕਤਾ ਭਵੇਯ੍ਯ. ਤੇਸੁ ਪਨਸ੍ਸ ਏਕੋਪਿ ਨ ਉਪ੍ਪਨ੍ਨੋਤਿ ਕਿਲੇਸਮਰਿਯਾਦਾ ਨਤ੍ਥਿ. ਸਚੇ ਪਨਸ੍ਸ ਰੂਪਾਦਿਧਮ੍ਮੇ ਆਵਜ੍ਜੇਨ੍ਤਸ੍ਸ ਏਕਚ੍ਚੇ ਆਪਾਥਂ ਨਾਗਚ੍ਛੇਯ੍ਯੁਂ, ਏਵਮਸ੍ਸ ਆਰਮ੍ਮਣਮਰਿਯਾਦਾ ਭਵੇਯ੍ਯ. ਤੇ ਪਨਸ੍ਸ ਧਮ੍ਮੇ ਆਵਜ੍ਜੇਨ੍ਤਸ੍ਸ ਆਪਾਥਂ ਅਨਾਗਤਧਮ੍ਮੋ ਨਾਮ ਨਤ੍ਥੀਤਿ ਆਰਮ੍ਮਣਮਰਿਯਾਦਾਪਿ ਨਤ੍ਥਿ. ਇਧ ਪਨ ਕਿਲੇਸਮਰਿਯਾਦਾ ਅਧਿਪ੍ਪੇਤਾਤਿ ਆਹ ‘‘ਕਿਲੇਸਮਰਿਯਾਦਂ ਭਿਨ੍ਦਿਤ੍ਵਾ’’ਤਿਆਦਿ. ਤਤਿਯਾਦੀਸੁ ਨਤ੍ਥਿ ਵਤ੍ਤਬ੍ਬਂ.

ਵਾਹਨਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੯-੧੦. ਕੋਕਾਲਿਕਸੁਤ੍ਤਾਦਿਵਣ੍ਣਨਾ

੮੯-੯੦. ਨਵਮੇ (ਸਂ. ਨਿ. ਟੀ. ੧.੧.੧੮੧) ਕੋਕਾਲਿਕਨਾਮਕਾ ਦ੍ਵੇ ਭਿਕ੍ਖੂ. ਤਤੋ ਇਧਾਧਿਪ੍ਪੇਤਂ ਨਿਦ੍ਧਾਰੇਤ੍ਵਾ ਦਸ੍ਸੇਤੁਂ ‘‘ਕੋਯਂ ਕੋਕਾਲਿਕੋ’’ਤਿ ਪੁਚ੍ਛਾ. ਸੁਤ੍ਤਸ੍ਸ ਅਟ੍ਠੁਪ੍ਪਤ੍ਤਿਂ ਦਸ੍ਸੇਤੁਂ ‘‘ਕਸ੍ਮਾ ਚ ਉਪਸਙ੍ਕਮੀ’’ਤਿ ਪੁਚ੍ਛਾ. ਅਯਂ ਕਿਰਾਤਿਆਦਿ ਯਥਾਕ੍ਕਮਂ ਤਾਸਂ ਵਿਸ੍ਸਜ੍ਜਨਂ. ਵਿਵੇਕਵਾਸਂ ਵਸਿਤੁਕਾਮਤ੍ਤਾ ਅਪ੍ਪਿਚ੍ਛਤਾਯ ਚ ਮਾ ਨੋ ਕਸ੍ਸਚਿ…ਪੇ… ਵਸਿਂਸੁ. ਆਘਾਤਂ ਉਪ੍ਪਾਦੇਸਿ ਅਤ੍ਤਨੋ ਇਚ੍ਛਾਵਿਘਾਤਨਤੋ. ਥੇਰਾ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦਯਿਂਸੁ ਪਯੁਤ੍ਤਵਾਚਾਯ ਅਕਤਤ੍ਤਾ ਥੇਰੇਹਿ ਚ ਅਦਾਪਿਤਤ੍ਤਾ. ਪੁਬ੍ਬੇਪਿ…ਪੇ… ਮਞ੍ਞੇਤਿ ਇਮਿਨਾ ਥੇਰਾਨਂ ਕੋਹਞ੍ਞੇ ਠਿਤਭਾਵਂ ਆਸਙ੍ਕਤਿ ਅਵਣੇ ਵਣਂ ਪਸ੍ਸਨ੍ਤੋ ਵਿਯ, ਸੁਪਰਿਸੁਦ੍ਧੇ ਆਦਾਸਤਲੇ ਜਲ੍ਲਂ ਉਟ੍ਠਾਪੇਨ੍ਤੋ ਵਿਯ ਚ.

ਅਪਰਜ੍ਝਿਤ੍ਵਾਤਿ ਭਗਵਤੋ ਸਮ੍ਮੁਖਾ ‘‘ਪਾਪਭਿਕ੍ਖੂ ਜਾਤਾ’’ਤਿ ਵਤ੍ਵਾ. ਮਹਾਸਾਵਜ੍ਜਦਸ੍ਸਨਤ੍ਥਨ੍ਤਿ ਮਹਾਸਾਵਜ੍ਜਭਾਵਦਸ੍ਸਨਤ੍ਥਂ, ਅਯਮੇਵ ਵਾ ਪਾਠੋ. ਮਾਹੇਵਨ੍ਤਿ ਮਾ ਏਵਮਾਹ, ਮਾ ਏਵਂ ਭਣਿ. ਸਦ੍ਧਾਯ ਅਯੋ ਉਪ੍ਪਾਦੋ ਸਦ੍ਧਾਯੋ, ਤਂ ਆਵਹਤੀਤਿ ਸਦ੍ਧਾਯਿਕੋਤਿ ਆਹ ‘‘ਸਦ੍ਧਾਯ ਆਗਮਕਰੋ’’ਤਿ. ਸਦ੍ਧਾਯਿਕੋਤਿ ਵਾ ਸਦ੍ਧਾਯ ਅਯਿਤਬ੍ਬੋ, ਸਦ੍ਧੇਯ੍ਯੋਤਿ ਅਤ੍ਥੋ. ਤੇਨਾਹ ‘‘ਸਦ੍ਧਾਤਬ੍ਬਵਚਨੋ ਵਾ’’ਤਿ.

ਪੀਲ਼ਕਾ ਨਾਮ ਬਾਹਿਰਤੋ ਪਟ੍ਠਾਯ ਅਟ੍ਠੀਨਿ ਭਿਨ੍ਦਨ੍ਤਿ, ਇਮਾ ਪਨ ਪਠਮਂਯੇਵ ਅਟ੍ਠੀਨਿ ਭਿਨ੍ਦਿਤ੍ਵਾ ਉਗ੍ਗਤਾ. ਤੇਨਾਹ ‘‘ਅਟ੍ਠੀਨਿ ਭਿਨ੍ਦਿਤ੍ਵਾ ਉਗ੍ਗਤਾਹਿ ਪਿਲ਼ਕਾਹੀ’’ਤਿ. ਤਰੁਣਬੇਲੁਵਮਤ੍ਤਿਯੋਤਿ ਤਰੁਣਬਿਲ੍ਲਫਲਮਤ੍ਤਿਯੋ. ਵਿਸਗਿਲਿਤੋਤਿ ਖਿਤ੍ਤਪਹਰਣੋ. ਤਞ੍ਚ ਬਲ਼ਿਸਂ ਵਿਸਸਮਞ੍ਞਾ ਲੋਕੇ. ਆਰਕ੍ਖਦੇਵਤਾਨਂ ਸਦ੍ਦਂ ਸੁਤ੍ਵਾਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧੋ.

ਬ੍ਰਹ੍ਮਲੋਕੇਤਿ ਸੁਦ੍ਧਾਵਾਸਲੋਕੇ. ਵਰਾਕੋਤਿ ਅਨੁਗ੍ਗਹਵਚਨਮੇਤਂ. ਹੀਨਪਰਿਯਾਯੋਤਿ ਕੇਚਿ. ਪਿਯਸੀਲਾਤਿ ਇਮਿਨਾ ਏਤਸ੍ਮਿਂ ਅਤ੍ਥੇ ਨਿਰੁਤ੍ਤਿਨਯੇਨ ਪੇਸਲਾਤਿ ਪਦਸਿਦ੍ਧੀਤਿ ਦਸ੍ਸੇਤਿ. ਕਬਰਕ੍ਖੀਨੀਤਿ ਬ੍ਯਾਧਿਬਲੇਨ ਪਰਿਭਿਨ੍ਨਵਣ੍ਣਤਾਯ ਕਬਰਭੂਤਾਨਿ ਅਕ੍ਖੀਨਿ. ਯਤ੍ਤਕਨ੍ਤਿ ਭਗਵਤੋ ਵਚਨਂ ਅਞ੍ਞਥਾ ਕਰੋਨ੍ਤੇਨ ਯਤ੍ਤਕਂ ਤਯਾ ਅਪਰਦ੍ਧਂ, ਤਸ੍ਸ ਪਮਾਣਂ ਨਤ੍ਥੀਤਿ ਅਤ੍ਥੋ. ਯਸ੍ਮਾ ਅਨਾਗਾਮਿਨੋ ਨਾਮ ਪਹੀਨਕਾਮਚ੍ਛਨ੍ਦਬ੍ਯਾਪਾਦਾ ਹੋਨ੍ਤਿ, ਤ੍ਵਞ੍ਚ ਦਿਟ੍ਠਿਕਾਮਚ੍ਛਨ੍ਦਬ੍ਯਾਪਾਦਵਸੇਨ ਇਧਾਗਤੋ, ਤਸ੍ਮਾ ਯਾਵਞ੍ਚ ਤੇ ਇਦਂ ਅਪਰਦ੍ਧਨ੍ਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਅਦਿਟ੍ਠਿਪ੍ਪਤ੍ਤੋਤਿ ਅਪ੍ਪਤ੍ਤਦਿਟ੍ਠਿਕੋ. ਗਿਲਿਤਵਿਸੋ ਵਿਯ ਵਿਸਂ ਗਿਲਿਤ੍ਵਾ ਠਿਤੋ ਵਿਯ. ਕੁਠਾਰਿਸਦਿਸਾ ਮੂਲਪਚ੍ਛਿਨ੍ਦਨਟ੍ਠੇਨ. ਉਤ੍ਤਮਤ੍ਥੇਤਿ ਅਰਹਤ੍ਤੇ. ਖੀਣਾਸਵੋਤਿ ਵਦਤਿ ਸੁਨਕ੍ਖਤ੍ਤੋ ਵਿਯ ਅਚੇਲਂ ਕੋਰਕ੍ਖਤ੍ਤਿਯਂ. ਯੋ ਅਗ੍ਗਸਾਵਕੋ ਵਿਯ ਪਸਂਸਿਤਬ੍ਬੋ ਖੀਣਾਸਵੋ, ਤਂ ‘‘ਦੁਸ੍ਸੀਲੋ ਅਯ’’ਨ੍ਤਿ ਵਦਤਿ. ਵਿਚਿਨਾਤੀਤਿ ਆਚਿਨੋਤਿ ਪਸਵਤਿ. ਪਸਂਸਿਯਨਿਨ੍ਦਾ ਤਾਵ ਸਮ੍ਪਨ੍ਨਗੁਣਪਰਿਧਂਸਨਵਸੇਨ ਪਵਤ੍ਤਿਯਾ ਸਾਵਜ੍ਜਤਾਯ ਕਟੁਕਵਿਪਾਕਾ, ਨਿਨ੍ਦਿਯਪ੍ਪਸਂਸਾ ਪਨ ਕਥਂ ਤਾਯ ਸਮਵਿਪਾਕਾਤਿ? ਤਤ੍ਥ ਅਵਿਜ੍ਜਮਾਨਗੁਣਸਮਾਰੋਪਨੇਨ ਅਤ੍ਤਨੋ ਪਰੇਸਞ੍ਚ ਮਿਚ੍ਛਾਪਟਿਪਤ੍ਤਿਹੇਤੁਭਾਵਤੋ ਪਸਂਸਿਯੇਨ ਤਸ੍ਸ ਸਮਭਾਵਕਰਣਤੋ ਚ. ਲੋਕੇਪਿ ਹਿ ਅਸੂਰਂ ਸੂਰੇਨ ਸਮਂ ਕਰੋਨ੍ਤੋ ਗਾਰਯ੍ਹੋ ਹੋਤਿ, ਪਗੇਵ ਦੁਪ੍ਪਟਿਪਨ੍ਨਂ ਸੁਪ੍ਪਟਿਪਨ੍ਨੇਨ ਸਮਂ ਕਰੋਨ੍ਤੋਤਿ.

ਸਕੇਨ ਧਨੇਨਾਤਿ ਅਤ੍ਤਨੋ ਸਾਪਤੇਯ੍ਯੇਨ. ਅਯਂ ਅਪ੍ਪਮਤ੍ਤਕੋ ਅਪਰਾਧੋ ਦਿਟ੍ਠਧਮ੍ਮਿਕਤ੍ਤਾ ਸਪ੍ਪਤਿਕਾਰਤ੍ਤਾ ਚ ਤਸ੍ਸ. ਅਯਂ ਮਹਨ੍ਤਤਰੋ ਕਲਿ ਕਤੂਪਚਿਤਸ੍ਸ ਸਮ੍ਪਰਾਯਿਕਤ੍ਤਾ ਅਪ੍ਪਤਿਕਾਰਤ੍ਤਾ ਚ.

ਨਿਰਬ੍ਬੁਦੋਤਿ ਗਣਨਾਵਿਸੇਸੋ ਏਸੋਤਿ ਆਹ ‘‘ਨਿਰਬ੍ਬੁਦਗਣਨਾਯਾ’’ਤਿ, ਸਤਸਹਸ੍ਸਂ ਨਿਰਬ੍ਬੁਦਾਨਨ੍ਤਿ ਅਤ੍ਥੋ. ਯਮਰਿਯਗਰਹੀ ਨਿਰਯਂ ਉਪੇਤੀਤਿ ਏਤ੍ਥ ਯਥਾਵੁਤ੍ਤਆਯੁਪ੍ਪਮਾਣਂ ਪਾਕਤਿਕਵਸੇਨ ਅਰਿਯੂਪਵਾਦਿਨਾ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਅਗ੍ਗਸਾਵਕਾਨਂ ਪਨ ਗੁਣਮਹਨ੍ਤਤਾਯ ਤਤੋਪਿ ਅਤਿਵਿਯ ਮਹਨ੍ਤਤਰਮੇਵਾਤਿ ਵਦਨ੍ਤਿ.

ਅਥ ਖੋ ਬ੍ਰਹ੍ਮਾ ਸਹਮ੍ਪਤੀਤਿ ਕੋ ਅਯਂ ਬ੍ਰਹ੍ਮਾ, ਕਸ੍ਮਾ ਚ ਪਨ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚਾਤਿ? ਅਯਂ ਕਸ੍ਸਪਸ੍ਸ ਭਗਵਤੋ ਸਾਸਨੇ ਸਹਕੋ ਨਾਮ ਭਿਕ੍ਖੁ ਅਨਾਗਾਮੀ ਹੁਤ੍ਵਾ ਸੁਦ੍ਧਾਵਾਸੇਸੁ ਉਪ੍ਪਨ੍ਨੋ, ਤਤ੍ਥ ਸਹਮ੍ਪਤਿ ਬ੍ਰਹ੍ਮਾਤਿ ਸਞ੍ਜਾਨਨ੍ਤਿ. ਸੋ ਪਨਾਹਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਪਦੁਮਨਿਰਯਂ ਕਿਤ੍ਤੇਸ੍ਸਾਮਿ, ਤਤੋ ਭਗਵਾ ਭਿਕ੍ਖੂਨਂ ਆਰੋਚੇਸ੍ਸਤਿ, ਅਥਾਨੁਸਨ੍ਧਿਕੁਸਲਾ ਭਿਕ੍ਖੂ ਤਤ੍ਥਾਯੁਪ੍ਪਮਾਣਂ ਪੁਚ੍ਛਿਸ੍ਸਨ੍ਤਿ, ਭਗਵਾ ਆਚਿਕ੍ਖਨ੍ਤੋ ਅਰਿਯੂਪਵਾਦੇ ਆਦੀਨਵਂ ਪਕਾਸੇਸ੍ਸਤੀ’’ਤਿ ਇਮਿਨਾ ਕਾਰਣੇਨ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ.

ਮਗਧਰਟ੍ਠੇ ਸਂਵੋਹਾਰਤੋ ਮਾਗਧਕੋ ਪਤ੍ਥੋ, ਤੇਨ. ਪਚ੍ਚਿਤਬ੍ਬਟ੍ਠਾਨਸ੍ਸਾਤਿ ਨਿਰਯਦੁਕ੍ਖੇਨ ਪਚ੍ਚਿਤਬ੍ਬਪ੍ਪਦੇਸਸ੍ਸ ਏਤਂ ਅਬ੍ਬੁਦੋਤਿ ਨਾਮਂ. ਵਸ੍ਸਗਣਨਾਤਿ ਏਕਤੋ ਪਟ੍ਠਾਯ ਦਸਗੁਣਿਤਂ ਅਬ੍ਬੁਦਆਯੁਮ੍ਹਿ ਤਤੋ ਅਪਰਂ ਵੀਸਤਿਗੁਣਿਤਂ ਨਿਰਬ੍ਬੁਦਾਦੀਸੁ ਵਸ੍ਸਗਣਨਾ ਵੇਦਿਤਬ੍ਬਾ. ਅਯਞ੍ਚ ਗਣਨਾ ਅਪਰਿਚਿਤਾਨਂ ਦੁਕ੍ਕਰਾਤਿ ਵੁਤ੍ਤਂ ‘‘ਨ ਤਂ ਸੁਕਰਂ ਸਙ੍ਖਾਤੁ’’ਨ੍ਤਿ. ਕੇਚਿ ਪਨ ‘‘ਤਤ੍ਥ ਤਤ੍ਥ ਪਰਿਦੇਵਨਾਨਤ੍ਤੇਨ ਕਮ੍ਮਕਾਰਣਨਾਨਤ੍ਤੇਨਪਿ ਇਮਾਨਿ ਨਾਮਾਨਿ ਲਦ੍ਧਾਨੀ’’ਤਿ ਵਦਨ੍ਤਿ, ਅਪਰੇ ‘‘ਸੀਤਨਰਕਾ ਏਤੇ’’ਤਿ. ਸਬ੍ਬਤ੍ਥਾਤਿ ਅਬਬਾਦੀਸੁ ਪਦੁਮਪਰਿਯੋਸਾਨੇਸੁ ਸਬ੍ਬੇਸੁ ਨਿਰਯੇਸੁ. ਏਸ ਨਯੋਤਿ ਹੇਟ੍ਠਿਮਤੋ ਉਪਰਿਮਸ੍ਸ ਵੀਸਤਿਗੁਣਤਂ ਅਤਿਦਿਸਤਿ. ਦਸਮੇ ਨਤ੍ਥਿ ਵਤ੍ਤਬ੍ਬਂ.

ਕੋਕਾਲਿਕਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਥੇਰਵਗ੍ਗਵਣ੍ਣਨਾ ਨਿਟ੍ਠਿਤਾ.