੯. ਨਵਮੋ ਪਰਿਚ੍ਛੇਦੋ
ਪੁਞ੍ਞਵਿਪਾਕਪਚ੍ਚਯਨਿਦ੍ਦੇਸੋ
੫੬੦. ਬਾਤ੍ਤਿਂਸ ਪਾਕਚਿਤ੍ਤਾਨਿ, ਲੋਕਿਕਾਨੇਵ ਯਾਨਿ ਹਿ;
ਏਤੇਸਂ ਪਾਕਚਿਤ੍ਤਾਨਂ, ਪਟਿਸਨ੍ਧਿਪਵਤ੍ਤਿਸੁ.
੫੬੧. ਪੁਞ੍ਞਾਪੁਞ੍ਞਾਦਿਸਙ੍ਖਾਰਾ, ਯਥਾ ਯੇਸਞ੍ਚ ਪਚ੍ਚਯਾ;
ਭਵਾਦੀਸੁ ਤਥਾ ਤੇਪਿ, ਵਿਞ੍ਞਾਤਬ੍ਬਾ ਵਿਭਾਵਿਨਾ.
੫੬੨. ਤਯੋ ਭਵਾ ਚਤਸ੍ਸੋ ਚ, ਯੋਨਿਯੋ ਗਤਿਪਞ੍ਚਕਂ;
ਵਿਞ੍ਞਾਣਟ੍ਠਿਤਿਯੋ ਸਤ੍ਤ, ਸਤ੍ਤਾਵਾਸਾ ਨਵੇਰਿਤਾ.
੫੬੩. ਕਾਮੇ ਪੁਞ੍ਞਾਭਿਸਙ੍ਖਾਰ-ਸਞ੍ਞਿਤਾ ਅਟ੍ਠ ਚੇਤਨਾ;
ਨਵਨ੍ਨਂ ਪਾਕਚਿਤ੍ਤਾਨਂ, ਕਾਮੇ ਸੁਗਤਿਯਂ ਪਨ.
੫੬੪. ਨਾਨਾਕ੍ਖਣਿਕਕਮ੍ਮੂਪ-ਨਿਸ੍ਸਯਪਚ੍ਚਯੇਹਿ ਚ;
ਦ੍ਵੇਧਾ ਹਿ ਪਚ੍ਚਯਾ ਤੇਸਂ, ਭਵਨ੍ਤਿ ਪਟਿਸਨ੍ਧਿਯਂ.
੫੬੫. ਉਪੇਕ੍ਖਾਸਹਿਤਾਹੇਤੁ-ਮਨੋਵਿਞ੍ਞਾਣਧਾਤੁਯਾ;
ਵਿਨਾ ਪਰਿਤ੍ਤਪਾਕਾਨਂ, ਹੋਨ੍ਤਿ ਦ੍ਵੇਧਾ ਪਵਤ੍ਤਿਯਂ.
੫੬੬. ਤਾਯੇਵ ਚੇਤਨਾ ਰੂਪ-ਭਵੇ ਦ੍ਵੇਧਾਵ ਪਚ੍ਚਯਾ;
ਪਞ੍ਚਨ੍ਨਂ ਪਾਕਚਿਤ੍ਤਾਨਂ, ਭਵਨ੍ਤਿ ਹਿ ਪਵਤ੍ਤਿਯਂ.
੫੬੭. ਅਟ੍ਠਨ੍ਨਂ ਤੁ ਪਰਿਤ੍ਤਾਨਂ, ਕਾਮੇ ਦੁਗ੍ਗਤਿਯਂ ਤਥਾ;
ਪਵਤ੍ਤੇ ਪਚ੍ਚਯਾ ਹੋਨ੍ਤਿ, ਨ ਹੋਨ੍ਤਿ ਪਟਿਸਨ੍ਧਿਯਂ.
੫੬੮. ਹੋਨ੍ਤਿ ਵੁਤ੍ਤਪ੍ਪਕਾਰਾਵ, ਕਾਮੇ ਸੁਗਤਿਯਂ ਤਥਾ;
ਸੋਲ਼ਸਨ੍ਨਂ ਵਿਪਾਕਾਨਂ, ਪਵਤ੍ਤੇ ਪਟਿਸਨ੍ਧਿਯਂ.
੫੬੯. ਰੂਪੇ ਪੁਞ੍ਞਾਭਿਸਙ੍ਖਾਰਾ, ਰੂਪਾਵਚਰਭੂਮਿਯਂ;
ਪਞ੍ਚਨ੍ਨਂ ਪਾਕਚਿਤ੍ਤਾਨਂ, ਪਚ੍ਚਯਾ ਪਟਿਸਨ੍ਧਿਯਂ.
੫੭੦. ਹੋਨ੍ਤਿਮਾਪੁਞ੍ਞਸਙ੍ਖਾਰਾ, ਕਾਮੇ ਦੁਗ੍ਗਤਿਯਂ ਦ੍ਵਿਧਾ;
ਵਿਞ੍ਞਾਣਸ੍ਸ ਪਨੇਕਸ੍ਸ, ਪਚ੍ਚਯਾ ਪਟਿਸਨ੍ਧਿਯਂ.
੫੭੧. ਛਨ੍ਨਂ ਪਨ ਪਵਤ੍ਤੇਵ, ਹੋਨ੍ਤਿ ਨੋ ਪਟਿਸਨ੍ਧਿਯਂ;
ਸਤ੍ਤਨ੍ਨਮ੍ਪਿ ਭਵਨ੍ਤੇਵ, ਪਵਤ੍ਤੇ ਪਟਿਸਨ੍ਧਿਯਂ.
੫੭੨. ਕਾਮੇ ਸੁਗਤਿਯਂ ਤੇਸਂ, ਸਤ੍ਤਨ੍ਨਮ੍ਪਿ ਤਥੇਵ ਚ;
ਪਵਤ੍ਤੇ ਪਚ੍ਚਯਾ ਹੋਨ੍ਤਿ, ਨ ਹੋਨ੍ਤਿ ਪਟਿਸਨ੍ਧਿਯਂ.
੫੭੩. ਵਿਞ੍ਞਾਣਾਨਂ ਚਤੁਨ੍ਨਮ੍ਪਿ, ਤੇਸਂ ਰੂਪਭਵੇ ਤਥਾ;
ਪਵਤ੍ਤੇ ਪਚ੍ਚਯਾ ਹੋਨ੍ਤਿ, ਨ ਹੋਨ੍ਤਿ ਪਟਿਸਨ੍ਧਿਯਂ.
੫੭੪. ਸੋ ਚ ਕਾਮਭਵੇਨਿਟ੍ਠ-ਰੂਪਾਦਿਉਪਲਦ੍ਧਿਯਂ;
ਅਨਿਟ੍ਠਰੂਪਾਦਯੋ ਪਨ, ਬ੍ਰਹ੍ਮਲੋਕੇ ਨ ਵਿਜ੍ਜਰੇ.
੫੭੫. ਤਥੇਵਾਨੇਞ੍ਜਸਙ੍ਖਾਰੋ, ਅਰੂਪਾਵਚਰਭੂਮਿਯਂ;
ਚਤੁਨ੍ਨਂ ਪਾਕਚਿਤ੍ਤਾਨਂ, ਪਵਤ੍ਤੇ ਪਟਿਸਨ੍ਧਿਯਂ.
੫੭੬. ਏਵਂ ਤਾਵ ਭਵੇਸ੍ਵੇਤੇ, ਪਟਿਸਨ੍ਧਿਪਵਤ੍ਤਿਸੁ;
ਯਥਾ ਚ ਪਚ੍ਚਯਾ ਹੋਨ੍ਤਿ, ਤਥਾ ਞੇਯ੍ਯਾ ਵਿਭਾਵਿਨਾ.
੫੭੭. ਏਸੇਵ ਚ ਨਯੋ ਞੇਯ੍ਯੋ, ਯੋਨਿਆਦੀਸੁ ਤਤ੍ਰਿਦਂ;
ਆਦਿਤੋ ਪਨ ਪਟ੍ਠਾਯ, ਮੁਖਮਤ੍ਤਨਿਦਸ੍ਸਨਂ.
੫੭੮. ਅਵਿਸੇਸੇਨ ਪੁਞ੍ਞਾਭਿ-ਸਙ੍ਖਾਰੋ ਦ੍ਵਿਭਵੇਸੁਪਿ;
ਦਤ੍ਵਾਨ ਪਟਿਸਨ੍ਧਿਂ ਤੁ, ਸਬ੍ਬਪਾਕਂ ਜਨੇਤਿ ਸੋ.
੫੭੯. ਤਥਾ ਚਤੂਸੁ ਵਿਞ੍ਞੇਯ੍ਯੋ, ਅਣ੍ਡਜਾਦੀਸੁ ਯੋਨਿਸੁ;
ਬਹੁਦੇਵਮਨੁਸ੍ਸਾਨਂ, ਗਤੀਸੁ ਦ੍ਵੀਸੁ ਏਵ ਚ.
੫੮੦. ਤਥਾ ਨਾਨਤ੍ਤਕਾਯਾਦਿ-ਵਿਞ੍ਞਾਣਾਨਂ ਠਿਤੀਸੁਪਿ;
ਤਥਾ ਵੁਤ੍ਤਪ੍ਪਕਾਰਸ੍ਮਿਂ, ਸਤ੍ਤਾਵਾਸੇ ਚਤੁਬ੍ਬਿਧੇ.
੫੮੧. ਏਵਂ ਪੁਞ੍ਞਾਭਿਸਙ੍ਖਾਰੋ, ਭਵਾਦੀਸੁ ਯਥਾਰਹਂ;
ਏਕਵੀਸਤਿਪਾਕਾਨਂ, ਪਚ੍ਚਯੋ ਹੋਤਿ ਚ ਦ੍ਵਿਧਾ.
੫੮੨. ਕਾਮੇ ਅਪੁਞ੍ਞਸਙ੍ਖਾਰੋ, ਭਵੇ ਚਤੂਸੁ ਯੋਨਿਸੁ;
ਤੀਸੁ ਗਤੀਸੁ ਏਕਿਸ੍ਸਾ, ਵਿਞ੍ਞਾਣਟ੍ਠਿਤਿਯਾਪਿ ਚ.
੫੮੩. ਸਤ੍ਤਾਵਾਸੇ ਪਨੇਕਸ੍ਮਿਂ,
ਉਹੋਤਿ ਸੋ ਪਚ੍ਚਯੋ ਦ੍ਵਿਧਾ;
ਸਤ੍ਤਨ੍ਨਂ ਪਾਕਚਿਤ੍ਤਾਨਂ,
ਪਵਤ੍ਤੇ ਪਟਿਸਨ੍ਧਿਯਂ.
੫੮੪. ਤਥੇਵਾਨੇਞ੍ਜਸਙ੍ਖਾਰੋ, ਏਕਾਰੂਪਭਵੇ ਪੁਨ;
ਏਕਿਸ੍ਸਾ ਯੋਨਿਯਾ ਚੇਵ, ਏਕਿਸ੍ਸਾ ਗਤਿਯਾਪਿ ਚ.
੫੮੫. ਤੀਸੁ ਚਿਤ੍ਤਟ੍ਠਿਤੀਸ੍ਵੇਵ, ਸਤ੍ਤਾਵਾਸੇ ਚਤੁਬ੍ਬਿਧੇ;
ਚਤੁਨ੍ਨਂ ਪਾਕਚਿਤ੍ਤਾਨਂ, ਦ੍ਵੇਧਾ ਸੋ ਹੋਤਿ ਪਚ੍ਚਯੋ.
੫੮੬. ਪਟਿਸਨ੍ਧਿਪਵਤ੍ਤੀਨਂ, ਵਸੇਨੇਵ ਭਵਾਦਿਸੁ;
ਵਿਜਾਨਿਤਬ੍ਬਾ ਸਙ੍ਖਾਰਾ, ਯਥਾ ਯੇਸਞ੍ਚ ਪਚ੍ਚਯਾ.
੫੮੭. ਨ ਰੂਪਾਰੂਪਧਮ੍ਮਾਨਂ, ਸਙ੍ਕਨ੍ਤਿ ਪਨ ਵਿਜ੍ਜਤਿ;
ਸਙ੍ਕਨ੍ਤਿਭਾਵੇ ਅਸਤਿ, ਪਟਿਸਨ੍ਧਿ ਕਥਂ ਸਿਯਾ.
੫੮੮. ਨਤ੍ਥਿ ਚਿਤ੍ਤਸ੍ਸ ਸਙ੍ਕਨ੍ਤਿ, ਅਤੀਤਭਵਤੋ ਇਧ;
ਤਤੋ ਹੇਤੁਂ ਵਿਨਾ ਤਸ੍ਸ, ਪਾਤੁਭਾਵੋ ਨ ਵਿਜ੍ਜਤਿ.
੫੮੯. ਸੁਲਦ੍ਧਪਚ੍ਚਯਂ ਰੂਪਾ-ਰੂਪਮਤ੍ਤਂ ਤੁ ਜਾਯਤਿ;
ਉਪ੍ਪਜ੍ਜਮਾਨਮੇਵਂ ਤੁ, ਲਭਿਤ੍ਵਾ ਪਚ੍ਚਯਂ ਪਨ.
੫੯੦. ਭਵਨ੍ਤਰਮੁਪੇਤੀਤਿ, ਸਮਞ੍ਞਾਯ ਪਵੁਚ੍ਚਤਿ;
ਨ ਚ ਸਤ੍ਤੋ ਨ ਚ ਜੀਵੋ, ਨ ਅਤ੍ਤਾ ਵਾਪਿ ਵਿਜ੍ਜਤਿ.
੫੯੧. ਤਯਿਦਂ ਪਾਕਟਂ ਕਤ੍ਵਾ, ਪਟਿਸਨ੍ਧਿਕ੍ਕਮਂ ਪਨ;
ਦਸ੍ਸਯਿਸ੍ਸਾਮਹਂ ਸਾਧੁ, ਨਿਬੋਧਥ ਸੁਦੁਬ੍ਬੁਧਂ.
੫੯੨. ਅਤੀਤਸ੍ਮਿਂ ਭਵੇ ਤਸ੍ਸ, ਆਸਨ੍ਨਮਰਣਸ੍ਸ ਹਿ;
ਹਰਿਤਂ ਤਾਲਪਣ੍ਣਂਵ, ਪਕ੍ਖਿਤ੍ਤਂ ਆਤਪੇ ਪਨ.
੫੯੩. ਸੁਸ੍ਸਮਾਨੇ ਸਰੀਰਸ੍ਮਿਂ, ਨਟ੍ਠੇ ਚਕ੍ਖੁਨ੍ਦ੍ਰਿਯਾਦਿਕੇ;
ਹਦਯਵਤ੍ਥੁਮਤ੍ਤਸ੍ਮਿਂ, ਠਿਤੇ ਕਾਯਪ੍ਪਸਾਦਿਕੇ.
੫੯੪. ਵਤ੍ਥੁਸਨ੍ਨਿਸ੍ਸਿਤਂ ਚਿਤ੍ਤਂ, ਹੋਤਿ ਤਸ੍ਮਿਂ ਖਣੇਪਿ ਚ;
ਪੁਬ੍ਬਾਨੁਸੇਵਿਤਂ ਕਮ੍ਮਂ, ਪੁਞ੍ਞਂ ਵਾਪੁਞ੍ਞਮੇਵ ਵਾ.
੫੯੫. ਕਮ੍ਮਂ ਕਮ੍ਮਨਿਮਿਤ੍ਤਂ ਵਾ, ਆਲਮ੍ਬਿਤ੍ਵਾ ਪਵਤ੍ਤਤਿ;
ਏਵਂ ਪਵਤ੍ਤਮਾਨਂ ਤਂ, ਵਿਞ੍ਞਾਣਂ ਲਦ੍ਧਪਚ੍ਚਯਂ.
੫੯੬. ਅਵਿਜ੍ਜਾਯ ਪਟਿਚ੍ਛਨ੍ਨਾ-ਦੀਨਵੇ ਵਿਸਯੇ ਪਨ;
ਤਣ੍ਹਾ ਨਮੇਤਿ ਸਙ੍ਖਾਰਾ, ਖਿਪਨ੍ਤਿ ਸਹਜਾ ਪਨ.
੫੯੭. ਨ ਮੀਯਮਾਨਂ ਤਣ੍ਹਾਯ, ਤਂ ਸਨ੍ਤਤਿਵਸਾ ਪਨ;
ਓਰਿਮਾ ਪਨ ਤੀਰਮ੍ਹਾ, ਆਲਮ੍ਬਿਤ੍ਵਾਨ ਰਜ੍ਜੁਕਂ.
੫੯੮. ਮਾਤਿਕਾਤਿਕ੍ਕਮੋਵੇਤਂ, ਪੁਰਿਮਂ ਜਹਤਿ ਨਿਸ੍ਸਯਂ;
ਅਪਰਂ ਕਮ੍ਮਸਮ੍ਭੂਤਂ, ਲਮ੍ਬਿਤ੍ਵਾ ਵਾਪਿ ਨਿਸ੍ਸਯਂ.
੫੯੯. ਤਂ ਪਨਾਰਮ੍ਮਣਾਦੀਹਿ, ਪਚ੍ਚਯੇਹਿ ਪਵਤ੍ਤਤਿ;
ਪੁਰਿਮਂ ਚਵਨਂ ਏਤ੍ਥ, ਪਚ੍ਛਿਮਂ ਪਟਿਸਨ੍ਧਿ ਤੁ.
੬੦੦. ਤਦੇਤਂ ਨਾਪਿ ਪੁਰਿਮਾ, ਭਵਤੋਪਿ ਇਧਾਗਤਂ;
ਕਮ੍ਮਾਦਿਞ੍ਚ ਵਿਨਾ ਹੇਤੁਂ, ਪਾਤੁਭੂਤਂ ਨ ਚੇਵ ਤਂ.
੬੦੧. ਏਤ੍ਥ ਚੇਤਸ੍ਸ ਚਿਤ੍ਤਸ੍ਸ, ਪੁਰਿਮਾ ਭਵਤੋ ਪਨ;
ਇਧਾਨਾਗਮਨੇਤੀਤ-ਭਵਹੇਤੂਹਿ ਸਮ੍ਭਵੇ.
੬੦੨. ਪਟਿਘੋਸਦੀਪਮੁਦ੍ਦਾਦੀ, ਭਵਨ੍ਤੇਤ੍ਥ ਨਿਦਸ੍ਸਨਾ;
ਯਥਾ ਆਗਨ੍ਤ੍ਵਾ ਅਞ੍ਞਤ੍ਰ, ਹੋਨ੍ਤਿ ਸਦ੍ਦਾਦਿਹੇਤੁਕਾ.
੬੦੩. ਏਵਮੇਵ ਚ ਵਿਞ੍ਞਾਣਂ, ਵੇਦਿਤਬ੍ਬਂ ਵਿਭਾਵਿਨਾ;
ਸਨ੍ਤਾਨਬਨ੍ਧਤੋ ਨਤ੍ਥਿ, ਏਕਤਾ ਵਾਪਿ ਨਾਨਤਾ.
੬੦੪. ਸਤਿ ਸਨ੍ਤਾਨਬਨ੍ਧੇ ਤੁ, ਏਕਨ੍ਤੇਨੇਕਤਾ ਸਿਯਾ;
ਖੀਰਤੋ ਦਧਿਸਮ੍ਭੂਤਂ, ਨ ਭਵੇਯ੍ਯ ਕਦਾਚਿਪਿ.
੬੦੫. ਅਥਾਪਿ ਪਨ ਏਕਨ੍ਤ-ਨਾਨਤਾ ਸਾ ਭਵੇਯ੍ਯ ਚੇ;
ਖੀਰਸਾਮੀ ਨਰੋ ਨੇਵ, ਦਧਿਸਾਮੀ ਭਵੇਯ੍ਯ ਸੋ.
੬੦੬. ਤਸ੍ਮਾ ਏਤ੍ਥ ਪਨੇਕਨ੍ਤ-ਏਕਤਾਨਾਨਤਾਪਿ ਵਾ;
ਨ ਚੇਵ ਉਪਗਨ੍ਤਬ੍ਬਾ, ਵਿਞ੍ਞੁਨਾ ਸਮਯਞ੍ਞੁਨਾ.
੬੦੭. ਨਨੁ ਏਵਮਸਙ੍ਕਨ੍ਤਿ-ਪਾਤੁਭਾਵੇ ਤਸ੍ਸ ਸਤਿ;
ਯੇ ਇਮਸ੍ਮਿਂ ਮਨੁਸ੍ਸਤ੍ਤ-ਭਾਵੇ ਖਨ੍ਧਾਭਿਸਮ੍ਭਵਾ.
੬੦੮. ਤੇਸਂ ਇਧ ਨਿਰੁਦ੍ਧਤ੍ਤਾ, ਕਮ੍ਮਸ੍ਸ ਫਲਹੇਤੁਨੋ;
ਪਰਤ੍ਥਾਗਮਤੋ ਚੇਵ, ਇਧ ਤਸ੍ਸ ਕਤਸ੍ਸ ਹਿ.
੬੦੯. ਅਞ੍ਞਸ੍ਸ ਅਞ੍ਞਤੋ ਚੇਵ, ਕਮ੍ਮਤੋ ਤਂ ਫਲਂ ਸਿਯਾ;
ਤਸ੍ਮਾ ਨ ਸੁਨ੍ਦਰਂ ਏਤਂ, ਵਿਧਾਨਂ ਸਬ੍ਬਮੇਵ ਚ.
ਏਤ੍ਥਾਹ –
੬੧੦. ਸਨ੍ਤਾਨੇ ਯਂ ਫਲਂ ਏਤਂ, ਨਾਞ੍ਞਸ੍ਸ ਨ ਚ ਅਞ੍ਞਤੋ;
ਬੀਜਾਨਂ ਅਭਿਸਙ੍ਖਾਰੋ, ਏਤਸ੍ਸਤ੍ਥਸ੍ਸ ਸਾਧਕੋ.
੬੧੧. ਏਕਸ੍ਮਿਂ ਪਨ ਸਨ੍ਤਾਨੇ, ਵਤ੍ਤਮਾਨਂ ਫਲਂ ਪਨ;
ਅਞ੍ਞਸ੍ਸਾਤਿਪਿ ਵਾ ਨੇਵ, ਅਞ੍ਞਤੋ ਵਾ ਨ ਹੋਤਿ ਤਂ.
੬੧੨. ਬੀਜਾਨਂ ਅਭਿਸਙ੍ਖਾਰਾ, ਏਤਸ੍ਸਤ੍ਥਸ੍ਸ ਸਾਧਕੋ;
ਬੀਜਾਨਂ ਅਭਿਸਙ੍ਖਾਰੇ, ਕਤੇ ਤੁ ਮਧੁਆਦਿਨਾ.
੬੧੩. ਤਸ੍ਸ ਬੀਜਸ੍ਸ ਸਨ੍ਤਾਨੇ, ਪਠਮਂ ਲਦ੍ਧਪਚ੍ਚਯੋ;
ਮਧੁਰੋ ਫਲਸੋ ਤਸ੍ਸ, ਹੋਤਿ ਕਾਲਨ੍ਤਰੇ ਪਨ.
੬੧੪. ਨ ਹਿ ਤਾਨਿ ਹਿ ਬੀਜਾਨਿ, ਅਭਿਸਙ੍ਖਰਣਮ੍ਪਿ ਵਾ;
ਪਾਪੁਣਨ੍ਤਿ ਫਲਟ੍ਠਾਨਂ, ਏਵਂ ਞੇਯ੍ਯਮਿਦਮ੍ਪਿ ਚ.
੬੧੫. ਬਾਲਕਾਲੇ ਪਯੁਤ੍ਤੇਨ, ਵਿਜ੍ਜਾਸਿਪ੍ਪੋਸਧਾਦਿਨਾ;
ਦੀਪੇਤਬ੍ਬੋ ਅਯਂ ਵੁਦ੍ਧ-ਕਾਲਸ੍ਮਿਂ ਫਲਦਾਯਿਨਾ.
੬੧੬. ਏਵਂ ਸਨ੍ਤੇਪਿ ਤਂ ਕਮ੍ਮਂ, ਵਿਜ੍ਜਮਾਨਮ੍ਪਿ ਵਾ ਪਨ;
ਫਲਸ੍ਸ ਪਚ੍ਚਯੋ ਹੋਤਿ, ਅਥ ਵਾਵਿਜ੍ਜਮਾਨਕਂ.
੬੧੭. ਵਿਜ੍ਜਮਾਨਂ ਸਚੇ ਹੋਤਿ, ਤਪ੍ਪਵਤ੍ਤਿਕ੍ਖਣੇ ਪਨ;
ਭਵਿਤਬ੍ਬਂ ਵਿਪਾਕੇਨ, ਸਦ੍ਧਿਮੇਵ ਚ ਹੇਤੁਨਾ.
੬੧੮. ਅਥ ਵਾਵਿਜ੍ਜਮਾਨਂ ਤਂ, ਨਿਰੁਦ੍ਧਂ ਪਚ੍ਚਯੋ ਭਵੇ;
ਪਵਤ੍ਤਿਕ੍ਖਣਤੋ ਪੁਬ੍ਬੇ, ਪਚ੍ਛਾ ਨਿਚ੍ਚਫਲਂ ਸਿਯਾ.
ਵੁਚ੍ਚਤੇ –
੬੧੯. ਕਟਤ੍ਤਾ ਪਚ੍ਚਯੋ ਕਮ੍ਮਂ, ਤਸ੍ਮਾ ਨਿਚ੍ਚਫਲਂ ਨ ਚ;
ਪਾਟਿਭੋਗਾਦਿਕਂ ਕਮ੍ਮਂ, ਵੇਦਿਤਬ੍ਬਂ ਨਿਦਸ੍ਸਨਂ.
੬੨੦. ਕਟਤ੍ਤਾਯੇਵ ਤਂ ਕਮ੍ਮਂ, ਫਲਸ੍ਸ ਪਨ ਪਚ੍ਚਯੋ;
ਨ ਚਸ੍ਸ ਵਿਜ੍ਜਮਾਨਤ੍ਤਂ, ਤਸ੍ਸ ਵਾਵਿਜ੍ਜਮਾਨਤਾ.
੬੨੧. ਅਭਿਧਮ੍ਮਾਵਤਾਰੋਯਂ, ਪਰਮਤ੍ਥਪਕਾਸਨੋ;
ਸੋਤਬ੍ਬੋ ਪਨ ਸੋਤੂਨਂ, ਪੀਤਿਬੁਦ੍ਧਿਵਿਵਡ੍ਢਨੋ.
ਇਤਿ ਅਭਿਧਮ੍ਮਾਵਤਾਰੇ ਪੁਞ੍ਞਵਿਪਾਕਪਚ੍ਚਯਨਿਦ੍ਦੇਸੋ ਨਾਮ
ਨਵਮੋ ਪਰਿਚ੍ਛੇਦੋ.