੮. ਅਟ੍ਠਮੋ ਪਰਿਚ੍ਛੇਦੋ
ਪਕਿਣ੍ਣਕਨਿਦ੍ਦੇਸੋ
੪੭੫. ਇਦਾਨਿ ਪਨ ਸਬ੍ਬੇਸਂ, ਏਤੇਸਂ ਮਾਨਸਂ ਮਯਾ;
ਪਾਟਵਤ੍ਥਾਯ ਭਿਕ੍ਖੂਨਂ, ਕਥੀਯਤਿ ਪਕਿਣ੍ਣਕਂ.
੪੭੬. ਪਨ੍ਥਮਕ੍ਕਟਕੋ ਨਾਮ, ਦਿਸਾਸੁ ਪਨ ਪਞ੍ਚਸੁ;
ਤਤ੍ਥ ਸੁਤ੍ਤਂ ਪਸਾਰੇਤ੍ਵਾ, ਜਾਲਮਜ੍ਝੇ ਨਿਪਜ੍ਜਤਿ.
੪੭੭. ਪਠਮਾਯ ਦਿਸਾਯੇਤ੍ਥ, ਸੁਤ੍ਤੇ ਪਨ ਪਸਾਰਿਤੇ;
ਪਾਣਕੇਨ ਪਟਙ੍ਗੇਨ, ਘਟ੍ਟਿਤੇ ਮਕ੍ਖਿਕਾਯ ਵਾ.
੪੭੮. ਨਿਪਨ੍ਨਟ੍ਠਾਨਤੋ ਕਿਞ੍ਚਿ, ਚਲਿਤ੍ਵਾ ਉਣ੍ਣਨਾਭਿ ਤੁ;
ਗਨ੍ਤ੍ਵਾ ਸੁਤ੍ਤਾਨੁਸਾਰੇਨ, ਯੂਸਂ ਪਿਵਤਿ ਤਸ੍ਸ ਸਾ.
੪੭੯. ਪੁਨਾਗਨ੍ਤ੍ਵਾਨ ਤਤ੍ਥੇਵ, ਨਿਪਜ੍ਜਤਿ ਯਥਾਸੁਖਂ;
ਏਵਮੇਵ ਕਰੋਤੇਵ, ਦਿਸਾਸੁ ਦੁਤਿਯਾਦਿਸੁ.
੪੮੦. ਪਸਾਦਾ ਪਞ੍ਚ ਦਟ੍ਠਬ੍ਬਾ, ਸੁਤ੍ਤਂ ਪਞ੍ਚਦਿਸਾਸ੍ਵਿਵ;
ਚਿਤ੍ਤਂ ਪਨ ਚ ਦਟ੍ਠਬ੍ਬਂ, ਮਜ੍ਝੇ ਮਕ੍ਕਟਕੋ ਵਿਯ.
੪੮੧. ਪਾਣਕਾਦੀਹਿ ਸੁਤ੍ਤਸ੍ਸ, ਤਸ੍ਸ ਸਙ੍ਘਟ੍ਟਨਾ ਵਿਯ;
ਪਸਾਦਾਨਂ ਤੁ ਦਟ੍ਠਬ੍ਬਾ, ਘਟ੍ਟਨਾਰਮ੍ਮਣੇਨ ਹਿ.
੪੮੨. ਚਲਨਂ ਵਿਯ ਤਂਮਜ੍ਝੇ, ਨਿਪਨ੍ਨਾਯੁਣ੍ਣਨਾਭਿਯਾ;
ਪਸਾਦਘਟ੍ਟਨਂ ਤਤ੍ਥ, ਗਹੇਤ੍ਵਾਰਮ੍ਮਣਂ ਪਨ.
੪੮੩. ਮਨੋਧਾਤੁਕ੍ਰਿਯਾਚਿਤ੍ਤਂ, ਭਵਙ੍ਗਾਵਟ੍ਟਨਂ ਮਤਂ;
ਤਸ੍ਸਾ ਸੁਤ੍ਤਾਨੁਸਾਰਂਵ, ਵੀਥਿਚਿਤ੍ਤਪਵਤ੍ਤਨਂ.
੪੮੪. ਸੀਸੇ ਪਨਸ੍ਸ ਵਿਜ੍ਝਿਤ੍ਵਾ, ਯੂਸਪਾਨਂਵ ਚੇਤਸੋ;
ਆਰਮ੍ਮਣੇਸੁ ਦਟ੍ਠਬ੍ਬਂ, ਜਵਨਸ੍ਸ ਪਵਤ੍ਤਨਂ.
੪੮੫. ਪੁਨਾਗਨ੍ਤ੍ਵਾ ਯਥਾ ਸੁਤ੍ਤ-ਜਾਲਮਜ੍ਝੇ ਨਿਪਜ੍ਜਨਂ;
ਵਤ੍ਥੁਂਯੇਵ ਚ ਨਿਸ੍ਸਾਯ, ਚਿਤ੍ਤਸ੍ਸ ਪਰਿਵਤ੍ਤਨਂ.
੪੮੬. ਇਦਂ ਤੁ ਪਨ ਓਪਮ੍ਮਂ, ਅਤ੍ਥਂ ਦੀਪੇਤਿ ਕਿਂ ਤੁ ਹਿ;
ਆਰਮ੍ਮਣੇਨ ਪਠਮਂ, ਪਸਾਦੇ ਘਟ੍ਟਿਤੇ ਪਨ.
੪੮੭. ਪਸਾਦਵਤ੍ਥੁਤੋ ਚਿਤ੍ਤਾ, ਵਤ੍ਥੁਸਨ੍ਨਿਸ੍ਸਿਤਂ ਮਨੋ;
ਤਤੋ ਹਿ ਪਠਮਂਯੇਵ, ਜਾਯਤੀਤਿ ਹਿ ਦੀਪਿਤਂ.
੪੮੮. ਏਕੇਕਾਰਮ੍ਮਣਂ ਦ੍ਵੀਸੁ, ਦ੍ਵੀਸੁ ਦ੍ਵਾਰੇਸੁ ਸਬ੍ਬਸੋ;
ਆਗਚ੍ਛਤਿ ਤੇਨਾਪਾਥਂ, ਅਯਮਤ੍ਥੋਪਿ ਦੀਪਿਤੋ.
੪੮੯. ਰੂਪਂ ਚਕ੍ਖੁਪਸਾਦਮ੍ਹਿ, ਘਟ੍ਟਿਤ੍ਵਾ ਤਙ੍ਖਣੇ ਪਨ;
ਮਨੋਦ੍ਵਾਰੇ ਤਥਾਪਾਥ-ਮਾਗਚ੍ਛਤਿ ਨਿਸਂਸਯੋ.
੪੯੦. ਖਗੋ ਯਥਾ ਹਿ ਰੁਕ੍ਖਗ੍ਗੇ, ਨਿਲੀਯਨ੍ਤੋਵ ਸਾਖਿਨੋ;
ਸਾਖਂ ਘਟ੍ਟੇਤਿ ਤਸ੍ਸੀਧ, ਛਾਯਾ ਫਰਤਿ ਭੂਮਿਯਂ.
੪੯੧. ਸਾਖਾਯ ਘਟ੍ਟਨਚ੍ਛਾਯਾ, ਫਰਣਾਨਿ ਚ ਸਬ੍ਬਸੋ;
ਅਪੁਬ੍ਬਾਚਰਿਮਂ ਏਕ-ਕ੍ਖਣਸ੍ਮਿਂਯੇਵ ਜਾਯਰੇ.
੪੯੨. ਏਵਮੇਵ ਚ ਰੂਪਸ੍ਸ, ਪਸਾਦਸ੍ਸ ਚ ਘਟ੍ਟਨਂ;
ਭਵਙ੍ਗਚਲਨਸ੍ਸਾਪਿ, ਪਚ੍ਚਯਤ੍ਤੇਨ ਅਤ੍ਥਤੋ.
੪੯੩. ਤਥੇਵ ਚ ਮਨੋਦ੍ਵਾਰੇ, ਆਪਾਥਗਮਨਮ੍ਪਿ ਚ;
ਅਪੁਬ੍ਬਾਚਰਿਮਂ ਏਕ-ਕ੍ਖਣਸ੍ਮਿਂਯੇਵ ਹੋਤਿਤਿ.
੪੯੪. ਤਤੋ ਭਵਙ੍ਗਂ ਛਿਨ੍ਦਿਤ੍ਵਾ, ਚਕ੍ਖੁਦ੍ਵਾਰੇ ਯਥਾਕ੍ਕਮਂ;
ਆਵਜ੍ਜਨੇ ਸਮੁਪ੍ਪਨ੍ਨੇ, ਦਸ੍ਸਨੇ ਸਮ੍ਪਟਿਚ੍ਛਨੇ.
੪੯੫. ਸਨ੍ਤੀਰਣੇ ਸਮੁਪ੍ਪਨ੍ਨੇ, ਤਤੋ ਵੋਟ੍ਠਬ੍ਬਨੇਪਿ ਚ;
ਕੁਸਲਂ ਜਵਨਂ ਚਿਤ੍ਤਂ, ਤਥਾਕੁਸਲਮੇਵ ਵਾ.
੪੯੬. ਏਸੋ ਏਵ ਨਯੋ ਸੋਤ-ਦ੍ਵਾਰਾਦੀਸੁਪਿ ਵਿਞ੍ਞੁਨਾ;
ਅਵਿਸੇਸੇਨ ਵਿਞ੍ਞੇਯ੍ਯੋ, ਸਦ੍ਦਾਦੀਨਂ ਤੁ ਘਟ੍ਟਨੇ.
੪੯੭. ਦੋਵਾਰਿਕੋਪਮਾਦੀਨਿ, ਏਤਸ੍ਸਤ੍ਥਸ੍ਸ ਦੀਪਨੇ;
ਉਦ੍ਧਰਿਤ੍ਵਾਨ ਤਾਨੇਤ੍ਥ, ਦਸ੍ਸੇਤਬ੍ਬਾਨਿ ਵਿਞ੍ਞੁਨਾ.
੪੯੮. ਅਸਮ੍ਭੇਦੇਨ ਚਕ੍ਖੁਸ੍ਸ, ਰੂਪਾਪਾਥਗਮੇਨ ਚ;
ਆਲੋਕਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.
੪੯੯. ਪਚ੍ਚਯੇਹਿ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;
ਜਾਯਤੇ ਚਕ੍ਖੁਵਿਞ੍ਞਾਣਂ, ਸਮ੍ਪਯੁਤ੍ਤੇਹਿ ਤਂ ਸਹ.
੫੦੦. ਅਸਮ੍ਭੇਦੇਨ ਸੋਤਸ੍ਸ, ਸਦ੍ਦਾਪਾਥਗਮੇਨ ਚ;
ਆਕਾਸਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.
੫੦੧. ਪਚ੍ਚਯੇਹਿ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;
ਜਾਯਤੇ ਸੋਤਵਿਞ੍ਞਾਣਂ, ਸਮ੍ਪਯੁਤ੍ਤੇਹਿ ਤਂ ਸਹ.
੫੦੨. ਅਸਮ੍ਭੇਦੇਨ ਘਾਨਸ੍ਸ, ਗਨ੍ਧਾਪਾਥਗਮੇਨ ਚ;
ਵਾਯੋਸਨ੍ਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.
੫੦੩. ਪਚ੍ਚਯੇਹਿ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;
ਜਾਯਤੇ ਘਾਨਵਿਞ੍ਞਾਣਂ, ਸਮ੍ਪਯੁਤ੍ਤੇਹਿ ਤਂ ਸਹ.
੫੦੪. ਅਸਮ੍ਭੇਦੇਨ ਜਿਵ੍ਹਾਯ, ਰਸਾਪਾਥਗਮੇਨ ਚ;
ਆਪੋਸਨ੍ਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.
੫੦੫. ਪਚ੍ਚਯੇਹਿ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;
ਜਾਯਤੇ ਜਿਵ੍ਹਾਵਿਞ੍ਞਾਣਂ, ਸਮ੍ਪਯੁਤ੍ਤੇਹਿ ਤਂ ਸਹ.
੫੦੬. ਅਸਮ੍ਭੇਦੇਨ ਕਾਯਸ੍ਸ, ਫੋਟ੍ਠਬ੍ਬਾਪਾਥਸਙ੍ਗਮਾ;
ਪਥਵੀਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.
੫੦੭. ਪਚ੍ਚਯੇਹਿ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;
ਜਾਯਤੇ ਕਾਯਵਿਞ੍ਞਾਣਂ, ਸਮ੍ਪਯੁਤ੍ਤੇਹਿ ਤਂ ਸਹ.
੫੦੮. ਅਸਮ੍ਭੇਦਾ ਮਨਸ੍ਸਾਪਿ, ਧਮ੍ਮਾਪਾਥਗਮੇਨ ਚ;
ਵਤ੍ਥੁਸਨ੍ਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.
੫੦੯. ਪਚ੍ਚਯੇਹਿ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;
ਮਨੋਵਿਞ੍ਞਾਣਮੇਵਂ ਤੁ, ਸਮ੍ਪਯੁਤ੍ਤੇਹਿ ਜਾਯਤੇ.
੫੧੦. ਮਨੋ ਭਵਙ੍ਗਚਿਤ੍ਤਨ੍ਤਿ, ਵੇਦਿਤਬ੍ਬਂ ਵਿਭਾਵਿਨਾ;
ਆਵਜ੍ਜਨਕ੍ਰਿਯਾਚਿਤ੍ਤਂ, ਸਮਨਕ੍ਕਾਰੋਤਿ ਸਞ੍ਞਿਤਂ.
੫੧੧. ਵਤ੍ਥੁਸਨ੍ਨਿਸ੍ਸਯੇਨਾਤਿ, ਨਾਯਂ ਸਬ੍ਬਤ੍ਥ ਗਚ੍ਛਤਿ;
ਭਵਂ ਤੁ ਪਞ੍ਚਵੋਕਾਰਂ, ਸਨ੍ਧਾਯ ਕਥਿਤੋ ਪਨ.
੫੧੨. ਪਟਿਸਨ੍ਧਾਦਿਚਿਤ੍ਤਾਨਿ, ਸਬ੍ਬਾਨੇਕੂਨਵੀਸਤਿ;
ਕਾਮੇ ਦਸ ਚ ਰੂਪੇਸੁ, ਪਞ੍ਚ ਚਤ੍ਤਾਰਿਰੂਪਿਸੁ.
੫੧੩. ਕਮ੍ਮਂ ਕਮ੍ਮਨਿਮਿਤ੍ਤਞ੍ਚ, ਤਥਾ ਗਤਿਨਿਮਿਤ੍ਤਕਂ;
ਇਦਂ ਹਿ ਤਿਵਿਧਂ ਤੇਸਂ, ਆਰਮ੍ਮਣਮੁਦੀਰਿਤਂ.
੫੧੪. ਕਾਮਾਵਚਰਸਨ੍ਧੀਨਂ, ਪਰਿਤ੍ਤਾਰਮ੍ਮਣਂ ਮਤਂ;
ਪਚ੍ਚੁਪ੍ਪਨ੍ਨਮਤੀਤਂ ਵਾ, ਹੋਤਿ ਨਤ੍ਥਿ ਅਨਾਗਤਂ.
੫੧੫. ਅਟ੍ਠੇਵ ਚ ਮਹਾਪਾਕਾ, ਤੀਣਿ ਸਨ੍ਤੀਰਣਾਨਿ ਚ;
ਏਕਾਦਸਵਿਧਂ ਚਿਤ੍ਤਂ, ਤਦਾਰਮ੍ਮਣਸਞ੍ਞਿਤਂ.
੫੧੬. ਏਕਾਦਸਵਿਧੇ ਚਿਤ੍ਤੇ, ਤਦਾਰਮ੍ਮਣਸਞ੍ਞਿਤੇ;
ਦਸ ਪੁਞ੍ਞਵਿਪਾਕਾਨਿ, ਏਕਂ ਹੋਤਿ ਅਪੁਞ੍ਞਜਂ.
੫੧੭. ਮਹਾਪਾਕਾ ਨ ਜਾਯਨ੍ਤੇ, ਰੂਪਾਰੂਪਭਵਦ੍ਵਯੇ;
ਕਾਮੇ ਰੂਪੇ ਭਵੇ ਚੇਵ, ਹੋਤਿ ਸਨ੍ਤੀਰਣਤ੍ਤਯਂ.
੫੧੮. ਤਦਾਰਮ੍ਮਣਚਿਤ੍ਤਾਨਿ, ਯਾਨਿ ਵੁਤ੍ਤਾਨਿ ਸਤ੍ਥੁਨਾ;
ਤੇਸੁ ਚਿਤ੍ਤਂ ਪਨੇਕਮ੍ਪਿ, ਰੂਪਾਰੂਪਭਵਦ੍ਵਯੇ.
੫੧੯. ਨ ਤਦਾਰਮ੍ਮਣਂ ਹੁਤ੍ਵਾ, ਪਵਤ੍ਤਤਿ ਕਦਾਚਿਪਿ;
ਕਸ੍ਮਾ ਨ ਹੋਤਿ ਚੇ ਤਤ੍ਥ, ਬੀਜਸ੍ਸਾਭਾਵਤੋ ਪਨ.
੫੨੦. ਪਟਿਸਨ੍ਧਿਬੀਜਂ ਨਤ੍ਥੇਤ੍ਥ, ਕਾਮਾਵਚਰਸਞ੍ਞਿਤਂ;
ਰੂਪਾਦਿਗੋਚਰੇ ਤਸ੍ਸ, ਭਵੇਯ੍ਯ ਜਨਕਂ ਤੁ ਯਂ.
੫੨੧. ਚਕ੍ਖੁਵਿਞ੍ਞਾਣਕਾਦੀਨਂ, ਨਤ੍ਥਿਤਾਪਜ੍ਜਤੀਤਿ ਚੇ;
ਨਿਨ੍ਦ੍ਰਿਯਾਨਂ ਪਵਤ੍ਤਾਨੁ-ਭਾਵਤੋ ਚਿਤ੍ਤਸਮ੍ਭਵੋ.
੫੨੨. ਏਕਨ੍ਤੇਨ ਯਥਾ ਚੇਤਂ, ਤਦਾਰਮ੍ਮਣਮਾਨਸਂ;
ਨਪ੍ਪਵਤ੍ਤਤਿ ਸਬ੍ਬਮ੍ਪਿ, ਰੂਪਾਰੂਪਭਵਦ੍ਵਯੇ.
੫੨੩. ਅਕਾਮਾਵਚਰਧਮ੍ਮੇਪਿ, ਤਦੇਤਂ ਨਾਨੁਬਨ੍ਧਤਿ;
ਕਸ੍ਮਾ ਅਜਨਕਤ੍ਤਾ ਹਿ, ਜਨਕਸ੍ਸਾਸਮਾਨਤੋ.
੫੨੪. ਜਨਕਂ ਤੇਨ ਤੁਲ੍ਯਂ ਵਾ, ਕਾਮਾਵਚਰਸਞ੍ਞਿਤਂ;
ਕੁਸਲਾਕੁਸਲਾਦਿਂ ਤੁ, ਜਵਨਂ ਅਨੁਬਨ੍ਧਤਿ.
੫੨੫. ਕਾਮਾਵਚਰਧਮ੍ਮਾਪਿ, ਯੇ ਮਹਗ੍ਗਤਗੋਚਰਾ;
ਹੁਤ੍ਵਾ ਵਤ੍ਤਨ੍ਤਿ ਤੇ ਚਾਪਿ, ਇਦਂ ਨੇਵਾਨੁਬਨ੍ਧਤਿ.
੫੨੬. ਪਰਿਤ੍ਤਾਰਮ੍ਮਣਤ੍ਤਾ ਚ, ਏਕਨ੍ਤੇਨ ਪਨਸ੍ਸ ਹਿ;
ਤਥਾਪਰਿਚਿਤਤ੍ਤਾ ਚ, ਨਾਨੁਬਨ੍ਧਤਿ ਸਬ੍ਬਦਾ.
੫੨੭. ਕਿਂ ਤੇਨ ਯੁਤ੍ਤਿਵਾਦੇਨ, ਵੁਤ੍ਤਂ ਅਟ੍ਠਕਥਾਸੁ ਹਿ;
ਤਦਾਰਮ੍ਮਣਚਿਤ੍ਤਾਨਿ, ਏਕਾਦਸਪਿ ਸਬ੍ਬਸੋ.
੫੨੮. ਨਾਮਗੋਤ੍ਤਂ ਪਨਾਰਬ੍ਭ, ਜਵਨੇ ਜਵਿਤੇਪਿ ਚ;
ਤਦਾਰਮ੍ਮਣਂ ਨ ਗਣ੍ਹਨ੍ਤਿ, ਰੂਪਾਰੂਪਭਵੇਸੁ ਵਾ.
੫੨੯. ਯਦਾ ਪਞ੍ਞਤ੍ਤਿਮਾਰਬ੍ਭ, ਜਵਨੇ ਜਵਿਤੇਪਿ ਵਾ;
ਤਥਾ ਵਿਪਸ੍ਸਨਾਯਾਪਿ, ਲਕ੍ਖਣਾਰਮ੍ਮਣਾਯ ਚ.
੫੩੦. ਤਦਾਰਮ੍ਮਣਾ ਨ ਲਬ੍ਭਨ੍ਤਿ, ਮਿਚ੍ਛਤ੍ਤਨਿਯਤੇਸੁਪਿ;
ਨ ਲੋਕੁਤ੍ਤਰਧਮ੍ਮੇਪਿ, ਆਰਬ੍ਭ ਜਵਨੇ ਗਤੇ.
੫੩੧. ਤਥਾ ਮਹਗ੍ਗਤੇ ਧਮ੍ਮੇ, ਆਰਬ੍ਭ ਜਵਨੇ ਪਨ;
ਪਟਿਸਮ੍ਭਿਦਾਞਾਣਾਨਿ, ਆਰਬ੍ਭ ਜਵਿਤੇਪਿ ਚ.
੫੩੨. ਮਨੋਦ੍ਵਾਰੇਪਿ ਸਬ੍ਬੇਸਂ, ਜਵਨਾਨਮਨਨ੍ਤਰਂ;
ਤਦਾਰਮ੍ਮਣਚਿਤ੍ਤਾਨਿ, ਭਵਨ੍ਤਿ ਅਨੁਪੁਬ੍ਬਤੋ.
੫੩੩. ਨ ਵਿਜ੍ਜਤਿ ਮਨੋਦ੍ਵਾਰੇ, ਘਟ੍ਟਨਾਰਮ੍ਮਣਸ੍ਸ ਹਿ;
ਕਥਂ ਭਵਙ੍ਗਤੋ ਹੋਤਿ, ਵੁਟ੍ਠਾਨਂ ਪਨ ਚੇਤਸੋ.
੫੩੪. ਮਨੋਦ੍ਵਾਰੇਪਿ ਆਪਾਥ-ਮਾਗਚ੍ਛਨ੍ਤੇਵ ਗੋਚਰਾ;
ਘਟ੍ਟਨਾਯ ਵਿਨਾ ਤਸ੍ਮਾ, ਚਿਤ੍ਤਾਨਂ ਹੋਤਿ ਸਮ੍ਭਵੋ.
੫੩੫. ਦ੍ਵਾਦਸਾਪੁਞ੍ਞਚਿਤ੍ਤਾਨਂ, ਵਿਪਾਕਾ ਸਤ੍ਤਸਤ੍ਤਤਿ;
ਭਵਨ੍ਤਿ ਚਤੁਰਾਸੀਤਿ, ਪਾਪਪਾਕਾ ਪਵਤ੍ਤਿਯਂ.
੫੩੬. ਏਕਾਦਸਵਿਧਾਨਂ ਤੁ, ਹਿਤ੍ਵਾ ਉਦ੍ਧਚ੍ਚਮਾਨਸਂ;
ਏਕਾਦਸਵਿਧਾ ਚੇਵ, ਭਵਨ੍ਤਿ ਪਟਿਸਨ੍ਧਿਯੋ.
੫੩੭. ਕ੍ਰਿਯਚਿਤ੍ਤੇਸੁ ਸਬ੍ਬੇਸੁ, ਜਵਨਂ ਨ ਚ ਹੋਤਿ ਯਂ;
ਤਂ ਵੇ ਕਰਣਮਤ੍ਤਤ੍ਤਾ, ਵਾਤਪੁਪ੍ਫਸਮਂ ਮਤਂ.
੫੩੮. ਜਵਨਤ੍ਤਂ ਤੁ ਸਮ੍ਪਤ੍ਤਂ, ਕਿਚ੍ਚਸਾਧਨਤੋ ਪਨ;
ਛਿਨ੍ਨਮੂਲਸ੍ਸ ਰੁਕ੍ਖਸ੍ਸ, ਪੁਪ੍ਫਂਵ ਅਫਲਂ ਸਿਯਾ.
੫੩੯. ਪਟਿਚ੍ਚ ਪਨ ਏਤਸ੍ਮਾ, ਫਲਮੇਤੀਤਿ ਪਚ੍ਚਯੋ;
ਯੋ ਧਮ੍ਮੋ ਯਸ੍ਸ ਧਮ੍ਮਸ੍ਸ, ਠਿਤਿਯੁਪ੍ਪਤ੍ਤਿਯਾਪਿ ਵਾ.
੫੪੦. ਉਪਕਾਰੋ ਹਿ ਸੋ ਤਸ੍ਸ, ਪਚ੍ਚਯੋਤਿ ਪਵੁਚ੍ਚਤਿ;
ਸਮ੍ਭਵੋਪਭਵੋ ਹੇਤੁ, ਕਾਰਣਂ ਪਚ੍ਚਯੋ ਮਤੋ.
੫੪੧. ਲੋਭਾਦਿ ਪਨ ਯੋ ਧਮ੍ਮੋ, ਮੂਲਟ੍ਠੇਨੁਪਕਾਰਕੋ;
ਹੇਤੂਤਿ ਪਨ ਸੋ ਧਮ੍ਮੋ, ਵਿਞ੍ਞਾਤਬ੍ਬੋ ਵਿਭਾਵਿਨਾ.
੫੪੨. ਲੋਭੋ ਦੋਸੋ ਚ ਮੋਹੋ ਚ,
ਤਥਾਲੋਭਾਦਯੋ ਤਯੋ;
ਛਲ਼ੇਵ ਹੇਤੁਯੋ ਹੋਨ੍ਤਿ,
ਜਾਤਿਤੋ ਨਵਧਾ ਸਿਯੁਂ.
੫੪੩. ਧਮ੍ਮਾਨਂ ਕੁਸਲਾਦੀਨਂ, ਕੁਸਲਾਦਿਤ੍ਤਸਾਧਕੋ;
ਮੂਲਟ੍ਠੋਤਿ ਵਦਨ੍ਤੇਵਂ, ਏਕੇ ਆਚਰਿਯਾ ਪਨ.
੫੪੪. ਏਵਂ ਸਨ੍ਤੇ ਤੁ ਹੇਤੂਨਂ, ਤਂਸਮੁਟ੍ਠਾਨਰੂਪਿਸੁ;
ਹੇਤੁਪਚ੍ਚਯਤਾ ਨੇਵ, ਸਮ੍ਪਜ੍ਜਤਿ ਕਦਾਚਿਪਿ.
੫੪੫. ਨ ਹਿ ਤੇ ਪਨ ਰੂਪਾਨਂ, ਸਾਧੇਨ੍ਤਿ ਕੁਸਲਾਦਿਕਂ;
ਨ ਤੇਸਂ ਪਨ ਰੂਪਾਨਂ, ਪਚ੍ਚਯਾ ਨ ਚ ਹੋਨ੍ਤਿ ਤੇ.
੫੪੬. ਤਸ੍ਮਾ ਹਿ ਕੁਸਲਾਦੀਨਂ, ਕੁਸਲਾਦਿਤ੍ਤਸਾਧਕੋ;
ਮੂਲਟ੍ਠੋਤਿ ਨ ਗਨ੍ਤਬ੍ਬੋ, ਵਿਞ੍ਞੁਨਾ ਸਮਯਞ੍ਞੁਨਾ.
੫੪੭. ਸੁਪ੍ਪਤਿਟ੍ਠਿਤਭਾਵਸ੍ਸ, ਸਾਧਨੇਨੁਪਕਾਰਕੋ;
ਮੂਲਟ੍ਠੋਤਿ ਚ ਹੇਤੂਨਂ, ਵਿਞ੍ਞਾਤਬ੍ਬੋ ਵਿਭਾਵਿਨਾ.