੩. ਤਤਿਯੋ ਪਰਿਚ੍ਛੇਦੋ
ਚੇਤਸਿਕਵਿਭਾਗਨਿਦ੍ਦੇਸੋ
੮੯. ਸਬ੍ਬੇ ਚੇਤਸਿਕਾ ਵੁਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ;
ਨਾਮਸਾਮਞ੍ਞਤੋਯੇਵ, ਦ੍ਵੇਪਞ੍ਞਾਸ ਭਵਨ੍ਤਿ ਤੇ.
ਸੇਯ੍ਯਥਿਦਂ – ਫਸ੍ਸੋ ਵੇਦਨਾ ਸਞ੍ਞਾ ਚੇਤਨਾ ਵਿਤਕ੍ਕੋ ਵਿਚਾਰੋ ਪੀਤਿ ਚਿਤ੍ਤੇਕਗ੍ਗਤਾ ਵੀਰਿਯਂ ਜੀਵਿਤਂ ਛਨ੍ਦੋ ਅਧਿਮੋਕ੍ਖੋ ਮਨਸਿਕਾਰੋ ਤਤ੍ਰਮਜ੍ਝਤ੍ਤਤਾ ਸਦ੍ਧਾ ਸਤਿ ਹਿਰੀ ਓਤ੍ਤਪ੍ਪਂ ਅਲੋਭੋ ਅਦੋਸੋ ਅਮੋਹੋ ਕਾਯਪ੍ਪਸ੍ਸਦ੍ਧਿਆਦੀਨਿ ਛ ਯੁਗਾਨਿ, ਤਿਸ੍ਸੋ ਵਿਰਤਿਯੋ, ਕਰੁਣਾ ਮੁਦਿਤਾ ਲੋਭੋ ਦੋਸੋ ਮੋਹੋ ਉਦ੍ਧਚ੍ਚਂ ਮਾਨੋ ਦਿਟ੍ਠਿ ਇਸ੍ਸਾ ਮਚ੍ਛਰਿਯਂ ਕੁਕ੍ਕੁਚ੍ਚਂ ਥਿਨਂ ਮਿਦ੍ਧਂ ਵਿਚਿਕਿਚ੍ਛਾ ਅਹਿਰਿਕਂ ਅਨੋਤ੍ਤਪ੍ਪਞ੍ਚਾਤਿ.
੯੦. ਚਤੁਪਞ੍ਞਾਸਧਾ ਕਾਮੇ, ਰੂਪੇ ਪਞ੍ਚਦਸੇਰਿਤਾ;
ਤੇ ਹੋਨ੍ਤਿ ਦ੍ਵਾਦਸਾਰੂਪੇ, ਚਤ੍ਤਾਲੀਸਮਨਾਸਵਾ.
੯੧. ਏਕਵੀਸਸਤਂ ਸਬ੍ਬੇ, ਚਿਤ੍ਤੁਪ੍ਪਾਦਾ ਸਮਾਸਤੋ;
ਏਤੇਸੁ ਤੇਸਮੁਪ੍ਪਤ੍ਤਿਂ, ਉਦ੍ਧਰਿਤ੍ਵਾ ਪਨੇਕਕਂ.
੯੨. ਫਸ੍ਸਾਦੀਨਂ ਤੁ ਧਮ੍ਮਾਨਂ, ਪਵਕ੍ਖਾਮਿ ਇਤੋ ਪਰਂ;
ਪਾਟਵਤ੍ਥਾਯ ਭਿਕ੍ਖੂਨਂ, ਚਿਤ੍ਤਚੇਤਸਿਕੇਸ੍ਵਹਂ.
੯੩. ਏਕਗ੍ਗਤਾ ਮਨਕ੍ਕਾਰੋ, ਜੀਵਿਤਂ ਫਸ੍ਸਪਞ੍ਚਕਂ;
ਅਟ੍ਠੇਤੇ ਅਵਿਨਿਬ੍ਭੋਗਾ, ਏਕੁਪ੍ਪਾਦਾ ਸਹਕ੍ਖਯਾ.
੯੪. ਫਸ੍ਸੋ ਚ ਵੇਦਨਾ ਸਞ੍ਞਾ, ਚੇਤਨਾ ਜੀਵਿਤਿਨ੍ਦ੍ਰਿਯਂ;
ਏਕਗ੍ਗਤਾ ਮਨਕ੍ਕਾਰੋ, ਸਬ੍ਬਸਾਧਾਰਣਾ ਇਮੇ.
੯੫. ਵਿਤਕ੍ਕੋ ਪਞ੍ਚਪਞ੍ਞਾਸ-ਚਿਤ੍ਤੇਸੁ ਸਮੁਦੀਰਿਤੋ;
ਚਾਰੋ ਛਸਟ੍ਠਿਚਿਤ੍ਤੇਸੁ, ਜਾਯਤੇ ਨਤ੍ਥਿ ਸਂਸਯੋ.
੯੬. ਏਕਪਞ੍ਞਾਸਚਿਤ੍ਤੇਸੁ, ਪੀਤਿ ਤੇਸਟ੍ਠਿਯਾ ਸੁਖਂ;
ਉਪੇਕ੍ਖਾ ਪਞ੍ਚਪਞ੍ਞਾਸ-ਚਿਤ੍ਤੇ ਦੁਕ੍ਖਂ ਤੁ ਤੀਸੁ ਹਿ.
੯੭. ਹੋਤਿ ਦ੍ਵਾਸਟ੍ਠਿਚਿਤ੍ਤੇਸੁ, ਸੋਮਨਸ੍ਸਿਨ੍ਦ੍ਰਿਯਂ ਪਨ;
ਦੁਕ੍ਖਿਨ੍ਦ੍ਰਿਯਂ ਪਨੇਕਸ੍ਮਿਂ, ਤਥੇਕਮ੍ਹਿ ਸੁਖਿਨ੍ਦ੍ਰਿਯਂ.
੯੮. ਪਞ੍ਚੁਤ੍ਤਰਸਤੇ ਚਿਤ੍ਤੇ, ਵੀਰਿਯਂ ਆਹ ਨਾਯਕੋ;
ਚਤੁਤ੍ਤਰਸਤੇ ਚਿਤ੍ਤੇ, ਸਮਾਧਿਨ੍ਦ੍ਰਿਯਮਬ੍ਰਵਿ.
੯੯. ਸਬ੍ਬਾਹੇਤੁਕਚਿਤ੍ਤਾਨਿ, ਠਪੇਤ੍ਵਾ ਚੇਕਹੇਤੁਕੇ;
ਏਕੁਤ੍ਤਰਸਤੇ ਚਿਤ੍ਤੇ, ਛਨ੍ਦਸ੍ਸੁਪ੍ਪਤ੍ਤਿਮੁਦ੍ਦਿਸੇ.
੧੦੦. ਠਪੇਤ੍ਵਾ ਦਸ ਵਿਞ੍ਞਾਣੇ, ਵਿਚਿਕਿਚ੍ਛਾਯੁਤਮ੍ਪਿ ਚ;
ਦਸੁਤ੍ਤਰਸਤੇ ਚਿਤ੍ਤੇ, ਅਧਿਮੋਕ੍ਖੋ ਉਦੀਰਿਤੋ.
੧੦੧. ਸਦ੍ਧਾ ਸਤਿ ਹਿਰੋਤ੍ਤਪ੍ਪਂ, ਅਲੋਭਾਦੋਸਮਜ੍ਝਤਾ;
ਛਲ਼ੇਵ ਯੁਗਲ਼ਾ ਚਾਤਿ, ਧਮ੍ਮਾ ਏਕੂਨਵੀਸਤਿ.
੧੦੨. ਏਕਨਵੁਤਿਯਾ ਚਿਤ੍ਤੇ, ਜਾਯਨ੍ਤਿ ਨਿਯਤਾ ਇਮੇ;
ਅਹੇਤੁਕੇਸੁ ਚਿਤ੍ਤੇਸੁ, ਅਪੁਞ੍ਞੇਸੁ ਨ ਜਾਯਰੇ.
੧੦੩. ਏਕੂਨਾਸੀਤਿਯਾ ਚਿਤ੍ਤੇ, ਪਞ੍ਞਾ ਜਾਯਤਿ ਸਬ੍ਬਦਾ;
ਅਟ੍ਠਵੀਸਤਿਯਾ ਚਿਤ੍ਤੇ, ਕਰੁਣਾਮੁਦਿਤਾ ਸਿਯੁਂ.
੧੦੪. ਕਾਮਾਵਚਰਪੁਞ੍ਞੇਸੁ, ਸਬ੍ਬਲੋਕੁਤ੍ਤਰੇਸੁ ਚ;
ਚਤ੍ਤਾਲੀਸਵਿਧੇ ਚਿਤ੍ਤੇ, ਸਾਟ੍ਠਕੇ ਵਿਰਤਿਤ੍ਤਯਂ.
੧੦੫. ਸਦ੍ਧਾ ਸਤਿ ਹਿਰੋਤ੍ਤਪ੍ਪਂ, ਅਲੋਭਾਦਿਤ੍ਤਯਮ੍ਪਿ ਚ;
ਯੁਗਲ਼ਾਨਿ ਛ ਮਜ੍ਝਤ੍ਤਂ, ਕਰੁਣਾਮੁਦਿਤਾਪਿ ਚ.
੧੦੬. ਤਥਾ ਵਿਰਤਿਯੋ ਤਿਸ੍ਸੋ, ਸਬ੍ਬੇ ਤੇ ਪਞ੍ਚਵੀਸਤਿ;
ਕੁਸਲਾਬ੍ਯਾਕਤਾ ਚਾਪਿ, ਕੁਸਲੇਨ ਪਕਾਸਿਤਾ.
੧੦੭. ਅਹਿਰੀਕਮਨੋਤ੍ਤਪ੍ਪਂ, ਮੋਹੋ ਉਦ੍ਧਚ੍ਚਮੇਵ ਚ;
ਦ੍ਵਾਦਸਾਪੁਞ੍ਞਚਿਤ੍ਤੇਸੁ, ਨਿਯਤਾਯੇਵ ਜਾਯਰੇ.
੧੦੮. ਲੋਭੋ ਦੋਸੋ ਚ ਮੋਹੋ ਚ, ਮਾਨੋ ਦਿਟ੍ਠਿ ਚ ਸਂਸਯੋ;
ਮਿਦ੍ਧਮੁਦ੍ਧਚ੍ਚਕੁਕ੍ਕੁਚ੍ਚਂ, ਥਿਨਂ ਮਚ੍ਛਰਿਯਮ੍ਪਿ ਚ.
੧੦੯. ਅਹਿਰੀਕਮਨੋਤ੍ਤਪ੍ਪਂ, ਇਸ੍ਸਾ ਚ ਦੋਮਨਸ੍ਸਕਂ;
ਏਤੇ ਅਕੁਸਲਾ ਵੁਤ੍ਤਾ, ਏਕਨ੍ਤੇਨ ਮਹੇਸਿਨਾ.
੧੧੦. ਲੋਭੋ ਅਟ੍ਠਸੁ ਨਿਦ੍ਦਿਟ੍ਠੋ, ਵੁਤ੍ਤਾ ਚਤੂਸੁ ਦਿਟ੍ਠਿਤੁ;
ਮਾਨੋ ਦਿਟ੍ਠਿਵਿਯੁਤ੍ਤੇਸੁ, ਦੋਸੋਦ੍ਵੀਸ੍ਵੇਵ ਜਾਯਤੇ.
੧੧੧. ਇਸ੍ਸਾਮਚ੍ਛੇਰਕੁਕ੍ਕੁਚ੍ਚਾ, ਦ੍ਵੀਸੁ ਜਾਯਨ੍ਤਿ ਨੋ ਸਹ;
ਵਿਚਿਕਿਚ੍ਛਾ ਪਨੇਕਸ੍ਮਿਂ, ਥਿਨਮਿਦ੍ਧਂ ਤੁ ਪਞ੍ਚਸੁ.
੧੧੨. ਫਸ੍ਸੋ ਚ ਵੇਦਨਾ ਸਞ੍ਞਾ, ਚੇਤਨਾ ਜੀਵਿਤਂ ਮਨੋ;
ਵਿਤਕ੍ਕੋ ਚ ਵਿਚਾਰੋ ਚ, ਪੀਤਿ ਵੀਰਿਯਸਮਾਧਿ ਚ.
੧੧੩. ਛਨ੍ਦੋ ਚੇਵਾਧਿਮੋਕ੍ਖੋ ਚ, ਮਨਸਿਕਾਰੋ ਚ ਚੁਦ੍ਦਸ;
ਕੁਸਲਾਕੁਸਲਾ ਚੇਵ, ਹੋਨ੍ਤਿ ਅਬ੍ਯਾਕਤਾਪਿ ਚ.
੧੧੪. ਏਕੂਨਤਿਂਸਚਿਤ੍ਤੇਸੁ, ਝਾਨਂ ਪਞ੍ਚਙ੍ਗਿਕਂ ਮਤਂ;
ਚਤੁਝਾਨਙ੍ਗਯੁਤ੍ਤਾਨਿ, ਸਤ੍ਤਤਿਂਸਾਤਿ ਨਿਦ੍ਦਿਸੇ.
੧੧੫. ਏਕਾਦਸਵਿਧਂ ਚਿਤ੍ਤਂ, ਤਿਵਙ੍ਗਿਕਮੁਦੀਰਿਤਂ;
ਚਤੁਤਿਂਸਵਿਧਂ ਚਿਤ੍ਤਂ, ਦੁਵਙ੍ਗਿਕਮੁਦੀਰਿਤਂ.
੧੧੬. ਸਭਾਵੇਨਾਵਿਤਕ੍ਕੇਸੁ, ਝਾਨਙ੍ਗਾਨਿ ਨ ਉਦ੍ਧਰੇ;
ਸਬ੍ਬਾਹੇਤੁਕਚਿਤ੍ਤੇਸੁ, ਮਗ੍ਗਙ੍ਗਾਨਿ ਨ ਉਦ੍ਧਰੇ.
੧੧੭. ਤੀਣਿ ਸੋਲ਼ਸਚਿਤ੍ਤੇਸੁ, ਇਨ੍ਦ੍ਰਿਯਾਨਿ ਵਦੇ ਬੁਧੋ;
ਏਕਸ੍ਮਿਂ ਪਨ ਚਤ੍ਤਾਰਿ, ਪਞ੍ਚ ਤੇਰਸਸੁਦ੍ਧਰੇ.
੧੧੮. ਸਤ੍ਤ ਦ੍ਵਾਦਸਚਿਤ੍ਤੇਸੁ, ਇਨ੍ਦ੍ਰਿਯਾਨਿ ਜਿਨੋਬ੍ਰਵਿ;
ਏਕੇਨੂਨੇਸੁ ਅਟ੍ਠੇਵ, ਚਤ੍ਤਾਲੀਸਮਨੇਸੁ ਚ.
੧੧੯. ਚਤ੍ਤਾਲੀਸਾਯ ਚਿਤ੍ਤੇਸੁ, ਨਵਕਂ ਨਾਯਕੋਬ੍ਰਵਿ;
ਏਵਂ ਇਨ੍ਦ੍ਰਿਯਯੋਗੋਪਿ, ਵੇਦਿਤਬ੍ਬੋ ਵਿਭਾਵਿਨਾ.
੧੨੦. ਅਮਗ੍ਗਙ੍ਗਾਨਿ ਨਾਮੇਤ੍ਥ, ਅਟ੍ਠਾਰਸ ਅਹੇਤੁਕਾ;
ਝਾਨਙ੍ਗਾਨਿ ਨ ਵਿਜ੍ਜਨ੍ਤਿ, ਵਿਞ੍ਞਾਣੇਸੁ ਦ੍ਵਿਪਞ੍ਚਸੁ.
੧੨੧. ਏਕਂ ਚਿਤ੍ਤਂ ਦੁਮਗ੍ਗਙ੍ਗਂ, ਤਿਮਗ੍ਗਙ੍ਗਾਨਿ ਸਤ੍ਤਸੁ;
ਚਤ੍ਤਾਲੀਸਾਯ ਚਿਤ੍ਤੇਸੁ, ਮਗ੍ਗੋ ਸੋ ਚਤੁਰਙ੍ਗਿਕੋ.
੧੨੨. ਪਞ੍ਚਦ੍ਦਸਸੁ ਚਿਤ੍ਤੇਸੁ, ਮਗ੍ਗੋ ਪਞ੍ਚਙ੍ਗਿਕੋ ਮਤੋ;
ਵੁਤ੍ਤੋ ਦ੍ਵਤ੍ਤਿਂਸਚਿਤ੍ਤੇਸੁ, ਮਗ੍ਗੋ ਸਤ੍ਤਙ੍ਗਿਕੋਪਿ ਚ.
੧੨੩. ਮਗ੍ਗੋ ਅਟ੍ਠਸੁ ਚਿਤ੍ਤੇਸੁ, ਮਤੋ ਅਟ੍ਠਙ੍ਗਿਕੋਤਿ ਹਿ;
ਏਵਂ ਤੁ ਸਬ੍ਬਚਿਤ੍ਤੇਸੁ, ਮਗ੍ਗਙ੍ਗਾਨਿ ਸਮੁਦ੍ਧਰੇ.
੧੨੪. ਬਲਾਨਿ ਦ੍ਵੇ ਦ੍ਵਿਚਿਤ੍ਤੇਸੁ, ਏਕਸ੍ਮਿਂ ਤੀਣਿ ਦੀਪਯੇ;
ਏਕਾਦਸਸੁ ਚਤ੍ਤਾਰਿ, ਛ ਦ੍ਵਾਦਸਸੁ ਨਿਦ੍ਦਿਸੇ.
੧੨੫. ਏਕੂਨਾਸੀਤਿਯਾ ਸਤ੍ਤ, ਸੋਲ਼ਸੇਵਾਬਲਾਨਿ ਤੁ;
ਚਿਤ੍ਤਮੇਵਂ ਤੁ ਵਿਞ੍ਞੇਯ੍ਯਂ, ਸਬਲਂ ਅਬਲਮ੍ਪਿ ਚ.
੧੨੬. ਝਾਨਙ੍ਗਮਗ੍ਗਙ੍ਗਬਲਿਨ੍ਦ੍ਰਿਯਾਨਿ,
ਚਿਤ੍ਤੇਸੁ ਜਾਯਨ੍ਤਿ ਹਿ ਯੇਸੁ ਯਾਨਿ;
ਮਯਾ ਸਮਾਸੇਨ ਸਮੁਦ੍ਧਰਿਤ੍ਵਾ,
ਵੁਤ੍ਤਾਨਿ ਸਬ੍ਬਾਨਿਪਿ ਤਾਨਿ ਤੇਸੁ.
ਇਤਿ ਅਭਿਧਮ੍ਮਾਵਤਾਰੇ ਚੇਤਸਿਕਵਿਭਾਗਨਿਦ੍ਦੇਸੋ ਨਾਮ
ਤਤਿਯੋ ਪਰਿਚ੍ਛੇਦੋ.