੧੬. ਏਕਧਮ੍ਮਪਾਲ਼ਿ

(੧੬) ੩. ਏਕਧਮ੍ਮਪਾਲ਼ਿ-ਤਤਿਯਵਗ੍ਗਵਣ੍ਣਨਾ

੩੦੮. ਤਤਿਯਸ੍ਸ ਪਠਮੇ ਅਯਾਥਾਵਦਿਟ੍ਠਿਕੋਤਿ ਅਨਿਚ੍ਚਾਦਿਭਾਵੇਸੁ ਧਮ੍ਮੇਸੁ ਨਿਚ੍ਚਾਤਿਆਦਿਨਾ ਉਪ੍ਪਨ੍ਨਦਿਟ੍ਠਿਕੋ. ਤੇਨਾਹ – ‘‘ਤਾਯੇਵ ਮਿਚ੍ਛਾਦਿਟ੍ਠਿਯਾ ਵਿਪਰੀਤਦਸ੍ਸਨੋ’’ਤਿ ਸਦ੍ਧਮ੍ਮਾਤਿ ਏਤ੍ਥ ਸਨ੍ਤੋ ਪਸਤ੍ਥੋ ਸੁਨ੍ਦਰੋ ਧਮ੍ਮੋ, ਯੋ ਮਨੁਸ੍ਸਧਮ੍ਮੋਤਿਪਿ ਵੁਚ੍ਚਤਿ. ਤਤੋ ਹਿ ਮਿਚ੍ਛਾਦਿਟ੍ਠਿਕੋ ਪਰਂ ਵੁਟ੍ਠਾਪੇਯ੍ਯ, ਨ ਅਰਿਯਧਮ੍ਮਤੋ. ਤੇਨਾਹ – ‘‘ਦਸਕੁਸਲਕਮ੍ਮਪਥਧਮ੍ਮਤੋ’’ਤਿ. ਏਵਰੂਪਾਤਿ ਇਮਿਨਾ ਪਾਥਿਕਪੁਤ੍ਤਾਦਿਕੇ ਸਙ੍ਗਣ੍ਹਾਤਿ.

੩੦੯. ਸਬ੍ਬਞ੍ਞੁਬੋਧਿਸਤ੍ਤੋਤਿ ਸਬ੍ਬਞ੍ਞੁਭਾਗੀ ਬੋਧਿਸਤ੍ਤੋ. ਆਦਿ-ਸਦ੍ਦੇਨ ਪੂਰਿਤਪਾਰਮਿਕਾ ਪਚ੍ਚੇਕਬੋਧਿਸਤ੍ਤਾ ਏਕਚ੍ਚਸਾਵਕਬੋਧਿਸਤ੍ਤਾ ਚ ਸਙ੍ਗਯ੍ਹਨ੍ਤਿ.

੩੧੦. ਪਰਮਾਤਿ ਮਹਾਸਾਵਜ੍ਜਭਾਵੇਨ ਪਰਮਾ, ਉਕ੍ਕਂਸਗਤਾਤਿ ਅਤ੍ਥੋ. ਤੇਸਨ੍ਤਿ ਆਨਨ੍ਤਰਿਯਕਮ੍ਮਾਨਂ. ਪਰਿਚ੍ਛੇਦੋਤਿ ਵਿਪਾਕਵਸੇਨ ਪਰਿਯੋਸਾਨਂ. ਵਟ੍ਟਸ੍ਸ ਮੂਲਂ, ਤਤੋ ਤਂਸਮਙ੍ਗੀਪੁਗ੍ਗਲੋ ਵਟ੍ਟਸ੍ਸ ਖਾਣੂਤਿ ਵੁਚ੍ਚਤਿ. ਤੇਨਾਹ – ‘‘ਤਾਯਾ’’ਤਿਆਦਿ. ਤਞ੍ਚੇ ਗਾਹਂ ਨ ਵਿਸ੍ਸਜ੍ਜੇਤਿ, ਤਸ੍ਸ ਪੁਨਪਿ ਤਬ੍ਭਾਵਾਵਹਤ੍ਤਾ ਵੁਤ੍ਤਂ – ‘‘ਭਵਤੋ ਵੁਟ੍ਠਾਨਂ ਨਤ੍ਥੀ’’ਤਿ, ਨ ਪਨ ਸਬ੍ਬਸੋ ਵੁਟ੍ਠਾਨਸ੍ਸ ਅਭਾਵਤੋ. ਯਾਦਿਸੇ ਹਿ ਪਚ੍ਚਯੇ ਪਟਿਚ੍ਚ ਅਯਂ ਤਂ ਦਸ੍ਸਨਂ ਓਕ੍ਕਨ੍ਤੋ ਪੁਨ ਕਦਾਚਿ ਤਪ੍ਪਟਿਪਕ੍ਖੇ ਪਚ੍ਚਯੇ ਪਟਿਚ੍ਚ ਤਤੋ ਸੀਸੁਕ੍ਖਿਪਨਮਸ੍ਸ ਨ ਹੋਤੀਤਿ ਨ ਵਤ੍ਤਬ੍ਬਂ. ਅਕੁਸਲਞ੍ਹਿ ਨਾਮੇਤਂ ਅਬਲਂ ਦੁਬ੍ਬਲਂ, ਨ ਕੁਸਲਂ ਵਿਯ ਮਹਾਬਲਂ. ਅਞ੍ਞਥਾ ਸਮ੍ਮਤ੍ਤਨਿਯਾਮੋ ਵਿਯ ਮਿਚ੍ਛਤ੍ਤਨਿਯਾਮੋਪਿ ਅਚ੍ਚਨ੍ਤਿਕੋ ਸਿਯਾ, ਨ ਚ ਮਿਚ੍ਛਤ੍ਤਨਿਯਾਮੋ ਅਚ੍ਚਨ੍ਤਿਕੋ. ਤੇਨੇਵ ਪਪਞ੍ਚਸੂਦਨਿਯਂ (ਮ. ਨਿ. ਅਟ੍ਠ. ੨.੧੦੦) –

‘‘ਕਿਂ ਪਨੇਸ ਏਕਸ੍ਮਿਂਯੇਵ ਅਤ੍ਤਭਾਵੇ ਨਿਯਤੋ ਹੋਤਿ, ਉਦਾਹੁ ਅਞ੍ਞਸ੍ਮਿਮ੍ਪੀਤਿ? ਏਕਸ੍ਮਿਂਯੇਵ ਨਿਯਤੋ, ਆਸੇਵਨਵਸੇਨ ਭਵਨ੍ਤਰੇਪਿ ਤਂ ਦਿਟ੍ਠਿਂ ਰੋਚੇਤਿ ਏਵਾ’’ਤਿ –

ਵੁਤ੍ਤਂ. ਤਤੋਯੇਵ ਚ ਸੁਮਙ੍ਗਲਵਿਲਾਸਿਨਿਯਮ੍ਪਿ (ਦੀ. ਨਿ. ਅਟ੍ਠ. ੧.੧੭੦-੧੭੨) ਵੁਤ੍ਤਂ –

‘‘ਯੇ ਵਾ ਪਨ ਤੇਸਂ ਲਦ੍ਧਿਂ ਗਹੇਤ੍ਵਾ ਰਤ੍ਤਿਟ੍ਠਾਨੇ ਦਿਵਾਟ੍ਠਾਨੇ ਨਿਸਿਨ੍ਨਾ ਸਜ੍ਝਾਯਨ੍ਤਿ ਵੀਮਂਸਨ੍ਤਿ, ਤੇਸਂ ‘ਕਰੋਤੋ ਨ ਕਰੀਯਤਿ ਪਾਪਂ, ਨਤ੍ਥਿ ਹੇਤੁ, ਨਤ੍ਥਿ ਪਚ੍ਚਯੋ, ਮਤੋ ਉਚ੍ਛਿਜ੍ਜਤੀ’ਤਿ ਤਸ੍ਮਿਂ ਆਰਮ੍ਮਣੇ ਮਿਚ੍ਛਾਸਤਿ ਸਨ੍ਤਿਟ੍ਠਤਿ, ਚਿਤ੍ਤਂ ਏਕਗ੍ਗਂ ਹੋਤਿ, ਜਵਨਾਨਿ ਜਵਨ੍ਤਿ. ਪਠਮਜਵਨੇ ਸਤੇਕਿਚ੍ਛਾ ਹੋਨ੍ਤਿ, ਤਥਾ ਦੁਤਿਯਾਦੀਸੁ. ਸਤ੍ਤਮੇ ਬੁਦ੍ਧਾਨਮ੍ਪਿ ਅਤੇਕਿਚ੍ਛਾ ਅਨਿਵਤ੍ਤਿਨੋ ਅਰਿਟ੍ਠਕਣ੍ਟਕਸਦਿਸਾ, ਤਤ੍ਥ ਕੋਚਿ ਏਕਂ ਦਸ੍ਸਨਂ ਓਕ੍ਕਮਤਿ, ਕੋਚਿ ਦ੍ਵੇ, ਕੋਚਿ ਤੀਣਿਪਿ, ਏਕਸ੍ਮਿਂ ਓਕ੍ਕਨ੍ਤੇਪਿ ਦ੍ਵੀਸੁ ਤੀਸੁ ਓਕ੍ਕਨ੍ਤੇਸੁਪਿ ਨਿਯਤਮਿਚ੍ਛਾਦਿਟ੍ਠਿਕੋਵ ਹੋਤਿ. ਪਤ੍ਤੋ ਸਗ੍ਗਮਗ੍ਗਾਵਰਣਞ੍ਚੇਵ ਮੋਕ੍ਖਮਗ੍ਗਾਵਰਣਞ੍ਚ, ਅਭਬ੍ਬੋ ਤਸ੍ਸਤ੍ਤਭਾਵਸ੍ਸ ਅਨਨ੍ਤਰਂ ਸਗ੍ਗਮ੍ਪਿ ਗਨ੍ਤੁਂ, ਪਗੇਵ ਮੋਕ੍ਖਂ, ਵਟ੍ਟਖਾਣੁ ਨਾਮੇਸ ਸਤ੍ਤੋ ਪਥਵਿਗੋਪਕੋ, ਯੇਭੁਯ੍ਯੇਨ ਏਵਰੂਪਸ੍ਸ ਭਵਤੋ ਵੁਟ੍ਠਾਨਂ ਨਤ੍ਥੀ’’ਤਿ.

ਪਿਟ੍ਠਿਚਕ੍ਕਵਾਲ਼ੇਤਿ ਝਾਯਮਾਨਚਕ੍ਕਵਾਲ਼ਸ੍ਸ ਪਰਤੋ ਏਕਸ੍ਮਿਂ ਓਕਾਸੇ. ਯਂ ਝਾਯਮਾਨਾਨਂ ਅਜ੍ਝਾਯਮਾਨਾਨਞ੍ਚ ਚਕ੍ਕਵਾਲ਼ਾਨਮਨ੍ਤਰਂ, ਯਤ੍ਥ ਲੋਕਨ੍ਤਰਿਕਨਿਰਯਸਮਞ੍ਞਾ, ਤਾਦਿਸੇ ਏਕਸ੍ਮਿਂ ਓਕਾਸੇ. ਪਚ੍ਚਤਿਯੇਵਾਤਿ ਚਕ੍ਕਵਾਲ਼ੇ ਝਾਯਮਾਨੇ ਅਜ੍ਝਾਯਮਾਨੇਪਿ ਅਤ੍ਤਨੋ ਕਮ੍ਮਬਲੇਨ ਪਚ੍ਚਤਿਯੇਵ.

੩੧੧. ਚਤੁਤ੍ਥੇ ‘‘ਮਾ ਖਲੀ’’ਤਿ ਵਚਨਂ ਉਪਾਦਾਯ ਏਵਂਲਦ੍ਧਨਾਮੋਤਿ ਤਂ ਕਿਰ ਸਕਦ੍ਦਮਾਯ ਭੂਮਿਯਾ ਤੇਲਘਟਂ ਗਹੇਤ੍ਵਾ ਗਚ੍ਛਨ੍ਤਂ, ‘‘ਤਾਤ, ਮਾ ਖਲੀ’’ਤਿ ਸਾਮਿਕੋ ਆਹ. ਸੋ ਪਮਾਦੇਨ ਖਲਿਤ੍ਵਾ ਪਤਿਤ੍ਵਾ ਸਾਮਿਕਸ੍ਸ ਭਯੇਨ ਪਲਾਯਿਤੁਂ ਆਰਦ੍ਧੋ. ਸਾਮਿਕੋ ਉਪਧਾਵਿਤ੍ਵਾ ਸਾਟਕਕਣ੍ਣੇ ਅਗ੍ਗਹੇਸਿ. ਸੋ ਸਾਟਕਂ ਛਡ੍ਡੇਤ੍ਵਾ ਅਚੇਲਕੋ ਹੁਤ੍ਵਾ ਪਲਾਤੋ ਪਣ੍ਣੇਨ ਵਾ ਤਿਣੇਨ ਵਾ ਪਟਿਚ੍ਛਾਦੇਤੁਮ੍ਪਿ ਅਜਾਨਨ੍ਤੋ ਜਾਤਰੂਪੇਨੇਵ ਏਕਂ ਗਾਮਂ ਪਾਵਿਸਿ. ਮਨੁਸ੍ਸਾ ਤਂ ਦਿਸ੍ਵਾ ‘‘ਅਯਂ ਸਮਣੋ ਅਰਹਾ ਅਪ੍ਪਿਚ੍ਛੋ, ਨਤ੍ਥਿ ਇਮਿਨਾ ਸਦਿਸੋ’’ਤਿ ਪੂਵਭਤ੍ਤਾਦੀਨਿ ਗਹੇਤ੍ਵਾ ਉਪਸਙ੍ਕਮਿਤ੍ਵਾ ‘‘ਮਯ੍ਹਂ ਸਾਟਕਂ ਅਨਿਵਤ੍ਥਭਾਵੇਨ ਇਦਂ ਉਪ੍ਪਨ੍ਨ’’ਨ੍ਤਿ ਤਤੋ ਪਟ੍ਠਾਯ ਸਾਟਕਂ ਲਭਿਤ੍ਵਾਪਿ ਨ ਨਿਵਾਸੇਸਿ, ਤਦੇਵ ਚ ਪਬ੍ਬਜ੍ਜਂ ਅਗ੍ਗਹੇਸਿ. ਤਸ੍ਸ ਸਨ੍ਤਿਕੇ ਅਞ੍ਞੇਪਿ ਅਞ੍ਞੇਪੀਤਿ ਪਞ੍ਚਸਤਾ ਮਨੁਸ੍ਸਾ ਪਬ੍ਬਜਿਂਸੁ. ਤਂ ਸਨ੍ਧਾਯੇਤਂ ਵੁਤ੍ਤਂ – ‘‘ਮਾ ਖਲੀਤਿ ਵਚਨਂ ਉਪਾਦਾਯ ਏਵਂਲਦ੍ਧਨਾਮੋ ਤਿਤ੍ਥਕਰੋ’’ਤਿ.

ਸਮਾਗਤਟ੍ਠਾਨੇਤਿ ਦ੍ਵਿਨ੍ਨਂ ਨਦੀਨਂ ਉਦਕਪ੍ਪਵਾਹਸ੍ਸ ਸਨ੍ਨਿਪਾਤਟ੍ਠਾਨੇ. ਦ੍ਵਿਨ੍ਨਂ ਉਦਕਾਨਨ੍ਤਿ ਦ੍ਵਿਨ੍ਨਂ ਉਦਕਪ੍ਪਵਾਹਾਨਂ. ਯਥਾਵੁਤ੍ਤਟ੍ਠਾਨੇ ਮਚ੍ਛਗ੍ਗਹਣਤ੍ਥਂ ਖਿਪਿਤਬ੍ਬਤੋ ਖਿਪ੍ਪਂ, ਕੁਮਿਨਂ, ਤਦੇਵ ਇਧ ਖਿਪ੍ਪਨ੍ਤਿ ਵੁਤ੍ਤਂ. ਤੇਨਾਹ – ‘‘ਕੁਮਿਨ’’ਨ੍ਤਿ. ਉਚ੍ਛੂਹੀਤਿ ਉਦਕਉਚ੍ਛੂਹਿ. ਤੁਚ੍ਛਪੁਰਿਸੋ ਅਰਿਯਧਮ੍ਮਾਭਾਵਤੋ. ਝਾਨਮਤ੍ਤਮ੍ਪਿ ਹਿ ਤਸ੍ਸ ਨਤ੍ਥੇਵ, ਕੁਤੋ ਅਰਿਯਮਗ੍ਗੋ. ਮਨੁਸ੍ਸਖਿਪ੍ਪਂ ਮਞ੍ਞੇਤਿ ਮਨੁਸ੍ਸਾ ਪਤਿਤ੍ਵਾ ਬ੍ਯਸਨਪ੍ਪਤ੍ਤਿਅਤ੍ਥਂ ਓਟ੍ਟਿਤਂ ਕੁਮਿਨਂ ਵਿਯ. ਤੇਨਾਹ – ‘‘ਮਹਾਜਨਸ੍ਸਾ’’ਤਿਆਦਿ.

੩੧੨. ਪਞ੍ਚਮਾਦੀਸੁ ਬਾਹਿਰਕਸਾਸਨਨ੍ਤਿ ਅਵਿਸੇਸੇਨ ਵੁਤ੍ਤਂ – ਤਸ੍ਸ ਸਬ੍ਬਸ੍ਸਪਿ ਅਨਿਯ੍ਯਾਨਿਕਤ੍ਤਾ ਸਤ੍ਥੁਪਟਿਞ੍ਞਸ੍ਸਪਿ ਅਸਬ੍ਬਞ੍ਞੁਭਾਵਤੋ. ਤੇਨਾਹ – ‘‘ਤਤ੍ਥ ਹੀ’’ਤਿਆਦਿ. ਗਣੋਤਿ ਸਾਵਕਗਣੋ. ਤਥਾਭਾਵਾਯਾਤਿ ਆਚਰਿਯੇਨ ਵੁਤ੍ਤਾਕਾਰਤਾਯ ਸਮਙ੍ਗਿਭਾਵਤ੍ਥਂ. ਜਙ੍ਘਸਤਨ੍ਤਿ ਬਹੂ ਅਨੇਕੇ ਸਤ੍ਤੇ. ਸਮਕਮੇਵ ਅਕੁਸਲਂ ਪਾਪੁਣਾਤੀਤਿ ਤੇਸਂ ਸਬ੍ਬੇਸਂ ਏਕਜ੍ਝਂ ਸਮਾਦਪਨੇਪਿ ਤੇਸਂ ਅਕੁਸਲੇਨ ਸਮਕਮੇਵ ਅਕੁਸਲਂ ਪਾਪੁਣਾਤਿ ਏਕਜ੍ਝਂ ਬਹੂਨਂ ਸਮਾਦਪਨੇਪਿ ਤਥਾ ਉਸ੍ਸਹਨਸ੍ਸ ਬਲਵਭਾਵਤੋ. ਵਿਸੁਂ ਵਿਸੁਂ ਸਮਾਦਪਨੇ ਵਤ੍ਤਬ੍ਬਮੇਵ ਨਤ੍ਥਿ. ਯਥਾ ਹਿ ਧਮ੍ਮਚਰਿਯਾਯਂ ਸਮਕਮੇਵਾਤਿ ਵਤ੍ਤਬ੍ਬਾ ਕਲ੍ਯਾਣਮਿਤ੍ਤਤਾ, ਏਵਂ ਅਧਮ੍ਮਚਰਿਯਾਯਂ ਅਕਲ੍ਯਾਣਮਿਤ੍ਤਤਾਤਿ.

੩੧੩. ਸੁਟ੍ਠੁ ਅਕ੍ਖਾਤੇਤਿ ਏਕਨ੍ਤਤੋ ਨਿਯ੍ਯਾਨਿਕਭਾਵੇਨ ਅਕ੍ਖਾਤੇ. ਸਤ੍ਥਾ ਚ ਸਬ੍ਬਞ੍ਞੂ ਹੋਤੀਤਿ ਅਸਬ੍ਬਞ੍ਞੁਨੋ ਨਿਯ੍ਯਾਨਿਕਭਾਵੇਨ ਕਥੇਤੁਂ ਅਸਕ੍ਕੁਣੇਯ੍ਯਤ੍ਤਾ. ਧਮ੍ਮੋ ਚ ਸ੍ਵਾਕ੍ਖਾਤੋ ਸਮ੍ਮਾਸਮ੍ਬੁਦ੍ਧਪ੍ਪਵੇਦਿਤਤ੍ਤਾ. ਗਣੋ ਚ ਸੁਪ੍ਪਟਿਪਨ੍ਨੋ ਸਤ੍ਥਾਰਾ ਸੁਵਿਨੀਤਤ੍ਤਾ. ਸਮਾਦਪਕੋ ਹੀਤਿਆਦਿ ਸੁਪ੍ਪਟਿਪਤ੍ਤਿਯਾ ਨਿਦਸ੍ਸਨਂ ਦਟ੍ਠਬ੍ਬਂ.

੩੧੪. ਪਮਾਣਂ ਜਾਨਿਤਬ੍ਬਨ੍ਤਿ ‘‘ਅਯਂ ਏਤ੍ਤਕੇਨ ਯਾਪੇਤਿ, ਇਮਸ੍ਸ ਏਤ੍ਤਕਂ ਦਾਤੁਂ ਯੁਤ੍ਤ’’ਨ੍ਤਿ ਏਵਂ ਪਮਾਣਂ ਜਾਨਿਤਬ੍ਬਂ. ਅਤਿਰੇਕੇ…ਪੇ… ਨਿਬ੍ਬਾਨਸਮ੍ਪਤ੍ਤਿ ਵਾ ਨਤ੍ਥਿ ਦੁਰਕ੍ਖਾਤਤ੍ਤਾ ਧਮ੍ਮਸ੍ਸ. ਤਸ੍ਸਾਤਿ ਪਟਿਗ੍ਗਾਹਕਸ੍ਸ. ਅਪ੍ਪਿਚ੍ਛਪਟਿਪਦਾ ਨਾਮ ਨਤ੍ਥਿ ਦੁਰਕ੍ਖਾਤੇ ਧਮ੍ਮਵਿਨਯੇਤਿ ਅਧਿਪ੍ਪਾਯੋ.

੩੧੫. ਦਾਯਕਸ੍ਸ ਵਸੋ ਨਾਮ ਉਲ਼ਾਰੁਲ਼ਾਰਤਾਭੇਦੋ ਅਜ੍ਝਾਸਯੋ. ਦੇਯ੍ਯਧਮ੍ਮਸ੍ਸ ਪਨ ਥੋਕਬਹੁਤਾਵ ਦੇਯ੍ਯਧਮ੍ਮਸ੍ਸ ਵਸੋ ਨਾਮ. ਅਤ੍ਤਨੋ ਥਾਮੋਤਿ ਯਾਪਨਪ੍ਪਮਾਣਂ. ਯਦਿ ਹੀਤਿਆਦਿ ‘‘ਕਥ’’ਨ੍ਤਿਆਦਿਨਾ ਸਙ੍ਖੇਪਤੋ ਵੁਤ੍ਤਸ੍ਸ ਅਤ੍ਥਸ੍ਸ ਵਿਵਰਣਂ. ਅਨੁਪ੍ਪਨ੍ਨਸ੍ਸਾਤਿ ਅਨੁਪ੍ਪਨ੍ਨੋ ਅਸ੍ਸ ਪੁਗ੍ਗਲਸ੍ਸ. ਚਕ੍ਖੁਭੂਤੋ ਹੋਤੀਤਿ ਮਹਾਜਨਸ੍ਸ ਚਕ੍ਖੁ ਵਿਯ ਹੋਤਿ. ਸਾਸਨਂ ਚਿਰਟ੍ਠਿਤਿਤਂ ਕਰੋਤੀਤਿ ਅਨੁਪ੍ਪਨ੍ਨਲਾਭੁਪ੍ਪਾਦਨੇਨ ਮਹਾਜਨਸ੍ਸ ਪਸਾਦੁਪ੍ਪਾਦਨੇਨ ਚ ਚਿਰਟ੍ਠਿਤਿਕਂ ਕਰੋਤਿ.

ਕੁਟੁਮ੍ਬਰਿਯਵਿਹਾਰੇਤਿ ਕੁਟੁਮ੍ਬਰਿਯਗਾਮਸਨ੍ਨਿਸ੍ਸਿਤਵਿਹਾਰੇ. ਭੁਞ੍ਜਨਤ੍ਥਾਯਾਤਿ ਤਸ੍ਮਿਂਯੇਵ ਗੇਹੇ ਨਿਸੀਦਿਤ੍ਵਾ ਭੁਞ੍ਜਨਤ੍ਥਾਯ. ਗਹੇਤ੍ਵਾ ਗਮਨਤ੍ਥਾਯਾਤਿ ਗੇਹਤੋ ਬਹਿ ਗਹੇਤ੍ਵਾ ਗਮਨਤ੍ਥਾਯ. ਧੁਰਭਤ੍ਤਾਨੀਤਿ ਨਿਚ੍ਚਭਤ੍ਤਾਨਿ. ਚੂਲ਼ੁਪਟ੍ਠਾਕਨ੍ਤਿ ਵੇਯ੍ਯਾਵਚ੍ਚਕਰਂ. ਵੀਮਂਸਿਤ੍ਵਾਤਿ ਯਥਾ ਉਦ੍ਦਿਸ੍ਸ ਕਤਂ ਨ ਹੋਤਿ, ਏਵਂ ਵੀਮਂਸਿਤ੍ਵਾ. ਮਹਾਜਨੋ ਅਪ੍ਪਿਚ੍ਛੋ ਭਵਿਤੁਂ ਮਞ੍ਞਤੀਤਿ ਮਹਾਜਨੋ ਸਯਂ ਅਪ੍ਪਿਚ੍ਛੋ ਭਵਿਤੁਂ ਮਞ੍ਞਤਿ ਦਿਟ੍ਠਾਨੁਗਤਿਂ ਆਪਜ੍ਜਨੇਨ. ਮਹਾਜਨਸ੍ਸਾਤਿ ਬਹੁਜਨਸ੍ਸ. ਅਵਤ੍ਥਰਿਤ੍ਵਾਤਿ ਵਿਤ੍ਥਾਰਿਕਂ ਕਤ੍ਵਾ.

੩੧੬. ਪਞ੍ਚਾਤਪਤਪ੍ਪਨਂ ਚਤੂਸੁ ਪਸ੍ਸੇਸੁ ਅਗ੍ਗਿਸਨ੍ਤਾਪਸ੍ਸ ਉਪਰਿ ਸੂਰਿਯਸਨ੍ਤਾਪਸ੍ਸ ਚ ਤਪ੍ਪਨਂ, ਤਞ੍ਚ ਖੋ ਗਿਮ੍ਹਕਾਲੇ. ਛਿਨ੍ਨਪ੍ਪਪਾਤਪਬ੍ਬਤਸਿਖਰਤੋ ਪਤਨਂ ਮਰੁਪ੍ਪਪਾਤਪਤਨਂ. ਪੁਬ੍ਬਣ੍ਹਾਦੀਸੁ ਆਦਿਚ੍ਚਾਭਿਮੁਖਾਵਟ੍ਟਨਂ ਆਦਿਚ੍ਚਾਨੁਪਰਿਵਤ੍ਤਨਂ.

੩੧੭. ਅਯਮ੍ਪੀਤਿ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਕੁਸੀਤੋਪਿ. ਸਾਮਞ੍ਞਨ੍ਤਿ ਤਪਚਰਣਂ. ਦੁਪ੍ਪਰਾਮਟ੍ਠਨ੍ਤਿ ਮਿਚ੍ਛਾਚਰਿਤਂ ਸਂਕਿਲਿਟ੍ਠਂ. ਨਿਰਯਾਯੁਪਕਡ੍ਢਤੀਤਿ ਨਿਰਯਦੁਕ੍ਖਾਯ ਨਂ ਕਡ੍ਢਤਿ.

੩੧੮. ਵੁਤ੍ਤਪ੍ਪਕਾਰੇਤਿ ਪਞ੍ਚਾਤਪਤਪ੍ਪਨਾਦਿਕੇ ਵੁਤ੍ਤਪ੍ਪਕਾਰੇ.

੩੧੯. ਏਵਨ੍ਤਿ ਵੁਤ੍ਤਪ੍ਪਕਾਰਾਯ ਚਿਤ੍ਤਪ੍ਪਸਾਦਵ੍ਹਯਸੁਪ੍ਪਟਿਪਤ੍ਤਿਯਾ. ਤੇਨ ਸਮਣਧਮ੍ਮਕਰਣਸੁਖਞ੍ਚ ਸਙ੍ਗਣ੍ਹਾਤਿ.

੩੨੦. ਨਵਕਨਿਪਾਤੇਤਿ ਇਮਸ੍ਮਿਂਯੇਵ ਅਙ੍ਗੁਤ੍ਤਰਨਿਕਾਯੇ ਵਕ੍ਖਮਾਨਂ ਨਵਕਨਿਪਾਤਂ ਸਨ੍ਧਾਯਾਹ. ਨਵ ਪੁਗ੍ਗਲਾਤਿ ਸਤ੍ਤਕ੍ਖਤ੍ਤੁਪਰਮਕੋਲਂਕੋਲਾਦਯੋ ਨਵ ਪੁਗ੍ਗਲਾ. ਸਬ੍ਬਤ੍ਥਾਤਿ ਇਮਸ੍ਮਿਂ ਸੁਤ੍ਤੇ ਵੁਤ੍ਤਾਵਸਿਟ੍ਠੇਸੁ ਸਬ੍ਬੇਸੁ ਸੁਤ੍ਤੇਸੁ.

ਤਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.